-ابا الحسن علي: اول ما ينلزمون نرفع قضية ضدهم ونرجع حگ تَـمني الاخذوا شنو ما چان راح يرجعلچ خوية لا تخافين
هزيت راسي اي وياريتني ما هزيته الاستقبال كلها دارت بيه وحسيت بروحي راح اوگع چفي على وجهي ،من لا وعي كمشت بياخة الامـير علي وكمشت بي حييل حسيت بدگم قميصه تتفتح وما سمعت بس الخبصة گبت..
-علي الحـق: سلامات سلاماات شنو شبيها
هديت الامير الي انخبص ويايه وركضت اريد اشرد منا، دخلت لحمام الاستقبال وذبيت من راسي طلعت روحيي، دموعي تنزل والحمام يفتر بيه واتقيء لدرجة حسيت معدتي راح تطلع من حلگي حيلي باد..
غسلت ابچي بالخنسة شگد حاولت اسيطر على نفسي بس فشلت شجااني وسويت روحي فرجة الهم واكيد راح يحچون لامهم ونسوانهم، عفت البوري مفتوح وگعدت على گاع الحمام تعبانة امسح بدموعي ويرجعن ينزلن ويه ما اسمع اصواتهم وصوت الامير واگف بباب الحمام يطرقه يريدني اجاوب..
-علي التـقي: امير تره البت مبين عليها تعبانة انا اگول لو تاخذها طبيب
-ابا الحسن علي: شفت عيونها تتگلب كل شوي بس ما ربطت بيها شي
-الامـير علي: فتحي الباب تَـمني.. فتحيي خليني افتهم شبييچ
-علي الدر: خليها ترتاح يمكن استحت من عدنا امشوا شباب وخلي زلمتها يبقى وياهة
بس راحوا رجع الامير يدگ الباب يبلغني حتى اطلع، گمت من الگاع غسلت حلگي وباوعت لروحي بالمراية رتبت شعري وطلعت ابين نفسي طبيعية..
-الامـير علي: شلون صرتي؟؟
-لا زينة مبية شي
-بدلي خليني اخذج طبيب بساع
-لا يمعود بس الكباب الاكلناه على الريوگ يمكن اذاني شو وضعي تخربط من وراه
سكت ميجادل واعرف سبب سكوته شنو وحاولت اوهمه الصار بسبب الكباب وماله ربط بالحمل..
-اجيبلج علاج من الصيدلية دوا مال دوخة لو شي ثاني..؟
-لا لا صدگني اني زينة ورايحة اگعد ويه خالة والبنات
عبرته قبل لا يحچي شي وطلعت اگعد بالصالة ولا كأن الدنيا طالعة من عيني ابتسمت وضحكت وياهن ومثلت الخير كله گدامهن والسعادة.. للمغرب گمنا نصلي وام امير گالت نطلع نكمل تجهيز، تمنيت ارفض لان وضعي كللش مو زين ووجع ببطني ديصير والنزف ما وگف بس وافقت گلت عود مناك اگول لخالتي تاخذني دكتورة حتى اعرف وضعي شنو..
افترينا بالسوگ وصدمتني خالة رسمية على شنو اأشر تشتري حتى لو مو حلو المهم اشرت عليه عبالها عاجبني صرت استحي حتى انطي رأيي بأي شي لا تاخذه..
-حنين: هواي دتكلفون نفسكم ام علي
-رسمية: چا هاي فرحة العمر قابل كل يوم مزوجة وليد انا اهم شي سعادتهم بهاي الدنيا ماريد اكثر من هالشي
-الله يحفظهم الچ ان شاء الله
افترينا على البدلات ومفاجأة ثانية اجتني من عرفت بخالة رسمية رادت العرس يصير بقاعة وهذا السبب رادت تزوج الامير وره صفر حتى تكون طالعة سنوية نعمة ومحد يحچي عليهم اذا رادوا يسوون العرس هناك وياخذون راحتهم..
-حنين: بس هسة العرس بالبيت يصير مو؟
-رسمية: اي بس زفة والله يا ام تالة تمنيت اردح للصبح على عرسه بس بعد شيخلصنا من حچي الوادم همه حفلة العقد وكلو راسنا عليها
ظلن يحچن سوه وبطريقنا عبرنا على دكتورة نسائية، اشرت لخالتي وهي تملصت من خالة رسمية بطريقتها گلتلها تريد تشتريلي ملابس نوم وهالسوالف وعود اخجل گدامهم بعد عيني..
-رسمية: ههههه يا بعد گلبي براحتكم يمة انا اخذ حبيبة ونشوفلها فستان
توادعنا وحجزنا عند الدكتورة شوية ازدحام عليها، انتظرنا فترة ياله دخلتنا حچيتلها وضعي وطلبت تسويلي سونار ونصحتني ما اكثر بالسونارات مو زين على الطفل..
-الدكتورة: انتبهي لنفسج ولا تجهديها الجاي يصير وياچ من التعب راح اكتبلج مثبت تلتزمين بي
-تَـمني: يعني مو شي خطر؟
-لا مو خطر اذا انتبهتي لروحج
تشكرت منها واخذنا العلاج وخالتي اصرت اشتري كم قطعة ملابس نوم حتى گدامهم خاف يشكون بشي، اخذت من وره خشمي شلون مچان وكله احمر مادري شجاني بس هو كله المعروض احمر، رجعنا للبيت وبوجهي لغرفتي وهاي الميتة تالة بعدها نايمة عجيب!!
ثاني يوم هم طلعنا بس انتبهت لنفسي وما مشيت هوايه كل شوية اگعد استراحة بس افترينا على غرف النوم اختاريت غرفة من زمان چانت بنفسي وتمنيت اشتريها بغير هالظروف بس هم اختاريتها گالو يومين ويجون يشدوها..
كلما اتسوگ لعرسي واستمتع بالطلعة وبالاذواق المختلفة بين خالتي وتالة وحبيبة وحتى رفل اجت ويانه لكن مجرد ما اتذكر هالعرس مو حقيقي ومجرد تمثيلية ارجع انتكس وانقهر واگوم اختار شلون مچان..
-رفل: عمة چنها العروس تعبانة لو نگعد نرتاح شوي
-رسمية: ما نلحگ خايبات بعد البدلة البيضة ما خذيناها امشن
