Lost Memories 1 Simple lang na pamumuhay ang mayroon si Ana Crisostomo. Nakatira siya kasama ang kanyang mga magulang sa isang malayong isla na matatagpuan sa Hilagang Luzon. Isang mangingisda lamang ang kanyang ama samantalang wala namang trabaho ang kanyang ina. Mahina kasi ang puso nito at ito'y hinihika rin. Magkokolehiyo na sana siya ngayong paparating na pasukan kaso wala siyang sapat na pera upang pag-aralin ang kanyang sarili. Plano sana niyang magtrabaho muna bago niya ipagpatuloy ang kanyang pag-aaral. Hindi naman kasi siya maaaring umasa sa ipon ng kanyang mga magulang dahil kailangan din ng mga ito ang perang iyon upang may maipambili ng gamot ang kanyang ina. Isang hapon, nagpunta sila ng kanyang ina sa may dalampasigan kasama ang mga asawa ng kapwa mangingisda ng kanyang ama. Balak sana kasi nilang salubungin ang mga ito mula sa buong araw na pamamalaot nang may napansin siyang kakaiba. Namataan niya ang bangka ng kanyang ama at nakita niyang parang hindi mapakali ang mga sakay nito. Nang makadaong ang bangka ay doon niya napansin ang lalaking pinagtutulungang buhatin ng kanyang ama at ng mga kapwa mangingisda nito. Duguan ito at walang malay. Mayroon din itong malaking sugat sa noo. Alam niyang hindi taga roon ang lalaking iyon sapagkat hindi pamilyar sa kanya ang mukha nito. Dinala ito sa ospital ng kanyang mga magulang upang magamot ang mga sugat nito. Nang magkamalay naman ang lalaki ay hindi ito nagsasalita at nakatingin lamang sa kanila na para bang wala sa kanyang sarili. Nagpasya ang kanyang mga magulang na kupkupin nalang muna ito hanggang sa maging maayos na ang lagay nito. Naging malaking palaispan sa kanya ang pagkakakilanlan sa lalaki. Taga saan ba ito at pano ito napadpad sa kanila? Anong nangyari rito bago ito makita ng kanyang ama? Sino nga ba ito?