ထိုသို့ဖြင့် ဖြေးညှင်းစွာ ဖုန်းရှိရာသို့ လျှောက်သွားနေရသည်။ ဖုန်းဆီသို့ ရောက်မည့်ဆဲဆဲတွင် သွေးရည်များသည် တဖြေးဖြေးနှင့် တိုးလာသည်ကို ခံစားရသည်။ ခနကတော့ ဒူးလောက်ပင် ရှိသေးပေမယ့် ခုတော့ ခါးထိကို ရောက်နေပြီဖြစ်ပါသည်။ မှိုင်းလျှံ အနောက်သို့ ပြန်လှည့်ကြည့်မိရသည်။ သွေးရည်များသည် မိမိခါးအထိ ရောက်နေပြီဆိုပါလျှင် ကုတင်ပေါ်တွင် လှဲလျောင်းနေသော အချစ်သည် မည်သို့ ဖြစ်သွားမည်နည်း။ သွေးရည်တွေထဲ နစ်မွှန်းနေမည်လား။ မှိုင်းလျှံ လှည့်ကြည့်မိတော့ ကုတင်ဟာ နစ်မြှုပ်နေပြီဖြစ်သည်။ မှိုင်းလျှံ ခေါင်းကြီးချင်သွားသည်။ အသက်ကိုတောင် မနည်းလုရှူနေရသည့် သူ့ချစ်သူဟာ သွေးရည်တွေအောက် ရောက်သွားပြီတဲ့လား။
ထို့ကြောင့် မှိုင်းလျှံ နံရံက ဖုန်းဆီ ဆက်မသွားနိုင်ဘဲ သွေးရည်များအောက် ငုပ်ချပစ်လိုက်ရသည်။ သူ့ဘဝတွင် တစ်ခါမှားပြီးသားအရာတစ်ခုကို ဆက်လက်မှားယွင်းဖို့ ခွင့်မပြုနိုင်သည့်အတွက်ကြောင့်သာ ဖြစ်သည်။ နောက်ပြီး ထိုလူသားသည် သူ့အသက်မက ချစ်မြတ်နိုးရမှန်း သိသွားသည့်အခါမှာ အဲ့ဒီလူသားသာ အရေးကြီးတော့ကြောင်းကို သဘောပေါက်လာခဲ့ရတော့သည်။
သို့သော် နီရဲတောက်နေသည့် မိမိခါးလောက်ပင်ရှိသည့် သွေးရည်တွေအောက်တွင် မိမိ၏ ချစ်ရပါသော စာရေးဆရာလေးကို မတွေ့ခဲ့ရပါ။ သွေးရည်ထဲတွင် လူနာကုတင်ကို တွေ့ရသည်။ ကုတင်ပေါ်တွင်တော့ အချစ်ကို မတွေ့ရပေ။ အချစ် မင်း ဘယ်ရောက်သွားတာလဲကွာ။ မှိုင်းလျှံ သွေးရည်ထဲတွင် ကူးခတ်ကာ ရှာနေဆဲဖြစ်သည်။ ကုတင်၏ ပတ်ပတ်လည်ကိုလည်း နှံ့နေပြီဖြစ်သည်။ ကုတင်အောက်ကိုတော့ မကြည့်ရသေးဘူးဖြစ်သည်။ ကုတင်အောက်သို့ ဖြေးညှင်းစွာ ငုံ့ကြည့်ရသည်။ မရှိခဲ့ပါ။ ထို့ကြောင့် သွေးရည်တွေထဲကနေ အပေါ်သို့ အသက်ရှူရန် ကြိုးစားရပြန်သည်။
ဖြေးညှင်းနေသည့် လှုပ်ရှားမှုတွေကို မှိုင်းလျှံတစ်ယောက် စိတ်မရှည် ဖြစ်နေရသည်။ သွေးရည်ထဲက ထွက်ခါနီး လေဟာနယ်ထဲ ရောက်တော့မည့်ဆဲဆဲတွင် သူ့ခြေထောက်ကို တစ်ယောက်ယောက်က ဆွဲထားသလို ခံစားနေရသည်။ သွေးရည်တွေကလည်း ထပ်ပြီး များလာသလို ခံစားနေရသည်။ ထူးဆန်းသည်။ အထူးဆန်းဆုံးက အခန်းထဲသို့ မည်သူမျှ လာမကြည့်ကြခြင်းပင်ဖြစ်သည်။ အခန်းထဲကသွေးရည်တွေကလည်း အပြင်ဘက်သို့ စိမ့်ထွက်ခြင်း မရှိနေပေ။ ဘာတွေလဲ။ ဘာတွေဖြစ်ကုန်တာလဲ။ အိပ်မက်မက်နေတာလား။ မဟုတ်နိုင်ပါဘူး။ ခြေထောက်ကို ဆုပ်ကိုင်ထားတဲ့လက်တွေကိုလည်း ခံစားလို့ရနေတာပဲ။
YOU ARE READING
ကြွေ (Complete)
General Fictionတိုက်ပေါ်က ခုန်ချသတ်သေသွားတဲ့ကောင်လေးတစ်ယောက်အကြောင်းဖြစ်ပါတယ်။ ကိုမာဝင်သွားတဲ့ ကောင်လေးတစ်ယောက်အကြောင်းပေါ့။ အဲ့ဒီကောင်လေးရဲ့ အချစ်ရေးကတော့ အဓိကပေါ့ ဘာကြောင့် သတ်သေရလောက်တဲ့အထိ ဖြစ်သွားရတာများလဲ နောက်တစ်ယောက်ကတော့ ရည်းစားတွေ...
အပိုင်း (၇)
Start from the beginning