ليس ذنبي

البارت (12) الجزء الثاني

حاولت اصحيها بس ماكو فايدة وعرفتها فاقدة الوعي بسبب الخوف وشفت ماكو حل شلتها اخذتها للسيارة وقيس حط الولد بسيارتهم ورجعنا للبيت

خلوني احجيلكم عني شوية

وياكم اوس ضابط بالاستخبارات والابن الجبير للشيخ عيدان طولي 190 وزني 90 عمري 29 سنة متزوج وبسبب الخلافات الزايدة عن حدها طلكت

عائلتي متكونة من

الاب عيدان العمر 60 سنة لان تأخر لحد ما تزوج
الام نهلة العمر 49 سنة

الاخوان
قيس عمرو 25 سنة متزوج قبل سنة وبعد ما صارلو جهال
زوجتو اسمها دعاء عمرها 20

الاخ الاصغر ذيب عمرو 20 سنة بعدو ما متزوج

الاخوات

سحر عمرها 23 متزوجة ابن عمي وعدها طفل واحد عمرو سنتين

سمر دلوعة البيت واخر العنكود عمرها 19 سنة بعدها مو متزوجة

خلي نرجع للقصة قبل ما نوصل خابرت ابوي كلتلو جيب عمامي وانتظرونا بالمضيف واستغرب لان الدنيا بعدها صبح كلتلو من نوصل افهمك

السبب الي خلاني اطلب عمامي علمود اذا الولد عندهم عشيرة ويريدون ياخذون حقهم يكونون عمامي شاهدين على كلشي ويعرفون شلون يتصرفون

من وصلنا استغربو بعد اكثر من السيارة الي صاعد بيها قيس صحت ذيب كلتلو ساعد قيس ورجعت عالبنت بعدها فاقدة الوعي

جنت محتار شلون انزلها كدام عمامي ولازم اعرف قصتها قبل ما ادخلها لبيتي تعرفون انتو سوالف العشاير اي غلط صغير توكع نفسك بمصيبة ما تنحل

انتبهتلها لابسة خمار بس مرفوع عن وجهها سحبتو غطيت وجهها وشلتها اخذتها للمضيف وابوي وعمامي انخبصو لان ما يعرفون شنو صاير ومنو ذول

كلتلهم ذول الجلاب يريد يغتصبون البنت هاي ومن سألتهم يكلولي بنتنا وجابت العار للعشيرة ونريد نغسل عارنا بايدنا ذيب كعدهم وصب عليهم ماي وكعدو

عيدان .. منو انتو وشجابكم على كاعنا

اياد .. فكونا شدخلكم بينا

قيس .. انجب ولك لا تخليني اهينك وتعلم شلون تحجي ويا الشيخ

اياد .. كلتلكم هاي اختنا وجابت العار لعشيرتنا واذا منعتونا نغسل عارنا ما راح يصير خير

عيدان .. منو عشيرتكم

اياد .. ممنوع احجي

اوس .. قيس انطيني هوياتهم

انتبهتلهم صارت وجوهم صفر والثاني مادري ليش ما يحجي طلع هوياتهم باوعت لاسمائهم وعرفت انهم لا اخوان ولا ولد عم باوعت للثاني كلتلو احجي انت

حسان .. شحجي

اوس .. منو انتو وشعندكم بكاعنا واذا حجيت مثل هالحيوان الي وياكم ادوس على راسكم ثنينكم