زين >> قاعد جوا يلبس وطالع
ليث >> تم
مشى ليث لقا هارون طالع
هارون>> حجزت ؟
ليث رفعله التذكره
هارون>> متأكد ؟
ليث>> مانقدرش نقعد لاني ح نخرب الدنيا اكثر من هكي
هارون >> وكم ح تغيب
ليث>> لحد ما نحس روحي قادر نرد
هارون >> تم
ليث>> وين ماشي
هارون>> بنشوف ثابت
ليث >> وشنجوك انت
هارون>> مافيش جديد
ركب ليث وطلع هارون مر من جنب وزين وجوري بدون ما يبحت فيهن
جوري >> شنصار ؟
زين >> تعاركنا امس وما حكينش اليوم
جوري>> مش ح تعقلي ؟
زين >> مش قادره نشوفه الهيرو كيف ما انتو تشوفو فيه ... انا نحق فيه هارون ولد الحاج محمد اللي خش حياتي وقلبها فوقي لوطي و من بنت فالثانوي لمدام مش فاهمه شي 🙂
جوري >> تحسابيني مش حاسه بيكي ؟ انا مخليه انه هارون عمي وحاطته ع جنب و نشوف فالقصة من ناحية ثانيه وحاسه بشعورك .. بس انا نحكي عشانك ... يعني لما تقعدو كل يوم حرق اعصاب لا انتي تريحي ولا هوا .. ف قربي منه تعرفي عليه بلكي تحبيه ياستي حتي لو ما حبيتيش بلكي اتعودي عليه
زين >> حاسه روحي وحيده بكل 😔 مش متريحه والله ومش عارفه وين ماشية
جوري >> كلنا جنبك و الهيرو مدامك معاه اطمني
زين >> خليني نخش نكلم روان حتي هي مسكينه همها هم
//
//
عند روان
اللي كانت تفكر في حياتها اللي بين يوم وليله انقلبت كانت في منطقة وجت المنطقة ووقفت قرايتها ومش عارفه كيف بتبدا ... كانت ماسكه كباية القهوة و مقعمزه فالمطبخ وسرحانه .. علي خشت بسام
بسام >>صباح الخير
روان >> صباح النور
بسام >> وين سرحانه
روان ابتسمت >>والله مانندري كل مره في مكان
بسام >> عمتي وسلوى وين ؟
روان >> طلعن للمنور يغسلن فالفرش
بسام>> يحبن يجيبن الروحهن تعب
روان>> بكللل هربت منهن هروب
حط بسام فنجانه وقعمز فالكرسي لي مقابلها >> شن ح ديري في قرايتك
روان>> مشعارفة مش مفكره في قرايه بكل نحس فروحي دماغي موقف
بسام >> ماتفكريش بلكي بعد يبعدو فتره يهدو شويه وكل شي يرد
روان >> تصدق لو نقولك هكي اريح ؟
بسام>> كيف يعني
روان >> انه قعدتهم في نفس الحوش متعبتلي نفسيتي انوض علي مشكله كبيره ونرقد علي مشكله اكبر ... تخيل فيه بنت تخاف لما يخش باتها للحوش ؟
اول ما يخش نحس انه فيه مشكله ح تصير نقعد نتمناه يطول برا و لا مايجيش اصلا اول مايجي يبدا شغل النكد وماما تتحمل مره و تهزب مره ويعلى الصوت مره و عالحال هضا ... اخر سنتين الوضع قعد سيء لدرجة الجيران يدقو عليهم عشان صوتهم عالي
"سكتت روان ومعش قدرت تكمل"
أنت تقرأ
بين الاجبار و الوَجد 💚
Mystery / Thrillerهذه المرّة كبارًا نعرف أن خطوةً في الدربِ الخاطئ تكلّف عمرًا!💚.
