فراشات تخشى الاحتراق

٣٩

ها جمانة ناخذه للمستشفى احسن؟
لا المستشفى ماعدهم غير الابر
اخاف وابدا مااودي..
انتظر للظهر واخذي للدكتور..
الظاهر مستبرد..
تعرفين دكتور زين لو لا؟
اي عندي رقم السكرتيرة بعدين احجز..

بقى جياد مكابلني وقلق اول مرة
يشوف طفل يتمرض ومحتار
كتله عادي تصير وهو مامرتاح وكلساع
كال شلون..
تالي كتله كوم بدل وروح لدوامك..
رفض يروح كتله مابي شي لا تقلق..
اقتنع وراح وكال خلي تلفونج يمج..

بقيت مخلية عبودي بحضني
واحاجي ..شوية قبل يكعد
ع الكاونتر..
سويتله شوربة خضار وجاي اشربه..
اجه ادم للمطبخ..
صبيتله شوية كعد ياكل وسالني
عن عبودي كتله مريض..
انوب عاف الاكل وكابله مقهور شلون
مريض..

للساعة بالتسعة..دك تلفوني جياد
خابر يتطمن..
وانة احاجي رغد دكت ..سديته وياه
وجاوبتها..
هلا رغود..
هلا حبوبة شلونج..
نعمة الحمدلله شلونكم..
الله يخليج ..
انك بالباب اجيتج..
صدك ياهلا جايتج..

كمت شايلة عبودي وفتحتلها الباب..
بوستني ودخلت..
باوعت لعبدالله وكالت شبي ولج؟؟
حاجيتها واحنا ندخل للداخل..
مادري صخن البارحة والصبح
شرب الممه وذبها
هسه شربته شوربة يمكن استبرد..

هي كعدت بالهول واجاها ادم بوسها..
ادم كلش يحبها..
شعجب اليوم من وكت كاعدة وشكلج
فحطان..
فتحت جنطتها وطلعت علاكة حطتها يمي..
هاج ملابس ابنج..

حجت بصوت ناصي لان ادم يمنا..
دربالج تدخليها لبيتج بعد..ذني شياطيين..
حجت بعصبية ووجهه احمر..
نيتج الصافية وياهن ماتفيد..حمدي ربج
لحكت عليها جان سوت بالطفل
شي..لو كطعت خلفتج وبهذلت حالج..

ولح باد حيلي شنوو شصار؟؟
حمدي ربج كتيلي اخذت ملابسه من خابرتيني..
جان مالحكت عليها..
رغد تحجين لو اشك هدومي ترى راح انهار
كليلي شسوت لابني..

اهدي اهدي مالحكت تسوي..من كتيلي
حطيت بالي وياها وجنت شاكة بسالفة
وتاكدت منها..
هيج تقريبا ساعة ب٢ ..سمعت صوت
باب السطح انفتح..
كمت بسرعة طلعت..باوعت محد..
كلت ماكو غيرها طيبة..لان غديرة
مابيها تفر روحها وتكوم..

دخلت للمطبخ..شوية وسمعت صوت مشي
ع الدرج..
حسيتها اقتربت خليت وطلعت ..
جانت توها نازلة..تدرين بيه لا اطيقها
ولا تطيقني..
سويت روحي ماشفتها..ونزلت جوا..
دقايق ورجعت صعدت..
باوعت هدوء كلش..صعدت فوك وفتحت
الباب..

طلعت ركض بقيت اباوع ..فارشة
الملابس بالكاع..
شلتهن نفضتهن وصليت على محمد وال محمد..
يمه دخيلك ربي..كليلي رغد ليش تسحرله
ليش ابوس ايدج..
بقيت احجي ودموعي تصب..وشبكته
حيل وهو بحضني غفى..