#أحبيني_بلا_عقدِ((السجين777))
#الحلقة_1
.
.
.
#مشهد_من_الحلقات_القادمة👇
#الجزائر_قرية_عين_أميناس_الحدود_الجزائرية_الليبية
((من بين سنابل الزرع اللي كنت متخبي وسطهم قدرت انشوف رجليهم وهما يتحاووس ويدور عليا ...وكيف ايعيطوا لبعضهم باللهجتهم الغريبة اللي مش قادر نفهم منها الا اشوية كلمات ...بس كنت عارف انهم يسألوا في بعض عني و وين ممكن انكون أختفيت؟؟
واحد منهم يشاور لصحابه : حوصو عليه في كل بلاصه فيسع فيسع
وبدوا يجروا في كل مكان ....وأني وسط خوفي أنهم يلقوني ...كنت نسمع في صوت دقات قلبي المتسارعة ...وأنحاول انسيطر على أنفاسي المتقطعة...جبيني ايصب عرق ..رفعت شعري عن وجههي ...وحاولت ناخذ كم خطوة للخلف على قد مانقدر من غير ماحد يسمعني ...بس صوت الزرع اللي يتكسر تحت رجليا خلاني نوقف مكاني ...خفت يسمعوني ...شبحت لرجلي ايصب دم ...رجليا من كثر الجري وأني حفيان كانوا يوجعوا فيا وحالهم حالة ...تي أمتى يمشوا هادوا ؟؟ الباين أنهم شاكين أني متخبي وسط الزرع ...حسيت بشي يرقى مع رجليا ...وبدي يقرص فيا ...شبحت للارض وكنت عافس على كوم تراب والنمل يتحاوس تحت رجليا ويرقى معاهم ...النم هادا مش وقته ...حاولت انحيهم من عليا ...ومانندري على شي والا فروخ الحرام اللي كانوا يجروا ورايا ...خشوا في وسط الزرع ...الباين حسوا بحركتي ...اااايح يانوح نهارك أحرف .....معادش فيها ...قربوا من مكاني ...وقفت بسرعة ...وبديت نجري بكل قوتي ...نجري نجري ومش عارف وين او اي أتجاه ...الزرع كان طويل واصل لنص جسمي ...شافوني ...والكل بدأ يجري ورايا ...يتعايطوا ويجروا من كل مكان ...وأني مستمر في الجري ...وكل مرة نعفس على شي ونحس بالالم ...بس مانقدرش نوقف ...كان لازم نهرب منهم ...جريت لعند عييت ....ومش قادر انشوف قدامي ...نجري للمجهول نجري وخلاص ...لعند أخر شي حسيت برجليا في الهواء والتراب أنجرف بيا بسرعة لتحت ....وطحت من منحدر في نهاية الزرع ...بديت نتقلب من فوق ومرة مرة نخبط في رشاد واكوام التراب ...لعند وصلت لنهاية المنحدر ....جيت أخر شي على وجهي ...الدنيا لفت بيا وحسيت نفسي كأني حنفقد الوعي ...رأسي خبط في رشادة كبيرة والدم الساخن بدأ ينزل من رأسي ..ريحة التراب عبت خشمي ...حاولت ننقلب او نستجمع قوتي ونوقف بس جسمي خأني ...يادوب قدرت انقيم وجهي وأنشوف رجليهم وهما يجتمعوا ويتلقطوا عليا ...بصعوبة قمعزت وشبحت لوجوهم كيف ايشوفلي وفي عيونهم نظرة نصر 😏
قربوا مني أتنين منهم قاموني لعند وقفت ...وجاء واحد قرب مني ورفع وجهي وشبح لعيوني ...وأني برغم الالم اللي حاس بيه ...وأنفاسي الهاربة من كثر الجري ...بس شفتله بكل ثقة ...ومانزلتش اعيوني عنه ...قرب مني أكثر وتكلم : نوح الحاج وين راك هارب منا ؟؟😏))
.
.
.
.
.
*********************((الكاتبة أم ناصر))
.
.
.
#الوقت_الحاضر_ليبيا
.
.
.
نوح واقف على المراية يمشط في شعره ..مرر يده في شعره ....وبخ صنة ..ولقط مفتاح السيارة ...وطلع من دار النوم للمطبخ ..وقف على الباب : مازل حبيبي؟؟
دارين اتجهز في الفطور التفتت على صوته : لا خلاص كملت ☺
وقربت منه وبأسته على خده : أحتمال نتأخر في الشغل اليوم
نوح : علاش ؟؟
دارين : بتمر عليا رغد نهاية الدوام
نوح : ليش ؟
دارين : عندها موعد عند الدكتورة في العيادة
نوح : امممم.... المهم ماتعطليش هلبا
دارين : لا إن شالله مش هلبا
وطلعت من المطبخ ...ونوح شافلها : شنو بتمشي توا؟؟
دارين خذت شنطتها من على الصالون : اي تأخرت حبيبي ...فطورك جاهز
نوح تنهد : ماتنيسش لعشية بنمشوا لامي
دارين شافت نفسها على مراية قبل تفتح الباب : مش ناسية ...بااااي
وطلعت وصكرت الباب ...ونوح قرب من رخام المطبخ ..وبدأ يفطر على السريع ....وشرب قهوته وطلع ...
.
.
.
.
.
رغد تتقلب في سريرها ..فتحت نص عين اتشوف لمكان اوس ..بس مش قاعد ...الباين طلع للعمل ...شدت مخدته وضمتها ...ورجعت رقدت من جديد...الساعة 11 فاقت وقمعزت في مكانها...خمس دقائق لعند قدرت اتصحصح ...وبعدين صبت ومشت للحمام ...غسلت وصلت ...وخشت للمطبخ شغلت الغلاية ...وخذت فونها تتصل بدارين
دارين فونها يشرين ...بس عندها حالة ...ومش قادرة اترد ......رغد صكرت المكالمة بعد شرين كم مرة من غير رد ....ومشت تفتح في رواشن الشقة .
.
.
.
.
كملت الكشف والمريض طلع ...رفعت فونها واتصلت برغد ....
رغد : الو
دارين : صباح الخير
رغد : صباح النور ...ويينك؟؟
دارين : كان عندي مريض ماقدرتش انرد
رغد : رد بالك تنسي الموعد اليوم
دارين : لا مش ناسية ...حتى نوح قتله مرات نتأخر
رغد : حي حي ....إن شالله قلتي لنوح رغد بتجيني 😨
دارين : ااااايه 😅
رغد : نهاري لاغبر ...توا يخبر أوس 😑
دارين : لا ماتخافيش ...نوح طلع لخدمته ...والعشية بنمشوا لحوش عجوزتي ...وين بيشوفه أوس ؟!!
رغد : وين تندري عنهم ...مرات يتصل بيه....المهم ...أني نفطر ونظم أموري ...ونلبس وأنجيك طول
دارين شافت لساعتها : أني ممكن ساعتين وننهي الحالات اللي عندي
رغد : مئة المئة حبيبتي ...انكون كملت وجيتك
دارين : تمام ..نتلاقوا
رغد : إن شالله ....باااي
نزلت رغد فونها ...وخذت مق القهوة وطلعت من المطبخ......
.
.
.
**********************(( الكاتبة أم ناصر ))
.
.
.
.
نزار فتح باب المكتب : صباح الخير يافندي
أوس : صباح النور... تعالى نزار قمعز
قرب وقمعز : كل الاوراق والملفات انتقلوا للفرع الجديد زي ماطلبت
أوس هز رأسه ويشوف للاوارق اللي بين ايديه من غير أهتمام : تمام ....تمام
نزار : بنطلعوا دورية اليوم؟؟
أوس : اااه ..لا مافيش
نزار يشبحله زين : خيرك أوس ...في شي ؟!!
أوس تنهد ونزل لاوارق : لاسبوع هادا أخر أسبوع للافندي قاسم في الخدمة قبل يطلع للتقاعد
نزار : والله ؟!!
أوس لم الاوارق وحطهم في ملف وصبا : مش عارف من بيستلم من بعده ...وكيف بتكون الخدمة امعاه ؟؟
نزار صبا : ماسألتش الافندي قاسم ...أكيد بيكون عنده معلومات من بيكون في مكانه
أوس حط الملف في الدرج وخذا جاكته يلبس فيها : اي أكيد ...بس تعرف ماقدرتش نسأله عن اي شي ...اول مرة ايمر عليا موقف زي هادا ...وحسيت الموقف مش عارف كيف
نزار : إن شالله ايكون شخص متفاهم ونقدروا نخدموا معاه زي الافندي قاسم
أوس لقط مفتاحه والفون : إن شالله
نزار : بتطلع توا والا كيف ؟؟
أوس : مافيش شغل اليوم ...كل القضايا وقفوها للاسبوع الجاي...نظم امورك وشوف باقي الشباب
نزار : تم
.
.
.
طلع أوس وركب سيارته ....مر على واحد في طريقه ...وبعدين مشي للشقة .
.
.
.
.
.
دارين أخر حالة كشفت عليها ...وكانت خلاص مصدعة ...طلبت قهوة ...ومشت توضت وصلت الظهر ...دق باب المكتب وخشت رغد : سلااااام ..اااا..
لقت دارين اتصلي سكتت وقمعزت ....دراين كملت و وقفت اطبق في الصلاية : اهلييين ☺
رغد : تقبل الله
دارين : منا ومنك ياقلبي ...شن اخبارك ؟؟
رغد : ملللل وكسسسساد ....شن صار الدكتورة قاعدة ؟؟
دارين : اي قاعدة ...وكلمتها عليك ...تستنا فينا من بكري
رغد صبت : املا شن انراجوا...هيا ؟
دارين اتلم في حاجاتها وصكرت الشنطة : هيا ...بس جبتي لاوراق والتحاليل اللي قتلك عليهم ؟؟
رغد : جبتهم كلهم ...أكيد بتتطلب غيرهم والا لا ؟؟
دارين : ممكن مانعرفش ..خلينا انشوفها ..وهيا حتقولك كل شي
رغد : اووووفه ...هيا
دارين : خيرك ؟؟
رغد : تعرفي متوترة وخايفة هلبا 😣
دارين : ماتخافيش ...متأكدة المرة هادي أمورك تمام 😊
رغد : آن شالله ...ايديا يرعشوا وحالة
دارين : غير اهدي ربي كريم
طلعوا مع بعض ...ومشوا لمكتب دكتورة تانية في نفس العيادة اللي تخدم فيها دارين ...وكانت تستنى فيهم دخلوا عليها .....
.
.
.
.
*****************(( الكاتبة أم ناصر ))
.
.
.
.
هنية اطيب في الغدي ..سمعت باب الحوش انفتح واصكر ...وبعدين خش عليها نوح في المطبخ : خير يأم
هنية : اهلين اوليدي
في ايديه اكياس لحم وخضرة وحاجات تانية نزلهم : وين لبنات ؟؟
هنية : نهى اتضم داخل ...ونسمة كيف جت من العمل ..علاش متعب روحك كل شي قاعد
نوح خذا طاسة ويشرب في أمية : مافيش تعب ...لعشية جايينا اهني
هنية : مرحبا بيكم...عندها خدمة دارين اليوم؟
نوح : اي
خشت نسمة : سلام
نوح : اهلين
نسمة : مازل الغدي يأم ؟؟
هنية : اشويا بس
نسمة فونها يشرين شافتله ...ورجعته لجيبها
نوح شبحلها زين : اي يأم...طالع ماتبي شي؟
نسمة توترت من نظرة نوح ومشت اتجهز في سفرة الغداء 😣
هنية : سلامتك اوليدي ...خليك تغدى معنا
نوح : مرة تانية ...عندي كم شي بنديره قبل انروح للحوش
هنية : سلم على دارين
نوح : يوصل ....هيا سلام
.
.
.
.
.
نزار خش للمكتب وطلع فونه يتصل بنسمة ضرب من غير رد ...استغرب ماردتش ..ومازال ايشوف لفونه اتصلت بيه نسمة
نزار : الو
نسمة : الو
نزار : خيرك ماترديش ؟؟
نسمة : كنت واقفة مع نوح وماما
نزار : اااها ...شن أخبارك ؟؟ استاحشتك
نسمة : حتى أني
نزار : هلبا ؟؟
نسمة منحرجة : اي هلبا
نزار : املا خلينا نتلاقوا
نسمة : مانقدرش
نزار : علاش باهي؟؟
نسمة : أنخاف من نوح 🥺الفترة هادي كل يوم ايمر علينا
نزار : اوووفه ....عندك الحق ...يالله هانت فترة بسيطة ونقدر انشوفك وقت مانبي
نسمة ساكتة .....
نزار : الو ...وين مشيتي ؟؟
نسمة : نسمع فيك
نزار : مشيتي للخدمة اليوم
نسمة : كيف روحت منها ...وينك انتا ؟؟
نزار : في المكتب ...شن بنقولك لايام ها..... .
وكملوا هداريز مع بعض ❤
.
.
.
.
.
دارين ورغد طلعوا من مكتب الدكتورة ...ورغد اتحط في اوراقها في الشنطة
دارين : حسيت كلام الدكتورة مريح المرة هادي
رغد تنهدت ورفعت شعرها عن وجهها : نفس الكلام كل مرة مافيش جديد 😔
دارين حطت يدها على كتف رغد : ماتزعليش رغودة ...اول شي مازال بكري عليكم ....وبعدين عندي احساس المرة هادي حيصير
رغد : إن شالله ...مليت من نقان عزوزة الشياطين على رأسي
دارين ضحكت : اسكتي عيب 😂
رغد : باعدي من طريقي ترا ...قال عيب قال 😒
دارين تضحك ولحقت رغد : ماعليش تحمليها على خاطر أوس
رغد : وأني شن مصبرني عليها غير أوس
طلعوا من العيادة وصلوا للسيارة رغد : طالعة اليوم
دارين : اي ...ماشية لعميمة هنية
رغد : سلمي على البنااااا .......وسكتت فونها يشرين أوس يتصل بيها
رغد : حي حي اسكتي والنبي : الو
أوس : الو ...وينك رغد ؟
رغد : ااا في الشقة
أوس رفع حاجبه : اما شقة ؟!!
رغد : ااا شقتنا حبيبي
أوس عض على فمه : امممم ...بس أني في الشقة وأنتي مهناش 😑
رغد شدت في يد دارين وضغطت عليها 😣😣😣
أوس : رررغد وينك؟؟
رغد بلعت ريقها : ااا قصدي في الطريق للشقة 😣
أوس : في الطريق؟!! .....ليش وين كنتي؟
رغد نزلت الفون وتندب : نهار مغبر ماطلعتلاش شمس ...ووووك عليا😣
دارين : خيرك ...شن في؟؟
رغد : اششش أسكتي بالله عليك....اها أوستي .....كنت مع دارين ومروحة في الطريق ...توا نحكوا لما انروح
أوس هز رأسه معصب : تمام ...نستنى فيك هيا
رغد : خيرك مروح بكري اليوم؟؟
أوس : نتفاهموا لما اتجي 😑
رغد : اااها😅 بالسلامة حبيبي🥺
دارين : شن في ...خيره اوس ؟
رغد : حي عليا وحي ....شن بنقوله ...شن نكدب عليه ؟
دارين : خيرك ياهمي شن صار ؟؟
رغد : أوس ...اوس روح وقاعد في الشقة
دارين : غريبة ...كيف رجع توا؟؟
رغد تفتح في سيارتها : ماهو من أياماتي السود ...وحظي لاغبر
دارين : قوليله الحق وخلاص
رغد : ماهو نبهني اكتر من مرة على الموضوع هادا ...وأني وعدته بنوقف الفترة هادي🥺
دارين أبتسمت بحزن ونزلت رأسها : كل شي ماشي بالعكس ....أنتي و أوس ميتين على بيبي وربي مازال ماسخر .....وأني ونوح ....😔
رغد : على الاقل أنتي نوح هوا اللي رافض الشي هادا في الوقت الحالي واتفقتوا من البداية ....ومافيش مخلوق يقدر يفتح فمه عليك .....مش زي حالتي أني من دكتور لدكتور ومافيش فائدة وعزوزتي كل ماتشوفني تحدف عليا في الدوة لعند كرهت نمشيلهم
دارين : كل شي نصيب ....وبعدين مازال ليكم سنة بس متزوجين ....بكري على الكلام هادا
رغد ركبت سيارتها : لو عليا او على أوس مش مشكلة ...لكن عمتك عزيزة حالفة ماتخليني في حالي 😒
دارين : ربي يهديها
رغد : اوكي بنمشي أني ...خلي انلحق انلم الموضوع مع أوس
دارين : اتصلي بيا طمنيني عليك
رغد طلعت بالسيارة : تم ....باااي
.
.
.
.
.
*******************(( الكاتبة أم ناصر ))
.
.
.
.
نوح مروح في الطريق ....ومركز على مراية السيارة يشبح وراه ....عدل لمراية ويشوف سيارة تلاحق فيه ...وفجاة غيرت طريقها ...ومشت في طريق تاني ...ونوح طلع فونه وأتصل بحد ....
.
.
.
.
.
.
دارين في المطبخ أتجهز في الغداء ....ونوح فتح باب الشقة وخش ...في يده اوراق حطهم على الطاولة في الصالة وخش للمطبخ : خير
دارين : أهلين ☺
نوح قرب منها وهيا تجهز رفع شعرها على جنب وحط وجهه في رقبتها بأسها : أستاحشتك
دارين التفت عليه وجت بين ايديه : أني أكثر والله
نزل وجهه وبأسها على فمها : مازال الغدي ...جيعان
دارين : لا كملت ....على بال ماغيرت وغسلت ايكون جاهز
لقط قطعة من السلاطة كلاها : هيا ...خمسة وأنجيك
طلع من المطبخ ...خش غسل وغير ....وشغل التلفزيون في دار المعيشة ....ودارين حطت الغداء وقمعزوا تغدوا مع بعض .... ودارين مشت اتلم في الحوسة ...ونوح متكي يتفرج على التلفزيون ....وغفى وهوا يتفرج ...ودارين كملت وبخرت الشقة ....وجابت بطانية غطت نوح وخشت رقدت في جنبه ❤
.
.
.
.
.
هيبة فتح باب الشقة وخش ....ونور جت تجري وهوا رفعها فوق ايبوس فيها : اهلييين يابابا ....اوب اوب باقية ثقيلة معادش نقدر انقيمك فوق 😂
نور : أنتا أصلا مش قوي هلبا
هيبة : اوووفه قصدك أني ماننفعش ؟؟ زعلت منك الحق
نور : لا مش هكي ...بس خالوا هشام أكبر منك ورفعني هلبا فوق
هيبة نزلها : اااها خالك هشام 😑
نور رجعت قمعزت على الارض تلعب ....وهيبة خش للمطبخ والدار ايدور على ياسمين ...بس مالقاهاش
هيبة : ياسمين ....ياسمين ...وينها هادي ؟!!
رجع للصالة : وين ماما نور؟
نور : قاعدة داخل في الحمام
هيبة قرب من باب الحمام وفتح الباب لاقاه مصكر : ياسمين ...ياسمين !!...أفتحي خيرك .. .ياسمين تسمعي فيا ...أفتحي
مافيش اي صوت ...وهيبة خاف وقعد ايخبط على الباب : ياسمين حبيبي أفتحي ....يااااسمين
فجاة الباب انفتح وبانت عليه ياسمين ...بس وجهها احمر ...واعيونها متنفخة من البكي 😭
هيبة اعيونه طلعوا : خيرك شن فيك ....علاش تبكي ؟؟
مسحت وجهها ومدت يدها فيها شريط أختبار حمل 😥
هيبة يشوفله ومش فاهم : هادا شنو ؟!!
ياسمين حطته في يده وطلعت خلاته واقف ومشت للمطبخ
هيبة شاف للشريط وفاهم عليها ....غمض اعيونه وتنهد ...ولاحقها قرب منها : قصدك أنتي حامل ؟؟
ياسمين تشرب في مية وهزت رأسها وادموعها نزلوا 😭
هيبة خذاها في حضنه : الف مبروك حبيبي
ياسمين تبكي وخلاص 😭
وخر عنها شويا وشاف لوجهها : ليش تبكي ...شن صار ؟
ياسمين بلعت ريقها وتمسح في ادموعها : أنتا فاهم وعارف علاش نبكي 😥
حط يده على خدها وقرب وجهه منها : ماتخافيش كل شي ليه حل ...وإن شالله أمورنا تنحل وأني مش قاعد كل يوم نطلع وانحوس على شغل وأكيد بنحصل
ياسمين : ربي يقويك ....بس الموضوع هادا مش وقته ...من وين بنصرفوا عليه ...واحني مش ملحقين على نور ماكلة وشراب 🥺
هيبة من جواه مقهور بس مايبيش ايباين قدام مرته : ماتفكريش في شي ...وأني إن شالله كلمت كم واحد ايشوفلي خدمة اهني والا اهني ...وقاعد انلقط في رزقي لعند يفرج ربي
ياسمين بتردد : شن رائك ناخد دواء وانز.....
هيبة فنص فيها : اشششش رد بالك اتكملي كلامك ..مانبيش نسمع الكلام هادا مرة تانية
ياسمين نزلت رأسها : اووووفه مش عارفة من وين جي الهم هادا ؟؟
هيبة لاصق فيها وأبتسم : من لعب الليل
ياسمين ضحكت وسط ادموعها : بارد نتكلم جديات
هيبة : أنبصر عليك ...وربي حاس وفاهم عليك ...وزي ماقتلك ربي كريم وإن شالله حتنحل ...بس حرام اللي تفكري فيه
ياسمين : استغفرالله ...بس حاسة روحي مخنوقة 🥺
هيبة : تفرج ماتفكريش في شي
ياسمين : إن شالله 🥺
.
.
.
.
رغد نزلت ترعش من السيارة ...ركبت للشقة وتبي اتحط المفتاح بس أوس سبقها وفتح الباب : أخيرا شرفتي 😑
رغد : ااا اهلين حبيبي
أوس ماردش وخش داخل ورغد صكرت الباب ولاحقاته لاقاته واقف على الروشن : كيف رجعت بكري اليوم غربية ؟؟
أوس شافلها وعاض على فمه ويسال فيها بعيونه : وين كنتي ؟؟
رغد : اااا كنت مع دارين 😣
أوس : في العيادة والا وين ؟؟
رغد ارتبكت : اي في العيادة
أوس : وليش ...شن صار ...خيرها دارين ؟؟
رغد : مافي شي ....أني مليت من القعدة وحدي وأطلعت انشوف دارين شويا
أوس رفع حاجبه : والله ؟؟!!
رغد تفتح في جاكتها : اي
أوس عصب : شن هوا اللي أي ؟؟...قاعدة في وكالة من غير بواب املا ...تتطلعي وقت ماتبي وترجعي وقت ماتبي 😡
رغد : لا مش قصدي ...غير أهدا خيرك عصبت ؟
أوس قرب منها : لانك تكدبي عليا
رغد : لا ماكدبتش عليك
أوس : لا حول ولا قوة الا بالله .....ومشى وخلاها
رغد تمشي وراءه : أوس تعالى ....تعالى أنقولك ....أوس ....أسمعني بس ....ااااا
طلع وطبق الباب وراءه 😡😡
رغد تنهدت بحزن ورجعت قمعزت على الكرسي رفعت وجهها فوق : اوووفه منك أوس اوووفه
.
.
.
.
.
قبل المغرب بشويا كانوا دارين ونوح عند حوش هنية ...نزلوا ودارين سلمت عليهن ...وخشوا قعدوا في الصالة ونهى طيبت قهوة وقمعزوا كلهم ايهدرزوا ....ونوح بعد خذا قهوته طلع وخلاهن ..
.
.
دارين دخلت مع هنية ايطيبوا في العشاء وامعاهم نهى اتدهدرز امعاهن ....ونسمة زي العادة قاعدة على فونها 🤷🏻♀️
.
.
.
.
.
قبل وقت العشاء جاء نوح وتعشوا مع بعضهم ....وبعدين دارين ونوح طلعوا ركبوا سيارتهم وروحوا
دارين : نوحي
نوح : همم
دارين : أخطم على أمي نطمن عليها
نوح شبحلها : لازم؟
دارين شدت في ذراعه : اي حبيبي خليني انشوفها
نوح : مرات اتكون راقدة
دارين : لا مازال ...كلمتها قبل نطلع قلتها بنمر عليك
نوح : اااممم ...يعني معادش فيها
دارين ضحكت : أمر واقع
نوح : ااايه ....مايهمك شي ......ولف بالسيارة ....ومشى للشقة دارين القديمة ....نزلوا ....وقعدوا قريب عشر دقائق مع صباح هدرزوا امعاها ....وبعدين طلعوا وروحوا للشقتهم
.
.
.
.
.
***********************(( الكاتبة أم ناصر ))
.
.
.
رغد بعد طلعت أوس غيرت وجهزت غداء ...بس هوا ماروحش ....وقعدت تستنى فيه من غير فائدة ...لعند العشية أتصلت بيه
أوس : الو
رغد : حبيبي وينك ؟؟
أوس : شن تبي رغد ؟؟
رغد : أوس بالله عليك تعالى ...خلينا نتكلموا بس
أوس ساكت ....
رغد : بيبي تعالى 🥺
أوس : بيبي!!😑 تعرفيني مانحبهاش الكلمة هادي 😒
رغد : بس أني أنحبك 🥺
أوس هز رأسه وضحك
رغد : أوستي تعالى هيا ...والله حتى الغدي ماضقته ولا كليت شي ...على خاطري تعالا
أوس : هيا دقائق وانكون عندك
رغد ابتسمت : نستنى فيك
.
.
.
.
خش أوس للشقة ورغد كانت تستنى فيه واول ماسمعت الباب انفتح مشت تجري وخشت في حضنه
رفع ايديه وضمها ....وهيا رجعت للخلف اشويا لعند شافت اعيونه : مازلت زعلان مني ؟؟🥺
أوس : قوليلي وين كنتي وماتكدبيش عليا
رغد طبست : كنت عند دكتورة نساء في عيادة دارين😥
أوس تنهد : رجعنا لنفس الموضوع 😑
رغد : الله غالب أوس ...خاطري أنكون أم زي باقي النساوين 🥺
أوس حط يده في شعرها : وأني خاطري أنكون أب ...بس مشينا وجينا وكل الدكاترة نفس الكلام ...مسالة وقت ...خليها على الله
رغد : ونعم بالله ...بس سمعت أنه الدكتورة هادي شاطرة وقلت انجرب حظي امعاها
أوس : همم وشن قالت ؟؟
رغد : نفس الكلام ...مافيش جديد 😥
أوس : ماهو قلنا خلينا فترة من غير معاينة او اي شي ...مازال العمر لقدام وتوا كيف بدينا حياتنا
رغد هزت رأسها : تمام ....المهم ماتزعلش مني بس
أوس قرصها من خشمها : معادش تطلعي من الحوش من غير ماتقوليلي...فاهمة والا لا ؟؟
رغد : حاضر سي السيد 😁
أوس خلاها وخش للدار : ندوي جديات 😒
رغد جت وراءه : خلاص وربي ماعاد انعاودها ...خلينا نتغدوا جعت 🥺
أوس حول جاكته ورفع تيشرته حوله : وتي الغدي ..نغسل وأنجيك
رغد : تمام .......طلعت مشت اشويا بعدين رجعت وشافتله : قولي ....وين كنت الوقت هادا كله 🤨
أوس حط يده على وجهه : ياربي منك ومن للسانك 🤦🏻♂️
وسيبها وخش الحمام ...وهيا مشت للمطبخ : تتطلع ونعرف وين كنت 🤨
😅😅.
.
.
.
.
دارين في الشقة اتحوس في المطبخ ...أتصلت برغد أطمنت عليها ...وطلعت ....
.
.
نوح واقف في البلكونة ...ويشوف للشارع ....وبعدين اتصل بأوس
أوس : نعم
نوح : كيف الحال؟
أوس : تمام ...شن أمورك ؟؟
نوح : باهي ....بنسألك ...شن صار أمعاك ؟؟
أوس : في شنو ؟؟
نوح : تأكدت من الكلام اللي دويتلك عليه امبكري ؟؟
أوس : أنتا من وين جبت الدوة هادي ؟؟
نوح : ااايح علينا عاد ...جاوب من غير ماتقلق أمي بالاسئلة أمتاعك الزح
أوس : مازل ماسألت حد ...وبعدين ماعتقدش الدوة هادي في منها
نوح : ماعتقدش وماضنيش ومش عارف شنو....الكلام هادا مايمشيش امعايا ...نبي تأكيد ....كلام مقنط ومن مصدر ثقة يا افندي
أوس : باهي بالشويا ...خيرك نضت عليا ...خليني انشوف جماعتي وانرد عليك
نوح : شوفهم ...بس نبي دوة أكيدة أوس
أوس : حاضر ...ماتشغلش بالك أنتا
نوح ضحك بهزوة : هههه اي أكيد
أوس : ماتبي مني شي توا ؟؟
نوح : سلامتك ...سلم على أهلك
أوس : تمام اوكي .
.
.
.
.
.
دارين طلعت للبلكونة : خش داخل نوح ...الجو مصقع
نوح أنتبه على صوتها كان سارح : اهممم ...اااا هيا جيت .
.
.
.
قعدوا في الصالة يتفرجوا على التلفزيون ....وبعدين دارين صبت : نعست ونبي نرقد
نوح متكي على الكنبة ومتغطي : خشي ارقدي ...نكمل الفيلم هادا ونلحقك
طبست عليه بأسته على خده : تصبح على خير
نوح : وأنتي من اهل الخير
.
.
مشت خشت للسرير .....ونوح مازل يتفرج ....وبعد قريب ربع ساعة ...دارين طلعت و وقفت على الباب
نوح ارتفع اشويا وشافلها : خيرك ؟؟
دارين : ماعرفتش نرقد ...ماجانيش نوم 🥺
ابتسم وفتح ايديه : تعالي
جت زي الطفلة وخشت في حضنه والتفت على نفسها ...ونوح حضنها من لاوراء ...ودفن وجهه في شعرها ...ويده يحرك فيها على كتفها وظهرها
همس في وذنها : أنحبك🔥
دارين شدت في يده بأستها وحضنتها زين : أنموت فيك❤
وهوا زاد حضنها وغطها ...ورجع يتفرج على الفليم .
.
.
.
.
.
.
ناضت الصبح نوح مش راقد في جنبها .....ناضت ومشت شافته في كل مكان مش قاعد ....خشت الحمام ....وبعد شويا نوح رجع من برا وامعاه خبزة ...وخش للمطبخ
دارين طلعت : صباح الخير
نوح : صباح الخيرات
دارين : غريبة نايض بكري اليوم
حط القهوة على الغاز : عندي شغل مهم اليوم
دارين : نلبس وتوا انجي
نوح : على مهلك
خشت غيرت احوايجها ...وحطت ميك اب خفيف ...وطلعت لاقت نوح مجهز الفطور : اوووووه ...شني هادا ؟؟
نوح : تعالي أفطري ...نضت رايق اليوم
دارين : ياريت كل يوم اتنوض رايق 😂
نوح أبتسم ....ودارين قربت منه وفطروا مع بعض ...كمل وصبا خش للدار ....ودارين لمت الحوسة على السريع ...وغسلت ايديها ...وطلعت وقفت على المراية اتساوي في وشاحها
نوح لابس جاكة وطلع عليها : طالع ...ناقصك شي ؟؟
دارين : لا سلامتك
نوح : عندك زحمة اليوم ؟
دارين : يعني ...مش هلبا
نوح : تمام
دارين : بس مرات بعد نطلع نمشي لحوش بوي
نوح : تؤ تؤ
دارين : نوووح
نوح : قلت لا
دارين : علاش باهي ؟؟
نوح : حبيبي عندي شغل ومش فاضي لنقاش ...خليها مرة تانية
دارين : حاضر 🥺
فتح الباب : هيا اطلعي قدامي
خذت شنطتها وطلعت ونوح صكر الباب ...ونزلوا كل واحد ركب سيارته ....بس نوح قاعد واقف ايشوفلها لعند دارين طلعت من الشارع .
.
.
.
.
.
.
دارين اول ماطلعت على الطريق السريع ...وفي سيارة تمشي وراءها ....وكل شويا تقرب من سيارتها ....لعند قعدت تضايق فيها
دارين اتشوف للسيارة : خيره هادا ؟؟
سواق السيارة بدأ يقرب من سيارة دارين لعند مرة مرة السيارات يتلامسوا
دارين بدأت اتخاف منه ...وترعش ....فتحت شنطتها وطلعت فونها تبي تتصل بنوح ....طلبت الرقم ....وقبل يضرب عند نوح ....سمعت خبطة قوية والسيارة تحركت من مكانها ...وبدأت تتطلع عن الطريق ....ودارين برغم أنها خبطت في الستيرسوا ...لكن رجعت بسرعة وهيا ترجف وخايفة وتحاول تسيطر على السيارة ....بس الراجل رجع خبط سيارتها مرة تانية ...والمرة هادي سيارة دارين طلعت من الطريق ...وصارت زحمة والسيارات توقف ...ودارين فقدت السيطرة على سيارتها ....وتمت تبرم في مكانها ....وبعدين خبطت في عمود ضي بكل قوتها 😰😰
.
.
.
.
*******نهاية الحلقة#1
تفاعلوا مع الحلقة ...وأكتبوا شن رائكم في البداية ...وأنا اليوم حاولت انخليها حلقة تمهيد للاحداث وتعرفوا كل شخص كيف عايش حياته قبل ..❤
نظام التنزيل زي قبل 🤷🏻♀️ يوم بعد يوم