jannat ke pattay...[Leaves Of Paradise]

part 63

DJ ki aankhein band ho rahi thi. Saari duniya andhere mein doob rahi thi.

Hospital ka woh corridor sard aur veeran tha. Sang-e-marmar ka farsh kisi murday ki tarah safaid tha. Safaid, be-jaan, thanda. Woh bilkul seedhi bethi thi. Sakht, jamid, seedh mein kisi ghair muree nuktay par nigahain markaz kiye uski aankhon se ansoo tut-tut kar gir rahe thay. Jab se DJ operation theatre mein thi, woh yunhi idhar bethi thi. On duty doctor ne kuch bataya tha ke Khadija ke brain mein berry aneurysm thi. Ek phooli hui aneurysm jo phat gayi thi. Sab arachnoid hemorrhage. Doctor ne kaha tha ke berry aneurysm phatne walay mareezon mein se 80 se 90% ki maut waqai ho jati hai. Kam se kam 10 umeed thi aur woh usi 10% umeed ko thamay bench par bethi thi.

Uska zehan bilkul muflog ho chuka tha, jaise bhari sel se sar ko kuchla gaya ho. Phir bhi usne kahin se himmat mujtama karke DJ ke ghar walon ko phone kar diya tha. Uske abu aur bhaiyon ki pareshani, maan ke ansoo, woh kuch nahi samjh pa rahi thi.

Uske abu tar ki anay ki koshish kar rahe hain aur uska bhai jo France mein muqeem tha, woh bhi raat tak pahunch jaye ga. Bas uski samajh mein yahi baat aayi thi. Bar bar koi na koi usay phone karta aur woh har baat ke jawab mein bhigi awaaz se itna hi keh pati.

"Mujhe nahi pata. Doctor bahar nahi aaye."

Ab woh yunhi nidhaal si bench par bethi thi. Ansoo lariyon ki soorat aankhon se gir rahe thay.

Das feesad ki umeed.

Usne god mein rakhe mobile ko dekha aur kapkapaate hathon se utha kar paigham likhne lagi. "Main first aid hospital mein hoon. DJ ko brain hemorrhage hua hai, tum foran aajao." Aur jihan ko bhej diya. Unke darmiyan agar koi talkhi thi bhi to usay yaad nahi thi. Agar yaad thi to sirf aur sirf Khadija.

Azaan ka waqt hua to woh uthi aur wazu kar ke waapas idhar aayi. Coat usne wahan bench par chhod diya aur ab neeli qameez ki aastein giley bazuon se neeche kar rahi thi. Chehra, haath, aur mathe se baal giley thay."Kya zindagi itni jaldi guzar jati hai?"

"Is se bhi jaldi guzar jati hai." Chand roz qabal ki do larkiyon ki guftagu usay yaad aayi thi. Woh salaam phir kar tashahud ki halat mein bethi thi. Uska chehra mukamal tor par bhiga hua tha aur yeh wazu ka paani nahi tha. Woh dono hathelayan milaye unhein dubdubai ankhon se dekh rahi thi.

"Meray Allah... " Woh be awaz ro rahi thi. "Aap ko pata hai, DJ meri best friend hai. Sab se achi dost. Zara, Arm, in sab se achi dost. Usay hum se mat chheenain. Uske maan baap... " Woh borhay hain, woh mar jayenge. Aap hamein aise mat aazmaayain. Aap hamein DJ wapas kar dein. Meri das feesad ki umeed ko haar na dein. Woh hatheliyon pe chehra jhukaye hue laraz rahi thi.

Shefoon ka neela do patta sir se phisal kar gardan ki peech tak ja gaya tha.

"Main bohot akeli hoon. Mere paas abhi koi nahi hai siwaye aap ke. Mere paas bajane ke liye koi ghanti nahi hai, khatkhatane ke liye koi darwaza nahi hai, hilane ke liye koi zanjeer nahi hai. Meri pehli umeed bhi aap hain, aakhri bhi aap hain. Agar aap ne meri madad na ki to koi bhi meri madad nahi kar sake ga. Agar aap ne cheen liya to koi de nahi sake ga aur agar aap de dein to koi rok nahi sake ga. Aap hamein DJ ki zindagi wapas louta dein. Main har woh kaam karun gi jo aap ko raazi kare aur raazi rakhe. Main aap ko kabhi naraz nahi karun gi. Aap DJ ko theek kar dein please."

Woh hathon mein chehra chhupa kar phoot phoot kar ro rahi thi. Woh zindagi mein kabhi itni akeli nahi hui thi, jitni aaj thi. Woh kabhi itni be bas, itni la chaar bhi nahi rahi thi, jitni is waqt thi.

Kitne ghante guzre, kitni ghariyan beeti, usay kuch yaad nahi tha. Bas and phir uthar ha tha, jab usne jihan ko tez tez qadmon se chalte apni taraf aate dekha.

Woh khari bhi nahi hui, bas beech yeh bethi girdan uthaye usay dekhe gayi."Tum ne mujhe pehle kyun nahi bataya? Ab kaisi hai woh? Hua kya tha?" Woh phooli saansoon ke darmiyan kehtay hue uske sath betha. Woh itna pareshan tha jitna woh.