رواحل .و. أفتداء

ح ١٧

هو بعد كيف بالزايد من ختلت بصدره...
خبث ويايه خباثه حلوه،،وللمره ثانيه بس ما وصلني وهلمره طول أكثر بالاحظان والبوسات وأرتاح بحظني...وإني بقيت مستغربه ومااعرف شنو يصير وياه...قبل شويه ما جنت واعيه...خفت عليه وسألته
بقى يضحك وكالي:-تعودي منا وغادي على هذا اللعب...ولعبنه يتحول للثكيل .

ما أحس نفسي الا غافيه بحظنه...
وهو حاظني بقوه ضامني بين ظلوعه.

فزيت بهوسه وما واعيه على روحي
الباب دكت بقوه...
وصوت خالتي تصيح :-ووول يوسف فدوه وين.....
أوليدك نط من الصريخ...
ول يمه آلدنيآ ليل حرمتك وخالتك وين مشن...

يوسف فز على كمزتي...وانتبه على صوت خالتي
جاوبها :- يمه هاي فدوه يمي
خالتي ما نعرف بيها وين مشت...

بقيت أتلفت أدور على دشداشتي
الاستقبال أظلم...ومضوي بس التلفزيون
الدنيآ ليل...والوكت رايح عليه

هو كام شعل الضوه...اباوع للساعه بصدمه
يمه شبينه موته خو ما موته...شكد نايمين
متعدي حتى اذان المغرب.

كمت لبست هدومي...ولملمت كفشتي
وهو ساعدني لملم فراشه وسفطة...

كتله :حباب أطلع كبلي استحى من أمي وخالتي

ضحك وكال :- ول تلكيهن هساع منشعات من الفرحه
ووحدتهن طارت من الفرح...
مو يردن نتواصل هل تمت أمنيتهن...
أمشي نطلع سوه عليش مستحيه لا عيب ولا حرام...

هو فتح الباب وطلع كبلي،،، وإني طلعت وراه...
وخالتي مبتليه بحمودي تسكته يتنعوص ويبجي..
صفنت علينه ومن وحدها ضحكت وكالت :- مبارك عليكم يمه عساكم بسبع بخوت وسبع سعادات

يوسف راح عليها باسها على رأسها
واخذ حمودي منها...وخله نيشاني بيدها
هي ضحكت بفرح أكثر وكالت :- وول عيب من النبي
جان هساع هلهلت بس لآزم احشم مصاب وليده

اشرتلي رحت عليها بوستني ودعتلي بالخير والفرح

سألتها على أمي شو ماكو لا بالفسحة ولا بالهول
كالت :- غفيت شويه،،،ومن كعدت ما لكيتها
حسبالي طالعات انتي وياها...

يوسف شايل حمودي ويفتر حتى يسكته
وصل لباب المطبخ وأشرلي تعاي...
رحت واشوف امي متمدد مناك بصف الكاونتر ونايمه
يمه إسم الله خفت عليها...
رحت كعدتها وصفنت بحالها...شبيها أمي...؟؟؟
وليش غافيه هنا....؟؟؟

كعدت وظلت عينها عليه وعلى يوسف
هو سألها :- خيرج خالتي عليش هين نايمه
صايرلج شي....؟؟؟

هي كالتله :-سلامتك يمه بس شويه ضغطي صاعد
وجنت كاعده بالمنور على بروده الجو
واجيت غفيت هنا شويه.

خالتي صاحت عليها من مكانها :- ووووول أمونه
وينج...تعاي هين خل أفهم منج شبلاج...

هي كامت وكالت :- والله ما بيه شي شبيكم
شو خاله أنطيني أحميد شبي معصول ويبجي
لك غليص شبيك معصول...؟؟؟