غلطة عشك

الجزء 17

#غلطة عشك
#الجزء 17 والاخييييررررر
#بقلمي هديل
#شمعة امل

فرات ......بقت علاقتي برواسي شويه متوتره هاي ألفتره
بعد ماعرفت بروحتهه لهيام
العجيب بيهه انه ماسوت مشكله جبيره ولا لمت هدومهه واخذت الجهال  وراحت لاهلهه
الهدوء الي عدهه يخوفني ...
والله انتن مصيبه النسوان اخاف احجي النوب تتعارك واخاف ابقى ساكت تطلع محظرتلي فد شغله
ويطلع هذا الهدوء الذي يسبق العاصفه
....والاحسن خلي انطيهه مجال مااحجي هسه ....
طلعت من البيت ....أتصلت على هيام
هيام ......ها فرات .....ليش تتصل
فرات ...أسأل عنج ....
وهم حتى اعتذرلج عن جيت رواسي الج
هيام ....يعني صدكت من كتلك اجتني
فرات ....اي ...وهيه مانكرت هذا الشي
بس انتي ليش مكلتيلي بوقتهه
هيام ......لان مااريد اخرب حياتك
فرات ...والحب الي جنتي تحجين بيه
هيام .....اوووووف ......
شوف فرات ...اني صح حبيتك ..وماانكر هذا الشي ...
بس بنفس الوقت مااريد ابني حياتي على خراب بيتك
فرات ....زين واذا هيه توافق على زواجنه
هيام ....مااعتقد توافق ..
لان هيه تحبك هوايه وتغار عليك
ولكن إذا فعلا وافقت اني اكيد أقبل
انت اول حب بحياتي ...
ولحد الان ماالتقيت بشخص يشبهك
فرات .....تدرين حتى انتي اول حب الي
هيام ....قصدك خيانه
فرات ....ليش ....اني المن خنت
هيام ....زوجتك ...لو نسيت ....
فرات ......سدي الموضوع هيام ....
مااريدج تفكرين هيج
هيام .....اصلا اني لغيتك من حياتي
ومااريد بعد اي اتصال بيك
فرات .....بس اني مالغيتج ...
هيام ....شوف فرات ...آخر كلام عندي
اذا زوجتك تقبل فاني موافقه عليك
واذا متقبل خليني اعيش حياتي بدونك

فرات ....ليش احسج تغيرتي ..
مو هذيج هيام الي جنت اعرفهه
هيام .....لع مو تغيرت .....بس فهمت
انه بهاي الدنيه دائما الشخص الي تحبه وتتمناه يكون من نصيبك مستحيل يصير الك إلا ماندر
يعني احنه نريد شكل ..
والدنيه تقسملنه غير شكل ...
أحبك ....وروحي بيك ......بس اعرف تأليهه انت مو الي
دائما الإنسان يحب الشخص الصح
بس بوقت غلط
لو من يفوت الاوان يله الطرف الثاني يحس بيه..... بعد ميبني حياته ويكمل مستقبله ويه شخص مو من اختياره
بس الدنيه تختارلهياه

وهسه ياريت تعوفني
..... اريد اروح عندي محاظره بعد شويه
يله باي
فرات .....ماشي ...باي ...

كلامهه أثر بيه
وخلاني احس بيهه شكد كبرت وعقلت
هيج وحده حرامات اعوفهه
بس رواسي ابد ممقصره ويايه واني هم احبهه خلفتلي 3 اطفال ريحتهم تشبه الجنه
من اشوفهم ترد روحي
بس هيام طعم ثاني ....مااعرف شلون اوصفهه مااريد اعوف رواسي
ولا أريد انهي علاقتي بهيام
الضحكه وياهه غير شكل
النبض وياهه يختلف
قبل جنت مااريدهه بس من عافتني هذيج الفتره
كل مااصفن اشوف نفسي ادور عليهه بذاكرتي
وينعاد شريط الذكريات .....
جنت اصيح بيهه
واشوف الدمعه بعينهه بس تسكت وتطيعني ومتحجي شي يزعجني ....

شسويت بروحي ....وشسويت بيهه ....

.....هيام. ......بعد المكالمه ويه فرات ...
حسيت مثل واحد جان صاعد جبل وبقى يراوح بمكانه ...
لا هو يكدر ينزل  بسهوله
وصعبه عليه يكمل صعود
بس حجيت وياه حسيت انهد حيلي

ليش انت
...مو هذوله الشباب أشكال كدامي
لو بيدي ....اخخخخخ عفيه قلب
متسوي شغله بيهه خير بحياتك ليش تنبض للناس الغلط ...

.....يارب حلهه انت من يمك ....
........
رافد .....لحد الآن ماكو تغيير بحياتي
قبل أسبوع تقريبا  رجعت داليا لزوجهه
.....اعتبرتهه غلطه وانتهت
وحتى رفقه ....أكبر غلطه بحياتي
الي يحب لازم ينجوي بالحب
واني انجويت مرتين
وان شاء الله ماكو الثالثه .....

.....هيام ......بعد ما خلصت الدوام ....
رجعت للبيت كلش تعبانه وراسي يوجعني
يادوب تغديت واخذت حبايه

رحت لغرفتي كلت انام شويه ....
هستوني حطيت راسي على المخده
وجان يجيني اتصال ...
.....يوووووه اكيد عدهه فد سالفه تغث مثلهه ...
....الووووو....
رفقه ......هلووووو شلونج حياتي  ....
هيام .....هلووووو ....انتي شلونج ...
رفقه ...لج بذات ليش متسالين
هيام .....انتي مو تدري ماعندي مجال
بعدين انتي هم متسالين يعني متعادلين

...رفقه ....اي ...ههههههه ....لج شلونج مشتاقتلج
هيام ....اني أكثر ....شنو اخبارج

رفقه ....إخباري توب والحمد لله
هيام ...شلون ....
رفقه ....اريد اعزمج بعد اسبوع العقد مالتي واريدج تجين ....
هيام .....هنا عنصر المفاجأه صدك لعب دوره كلش زين
حجيت ويه روحي ...
......اي بيهه الخير ..
ولج شو مكلتيلي قبل انتي متعرفه على أحد جديد
رفقه .....لا ابد صدكيني ...
ناس معارف ماما ...يعني من اقارب وحده من صديقاتهه وشافني صدفه كنا رايحين يمهم وهو اجه
ومن شافني انعجب بيه وراد يتقدملي
وهيج اني وافقت
هيام ...بقيت احجي ويه روحي ...
.........لعد وين راح هذاك الحب الاسطوري لرافد ...من جنتي تكلين ميفرقنه غير الموت
ولج صدك انتي ...مااريد احجي زايد

رفقه ......هاااااا شبيج صفنتي ...
وين رحتي ....

هيام ....لا ماكو شي ...
شايفه الخير حياتي ....
رفقه ...ازعل تره اذا متجين ...
هيام .....لا شلون لازم اجي ...
رفقه ...اوكي باي ....هم يله الحك اعزم باقي صديقاتي ...

هيام ...اوكي باي ....
.....
هسه شلون ....والله يدنيه شكد عندج سوالف ....
....خطيه شلون برافد اذا سمع ...
....خاف يسمع من غير مكان هسه ه يكول ليش مكلتيلي
وخاف احجيله وهم ينصدم ....
شلون يربي ..
بقيت بحيره ....

......وبعد تفكيييييييررررر
كلت خلي اتصل على فرات وهو يكله
.....وهم بعد تفكييييير غيرت رأيي
هسه يكول هاي بعدهه .....
ولو خلي يولي هذا الموضوع
.....أحسن شي اتصل ب.......

........الوووووو
رافد .....الووووو
هيام .....شلونك رافد أن شاء الله زين
رافد ......الحمد لله انتي شلونج
هيام .....زينه والحمد لله. ...
رافد .....شعجب تذكرتيني هسه
هيام ......بصراحه مجنت اريد اتصل بيك
بس....
رافد .....اي .....شنو ...
هيام .....ردت أسألك بالاول
انت بعدك تحب رفقه
رافد .....اووووففف هيام ليش تذكريني بيهه
وانتي تعرفين كلش زين رفقه لغيتهه من حياتي
غلطه وبعد متتكرر
هيام ....متأكد
رافد ...اي طبعا .....ليش شكو
هيام ...يعني متزعل اذا سمعت فد خبر يخصهه
رافد .....ولا راح تعنيلي شي ..
هيام ...متأكد
رافد ...  اي طبعا ...ليش شنو الموضوع
هيام .....طبعا اني جنت متردده انه اكلك
بس كلت خاف تسمع من غير مكان وتنقهر

.....رفقه خطوبتهه بعد اسبوع ....
....وهنا صار هدووووووووء
.....شو سكتت
رافد .....لا ماكو شي .....
بس هيه بعد متهمني
هيام ...يعني مازعلت
رافد ....ولا حتى اهتميت .....
يله .....الله يسعدهه
هيام ....بعد كل الي سوته بيك
رافد ....صدكيني محاقد عليهه
هيه اختارت حياتهه وبعد متعنيلي شي
......رفقه بالنسبه الي انتهت من زمان

هيام .....والله تريد الصدك ...
هاي غبيه وهيه صدك متستاهلك ...
انت قلبك ابيض وتستاهل كل خير
ويارب تلكي الي تسعدك ....

......رافد .....اشكرج ....
ولكي بالمثل ....
هيام ....😊شكرااا
يله اعوفك هسه خاف عندك شغل

رافد ....اوكي .....باي ....

....
طالما هيه اختارت طريقه
اني هم اريد اختار طريقي ....
والخبر مفاجأه

اتصلت على فرات ....وخبرته بالي كالته هيام
وطبعا هو هم حجالي على الي صار وياه ويه رواسي وويه هيام ...
....المساله بالنسبه الك محسومه
انت متزوج وتحب زوجتك وجهالك
بعد ليش تريد ترتبط بوحده ثانيه وتخرب حياتك
وانت تعرف بمرتك متستاهل هيج اذيه منك
فرات .....هيه صح متستاهل
بس اني حبيت هيام
رافد ....انسى .....ماكو شي بعد اسمه حب
ولو تفتر الدنيه كلهه متلكي اثنين حبوا بعضهم وتزوجوا
إلا ماندر ...
ومن يتزوجون هذا الحب كله ينتهي مع أول مشكله تصادفهم
خليك واقعي فرات ..ولاتغلط هيج غلطه
وعوف البنيه بحالهه
وانت دير بالك على بيتك ومرتك وجهالك

فرات ...  على كيفك ...شو صاير مصلح
رافد ....مو المساله ...بس مااريدك توكع بغلطه باجر تندم عليهه
فرات ...ويجوز مااندم
رافد ....هي في حاله وحده بس ...
إذا وافقت رواسي عليهه
فرات ...يعني انت هيج تشوف
رافد ....اي ...ماكو غير حل ...

فرات .....هم صحيح ....
زين وانت شراح تسوي ....

رافد ....اني اكلك .............
...........

حجيت ويه اهلي ...
طبعا ابويه كلش تعصب ..بس بعدين قنعته
امي محجت شي ...ماطول اني مقتنع

......نطينه خبر للجماعه ورحنه حتى نخطب
دلال بنت عمي ...
طبعا الخبر بالنسبه الهم مفاجأه محد متوقعهه
أما دلال ....فما حجت ولا كلمه
المهم اني حجيت كل الي عندي وطلبت اكعد اني وياهه وحدنه
وقنعتهه وكلتلهه الموضوع السابق انسيه
وجان غلطه ومن هالحجي
والدليل اني نسيتهه بمرور الوقت
وهوايه حجي
هيه مكالت شي ....
بس طلبت مهله تفكر وبعدين تردلي الجواب

....بالبيت ....
ام فرات .....شفت دلال ...خطيه البنيه بعد متعرف شتحجي
ابو فرات .. والله يا ام فرات اذا تردين الصدك
اني اشوفهه صدك مناسبه لرافد
والبنيه تقريبا احنه مربيهه على ايدينه
ام فرات ....اعرف يارجال مو هذا قصدي
..أقصد شلون يتزوج دلال وهو قبل جان يحب اختهه
ابو فرات.  .....اي وشنو يعني ..
بس احنه لارحنه خطبنه ولا وصلنه
واذا مثل متكلين جان يحبهه
فهاي انتي كلتيهه جااان
يعني ماضي وانتهى .....
وبكل الأحوال.....
...... هو القرار للبنيه تريد توافق أو لا

....ام فرات .. يعني هيج تشوف ..
ابو فرات. .....اي ....وهسه عوفيني اريد اروح انام ...

دلال .....بعد أيام من التفكير الطويل
وحتى اتصلت بداليا
مااريد بعدين من تعرف تصير مشكله ...وهيه هم خطيه اكدتلي انه رافد انتهى من حياتهه بمجرد زواجهه
يعني صدك القسمه مثل ميكلون
تلجم الحلوك ...منو جان متوقع ...
مااكدر اكول لع ...
بعدين نطيت موافقتي ...
وصارت الخطوبه بسرعه
ماطولنه أسبوع وصار العقد ....

.....ولبسني النيشان. ....مامصدكه ....
وابد مجنت مفكره برافد انه بيوم من الايام
ممكن يصير الي ...
.....
هيام .....صارت خطوبة رافد بعد خطوبة رفقه ...بيومين ...
واتصلت عليهه وخبرتهه وهيه ولا اهتمت
والله عفيه عليك رافد من عفتهه
صدك هاي متستاهلك ...

......
فرات ....الحمد لله رجعت علاقتي زينه برواسي ولا كأنه اكو شي صار ...
وحجيت ويه هيام كلتلهه احنه علاقتنه مستحيله
واتفقنى نبقى مجرد اصدقاء ...

..بعد فتره سمعت تزوجت
رافد .....تزوجت دلال ...والآن عايشين ويه اهلي مرتاحين والحمد لله
والشقه اجرتهه كلت استفاد من فلوسهه
ويجوز اشتري فد قطعة أرض وابنيهه على مزاجي مستقبلا
....بعد الله مراد يرزقنه اطفال ...
واحنه هم ما جنه مستعجلين على الخلفه

....بعد فتره سمعت من هيام انه رفقه تطلقت بعد مشاكل وجرجره بالمحاكم
وهسه رجعت مذلوله لامهه وزوجهه حتى الذهب منطاهياه طلع بايعه ومااعرف بعد باقي التفاصيل
وبيوم اتصل بيه رقم مااعرفه
ومن حجيت وياهه طلعت رفقه ...
رزلتهه وسديت المبايل بوجهه وكلتلهه
ديري بالج ترجعين النوب تتصلين ...
...
اما هيام ....آخر مره سمعت بيهه تزوجت
والآن مهاجره هيه وزوجهه وبعد انقطعت اخبارهه ...
بعد مده ....عرفت دلال حامل ...
وبعد تسعة أشهر
وكانت ولادتهه صعبه وعمليه
جابت بنيه والحمد لله
الآن عايشين مرتاحين وهم بعدنه يم اهلي ...

سبحان الله شوف البشر شكد يحب يرتب حياته ويعيشهه مع ناس هو يختارهم
لكن بالنهايه تبقى الدنيه هيه الي تختار وتجبره يرضى بنصيبه
يعني ميصيبك غير نصيبك ....

.....وهنا انتهت قصتنه ....

ويارب تكون عجبتكم ....

هيه مو انتهت اكيد أبطال القصه كل واحد بعده عنده حياة مامكملهه
ولكن ماحصل بيهه فد تغيير يذكر

أتمنى الخير لإبطال القصه وللجميع
وان شاء الله السعاده تغمر قلوبكم .

⚘⚘🌷🌷🌷🌷🌷🌷🌷🌷⚘⚘