للقدر رأي آخر

البارت 7

منصف : اش درت ليك انا هااا؟ شنو درت لييييك

الأم : كووون غااادرتي، شوووف نقووووليك جوج كلماااات مانعاااودهمش، انا بااااغاااا نشوف ولادك قبل مانموووت والبنت لي بغييتها ليك كل نهار جاييين فيها الخطاااب ماغانجلسش ونخليها طير من يدي عروووسة شهووة منهاااا ومن دمنااا وزايدون خبز الدااار ماياكلووو البراااني وانااا عااطية الكلمة لختييي ووليت نحشم منها فاش تجبد ليا الخطاب لي كايجيو لسامية

منصف : الواليدة هاد الموضوع دويت معاك فيه وسديناه، ديك بنت ختك راها بحال وفاء والسلام، خلي البنت ضبر على راسها وتمشي الله يسهل عليه، ويلا نيت باغاني نتزوج هانا غانديرها ليك على قد فمك ولكن مراتي غانختارها انا، انا لي غانتزوج بيها ونعيش معاها ونكون معاها اسرة ماشي شي حد اخور، لذلك غانختارها بنفسي، البنت لي نرتاح ليها ونبغيها ونقدر نمشي معاها مزيان

الأم (ضيقات عينيها) : ايييه هي حاط عينيك على شي وحدة ولا نقول تلوات عليه، يالاه گر گر نسمع

منصف : اش هاد الهضرة ديال تلوات عليا مالها حبل!! البنت الله يعمرها دار وراكم كاتعرفوها مزيان، وداكشي علاش جيت هاد الشهر غير باش نقولها ليكم ونمشيو نخطبوها ونضربو الكحل فالابيض

الأم : شكون هادي؟

منصف : احم حنان صاحبة وفاء

وفاء زولات تيليفون من يدها وتقادات فالجلسة مخنزرة وكاتشوف فمها بعينيها ودير ليها اشارات زعما هاا شنو قلت ليك وا دابا فكيها، الحاج تاهو حيد عينيه على التلفازة وشاف فولدو ووجهو مافيه تا تعبير هادئ وغير كايسمع، ماكايدخل ليهم فوالو يشرقو ولا يغربو والحاجة لي ارتاحو فيها يديروها عكس الأم لي سلطوية وكاتبغي تحكم فيهم واخا يشرفو خاص كلمتها هي لي تكون ولي قالت عليه يتنفذ ولا يتسماو مساخيط .. واسم حنان كان بحال الصفعة الحارة ليها وهي فداك السن .. جمعات النفس مزياااان وهو كايشوفيها .. وساطتو بحال العافية على وجهو ..

الأم : هااااديك لي ماتكووون ليك، سمعتي؟ والله اوليدي لا ديتيها واخا نموووووت ماتديهااااش، ماحشمتيييش باااغي تجيييب ليا صلگوووطة للدار گاااع اليدين لعبووو فيهااا هااا باااغي تشمت فيا عبااااد اللله وضحكهم فيااا فاخر يااامي ندخل لداااري وحدة ماتسوى ماتصلاااح وكلشي يهضر عليها ماحشمتيييشش

منصف (وقف صاعر) : اش كاتروني الواليدة، اش هاد الهضرة كاتقولي

الأم : ايياااه وليت دااابا كانرون هااا؟ هااا ختك قداامك لي كانت صاحبتها تعااااود لييك اش عااارفا علاه غير جات وبعداااات علييييها هاااهي سولهاااا تقوليييك، مالقيتي شكووون والله ماتكووون ليك .. وهاااا السخط هااا الرضى .. يااا تزوج ببنت خااالتك وتنسا عليا ديك الموصيبة يا نتا ما ولدي مانا مك تا لغدا قدااام الله يالاه اختااار