هلووو شلونهم الحلوين + أهل الأنبار شلونكم ويه العجاج😂😔💔 ، و چان نرجع بَعد أنقطاع ، المهم البارت الجاي ما أعرف شوكت على مجالي يعني لأن أمتحاناتي الشهرية بلشت و أنتو تعرفون البير و غطاه فـ تحملوني يـَ عيوني
المهم لا تنسون حبشكلات العيد ، و أهم شي التصويت و التعلي بين الفقرات چثرولي تعليقات گد كتگدرون بَس مو إيموجيات يعني لا قصدي آرائكم بالمشاهد و الأحداث يعني تفاعلو ويه البارت
و هَسه أخليكم ويه البارت ، قراءة مُمتعة💜🦋
*****
- رُوحي و راحتي ، و بين الرائين أنا أعشَقُك .
***
سجاد
رحنه للقسم آنـه و عمي سلام حَتى نشوف شهم ، طلبنه من الضابط و سمحلنه نشوفه ، گعدنه ننتظر وره شوي أجه و عمي گام عليه و حضنه ...
- شلونك وليدي طمني عليك يـَ بعد أبوك
- آنـه بخير بوية الحمدلله ، أنتو شلونكم؟
- حال الظيم حالنه بعدك يـَ بوية
- ليش؟!
- أگعد أگعد
سجاد : شلونك شهم
- هلا سجاد ، الحمدلله على الله
- يستاهل الحَمد
- شهم بوية آنـه جاي أگلك إن شاء الله هاليومين تطلع و ترجعلنه بالسلامة
- شلون؟ ، مو علساس راح أنحكم !
- لا وليدي ، طلعت السالفة كلها افتراء و خطة حَتى يوگعوك بحفرة ، و آنـه شاك بحيدر
- بَس بوية حيدر سديناها وياه ، بعد ماعنده شي ويانه
- بوية هذا ما يتوب مطالبنه بطلابة ، المهم المحامي جاي يشتغل ع القضية و إن شاء الله هاليومين يفضها و تطلع
- إن شاء الله ، بوية مُهره شلونها؟
- مُهره !!
- إي بوية مُهره
هنا عمي بقى ساكت حار شيجاوبه ...
- بوية شو ساكت ، مُهره صايرلها شي؟!
- لا لا أبني ما صايرلها شي زينة
- بوية عليك العباس گلي إذا بيها شي لا تضم علي
- مابيها شي وليدي والله ، يلا أحنه هَسه راح نمشي ، رايد شي؟
- لا سلامتك
- الله يسلمك
گمنه طلعنه من القسم و توجهنه للبيت ، حچه عمي و هو حاط إيده على راسه ...
- بالگوة كضيت روحي و ما حچيتله ، آنـه ما أگدر أضم عليه
- آنـه خايف لا يكون حَس بشي
- لا لا ما أظن ، لو حَس چان بقى يسأل
- عَمي شلون لو طلع و ما لگه مُهره ، أنت تعرف شهم مسودن و ما ينكض
- و هو هذا الـ آنـه خايف منه
***
رجاء : بابا رجع البنيه لأهلها خطية
حيدر : أنتِ مالچ غرض بوية
- بابا والله حرام البنيه حامل ، و حملها خطر ، عدها أدوية لازم تاخذها و مراجعات للطبيب ، شنو ذنبه الطفل اللي ببطنها؟!
- يواشچ بوية ، گلتي البت حامل؟!
- إي بابا حامل
- حلو ، يعني أبنهم هَسه بين أديه
- أنت شنو اللي ناوي عليه؟
- ردي لشغلچ بوية
- بـس با ...
- گتلچ ردي لشغلچ
***
رُسل صحت و وضعها تمام و صگر ما فارگها أبد رغم حالته تعبانة بَس أصر أنُ يبقى وياها و ميعوفها ، حاط إيده على راسها و يحچي وياها ...
صگر : شلونچ هَسه گلبي
- آني بشوفتك صرت زينة ، الف الحمدلله اللي رجعلنه ياك بالسلامة
- الحمدلله ، هَسه يلا گوليلي شنو مشتهية تا أگوم أجيبلچ
- ماريد شي مو مشتهية ، بَس ضل يمي
- ميصير لازم تاكلين
- مو هَسه
- خوش عَجل شوكت ما ردتي گوليلي
- تمام
أنفتح الباب و دخل عَلي شايل الطفل بأديه و دخل وياه جسام و رافد و فرات ، حچه ...
- يولو أنتو گاعدين إهينه و ذولة جو لگحو أبنكم عليه و مشو
صگر : ههههههههه ، يابة عَجل غير أنت جده
- دهاك أگضبه و أذن بأذن الوليد
- لا يابة ما زاله بأيدك أنت أذن بأذنه ، أنت هَم جده
- خوش عَجل ، بعدكم تريد تسمونه سيف؟
- إن شاء الله
قرب وجهه من أذن الطفل و بده يأذن بأذنه ...
- اللهُ أكبرْ , اللهُ أكبرْ ,
أشهد أن لا إلهَ إلا الله , أشهد أن لا إله إلا الله
أشهد أن محمداً رسولُ الله , أشهد أن محمداً رسول الله ، الخ ...
- الله يحفظة و يوفقة و يجعله من الصالحين إن شاء الله
باسه من راسه و أنطاه لأبوه ، أخذه صگر و شاله بأيد وحدة عبن إيده الثانية مكسورة و ميگدر يشيله بيها ، باسه من خده و صار يلاشي بي و يضحك وياه ، حچه رافد ...
- يول تره ما راح يفتهم عليك و هو يالله عمره يوم
- مالك علاقة ، آني و أبني ننجاز
- إي تسطفل على گولت أخوانا السوريين
فرات أستغل أنشغال الكُل بالطفل و راح وگف بصف عشگ ، لزم إيدها و حچه ...
- شوكت نتزوج و نجيب طفل مثل هذا
- لاحگين على هوسة الأطفال حَبيبي
- بَس آني ما أصبر
- ما تصبر على شنو؟!
- أريد طفل
- يعني شتريد نسوي طفل هَسه قابل !!
حَط إيده على خصرها و حچه ...
- والله آني ماعندي مشكلة أسوي طفل هَسه
عشگ حسته تماده بحركاته ، أبتعدت عنه و حچت ...
- شبييك تره أحنه مو وحدنه
- إي عادي و إذا
- هاااا ؟
- أگول هو منو اللي جه و حضن الثاني گدام أبوية و عمي مو أنتِ لو آني غلطان
- أهووو هَسه لا تلزمها عليه ، ما چنت منتبهتلهم
- علواه هَسه ه‍ـم ما تنتبهيلهم
- شو أنت طالعة عينك وره الخطوبة
- حَتى أنتِ طالعة عينچ ، مو بَس آني
- اووووف
عافته و راحت گعدت بعيد عنه و هو ضل يدحگ عليها و يضحك
عَلي راح گعد بصف نجاة و حاچاها بصوت ناصي ...
- هذا الحفيد الثاني يـَ نجاة
- إن شاء الله يملونه البيت كُله أحفاد
- أهم شي تكونين أنتِ وياي
- آنـه وياك طول العمر ، الله يخليك اليه و ما يحرمني منك
- و يخليچ
عشق
للعصر و رجعنه للبيت بَس خالة و صگر بقو يم رُسل لأن لباچر يلا يطلعونها ، وصلنه البيت و دخلت لغرفتي بدلت بسرعة و رحت لغرفة فرات أحضرله ملابسه لأن يريد يسبح ، فتحت باب الكنتور و صار بوجهي صندوگ شوي چبير ، صار عندي فضول أعرف شنو بي ، جريته و حاولت أفتحه بَس طلع مقفول عفته و رجعته لمكانه ، دورت بملابسه و أختاريتله تراك أسود و جواه بدي أبيض ، خليته ع الچرباية و رحت للميز فتحت واحد من المجرات و لگيته للسبحات و المحابس و الساعات ، شفت السوار اللي محفور عليه حرف ميس ، بعده محتفظ بي ، ضجت من شفته ، بين ما داگلب بالغراض حسيت أديه حاوطت خصري ، باوعت بالمرايه طلع فرات ، دنگ راسه و شم رگبتي ، حچه بصوت هامس ...
- شعندچ بغرفتي
- أأأ ، شسمه ، چنت داحضرلك ملابسك
وخرته عني و أنداريت عليه ، صفن بوجهي شوي بعدين حچه ...
- عاجبني أخرب حمرتچ
- يا حمره ، ما شايلة وياي حمره
- مو هيچ قصدي
- لعد؟؟
تقرب مني حيل و باسني من شفايفي ، هنا تمنيت الأرض تنشگ و تبلعني ، أبتعدت منه بهدوء ...
- أأأ ، هذا ، حضرتلك ملابسك ، أروح هَسه
عفته مبتسم و طلعت من الغرفة ، رحت لغرفتي دخلت و سديت الباب و آني گلبي مديهدأ ، صار يدگ سريع ، كلش ما تقبلت يتقرب مني هيچ و يبوسني ، بعدني مجاي أتقبل رجال هيچ يسوي وياي حَتى لو هو خطيبي و آني أحبه ، مجاي أتقبل هالشي ، لازم أحاول أفهمه هالشي
***
سجاد و أبوه ما خلو مكان ما دورو على مُهره بي بَس مالها أثر و الشرطة مستمرين بعمليات البحث و أيضًا ماكو نتيجة ، حسين أكثر من مَره يتخربط و ينقلونه للمستشفى حيل تأذة على أختفاء بنته ، بهاليومين شهم طلع من السجن راح أبوه للقسم و جابه و رجع للبيت ، دخلو جوه و أستقبلته أمه و هي تبچي ، گعد و هو يگُلها ...
- هَسه ليش تبچين يا يمه؟!
- فدوة رحت لطولك يمه
- أسم الله عليچ حَبيبتي
سكت شهم و صار يتلفت حواليه ، رجع عاين على أهله حچه ...
- چا مُهره وين؟
سكتو ما جاوبو ، شهم حَس أنهم ضامين عليه شي ...
- ليش ساكتين؟!
السكوت أحتلهم و هُمه حايرين شلون يگُلوله هالخبر ، شهم من شافهم هيچ زادت الحيرة بگلبه ، فز على حيله و صاح ...
- جاي أسأللكمم مُهررره ووييين ، جاوبونيي؟؟؟
گام سلام و هو يحاول يهدي ...
- على كيفك وليدي آنـه أحچيلك كلشي
- بوية مُهره صايرلها شي؟
- باليوم اللي أنسجنت بي ، داخلين زلم ما ندري منين ماخذين مُهره وياهم و رايحين ، بلغنه الشرطة و دورنه بَس ما وصلنه لنتيجة
- شللووون يعنيي مخطووفة ، آنـه ما جاي أستووعب مااا جاااي أسستوووعب اللي أسممعههه
گعد ع القنفة و صار يدگ على راسه ...
فاطمة : ولك يمه لا تسوي هيچ ، ترجع بعون الله و أهل البيت ترجع
- منووو أخذهااا مننييي منوووو
ضل يصيح و أبوه و أمه مو گدرانين يهدونه آخر شي عافهم و طلع
***
رافد
گاعد بالحديقة وحدي ، ما حسيت أله إيد أنحطت على چتفي من وره أنداريت أدحگ و لنه أبوية ، أبتسم و حچه ...
- شايل بگلبك على أبوك يوليدي؟!
ما جاوبته و درت وجهي ، سحب الكُرسي و گعد بصفي ...
- وليدي رافد ، آني والله مو متعمد ما أحچيلك عن أمك ، بَس آني مگدر أجيب طاريها ، من أسمع بأسمها گلبي ينلچم ، جاي تفتهم عليه لو لا؟
أداريت عليه ...
- بَس يابة آني من حقي أعرف كُلشي عن أمي ، و أنت التحچيلي مو أحد غيرك
- صار ، گُلي شنو يدور بعقلك من أسئلة عنها و آني أجاوبك
أنتبهت لنبرة الحزن بصوت أبوية من يحچي عنها ، و الدمعة اللي واضحة بعيونه ، صفنت شوي ، آني هَم ما لازم أضغط عليه و لازم أتفهم موقفه ...
- لا يابة مو هَسه ، شوكت متحس نفسك جاهز و مرتاح أحچيلي اللي تريده ، آني ماريد أضغط عليك
أبتسم ...
- يعني ما زعلان علي؟
- آني مگدر أزعل منك يابة ، أنت ابوية و تاج راسي ، ليش قليل اللي سويتلي ياه ، ربيتني و چنت ليه الأب و الأم و كُلشي ، زواج ما تزوجت و فضلت تظل طول عمرك وحيد بَس علمودي ، و هَم أزعل منك ، والله غير بطران آني
- هههههههههه ، الله يخليك وليدي
شوي و شفنه نَفس طلعت تسگي بالحديقة ، ألتفت عليها أبوية و ناداها ، جت ...
- هلا عمي
- أستكين چاي بنيتي من أديچ الحلوات
- صار تدلل ، و أنت رافد تريد؟
صفنت عليها و ع الحمره الوردية الخفيفة اللي على شفايفها اللي زايدتهن جمال و جاذبية ، ردت أچفص بالحچي بَس على آخر لحظة تذكرت أبوية گاعد ...
- إي ، لا ، أريد عصير وردي
- هااااا؟!
جسام : عصير وردي هاي وين لگيتها وليدي !!
- ءءءأ ، هذا يمعودين عصير برتقال مشمش حي الله
أبتسمت و راحت ، تمشي و تتمايل بخصرها گدامي و آني گلبي أحسه يتمايل وياه ، گمت وراها ، فتت للمطبخ لگيتها حاطة الچاي ع النار و جاي تسوي عصير ، رديت الباب و رحتلها حضنتها من خصرها و حطيت راسي برگبتها ...
- أنتِ شنو ناوية تجلطيني يولي؟
- ياااا رافد فدوة وخر ، هَسه يجي أحد و يشوفنه والله فشلة
- ما اوخر
سحبت نفسها من بين أديه و وگفت گبالي ...
- و العباس أنت مخبل
- و العباس آني مخبل بحُب هالشيعية الگبالي
أبتسمت ...
- ليش سويتي بيه هيچ ، أبوية گاعد و لعبتي بيه طوبه
ما أدري شلون گضبت نفسي گدامه و ما چفصت
- ليش شسويت آني؟!
تقربت منها و حطيت أصبعي على شفايفها ...
- ميلة خصرچ بالمشية ، و الحمره الوردية اللي على شفايفچ ، خبلتيني بَعد لا تحطينها
- حَبيبي هو أنت مخبل من گاعك
- شنو رأيچ أشوفچ خبالي الصحيحي هَسه؟
- لا لا فدوة
أنادرت ع الچاي ونه متفايع و عاگد ...
- عززاااا ، أحترگ اچاي كُله من وراك
ضحكت و رحت يمها ...
- أحبچ يـَ نَفس ريتي
***
رُسل
ثاني يوم طلعنه من المستسفى و رجعنه للبيت ، متمدده ع الچرباية و سيوفي بالسرير ليغاد عني ، أنفتح الباب و دخل صگر بإيده صينية الأكل ، حطها گدامي ...
- يلا حياتي أكلي تا تصيرين زينة ، هذا معلاگ آني شويتلچ ياه بإيدي
- ما دام أنت اللي شويته راح آكل
- عفيه
صار يسويلي لفات زغيره و ينطيني ، شال بطل العصير و فتحه و أنطاني ياه ...
- أريد ببسي آني
- موزين عليچ الببسي هَسه ، أشربي عصير أحسلچ
- أنت هَم أكل وياي
- آني تعشيت حَبيبتي أكلي أنتِ
هنا گعد سيف و صار يبچي ...
- حَبيبي أنطيني ياه خل أسويله مميه هَسه جوعان
- لا أنتِ ظلي أكلي آني أشوفه
گام عليه و شاله من السرير ...
- هاا بابا هااا سيوفي ليش البچي وليدي ، جوعان مو
رجعه ع السرير و گام طلع المميه ...
- شكم رقم نسويله؟
- سوي رقمين
سواله المميه و شاله و گعد بصفي ع الچرباية ، و صار يرضع بي ...
- سكت أبو كرش
- ههههههه
- يلا بَعد گلبي ، طيبي بساع علمود من أداوم ما يظل بالي يمچ
- خفت عليه صگر؟
- أله متت من الخوف ، من گالي أبوية دخلوچ للعمليات خفت ، لأن أعرف أنُ حملچ مو سهل من البداية و أكيد الولادة هَم مو سهلة
- لو متت چان شسويت؟
عگد حواجبه ...
- هَسه ليش هالحچي يا رُسل
- بَس أحچيلي أريد أعرف
سكت شوي و بعدين رجع حچه ...
- رُسل أنتِ مثل سلاحي ، و العسكري بدون سلاحة ما يسوه شي و ما يگدر يكمل ، يعني آني بدونچ مگدر أكمل حياتي
- يعني آني سلاحك؟
- إي يـَ سلاحي
أبتسمت و هو گام رجع سيوفي لفراشه لأن نام
***
شهم
رجعت للبيت و آني الخيبة و الحزن واضحات على وجهي ، فتحت الباب و دخلت لگيت أمي گاعدة و تلوب و أبوي رايح راد بالصالة ، أنتبهو عليه ، حچه أبوي ...
- وينك ولك ؟! ، من الصبح ما بينت ، شليت حالنه آنـه و أمك
گعدت القنفة و دنگت راسي ...
- ما خليت مكان ما دورتها بي ، حچيت ويه الشرطة و گالو مالها أثر بعدنه ندور عليها ، وين ألگاها بوية؟
أجه أبوي گعد بصفي و حط إيده على چتفي ...
- نلگاها وليدي بأذن الله نلگاها ، أنت بَس أرتاح و لا تسوي بنفسك هيچ
- شرتاح بوية شرتاح ، آنـه راحتي وياها
سكت أبوي ما حچه شي ...
- أنوب حامل بوية ، تعرف إذا صارلهم شي هي و أبني شيصير بحالي؟ ، و العباس أموت
فاطمة : توكل على الله وليدي ، هو اليدبرها
سكتت و گمت صعدت فوگ لغرفتي ، فتحت الباب و فتت ، تخيلت أطب و ألگاها گبالي بَس ماكو ، گعدت ع الچرباية ، تمددت ما حسيت على نفسي شلون نمت
***
عشق
گعدت الصبح نَفس الروتين ، نزلت جوه بَس أحس راسي يوجعني كلش اليوم ، رحت للمطبخ لگيت ماما ...
- صباح الخير
- هلا ماما صباح النور ، يلا أگعدي تريگي لا تتأخرين على جامعتچ
گعدت أكلت شوية لأن ما مشتهية ، أجه فرات ...
- صباح الخير
أبتسمت بوجهه ...
- صباح النور
گعد مقابيلي ع الكرسي و صار يقره مجلة ، كملت ريوگي و گمت حَتى أغسل بَس دخت كُلش و لزمت الميز ، گام عليه فرات و لزم إيدي ...
- شبيچ ، عشگ شبيييچ؟؟
شو دحگي عليه
- هااا ، مابيه شي بَس دخت شوية
بدور : شبيچ بنيتي ليش دختي؟
- مابيه شي ماما هيچ دوخة
فرات : أگعدي أرتاحي
- لا مگدر تأخرت ع الدوام
- عوفي الدوام متروحين اليوم
- لا شنو عندي أمتحان اليوم
- ميخالف يتأخل
- لا والله فدوة فرات أريد أمتحن و أخلص ، وصلني
سكت ما جاوبني ...
- إذا ما توصلني أگول لأحد من الولد يوصلني
- دمشي يلا
وصلني للجامعة و ردت أنزل و صاح ..
- عشگ
أنداريت عليه ...
- هلا حَبيبي
- راح يظل بالي يمچ
- ليظل بالك حَبيبي والله مابيه شي
- زين ديربالچ على نفسچ
- إن شاء الله ، و أنت هَم
- صار
نزلت و دخلت للجامعة و هو حرك سيارته و مشه
***
شهم
گعدت من الصبح صليت و بدلت و نزلت جوه ، مريت ع المطبخ لگيت أمي جاي تحضر بالريوگ ...
- يمه آنـه طالع
- وين رايح يمه تعال تريگ
- ماريد
- ولك يمه شلون متريد ، و أنت من البارحة الصبح ما أكلت ، تعال تريگ يـَ يمه لا يصير بيك شي ، والله آنـه و أبوك مو ناقصين صدمة ثانية
- ماريد شي يمه ، بَس أريد ألگاها ، أبوي وين؟
- طلع على بيت عمك حسين ، گال من يگعد شهم خل يلحگني
- تمام
ودعت أمي و طلعت لبيت عمي ، وصلت و دخلت لگيتهم گاعدين بالديوان سلمت و گعدت وياهم ...
بكر : و التالي شنو ، راح تبقى البت مختفية
حسين : ولكم والله عقلي ما جاي يستوعب صارلنه أسبوع ندور عليها ماكو ، وين راحت و منو ذولة الأخذوها !!
سلام : معقولة حيدر أله إيد بالسالفة؟
بكر : شيريد من عدنه حيدر ، مو فضيناها وياه
حسين : كلشي نتوقع من حيدر و جماعته
فزيت على حيلي و گمت ردت أطلع صاح وراي عمي حسين ...
- شهم أوگف
أنداريت عليه ...
- وين رايح؟
- رايح أشوف مُهره عند حيدر لو لا ، و إذا طلع هو ماخذها أقرو على روحه الفاتحة
بكر : ولك شني تروحله ، أنت رايد تفضحنه؟؟
- چااا ياا عمييي گليي شسووي ، مرتتيي و ببطنههاا أبننيي صاارلههم أكثر من أسبووع مااكو ، شسووي أنتو گلوليي شسوويي
تقرب من يمي عمي حسين و حط إيده على چتفي ...
- بوية شهم ، إذا مُهره مرتك فـ هي بنتي يعني قطعة من گلبي و اللي ببطنها مثل ما هو أبنك فـ هو حفيدي ، بَس ما بدينه غير ننتظر الشرطة و شغلهم و ما نتهور لأن هاي الشغلة بيها سُمعتنه يـَ بعد عَمك
- و أبقى هيچ عمي ، گلبي شابه بي النار ، مو گادر لا أگعد و لا أرتاح بغيابها
- كلنه گلوبنه شابه بيها النار يوليدي ، بَس أكو رب اليطفي نار گلوبنه و يهديها ، زت حمولك عليه و گول يا الله و هو اليدبرها
خنگتني العبره على كلامه هذا ، شلون بيه آنـه شلون أتحمل فراگها ، صاح عمي على سجاد ...
- سجاد بوية أخذ أبن عمك و روحو يم عباس و خلونه آنـه و عمامكم نداور هالأمر بينه
طلعنه آنـه و سجاد نمشي جسد بلا روح ، ما ندري أصبره لو يصبرني
***
عشق
بالگوه أمتحنت و طلعت من الأمتحان بالگوة أمشي دايخة و الدنيا تفتر بيه ، أصلاً حَتى ما أدري شلون جاوبت ، رحت للحديقة لگيت أسراء گاعده على واحد من المقاعد ، رحت گعدت يمها و حطيت إيدي على راسي ، أندارت عليه ...
- هاي شبيچ ولچ؟ ، عشق شو باعيلي
- ما أعرف راسي حيموتني و دايخة كلش
- شلون هَسه تطلعين؟
طلعت فوني من الجنطة و نطيتها ياه ...
- هاچ دگي على فرات و گُليله يجي ، آني ما أگدر أحچي
أخذته و دگت عليه شوي و جاوب ...
- السلام عليكم
- و عليكم السلام ، هذا مو تيلفون عشق أنتِ منو؟
- إي ، آني صديقتها ، خوية عشق كلش مريضة و متگدر تحچي ياريت تجي تاخذها
- شللوون؟؟ ، زين زين جاي ، ديري بالچ عليها عفيه
- تمام
وره هيچ عشر دقايق ، دگ تيلفوني و هو بإيد أسراء و جاوبت ..
- ألوو
- وينكم أنتو ، آني وصلت
- گاعدين بالحديقة اللي على يسار الباب
- تمام
سدته و أنطتني ياه ، شوي و رفعت راسي عيوني مغوشات مجاي أگدر اركز ، شفت رجاي ديمشي بأتجاهي لابس دشداشة سوده و لاف چراوية عرفته فرات ، وصل يمي و حط إيده على چتفي ، دنگ عليه ...
- عشگي هاي شبيچ؟
- دايخة فرات
- زين گومي آخذچ للمستشفى
- لا أخذني للبيت
- يابة شلون آخذچ للبيت متشوفين وضعچ شلون ، گومي نروح للمستشفى
گومني و گادني و آني خليت راسي على چتفه و غمضت مجاي أگدر أفتح عيوني ، وصلنه السيارة و صعدنه
***
شهم
رحنه آنـه و سجاد للقسم حَتى نشوف آخر التطورات بسالفة أحتفاء مُهره ، و هناك صادفنه عمي حسين و أبوي ، دخلنه كُلنه للضابط گعدنه و حچه عمي حسين ...
- بشرنه سيادة الضابط ماكو أخبار عن بنتي؟
- الحمدلله أجيتو ، أستجدت أمور بالقضية و ردنه نبلغكم
شهم : شنو هالأمور؟
صاح على واحد من الولد ينطي علاگة سوده ، أنطاني ياها و حچه ...
- لگينه هذا الثوب بدائرة أختفاء البنيه ، الثوب ملطخ بالدماء و بي أكثر من أثر لطعنات سكين ، شوفو إذا چان ثوب بنتكم لو لا ...
********
يتبع ...
شلونها القفلة🙂 ، أحچولي توقعاتكم
تعالو أنستا
سحر الدليمي