jannat ke pattay...[Leaves Of Paradise]

part 109

Woh num aankhon se sar haathon mein diye sunati rahi. Usay Roohail ya us ki biwi mein koi dilchaspi nah thi. Usay sirf Aba ki fikr thi. Dhai mah qabal ka waqia phir dohraaya jaane laga tha kiya? Woh phir alaamati khushboo mein ek mohabbat ko khoonay lagti thi kya?

Jab bimushkil unhein Aba se milne ki ejazat mili, tab woh ghundogi mein the aur woh unke qareeb baithi andar hi andar ro rahi thi. Aankhein khushk ho chuki thi, magar har aansu aankh se to nahi girta na. Shayad agar Aba ke dost Zeeshan uncle milne nah aaye hote to woh aankhon se bhi rone lag jaati, magar un sab ke samne khud ko mazboot zahir karna tha.

Fatima ndhaal thi, magar Sabreen phupho bohot himmat se kaam le rahi thi.

Sulaiman bohot mazboot hai beta! Fikr nah karo, woh theek ho jaye ga.

Zeeshan uncle ko chhodne woh Fatima ke saath bahar tak aayi to woh tasalli dene lage.

Woh Aba ke sab se achhe dost the. Woh unko zyada nahi jaante thi, magar Fatima waqif thi. Un ke saath un ki beti bhi thi, pandrah solah saal ki Raja jo jo qad aur zehni tor par apni umr se peechay thi. Qadray abnarmal bachi jo ghunghralay baalon wala sir jhukaye musalsal akhbar pe qalam se kuchh likhti rahi thi.

Raja bohot zehni hai. Us ki nigaahon ko apni beti par pa kar Zeeshan uncle muskurakar batane lage. Usay word puzzle aur crossword khelne ka bohot shoq hai. Pura chart hal karne mein kayi din lagti hai, magar kar leti hai.

Woh pheeki si muskurahat ke saath sunati rahi. Woh apni beti ko hamesha apne saath rakhte thi, chahe ghar ho ya office, mohabbat thi ya fikr ya phir dono.

Un ke jaane ke baad woh kuchh der ke liye ghar aayi thi. Ghar pe wehshat aur veerani chhaayi thi. Jaise sab kuchh tham gaya ho. Woh abhi abaya utar hi rahi thi ke phone bajne laga. Private number calling.

Is roz ke baad Major Ahmed ne aaj call ki thi, magar usne call kaat di. Woh baar baar phone karne laga, magar Haya phone band kar diya. Woh us aadmi se koi rabta nah rakhna chahti thi. Zaroorat hi nahi thi.

Aba abhi hospital mein the. Aaj Sabreen phupho aur Fatima un ke paas thi, so woh aur jihan ghar pe the. Woh shaam ka waqt tha, magar roshni baqi thi. Haya chhat par mandir ke saath lage jhoole par baithi Aba ke gomlon ko dekh rahi thi. Aaj un pe saaye nahin gir rahe the. Magar woh phir bhi mar jhaaye hue lag rahe the. Un ka is ghar mein khayal rakhne wala jo tha, woh ab khayal rakhne ki position mein nahin raha tha. Usne bohot se aansu apne andar taare. Aba ke poday akelay ho gaye the.Kaisi ho? Jihan hole se us ke saath aakar baitha.

Tumhare samne hoon. Tum ne khana kha liya?

Haan! Noor Banu ne khanna le aayi thi. Aur tum ne?

Mood nahi hai. Woh abhi tak gomlon ko dekh rahi thi.

Woh use sarzanish karne hi laga, magar ruk gaya. Mandir ke suraakh se use jaise kuchh nazar aaya tha.

Suno! Yeh aadmi kaun hai?

Kaun? Haya ne zara chonk kar gardan pheri. Mandir ke suraakh se Taaya ke laan ka manzar wazeh tha. Woh apne driveway par khade ek sahib ke saath baatein kar rahe the, jo siyah suit mein malboos, brief case haath mein liye hue the. Woh unhein nahin pehchanti thi.

Pata nahi. Usne la ta'alluqi se shaney achkaaye.

Mir Akhyal hai, woh wakeel hai.

Tumhein kaise pata? Us ke suit ka rang to simple black hai, lawyers wala to nahi hai.

Magar tie dekho, jet black hai. Wakeel ki makhsoos tie. Woh aankhon ki patliyan skered un ko dekhte hue keh raha tha. Aur Mir Akhyal hai, woh abhi idhar aane ka irada rakhte hain. Haya ne zara hairat se use dekha.

Woh apne driveway pe khade hain, tumhein kaise pata ke un ka irada kya hai?

Ghor se dekho! Farqan mamoon ke jooton ka rukh kiss taraf hai?