🌹هن القوارير🌹 (في طور التنزيل )

part140

بقات راضية ومحمد غير كيشوفو فيهم مالهم داخلين بهاد العجاجة وعلاش دخلو فهاد الموضوع نيشان
رضا: فين نسرين وراحة؟
راضية: طلعو للحمام البلدي لي فالسطاح يعومو.. الله يرضي عليهم كسلوني انا الأولى.. خرجت لقيت باكم معمر هاد البراد ديال اتاي
محمد: رضا اش كاين؟
رضا: رضوان ولد عمي
محمد: مالو؟
رضا: عيط عليا للقهوة ديالو قالك بغا يطلب مني زينة.. ولقيت عمي تما غادي يطير بالفرحة حيت رضوان بغا زينة
راضية شافت فراجلها: ايييوة زييدك اتاااي
حمزة ضحك بجهد: ناض ليها الميمون دقة وحدة (عنق أمه جنب) راضية؟ ياكما تكوني نتي لي مشيتي فيقتي لبنتك الميمون
دفعاته بشوية: كون كنت نعرف لداكشي كون نعستو لك انت شوية بنتي ليا زربان.. كيفاش قضيتك مع بنت حليمة.. فينما نتلاقا مع أمها تلوح ليا المعنى.. وااا جمع راسك شوية جيبها بحال خوتك بنات دارهم وعائلاتهم محترمين.. ماشي بحال هادي لي كل مرة انا كنت نلقاها مع واحد فشكل فالركاني.. كون غير انت بعدا لي تضل طوطح بيها نقولو (وقفات مشات وخلاتو منشور)
رضا ضحك عليه: واا انت لي زيدك اتاي.. بانت ليك غير بنت حليمة
ضايرات بأمهم لي من البارح وهي تتسناهم يجيو يقولو لها اش قال ليهم خليفة باغيا تعرف عروسة ولدها شكون هي.. هادي لي خلات قلب خليفة يضرب شكون تكون
معمرة اتاي وحاطة لكل وحدة اش تبغي من حلويات ومملحات فطباسلهم وجالسة مرتاحة عبد الله خرج لشي خدمة وأولادهم مشاو للمدرسة عاد تسمع مزيان وتفهم
غيثة: هاااه يالاه اا رقية فاش طلعتي عنده اش قالك؟
رقية: اا ماما أنا اصلا كنت شاكة فواحد الممرضة كانت مع آدم فالكلينيك
غيثة حلات فمها: ايوة كيفاش شافها وفين تعرف عليها.. عن طريق آدم؟
رقية حركات صبعها بلا: لأ لأ اا ماما.. تعرف عليها راسه فاش كان رجع من المهمة
غيثة نسات هي البنت لي خيطات لعيسى: هاااه قولي هكاك وشنو سميتها
ماجدة: وياا ماما بحال الى ما كتعرفيش ولدك علاه هو رضا يقول اسمها.. راه انا براسي كنتسنى هادي تقول ليا معاك ملي تقلقل راجلها

كلهم قلبو عينيهم عند رقية لي كتاكل بشوية عليها وكتفشش عليهم تقول عارفة سر من أسرار الدولة وهما غايحماقو ويعرفو معلومات أكثر.. طبيعي راه غاتكون زوجة خوهم خليفة وماشي أي خليفة
غيثة تعصبات عليها: يااا هضري خلاص.. براكة من البهلان ديالك
رقية حطات الكأس: واخا واخا البنت اسمها زينة الادريسي (شافت فماجدة) هاد النسب ما دازش على مسامعك
ماجدة حطات الكأس: سي كنعرف واحد الشاب اسمه معاذ الادريسي عميد ممتاز.. والصراحة شاب صغير فالعمر وكبير فالعطاء الخدمة دياله كلها إتقان وما عنده لا مع رشاوي ولا هذا من طرف هذا.. الحق والقانون
حركات رقية عينيها: هاد البنت أخته
حلات فمها ماجدة: اااوه هاي على خليفة لي كيقول لبابا ما تكونش بنت المخزن.. هاا على الأقل عندها فعائلتها شي حد من عائلة الأمن

هما كيتناقشو وأمهم كتتخايل عروستها كيف غاتكون واش غادي تبغي تبقا ساكنة معها أو لا لا.. كتمنى من قلبها حتى إلى ما بغاتش تسكن معاهم فالدار ياخدو شي حاجة قريبة منهم لأنه خليفة هو لي معمر عليهم بقات فتخيلاتها اش تدي لها فللتعارف واش تديلها فالخطبة بقات تما كتخمم والبنات مجمعات على زينة وكيفاش طبيعتها حتى خطفت قلب خوهم
رقية: قال ليا ادم هي نشيطة فالعمل ديالها وحياتها كلها فالتليفون ديالها.. بالحق خويويفة وحشومية فنفس الوقت
ماجدة شدات أهم حاجة: قلتي حياتها فالتليفون اذن غاتكون فسوشيال ميديا
قلبو عليها فالانستغرام وفعلا طاحو على الكونط ديالها وغير شافت أمهم صورتها عقلت عليها نيشان
غيثة: هادي هي البنت لي خيطات لعيسى  
مر الوقت بسرعة ثاني العائلة جاو وما بقا لهم لا فين يلومو ولا والو الأهم دبا هو تقوم ضياء بالسلامة هي وبنتها هذا هو الأهم عندهم
زهور تحنات على نعمة: راحة فراسها؟
نعمة: ماما يالاه اتصلت بخالتي راضية البنات فالحمام.. قالت لها ماما بلا ما تقولها ليهم وهما دمهم سخون هاك
نجاة: مكتوب الله كيتصرف.. ما تعرفي اشمن خير من ورا زيادتها بكري
دخلات رحيمة كانو غير هما العيالات لي معها فالبيت أما الرجال خرجو كاملين حتى من جلال لي ما بغاش يحيد من حداها حشم فالاخير.. جالسة جنبها أمها كتعاود لها كيفاش وعلاش ما بغاتش تقولها ليهم
فاطمة: خير اا بنتي خير رجعي غير صحيحتك.. أما راه الطب دبا الحمد لله تقدم والى ربي بغاها تعيش راه تعيش.. راهم عداد تزادو قبل وقتهم ايام زمان وعاشو وسط الصوفة والغربال وفالظلام.. حتى هي دبا تكبر انشاء الله ما تحسي بهاد شهرين ايمتا طير خلاص
رحيمة: والله الى بحال خويا انا الكبير حتى هو على سبع شهور.. وولده تزاد حتى هو على سبعة الشهور سبحان الله