العروسة في الثوب الاسود

بارت ٦٩و٧٠

٦٩__٧٠
العروس في الثوب الاسود

البارت التاسع والستون

ايهم

اعاند روحي ما أشتاك وانه الشوك كاتلني

مروان

دورت الرسايل والحجي المضموم

ولا مرة لكيتك بيها عاشكني

رسيل

بكيف الضروف نعيش محد عايش بكيفه

٠٠٠٠٠٠٠

مروان: الو نعم ، هااا جاي جاي .

علي : شكو

مروان: لكيتها ، كام اخذ السلاح وطلع بره ،
لحكوه ياسر وايهم ، اسمع من ورة الباب ، واحد يحجي ويه مروان..

سيدي، هاي تسجيلات الكامرة الطلبتها .

مروان: مالها داعي لكيتها ...

صعدو بسيارة مروان وراحو، يجيبون رسيل .

كمت الوب هاي اذا جابوها اصلا . والله بجيت بجي عليها عيوني عمت ...

شيماء: كومي كومي ، كاعده تبجي على كح**** مابجيتي على شوق ، تعوقت مو بت عمج وعايشات عمر سوية ، لو ذيج رغد حالها يبجي الصخر، مرت عمج تكول هيه والمخبله سوة تبجي وتصيح اريدن مروان ...تبجين على بت ام المطارات. خلفت سوسن ما ماتت ، من يوم دخلت لهذا البيت هجمته هجم ...

يايوم ارتاحينه يايوم ، هجولت ابني بالغربه سنتين ، والثاني تزوجها وطلك مرته ، جدج مات من قهره ، وشوق تعوقت ايدها، طول عمرها تبقى هيج غير اموت ، بتي تسكطت ....

نور: ذن من عمايلهن هيج صار بيهن ، وياريتهن يتوبن ، فد رسيل انتو اذيتوها، وجبرتوها على عيشتكم ، كالتلكم ماريدكم شكو جلبتو بيها، وهاي راح تنكتل ارتاحي ، يدفنوها ويجوج ....

شيماء: وياهو المجلب بيها، غير مروان، ورم كلبي ورمه اخ منك ابن بطني وما تسمع الكلمه، شحال لوجنت غريب ، وانتي لا تضلين تدافعين عنها لا سود عيشتج..

نور: عمه ترة كلش مو وكت حجيج ، احنه بمصيبه، ولدج راح يرحون من ايدج متخافين عليهم..

شيماء: وليش يرحون يمه، عارهم وطموه قابل كاتلين ناهبين، هي مو شريفه وانهزمت شو وي منو، من يوم الزيارة اتفقت وي واحد ونهزمت وياه ولكفها مروان، مفروض من ذاك اليوم يخلص عليها، هذا ابو كلب الفطير ..

كمت من يمها صعدت فوك هاي كلبها كوي، وتحب تسولف الله يسلمها ، وانه خلكي على كدي. صعدت لكيت ايه تلعب بعلاوي ،.

ايه : شبيج ماما تبجين ..

نور: حبيبتي مابيه شي تعبتج ، خليت اخوج يمج والله لو مو انتي انه اضيع ..

اجتي مسحت دموعي وباستني، البنيه حبيبه امها ..

...................

نرجع بالاحداث تعالو ويايه ....

رسيل

من بعد ما سديت الخط من ريناد ، كمت على كيفي، وطلعت صحت نور، اجتي ورة شويه ...

نور: يايمه عزززة هاي شصاير بيج ..

رسيل: الحقير ضربني...

نور: ليش شسويتي.

رسيل: وصل بيه الحال يشرب بلبيت وتعاي اله انتي تسويله الميز ، لعبت نفسي منه ومن بيته ومن كلشي يخصه..

نور: كومي دادة اغسلج هاي شصاير بحالج .عمت عيني ..

مشتني، وصلت للحمام وكعدت ما اكدر اوكف جسمي كله يوجعني ويون عليه ....

نور: ها خيه مابيج تكومين، كعدي هنا وانه اغسلج، جابت طابوريه ودخلتها للحمام وكعدتني عليها، نزعت ملابسي وغسلتلي ، راحت جابت ملابس نظيفه بدلتلي وطلعنه ، كوه وصلت للقنفه اللي بالهول وكعدت عليها ...
راحت جابت كطن ومعقم ..

رسيل: هاي المن ، احجي بتعب ...

نور: هذا راسج يجري دم خل اشوف وين الضربه ..

لزمت راسي عطتتت

نور: على كيفي والله ..

رسيل: يموتني ..

نور: طبعا وارم ...تكدرين تلزمينه ...

مديت ايدي مورم .... شدعي عليك مروان ....

ضمدت راسي ومددت ، هيه كامت للشقه نضفتها كلها ، واني كل شويه ملجومه وتشوغ روحي واون من وجع جسمي، .... كملت نور...

نور: اجيبلج اكل تاكلينه وعصير لا تكومين من مكانج ..

راحت واني افكر بطريقه كون اخلص منهم ، اجتي فكرة ابالي ، كلت هاي انسب حل، كمت على كيفي امشي دورت على جوازي مستمسكاتي كلشي ماكو ، لا بكنتور لا بمجر ، ضلت بس القاصه ومفتاحها يم مروان ايست ، رحت لجنطتي لكيت عندي فلوس همزين، هو مروان يخلي مصرف يوميه يعرف ما اطلع بس يخلي ...

اخذت الجنطه ، خليتها بعلاكة واخذت عبايه مال راس هم صفطتها، وطلعت ملابس، بنطرون وعندي قميص طويل،وحذاء رياضي حضرتهن ودحستهن جوة الجربايه ...

طلعت مدتت بمكاني شويه وفاتت نور،

نور: كعدي اوكلج...

كعدتني وبدت توكلني ، شويه شويه ،واعيط ،اخ عفيه فجي يوجعي...

نور: عوفي وشربي بس العصير، اخذت الاكل ، خلته على الطبله وشربتني العصير .

رسيل: عاشت ايدج تعبتج.

نور: تعبج راحه بالعافيه ..شنو راح تسووين .

رسيل: انام تعبانه .

لهناك وسمعنه صوت هلاهل ...

رسيل: يتقصدون يسمعوني موو كاعد يركصون على جروحي ، يتفننون بطرق تعذيبي ...جريت حسرة

نور: عوفج منهن هاي فرصتهم يضوجنج ،لا تهتمين الهن سدي بابج وكعدي ..انه اروح اكمل شغل وي ايهم عفته وحده ..

رسيل: روحيله عيني روحيله عريس بعد يحتاجج..

نور: لا تزعلين مني انتي غاليه وهو هم، ما اكدر اعوفه بهيج ايام...

رسيل: لا على شنو ازعل ، طز بيهم كلهم عساهم بحركة كلبي وازيد..

نور: لا تدعين، رسيل عريس يتأذه ..

ضحكت ب استهزاء

رسيل: الله يهنيه للعريس مالتكم ...

نور: اووف منج رسيل ، شلون تاليتها ما ادريكامت راحت ، كمت اخذت الموبايل واتصلت بريناد .
يدك يدك متجاوب . سديته ورة نص ساعه دكت..

رسيل: وينج ريناد ادك عليك ليش متردين ..

ريناد: جنت اسوي عشا واجوي الولد مكدرت ارد لان محد يعرف اني عندي اتصال بيج...

رسيل: وليش قابل يمنعوج مني ..

ريناد: مو قصه يمنعوني بس مالي خلك لغاوي وكال وكلت..

رسيل: منو يسويلج لغاوي، عمة زهرة...

ريناد: عوفج منها وخلي البلكلب بلكلب ...

رسيل: شنو الوضع يمكم ، اران شلونه متكدرين تنطيني احجي وياه كلبي طاك عليه..

ريناد: اران ، اجه ورد رجع للاردن .

رسيل: ليييش؟

ريناد: حجي هووواي مال خمس سنين . غير وكت احجيلج هسه اني نازله جوة ، خاف يحتاجون شي ..

رسيل: قبل لا ترحين اريد اكلج شي ..

ريناد: كولي حياتي .

رسيل: اريد اجي لبغداد.

ريناد: معقوله قنع مروان تجينه ..

رسيل: بدون ميدري...

سمعتها شهكت .

ريناد: اياج هيج تسوين رسيل، شيخلصج منه يمعوده مروان عصبي ميتشاقه ...

رسيل: اني كتلج كفكره بس شلتها من بالي لتخلين ابالج ..

ريناد: يلا حبيبتي بعدين نحجي والله لو بيدي ابقه وياج للصبح ، بس عمه ثبرتني كاعد تسمعين صوتهة تصيحني، باجر بس تروح للسوك اخابرج اذا ماعندج شي ..

رسيل: ماعندي شي خابري بكل وكت تحبين ....

سديته منها ، رجعت مددت سمعت ايهم يكلها لنور راح اروح لغيداء خابرتني كملي بين ما اجي...

ضحكت على غبائي لو على حبي اله ، لو على دمار حياتي بسببه وهو يركض لغيداء ، ايهم اريد اكرهك واخلص من لعنة حبك بس شسويله لكلبي والله لو يصير ابدله جان بدلته وعشت حياتي ويه مروان ، كلبي تعبني .....

ورة ربع ساعه طلعت ، بهذا الوكت نور تنزل تسوي عشا ...
رحت فتت لغرفه ايهم ، طلعت ملابسه واشم بيهن هاي اخر مرة افوت لهنا اخر مره اشم عطرك ، اخر مرة اسمع صوتك اخر مره اشوفك ، راح اروح راح اخلصك مني ...

كمت افتر بالشقه واشوف الاثاث والتحفيات ،

كلشي جديد ويخبل ،

مو المفروض هذا الي ،

صح يكولون ميصير تتمنى شي عد غيرك،

يعتبر حسد عيشه ، بس هذا حلمي هاي امنيتي ،

يمكن البعض يشوفني تافها ، وحده صلفه ، وحده ماعدها قيم واخلاق ،
اعتقد انتو معشتو قصه حب حقيقيه ويه شخص صارلكم اب واخ وحبيب وسند ،

بوكت ما جنت ابجي على بابا احس بيه واكفلي ورة الباب يسمعني اذا ابجي يدك الباب ويفوت ويضل يهون عليه ،
ويشاقيني حتى يغير مودي ،

لو من تمرضت شلون يداريني ويسهر الليل كله فوك راسي ونضرات القلق من يباوعلي ،
شلون انساهن ، لو من حارب الكل علمود دوامي ،
وجبرهم اداوم ، يودي ويجيب ويشتري ملابس وحاير بيه ،
اذا كلت اخ كمزلي شكد سويت اخطاء ابد ميرزلني يفهمني ويحتويني،
ويحاول يشرحلي غلطي بطريقه ميجرحني بيها ،

بحيث اخجل من نفسي هيج سويت ،

من يكلي على شي لا ما اقبل عليه ،
يحجيه بضحك ، وبغزل ، من اخلي مكياج هو ميقبل بس ميكلي روحي مسحيه غصب عنج لا ،

يكلي احب وجهج بدونه احلا ، لو طفت برائة وجهج ، يخليني اروح وامسحه،
لو من يسافر يجي محمل اشكال ،
لو من سوه غرفتي وخله سبلت ،
يفكر بيه شلون انام بالحر ،

والباقين محد كلف روحه يسأل عليه سؤال ، مروان اللي بس اغلط ايده والضرب لو جدي كل همه يطم العار لو منو ، بس نور وايهم ،شريد انسى حتى انسى ، يرادلي عمر كامل يلا اكدر انساك....

افتر واشهك وابجي اني وذكرياتي ، هنا ضحكنه هنا بجيت وحضني ، هنا شفنه فلم سوة وضحكاتنه ترن بجدران الشقه ، هنا سوينه اكل سوه واكلنه هنا غنالي .

هنا قرالي قصيده وشعر ، هنا تمنينه وحلمنه ننجمع سوه. راح كلشي مني ، متت اني ..متت ..ايهم اخذ روحي مني وميقبل يرجعها ...

اخر شي جريت ورقه وقلم من الميز مالته وكتبتله رساله وخليتها على ميز المرايا...

طلعت وسديت الباب ورايه وسديت باب احلامي وامنياتي ... ورجعت لسجني انتضر الصبح حتى انهزم منه....

ضليت الليل كله كاعده ، بجربايتي بس ما اكدر انام ، صارت ساعه اربعه ونص فات مروان سويت روحي نايمه ، حسيت بيه كعد يم راسي ، لان نفسه قريب مني حيل ....

ورة شويه كام يمكن راح يبدل سمعت صوت الدوش ، سبح ورجع للغرفه فات ورة شويه هم اجه يم راسي باسني وطلع ...

سمعت صوت باب الشقه انقفل كمت مسحت بوسته بيدي ، اكرهك هيه كوة... كمت غسلت ولبست على السريع عفت موبايلي خاف خال بيه برنامج تعقب او شي لان اقره هيج شغلات بالفيس ...

واخذت الفلوس وطلعت ، البيت اضلم بس ضوه الشمس فايت بيه ،لان صيف نزلت على كيفي اباوع يمنه يسرة خاف احد يكعد ... والله ونزلت هففف

ضلت المهمه الاصعب باب المطبخ كون افتحه على كيفي بس هو بيه صوت شلون ، فتحته على كيف ، وطلع صوت ، خرب خرب .....

طلعت وسديته بسرعه وركضت لباب الشارع فتحته مديت راسي ماكو احد طلعت امشي سرييييع ماكو احد الشارع فارغ هدووووء بس صوت دكات كلبي اسمعها ، امشي واكو غصه بكلبي صح اريد اخلص بس عفت روحي يمهم تعلمت على ايهم ، شلون بيه ....

بعدين كلت اني خسرته بالحالتين ابتعد ولا اشوفه كدام عيني ويحب وحده غيري ويدللها ....وصلت راس الشارع ، سيارات قليله ، ورة اكثر من نص ساعه فات تكسي بيه رجال جبير بالعمر وكفته ...

نزل الجام ، وحجيت وياها .

رسيل: السلام عليكم حجي تروح لبغداد..

_ لا والله بنتي بس اذا تردين اوصلج للكراج ومناك اخذي سيارات تاخذج لبغداد ..

رسيل: ماشي ، صعدت ليورة واتلفت ورايه خاف احد شافني ولحكني ، مشت السياره الى ان اختفى الفرع مال بيت جدي ، يلا كعدت عدل واتنفست ، شفت السايق يباوعلي، ضجت ودرت وجهي على الشارع ..

_ شلون طالعه بهيج وكت وحدج وانتي صغيرة ما خفتي ، بنتي وين اهلج، خاف شاردة منهم..

رسيل: لا حجي اني راجعه لاهلي ، هنا بيت جدي اهل ابويه اذوني كلش ، وراح اروح لبيت جدي اهل امي، اني سنين عايشه يمهم...

_ لا اله الا الله، شلون دنيا هاي بيت جدج يأذون حفيدتهم والله انه بنات بناتي مدللهن دلال ...

ضل يحجي واني بالي مو يمه، بالي اريد بس اوصل لبغداد ومناك وين اروح، لان اول مكان يدورون عليه بيه هو بيت جدي ...

وصلنه ، كال هذا الكراج . نزلت ...وطلعت العبايه من العلاكه ولبستها كلت كلشي يصير خاف احد يتحرش شي اتلفلف بيها.. مشيت واسمع ، كل واحد يصيح شكل ..
سالت مرة كبيرة على سيارات بغداد، كصتني كص ، حسستني وحده مو زينه وتحجي وياها عفتها وفتت شفت رجال كبير يبيع جرك وهيج سوالف ..

رسيل: صباح الخير حجي.

_ هله بنيتي، خمسه بالف اخذي

رسيل: لا حجي ماريد اشتري بس سؤال فدوة ، وين الكه سيارات تروح لبغداد..

_ كعدي هنا يمي هاج هذا كرسي ومن تجي السيارات اكلج...

رسيل: خاف تتأخر ۔

_ لا انتي جايه من وكت ....

كعدت واهز برجلي من التوتر اريد بس اصعد وانهزم ، احس مروان اله عيون بكل مكان...

فززني من صفنتي صوت الحجي ،كومي بنتي هاي سيارة تروح لبغداد ،،،، كمت وتشكرت منه وصعدت ،جانت كيه ،هاي شراح يمليها، وكعدت انتضر بالساعه نملت وطلعنه ، بهاي الساعه اني لافه وجهي بالعبايه حتى من كعدت بالكراج خفت احد من اقاربهم يشوفني ويروح يكللهم...

مشت بينه السيارة واني مرت عليه الخمس السنين العشتها يمهم كلها ، الى ان فززني صوت السايق كال وصلنه ،

رسيل: احنه وين هسه ..

_ كراج العلاوي يابه ...

رسيل: شكرا كمت دفعت كروة ونزلت ، باوعت وين اروح هسه مشيت واخذت تكسي للاعظميه ، هنا بديت اتنفس براحه شويه ارتاحيت ، حسيت روحي بأمان بس هم قلقله وعندي خوف.....

وصلنه للاعظمية واني شنو دموووع شنوو شهكات تطلع من صدري هنا بابه عشانه هنا وكلنه موطه هنا تمشينه وصلنه راس الفرع وتذكرت من ضربوه ومكان الدم من شفته شلون تخبلت ،، ..

رسيل؛ نازل هنا يمك ، دفعت الكروه ونزلت مشيت رجلي طايرة عن الكاع احس روحي تحررت والله تحررت جنت بسجن بس اللي عايش حياتي يحس بيه وباللي عانيته .....

وصلت للباب مال بيت جدي وبصفه باب بيتنه اخ اخ يابيتنه ويا الذكريات ....

مترددة ادك الباب لو لا ، جانت ساعه ١ ونص الضهر يعني الطريق ست ساعات ونص ولا حسيت بيها عكس من ما رحت منا حسيت سنين امشي شكثله جان الطريق ....

شنو راح تكون ردة فعلهم شراح يكولون من يشوفوني يكيفون لا مشتاقيلي لا، حسام اكيد هسه عنده طفل، اني شلون مسالت ريناد عنه ، التهيت بمصيبتي ، تجرأت ودكيت الباب ، اجاني صوت شاب منو؟؟

رسيل: اني .

فتحها تفاجأ بيه واني هم تفاجأت ...

ثائر : رسيل

رسيل: ضحكت ثائر لك هاي شصاير كبران ولا عرفتك ..

ثائر تعاي فوتي جوه نسولف وينهم لعد منو جابج..

رسيل: جيت وحدي .

عقج حاجبه ،

ثائر: شلون وحدج انهزمتي يعني ..

رسيل: بعدين افهمك حباب طريق طويل وتعبت هذا ابن حسام شكد حلو ،

جان شايل طفل بيده .. ابتسم وكال

ثائر: هذا ابني ياحسام

رسيل: استغربت ، شلون حسام مو تزوج ..

ثائر: هاي شبيج رسيل مصخنه ، حسام بعده ينوح على ذكراج ، لحد الان عنده امل بيج ،ويا فرحته اليوم يمكن راح يشبعنه لحم ، هسه يذبحلج اشكال ههههه.

رسيل: صدمتني والله ....

فتنه ،ريحه الاكل طالعه ذكرتني من جنت ارجع من المدرسه واشتم من باب الشارع عمه شمسويه واركض اصبلي ماعون واكعد اكل، شكد جانت حياتي حلوه وبسيطه....

فتت للهول ، عمه زهره دتصلي ، عفتها وفتت لخاله سهاد واريد اشوف بيبي كلبي طاك عليها ..
شفتها كاعده تباوع تلفزيون منتبهت من فتت ،

رسيل: خالتوو حبيبتي ...

سهاد: ياااا رسوله ممصدكه تعاي ابوسج حبيبتي ، حضنتني اني ابجي وهيه تبجي متتت بجي بحضنها ...

سمعت صوت عمه زهرة ...

زهرة: شجابج ..

التفتت الها مصدومه بحجايتها متوقعت هيج تستقبلني

سهاد: شبيج زهرة البنيه صار سنين ما شايفيها هيج تحجين وياها..

زهرة: تزوجت وراحت شكو جايتني ، بعد مكافي الصار بينه بسببها ترجع منين ما جتي ، يلا كومي بيتي ميلفيج ..

اني مصدومه ما اكدر انطق بكلمه وحده عيوني مفتوحات على وسعهن من الصدمه ما اكدر ارمش..

سهاد: مو بس بيتج حتى تطرديها بيتنه كلنا ...

ضلت تحجي وتصيح فاتت ريناد ،تركض حضنتني اني ابجي وهيه تبجي منكدر نحجي ، دموعنه تعبر عن مدى شوقنه وحده للخ ....تبوس بيه وارجع ابوس بيها ..لزمت وجها ...

رسيل: حبيبتي كبرانه صايرة مرة..

ريناد: هههه اي وصرت ام وهذا الفحمه ابني ...

فات يمشي يطلع عمره سنه وشويه ،

رسيل: اووي فدوة حبيب خالتك تعال ، شلته وابوس بيه ....

اخذنه خاله سهاد للهول وطلعنه كعدنه ، عمه زهرة ماكو جوز فاتت لغرفتها ..

ريناد، تباوعلي وتضحك: ولج ممصدكه شفتج ..

رسيل: ولا اني مصدكه راح اشوفكم ..

ريناد: لعد وين مروان ايهم، ليش مفاتو منو جابج ..

رسيل: جيت وحدي ،

هنا اختفت الابتسامه على وجه ريناد ، انرسم الخوف والقلق ، اجتي وكعدت كبالي..

ريناد: شلون وحدج مفهمت ؟؟؟

رسيل: انهزمت ..

شهكت ولطمت على صدرها ، لهناك وسمعنه صوت باب الشارع انفتح، اسمع خالو وحسام يحجون ..خالو يكله نتغده ونطلع لان شغل هواي عدنه ..

حسام: اي ماعندي شي ، بس اسبح الشمس سمطتني ، فات ويحجي، حجيه محضره الغد......... وسكت وكف بمكانه مصدوم يباوع عليه وعلى خالو ، يعني دتشوف لو دا اتخايل ...

محمد: هاي رسوله هنااا ياهلا بحبيبه خالهة نورت بغداد بيج ..

اجه باسني وحضنته وكمت ابجي ..

رسيل: اخ ياخالو ، ريحه ماما وبابا بيك ،اخ يا اماني الفقدته من يوم العفتكم ....

زهرة: بلا هالترحيب شوفلنه حل بهالمصيبه

محمد: خير شكو ..

باوعت على حسام يباوع عليه وساكت بعده مصدوم ممصدك نضراته تحجي اشتياقه ولهفته لحبه القديم المرت عليه سنين ومشت فوكاها امواج من
المي وغركته .وما ضله اثر ، جوز صدمتك اقوى من راح تعرف بيه متزوجه ومهزومه من زوجي..

ضلو يحجون واني عيني على حسام ، متت قهر من شفته يعرج برجله دمعت عيني ، نفس الرجل اللي ضربه بيها حازم الكلب اجه وصل يمي ...

محمد: ريناد بابا صبي الغده على ما نجي ،

اخذ عمه زهرة وفاتو لغرفتهم ...

صاح حسام على ريناد وعينه عليه مشالها ابد ..

حسام: ريناد صبي وجيبي الغده لغرفتي ناكل اني ورسيل ..

ريناد: ماشي ...

مشه كدامي والتفت يعني تعاي.. رحت وراه دخلنه وسد الباب ، رحت كعدت ، واجه كعد كبالي ...

حسام: ممصدك ، والله ممصدك ، يعني انتي هسه حقيقية ...دمعت عيونه .. اووف يارسيل اووف

رسيل: مبين عليك مصدوم ماكو داعي تحجي ..

حسام: شلونج ،شخبارج ليش كطعتي عني ، ليش عفتيني وما خليتيلج اثر والكاج بيه ...

رسيل: شلون اتصل بيك لا عندي تليفون لا اكدر اجي ..

حسام: تدرين اخر مكالمه ، من سمعت عياطج لسه تدك بكلبي ، تدرين من يومها واني منايم مثل البشر ، كلبي محروك اريد بس اوصلج .

عندج علم كم مرة اني جاي للبصره سائل عليج ومالكيتج ، جبيرة حيل وما اندلكم وين بالضبط ياما عاركت ابويه وعفتله البيت اسابيع لان ميكلي مكانج ..

بشهر الثالث من سمعت ريناد تحجي ويه ثائر تكله رسيل رجعت لدوامها ، ثاني يوم اني بالبصره طلعت من الفجر بوجهي للمعهد ، وسألت عليج كالو الها هواي ممداومه ، وضليت اسبوع اجرت غرفه بفندق ويوميه جاي للدوام واكعدلج باب القسم بلكت المحج كمت اشوف وجهج بكل بنيه تفوت واكول هاي رسيل وكلبي يركض كبالي وتطلعين مو انتي تالي ايست ورجعت ومن يومها اني ممرتاح رسيل، تدمرت شهكاتج وصوت الضرب بأذني وصوت الحقير ميروح من بالي ، والله لو الزمه اله اشرب من دمه ،كل ما يجي تصدف اني ماكو، الى ان عرفت امي تنطيه الوكت اللي اني مموجود بيه ويجي هو هنا واقاطعها اسابيع ، ومن اشوفها تبجي كلبي ينكسر وارجع اصالحها ، شحجيلج حتى احجيلج كون افتحلج كلبي واشوفج شبيه...

هو يحجي واني دموعي عشره عشره تنزل عليه وعلى الصار بيه ..والصار بيه اني هم ...

رسيل: شبيها رجلك ليش تعرج ، هاي من يوم الضربه مو ...

حسام: عوفج منها راحتلج فدوه ، تعاي كليلي ليش بطلتي من دوامج . شعجب مكملتي ...

رسيل: يوو حسام صارتلي شغلات كومه مو مال هسه احجيلك تعبانه والله ..

حسام: صدك اني استلمتج اول مجيتي لا سألتج ماكله لا ، خاف نعسانه، بس شسوي ممصدك والله ...

رسيل: لا صدك رجعت واضل على كلبك بعد ..

حسام: عندي احلا من العسل ...

اندكت الباب تكسرت فتحها زهرة ...

زهرة: وين تتختلين بالغرف ويه ابني كومي طلعي احسلج لا يجي مروان ويحرك البيت فوك راسنه..

حسام: شحده اريد رجال يوصل.

زهرة: لا بله حده ونص وشوف شيسوي يحركنه وياخذها .

حسام: بأي حق ياخذها هسه اروح اشتكي عليه والله .

زهرة: ههههه باي حق كتلي باي حق ، اني اكلك بحق انو هو زوجها والكدامك مهزومه منه ، وهسه اكيد فكدوها ماكو ، واول مكان يدوروها بيه هنا ، ويازهرة تعزيتي وتصخمتي ... وكامت تملخ بوجها ، اخذها خالو وطلعها برة .
حسام سد الباب واجه كعد كبالي ...

حسام: شنو السمعته هسه صدك تزوجتي ، واني الغبي عبالي منتضرتني وباقيه على ذكراي ..

رسيل: مو صوجي ، صوج امك خابرت وكالت عوفي ابني بحاله اتزوج واستقر لتضلين تحومين عليه ..

حسام: ومصدكتي رحتي ركض تزوجتي مووو ..

رسيل: مو اللي ابالك حسام، اني مريت بضروف كلش صعبه وهواي ، وزواجي على ورق بس ، علمود يحللون كعدتي يمهم ما اضل محرمه على ولدهم ..حسام: يعني بعدج مثل ما عفتج ...

رسيل: بعدني بس اني تغيرت وكلشي بيه تغير اكطع امل مني اني مافيدك ومستحيل بيوم اصير الك ..

حسام: عوفج من الحجي هذا كله تعاي كليلي جايبه جوازج مستمسكات حتى نسافر واخلصج منهم...

رسيل: دورتهن ماكو خافيهن وين ما اعرف ...

حسام: مو مشكله ، عندي استنساخات مالتج اخذهن واروح اطلعلج بدل ضائع وبعدها اطلع جواز ..

رسيل: وهاي شكد يرادلنه وكت ، يوصلني مروان ،هاي اذا ما اجه اليوم ..

حسام: معليج ، راح اروح هسه أأجر بيت قريب واكعدج بيه انتي وريناد ، حتى اذا اجه هنا ميلكاج ...نكله ما اجتي يدور ويروح ...

رسيل: هم خوش فكره بس ما اريد اورطك ويايه ، حسام اخاف عليك والله..

حسام: معليج مني ماعليه شي ، اخلصج منه يلا ارتاح..

كام طلع وطلعت وراه ، الغده مصبوب بس محد ياكل ، عمه زهره متمددة على القنفه وتبجي ..
خالو محمد كاعد وخال ايده على راسه ..

محمد: شلون اذا اجوي هذا مروان يهجم البيت على روسنه ويذبحها والله ومالنه حق نحجي، رسيل شلون هيج تسوين ، انتي على ذمه رجال مفكرتي بيه با أهله بسمعتهم بسمعتج ، بينه مفكرتي ، اني ابني تسكط بسببهم وهسه اذا اجوي اكيد يوكف بوجهم وراح يكتلوه ...

حسام: انعل ابوهم يابو الجابهم، خلي يجون هاي اذا لكو رسيل هنا ...

محمد: وين حتوديها ليش

حسام: أأجر الها بيت قريب منا تكعد هيه وريناد على ما يهدأ الوضع ..

مكللهم على السفر ..

زهرة كامت تدك على راسها ، ريناد تبجي ، ثائر كاعد ويهز برجله ... الوضع كله مو طبيعي ، هسه يلا حسيت بحجم الغلط اللي ارتكبته ، هسه يلا حسيت على نفسي وبده الخوف يسيطر عليه،.....

طلع حسام يدور بيت واني وريناد صعدنه فوك ...

رسيل: تعاي احجيلي شوكت تزوجتوا ، وشلون ..

ريناد: اول ما توفه بابا واخذوج سافر خالو محمد رجعني ، لهنا عقدت وعشت يمهم هنا عقد بس سيد ، وبعدين واسطات وروح وتعال صدقه بالمحكمه ، واني صافنه شنو الديصير ما اعرف ومن احجي اسمع لمصلحتج واسكتي ، واني ماشيتهم ... وصدك ورة عشر ايام سمعنه مروان مسافر يرجعني، وخالو علاء كايله عقد عليها ابن خالها ، وراد ياخذ اران ، مقابل خالو كاله اشتكي عليك ، عوفه هنا مدرسته ، وحياته مترتبه لتخربله نظام حياته، متعارك ومهوس وراجع ،

اجه لهنا، خالو شوفه العقد، سكت وعاف وراح ...

بس بين فتره وفتره يجي ينطيني مصرف ، لو يشتريلي شغلات ، رغم اني مخطوبه المفروض خطيبي يقيم بيه ، من تزوجت ثائر رفض اخذ شي من مروان بعد، رجع اران ،لهنا واجه مروان، سأله تريد تجي لو مرتاح ، اران كله مرتاح، كام ينطي مصرف لاران ، ومرات من ميكدر يجي يدزله بيد واحد ....

رسيل: شعجب يقبل خالو مروان يصرف عليكم

ريناد: بعدين ورة سنتين من اجه اران يمنه، سمعت عمه زهرة ، تخابره تكله تعال جيبلهم مصروف لو تاخذهم اني ما اتحمل بعد، مثل ما اخذت اختهم اخذهم..هو ميكدر ياخذني لان عاقده واران مقبل ...

رسيل: وليش هيج عمه تسوي شو ماجانت قبل هيج.

ريناد: من ماتت بيبي ، تفرعنت وكامت متريدنه عبالك بيبي جانت لازمتها ....

هيه تحجي واني شهكه بكلبي بيبي ماتت شوكت ، من ورة مصيبتي نسيت اسال عليها...

رسيل: بيبي ماتت شوكت ، وكمت ابجي بحركه بيبي مثل ماما جانت حنينه علينه..

ريناد: وراج بسنه تعبت حالتها كلش حتى الاكل كطعته وتالي توفت الله يرحمها ارتاحت ...

رسيل: الله يرحمها ....

وراها نمت من التعب مكدرت بعد وين يلا كعدت على صوت الهوسه ، زهرة وحسام يتعاركوون.

حسام: اذا طلعت رسيل اطلع وياها وبعمرج متشوفين وجهي ..

زهرة: ولك اخاف عليك ولك يكتلوك ..

حسام: معليج انكتل طبني مرض.

زهرة: ليش يمه طبك مرض متعبانه بيك اني ، لك انت فتحه عيني ، انت اول فرحتي شلون بيه شلون ياربي رحمتك...

نزلت ، طلعت للحديقه اختنكت وعفتهم مشاحنات ، عفيه رسيل مترتاحين ابد، بس لو نجي للصدك انتي ما الج مكان بينهم ، رسيل جنتي هناك مكانج ومستقله ، وبيتج، بس ممرتاحه ، هنا لا الج مكان ولا الج استقلاليه وهم ممرتاحه ، وين اروح للكبور التلفني واخلص من هالدنيا الجايفه ...

ضليت كاعده واجوي يمي حسام وريناد وثائر ،

كامو يسولفون ويايه ويفتحون مواضيع يغيرون جو عليه ، بس ليش احس روحي غريبه بنصهم؟
ليش مكاعد احس اني انتمي الهم؟
معقوله تسجلت با اسم بيت جدي هذاك ...

اني الي جنت هنا كلشي بكيفي ، هسه كاعده ولامه نفسي ، واستحي منهم حتى من اختي ....

مشى اليوم وصعدت نمت بغرفه ريناد وثائر نزل جوه نام ..

متمددات ثنينه وحده تباوع على الثانيه ممصدكات لحد الان..

ريناد: احنه ليش هيج صار بينه شنو الذنب السويناه، من يوم بابا راح الله يرحمه وتطشرنه كلمن بمكان وكلمن انذل شكل ، انتي بيت اهل بابا واني بيت اهل ماما واران بيت خالو هم ممرتاح هناك بس شيسوي بعده صغير ، يكبر ويجينه ...

جريت حسرة كبيرة

رسيل: ما اعرف عبالك ماما من راحت صابتنه لعنه، من مصيبه لمصيبه، لاحضتي ابد مرتاحينه لا بابا ارتاح ..

ريناد: اي والله ابد.

رسيل: تحبيه؟ريناد: المن

رسيل: ثائر المن يعني

ريناد: حباب وطيب ، بس العيب يسمع لامه هووواي وتحركه عليه ..

رسيل: شبيها تخبلت ..

ريناد: يمعوده دوامتلي يومين بالكليه حركت الدنيا عليه وتالي بطلني ثائر من وراها،، قشمرني على اقنعها وارجعج ، صار عندي حمودي ، وكعدت وسكتت..

رسيل: الضاهر مالنه حظ حتى بالدراسه..

ريناد: على كولتج ..

رسيل: راح انام تعبت .

ريناد: نوم العافيه حبيبتي ..

نمت مكعدت اله الضهر ساعه ٣ كمت غسلت وصليت .
ونزلت جوة، ريناد جانت تنظف بالمطبخ ..

رسيل: ها رنود

ريناد: ها حياتي كعدتي تعالي نتغده منتضرتج..

رسيل: فدوة لاختي حبيبتي ،

حضنتها حيل احس اني بحلم وخايفه اصحى واضيعها ...

ريناد: وخري هههه خلي نتغده ورانه ايام هوواي احضنج وحضنيني ...

تغدينه وكملنه ، وسالفه جرت سالفه صار المغرب اجه ،حسام ،

حسام: لكيت بيت ومن باجر الصبح اخذكم نضفوه واخذلكم كم شغله منا مشو اموركم بيها على ما احل سالفه الجوازت ..

طلعت زهرة تتسنط وصارت ذيج الهوسه ....

......

تعبت كلش صعدت فوك كعدت بغرفه ريناد صارت ساعه ١٢ بليل اريد انام وجان اسمع صوت ، نزلت ، واشوف منظر شل حالي رجلي متتحرك ما اكدر انزل ، مروان وايهم وياسر ،

واكفين شلون الذيابه ، والله منظر بحياتي ما انساه ولا اكدر اوصف الرعب والرهبه الجنت بيها هذا ايهم، ايهم مو نفسه غير واحد يريد ياكلني ...

مروان: نزلي هذا استقبالج لرجلج واهله ؟؟؟

شفته كعد وصاح على زهره .

مروان: مي ام حسام ..

زهره: تدلل..

اباوع هو كاعد والولد واكفين ، بس شنو اريدلي مكان اختل بيه منهم اريد احفر الكاع وافوت واذب التراب فوكايه ...

ياسر: اللي يشوفج يكول شكد فقيرة وتخاف خطيه تكسرين باب الكلب...

مروان: اي فقيره رجل دجاجه متحل ..

خوفي من هدوئكم هذا شنو من بلاوي وراه ، فات حسام يركض اسمعه يصيح وينهم، يمكن شايف السيارة.

فات يركض هجم على مروان ، وجتفوه ايهم وياسر ...

مروان: اووو بزر النستله طالعتلك اضافر وصاير تخرمش ...

حسام: هدوني اموته للكلب الساق* تفووو عليك ...

كامله مروان ركعه بكله خله خشمه يخر دم ، وجان يصيح على اخوته هدووو ...

هدوه وتلازمو حسام ومروان ، فاتت زهره تبجي وتتوسل بمروان واجه خالو محمد يفاكك بيهم خطيه تعبان....

زهرة: مروان اني من خابرتك انت وعدتني ، متأذي ابني

حسام: هد مروان والتفت لامه ، يعني انتي اللي ...

مروان: هيه خابرتني ، ولخاطرها انت تتنفس ، لو مو هيه انه وين لاكي رسيل بهلسرعه ، سهلت عليه هووواي امور وقربتلي المسافات ..اله انه جنت ناوي على دفنتك ..
يلا يابه احنى نترخص ، الخطار ثكيل بهيج وقت ...
يلا رسيل لبسي خوما تطلعين هيج بلا حجاب ،

حجاها ويكز على سنونه، خرب بحضي نزلت بلا حجاب وبدشداشه ريناد .. ردت اصعد ابدل ، اجه ياسر لزم ايدي و وصلني يم مروان ، لزمني مروان ، وكال لريناد

مروان: بلكت عبا لاختج يرحم ابوج، ولو انه زعلان منج ضميتي عليه فد عاذرج لان مشتاقه لاختج ونسيتي تبلغيني ...

هزت راسها ريناد وجابت العبايه وخلتها بيدي حضنتني وبجت والتفتت على مروان..

ريناد: عليك الله واهل البيت لا تأذي اختي ، بيمن احلفك ، هاي امانه بابا عندك صونها...

مروان: لا تخافين نامي مرتاحه ..

اجه حسام جر ايدي ،

حسام: متروح وياك هو انت زواجك منها كلاوات ..

عزة بعيني حجاله .. ما احس اله مروان مدميه لحسام ، بوكسات على دفرات وعمه وخالو يتوسلون بيه يعوفه ..

تالي جروه ايهم وياسر وطلعنه ،

ايهم: انه اسوق جيب السويج.

ياسر: انه اسوق انت تعبت بالجية

صعدنه ياسر يسوق ومروان بصفه واني وايهم ليورة ...

كل شويه احس بيه يلتفت يباوعلي ويرجع يباوع كدام، اباوع مروان هادئ ، خوفي من هدوئك هذا..

الطريق كله ساكتين وصلنه البصره ، ساعه سته الصبح ..

نزلنه والكاهم بالطرمه منتضرين ، شيماء عمي ازهار انتصار ونور ...نور خايفه وتبجي تعرف شراح يصيرلي ...

اول مفتت للهول اجتني دفره بضهري وكعتني بالكاع ، بعدني اريد اكوم اجتني الخ ،

رسيل: اخ اخ خ خ كمت اعيط ، والكل واكف يباوع محد اتدخل اباوع ادور على ملاكي الامن ومنقذي شفته واكف مكتف ايده ويباوعلي شلون انضرب ،
تفنن مروان بضربي ، جان لابس بسطال مال دوام ، ويدفرني بيه ، الى ان انكطع نفسي اريد اتنفس ماكدر ، وراها سمعت بس العياط كلهم يعيطون من افتح عيني اشوف مروان موجه السلاح عليه ،

ايهم: لا مرووان لالالالالالا ، تلاوه هو وياه ثارت طلقه من المسدس ، سمعتهم صاحوا ايهم وفقدت بعد محسيت بشي ........

يتبع ...

العروس في الثوب الاسود

البارت السبعون

لسان حال رسيل ....

غدروني وكلت يوسف نبي وعافوه

عام يطيح جلدي وعام لوني

وعلى بيعك ياكلبي عاملوني

مثل اخوان يوسف عاملوني

أيهم

آنا الغثتني شغلة عليها هواي متندم

يا اخي الاخرس ما يكول ( الله)!!

ليش بأسمك يدردم

هذن هذن هذن

هذن كلهن واكول أصبر

وأذب البير جوا السر

هلبت تقتنع ترجع أريد ابجيلك مربع

أريد تشوف من تمشياطيح بالدمع رمشي

....

مروان

ياهو الها

ولت روحي كالو ياهو الها

عفتني وريتي ظلت لاهوى الها

عظيمة ايام هجرك ياهو الها

ايام فكدك شفت الضيم بيها

..........

اول مفتت للهول اجتني دفره بضهري وكعتني بالكاع ، بعدني اريد اكوم اجتني الخ ،

رسيل: اخ اخ خ خ كمت اعيط ، والكل واكف يباوع محد اتدخل اباوع ادور على ملاكي الامن ومنقذي شفته واكف مكتف ايده ويباوعلي شلون انضرب ،
تفنن مروان بضربي ، جان لابس بسطال مال دوام ، ويدفرني بيه ، الى ان انكطع نفسي اريد اتنفس ماكدر ، وراها سمعت بس العياط كلهم يعيطون من افتح عيني اشوف مروان موجه السلاح عليه ،

ايهم: لا مرووان لالالالالالا ، تلاوه هو وياه انثارت طلقه من المسدس ، سمعتهم صاحوا ايهم وفقدت بعد محسيت بشي ..

....

اريد مي عطشانة ، ارررررريد مي، احجي بتعب ،

اه جسمي يوجعي، ماما وينج تعاليلي ،....انحطت ايد فوك ايدي ....

نور: حبيبتي ، حمدلله على سلامتج ..

فتحت عيني ،احس بجفوني نار ، راسي ثكييييل ...حلكي يابس ، بلاعيمي مجرحه

رسيل: اريد مي ...

نور: هذا حبيبتي ، كعدي اشربج ...

كومتني على كيف كعدتني، شربت شويه ، ورجعتني نمت...

هنا بديت اتذكر الصار شويه شويه ....

كمت ابجي ....

نور: عدت حبيبتي عدت الحمدلله ..

رسيل: تعبانه نور تعبانه...

نور: سودة عليه حبيبتي شبيدي عليج متكليلي ، اوووف ، وين اوديج، والله لو بيدي اخذج وانهزم واخلصج .بس ماباليد حيلة ....

رسيل: اني متت انتهت حياتي، مروان مستحيل يخليني اعيش..

نور: هو هم متأذي كلش ، وهسه حالته موزينه ...

رسيل: كلشي مابيه ، الضالم سالم ..

نور: شلون مابيه، وج وكع من طوله ، وجثيث ماكدر ياسر يشيلة خابرنه الاسعاف اجت اخذته ، وهسا عمي وياسر وايهم هناك ، ويكولون الدنيا مكلوبه بلمستشفى من عمامنه وعشيرتنه، ومن جماعته بالدوام ...

رسيل: ليش مو عنده اخوه الثاني وينه ما شاله ويه ياسر ...
احجي باستهزاء ...

نور: ياااا غير ايهم عاف اخوه واكع وحار بيج، يادادة غير انتي تصوبتي، بس الحمدلله صوابج خفيف ..

رسيل: اني تصوبت شو ما اتذكر ...

نور: انتي وي الضربه فقدتي بعد ما حسيتي بس رحمه ربج الطلقة شخطتج وطلعت..

رسيل: وين انضربت ؟؟

نور: بجتفج ،وشالج ايهم وركض بيج للمضمد ، خيطها الج وخلولج مغذي ، ضليتي ٣ ساعات فاقده ،حيل خفنه عليج ، وايهم جان يمج قبل شويه راح...

رسيل: لتحجيلي عنه بعد ولا تذكرين اسمه كبالي ايهم مات بالنسبه اليه ، حاله حال مروان وياسر، مابيهم واحد زين كلهم وجوهم تختلف بس العملة وحده ....

نور: رسيل عوفج من الحجي وارتاحي تعبانه انتي تراج طالعه من حلك الموت وبعدج تراددين.

رسيل: لعد لتجيبين طاريهم كدامي ، سيرتهم تنرفزني .

نور: هذا هو ما احجي اهم شي عندي راحتج، انه حجيت لان اعرف عندج فضول وتحبين تعرفين..

رسيل: اي هاي قبل هسه كلشي اختلف ، الكدامج رسيل جديده، لاتضعف، ولا تقبل تنضرب ،ولا تقبل تنهان واللي يدوسلي على طرف ، املخه تملخ ، اني هسه بيني وبين الخبال شعره وحده، ماعندي شي اخسره غير بس الجسم الكبالج وصار جثه هامدة ..

نور: هاج شربي هاي مسكنات ، وعوفج من الحجي هسه الجرح يهيج عليج .

اخذت الكبسوله منها شربتها ومددت، جنت كلش محتاجته لان الوجع اللي بجسمي مينحمل...

مرت ٣ ايام اني نايمه بفراشي عظامي كلها توجعني، كحة ما اكدر اكح، يهيج الوجع كله عليه ...

نور: ها حبيبه هسا احسن صرتي..

رسيل: لا مو احسن ...

نور: يمه تحولت رسوله حت انه عاديتيني ...

رسيل: روحي هم عاديتها مطايقه احد...

نور: هاج سويتلج شوربه بسوب اللحم ترم عظامج شويه ...

رسيل: ليش تعبين روحج يوميه تجيبين واكلج ماريد وتاخذين الاكل وياج مثل مجبتيه...

نور: غصب عنج تاكلين، شنو تردين تموتين ناقصه عمر ..

رسيل: عابت هيج عمر الكضيته بشلعان الكلب والعذاب ..

نور: عوفج من القديم والراح ، رتبي حياتج من جديد بعدج شابه والعمر كدامج ...
هاج اكلي اروحلج فدوة اذا تحبيني اكلي....

أيهم: عوفيها نور وروحي لولدج ، انه يمها ...

التفتت شفته واكف باب الغرفه ،باوعتله ودرت وجهي ...

طلعت نور واجه كعد بمكانها ...

جر نفس طوووووويل ، وضرب ايد بايد وكال ...

أيهم: الاكل ليش كاطعته ؟

رسيل: مالك شغل  اطلع برة اريد ارتاح، زيارة المريض قصيره ....

ايهم: هااا زيارة المريض ، واطلع برة ، يعني فوك شينج كوات عينج، فوك السويتيه ، النوب زعلانه وانتي ام الراهي....

رسيل: مو شغلك كتلك اطلع برة مطايقه وجودك ...واذا جاي تحاسبني اجاوبك من هسه اني مسويت غلط.. لتعب نفسك...

ايهم: صح مو شغلي ،بس سمعتج من سمعتي

و عندج رجال خليتيه يفتر داير مداير نفسه ، فاوض

عصابة ، خسر قضيه صارله سنين يركض بيها، تحمل

تهديد بالقتل، ومضايقات ، وحاربوه بدوامه، لان رادو

ياخذون منه القضيه . يفتر بالشارع يدور، ومستشفيات

ويومين مانايم ، وما ضايك الاكل، وتالي وكع من طولهوهسا نايم بالمستشفى ، كل هذا وتكولين مسويت غلط؟؟ ؟؟ شتسوين بعد ....وباالاصح شنو الماسويتيه..

رسيل: متشوف روحك جاي حامي على مروان، ليش استغرب اخوك ، اكيد تطلعه هو الصح واني الغلط ..

ايهم: انتي صدك تحجين ، لج شنو غلط شنو صح انتي سويتي كارثه ، رسيل عقلج وين، معقوله انتي هيج من قبل وانه ماعرفتج ، جاي اتفاجأ بيج والله مصدوم ...

رسيل: ضرب، مؤامرات، طعن بالشرف، غدر ، غصب ، انتهاك للحريه، ومن يطلع اسوء ما عندي ، تكلولي شوفي مصدومين بيج ، هاي اخلاقج رسيل معقوله .
عفيه اسكت ولتضحكني...

ايهم: من ايدج الصار واللي راح يصير، انتي خنتيني ،  و غدرتيني،وهسه  خنتي اخويه وغدرتيه ، وحده كذابه، والف وجه عندج ....

رسيل: اني خنتك ، ولو يرجع بيه الزمن هم اخونك ، واني فضلت اخوك عليك واني وحده غبيه، لان حبيت واحد مثلك .... اذا سمعت اللي تريده طفي الضوه وراك اريد انام....

غطيت راسي بالجرجف ..

ايهم: صدك يعني، الحب البينه انكلب عداوه ، ادري جاي تأذيني بكلامج واعرفج جذابه ...

وخرت الغطه من وجهي ...

رسيل: شتريد ، كذابه مو كذابه خاينه مو خاينه، وين تريد توصل ....

ايهم: سلامتج ما رايد شي ، اجيت اشوفج شلون صرتي ..والحمد لله مابيج شي السبع ياكل بيج اسبوع ۔۔ولا عبالك ماكله هلكد كتل ...

رسيل: كمت اصيح، طبعا بفضل اخوك الصارلك ساعه تدافع عنه بكل قباحه، تدمغت كمت ما احس، انضرب منا اكوم احضرله ميز الشرب منا  ...
اني اللي جنت بورده محد ضاربني ومدلليني دلال، اخوك سواني مكفخه ، والله منا وجاي لا اردله الضربه بضربه حتى لو يموتني ....

ايهم: هههه تخبلتي رسمي ، رسيل تعالجي انتي مو صاحيه..

رسيل: منو كلك صاحيه ، اني وحده مخبله لان حبيت واحد مثلك ، وبجيت سنتين عليه ، اني مخبله عاديت زوجي ومنطيته فرصه وعشت وياه ، اني مخبله فضلت حبك على راحتي ، اني مخبله جنت اغار عليك واون الليل كله ...

ايهم: وان شاءالله هسا شفيتي من مرضج وخبالج ...

رسيل: لتخاف عليه اشفى وب اقرب وقت وراح اكون عائله وادوس على كلبي وامشي ......

ايهم: الله يهنيج ويريحج ويكتبلج السعاده انه شرايد ..

يحجي بس مخنوك ، اعرفه كاعد يأذيني لان مجروح ،والحجي مو من كلبه ، واني هم نفس الشي..

رسيل: والله لا يهنيك ولا يريح كلبك ولا يسعدك ...

ابستم ونصى راسه ، ورجع رفعه وكال...

ايهم: مشكورة يابت عمي ، خوش دعوه هاي ...عاد من كلبج ...

درت وجهي محاجيته....

ايهم: على العموم ، يطلع مروان من المستشفى وانه اسافر ثاني يوم ، حبيت ابلغج واجي اطمن عليج، خاف متصيرلي فرصه...

رسيل: اي انهزم ، هذا انت ، كل ما تنحصر بالزاويا وانهزمت ....

ايهم: انهزم ، هههه حت لو انهزمت ، هذا شلون انهزم منه ...

يأشر على كلبه ...

رسيل: تتعود ، بعد كم يوم عرسك ، وتتزوج وتخلف وتنساني ...

ايهم: ليش انتي خليتي عرس بعد ..
على العموم زيارة المريض قصيرة على كولتج ، وانه ماريد اطول عليج . الشفاء العاجل يارب ...

كام طلع ، واني استغربت نفسي شعجب مبجيت ، ولا تأثرت بالحجي الحجاه ....

نمت لثاني يوم ، هاي الي اربع ايام كمت على كيفي مليت من النوم واختنكت ، كمت فتحت البردات مال غرفه النوم والشبابيك ورحت للاستقبال هم فتحتهن .

صح هوى حار ، بس اريد يتغير الجو ...

رحت للحمام غسلت وطلعت ، كل يوم نور ويايه خطيه ..
اليوم اني كدرت اكوم ، رحت للمطبخ سويت جاي، وتريكت ، رجعت للغرفه طلعت ملابس اريد اسبح صارلي ٣ ايام مغاسله ...فتت من يم المرايا ، ورديت رجعت ، هاي شنو ، وجهي مورم ، جوه عيوني ازرررك حلكي مشكوك....صايرة فلم ، رحت للحمام نزعت اريد اسبح، تذكرت الجرح شلون خاف ميصير ، ، لزمت الطاسه واترس واسبح بس بعيد عن الجرح، كملت وطلعت، سمعت صوت الاذان ، شبسرعه صار الضهر، كمت صليت وكعدت ، صافنه على السكف ، بدون لا افكر ولا شي بس هيج صافنه .

فاتت نور: جايبتلي اكل ...

نور: هاي جبت غداي وجيت حت ناكل سوة واذا ما اكلتي والله انه ما اكل ...

رسيل: قبل شويه تريكت وين اشتهي..

نور: كولي والله تريكتي..

رسيل: شوفي الاكل على الميز بعدني مشايلته اذا متصدكين ...

نور: اي حبيبتي اكلي اهم شي نفسج صدكيني .محد يستاهل..

رسيل: فعلا محد يستاهل، بس تعاي كليلي ليش تأجل العرس؟؟؟؟

نور: هسا اكدر اكول رسيل طابت ...

رسيل: ليش عود

نور: رجعلج الفضول وتردين تعرفين كلشي ...

رسيل: هههه لا والله صدك،،، احجي الله عليج.

نور: توج تكولين محد يستاهل ، وقبل يومين تكولين لا تجيبين سيرتهم ...

رسيل: اي لتجيبين سيرتهم بس احجيلي العرس ليش تأجل ..

نور: اكمل غداي على الاقل تراه برد ..

رسيل: اكلي واحجي شعندج ..نور: انتي يا لوتيه، قبل الحنه شردتي ويومين يدورون عليج ، اجه موعد العرس ، مروان بالمستشفى، انتي متصوبه، البيت مشتعل ، ياعرس ضل ، عمي علي خابر على عمي جواد كاله تأجل العرس، لو تخبل ، عمي يكول شلون احنه عازمين ناس وصالون وبدله، وكيك وكلشي على حسب الاصول شنو تلعبون علينه ، قشمرتونه ، جاي طلعون حيفكم بينه ، وصار صياح بينهم وعركه  جبيرة.

رسيل: وتالي شلون انتهت المشكله .

نور: عمي جواد كال ما عدكم يمي مرة، وعمي علي كايله مانطلك غصب عنك ناخذها وطبك الخط بوجها..

رسيل: ايهم شنو موقفه ..

نور: حجي بينه، حسيته فرحان ، حت كال راح اسافر فترة وارجع..

رسيل: اي كلي ..

نور: تراج حيل دايسه وياه بالكلام..

رسيل: شكالج...

نور: لا والله انه من طلعت من يمكم كعدت هنا بالهول وسمعت ، ايهم ما يستاهل هيج حجي منج..

رسيل: هااا ومن يشوفني انضرب ومكتف ايده، وصلت للموت وهو يتفرج، ابد ما انساها اله لحد ما اموت..

نور: حمدي ربج ، عدنه ، المرة من هيج تسوي تنذبح ، مو زين ربج نجاج من موت محتم ...

رسيل: اي الحمدلله والشكر خلف الله عليهم خلوني عايشه، والله لو ميته احسن ، وجان دعيتله لمروان بالخير والعافيه لان خلصني ، بس اني ممكتوبه عليه الراحه.

نور: رجلج باجر يطلعونه من المستشفى ، لا تداهرينه، فدوة رحتلج، مو حت ما ضل مكان صاحي بجسمج ..

رسيل: شبيه معرفتي..

نور: صعد ضغطه ، وتعبان كلش الطبيب كال لازم يضل هنا ، لان ضغطه ما جاي ينزل ينزلونه ويطلعوه..

رسيل: وهسه نزل ضغطه.

نور: اي نزل الحمدلله.

رسيل: مو مشكله ، ارجع اصعده اله..ههههه

نور: يااااا يمه ، انتي ماتجوزين، تصدكين لو انه ابدالج جان هسا ميته..

رسيل: الله ليخليج بدالي ولا يشوفج يوم من العشته.

نور: اميين دادة انه وين اتحمل، راح انزل محتاجه شي.

رسيل: سلامتج ...

نزلت واني ضليت متمدده واتفرج تلفزيون ....

ثاني يوم، اسمع هوسه برة ، طلعت بالبالكون واشوف مروان مطلعيه ، وكاعد يذبحوله فجران دم ...

كلت بكلبي ليش استعجلتو واشتريتو خروف ، هسه يصعد ويذبحني فجران دم لسلامته ....

فتت جوة غسلت وجهي ، ورحت اكلت، لان ورايه معركه شرسه لازم استعد الها ...

انتضرت خلص اليوم ومصعد ، اجه اليل نمت...

كعدت الصبح على صوت اكياس بالهول، كمت على كيفي شفته واكف يم الطبله بالهول، ويطلع من العلاكه ويخلي على الطبله ...

حيل هاي جايب الصيدليه كلها ..

كلت خلي اكسر الحاجز البينه واطلع اتحمدله على السلامه بلكت ينسى السويته ، اني صح احجي واهدد ، بس والله ميته خووووف بطرك اللسان ..

طلعت ومشيت على كيفي ...

رسيل: حمدلله على سلامتك ..

مجاوبني مستمر يفرغ بالعلاكه ، هذا شجايب، كطن وشاش، ومعقمات ، وكبسووول كوووووومه ...شنو راح تصير حرب وينقطع الدوة ...

رسيل: هذا العلاج الك ...

مروان: الج ...

رسيل: رديت با استغراب ، الي؟؟؟ بس اني مو مريضه..

مروان: راح تتمرضين ...

رسيل: ضحكت ، ليش يعني عندك علم الغيب ..

مروان: لا ماعندي فد انه اللي امرضج ..

رسيل: مفهمت

مروان: مو شرط تفهمين ، كبل تشوفين بعينج وتحسين ....

رسيل: مروان شناوي ..

مروان: أأدبج، وارجع اربيج من جديد ...

خفت والله كمت اطك سن بسن ، انسحبت على كيفي وركضت لباب الشقه كلت انهزم اروح احتمي بيهم، هذا تخبل شنو ناوي يسوي، وصلت للباب فتحته واتفاجأ مقفول ، كمت ادك بالباب حيل ، واصيح لحكوني ،...  كمت ابجي ايست ، انداريت ، وشفته واكف ، مكتف ايده ومبتسم ونازع التيشيرت ....باقي بالبنطرون ....

مروان: يلا حبي تعاي ..

رسيل: وين ؟؟ جاوبته بخوف ...

مروان: نتمم زواجنه، الكلاوات .. ليش محروك كلبج وتشكين زوجج للغريب ....

رسيل: مشاكيتك والله ، والله محاجيه عليك....

تقدم عليه ، ولزمني من ايدي وجرني ، دخلنه للغرفه وسد الباب ، دفعني وكعت على السرير ، اقترب مني .ووووووووووو...

بجيت توسلت ،صرخت ، دفعته ، ردت ، ماكو ... اخر شي تم الزواج  اذاني حيل .عافني ، وطلع ....

ضليت ابجي بمكاني ، الى ان حسيت شي نزل عليه ، باوعت واشوف رجليناتي كلها دم ، خفت هاي ليش ، طلعت من الغرفه ، شفته كاعد بالهول ويدخن ، باوعلي ودار وجها ،،، فتت سبحت، والدم مينكطع تخبلت، بجيت بصوت عالي، وكمت اصيح مروان الحكلي ، ...

ورة شويه اجه ، شافني، تفاجأ ، انخبص ميعرف شيسوي، غسلي وشالني رجعني للغرفه كعدني على الكرسي ، شال الجرجف وطلع جديد فرشه. وراح جابلي كبسول، ومي ...

مروان: هاج شربي...

رسيل: بس اني متأذيه، مو مال كبسول ...

مروان: ماعليج شي ، هذا طبيعي، شويه ويكطع ...

ضليت اباوع عليه وابجي، كمت مددت ، ورة ساعه ، فتت للحمام ، شفته مكطوع باقي شي قليل ....

مرت يومين تحسنت احسن ، ومروان مكابلني وكاعد ، اختنكت ، مماخذه راحتي، ادري ميطلع للشغل ماعنده دوام .....فتت للمطبخ، اكلت ، طبعا بهاي اليومين الفاتت افوت للمطبخ الكه اكل ، مطبوخ، بس مالي نفس اكل، اخذ فاكها شويه وارجع انام ، بس اليوم كلش جعت ، رحت صبيت وكعدت اكل،  حسيت واحد واكف باب المطبخ رفعت راسي شفته ...

جريت حسرررة ورجعت اكل ...

مروان:مبين تحسنتي ..ورجعتي طبيعي وصحتج عال العال ..

سكتت محجيت ، كمت شلت الاكل ، خليته على السنك ، ما احس روحي اله انشاليت ، ومشى بيه ..

رسيل: نزلني ، مروان نزلني توني ماكله معدتي كلبت، دخلنه للغرفه وووووووو ....

استمر الحال هيج، اذا ارفض ، انكتل ،  يعني بالحالتين هو ماخذ حاجته، اذا انكتلت او لا قبلت او لا ، تكررت هاي الحاله اكثر من مرة باليوم  نفسيتي تعبت ومن احجي لو يسمعني ابجي بليل ، يكلي ، مو تشكين لابن خالج عني ، هااي جاي اعوضج السنتين الفاتت ...

يتبع ....مروان: شلونج ام علاوي..حجاها وطلع للطرمه

نور: بخير خويه بخير ،

ركضت وراه

نور: مروان لحضه احاجيك

التفتلي

مروان: اسمعج ..عقج حواجبه .

نور: عفيه رسيل شلونهة شو مالكم صوت ، خاف موتتها .

ابتسم وراد يطلع ، رحت وكفت كباله ..

نور: واليرحم والديك جاوبني بس كلي ميته لو لا ، شو هدوء بيتكم ، وانه خايفه من هذا الهدوء ..

مروان: غير عرسان ، وتعرفين زوجتي تخجل هواي صوتها ما يطلع ، ونايمين اغلب الوقت ، وانتي مو تجيبين الاكل الصبح وانه اخذه منج ، بعد ليش ضال بالج ....

نور: خلي اصعد اشوفها والله كلبي نار ..

مروان: ماريد طير بشر يوصل لرسيل ، لا انتي ولا غيرج، واذا اسمع بيج صاعدتلها ومحاجيتها، ازعل منج وتعرفين بزعلي شلون ثكيل...

نور: وين اصعدلها وانت مكابلهة وكاعد ،واحتمال الكه الباب مقفول لو صعدت..

مروان: قافله ، ممنوع لا تشوف احد ولا تحجي وي احد..

نور: حرام خويه الجاي تسويه شلون لو تتخبل...

مروان: بالعكس انه جاي اعقلها ، هي جانت مخبله ، شوفيهة هسا صوتها ما ينسمع ...

نور: الله يهديك عليها ويحنن كلبك بجاه النبي ..

مروان: لتشيلين هم ما أأذيها ...

نور: جريت حسرة وكتله ، روح خويه الله وياك ...

راح طلع ورجعت اكمل العشا علكت الطباخ لان طفيته ، وبديت اكلي ..

شنو سوالها ، شعجب ساكته ، لو ضاربها جان سمعنه ، صوت بجيها صوت عياطه هووو .... لهناك وفات ياسر ..

ياسر : السلام عليكم شلونج يابه ..

نور: هله ابو علي شلونك تاج راسي...

اجه باسني من راسي ...

ياسر: زين،، فد جوووعان ميت ، راح اغسل ، وانزل حضري العشا وطلعيه بالحديقه ناكل مخنوك..

نور: بوخه بره نتغده هنا على التبريد ...

ياسر: نعلك المبردات  ...

نور: اعلكهن قبل لا تصعد حت يتغير الهوى ..

طلع علكهن ورجع ، عمي خال بالحديقه ٣ مبردات كبار خارجيه توزع الهوى، على مكان كعدتنه....

كملت العشا وطلعت الاكل برة ، رتبته على الطبله واجه ياسر كعدت ..

ياسر: عاشت ايدج ، هذا علاوي نايم ..

نور: توه نام قبل لا انزل كاعد وياي من الفجر ، عشيته هو واخته ونيمتهم ..

ياسر: والله ما جاي اشبع منهم من ورة الشغل ..

نور: هاي بعد شتسوي الله يخليك ويحفظك النه ...

بدينه ناكل وفات مروان .. شايل جياس بيده ..

ياسر: تعال ابو شاهين ، على اولها ...

مروان: رسيل سوت عشا فوك اكلو ، بالعافيه ...

ياسر: الله يعافيك ...

راح فات جوة التفتت على ياسر..

نور: غريب هالمروان والله دوخني ..

ياسر: ليش..

نور: انه كلت راح يوجها للقبله ويذبحها ، فلا تعيش رسيل يوم واحد من بعد السوته ، بس شوفه كابلهة وكعد، وهسا متسوك اشكال ،....

ياسر: اكو بطيبه كلب مروان ، رسيل لو تعرف تتصرف وتكسبه الها وتصيرله زوجه صالحه ، والله يخليها متمشي على الكاع ،من كثر الدلال ، بس هاي مو وجه نعمه ، يطبها مرض كلشي يصير بيها ما انقهر عليها ..

نور: ياسر انت ليش تغالط نفسك ، تعرف برسيل ليش هيج جاي تسوي...

ياسر: اعرف بس ما انطيها الحق، هيه عافته ، وهيه قبلت بمروان ...

نور: ياسر تعال احجيلك بس امانه لا تكول لاحد بداعتي ....

عاف الاكل ..

ياسر: صاير شي ما ادري عنه ..

نور: احلف متحجي.

ياسر: نور احجي لا والقران اكلب الدنيا فوك راسج ،رسيل مسويه مكسورة جديدة وانتي مغطيتلها .

نور: لا يابه هاي وين راح بالك صدك جذب ..

ياسر: احجي لعد بسرعه ..

نور: شوف ......... وحجيتله كلشي من يوم ما حازم راح لرسيل للمعهد ولحد ما عقد عليها مروان ...

ضل صافن عليه

ياسر: ولهذا السبب طلع حازم من العشيرة

نور: ايي

ياسر: وانه اكووول، والله جان كلبي حاس اكو شي حبير ،بس حازم هيج يسوي ،ماجان هيج ..

نور: مو بس هيج ، رغد باكت فلوس من مروان، دفتر ومن حقق ابوها وياها واخوتها، كاتليها كتله زينه معترفه ..

ياسر: وين موديته البر*

نور: على اساس حازم مخابرها ، ومهددها ، مثل ما خربو حياته وانحرم من كلشي شغله واهله ، يخرب عليهم.رغد متوسله بيه كايلتله انه احاجي مروان ويرجعك ، وعندي فلوس جوة ايدي احولهن الك لبين ما ترجع ...

ياسر: وهسه وين مولي بيا كبور...

نور: على اساس رايح بسوريا ، كاعد بشقه ويصرف من فلوس مروان..

ياسر: لا يا كلب اخ لو انه موجود اله اعلكه واخليه عبرة شعجب مروان ما كتله وطم عاره ..

نور: احتمال جدي وعمامي منعوه ...

ياسر: والله فريتي عقلي ، تدرين مجنت متوقع ولا يجي ابالي هيج شي ،لعد ايد شوق هو كاسرها ..

نور: اي هو موتهن بيومها ..

ياسر: شوكت عرف مروان بيهن ..

نور: اخر سفره الكم اجه من الدوام من وكت ،وسمعهن.

ياسر: من شوكت تدرين انتي...

نور: نفس اليوم عرفنه انه ومروان.

ياسر: معقوله رسيل ما حجتلج وانتن صديقات ..

نور: وداعت ابني ما حجت ..

ياسر: ايهم عنده خبر ..

نور: لا ماكتله ..

ياسر: ولتكوليله ، خليه ميعرف احسن ، هذا يتخبل اذا سمع ، وما يتغير شي ، تبقه زوجه مروان، وهو خاطب ، ما يحصل غير حركان الدم والقهر...

نور: لا ما احجي ، اخاف من مروان ...ياسر: معليج ،بيج مابيج عزلي نفسج عنهم، نور اذا اسمع بيج متدخله بين مروان ورسيل، لو تودين حجي بين ايهم ورسيل، ما ارحمج ، وفوك متوصلين ...

نور: لا ليضل بالك ..

ياسر: نور اذا سمعت ، والله ثم والله جهالج اخذهم وعمرج متشوفيهم ..

نور: لا تهدد ، كتلك ما احجي ولا اتدخل ..

ياسر: اشوف ، انه صاعد انام ، شوكت تصعدين..

نور: هسا اكمل المطبخ واصعد ..

ياسر: ابوي وامي وين شو ماشفتهم ..

نور: عمي نايم، وعمتي يم شوق بيت منال ....

ياسر: ها زين ، لتتأخرين ...

نور: ان شاءالله.....

..........

رسيل... من طلع كمت سويت عشا ، لان اني هم جوعانه وليوين اضل نور تجيب اكل هم خطيه...

بلشت اكلي واخلي على الميز سويت زلاطة وطلعت طرشي وخضورات ...

وفتت سبحت على السريع ولبست اخف بجامه عندي ، جانت تشيرت كيمونه وشورت ، ، من البوخه حتى السبالت متبرد ،واهل البصره يعرفون صيفها شلونه ..

مشطت شعري وعفته مفتوح ينشف ، رجعت للمطبخ ،سمعت باب الشقه انفتح ...

ورة شويه اجه للمطبخ ، جنت فاتحه الثلاجه ومدنكه اطلع بالخبز ...

شو هذا ماكو لا صوت ولا حركه ، التفتت لكيته واكف باب المطبخ وصافن عليه ...

رسيل: مضيع شي؟؟؟؟

ساكت .

رسيل: شبيك مضيع شي ...

جر حسرة وحجه ..

مروان: اي مضيع ..

رسيل: شنو ..

مروان: كلبي..

رسيل:  تعشه الاكل برد ...

شفت بيده اكياس خلاهن على الكاونتر وراح غسل ايده واجه كعد ....

مروان: تعاي اكلي ...

رسيل: جيت ،،، جريت كرسي وكعدت ،

ثنينه ساكتين ، هو بيه طبيعه ميحب يحجي على الاكل قليل كلش...

كملنه وكام راح للهول ، شلت المواعين ، ورجعت كلشي لمكانه ، ورحت على الاكياس فتحتهن وبديت افرغ بيهن ،.... ويطلعلي بطل ، خرب هم شرب، اخذته وخليته بالثلاجه ، بجيسه مابيه حيل حجي وعركات  ، جايب نساتل وموطات وكرزات وجباسه ، كومه شغلات بعد ، العلاكه الخ ،عسل ومربى واجبان ، شلتهن وسفطتهن بالثلاجه . كملت كلشي وفتت للغرفه طفيت الضوايات ونمت ، كلت بلكت يشوفني نايمه وميكعدني ولو هو توكف بعينه نايمه لو لا .....

غاطه بنومتي واسمع واحد يجر بلنفس شلون المنشول، كلش قريب عليه جان ،..

بده يحجي وشميت ريحه الشرب ، ..

مروان: ما ادري نايمه لو تسمعيني ، انه هوواي حجي بكلبي واريد احجي ، مخنوك ، .. اعرف جاي أأذيج ،
ومرات افقد اعصابي واضربج ، بس انه عصبي ودمي حار ما اتحمل مرة تتجاوز علي ، لو ترفع صوتها...

اني مغمضه عيني بس حسيته يبجي ، وجان وجها كلش قريب عليه ..

مروان: جر حسرة وكمل ، انه لو رغد بدالج مهزومه مني يمكن جان موتتها ، ما خليتها تشم الهوى يوم واحد، فد ليش انتي ما اكدر ، ما اكدر ، عندج علم انه من ضربتج طلقه وكعت كبل لا توكعين، ما تحملت ، رسيل انه اذيتج ، بس لا تنسين انتي هم آذيتيني ، هوواي ...
انه عفتج سنتين ، ما جيت يمج حت لا تكرهيني ،
شسويتي انتي هنتي رجولتي جدام اهلج وجدام اخواني .

انه حسام ، يعيرني ، ويكلي انت مو رجال ،وما ماخذ زوجتك ، تعرفين هاي الجلمة شكد صعبه عليه ، والله موتتني ...

خله راسه على راسي ، ودموعه كامت تنزل على خدي اني هم بجيت ، ما اعرف على حجيه ما اعرف على حضي ....

مروان: تدرين بعمري ما باجي على احد ، جدي مات بيدي واستصعبت ابجي ماكدرت ابين ضعيف خاف واحد يشوفني ، فد انتي بجيتيني .. انه بجيت بسببج ، وبجيت عليج ، بجيت لان جاي أأذيج ، بشنو احلفلج جاي أأذي نفسي .....

فتحت عيني ، وشفت وجها كبالي ، وخرته على كيفي ، جان ضوه التيبلام يعكس ملامحه ، عيونه حمر دم ...

رسيل: كافي مروان ثنينه تعبنه ، هم اني وهم انت ، الف مره كتلك اني مافيدك ....

جر نفس وكال ...

مروان: من كال ما تفيديني ، احتمال انتي كارهتني ،وانه مافيدج، بس انه اريدج ، انه تعلقت بيج ..انتي انزرعتي هنا ، نبته صغيره وسكيتج وكبرتي وتفرعتي واخذتي كلبي كله ، شلون اقلعج منه ، بحاله وحده، اله توكف دكاته ...

يحجي ويأشر على كلبه ....

رسيل: كافي تعبت ، كوم نام ، واني هم اريد انام نعست ...

مروان: رايح اسبح ، اعرف تلعب نفسج مني اذا شارب ..

رسيل: بكيفك ، تصبح على خير ...

طلع من الغرفه وللصبح اني افكر بكلامه ومكدرت انام ، وهو مرجع للغرفه بعد ....

كعدت الصبح شفته نايم ، على القنفه ....

.....

مشت الايام تتشابه ، مر شهر كامل ، رجع للدوام ، عشر ايام اضل وحدي وعشر ايام يكابلني ويكعد، ومرات من يتقرب مني ويشوفني مراغبته ، يأذيني ، لو يضربني ، لو يصيح عليه ، مرة من المرات ، ضربني راشدي وكام يسبني ، كلش انقهرت لان سب بابا....

نور ابد مشفتها ولا سمعت صوتها، ايهم ما اعرف بيه وين ما وين، بس مرة سمعت مروان ، وصاه على غراض يدزله ، يعني مسافر ، صار شهر وشويه ،..   ...

اسمع نور ياسر والجهال برة ، بس هو ابد مسمعت صوته معناها بعده مسافر ....

مرت الايام ، مروان يجيب مسواك ويقفل الباب ويروح ،قبل جنت اطلع بالبالكون شويه اشتم هوى ، هسه حتى الشباك سدة عليه اختنكت حيل ....نفسيتي تعبت ، كام يطب ويطلع مشاكل بينه ، بس بطل يضربني ، مرت ٣ اشهر ، الشهريه غابت عليه ماكو، كلت معقوله حامل ،بس لا اكيد هاي حاله نفسيه وتتأخر ...

عدت شهرين واني متجيني ، نفسي بدت تلعب من الاكل ما اشتهي اكل ،ما اطيق الشقه كمت اكرها .. تجيني ساعات املخ بروحي ،....

هنا صار خمس اشهر اني مسجونه ، بس شنو عدت عليه عبالك خمس سنين مرار وقهر ، حتى السجين ارحم مني على الاقل اكو ناس وياه يسولف وياهم يحجي همه ، اني وحدي مكابله الحياطين والتلفزيون ، الموبايل من رجعت ملكيته اكيد ماخذه .....

وبيوم كعدت الصبح جان موعد نزول مروان ، كلت هم راح يرجع وترجع سوالفه ، مجرد تذكرت رحت اتقيأت معدتي كلها ، طلعت من الحمام امشي ولازمه بطني كمت ادك بالباب حيل ،واصيح لحكوني ....

سمعت صوت ، هذا ايهم ، والله ايهم يمكن رجع ..

اسمع يكلها ، ليش قافله عليها ميكول ماتت احتركت، شبيه مروان تخبل ...

نور: ما اعرف ياخويه والله حرت بيمن احلفه وما يرضه اشوفها ....

سمعته يخابر ...حجه على كيف بعدين كام يصيح

أيهم: شنو معنى سوالفك هاي ، ادري معتقل، شنو تعاملها حالها حال السجناء العندك، مروان خاف الله بيها...حقك وانه وياك، بس اخذت جزاتها ، اي أدبها شهر شهرين ولك صارلك خمس اشهر ، والله لو ادري اله ارجع من السفر واخليلك حد ، كافي مروان كافي ..
شوكت رجعت شنو، اليوم ساعه سبعه، هسه انه وين احجي وانت وين، اسمعني ،مفتاح الشقه وين ، اكله تخبلت تدك بالباب ، يكلي من ارجع بليل ، اي اندليت ، الله وياك ...

نور: هاا وينه ..

ايهم: بالمجر مال ميز التواليت بغرفه رسيل القديمه ...

ركضت جبته وفتحت الباب والكه رسيل متمدده بالكاع عطت ايهم الحك رسيل ، متخربطه ...

ايهم: لا ياالله بسرعه جيبي مي ...

رحت جبت مي ونطيته اله، كام يغسل بوجها ...

كعدتها اني وشربتها مي ونيمتها بحضني ...

كمت امسد بشعرها واحجي وياها،،، وايهم صافن عليها ...

نور: حبيبتي ، رسوله كعدي انه نورة...

اشوفها بس تشهك بدون متبجي ...

ايهم: هذا صدك يحجي خمس اشهر حابسها ؟؟

رسيل: فتحت عيني واشوف ايهم كاعد كبالي بالكاع ومرتاج ضهره بالحايط ، واني نايمه بحضن نور ...

نور: حمدلله على سلامتج حبيبتي ..

رسيل: الله يسلمج ، كوميني عفيه ...

كومتني ، رادت تفوتني للغرفه وعطت ..ثنينهم التفتوا عليه...

نور: شبيج حبيبتي اسم الله الرحمن ..

رسيل: طلعيني من الشقه كرهتها ،راح اموت اختنكت ..

نور: امشي حبيبتي امشي...

طلعنه وايهم على صفنته ، محجيت وياه ولا سلمت عليه ،حسسته بعدم وجوده مثل مجان يعاملني ...

نزلت جوة كتلها لنور طلعيني للحديقه طلعتني وكعدنه
اريد اتنفس هوى طبيعي ، جان بدايه شهر العاشر ٢٠١٠

خلصت السنه واني كلشي ممفتهمه منها ...

ورة شويه نور كالت حارة كومي نفوت جوة ..

فتت وكبل نمت على القنفه راسي ثكيل ، غفيت ، محسيت اله يتخلى جرجف عليه باوعت نور غطتني ،رجعت نمت وكعدت على اصوات فتحت عيني ايهم وعمي علي كاعدين على القنفه المقابيلي يسولفون ، بس ايهم عينه عليه من شافني فتحت عيني دار وجها واستمر يحجي ويه عمي ...

صار الغده ، شميت ريحه اللحم ،كلبت معدتي ركضت للحمام استفرغت  ...طلعت لكيت نور واكفه ولازمه الخاولي ...

غسلت وجهي واخذته منها ورجعت مددت ...

شيماء: خاف شايله طفل ...

نور: لا عمه احتمال معدتها مستبرده، اني هم شكيت بيها بس لان ايهم كاعد وشفت وضعه تغير كله ، هيج حجيت ، هو هم كام اخذ السويج وطلع ....

للعصر ، ونزلت شوق تسأل وين السوار مالتي محد شافه ،سألت الكل ، كالو مندري ماعدنه ، التفتت عليه

شوق: رسيل مشفتيه ، انتي اليوم فتي لغرفتي الضهر ..

نور: وين صعدت هياتها نايمه هنا ومريضه ، لا صعدت ولا شافته ..

شوق: انه شفتها شوف بعيني شنو اكذب قابل ...

اجتي شيماء ،طبكت وياها ..

شيماء: احجي وينه ، مو عيب عليج تاخذين شغله مو مالتج ..

على الصوت اجتي بيبي وعمو علي واستلموني تحقيق..

شفت الشغله راح تنذب براسي كمت كعدت ...

رسيل: اني صارلي خمس شهور منازله ، واليوم يلا نزلت وبعد مصعدت ، نايمه ومتحركت من مكاني ، بعد وين شفت سوار...

شيماء: هو صار خمس اشهر مرتاحين مامبيوك شي ،ليش من نزلتي انباك ...

رسيل: تعاي فتشيني اذا لكيتي عود احجي وبعدين شسوي بيه هو اني ذهبي مالابسته ومروان يحير شيجيب ومو بعيني ، هلمرة عيني على ذهب شوق والله ياالله ..

علي : بابا اذا عندج طلعيه بلا مشاكل ، ترة تعبان

رسيل: عمو بشنو احلفلك وتصدك اني مماخذته ..

صار حجي هوواي وحلفت اني مماخذته بس حسيتهم ممصدكين ، كمت وصعدت فوك ،هم الحبسه ولا هم هيج شكولات...

لليل اجه مروان .سبح وفات للغرفه ..

اجه مدد بصفي ..

مروان: مشتاقلج ..

رسيل: مروان مالي خلكك ترة روحي طافره..

مروان: وانتي يايوم الج خلك .. 

كام يعيط ويصيح ركع الباب وطلع .....

ثاني يوم صعدلي ... اعصاب يفور

مروان: وين الذهب مال شوق طلعيه بسرعه ، مو عيب تاخذين شي مو مالتج ، انه مقصر وياج...رسيل: هاي شبيك والله مو أني اخذته صارلي سنين عايشة وياكم معقوله معرفتوني شنو اني اخلاقي شنو.

وبعدين اني عيني متروسة مو بحاجه سوار حتى اخذه و شسوي بيه لا اكدر البسة يبين مو مالتي ولا اكدر اطلع وابيعه لان أنت مانعني من الطلعة .

جان يعيط

مروان: داكلج طلعيه احسن الج وبرضاتج لان تعرفين شلون اخليج تطلعيه بعد ما ازوعج دم اخر مرة اسألج السوار مال شوق وينه .

كمت ابجي وارجف

رسيل: والله ماعندي شسوي بيه  هسه انزل ادوره جوز هيه شو وين خالته وناسيه كمت وكفت ع حيلي جان يدفعني حييل

مروان: شنو اختفى طلعيه هسه لو الحزام اخليه يلعب على جسمج

واكف فوك راسي وعيونه كلها شر اني اعرفه ديسوي هيج مو علمود اخته لو حابها وديطلع حقها لا لان البارحه مخليته ومنطيته عين ...

نزلت دموعي  لان اعرف كلش زين داتعب روحي على الخالي بلاش ونقاشي وياه عقيم ومراح يصدكني وبالنهايه مثل كل مرة لازم انكتل جريت نفس قوي وسكتت .

مروان: ها سكتي

باوعت عليه طلع باكيت الجكاير
لو أني تبسمرت  بمكاني اعرف كلش زين اذا تعاركنه و شرب جكارة واني موجوده لازم يطفيها بيه .

حضنت روحي وخليت راسي بين رجلي وبجيت وينك
بابه عني تعال شوف بنتك  شصار بيه من بعدك

لهناك ماأحس اله طفه الجكارة بأيدي عطت ولزم الحزام وضل يضرب بيه بلا وجع كلب على راسي وجسمي وكام يدفر بضهري لحد منتهيت وعافني وطلع.....

ضليت ابجي بحركه وصافنة سمعت صوت باب الشقة اندكت  كمت على كيفي وفتحته .

رسيل: شرايدة عندج تهمة جديدة تذبيها عليه وتروحين

شوق: باوعتلي من فوك ليجوة بشماتة ،كالو مضروبة ومزوركيج

رسيل: عبالج ما اعرف انتي اللي ضميتي السوار واتهمتيني اني بايكته قشمري على الكل بس ربج فوك يشوف ويعرف كلش زين الحق من الباطل والج يوم توكعين بشر اعمالج وتذكريني وكولي هاي حوبت رسيل طلعت بيه .

ههههههههههههه ضحكت ضحكة طويلة وكالت

شوق: والله زين بعد بيج حيل وتلاسنين كلت من بعد العياط السمعناه الكاج ميته اكيد اخويه ما قصر لو ما العيبة لا اهلهل و ابوس ايدة لانه برد كلبي بيج .

رسيل: يجيج يوم صبري ان غدا لناظره قريب مسلمتج بيد الله والعباس اللي تكومين وتكعدين تحلفين بيه كذب .

كامت ترجف

شوق: تدعين عليه لج تدعين عليه تعيط وكامت تملخ براسي اني محركت ايدي لان حيل ما بيه عفتها تملخ براسي حتى كمت ما احس بوجع ولا ابجي تعلمت على الضرب ، طبت نور تعيط وتجر بيها .

نور: ياحقيرة ياحية لانها فقيرة كدرتج عليها خافي ربج باجر عكبه سوالفج تنرد الج ياضالمة يوميه تاهمتها شكل ومسويه افلام عبالج كلنا ندري هاي سوالفج و رسيل ميطلع منها العيب عمنج غيرانه منها ومن جمالها وثقافتها هيج تسوين تردين تملين النقص البداخلج بأذيتج لهاي المسكينة بس مو صوجج صوج اخوج اللي يضرب بدون ميفهم والله اله يوم ويومه قريب.

شوق: خوش عصابه صايرات وحده تدعي عليه وحده على اخويه هين يجي واعرف شكله.

دفعتها نور طلعتها برة الشقة .

نور: ايدج الج سوي الترديه

وسدت الباب ورجعتلي تباوع عليه وتبجي لج ليش هيج خليتيها تضربج ليش مكسرتي ايدها الحقيره .

رسيل: اخوها خله بيه حييل حتى اكدر اقاومها لو اردلها الضربه .

نور: علمود السوار هيج سوة

رسيل: ضحكت بتعب ، انتي تتوقعين علمود السوار لو رادها حجه حته يجي يضرب ويهين بيه .

نور : كومي كومي خلي اسبحج  الله يفرجها عليج  وتطلع حوبتج بيهم .

اخذتني ودخلتني جوة الدوش وفتحت المي عليه وجسمي كله يون كتلها اريدة بارد 

نور: ليش خاف تستبردين.

رسيل: كلبي حار اريدة يبرد

فتحت المي البارد ونزل يلجم جروحي عبالك سجاجين وتذبح بجسمي واخذتني الصفنة ورجعتني بيت ابويه.
انقهرت على الدلال الجنت عايشته ...

وين صافنة ؟

رسيل رسيل رجعتي تصفنين يلا راح تستبردين كومي جبت المنشفة .
ناوشتني المنشفة نشفت ولبست البرنص وطلعت امشي بس ميتة الصارلي مو قليل يمكن اني قوية اللي تحملت كل هذا وبعدني مامتت دخلت لغرفتي ، جابت المشط وكفت على راسي .

نور: خلي امشط شعرج

رسيل: عوفيه راسي يأذيني عفيه

نور: ما اوجعج على كيفي حرامات متعكد

رسيل: جان بيه دم ويبس وتشابك الشعر .

نور: انتي ليش متحجيله الحقيقة وتخلصين من كل هذا الضيم .

رسيل : المن احجي منو يصدكني شفتي بعينج كلها طلعتني كذابه رغم حلفت وفرفحت .

نور : مو على السوار قصدي

رسيل: لعد على شنو

نور: على السالفة القديمة واللي صار وياج روحي احجي لأيهم  الوحيد ميعرف بلكت يصدكج .

رسيل: نور كارهني متشوفين بوجهي ميباوع عبالك خيال كباله مو بشر وحجاية والخ يكلي خاينه .عوفيني اني ماعندي حظ بالدنيا، برأيج ليش صار بيه كل هذا شنو الجرم السويته، ليش من دون العالم هيج صار بيه، ليش مو اني يم اخوتي هسه هواي اسئلة تجيني وما الكه الها جواب .

نور: حبيبتي هذا اختبار من رب العالمين والمؤمن الصحيح يمر بعده اختبارات ويجتازها بالصبر والتحمل وهذا كله عليه ثواب .رسيل: برأيج كل هاي الناس؟العايشة مرتاحة وسعيده كفار وماعدهم اختبارات شو بس عليه معقوله بس اني المؤمنة وهيج يصير بيه عمي اذا اخلص من الاني بيه واصير مثلهم حتى الصلاه اتركها.

نور: حرام استغفرالله ليش هيج تحجين رسيل اول تالي انتي ام القران والصلاه والصبر والله مرات من تصير عندي مشكلة وانقهر عليها رأسن تجين ابالي اكول اني ذرة لمصايب رسيل ما اوصل وهي مجزعت مثلي، صلاتها والتزامها ويه ربها .تالي استغفر ربي واكوم اصلي حبيبتي تعوذي من الشيطان وكومي صلي صار المغرب .

رسيل: اريد انام مابيه حيل كلشي اسوي

كملت شعري وطلعتلي ملابس

نور: هاج هاي البجامة لبسيها وكومي صلي ترتاحين وبعدين النومة هيج وكت ابد مو زينه .

كمت لبست بدون ما احجي رحت توضيت وكفت على السجادة ابجي بصوت عالي واشهك شلون عبالك واحد وشاف ابوه ويشكيله ضيم كلبه هاي اني من الزم السجاده احس رحت لابويه اشكيله واعرف ربي يسمعني وهو الوحيد من اشكيله ميمل مني رغم يومية اعيد الحجي نفسه واعيد كلشي مر عليه بحياتي انفض القهر والألم بسجادتي واكوم كأنما كلشي مصاير ويايه وارجع اتحمل من جديد الله ناطيني قوة صبر عجيبه اواجه اكبر شي بثبات وقوة يمكن يرجع هذا الشي لتربية بابا النه علمنه على الصبر والتحمل والمسؤوليه،

خلة شخصيتنه تقوة ،،، جان ياخذ رأينه بكلشي ويرجع النه من تصيرله مشكله ونحاول نحلها وياه ، من موضوع زواجه من شجن ولحد معافنه يشاركنة بكلشي يخص حياته ويشوف رأينه بيه شنو اذا وحده بينه رفضت والثانيه قبلت ميسوي الشي الكال عليه اله ثنينه نوافق وهذا الشي كلش عزز ثقتنه بنفسنه وخله عدنه قوة عجيبة بحيث نواجه اكبرر واحد .

كملت صلاة لميت السجادة وطلعت من الغرفة اباوع الصالة نظيفة خطيه اكيد نور نظفتها والله هاي البنية لو شأسوي ما اجازي ربع تعبها ويايه دمعتها ويه دمعتي تنزل .

دخلت للغرفة مددت ورجعت لخيالي لحياتي القديمة وين معفتها ملاذي الوحيد اللي يطلعني من الاني بيه ...

لهناك واحس برطوبه جوايه كمت واشوف دم متروس الفراش ... كمت وكفت ونزل اكثر تخبلت طلعت اركض  من الشقة وعطت نور لحكيني ،،  وكعت محسيت بشي بعد
....

يتبع .....

العروس في الثوب الاسود

البارت الثاني والسبعون

مروان

كتله اشتاكلي مدري شحجى ودردم

كتله أشتاك ، كال أحلم

من عدها وعرفت اليحب ....يتندم

من عدها وعرفت الموت ،، مو بالدم

من عدها وعرفت الوجع... صوغة هم

اسكر واريد انساك

وارد ارجع اشتاك

ياهوى العشاك والله انه مشتاك
.......

أيهم

ردناكم وما مش فرص

حتى الحلم يمكم خلص

شلت ايدي بس دك الجرص

انه ولهفتي نريدكم

كل الضوا بعيني خلص

انطوني فرصه ومو فرص

تلكوني عتبة أبيتكم..

جم أخ اصيح لوحدي

بيكم أوشل وابتدي

تدروني خوش مو ردي

امشولي لو امشيلكم

بس هذا حدنه

هذا حضنه الماجمعنة شكد تعبنه

شكد رسمنا احلام احنه

ندري قسمة بيد ربك

ندري لا هو ذنبي لاهو ذنبك

شكد تعبنا

بس هذا حدنا ...

رسيل

ما غرني المدح ... بشفاف المحبين

وما همني الشماتة اشما حجوا عني

يلتمن عليه ... امشتتات البال

وانفضهن نفض .. وانهض ولا جني

وينشدني صديقي .. المانشد عني

كبل طبعك الونة ... وصاير تغني

اكول تغيرت والناس ماهي الناس

رضاعة قواطي... وخيبو ظني
.........

دخلت للغرفة مددت ورجعت لخيالي لحياتي القديمة وين معفتها ملاذي الوحيد اللي يطلعني من الاني بيه ...

لهناك واحس برطوبه جوايه كمت واشوف دم متروس الفراش ...  وكفت ونزل اكثر تخبلت طلعت اركض  من الشقة وعطت نور لحكيني ،،  وكعت محسيت بشي بعد
....

نور: جنت بالمطبخ اسوي عشا ، ومخبوصه بالجهال علاوي بين رجلي، وايه تريد اسويلها بيتزا ،

وحايرة بزماني المن ارضى حت ارضى ، شلت علاوي اخذته للهول ، لكيت مروان ، متمدد على القنفه مغمض وخال ايده على عينه، كلش ضايجه منه ،

عفته ورحت لعمتي خليت يمها علاوي ،

طلعت من الغرفه واسمع رسيل عاطت ،

وراها الصوت اختفى وسمعت طبه ،

بعدني اصعد الدرج كمز مروان كدامي،

صعدنه نركض ولكينة ايهم شايلها ويرجف يريد ينزل بيها، اخذها منه مروان ...ويصيح .

مروان: شبيها؟؟؟ ...

ايهم: ما اعرف جنت ابدل وسمعتها عاطت ،طلعت اركض ،لكيتها غركانه بدمها ...

هاي يحجون همه وينزلون الدرج سريع ، ..

مروان: نور لبسي عباتج وتعاي وياي ...

ركضت اخذت عبايه وربطه من عمتي وامشي والبس بيهن .

صعدت بالسيارة جانت بالكراج بعدنه مطالعين الشارع،  مروان خله رسيل على الكشن الورة وراسها بحضني ، ..رجع للبيت ..

ايهم يدك هوورن ثبر الدنيا .

ايهم: ادري وين راح هذا ...اعوفه واطلع بيها كبل

نور: جوز يجيبلها حجاب .

ايهم: وكت ديانته البنيه حتموت ...

نزل ايهم فتح الباب الخارجي ورجع صعد رجع السيارة بك سريع، بحيث ردنه ننضرب بالباب ، طلع مروان يركض وشايل عبايه، عرفته والله ...شمرهة بحضني ..

مروان: غطيها بيها ...

نور: ماشي...

طلعنه وعفنه باب الكراج مفتوح....طبعا ايهم طاير بينه ، اباوع ايده ترجف .. مروان هادئ ..

وصلنه للمستشفى .. نزل مروان شالها وفات بيها يركض ..

مشينه اني وايهم وراهم ...

اخذوها منه خلوها بالسديه . وكالولنه انتضرو هنا ...

اباوع على مروان ايدة دم ملابسه متدمرة، وايهم هم ...

صافنه بيهم، شلون اخوان ثنين يحبون وحده ، وكل واحد بيهم يحبهة بطريقته الخاصه ، وثنينهن حبهم جنوني . بس شنو الفائدة ثنينهم ممحصليها ، ولا هيه ارتاحت لا اخذت التحبه ولا انسعدت وي اللي يحبها...

اهلنه كبل يكولون اخذي الي يحبج ولا تاخذين اللي تحبيه ، الي يحبج راح يدللج ، واللي تحبيه يتعبج...

بس ابد مو صحيح، وحياة رسيل اقرب مثال ...

والامثلة تضرب ولا تقاس .....

صح مروان دللها ويحبها بس بنفس الوقت تأذت منه

ماكول الصوج كله بمروان بس لا رسيل هم الها أيد بالصار

، ابد محاولت تحتوي زوجها و تتقرب منه ، رغم

مروان عصبي وصعب ، بس يجي بالكلام الطيب ،

كل رجال مهما كان عصبي وصعب ، بس بداخله اكو

طفل صغير ، لو حاولنه وياه راح نكتشف هذا الطفل

ونعرف اطباعه ، شيحب ، شنو يكره ، من شنو

يتعصب .وراح نكدر نتلافه كل مشكله قبل لتصير ،

ونمنعها قبل حصولها ....  

انتضرنه برة ، مروان كاعد ومدنك ، وايهم واكف ومنتجي على الحايط رافع رجل ومكتف ايده ورافع راسه للسكف ، عيونه مدمعه ، والله ايهم مفضوح ، بس مروان كلش عنده ثقه ب اخوانه صح يغار عليها منهم، بس ميخونهم .....

انتضرنه واجتي ممرضه ، كالت منو زوجها ، كام مروان .
كلتله تفضل ويايه ...

راحوا ورحت اني وراهم دخلنه لغرفه الدكتورة ...

_ حضرتك زوجها ..

مروان: نعم ..

_ زوجتك متعرضه لتعنيف اسري، وجسمها كله كدمات ،
وراسها متأذي ، اضافه لهذا كله ،

زوجتك حامل وسقطت ،

ولازم احولها عمليه تحتاج كورتاج ، لان الطفل كبير عمرة ٣ اشهر،،

وممكن نكول اسقاط الطفل ، من حسن حضكم ،

اتضح بلتحليل زوجتك جانت تاخذ نوع من المهدئات وهذا النوع اذا نأخذ بكثرة يسبب تشوه للجنين،لان دمها متشبع بهاي الماده

يعني هذا الطفل لو جاي كان اجه طفل غير كامل او مشوه ..

وقع هنا ، حتى ادخلها عمليه ، واتفضل استريح ، لان مدير المستشفى يريد يحجي وياك ...

نور: انصدمنه بالسمعناه ، شنو حامل شنو ٣ اشهر شنو طرحت شنو تشوه بالطفل، اباوع على مروان ، شنو شكله صار يرجف من الاعصاب ،دمرات وجها كلها برزت سكت محجى شي ...

التفتت للدكتورة ...

نور: دكتورة يعني شكد وتكدر تحمل مرة ثانيه ..

_ مو اقل من ست اشهر ..

نور: عفيه وهسه حالتها شلونها زينه..

_انت شتشوفيها زينه ، بتكم متعرضه لضرب مبرح ، يعني اريد افهم  هيه حيوان لو انسان، مهما كان السوء اللي ارتكبته ما المفرض تنضرب هيج ضرب ..الله يسامحكم .

طلعت، ومروان كاعد بمكانه ورة شويه اجوي ثنين ...

فاتو للغرفه وطلعوني ...اجاني ايهم

ايهم: هاا شنو كالت الدكتورة  ..

نور: حامل ٣ اشهر وطرحت ، وميصير تحبل مرة ثانيه اله تمر ست اشهر بسبب المهدئات الجانت تاخذها ...

شفته اختنك  ، راح مشى بالممر، يمكن عشر مرات يروح ويرجع ...

كاعده ، وطلع مروان وذوله الوياه، مروان سااااكت بس عيونه تحجي مدى الألم اللي بداخله ....
داخله انعكس بعيونه ، ..

راحله ايهم ...

ايهم: وين رايح ...

جاوبه الولد،  ...للمركز ، ومن تصحى زوجته هيه تقرر، اذا ينحبس ، لو تتنازل عن حقها...

اباوع مروان مستسلم يمشي كدامهم ...

ايهم ، صافن ميعرف شيسوي ، التفت مروان ، وكاله لايهم

مروان: رسيل ب أمانتك ...

ايهم هز راسه بس محجه شي ....

انتضرنه ورة ساعه ، كالو طلعت . تكدرون تشوفوها ..

رحنة اني وايهم هو يركض واني امشي سريع اريد الحك بيه ...

دخلنه، وجانت نايمه .بعدها مصاحيه من البنج ...

ايهم واكف فوك راسها، واني اكو كرسي جريته وكعدت يمها ،،

اباوع ايدها صغار ناعمات يخبلن ، بس لونهن اصفر , معقوله نزفت هوواي، بله هاي تنضرب ، شكد ناعمه ورقيقه ، ومروان شكد ضخم ،يمها ، والله خوفي لا ضربه من ضرباته تتسكط وتنتهي ...مرة كسر ايدها  وهسه طرحها شتشوفين بعد يا بت عمي ...

ايهم صافن عليها وعيونه مدمعه ، حجى بصوت ، ناصي مخنوك مبين مقهور حيييل ...

أيهم: شيصير لو هيه مرتي هسه ، انه اخليها توصل لهيج مرحله ، ليش دائما المايستاهل ، الله يوفقه وينطيه كلشي ، ليش الماشي عدل ، مايحصل شي ..
انه لو عندي رسيل ، يمكن يوميه اسجد شكر لرب العالمين .. بس هاي حكمته بعد .. وانه ما اعترض على حكمته....

جر حسرة طويله وطلع من الغرفه ....

ورة عشر دقايق ، بدت تحس ، ....

رسيل ...

افتح عيني واسدها جفوني ثكال ، اريد احجي ما اكدر ، حلكي متبنج ، راسي يتحرك بدون ما اني احركه،ما اسيطر عليه يروح منا ويجي منا ، اكو ألم ببطني ، عطشانة ...

فتحت عيوني واشوف بس غوواش .. هاي نور كاعده كبالي ....

مديت ايدي الها لزمتني ..

رسيل: اني وين ؟؟؟

نور: بالمستشفى .حمدلله على سلامتج حبيبتي ..

رسيل: ليش شنو الصار ..نور: ارتاحي وبعدين نحجي مو وكتها ..اروح اشوف الدكتورة، كالت من تكعد دزي عليه ...
....

طلعت نور ، ورة شويه فات ايهم، بس عيونه حمر وهدومه بيها دم ...

ايهم: حمدلله على سلامتج، خوفتينه عليج ...

رسيل: الله يسلمك ، حجيتها ودرت وجهي ...

ايهم: اعوفج ترتاحين ، اذا تحتاجين شي انه برة واكف ..

اشرت براسي ب اي ...

طلع واختنكت ، اني ليش هلكد اشتاقله، ليش مكاعد انساه ، ليش ما اكدر اتأقلم واكمل حياتي ، ليش حياتي وكفت من يوم العفته ، ليش وليش وليش وليش ، ماكو اجابه لأسئلتي غير جواب واحد، لان تحبيه....

دخلت الدكتورة ، وياها ثنين واحد منهم لازم دفتر ..

الدكتورة: حمدلله على سلامتج ، حبيبتي ، العوض على رب العالمين، بعدج صغيرة وتعوضين طفلج ...

رسيل: طفل؟؟ يا طفل ، حجيتها وعيني على الدكتورة وعلى نور اللي اجتي و وكفت وراها ...

_ جنتي حامل ٣ اشهر وللأسف راح ، هسه اللي اريده منج ، تنطين افاده كامله لتخافين محد يكدر يأذيج، تحجين الي صار ، منو ضربج ، و وصلج لهذه المرحله ..

باوعت عليهم وانفتح الباب فات ايهم ...

_ حبيبتي اذا تخافين من احد ، اطلعهم واحجي براحتج ..

عيني على ايهم ، عيونه تحجي ويأشرلي بيده ، بمعنى اشتكي عليه لتسكتين ...

درت وجهي منه وباوعت على الدكتورة ..

رسيل: محد ضربني ...

_ شلون ماما محد ضاربج جسمج كله كدمات ، ومبين اثار التعنيف عليج، احجي القانون وياج...

رسيل: دكتورة كتلج لا ضاربني ولا معنفني ..اتبلة عليه وهو ممسويها ...

_ ليش تردين تحميه، لان عنده رتبه ، وتخافين يطلع ، ترة سألت ، الولد الحقق وياه، هياته كدامج، كال حتى رتبته متفيده اذا اشتكيتي عليه ..

ابتسمت ، وكلت بكلبي مروان ، ينحبس، ابو العلاقات والفلوس وايده واصله فووك ، حتى الدكتورة يضيعهة بشربه مي ...

رسيل: لا دكتورة مخايفه زوجي يحبني وممأذيني ..

_ اخر كلام عندج ..

رسيل: اي نعم ...

شفتها ضاجت ، طلعو وسدوو الباب ..

ايهم: انه بحياتي ما شايف هيج غباء ، يعني ليش سكتي ، ليش تغطيله ، خليه ينحبس يوم يومين يحس ، بالسواه بيج ، ولج حبسج خمس شهور، وتكولين يحبني، وما مأذيني ...

رسيل: منو كلك حابسني، منو كلك مأذيني، مروان يحبني و مدللني  ، انت شدخلك ، اني وزوجي ...

ايهم: نور جاي تسمعين اللي اسمعه لو لا ...هههه زوجي ويحبني ومدللني، ... بده صوته يعلى ،،، لعد منو طرحج امي ؟؟؟؟

بس والله زين يسوي بيج ، عفيه عليه ، هذا دواج، وامداه لكلبي، اذا رجف عليج بعد. والله لو اشوفج ميته ، فلا اهتم ... نور انه رايح، هسا زوجها يجي راح يطلعونه، وهو يحير بيها ، زوجي يحبني ....

عافنه وطلع .....

نور: ليش تحركين كلبه ، ماتدرين شصار بيه عليج تخبل ، نزل شايلج على كلبه ، وتلكاه مروان واخذج منه .حت راد يدعمنه هلكد ما ساق سريع حتا يوصلج..

رسيل: نوررر ليش تحجيلي، اني تقصدت هيج احجي كدامه ، مثل معيشني مرار، الفات ، اني اعيشه الجاي ..

نور: النوب التفتي لايهم ...

رسيل: لعد من حرك كلبي وخطب وأثث شقته، ويطب ويطلع كدام عيني ، وزين زيان العرس والفرشه والقاط، واني من انضربت مدافعلي، تردين انساهن اله ، والله لو اموت ، لو من رحتله وذلني وهان كرامتي، يكلي شفتي رجلج راح لدوامه واجيتي للبديل، لو من سافرت رحتيله بهيج وضع ..

عبالج انسى ،كلامه يزرف بكلبي، كل حجايه حجاها، لو ضاربني سجين ولا حاجيهن على العموم محد يهمني بعد غير بس راحتي ، واشوفج شلون راح اتغير ...

نور: ياالله ، وترجع ضحكتج مثل قبل مشتاقة اسمعها ..

رسيل: راح تسمعيها وعد ...

ضلت نور تحجيلي، شنو كالت الدكتورة على حملي وعلى الحبوب الجنت اخذها ومن هالحجي ، وسالفه جرت سالفه ، وانفتح الباب فات مروان ، كامت نور طلعت وسدت الباب ...

اباوع عليه مكسور كسرة ، مشايفه مروان هيج ابد ، جر الكرسي وكعد ، ميكدر يخلي عينه بعيني ، مدنك

جر نفس وكال

مروان: ليش مشتكيتي؟؟

سكتت ورة شويه جاوبته

رسيل: يكفي الحال الانت بيه . ماكو داعي اشتكى واضيع منظر شوفتك وانت مكسور، ياهو احسن احبسك ، لو اشوف كسرتك وانت كاتل ابنك بيدك ،..

مروان: كافي رسيل انه من كاعي متأذي ...

رسيل: وبعد وبعد يا مروان شلون تنام ليلك ، وانت كتلت ابنك اللي صارلك سنين تنتظرة ..

مروان: وانتي ما مقهورة، ليش الراح فد ابني مو ابنج يعني؟؟

رسيل: بعدني صغيرة ، والعمر كدامي اجيب عشر اطفال، بس اويلي عليك انت كبرت ويادوب ابنك تلحك تشوفه يفوت مدرسه ، وراح تنتظر ست اشهر يلا اكدر اجيبلك طفل . تستاهل الصارلك ...

شفته بلع ريك ومسح عينه، دمعت ...

مروان: اوعدج، وكلمه شرف ، لو مديت ايدي عليج ، لو اذيتج لو سمحت لاحد يمس شعره منج، لتعتبريني من الزلم .... وكولي مروان كال وخلف ...

رسيل: ضحكت ،،،  لتخاف عليه من احد وتحميني ، خاف عليه واحميني من نفسك ...

مروان: وعدتج ، و وعد الحر دين ...

رسيل: شوكت اطلع منا اختنكت ...

مروان: بكيفج ، كالو من تشوف نفسها زينه وتكدر تكوم طلعوها ...رسيل: طلعني حتى لو موزينه ، ارجع انام بلبيت ...

مروان: تمام هسا رايح ادفع الحساب ، ونور تبدلج ..

طلعت واجتي نور ، بدلتلي ..

رسيل: منين هاي الملابس ...

نور: ايهم راح جابهن من البيت ، وخلاهن يمي..

رسيل: وينه هسه ..

نور: سأل عليج وراح ...

بدلت وكعدت انتظر مروان ....

فات . وكال يلا،،، لزمني من ايدي ومشينه ، بس عندي وجع بطني يموتني ...حس بيه اتوجع ، التفتلي ...

مروان: تعبانه ، بيج تمشين لو اجيبلج كرسي. .

رسيل: لا امشي ..

مشيت شويه ورجعت وكفت ..صاح على نور تلزمني وراح جابلي كرسي متحرك كعدني بيه ودفعني....

وصلنه للسيارة شالني وكعدني ليورة ونورة صعدت بصفي ...

رجعنه للبيت ، اول ما دخلنه للهول، تلكانه عمي علي يصيح ....

علي: ادري انت متجوز من الضرب وهاي طرحتها ، سنين متانين يصيرلك طفل وتالي هيج راح ...

مروان ساكت ميجاوب ...

علي: ويمته جنت ناوي تحجيلي ، لو ما ايهم يسولفلي انه نايم على اذاني ، اب ، ياناس الاب اخر من يعلم ،الله اكبر..

اجه عمي اخذني من ايدي وكعدني ..

علي: شلونج بابا خوما متأذيه ...

رسيل: شويه ..

مروان: هاج هذا العلاج مالتج جبته مناك ..اخذي وقت بوقته كله مكتوب على الغلاف ..

اخذته منه بدون ما اباوع عليه ،خليته بصفي ...

علي: نور يابه جيبي مخده وجرجف خلها تنام هنا ..

نور: خاف ما ترتاح على القنفه ..

علي: نيميها بغرفه من الغرف شو كوم غرف فارغه ...

نور: راح اجهز غرفه الضيوف تنام بيها ..

اكو غرفه بلبيت خاليها للضيوف اللي يجي يبات يمهم ، بيها اكثر من سرير ابو النفر وبيها كنتور ...

كومتني ورحت مددت ، بالغرفه ...

نور: اسويلج اكل تاكليه ،نامي شويه لبين ما اجي ...

رسيل: ماشي ..

راحت واني غمضت عيني نمت..

ورة شويه كعدتني ، مسويه شوربة وعصير برتقال ومعلاك ..

كعدت اكلت شويه من الشوربه وشربت العصير ورجعت نمت ..

نور: يااا والمعلاك ..

رسيل: ماحبه عفيه ..

نور: لازم تاكلينه مو بكيفج ..

رسيل: ابد والله ما اتقبله ...

نور: اوف يعنادج ...

اخذت الصينيه وطلعت وره شويه فات مروان شايل بيده ماعون وبيه المعلاك ...

كعد بصفي ، رحت ليغاد حتى يصيرله مجال لان كاعد بالحافه ، عدل كعدته ، .

مروان: فتحي حلكج ..

رسيل: ماحبه والله ..

مروان: مو شرط تحبينه ،تغصبيه ، هذا زين الج ...

كام يخلي وحده وحده بحلكي واكل ...

ضل شيش ،

رسيل: عفيه كافي مو معدتي كلبت ..

مروان: يلا انه اكله ، خسرتي ...

رسيل: اريد انام ..

مروان: شلون صرتي

رسيل:  احسن اذا طلعت ،طفي الضوه وراك ..

نمت وخليت ايدي على عيوني ...

لليل حسيت بحركه بالغرفه جان اكو ضوه خفيف يفوت من برة ، فتحت عيني ،شفته نام على الجربايه الثانيه ...

واستمر الحال هيج ، اني بالغرفه وهو يروح ويجي عليه مرتين باليوم حسب تواجده بلبيت ،

نور تحجيلي تكول يحير شنو يجيب ويكول وكلوها لتخليها بكيفها لو عليها كلشي متاكل ،

وبليل يجي ينام يمي بس على الجربايه الثانيه ، مرت عشر ايام ، كمت اكدر اكوم وحدي واكعد عادي ،

هو اصلا اني اكدر اكوم بس مروان هول الوضع وميخليني اكوم منا لهنا،ومن هو مموجود نور بداله

ورة العشر ايام طلعت كعدت بالهول جانت ،ساعه ٨ بليل ، سألت نور على مروان كالت التحق ،واجه عليج شافج نايمه وكال سلميلي عليها ...

رسيل: الله يسلمه ..

شفت ايه بت ياسر كاعده تلعب طاولي . هيه متعرف بس هيج ..

رسيل: نلعب اني وياج ..

ايه: يلا ،

كيفت فدوة

كعدنه بالكاع وبلشنه نلعب ...

رسيل: هاي شنو ليش انتي تبدين..

ايه: انه الاصغر لازم ابدي.

رسيل: ممممم غير اني ابدي لان كبيرة.

ايه: بس هلمرة وبعدين انتي ابدي ..

رسيل: يلا ماشي ولو من اولها غش هههه .

ايه: اهووو كله سته يطلعلج ..

رسيل: ههههه غير هو هيج اني شعليه ..

ايه: انه هم اريد السته ..

رسيل: جربي يلا ، الج مرتين تشمرين ...

شمرته طلع سته كيفت هههه ...

ورة شويه فاتوا ايهم وياسر ..

سلمو ورديت السلام ، ورجعت العب ويه ايه ..

صعدو كبل ، يمكن يسبحون ويبدلون ...

ورة ربع ساعه تقريبا نزل ايهم لابس تراك ، تربع وكعد كبالي ،.

ايه : هاي شنو عمو ليش كعدت بمكاني ..

ايهم: صارلها ساعه تغلبج مو ..

ايه: اي كلساع يطلع الها سته ..

ايهم: تعاي شوفي شلون راح اغسلها ، اله نخسرها انه وياج ، تعاي كعدي بحضني، كعدها..ولزم الزار وشمره ..

اني صافنه عليه ، من يوم الطلعت من المستشفى لليوم لا شفته ولا اجه سلم عليه ....

ايهم: يلا لعبي ، داسج ..

رسيل: تعبت اريد انام ، العب انت وايه ....

عفته وكمت فتت للغرفه الجوة،
شنو معنى تصرفاتك ، بيوم الي يعجبك تحجي ويايه تحجي وبيوم اللي تقفل عليه تقفل ، تكوم تعاملني اني والماكو سوة ، اني هم اعاملك بالمثل ....

مددت، ورة شويه غفيت ، مرت العشر الايام اني نفس وضعي ..

واليوم الي عشرين يوم يعني كافي صرت زينه بعد، رحت على نور جانت تسوي غده ...

رسيل: نورة اريد ارجع لغرفتي القديمه، بيج حيل انضفها اني وياج..نور : ومن يكول مروان يرضى تعوفين شقتكم ...

رسيل: يقبل ، خلي هاي الايام نبتعد شويه، بلكت نفسيتي تتغير واهدأ وهو هم يرتاح ،وارجع ..

نور: براحتج هسا اكمل البيدي ونصعد ..

انتضرتها كملت ، وصعدنه ، غيرنه الجراجف ،والبردات ، ونضفتها نور وجابتلي كم قطعه ملابس الي خلتهن بالكنتور ، جانت الغرفه فارغه مابيها غراض رغد الضاهر دازيهن الها....

ضليت بغرفتي ، وجبت الروايات والكتب اللي ايهم نطاهن الي ....

رتبتهن على الرف ، لليل اجه مروان دك الباب وفات ..

مروان: ليش عايفه مكانج .

رسيل: اريد ارتاح ..

مروان: رجعي وانه اطلع ، انام هنا ...

رسيل: لا مرتاحه ، انت هناك غراضك ومتعلم .

جر نفس وكال

مروان: براحتج ،، شلون صرتي ..

رسيل: احسن الحمدلله ..

مروان: عساااج دوم بخير وعافيه..

رسيل: تسلم ..

مروان: محتاجه شي ..

رسيل: سلامتك ..

مروان: تصبحين على خير .

رسيل: وانت من اهله ...

سد الباب وراح واني منعسانه ...

كمت اخذت روايه جذبني اسمها

( الامواج تحترق ) 

مضمونها

( الحب كالأمواج ،لايمكن ان نخفيه مهما كان القلب عميقآ، واسعآ ، قادرآ على الاحتواء ، كالبحر الكبير، ففي النهاية لابد ان يتدفق حارآ ، جارفآ ، كالنار )

*قصه لفتاه اسمها شاني رفضت ان تكون رهينه طبيب يوناني ،أرادها زوجة بالقوة ، وفي ليلة دخلتها هربت وتوارت عن الأنظار ، غادرت بريطانيا الى قبرص حيث قابلت براين ،الفتى الانكليزي الذي لاحد لجاذبيته ، احبته ، ،،، لكن الدكتور مانو زوجها اليوناني عاد فظهر بعد خمس سنوات في المستشفى حيث كانت تعمل ....
ماذا تفعل الان ؟ على اي صدر تتكئ ولا أحد من حولها يعرف انها متزوجه؟ حتى حبيبها براين*

شاني ضحت بحبها لبراين ورجعت لزوجها وخضعت اله من بعد هروب خمس سنوات ....

اخ يا شاني شكد قصتي تشبه قصتج ،، اني هم مثلج

شكلي راح ارضخ للامر الواقع واقبل بزواجي من مروان، كافي الصار تعبت من الحروب والمطاحن ...

لازم اعيش نفسي الها حق عليه ، حتى لو جنت ممتقبلته ومستحيل راح اتقبله ، بس احاول ، على الاقل ما اثير اعصابه.....

مررر شهر ونص من يوم الطرحت ، واجاني مروان بليل ..

فتح الباب وكعد بصفي جايب كرزات واجباس وهيج سوالف ،خلاهن بالنص ، طلع فلم وكعدنه نتفرج ..

مروان: اكلي ...

رسيل: اي ، اخذت جبس وكعدت اكل ...

كمل الفلم ، وكام يريد يطلع ،

مروان: بيج حيل باجر نروح للنجف هم نزور وهم نروح لابوج ..

رسيل: ياريت والله صارلي هواي مرايحه ..

مروان: حضري روحج بالخمسه كون جاهزه..

رسيل: ماشي ..

راح ، وكمت حضرت عباتي وملابسي ونمت كلش فرحت لان راح ازور ،وهم ازور بابا وماما ...

كعدت على دكه الباب ، فتحت عيني ساعه اربعه ونص ..فتح الباب وكال

مروان: رسيل كعدي ، يادوب نلحك .

رسيل: كعدت ..

راح وكمت غسلت وجهي وبدلت مطولت ربع ساعه ، يااا مصليت ، رجعت نزعت الحجاب توضيت وصليت ولبست ..

اجه مروان

كملتي

اي

طلعنه ، صعدنه بالسيارة وانطلقنه ....

وصلنه ويه الظهر ....

نزلنه ، قريب قبر بابا ....

رحت مثل كل مرة ابجي واقرالهم قران واقره الفاتحه واهديها لروحهم واكعد اشكيلهم همي ....

اجه مروان كعد كبالي وحجه بصوت مسموع ..

مروان: عمي انه جيتك وجبت رسيل وياي، واريدك تبريني الذمه لان أذيتها ، وكدامك انطيها وعد ، ما أأذيها ولا اسمح لاي احد يأذيها، انت اكثر واحد تعرفني شلون انه عصبي ودمي حار وما اتحمل ، يمكن لو انت عايش كان فهمتني ، وفهمت رسيل ، بوضع حياتي...

انه منا وجاي اكون الها اب قبل الزوج ، فد بالمقابل اريدها تراعي الله بيه ، لان هيه هم تعبتني ، انه هم اشكيلك منها، ما تسمع كلامي، تراددني، وهوواي حجي بكلبي ، اجيك فد يوم وحدي واشكيلك...

جر حسرة وكام ، جاب مي غسل القبر مال بابا وماما وقرينه الفاتحه ، ورحنه لقبر جدو هو قراله الفاتحه وغسل قبره واجه جرني من ايدي ...

مروان: لا يصير كلبج اسود ، اقريله الفاتحه، مو لخاطره لخاطر ابوج ...

رفعت ايدي وقريتله الفاتحه ، وطلعنه من المقبره، اتجهنا للامام ..

مروان: نتغده بالاول شتكولين..

رسيل: ماشي

دخلنه المطعم اكلنه ، وطلعنه ، وصلنه للامام توضيت وفتت من باب النساء ، لكيته واكفلي باب الصحن ...

اول موصلت اله لزم ايدي حيل ، واشر على الكبه مال الامام..

مروان: وحك هذا الاسد ، على ابن ابي طالب ، يارسيل يابت عمي، ما امد ايدي عليج بيوم ولا أأذيج ، بس بشرط انتي هم تحلفين ، تصونيني، وما تعانديني وتأذيني ، لان تعبت وانتي هم تعبتي ..

رسيل: وحق هذا الامام ما أأذيك بعد ...

ابتسم ودخلنه زرنه ، وصلينه، طلعت لكيته واكفلي ، بنفس المكان اللي اتفقنه عليه، كادني وطلعنه .. رجعنه للبيت ، ورة يومين كاعدين بالهول كلنا ، مروان ما اجه على الغده كال عندي شغلة ، اجه جانو يشربون جاي ..

كعد بصفي وخلة ضرفين بحضني ، رفعت راسي وكتله هاي شنو ..

مروان: حجزت تذكرتين، الي والج ، باجر نطلع لتركيا .....

يتبع