حب وسط الدماء

البارت 20

خرجت شديت طاكسي ومشيت نيشان للمستشفى..لقيت غير حسام وسفيان..
حسام: وصلك الصاك ديالك؟
أنا: اه شكرا بزاف...واش مزال ماكاين حتى خبار عليهم
حسام: لا مزال الطبيب كايتسناهم يفيقو
سفيان: شفتك جيتي بالزربة ياك قلنا ليكم رتاحو..
أنا: ماقدرتش نبقا فالدار وراحتي هي مللي ينوضو أسد وكرزة بالسلامة..
حسام: كانتمناو..
أنا: حقا حسام ماسولتكش كيفاش لقيتينا!!!
حسام: GPS اللي داير أسد فالطوموبيل للإحتياط..تاصلات بيا خالتي سهام وخبراتني أن كرزة غابرة وحتى أسد كاتصوني ليه مكايجاوبش على غير عادتو..فدرت عليه بحث فلGPS ووصلت للبلاصة اللي حاط فيها الطوموبيل بقيت كانقلب أنا ورجالي حتى لقينا الدار اللي كان خاطفكم فيها داك لحمق...
أنا: الحمد لله جيتي فالوقت المناسب..كنت غانقتلو وندوز حياتي فالحبس
حسام: صافي نسااااااي دبا هاد شي اللي فات مات ومجد غاياخد الجزاء ديالو..
أنا: كانتمنى..
حسام: المهم راه يقدرو يستجوبوك البوليس على هادشي اللي وقع..عاودي ليهم كلشي
أنا: اه أكيد..
الطبيب: راه المريضة كرزة فاقت
سفيان: وأسد؟؟؟؟
الطبيب: مزال ..خايف غير لايدخل فغيبوبة
أنا: (شهقت ودرت يدي على فمي) لا لا مغايوقعش هادشي..أكيد غايفيق
الطبيب: كانتمناو ...راه دايرين كثر من جهدنا
أنا: واش ممكن نشوف كرزة؟
الطبيب: ممممم ممكن لكن راه حالتها النفسية متضررة كانتمنى ماتقوليش ليها شي هضرة تفكرها فالحادثة
أنا: لا مغانقول والو...
خليت حسام وسفيان ومشيت لغرفة كرزة...كانت ناعسة على ضهرها وكاتشوف فالسقف ولابسة لباس أبيض...قربت عندها بخطوات تقيلة وجلست فواحد الكرسي قريب للناموسية ديالها..
أنا: احم...هااااا احم
كرزة: (الصمت)
أنا: مال الزين مكشر؟ عرفتي اجي نعاود ليك على واحد البنت ترايشت أنا وياها غير دابا😈
كرزة: (الصمت)
أنا: عقلتي نهار كنتي ناعسة وجيت عنقتك ههههه وقلت ليك حبيبة و....
كرزة: خرجي
أنا: كرزة.....
كرزة: قلت ليك خرجي
نضت من حداها والدموع كاطيع من عيني بحال لحجر ...مايمكنش نشوف كرزة كاتكرهني وكاتعامل معايا هاكا...أنا شنو ذنبي فهادشي كامل...خرجت كانجري حاولو حسام وسفيان يوقفوني لكن ضربت فيهم وزدت..شديت طاكسي وطلبت منو يديني للبحر..وصلت وبديت نجري فالرملة ونتركل ونغوت بالجهد ونضرب فراسي بحال شي حمقة فعلا أعصابي انهارت..كنحاول نصبر ونكون قوية لكن هاد الظروف قوى مني ....كانشوف الناس كايدوزو ويشوفو فيا ويبعدو عليا يصحاب ليهم غا حماقيت..غوت حتى بردت وجلست كانتنخصص ووجهي عمر بالدموع مخلطين بالرملة..
أنا: غير غايفيق أسد ونطمئن عليه غانخوي هاد لمدينة صافي شحال قدي نبقى ديما خارجة فيهم...هوما دارو فيا لخير وأنا رجعتو ليهم بالشر..تمنيت لو ماعتقنيش أسد ومت داك النهار..أصلا أنا مكانش خصني نخرج لهاد الدنيا ماعندي لا حياة لا عائلة لازهر..اهئ اهئ اهئ
بقيت تما ساعات كانبكي ونسكت ونعاود نبكي ونسكت حتى طاح الظلام..وأنا نطلع شديت طاكسي نيشان للدار..دخلت بدلت حوايجي وغسلت حالتي من الرملة ومشيت نيشان لفراشي خشيت راسي فلمخدة وبديت نبكي بحرقة حتى ضرني راسي ونعست بدون سابق إنذار..
في_اليوم_التالي:
فقت من النعاس ضارني راسي بزاف وعضامي مدكدكين شفت فالساعة كانت 12 أو عمري نعست هاد الوقت كامل بقيت شي ساعة وأنا فبلاصتي حالة عيني فالسقف..حاولت نوض بزز كان جسمي ضعيف بقلة لماكلة..قررت أنني ناكل باش نصح شوية..مشيت صايبت قهوة شربتها وبديت نوجد فسباكيتي..كنت واقفة غابزز تسنيتها حتى طابت وحطيتها..صايبت عصير الليمون وجلست كاناكل..كنت كانديها بزز لفمي حيت ماعنديش حس الشهية..كليت وساليت ومشيت تكيت فالصالون..بقيت على نفس الوضعية شي 10 دقايق وأنا نسمع تيليفوني كايصوني كان المتصل هو المشرف على المول..
أنا: ألو
المشرف: آنسة أسماء اش هاد الإهمال واش مابقيتيش باغا تخدمي؟
أنا: لا...تقدر تشوف وحدة أخرى..سمحليا بزاف
المشرف: وخا بسلامة..
أصلا مابقا عندي ماندير بهاد الخدمة..حيث أنا غانخوي طنجة فمرة..يالاه جيت نحط التيليفون وهو يعاود يصوني..
أنا: ألو؟
حسام: أسماء....أسد فاق!
حسيت بقلبي تهز من بلاصتو وعينيا غرغرو بديت كللي كانترعد بالفرحة
أنا: اوكي شكرا بززززاف هانا جاية
حسام: لا ماتجيش..بغيت نقول راه مدام سهام قالت بللي..
أنا: صافي فهمت..عفاك بغيت غير نعرف كي بقا😢
حسام: ماعرفتش راه يالاه دخلو عندو خالتي وشيماء..أنا كانشوفو غير من الزاج..
أنا: عفاك تقدر تنفد ليا واحد الطلب؟
حسام: شنو؟
أنا: صورو ليا وخا غير مورا الزاج
حسام: اوكي..
قطعت مع حسام وبديت نبكي ثاني..بقا فيا لحال بزاف حيت ماخلاونيش نشوفو..دازت 5 دقايق وهي توصلني صورة من عند حسام..كان أسد متكي عريان من لفوق وراسو مضور بلفاصمة وشعرو هابط من فوقها..بقيت حاضية ديك التصويرة شي 10 دقايق وأنا نعنق تيليفوني والدموع ماحبسوش..بقبت كانتفكر كاع داكشي اللي دار معايا..فعلا أسد إنسان لايعوض وراجل بكل ماتحمله الكلمة من معنى..بقيت متكية وحاطة حدايا التيليفون...كنت كل مرة كانجبد التصويرة نشوفها ونرجع نحطو..هاكا دوزت نهاري كامل..
#في_المستشفى:
أسد: ماما..ماما فين أسماء..اش وقع لأسماء..شيماء جاوبوني
سهام: أسماء هههه أسماء لااااباس عليها..نتوما كليتو لعصا وهي راها مزال كيما خليتيها
أسد: اووووف الحمد لله....واش هي باقا هنا فالمستشفى
سهام: علاه هي جات بعدا
شيماء: ماما ولكن....
سهام: سكتي نتي...شوف ا ولدي نسا علينا شي وحدة سميتها أسماء مكايجي موراها غير المشاكل ..ايه ضريفة وبريئة ولكن راه ماعندها ماتبقى دير معانا
أسد: اش كاتقولي ا ماما علاش كاتهضري عليها هاكا مالها اش دارت ..أسماء راها أكبر ضحية وأكثر وحدة تظلمات فينا..
سهام: أسد رتاح دابا من بعد ونهضرو فهادشي..قوليا باش كاتحس واش راسك كايضرك
أسد: شوية وصافي..فين كرزة؟؟؟؟
سهام: فالغرفة اللي حداك...مصدومة بزاف وماكاتقول حتى كلمة وماباغا تشوف حتى واحد...اهئ اهئ حبيبتي بقات فيا بزاف ماعندها حتى ذنب
أسد: حيوان كلب عمري نقدر نسا غواتها (زير على يديه) ممكن تكلمي ليا حسام
سهام: ماتعصبش ا ولدي ...هانا غانعيط ليه...
خرجات سهام وشيماء من عند أسد ودخل عندو رفيق دربو حسام اللي بفضلو تعتقوا
حسام: صاحبي (سلم عليه) على سلامتك ..كيبقا راسك والحروق اللي فظهرك؟
أسد: الحروق مكانحس بوالو يمكن دايرين ليا شي مسكنات..وراسي كايعطيني الصداع شوية...حسام قالولي أنك نتا اللي عتقتينا..عمري نساها ليك ا صاحبي
حسام: اش كاتقول نتا راك خويا وعاد هذا راه الواجب ديالي
أسد: حسام اش وقع بالتفاصيل
عاود حسام لأسد كاع داكشي اللي طرا مللي دخل لدار مجد حتى جاو للمستشفى..كان أسد كايسمع ليه باهتمام وفرح مللي عرف أن أسماء ماسلماتش راسها لمجد وكانت قوية وضرباتو بالرصاص..حس أنها زادت كبرات فعينو لأنها كاتجمع بين الرقة والبراءة والقوة والشجاعة..
#بعد_أسبوع:
فهاد الأسبوع قدرو أسد وكرزة أنهم يخرجو من المستشفى..أسد تحسن شوية لكن مزال خاصو العناية أما بالنسبة لكرزة فالحالة هي الحالة غير ساكتة وماكاتهضر مع حتى واحد وهذا كايبين أن اللي داز عليها ماشي ساهل ، تعرضات لاغتصاب وحشي من طرف 2 حيوانات بشرية مع العلم أنها كانت مزال بكر..جات لينا وفوزية من أمريكا بعدما سمعو داكشي اللي وقع باش يكونو فجنب العائلة...
أسد كان ديما كايحاول يتاصل بأسماء لكن تيليفونها كايلقاه طافي وكان كايبغي يشوفها لكن ماماه كانت كاتمنعو منعا كليا أنه يخرج من الدار حتى يبرا مزيان وفهاد الفترة كان سفيان هو اللي قايم بالواجب فالخدمة...نخليو أسد وعائلتو ونمشيو عند أسماء..
أسماء مزال لحد لآن فالدار اللي شرا ليها أسد مكاتخرج مكاتشوف الزنقة دخلات فحالة اكتئاب..غير كاتبكي ليل ونهار وكاتحاول تنعس أكبر وقت ممكن باش تهرب من الواقع..هاد لحالة راجعة لكونها كاظن أن أسد كرهها كيما كرهاتها سهام وكرزة ومزال داك اليوم المشؤوم بين عينيها..ماقدراتش تنسى كيفاش تغتاصبات كرزة وكيفاش تعذب أسد وتحرق بسبابها..كانت فكرة وحدة كاضور ليها فبالها هي أنها كيفاش خصها تبدا حياة جديدة بعيد عن عائلة أسد....
أما بالنسبة لمجد فحسام كان متبع القضية...وكلشي لاحظ الإضطراب العقلي اللي كايعاني منو مكايقول حتى كلمة من غير "واش عندكم هنا الفول مشرمل والبقولة" (هادي كانت جملة عفوية خرجات من فم أسماء نهار طلب منها الزواج فالمطعم)....حسام كانت علاقتو زوينة مع سهام وشيماء..شيماء كانت صديقتو وكايتواصل معاها كل نهار كونهم كايتفاهموا بززاف...

اسود 🦁💘