- اصلي واكطعها مو منتظمة صلاتي .
- دصلي على ما اجيب ريوك واجي
- هم تمر على اهلك ؟
- امرلهم ب٦ شعدي متحلم بيهم غابشلهم ، اجيب ريوك وصمون واجي .
- خوش لعد راح اسوي الجاي .
- ديلا ابويه ، كملي واني هسه اجي .
طلع شغلت التلفزيون على قناة الانوار مطلعين دعاء العهد ، ورحت توضيت وصليت ، ولميت سجادتي .. حطيت القوري على نار هادئة ومسحت البيت ، هو نظيف ، بس ارتاح نفسيا من احسه ممسوح وريحة الزاهي والعطور بيه .
طب هو بيده ماعون كيمر عرب و ماعون كاهي وعلاكة صمون حار .. اخذتهن من ايده : صليتي
ضحكت : شنو رايد ادخلني الجنة شو هواي مركز وياي ع الصلاة
- لا انتظمي بصلاتج احسن عندج جهال
سويت الصينية وكعدنا اني وياه نتريك ونسولف ونضحك .. للحظة واحنا بعز ضحكنا تذكرت شلون هو جان حماي ومثل اخوي وصار رجلي واحبه ويحبني .. بساع خطر على بالي حمزة .. تنهدت .
غمزلي وهز راسه بمعنى ( شبيج )
- حمزة ما يتضايق بكبره ع الديصير بيناتنا ؟
- وشصاير؟ غير مرتي !
- ما تعتبر خيانة
- الخيانة لما تخونينة وتشوفين غيره وهو بالحياة ، بس هو وينه هسه .
- هو سواها على زمانه وشاف غيري .. بس ما ادري
- لا تحطين هالامور ابالج ولا تقارنين ولا تجيبين هالاحساس .. شنو جنتم وشصرتوا ؟ ما يتضايق من تبهذلتوا وراه ، يتضايق من منسعدين وعايشين براحة .
- صدك عشنا براحة
ابتسمتله : الله يخليك النا ان شاءالله
- حبيبتي فدوة الوجهج
- صدك اني حبيبتك
- وليش مو حبيبتي
غمزلي وهو يوحيلي لشي ثاني ، ضحكت : لا يعني الكلب يحب وحدة .. فاني حبيبتك لو منو
- سوالفج ما اجوزين منها انت .. لج بابا لا تقارنين ولا تحطين روحج بميزان ويا احد .
- وليش متجاوب
- سؤال ميتجاوب عليه
- ليش ؟
- اذا سألتج تحبين اي واحد من ولدج راح تجاوبين ؟ لو كتلج ياهي من خواتج تحبينها اكثر ، راح تجاوبين ؟
كلهم تحبينهم بس كل واحد اله مكانته بكلبج تختلف عن الثاني فلا تقارنين .
- جواب مقنع ، بس احنا الحجية كواغد مرت ابوي تكول اليحبجن يطيح بشباجن
- ليش
- ما ادري ، ننحب ، واليحبنا ييميزنا
ضحك : من هاي الشيخ العشيرة عاشك اختج وهي مدعبلة كوة تكوم
الحلقة ١٥
ابدأ من البداية
