شدني يلي اسمه محمود : هي تحرك قدامي " دفني ومشيت قدامه كان هالمرة مكان كانه مهجور حيوط منجرة ومخربقه برصاص وممرات ضيقه
نزل بيا من الدروج يلي كان ف نهايتهم واحد واقف
محمود: هيا افتح الباب يامحمد "فتح الباب وخشينا للممر الضيق المظلم وفيه بعض الحجر واضح انهم سجون وكان يمشي قدامي يلي اسمه محمد وورايا محمود لين اخر الممر ع جيهه الايسار وفتح باب الحديد وكانت غرفه ضيييقة يادوب يقعمز فيها نفر واحد
محمود " حل ايديا : تفضل مش من مقامك لكن تكفي بالغرض
" دفني القدام وصكر الباب وفتح الفتحه الصغيرة يلي ف الباب " نسمع حسك ببكون اخر حس ليك ف هالحياة
"صكر الفتحه وسمعت صوته وهو يوصي ف الشاب محمد ان ماحد يقرب من هنا وصوتهم بدا يبتعد
قعمزت ف ركن الدار يلي يادوب سدتني ولو نمد رجلي توصل للحيط يلي مقابلني ...
هذا حبس قديم واضح زعمه ف اي بلاد واي ارض تو انا ؟؟؟؟
لا اله الا الله اني كنت من الظالمين
يارب رحمتك بيا
يارب الطف بحالي ونجيني من القوم الظالمين
يارب
يارب
يارب
شفت لساعة سالم الله يرحمه يلي حاسها انها ونسي ف هالمكان الموحش
تفكرت اني ماصليتش لا الفجر ولا الظهر يلي كيف اذن ع حسب الساعة وقفت وطقيت ع الباب : هييي نبي نتوضا وينكم .. هييي نبي نتوضأ ونصلي افتحولي
" قعدت نضبح هلبا ولا من مجيب تقول المكان مهجور .. ياربي كيف ندير بتفوتني الصلاة كيف ندير .. شفت تراب ف حاجية الغرفه قربت منه : يارب سامحني كان هالتراب مش طاهر يارب مانقدرش نأجل صلاتي " تيممت بيه وانا ندعي لله انه يقبل صلاتي .. كبرت وصليت وطولت ف السجود وانا ندعي ربي يفك كربتي .. بعد كملت قعمزت واتكيت ع الحيط وانا نسبح ونستغفر وندعي. .. وفات يومي هكا لين الليل ..
وقت افتح الباب ووقف عليه محمود : نوض اوقف
وقفت
محمود : تعال ورايا
قلتله: معليش نبي نستعمل الحمام
محمود" بهزوة: هو انت لتو مادرتهاش ع روحك مسموحلك عادي هههه
تنهدت: نبي حتى نتوضا لصلاة لعشاء باقي صلواتي ربي يقبلها تيممت بالتراب ان شاء الله غير يكون طاهر
محمود" سكت وشافلي وقعد فترة ساكت : به تعال " رفعني للحمام ووقف قدتم الباب: جو الافلام يلي عايشها ف مخيلتك وانك بتهرب من روشن الحمام الغيها لان الروشن بعد ثلاثة ميترو فوق واصلا ضيق مايدخلش حتى راسك هههه
معاذ: مش هارب ولا عندي وين بنهرب مسلم امري لله
محمود: خف روحك بلا دوة زايده
توضيت وطلعت نسفي ف اكمامي : معليش نبي جيهه القبلة
محمود" بهزوة: وبكري كيف صليت امالا
الحلقة الســـــــــابعة
ابدأ من البداية
