دياجير الغرام

البارت العاشر

نزلت عيوني و صفنت ما كدرت ارد عليها ما عندي شي اگولة انا مستغربة منهم و من قرارهم المفاجئ

-زمهرير

رفعت عيوني الها

-اكو واحد بالج ؟ تعرفين واحد ؟
صفنت شنو اگلها ، اگلها واحد شفتة و انا طفلة و اختفى ما ادري وين راح و هل هو حقيقة لو لا ؟ عايش لو ميت ؟

هزيت راسي بلا

-چا ليش ترفضين ؟ الولد شفتي منه شي ؟

-لا خالة بس ...
و سكتت

-گولي يمه

اخذتني الصفنة و انا افكر ، انا شمنتظرة ؟ وهم ، طفولة ، خيال ، منو هو ؟ ما اله جنسية لا هوية لا اسم منو هذا ؟ ليش حبيته و منو هو حتى ؟ طفل مشرد انا سويتلة اسم و شكل منو هو ؟

گمت من مكاني و رحت لغرفة عمو اديب لگيته يخابر بابا
-اديب : ها عمي بيج شي ؟ محتاجة شي ؟

مديت ايدي و اطلب التلفون من عمو حطا بأيدي و طلع
سمعت صوت ابوي التعبان ، صوتة المنكسر بي مثل الغصة

-مصعب : اديب ولك وين صرت هاي بنيتي ؟ شتريد منك بروح الحجي ما تقصر عليها اي شي تريدة جيبة الها

نزلت دموعي الي حابستهم و انا اسمع صوتة ، هذا الرجال الي احتمي بحضنة هذا هو الي كل ما حسيت بفرح و حزن اروحلة ، قوة و ضعف يمه صوتة هزني ما كدرت اكابر اكثر

گلت اسمه و شهكت
-بابا

حسيته تنفس نفس قوي و گال
-بنيتي زمهرير شلونج

دموعي تنزل و احجي ويا
-مو زينة بابا مو زينة

-ليش بوية هيج تسوين ليش ؟ هيج هين انا عندج ؟

-انا سويت لو انت بابا ؟ ليش تجبرني على شي ما اريد ؟ ليش تكسرني ؟ بيه نقص ؟ اذا نا....

قطع كلامي
-اكص لسانة الي يگلج ناقصة يابة انتي كاملة ما بيج نقص بس هذا نصيبج و صدكيني مستحيل اكسرج ولج انا عشت عمري ابني بيج هسه اكسرج ؟ شبية مخبل ؟

-لعد لا تسوي بيه هيج فدوة ، لا تأذيني هيج بابا جاي اموت انا والله ما اعرف شسوي جاي تأذيني ، دوم جنت متأكدة انت تحميني من الاذة هسه صرت اذيتي ؟

سكت فترة و رجع حچة بصوت قوي راح صوتة الحنين
-اسمعي زمهرير انا قررت و اتخذت قراري و خلص كلمتي ما تصير اثنين اليوم يجن النسوان و هسه اركان جاي ياخذج كلمة وحدة ما تحجين حرف ما اسمعلج تطلعين مثل الحبابة احسن ما اطلعج جبر و تعرفين اسويها