شظايا شيطانية~للكاتبة صرخة المُشتاقه

٧

تنهدت الأم وقالت: على العموم أنا رايحه اللحين عند أم جهاد أبغاها بموضوع .. إنتم رفعوا الغدا ونضفوا البيت ..
أول ما سمعت الهنوف طاري أم جهاد فزت من مكانها تقول: يمه بروح معك ..؟!
إستغربت الأم من كلامها وقالت: وليش ..؟! مو بالعاده تنامي الظهر بحكم إنك تعبتي بالمدرسه وبترتاحي ..!!
الهنوف: لا إطمئني أنا تمام وعال العال .. بالله عليك إشتقت لخالتي أم جهاد .. ودي أزورها ..
الأم بإستغراب: أوكي بكيفك .. بس تجهزي بسرعه ..
نطت الهنوف واقفه تقول: أنا جاهزه ..
الأم بحده: وين جاهزه وإنتي لسى بمريولك ..؟!!! متى تتعلمي تنزليه قبل لا تتغدي .. خلاص إنسي سالفة الروحه ..
الهنوف بسرعه: لا لا الله يخليك أنا آسفه .. اللحين أبدل وهذه آخر مره .. أصلاً ملابسي مالقيتها فعشان كذا ما غيرت ..
وبعدها راحت جري للغرفه تطلع ملابسها اللي زعمت بإنها مالقتها ..
تنهدت الأم وراحت لغرفتها ..

طيف بإستغراب: ليه الهنوف متحمسه كذا ..؟!
حور: ما تتحمس إلا وفيه فكره شيطانيه براسها ..
طلعت الهنوف من الغرفه بعد ما بدلت وقالت: هيه بنات ..
طيف بصدمه: مسرع غيرتي ملابسك ..؟!!!!
الهنوف: ما علينا .. المهم بنات قوموا معاي نروح مع أمي ..
حور: هااااا ..!! وليش ..؟!!
طيف: لا مو من جدك ..!! أنا حدّي تعبانه من دوام الجامعه وأبغى أنام ..
الهنوف بقهر: لا لازم تجون .. أبغى أتضارب مع اللي إسمها جود ..
حور: وليه ..؟!
الهنوف بإبتسامه شيطانيه: أبغى آخذ حق جهاد منها ..
طيف: إبتسامتك ما تبشر بخير ..
حور: أي حق إنتي الثانيه ..؟! وإيش دخلك بجهاد أصلاً ..؟!
تربعت الهنوف عالأرض وهي تقول: هذا جهاد يا طويلة العمر خقة حارتنا .. إكتشفت أمس بأنه يتيم وتبناه الإمام .. وجود هاللي ما تستحي على وجهها أكثر من مره تطلع قدام جهاد وبعدها تتهمه بأنه متقصد يطالعها وإنه داشر ومن هالحكي .. أمها عارفه أن جود متقصده بس ما تقدر تقول تخاف أبوها يهاوشها .. أما جهاد مسكين يدافع عن نفسه .. الأمام لحد اللحين مصدقه بس لابد يجي اليوم اللي يبدأ الإمام يشك بذا .. وعشان كذا أبغى أبهذل هالجود وأعلمها بإننا عارفين خرابيطها وراح نبلغ الإمام لو ما وقفت .. وبكذا نساعد جهاد وبنفس الوقت ناخذ حقه منها ..
بعدها قامت تقول بسرعه: ياللا ياللا خلصوا اللي بإيدكم وتجهزوا ..
أشرت بأصبعها عليهم وكملت بتهديد: وإن ما وافقتهم فهذا يعني إنكم تسكتون عن الظلم .. والساكت عن الحق شيطان أخرس ..
وبعد جملتها الأخيره رجعت للغرفه من جديد ..
لفوا طيف وحور يطالعوا ببعض وأكبر علامة إستفهام موجوده على راسهم ..

//

وأمام بيت الإمام ..
رفعت الأم إيدها ودقت جرس البيت كذا مره ..
ووراها كانت حور واقفه وتتنهد ..
لفت على طيف اللي كانت جنبها وقالت: وفي النهايه صرنا هنا ..
طيف: مع إني أبغى أنام بس هذا هو ما آلت إليه الأمور ..
الهنوف: هههههههههههههههههههه محد بالعالم يقدر عليّ ههههاعع ..
الأم: إششش .. ضحك جِمال هو بشر ..
الهنوف بحزن: لنا الله ..
إنفتح الباب وطلعت من وراه بنتهم الصغيره ..
آخر العنقود .. جمانه ..
طالعت فيهم وقالت: مين إنتم ..؟!
الأم: أمك هنا يا بنت ..؟!
جمانه: اها .. إنتم الحريم اللي بتزوروها ..
بعدت وهي تقول: تفضلوا ..
وكملت بهمس: فيه أحد يجي الظهر ..!!
دخلت الهنوف ورى أمها وقالت: سمعتك ..
ميلت جمانه صاحبة السبع سنوات فمها تقول: هنيف وش جابها ذي ..؟!
نزلت الهنوف غطاها ولفت على جمانه تقول بعصبيه: هنيف ووجع إنتي الثانيه ..!! إنطقي إسمي عدل لأعدلك ..
جمانه بلا مبالاه: جود تقول إسمك كذا ..
شدّة الهنوف قبضتها تقول في نفسها بتهديد: "هين يا جودوه .. مو بس راح أنتقم لجهاد .. وراح أنتقم لنفسي بعد" ..
دفتها حور من وراها عشان يقدروا يدخلوا وهي تقول: شفيك صيفتي عند الباب ..؟!
دخلت طيف في النهايه وقفلت الباب وراها ..
طالعت في جمانه وقالت بإبتسامه: كيفك جموون ..؟!
ظهرت الإبتسامه على وجه جمانه وراحت تحضن طيف وهي تقول: وااااو طيف جت ..
طيف: هههههه أخبارك وأخبار دراستك ..؟!
بعدت جمانه عنها وقالت بحماس: الحمد لله أنا بخير ..
ضربت إيدها ببعض وهي تقول بإستمتاع: وضربت بنات كثير وبكوا بسرعه ..
طيف بصدمه: وليش ضربتيهم ..؟!
هزت جمانه كتفها تقول: جهاد دايم يقولي إذا شفتي أحد يصلح غلط أضربيه وكسري راسه عشان يتوب ..
حور: هههههههههه يعلمها الشغب من صغرها ..
طيف: لا حبيبتي ما يصلح كذا .. مو كل شيء يجي بالضرب .. ومو كل من غلط ينضرب ..
هزت جمانه راسها بلا وهي تقول: إلا لازم ينضرب .. يعني اللي تسرق ألوان صاحبتها نسكت عنها ..!! واللي تضرب زميلتها نسكت عنها ..!! واللي تقول كلام وصخ نسكت عنها ..!!
ضربت إيدها ببعض مره ثانيه وكملت: هذولا لازم نكسر راسهم عشان يتعلموا .. الساكت عن الحق شيطان أخرس ..
تنهدت طيف بيأس وقالت حور: هههههه الظاهر إنه غاسل دماغها فلا تحاولي .. وياللا ندخل ترى أمي والهنوف دخلوا من زمان ..
ضربت جمانه راسها وهي تقول: يووووه نسيت ..
مدت إيدها وقالت: تفضلوا الله يحيكم ..
إبتسمت طيف بعدها دخلوا لداخل وراحوا للمجلس ..
نزلوا عباتهم بعد ما سلموا على أم جهاد وبعدها جلسوا على الكنب ..
أم جهاد: يالله يحيهم هالبنات .. من زمان ما شفناكم ..
الهنوف: الله يحيك يا خاله .. وينها جود ما جات ..؟!
حور بهمس لطيف: على طول وبدون مقدمات سألت ..
طيف بنفس الهمس: الله يستر هالبنت مجنونه والله ..
حور بتفكير: بس تصدقي .. بديت أتحمس للموضوع ..
هزت طيف راسها بيأس وهي تقول: ما أقول غير الله يستر ..
ردت أم جهاد على الهنوف تقول: والله جود تغير ملابسها .. شوي وبتجي ..
الهنوف بإبتسامة مكر: ما عليه راح أنتظرها .. جود هذه حبيبة قلبي ..
لفت الأم عيونها على بنتها وهالإبتسامه الغريبه مو مريحتها ..
لكن لو تمادت فغمزه وحده كفيله بإنها تسكتها ..