جذبني فمك البني

البارت السادس والاربعون

يانظره عيوني الثكيله
شكثر حبيتك.

يلوموني عليك
وكلت مو بيدي.

ادهم
_____________

نرمان : لا مستحيل مرض شنو احتمال مالها خلك او تعبانه .

رجله تهتز وعينه عليهم رمقني بنضره سريعه ورجع باوعلهم ..

ادهم : مأذيها هذا الحيوان ومتأكد ..

نرمان : عرسان بعدهم وين لحك يأذيها.

ادهم : كلبي علمني بيها شي صارلي ايام ما مرتاح.

نرمان : لتضخم الامور ادهم ماكو شي ومبين زوجها يحبها..

مجاوبني ، باوعت عليهم كعدو على صفحه بس هيه ممبينه لان هو كاعد كبالها وضهره علينه ، ادهم متحمل كام وكف لزمته من ايده..

نرمان : وين ؟

عينه عليهم ويحجي ..

ادهم : اروح اشوف شبيها.

نرمان : عوفهم تره مبينه متقصد جابها كبالك جوز شاك بشي امشي بره نطلع ونحجي لان هسه انت عصبي وخاف تسوي شي تندم عليه بعدين..

لزمته من ايده وبالكوه طلعته من النادي وكفنه بره بمكان معزول طلع باكيت الجكاير ورث جكاره وضل يحرك بيها ....

نرمان : على كيفك ادهم شجاك..

شمر الجكاره بالكاع بحركه عصبيه نفخ الدخان وحجه من بين اسنانه.

ادهم : انتي شبيج متشوفين شمسوي بيها صايره تشبه ياسه من جيت من السفر وانه ما اكدر اضل اتفرج واخسرها مثل ماخسرت عمتها.

نرمان : انت ليش مكاعد تستوعب هيه مسؤوله من رجال ثاني يعني انت غريب عنها.

ضرب على صدره بقبضه ايده وحجه مفرفح..

ادهم : انه صح غريب بس اقرب واحد الها انه كلشي اعرف عنها وبعدين واذا تزوجت يعني اشيل ايدي منها وهيه لا وراها ولا كدامها بالعكس لازم اضل بحياتها حتى يعرف عدها احد وما يتجرأ يأذيها.

نرمان : ياعيني صح حجيك بس انت بنفسك كلت هو عاداك وقطع علاقته بيك من يوم زواجه بسيلين ليش تغالط نفسك..

ادهم:عوفج من هالحجي سيلين شبيها وليش هلكد اختفت اكيد مأذيها صدكيني ..

نرمان: يلا ضل هيج فرفح وكلبك راح يوكف.

رفع سترته حيل وعتها ...

ادهم : انه اريده يوكف ماريده يدك تعبني تعبني ...

نرمان : استغفر الله ادهم تره دمرتني مو حاله هاي.

ادهم : اي مو حاله وانه هم تدمرت شسوي فهميني.

نرمان : متسوي شي اني اروح واسأل عليها انت معليك بيها بعد ابتعد عنها لان الضاهر بسببك كاعد تتأذه.

ادهم : شمسوي شمسوي فهميني شو اخاف عليها مثل ما اخاف على مريم وعليج وما غلطت وياها بشي ليش تبتعد..

نرمان: هيه مو كلتلك زوجها بعدها عن اختها وعنك يعني يريدها بس اله واني متأكده هاي شكوكك مو بمحلها وسيلين حامل..

ادهم: انت مخبله اكو حامل هيج تصير وين صايره خصوصا هنه يخبلن يصيرن بالحمل اصلا ياسه جانت تدز صورها اتعجب عليها وعلى جمالها انتي شتسولفين ..

نرمان: بشنو تشك ..

ادهم : ماعرف بس اعتقد كاعد يعذبها جسديا او نفسيا واحتمال ثنينهن سوه..

نرمان : لا هنا وكافي هواي رحت بعيد ..

ادهم : انتي شلون صرتي دكتوره بله اريد اشوفه اللي ناقشج وينه.

نرمان : ها راح ترجع عليه.

ادهم : لعد سكتي شي متعرفين بيه لتدخلين..

نرمان : اني صوجي والله فوك مخايفه عليك وعلى البنيه لتصيرلها مشكله.

مجاوبني ضل يروح ويرجع كل شويه يريد يرجع للنادي وامنعه ، ضلينه واكفين لحد مطلعو من النادي وراحو..

ادهم : من تدخل للقسم وهو يدخل محاضره نروح نحجي وياها ..

نرمان : ماشي بس اهدأ شنو تريد نسوي بس بعقل يعني اني اعلمك يا ادهم انت ابو العقل هيج يصير بيك.

مجاوبني جانت اكو مصطبة كعد عليها خله راسه بيه ايده ورجله تهتز رحت للكافتريا جبتله مي فتحته وخليته بيده دفعه بهدوء مقبل يشرب جريت نفس وكعدت يمه.

نرمان : الطلاب كلها انتبهت عليك التفت وشوف الغمزات والهمسات بين الطلبه راح تفقد مكانتك بينهم اذا ضليت هيج.

مجاوبني اساسا باله مو يمي كاعد على اعصابه انتضرنه وقت المحاضره الاولى خلص وكام مشى ومشيت وراه رحنه بأتجاه القسم مالتها وكفنه باب القسم جان الاستاذ مالتهم بعده مطالع من القاعه رفعت عيني باوعت لادهم ، دمرات راسه بلشت تظهر وجوه عيونه صار بيها انتفاخ.. عرفت بلش الصداع عنده وراح تلزمه نوبه ، جريت نفس واستغفرت ربي .

ضل يضرب بقدم رجله بالكاع بحركه قلقه.

نرمان : ادهم ماكو داعي لكل هذا التوتر تره اعصابي تعبت من وراك..

مجاوبني ولا باوعلي عينه على قاعتهم مجرد طلع الاستاذ مشى سريع دخل للقاعه دخلت وراه ماكو سيلين مموجوده..

ادهم سأل صديقتها عنها كلتله ممداومه اليوم تخبل بالزايد..

التفت عليه وهمس..

ادهم : كتلج صاير شي كتلج ...

طلع يتخبط بين الطلاب لا اهتم لمكانته ولا اهتم هو وين احس عقله مو براسه يمشي سريع شبه الركض مشيت وراه وجان المح سيلين كاعده جوه شجره ..

نرمان : ادهم ادهم اوكف لحظه ذيج سيلين..

بالبدايه من صحته مجاوبني بس من ذكرت اسمها وكف والتفت مغضب ، رجف حلكه وصاح.

ادهم : وينها ؟؟؟؟

اشرتله على مكانها ، رخت ملامحه وبهتت بنفس الوقت ركضلها اللي يشوفه يكول طفل وشاف امه راجعه من السفر والتقوا بعد مده من الاشتياق والصبر ولا عبالك دكتور جامعي متت قهر عليه وعليها ثنينهم احسهم انظلموا وصل يمها واني مشيت وراه وكفت على صفحه اباوعلهم وبنفس الوقت اسمع حجيهم بس ردت ياخذ راحته من يحجي ولو هو باله مو ويايه ميشوف احد بالجامعه غير بس سيلين ..

جانت مدنكه تبجي ورايحه بعالم ثاني كعد بصفها ضايع اكثر منها. همس ...

ادهم : شبيج شنو يوجعج...

مجاوبته..

ادهم : سيلينه منو وياج منو اذاج..

اشرت بصبعها عليه...

عقج حاجبه وبهت ارتد ليوره وكال ..

ادهم : انه ليش شسويت سيلين احجي شمسوي ...

رفعت راسها ليفوك غمضت ونزلت دموعها برهاوه رجف حلكها عبالك طفله خايفه ..

حجت بتعب وصدمتنه ثنينه...

سيلين : اذا كو شخص كرهته بحياتي من بعد تماره فهو انت....

ادهم فتح حلكه واني شهكت وخليت ايدي على حلكي مصدومين بكلامها..

ادهم : اخ

سيلين: هوواي نزلت من عيني وتندمت بيوم التجئت الك وحرامات عاشرتك انت واحد اناني وكل همك غرائزك كل مجالك تهدم حياتي علمود تحصلني ومتهمك النتائج حسبي الله ونعم الوكيل عليك انت ضيعتني ومن اليوم لا اريد اشوفك ولا اريد اسمع صوتك...

ضل صافن بوجها ميعرف شيسوي هيه تبجي وهو ملامح وجها ترجف خله ايده على وجها فركه حيل التفتلي همس ....

ادهم : سمعتيها شتكول انه خربت حياتها و تدعي عليه...

سيلين : اصلا حرامات كاعده يمك فعلا حجايتك من كلت الانسان مينعرف اله بالعشره وممكن يخفي اكثر من وجه ومتظهر دائما بصوره حقيقيه لان يكون متلون ..

كامت تريد تروح كام وكف كبالها منعها تمشي. صاح بيها ..

ادهم : انتضري مثل ما تهمتيني باطل انطيني الاسباب ما اسمحلج تحجين اشياء عني انه مامسويها ومجحفه بحقي..

سيلين : وانت منو تسمح لو متسمح صدكت روحك مسؤول عني ، شكد تعبت عليه وشكد وكفتلي روح اخذ فلوس تعبك من حسابي اعتبرني رايحه دكتور نفسي ، الدكتور مو هيج يعالج مريضه مقابل فلوس ، لو انت تريد غير مقابل ..

ضيق عينه وحجه بصوت حاد ، رغم عصبيته بس صوته بيه رجفه كلت راح يصير بيه شي وفعلا ماعدت على ادهم سلامات..

ادهم : قصدج جنت رايد منج مقابل لتعبي واي مقابل سيلين اي مقابل لج انه لو فعلا مثل ما كلتي جان منعت زواجج بكل الاحوال وغصب عنج اخليج يمي ابسطها احجي بماضيج كدام سامر ويتركج واي واحد يتقدم اسوي نفس الشي واكسر قسمتج.

سيلين: وانت سويت ابشع من هذا الشي يادكتور سويت الابشع انانيتك وصلتك لحال ، ماريد احجي اتركني لا اصرخ والم الطلبه عليك واخزيك..

مشت ركض وراها جرها من ايدها حيل هيه التفت عليه خزرته وعتت ايدها منه..

ادهم : اوكفي متروحين اذا متكليلي شنو سامعه.

سيلين : شيل ايددددددددك لتلزمني تعرف نفسك كلش زين شمسوي ماكو داعي اكلك..

رفع اصبعه مهدد

ادهم : بس قبل لا تروحين اكلج شغله راح ترجعيلي بيوم متأكد واله اطلب منج نفس الطلب الحجيتيه هسه واعيشج بيه واعيشه وياج برغبه مو حب بسيطه .

سيلين : انزل من عيني بعد انزل...

حجتها و راحت راد يروح وراها لزمته.

نرمان : كافي تخزينه شوف الطلاب الوراك شلون يباوعون.

مشه وراح يمهم عبالي راح يرزلهم،،،
حجه وياهم بنبره هدوء ولا عبالك جان مار بموقف صعب ويهد اكبر رجال بالدنيا..

ادهم : مو كلشي تشوفوه تاخذوه بنضره موحلوه حسب افكاركم ،
تعلمو دائما التمسو الاعذار للناس ولتأولون الكلام والمشهد حسب تفكيركم لان من تمسون اعراض الناس بسوء راح تنمس اعراضكم انه اعرفكم انتو طلابي ومستحل تتهامزون بسوء عني لان ما معقوله تعبي وياكم يروح هباء وبسرعه ينعدم عدكم الخلق والادب اللي شفتوها ويايه قريبتي ومثل بنتي مريضه وعدها انهيار حاد مكاعد تسيطر على اعصابها وانه جنت مانعها تداوم واليوم داومت عدها امتحان ، اذا جان تفكيركم بيها بشي سئء ياريت تمحوه واتذكرو عدكم خوات مثلها ....

الكل التم عليه وضلو يعتذرون منه لان وكفو يتفرجون كدر يحرجهم بكلامه وتركهم بموقف محرج وابستامه على وجوهم كاذبه صفراء ، عافهم ومشى مشيت وراه وافكر لو غيره واحد على الكلام اللي سمعه منها جان انتقم منها اشد انتقام وأذاها مو يكعد يبرر موقفها وياه كدام الطلاب خوفآ على سمعتها ، اخ يا ادهم شكد كبير .....

كبير بأخلاقه وبأدبه وبعلمه وبمداراته للأمور وبرزانته ، فخوره عندي هيج اخ مرات احسد نفسي عليه ساعدي الايمن وعضيدي هو...

صعدنه فوك لغرفته كعد على الكرسي خلف الميز نزع الستره وبعدين رخه الرباط وسحبه بعصبيه فتح ازرار القميص الاولى وفرك ركبته....

نرمان : ادهم شبيك ، حبيبي مو وياك.

نتر بيه.

ادهم : ها ها ها اوووووف ربي اوووووف...

نرمان : شبيك ياعيني راح تموتني امشي نرجع للبيت الله يخليك.

ادهم : يابيت يابيت اي مكان ميلمني بعد السمعته والحسيته.

نرمان : اكيد واصل الها شي لو سامعه شي وهيج قابلتك بسوء هسه من تفهم الحقيقه راح تتندم.

ضرب بيده بعصبيه على الميز.

ادهم : حتى وان واصلها تسجيل بصوتي المفروض متصدك لج ٣ سنوات عايشه ويايه معقوله بكلمتين يفرون عقلها ويكلبوها عليه.

نرمان : عذرها وياها اكيد عدها شي انت اهدأ هسه ويجي يوم ونفهم الصار..

ادهم : والله والله والله متأكد راح ترجعلي وترجع مهدومه وتعال يا ادهم عالجها بس بوكتها اله اعالجها بمقابل وفعلا اسوي اللي كالت عليه مو تكول اريد مقابل علاجي الها اشباع غريزتي ، اي راح اسويها وما راح اهتم الها ولا اتندم لان هيج طلبت ..

نرمان : انت اخلاقك مو هيج ومستحيل تسويها اعرفك كلش زين وهيه هم اعرفها مستحيل تأذيك بدون سبب..

ادهم : سبب او بدون سبب مادام هيج كالت اله اصير اناني صدك واله اسوي الكالت عليه مستحيل بعد اساعدها بدون مقابل .

نرمان : هسه انت مو كاعد تحضر لسفرك وعندك كومه شغل عوف سيلين عايشه حياتها وانت التهى بحياتك سويت العليك واللي يمليه ضميرك وماقصرت اعتقد يرادلك فتره راحه وصدكني من تسافر حتى فهد يترك انتقامه بعد منين ينتقم ايمن وخسره ايفين وانت خسرك سيلين وصرتو متساووين بالاذيه ..

ادهم : مادري هسه عوفيني ...

نام على الميز واني كعدت على صفحه مرت ساعه كامله واحنه ساكتين بعدين كتله.

نرمان : انت تعبت واني هم خلينه نرجع ..

كام وطلع من الغرفه خله ايده بجيوبه ومشى ، اخذت سترته والجنطه وموبايله وطلعت وراها يمشي ويتنفس بصعوبه كل شويه صدره يرتفع ويرجع يهبط وصلنه للكراج طلع السويج شمره عليه فتحت السياره صعد ليكدام رجع الكرسي ليوره و غمض عينه خله ايده على راسه واني سقت بكل ازدحام التفت عليه اباوع واسأله...

نرمان : بيك شي..

يسكت اخر شي جاوبني بزفره وغضب...

ادهم : عوفيني لخاطر الاولياء والمرسلين..

نرمان : هذا هو سكتت بس لتعصب.. ...

ضليت افكر بكلامه معقوله اذا رجعتله سيلين راح ينفذ تهديده ولو اعرف ادهم اذا حقد على واحد اذاه لو مس كرامته ينهيه بس ويه سيلين هم يسوي هيج ماعرف بعد..

اول ما وصلنه بعدني مطابكه السياره نزل وراح للبيت فتح الباب وفات ، صفيت السياره واخذت غراضنه ونزلت سديت باب الشارع ودخلت ، سمعت صوت الدوش عرفت دخل يسبح، خفت لا ضغطه يصعد خابرت على ايمن...

نرمان : ايموني انت وين عيني..

ايمن : داتغده ويه جماعتي.

نرمان : تتأخر.

ايمن : ليش صاير شي..

نرمان : الادهم تعبان ومكاعد يسيطر على انفعالاته وخايفه من ضغطه ليصعد..

ايمن: هسه جاي مسافه الطريق يمكم.

نرمان : على كيفك سوق تره مابيه شي بس خفت عليه.
ايمن : ليضل بالج بس عينج على اخوج..

نرمان : ميته خوف عليه والله يا ايمن..

ايمن : لتخافين كتلج..

نرمان : تعال ويايه ماكدر بعد..

ايمن : تمام جاي كتلج بس على كيفج ماكو داعي ترجفين..
نرمان : ماشي الله يحفظكم اليه..

ايمن: الله يسلمج الغاليه..

سديته منه ورحت وكفت يم باب الحمام سمعته يتنفس سريع وبعصبيه مخنوك ، بعدين سمعت صوت ضرب على الحايط ضليت ادعي الله يبرد كلبه مدكيت الباب ردته يهدأ بلكت تطلع اعصابه اذا هيج سوه احسن من الكبت..

وره ربع ساعه طلع من الحمام ملابسه نفسهن بس منكعه يعني مسابح لعد شجان يسوي ، عافني وراح لغرفته شمر روحه على الجربايه سديت الباب ورحت للمطبخ خابرت على ماما..

فردوس: الو هلو نرمان.

نرمان : هلو ماما شلونج.

فردوس : زينه الحمدلله انتو شلونكم اخوتج زينين.

نرمان : اي زينين خابرتج علمود مريم جابها الخط مو.

فردوس : اي وانتو تأخرتو غديتها ونامت

نرمان : خلوها يمكم ...

فردوس : مو باجر عدها دوام يا ماما منو يدرسها

نرمان : خليها تداوم من يمكم باجر واحنه نجي ناخذها واذا على الدراسه هيه تعرف واذا رادت شي خابريني افهمها بالموبايل.

فردوس : ماشي بس باعي صاير شي شو صوتج يرجف.

نرمان : لا تعبانه من الدوام وادهم راسه يوجعه تعب اليوم لود محاضرات عنده.

فردوس : ماشي اهم شي هو زين مابيه شي.

نرمان : لا مابيه ليضل بالج.

فردوس : تعالو تغدو يمنه مسويه اكل خير من الله ومحد اكل بس فهد ومرته.

نرمان : ايباه صارت مرته..

فردوس : غصب لو برضاتنه صارت مرته وتعاي شوفي اذا فتحت حلكي وياها شيسوي كاعد على حلكنه فنه اليفتح حلكه بكلمه..

نرمان : هههههه خرب بيومه حتى لو جان ميحبها بس مادام صارت خاصه بيه ميقبل احد يأذيها..

فردوس : تتذكرين روايه شلون جان يتخبل اذا كعدتها من وكت علمود تشتغل هسه هم نفس الشي يكلي جنتي معوله عليها تشتغل عندج زمن صخريها..

نرمان : اي حقه ضامها للخباثه هههههه .

فردوس: والله مادري شنو اباله خابصني النهار كله ففه وففتي طاب طالع يدلعها.

نرمان : هسه موزين بلكت الله ينسه روايه بيها.

فردوس: مادري والله ياماما حيره وابوه راح يتخبل يوميه جايبلنه سالفه شكل.

نرمان : تحملوه ماما شتسووون..

فردوس : ميته قهر عليكم اريدكم ترجعون يمنه والله البيت فارغ وموحش بلاكم خصوصا ايمن جان يصب من راس الجدر منو بعد يكول ماما شمسويه جوعان.

نرمان : تعاي اخذيه وخلصيني منه حسره عليه اكعد اذا مصخرني على بطنه.

فردوس : الله عليج بعده ضايج لو احسن.

نرمان: والله ماما ما ادري بيه تعرفيه هادئ وميبين مشاعره ولا يعكس عصبيته علينه يكتم..

فردوس: سوده عليه هذا حضه وكعه ويه بنت تماره الدا*******

نرمان : يمعوده ستوب صارت مرت فهد ميصير بعد تحجين عليها..

فردوس : اخوج عنده شغله براسه قابل هيج غبي ومخبل ياخذها ويكله لايمن خلصتك منها وبعدين تشكرني اكيد لازم لزمه عليها وراد يخلص اخوه منها وبعدين هو يتخلص منها..

نرمان : ماعرف بشنو ابنج يفكر الله يسلمه ما ينحزر..

فردوس : روحي هسه اجه عباله نحجي عليه.

نرمان : هههههه شوف الخوف شيسوي وتره فعلا جنه نحجي عليه.

فردوس : انه ماخاف منه بكد ما اضوج من النكد مالته يضل ينكد براسي ويطب ويطلع يسمعني بالحجي لان جبت سيرته.

نرمان : يريد يجوزكم منه هيج يسوي ..

فردوس : اي هم صح يلا روحي بعدين نحجي.

نرمان : الله وياج حبيبتي..

سديته منها ورحت فتحت الباب مال غرفه ادهم لكيته غافي ارتاحيت...سديت الباب ورحت للهول كعدت انتبهت على روحي لحد الان بملابس الدوام كمت رحت للغرفه بدلت ملابسي ورحت للحمام غسلت وتوضيت ورحت صليت كعدت ادعي لاخواني واحد واحد ماريد اخسرهم ولا اريدهم يتأذون لان يتنافسون بالمحبه بكلبي .

رفعت ايدي ادعي ومغمضه عيوني انفتح باب الهول فتحت عيني ايمن ، كمتله حضنته بقوه وبجيت بعد متحملت حضني وبعدين وخرني مسح وجهي وكال.

ايمن: اويلي من صغرج خلكج خلك ترفه هههههه

نرمان : تعرفني ما اتحمل اشوفكم متأذين.

ايمن : اخوتج زلم مايصير بيهم شي وعيب تبجين عليهم..

نرمان : والنعم منكم والنعم بس الصار فوكه فوكه بعد ما اتحمل..

ايمن : الله كريم تهون ، وين ادهم..

نرمان : نام.

راح كعد على القنفه وكال..

ايمن: شنو الصار احجيلي.

حجيتله الموقف كله ضل صافن..

ايمن : معقوله سيلين يطلع منها هيج شي.

نرمان : ماعرف بس تدري وجها تعبان وادهم شك بيها شي وحتى كال احتمال سامر مأذيها بشي قوي بس من حجه وياها وانصدم بكلامها حتى ما اهتم اذا فعلا مريضه او لا بس كال متأكد راح ترجعلي من الصفر ..

ايمن: هذا تعب منها وعليها ...

نرمان : شلون يعني مفهمت..

ايمن : يعني خايف عليها وتعبان وبنفس الوقت تعب منها لهذا هيج حجه مستحيل ادهم يأذيها.

نرمان : ما ادري بعد..

ضلينه نسولف للعصر سمعنه صوت ادهم يون كمزنه اني وايمن دخلنه للغرفه جان كاعد ولازم راسه راح ايمن كعد يمه..

ايمن: هاا شنو يوجعك..

اشر على راسه ...

ايمن: نرمان جيبي جهاز الضغط بسرعه .

رحت جبته اخذه مني وقاسله الضغط .

ايمن: ايابه..

نرمان : هاا شكو.

ايمن: صاعد ..

نرمان: شكد؟

ايمن: ١٩

نرمان : خرب شنسوي هسه.

ايمن : اخذه للمستشفى..

عبالنه ادهم راح يعارض اذا كلناله بس مجرد طلب منه ايمن حتى يروح وياه كام وطلع صعد بالسياره عرفت اخويه انهد ومحتاج علاج فعلي لان لو مابيه شي جان ماراح .

ضليت بلبيت انتضر اجوي بليل ساعه ١١ ونص ، تلكيتهم من الباب ردت احجي اشرلي ايمن وخله ايده على حلكه همس ب اش بدون صوت....

سكتت دخلو لغرفه ادهم ، عدل المخاديد ونيم ادهم ، باوعتله مغمض عينه بألم والوجه اصفر مبين حيل تعبان ...

ضلينه يمه سهرانين وكمنه نحجي همس

نرمان : شنو بيه..

ايمن : ربج ستر لو ما متلاحك عليه جان انجلط..

نرمان : ياستار ياربي عود صدك.

ايمن : اي والله وضل نايم توه كعد..

نرمان : خايفه عليه خايفه يا ايمن

ايمن: شمدريني شو التمت علينه تحاصرنه من كل الجهات ...

نرمان : معقوله الكاعد نمر بيه احنه سببه فهد.

ايمن: ليش انتي بعدج شاكه.

نرمان : بس لو تشوفه شلون يريد يتعالج ومتلهف ويتشاقه ويه ادهم تكول فهد استغنى عن انتقامه ...

ايمن : بربج اللي يخطط ويتكتك ويسوي سوالفه الصارت ويه ايفين هذا مال واحد يأمنله والله لو يضل اخر بشر بالدنيا والباقي شياطين أأمن للشيطان وهو ما احط ايدي بيده لان الشيطان معروف شنو رايد منك بينما فهد متلون مامعروف شنو يريد وبشنو راح يضربنه ومنين..

نرمان : راسي راح يطك ...

ايمن : الله ابتلانه بواحد خبل الحمدلله والشكر...

ضلينه نسولف وبعدين فرشت بالكاع بغرفه ادهم ونمنه يمه مر اسبوع كامل صحته تحسنت نوعا ما بس نفسيا تعبان ، بهذا الاسبوع اخذ اجازه وبس اني داومت مرات اشوف سيلين من بعيد بس ما احجي وياها ماعرف شنو اللي ديصير وياها ليش بس بالامتحانات كاعد تجي ليش متداوم باقي الايام ، حيره ياربي ، خلص هذا الاسبوع والاسبوع الثاني داوم ادهم..

بس شنو شايل حقد الدنيا كله بكلبه يمكن اذا تحترك سيلين كباله ميدير بال وفعلا شفناها بالنادي هيه وزوجها جانو كاعدين واكو طلاب وطالبات بنفس الميز مالتهم يعني مجموعه ، انتبهت عليهة باوعت علينه ودارت وجها وادهم مدار بال كعد نزلنه ريوك تريكنه ومشى يومنه عادي وطبيعي ...

من رجعنه للبيت العصر اتصل فهد على موبايل ادهم جاوبته اني لان ادهم نايم..

نرمان : هاا فهد ..

فهد : ها فهد وسم عبالك البارحه شايفتني متسلمين عدل لو صرتي دكتوره ترقيتي..

نرمان : نعسانه اريد انام كول شعندك..

فهد : تجوني لو اجيكم.

نرمان : وين تجي يمعود لتوصل .

فهد : ليش مشتاقلكم اخوتي الاعزاء.

نرمان : بلا حجي ماصخ لخاطر الله تره مالي خلكك..

فهد : اهووو هسه تجون لو اتفضل يمكم.

نرمان : شعندك تجي غير اعرف.

فهد : اسكر يعني شعندي غير اتعالج ..

نرمان : ماعرف اشوف ادهم شيكول واردلك خبر.

فهد : هاي شنو انه اخوكم يعني ما اجي اله بحجز..

نرمان : هاي شبيك.

فهد : لعد شنو اله تبلغين الدكتور حسستيني كاعد بعياده واله حجز.

نرمان: غير اشوف يستقبلك لا يكدر ميكدر..

فهد : انت كليله فهد يكول استفاديت هوواي وبلش يتغير ميريد يكطع الجلسات وصار اسبوع ممسوين شي.

نرمان : ماشي ماشي..

فهد : يلا باي..

نرمان : هلووو

سديته وانتضرت ادهم كعد وبلغته كال.

ادهم : احنه نروح وهم اجيب مريم ..

نرمان : احسن لان ايمن موجود وخاف تصير لغوه بينهم..

ادهم : اعرف اعرف يلا بدلي علمود نروح ونرجع من وكت اريد انام تعبان

نرمان : ماعندي شي بسرعه اكمل.

ادهم : منتضرج بالسياره.

طلع بتراكسوده حتى مبدل طلعت وراه ورحنه لبيت اهلي سلمنه وكعدنه اجتي مريم بوست ابوها وكعدت بحضنه ضل يسألها عن يومها وشصار وياها بعدين سمعنه فهد يصيح..

فهد : ففه ياففه تعاي سلمي عدنه خطار.

وره شويه دخلو هو وياها جانو يمشون متحاضنين هو حاضنها من كتفها وهيه من خصره...ادهم رفع عينه عليهم ورجع دنك على دفتر الاملاء مال مريم جانت تشوفه درجتها..

ايفين : شلونك عمو..

بدون ميرفع راسه جاوبها بعدم مبالاه..

ادهم : زين.

راحت كعدت وفهد اجه يم ادهم وكف وكال.

فهد : يلا نبلش لو تعبان.

ادهم رفع راسه بتعب ضيق عينه ورجع دنك دخل اصابعه بشعره جر نفس قوي تنهد وكام.

ادهم : يلا امشي..

مريم : بابا انطيني موبايلك اريد العب بيه العاب حباب كملت كل واجباتي.

ادهم : مو تخلصين الشحن.

مريم : لا اشحنه اذا خلص.

طلع موبايله وخلاه بيدها ، كل يوم تلعب بيه ساعه مرات نص ساعه جان ميقبل ابد بس هسه لان تعبان وهيه تضل تلح وياه على صديقاتي عدهم ويلعبون وليش بس اني وتضل تبوس بيه لهذا سمحلها ساعه تلعب بس تتوزع على طول اليوم يعني مو كعده وحده..

دخلو للأستقبال واني رحت وراهم لان الصراحه كمت ما اطيق اكعد ويه ايفين بمكان واحد كارهتها بشكل .

كعدو واحد كبال الثاني على ميز الطعام ، وبلش ادهم ينطيه تمارين وفهد يسويها ...

بس ادهم مو على بعضه مبين عليه التعب وفهد ابد ميفوت هيج فرصه صفن بوجها وكال...

فهد : اسناد المرفق على الطاوله واضع الابهام تحت الذقن رافع السبابه الى الصدغ ، دلاله على الورطه بالحديث وماعندك وسيله تخلصك من المقابل مممممم والحركه اشبه يتصويب المسدس نحو الرأس يعني مثل منكول انتحار هههههههههههه

ادهم : هسه شتريد.

فهد : حاسك متورط ويايه ومجاي تعرف شلون تتخلص مني وبأي طريقه.

ادهم جر نفس طويل وكال.

ادهم : كاعد افكر هذا التعب كله وتالي تطلع تمثل عليه وانت كاعد تهدر وقتي بالخالي بلاش تره حرام عليك اذا هيج تسوي

فهد : ممم يعني قصدك انت شاك بيه انه اكذب..

ادهم رفع اكتافه وبسط ايده بحركه تدل على الاستسلام ...

فهد : لا لا لا هاي الحركه تنطي شعور للمقابل انت عندك شك بناحيتي وهم تنطي شعور انت غير مؤهل لاتخاذ القرارات او اعطاء رأي حكيم ...

نرمان : انت جاي تتعالج لو تفسر حركات ادهم

فهد : الاثنين .

ادهم : عوفيه اريد اشوفه وين يوصل..

بعدين رفع عينه على ادهم

فهد : يوووووووو هاي انت شصاير بيك تره انه حرت وتاهت عليه اعالجك تعالجني شنو القضيه هسه اكدر اكول انه وانت ثنينه مرضه...

سكت ادهم مجاوبه واستمر يشرح ودمه محروك وفهد لزم الدفتر وكام يرسم ....

باوعنه اني وادهم على الرسمه ونشوفه راسم رجال ملابسه مهترئه وممزقه....

سأله ادهم كاشه نفسه....

ادهم : هاي شنو ؟؟؟؟

فهد : هاي نهايه الدكاتره النفسسين يشخطون كد ما متشعبين بالعلم المعقد يعني تكدر تكول كلشي يزيد عن حده ينكلب ضده لهذا نصيحه اخويه احب اكلك لتكثر منه هووواي.

سكت مجاوبه ادهم ، بس كل شويه ادهم يسرح وفهد يجاكره اخر شي كام ادهم وكال.

ادهم : انت اساسا جاي تضيع وقتي هيج بس تضحك وتستهزء اذا تحب تتعالج انطيك عنوان دكتور مختص بالاعصاب وعلم النفس وهو يعالجك..

جان كاعد على الكرسي رجع راسه ليوره وباوع لادهم.

فهد : يول ترضه يكولون على اخوك خبل اريدك انت تعالجني..

ادهم : هو انت خبل قابل جذب..

طلعنه وسد الباب واني هم ردت اطلع جان يكول.

فهد : لحكيه بسرعه خاف اكلج...

درت وجهي وطلعت....

اخذنه مريم وطلعنه ،رجعنه للبيت..

سويت عشا لايمن تعشه غسلت المواعين ورحت نمت..

ومشت الايام وتقربت السنه تخلص وصار ٣ اشهر على الحادثه الصارت بين سيلين وادهم ، مرات نشوفها وجه بوجه عبالك غريبه لا احنه نسلم ولا هيه وادهم من يشوفها يلبس وجه القساوه وياها...

رتب اموره كلها بهاي الفتره علمود يسافر وقدم اجازه اربع سنوات وكال هناك بس اروح اتعين عندي فرصه جبيره واكدر اطور نفسي اكثر بهذا المجال...

اجتي امتحانات اخر السنه وتقسمنه على الاقسام نراقب بالامتحانات عدنه نظام يغيرون الاساتذه مال الاقسام علمود ميصير رد للطلاب احنه جدولنه كل يوم بقسم معين واليوم جان بقسم سيلين ، دخلنه اني وادهم نراقب اني عيني على الطلاب وافتر وادهم واكف بالوسط متكتف ، سيلين عينها بالدفتر وتكتب من وصلت يم ادهم همسلي..

ادهم : بس شوفي لزمتها للقلم ..

باوعت لكيت ايدها ترجف..

نرمان : خاف بيها ضعف او فقر دم.

ادهم : شوفي وجها ولج يافقر دم هاي منتهيه شسوي فهميني..

نرمان : ماعرف حيره زين ناخذها للدكتور نسويلها فحص كامل شنو رأيك.

ادهم : ياريت اذا كدرتي تقنعيها ، باعي حركاتها كلها مو طبيعيه ..

نرمان : شنو الموطبيعي عدا رجفه القلم.

ادهم : شوفيها تحك بجسمها لو تفرك بزندها والله هاي حركات المدمنين انه قاري عنها وغالطت نفسي ذيج الفتره بس هسه تأكدت.

نرمان : لعد ليش سكتت عنها يا ادهم اذا فعلا متعاطيه نعالجها..

ادهم : ليش هيه نطتني مجال شفتيها شسوت ومن تشوفني كأنما متعرفني.

نرمان : بعدين نحجي اسمع الغش صار بفلس..

سكتنه بلشو الطلاب يطلعون واحد وره الثاني وهيه هم طلعت تقرب مني ادهم وكال..

ادهم : طلعي وراها وحاولي تقنعيها تروح طبيب حتى اذا مو ويانه تروح ويه ام زوجها اهم شي يشوفها دكتور ..

نرمان : والمراقبه شلون.

ادهم : معليج انه اراقب..

اخذت جنطتي وطلعت رحت للنادي لكيتها كاعده بنفس مكانها شافتني ابتسمت كل مره تدير وجها اليوم لا رحبت بيه من بعيد وحسيت من ملامحها محتاجه لمساعدتنه ومساندتنه الها بس يمكن تستحي تكول ورادت احنه نبادر او ما الها عين ماعرف هيج فسرت رحت يمها كامت بوستني وكعدت من بعد السلام سألتها عن حالها كالت.

سيلين: تعبانه كلش نفسيا وجسديا وحتى اعصابي تلفت تخيلي شعري ينهلس من وحده وجهي تغير ماعرف شبيه ، رجفه بجسمي اريد الزم الشي مرات يوكع من ايدي.

نرمان : حاولتي تزورين طبيب تشرحيله حالتج..

سيلين : كتله لسامر كال هذا تعب الامتحانات والدوام كام ياخذلي اجايز وبس بالامتحانات اداوم..

نرمان : كاعد يأذيج وشنو سالفه ادهم...

سكتت ورفعت راسها باوعت ورايه التفتت سامر واكف سلمت عليه ورحت ....

سألني ادهم عليها ملهوف سولفتله والقلق ازداد عدنه بس مابيدنه شي نسويه ....

بعدها كعدنه بلبيت وخلصت الامتحانات وانقطعت اخبار سيلين تماما...

وداني لبيتهم حتى ازورها واتطمن عليها اكثر من مره يكولون طالعه لو نايمه ونرجع...

اقترب موعد سفر ادهم وطلعت الموافقه على الاجازه مالته ومضل شي ويطير حتى اوراق مريم حضرها....

بليل ساعه ٢ ونص اجه اتصال لادهم فزيت على صوت صياحه يصيح الووو سيلين الوو رحت فتحت الباب مفزوعه اجه ايمن هم مخروع مثلي...

نرمان : شكو ياستار شصاير بهليل ...

ادهم : سيلين خابرتني تكول عمو وكعت بمصيبه وبس انت تكدر تحلها الي وانسد الخط اخابر مغلق...

يتبع....