في إحدى الشقق المفروشة بطنطا
يدخل عاصم وتستند عليه شروق لتستقبلهم فيروز ببشاشة هي وخطيبها حسن
فيروز.... حمدلله على السلامه، تعالوا بشرونا ولد ولا بنت؟
حسن... باينة الفرحة في عيونهم أهي ياروزا، أكيد ولد
عاصم... بفرح... بنتين
فيروز... بجد؟ يعني توأم؟ الله مبرووك
شروق... توأم مماثل شوفي كرم ربنا؟
فيروز... طبعا ربنا كبير، مفيش أحسن منه
حسن... احنا كمان ناويين نفرحكم ونتجوز
شروق... بصراخ... بجد؟
عاصم... اهدي ياشروق لأحسن افكر انك رايحة تولدي
شروق... مبروك ياروزا!
فيروز.... حبيبتي أكيد طبعا نبدأ تجهيز بقا
شروق... ملكيش دعوة إنتي ياعروسة فاهمة؟ انتي هاتفضلي قاعدة معززة مكرمة لحد ماسي حسن ياخدك على بيته
فيروز... مش للدرجادي يعني
شروق... انتي تسكتي خالص، انا لازم اتعبلك في فرحك ولا ايه ياسطا حسن؟
حسن... اللي تشوفوه
عاصم... مبروك ياسطا، مبروك
حسن... ربنا يبارك فيك ياعصوم، يلا بقا عقبال مانحصلكم، كفاية انك هتبقى أب قبلي، مبروك ياسيدي، مبروك يامرات أخويا
شروق... الله يبارك فيك ياسطا حسن
كانت هذه حياتهم خلال السنتين، حسن هذا الجديد، أصبح فردا من هذه العائله الجميلة في وقت قصير
ودخل قلوب الجميع وأصبح أخا لعاصم لاصديقا له وأخا لشروق يدافع عنها ويقف في ظهرها في غياب صديقه
أعجبت به فيروز ففضل عاصم أن يكون حسن جزءا رسميا من العائلة بزواجه من فيروز
هو ميكانيكي بسيط ولكنه يمتلك قناعه تؤهله للعيش في سلام
كانت المشاكل تواجههم وخاصة مشاكل المعيشة، فقد تركوا المال خلف ظهورهم ولم يبالوا له راجيين الحب والمودة بعيدا عن لعنة المال وحرب النسب
التي يشعلها الجد مابين لحظة وأخرى
إنتقلوا مؤخرا لهذه الشقه بعد أن حصل عاصم على زيادة مالية في عمله....
كاميليا.... بجد ياعاصم؟ بنتين مرة واحدة؟
نادية.. شوفي كرم ربنا، بعد سنتين جواز ربنا رزقهم ببنتين
عزت... هتسموهم إيه بقا إن شاء الله؟
شروق... بعد إذن الجميع أنا ناوية أسمى دهب ونادية
نادية... نادية ايه ياشروق الاسم دا بقا قديم اووي
كاميليا.... بصراحه اه ودهب برضه مش خفيف تحسيه تقيل شوية
فيروز... طيب إيه رآيكم أقترح أنا إسم
عاصم... هاتقترحي إيه؟
فيروز... ندى بدل نادية إيه رأيكم؟
عاصم... حلو ده
شروق.... مش مهم عندي الأسماء المهم عندي محبتكم ليا وليهم وليهم بالأكتر
كاميليا... أكيد ياحبيبتي، معزتهم دي حاجة خاصة، دا انتم رديتولنا روحنا بعد ماخلاص فقدنا الأمل في اللمة دي، حبكم جمعنا سوا
عاصم.... حبي ليها قواها وخلاها تتطمن وهي معايا، وحبها ليا كبر أكتر وأكتر وإداني القوة اللي هقدر أحارب بيها كل الدنيا عشان تفضل بس جمبنا
شروق... ربنا يخليك، أقصد يخليكوا ليا...
وقف عاصم إلى جانبها وهمس في أذنها... ربنا يخليك في حياتي مكسوفه تقوليها؟ بقا كدا مش قادرة تقوليلي كلمة حلوة قدامهم دايما بتجمعي كدا ماشي ياشيري
همست له شروق ببشاشه... حبيبي بطل حلو كده وانت أموص كدا ياجلبي
عاصم... اتريقي ياشرووق ،بس لما نكون لوحدنا إبقى استنجدي بيهم 😂😂ماشي؟
شروق... أنا مالي بقا الله؟
عاصم... بحب... حقك عليا ياستي عمتا، انا كنت عاوز اقولك اني عايز البنات شبهك، وطعمين زيك وفي جمالك وبساطتك مايطلعوش....
كاميليا.... احمحم ،بتتوشوشو في إيه؟
شروق... آصل ياماما عا....
وضع عاصم يده على فمها يكممه
عاصم... بتحذير... هوش، إيه ماسورة وهتتفتح علينا اهدي ايه يابنتي هتفتني عليا من أول قلم؟
ضحك الجميع على منظر عاصم وهو يكمم فم شروق بطريقه مضحكه وعلى طريقه لهفته مما جعلهم يخمنون أنه كان يغازلها أو يلاعبها بحديثه المازح فهو لايفعل ذلك إلا مع من يحب
نادية... امم شكلك عامل عملة، وكنت خايف انها تقر عليك
عزت... شكل الموضوع غير كدا خالص، طب ماتدخل ياحبيبي أوضتكم وتقولها اللي انت عاوز تقوله كله
عاصم.. بإحراج... أبدا ده انا كنت...
شروق... بخجل... خلاص بقا ياعاصم فضحتنا
نظر لها عاصم بحملقه.. أنا ؟ماشي
شروق.. محاولة تغيير الموضوع.... ماما! حضرتك جاهزة لبكرا أكيد
عاصم.... اه طبعا لازم تبقى جاهزة، العملية هتكون بكرا بإذن الله وبإذن الله هتنجح وهتبقى زي الفل
نادية... يابنتي أنا زي مانتي عارفه خلاص راحت عليا ليه المصاريف دي يعني بناتكم أولى بيهم، مش مهم أنا
شروق... سيبيها على الله، ربك بيرزق، ومفيش طفل بييجي الدنيا إلا وربنا بعتله رزقه خلينا كده نصرف أول بأول هنحوش لإيه؟
فيروز..... ❤️❤️
عاصم... فيروز إنتي بتبصي لشروق كدا ليه؟
فيروز.... بحب... بحاول أتعلم منها، أصل بصراحه أنا كنت حاجة ودلوقتي بقيت حاجة تانية خالص، يمكن فيه بنات زيها بس انا بصراحه يعتبرك حاجة كبيرة في حياتي ياشرووق، إنتي حاجة جميلة أووي
تسلم البطن اللي شالت، وتسلم الإيد اللي ربت
قامت فيروز وقبلت يد والدة شروق، وسط تأثر العائلة بموقف فيروز منذ لقائها الأول بشروق
فيروز... عارفه أنا مصرية وباريسية في نفس الوقت
يعني أصلي وجذوري شرقي وتربيتي غربي
عن مواقف زوجة الأب من بنت جوزها بالنسبة للثقافتين زي الفرق بين الشمس والقمر الليل والنهار طبعا إلا من رحم ربي
بس طبعا حتى الفرق دا بيبان، لكن أقسم بالله أنا ماشفت زي التناغم اللي بينكم دا
يعني مش انتي اللي خلفيتها ومع ذلك صفاتك كلها هي اللي ورثتها
نادية... صحيح مش أنا اللي خلفت، بس أنا اللي ربيت، أنا اللي أسست، أنا اللي سهرت وتعبت، فكان لازم ربنا يرزقني بثمرة تعبي دا في الأخر، وبعدين الحمدلله الذي لايحمد على مكروه سواه، الحمدلله في السراء والضراء الحمدلله والشكر لله
عامر بحماس جنوني.... يعني أخيرا عرفت مكانها، أنا مش مصدق وأخيرا بعد سنتين؟
... بس ياعامر باشا دي متجوزة عاصم باشا أخو المدام صفا و....
عامر.... وهو أنا طلبت منك تعرفني تفاصيل؟ أنا طلبت منك تعرف مكانهم وبس ومتشكرين ابقا عدي عليا في المكتب انهارده اديك حسابك
.... ماشي ياعامر باشا ومبروك مقدما لإني عرفت إنها حامل
عامر.... بصدمة... َحامل؟
.... أيوة، بس معرفش تفاصيل أكتر من كدا
عامر... ماشي روح انت
عامر.... لنفسه بحماس.... ماشي ياعاصم انت وشروق، المرادي مش هتقدروا تغيروا مصيركم لإن مصيركم هيبقى في إيدي لازم كل واحد ياخد حاجته اللي كانت ليه، وشروق كانت ليا وهتفضل ليا طول العمر والمرادي مش بس هاخد منك شروق دانا هاخد منك إبنك والمرادي مش هتقدر تقرب منها او تأخذها مني تاني
ضحك بشر وهو ينوي لهم الكثير فقد تسببت شروق في كسر قلبه حينما قتلت طفله وحينما هربت منه بعدما فكر أنه يعطيها فرصة أخرى لكن خانته من وجهة نظره وعليه الإنتقام
فلاش بااااك
عامر... مين ده؟
السكرتيرة... دا واحد بيقول إنه يعرف حضرتك من زمان وعاوزك ضروري
عامر... بغضب... وإنتي شايفني بقا عشان رجعت الشغل وبدأت من تاني إني في مزاج أقابل أي حد؟ أخرجي ومتدخليش حد عليا
السكرتيرة... يافندم دا عاوزك ضروري و...
عامر... بغضب... مش أنا قولت متدخليش حد؟
أتى صوتا من خلفه.... بس أنا مش أي حد ياعامر بيه، أنا مش أي حد
عامر... بصدمة... إنت؟
... اه انا، وانت عارف لو مش عاوزك ضروري مكنتش هجيلك، دا انت صحبي برده
عامر... اخرجي ومتدخليش حد علينا
السكرتيرة... حاضر يافندم
عامر... خير
الرجل بتقييم... اتغيرت كتيير عن آخر مرة شفتك فيها بس أقدر أعرف السبب، البنت إياها مش كدا؟
عامر.... بنت مين؟
الرجل... بإبتسامة صفرا.... شروق
عامر... بكذب... مليش علاقه بيها من آخر مرة إياها دي..
الرجل... بخبث.... خلاص ،انا كنت شفتها من فترة كدا ففكرت انك بتدور عليها، يلا شكلك استقريت مع مراتك، ربنا يوفقك
عامر.... بلهفه.... انت عارف مكانها منين؟ إوعي تقول انها عايشه في طنطا؟ لأن انت حياتك كلها في طنطا، قليل لما....
الرجل... مش هماك؟
عامر.... وصلني ليها، رجاءا، فيه بيني وبينها تار كبير اووي وبعدين انت مش زميلي؟
الرجل.... هي عمتا اتنقلت من البيت اللي كانت فيه، بس انا مسكت طرف الخيط وبدأت أعين واحد يراقبها، صح هي اتنقلت من البيت بس ماتنقلتش من الكلية
عامر... كلية ؟
الرجل... اه ماهي تقريبا كدا بتدرس في الكلية
عامر.... طيب ممكن اعرف مكانها؟
الرجل... تمام يبقى نتفق
بااااك
تنهد بخبث وشر وهو ينوي الكثير
طبعا دا فصل صغير بس وإنشاء الله هحاول أكبره وأكتر الأحداث
وإستعدوا لمفاجئة إن شاء الله خلال الفصلين تلاتة اللي جايين هتغير مجري الأحداث وتشيق القصة
تسابيح العشق
سأبقى بإنتظار يوم جميل صنعته بمخيلتي
الكاتبة الصغيرة
الكاتبة أسماء العمري