jannat ke pattay...[Leaves Of Paradise]

part 80

Foran hi aagayi. Bohat aasan thi. "Aur kam az kam is ke liye use kisi falaasuf ke gadhon aur kutton wale aqwal zaroori nahi parhne pare thay."

Aaishay ki bhi samajh mein aagayi thi, magar yeh mujhe nahi batati.

"Theek karti hoon. Yeh tumhara tohfa hai aur tumhein khud nikalna hai. Tohfa khushi ke liye hota hai, agar tum ise khud bojh kar nikalo gi toh tumhein asli khushi hogi warna tod kar bhi nikal sakti ho," Aaishay ne kaha.

"Aaishay theek keh rahi hai, waise yeh pehliyan kaun likhta hai?"

"Abdul Rehman ke paas har kaam ke liye bohat se bande hote hain. Usne kisi se likhvai hogi," Bahare ne shane uchka kar kaha. Goya Abdul Rehman se bohat mohabbat aur aqeedat ke bawajood uska khayal tha ke woh usne khud nahi likhi thi. To phir shayad Dolly ne...

Bahare bohat maharat se safed phoolon ki ladi ko sabz tehni par lapet rahi thi. Yahan tak ke sabz rang, ek safed phooldar halqe mein tabdeel ho gaya to usne dono haathon se woh taaj haya ke sar par rakha.

"Bahare gul aur Aaishay gul ki taraf se!"

Usne muskuratay hue sar peh pehne taaj ko chhua. Meri mein aise taaj ba-kasrat milte thay magar un mein se koi bhi taaj itna khubsurat nahi tha. Koi taaj itna khubsurat ho bhi nahi sakta tha.

Bahare ab puzzle box aur soi dhaaga ehtiyaat se apni gulabi zanbil mein rakha kar Aaishay ke saath kaam karwane lagi. Usne bhi uthna chaaha, magar Aaishay ne rok diya.

"Tum mehman ho aur tumhari tabiyat bhi theek nahi hai. Jab theek ho jaye gi to karwalena."

Phir kaam khatam kar ke Bahare ne chatai bichaayi aur badi basket se paani ki bottle nikaal kar haya aur Aaishay ke haath dhoaye. Phir lunch boxes khol khol kar chatai pe rakhne lagi.

"Yeh tali hui machhli hai, yeh salad hai aur yeh murghabhi ka salan hai." Khana abhi tak garam tha aur uski khushboo bohat ishtehaangiz thi.

Usse yaad tha shuru shuru mein woh aur DJ Turk khane se kitni nafrat ho gayi thi magar chand hi roz baad unko turk khane se acha koi khana nahi lagta tha.Yun sunsaan jungle mein darakhton ke beech mein zameen pe bethay thandi ki do pehur mein woh us ka pehla khana tha. Istanbul ki chehal pehal aur hungama khiz zindagi se door ek tanha jazeera pe, jahan woh khud ko fitrat ke zyada qareeb mehsoos kar rahi thi.

Khana kha kar, cheezen samait kar woh lakdiyon ke chhote chhote gathe saroon pe uthaaye dhalan se utar kar wapas baghi tak aayin. Aaishay ne kulhaari, lakdiyan aur ozaar sandooq mein rakhe aur baghi ko wahi chhod kar doosri simt chal parin. Usne nahi poocha tha ke ab woh kider ja rahe hain. Woh khud ko in do behnon ke rahm o karam par chhod chuki thi. Phir bhi Aaishay khud se hi batane lagi.

"Ab hum saahil ki taraf ja rahe hain."

"Magar faida koi nahi hai." Us ke saath chalti Bahare ne zara khufgi se sargoshi ki. Woh jo dono pehluon se mixi zara utha kar chal rahi thi, zara chonki.

"Woh kyun?"

"Hum samandar par seep chhonne ja rahe hain, magar koi faida nahi hai. Mere kisi seep se moti nahi nikalta aur Aaishay ke har seep se moti nikalta hai."

"Abdul Rehman kehta hai Aaishay ke seep se moti is liye nikalte hain ke woh hamesha sach bolti hai."

"Nahi, yeh koi paimana nahi hai. Bahare ke seep se moti is liye nahi nikalte ke Bahare hamesha Allah se bura guman rakhti hai. Jis din Bahare achha guman rakhe gi, us din moti nikal aayenge aur ek dafa to moti nikla bhi tha." Aage chalti Aaishay ne gerdan moday baghair kaha. Us ki aakhri baat par haya ne sawaliya nigahon se Bahare ko dekha to Bahare ne asbaat mein gerdan hila di.

"Haan... bas ek hi dafa moti nikla tha, safed moti aur woh bohat khubsurat tha. Main ne woh Abdul Rehman ko gift kar diya."

"Woh us ka kya kare ga? Tum apne paas rakhti na?"