في نهاية السبعينات بعنا بيتنا الصغير واشترينا بيت اكبر بمنطقه ثانيه كان هناك جار غني والغني هو الله مقاول وهو سيد من نسل رسول الله عليه افضل الصلاة واتم التسليم اما باقي الدربونه او الحي اغلبهم موظفين بسطاء والدي مثلا كان موظف بسيط جدا وكنا عائله كبيره حالتنا الماديه وسط بس الحمدلله ربونا اهلنا على القناعه والحلال والحرام
جارنا الغني والغني هو الله كان بيته من افخم البيوت مغلف حجر حلان وكل بيته مرمر وعدهم بانيو وحديقه بيها اشجار وعدهم تلفزيون ملون وثلاجه ومجمده واثاثهم درجه اولى وكان يعمل ولايم او عزائم مره جاب سمجه تقريبا طولها اكثر من متر اما احنا والدي جان مشتري شوايه من الاورزدي غازيه كل شهر يشتري خروف وكل جمعه ينصبها بالحديقه يسويلنا تكه وبيتنا عكاده وملبوخ واثاثنا بسيط تلفزيونا ابيض واسود بس عايشين بسعاده كل شهر والدي ياخذني للوكيل بالدربون الورانه اخذ عربانه مال عماله انقل السكر والتمن وباقي المواد بالعربانه لبيتنه من يشتري تفاح لو موز يشتري والدي بالكيلو ونخليه بالثلاجه اي فرد يشتهي ياكل ودائما كان تبقى الفواكه وتتعفن تلمها والدتي بكيس اذبه للزباله جيرانا السيد ايضا كان يتسوك بكميات اكبر بس اطفاله سبحان الله اذا يشوفون بيد اي شخص مثلا تفاحه يطلبون منه احنا علمونا اهلنا عيب نطلب ومناخذ من احد كنت استغرب واني طفل ليش هيج همه ماعدهم كرامه وعزة نفس
ولد وبنات السيد طلعو من الطريق سبحان الله مع العلم ابوهم وامهم يصلون ويصومون
اني جنت كلش استغرب ليش هيج عبالك مشايفين شي بعمرهم كبرنا وافترقنا محد بيهم كمل دراسه كملت اني علوم فنيه عسكريه يعني تخرجت ضابط مهندس بعد الاحتلال مرجعت للجيش بديت ادور على عمل التقيت بالسيد كان ماخذ مقاوله كال ليش متشتغل ويايه وتستفاد وافقت وانطاني مقاوله حسبت كرسته وعمل مالتها يطلعلي ربح خلال اسبوعين ٣ ملايين دينار مبلغ كلش حلو حسبت شغلي على التندر مال المقاوله بدون تلاعب بمواد الشغل او غش وبديت انفذ المقاوله كانت عباره عن اغطيه كونكريتيه للمجاري وكان مواصفات شيش التسليح السمنت ونوع الحصى والرمل محدد بالتندر للمقاوله وبديت انفذ المطلوب مر عليا السيد شافني كاعد اشتغل بده يحجي بعصبيه ويغلط من باب الميانه لان هو بعمر والدي الله يرحمهم اثنينهم لان السيد هم توفى وعشرة عمر كال عليا لاتظل غبي جاوبته ليش سيد شنو الغلط بشغلي جرني بصفحه وكال ليش مستخدم هيج شيش وهيج سمنت ورمل وحصو كتله مذكور بالتندر هاي المواصفات جاوبني ولك لاتظل غبي اشتغل بشيش اقل سمك وسمنت عادي مو مقاوم وحصو عادي مو مكسر حتى يفرقلك بالفلوس اكثر جاوبته سيد اني ربحي ٣ ملايين وحلال ليش اكل حرام واحرم فلوسي الحرام
ذاك اليوم عرفت سبب انحراف وضياع بناته ولده السبب الفلوس الحرام اياكم توكلون ولدكم فلوس حرام اقسم بالله دينار حلال يسوه ملايين الحرام وراح تطلع باطفالكم لاتكولون الرشوه هديه الرسول عليه الصلاة والسلام قال لعن الله الراشي والمرتشي اطفالكم امانه باعناقكم خصوصا الموظفين لاتحلل ماحرم الله اني مجبور اخذ الراتب ميكفي تعرف ليش ميكفيك لان تاخذ فلوس الحرام تمحي البركه اذا تكعد اثناء الدوام وتتقاعس عن شغلك هذا وكلت جهالك حرام اذا استخدمت السياره الحكوميه لاغراضك الشخصيه وكلت جهالك حرام المرور اذا اخذت فلس من سايق وكلت هالك حرام شنو فايده تربي جهالك ويضيعون منك
ارجو من الجميع ان اسمع رائيهم وارسال قصصهم الي بيها عبر ومواعض لنشرها لنستفاد
ماريد احجيلكم عن اولاد وبنات السيد شلون انحرفو وضاعو المهم العبره وفلوس السيد كلهن راحن بعد وفاته اذكركم فلوس المي للمي وفلوس اللبن للبن
تقبل الله صيامكم وقيامكم وغدا ان شاء الله مع قصه جديده بيها عبره وموعضه
لاتنسون لايك ومتابعه احبتي
