إني رأيتُ من العيونِ عجائباً
وأراك أعجب من رأيتُ عيونا
ما كُنت أحسب أن طرفاً ناعِساً
قد يُورث العَقل السَليم جنونا
#شـيـاع الـمِسك
#هُـدى حُـسَـيّـن
••••••••••••••••••••••••••••••••
كنت متمددة واراسل اخواتي واني بالي الصار اليوم
شلون كنت تعبانه وشياع ما تركني ابد من غفيت
بحظنه يلا طلع ، قفلت تلفوني ردت انام لكن انفتح
الباب رفعت راسي شفته شياع ابتسمت اله وهو كالي
شياع: شلون صرتي
مِسك: اني تمام
شياع: ما شفتج نزلتي گلت صار بيها شي
مِسك: لا لا لكن تعاجزت انزل
ختمت كلامي وضحكت من اجاني وفتح الي ايديه
ارتميت بحظنه وهو طبع شفافه على راسي كالي
شياع: كلشي يهون ولا يصير بيج شي
ابتسمت اني وغمضت عيوني كتله
مِسك: شصار بضبط اهناك ما ادري ما كنت واعية
شياع: ما صار شي
رفعت وجهي وباوعت لعيونه بملل كتله
مِسك: لو اكلك الشط بي مي تكلي لا عود ليش ما
تحچيلي شي
ضحك وكالي
شياع: شحجيلج مثلاً
مِسك: عود انتَ هيج كتوم وما تسولف لحد
شياع: مرات اكو حچي ما لازم نحچي حتى ما نزيد
الطين بله
مِسك: اهااا
شياع: وعيونج
مِسك: شياع باچر راح يجون اهلي خليني اروح
شياع: اي
مِسك بالفهة: اروح
شياع: لا كملي
ضحكت اني وكتله بتردد
مِسك: اريد شسمه هذا ابات
شياع: لا
مِسك: لا ما اكمل
شياع بضحكة: اي
ضحكت وختلت بصدره كتله واني استنشق عطرة
الكان ممزوج بريحة جكاير
مِسك: كنت تشرب جكاير شياع
شياع: مرات اشرب نركيلة ويا الولد
مِسك: ليش عود
شياع: واهس
مِسك: لكن هي مو زينة وتأذيك
ما حچى للحظات تنهد وكال
شياع: تأذي بس داوي مِسك
باوعتله كتله
مِسك: اني اداويك بس لا تأذي نفسك شياع
ابتسم الي وطبع شفافه على عيوني
شياع: ارتاحي يعيون شياع نامي وارتاحي
غمضت عيوني واني مقهوره علي شكد احس شايل
تعب لكن ما يحجي لحد ، افكر اذا يحجي لإنجيل لو
هي حالها من حالي ، غرقت بنومي واني افكر بشياع ،
ثاني يوم فتحت عيوني لكيت نفسي بحظنه هو لسه
نايم ، ابتسمت اني ورفعت ايدي صرت العب بالحيته
وعيوني تتنقل على وجه لتطبع ملامحه الهادئة ، رفعت
نفسي وطبعت شفافي على عيونه ، احب عيونه كان
كحلي ونظراته كلها بالي عيونه كانت حلوة شما
احچي ما اوصف جمالهن ،
ضمني اله اني ضحكت وغمضت عيوني كنت احاول
انام ما اريد اكعد قبله لكن للاسف ما نحجت اداعي
بالنوم من حسيت عيونه اخترقت روحي ، فتحت
عيوني باوعت شفته صافن بوجهي ضحكت وكتله
مِسك: شبيك
شياع: ثاريج نعمة
ضحكت اني كتله
مِسك: احرص على هالنعمة شياع والا انكلبت نقمة
جرني اله وكال وهو خازرني بعيونه واني مبتسمة
شياع: ما عندي مرة تهدد
طوقت ركبته وكتله
مِسك: ما عندي رجال يعترض
شياع: هاااا هيج صار الحچي
ضحكت هو من تقرب يبوسني كبل طفرت وكتله
مِسك: اهلي راح يجون اليوم خليني اروح الهم
شياع: احتركوه اهلج
التفتت اله واني خازرته كتله
مِسك: لا تغلط ترا اصير مو خوش
رفع حاجب وكام اني كبل طفرت وهو يحجي
شياع: طالعلج لسان وتهددين برجلج
وكفت يم الكنتور وتخصرت كتله
مِسك: واذا رجلي لو نبوخذ نصر كدامي ما اسكت الا
اهلي هااا سم يييمه
ختمت كلامي واني اركض على الحمام بعد ما طفر راد
يجيني قفلت باب الحمام عليه وايدي على قلبي دك
الباب بقوة وصاح
شياع: اطلعي ام لسان
مِسك: اما ما اطلع
شياع: وين راحت شجاعتج من تهددين افتحي الباااب
مِسك: غير ما رايده روحي اذا افتحلك الباب روووح
شياع روح
شياع: طلعتي بوخة ولج بس السان
مِسك: غير حكم القوي على الضعيف صرت بس حچي
اعرفك ما تخليني صاحية وما سامعه من قبل انسان
باع روحه بيده
شياع: دفحتي الباب خلي نتفاهم
مِسك: اني ما اتفاهم اهدد واشرد حبيبي
شياع; دفتحي عاد
مِسك: روح شياع روح
شياع: يعني ما طلعين
مِسك: لا
شياع: هين يمِسك وين طيرين من ايدي
ختم كلامه واصبح الهدوء محاوط المكان ، مشيت
غسلت وضليت واكفه ما اريد اطلع خاف الگه بالغرفه
ضليت انتظر واذاني على الباب بلكي اسمع حركة شي
سمعت باب الكنتور انفتح ونسد و وره شويه سمعت
هوسة وتساقط العطوره والمكياج ، اني كنت اعض
شفافي بقهر وغضب لكن ما طلعت ، سمعت الباب انفتح
وانسد ضليت انتظر اني مرت ثواني ومن تأكدت من
الهدوء طلعت ،
شهكت من شفت الملابس كلها مطشره بالكاع والفرشه
كذلك المكياج العطور وضع الغرفه كان مكلوب راساً
على عقب صحت
مِسك: عزززاا بقلبي شياااااع
صحت بقهر وغضب فتحت الباب شفته متوجه يريد
ينزل التفت عليه غمزلي ومشى اجيت اكله بمُحمد كد
ما قهرني لطخت راسي بالباب بقهر ، دخلت شمرت
نفسي على السرير واني اكتم صرخاتي الغاضبة بالمخدة
اني اعلمك شياع هين والله اذا ما اردها الك ما اطلع
مِسك .
كمت واني الممنونة انضف بيها والله تقريباً ساعتين اني
بس انضف بيها الحقير حتى ملابسي مطلعهن مشمرهن
واني انجبرت اعيد من البداية تصفيطهم وترتيبهم من
جديد كنت طول هالمدة بس افكر ارجعها لشياع ،
شلون ما ادري لكن الا ما الگه وين طير مني ،
نزلت واني كنت ضايجة ما شفته وشفت الريوك خلص
وكلها طشت لشغلها، كنت متخصره بيد وايد الثانية
اضرب بيها على كتفي الثاني تعبت بالتنضيف حلفت
انتقم من شياع على فعلته لكن هسه خلي اكل وبعدين
انتقم ،
كعدت على مائدة الطعام وراسي على المائدة واني
اتأفف مقهوره ، اجت كَمَرة وبيدها مكناستها عكدت
حواجبها وكالت
كَمَرة: خير مِسك بيج شي
مِسك: لااا
كَمَرة: ليش ما نزلتي على الريوك
مِسك: كنت انضف الغرفة
كَمَرة: اها اسويلج ريوك
مِسك: لا يابه شبيه اني هسه اسوي
هزت راسها ومشت واني كمت واني بس افكر شلون
انتقم منه ، سويت ريوك ومشيت جبت تلفوني ورجعت
اريد افكار من صديقاتي مريم صخام أي شي بس اريد
ابرد قلبي بي ، واني داحجي ويا مريم رن موبايلي
وشياع هو الي يتصل بيه ، تنفست بغضب و رديت
مِسك: الوو
شياع: ها شلونها الغرفه بشرفي تخبل عجبتني
مِسك: اردها اردها الك
شياع: بيج حظ
مِسك: وستين حظ هم اصبر وشوف مو مِسك التسكت
شياع: والله يمِسك خلي اكلج حچاية انه من شردتي
مني مساعة غسلت ايدي منج بعد منا لباب الغرفه ما
اصدك بيج
مِسك: أواعدك بالوعد واسگيك يا كمون اصبر ولا تستعجل على رزقك حبيبي
شياع: نصبر ونشوف
كان يضحك واني رجعت للخلف واني مبتسمة ومتحلفه
بي كتله
مِسك: وين انتَ؟
شياع: طالع ويا جماعتي
مِسك: من الصبح تفترون
شياع: اي احسن من كعدة البيت
مِسك: اعرف شوكت تريكت وطلعت كبل
شياع: الظاهر لسه ما شايفه الساعة
مِسك: اي والله من وراك ها صدك شياع اروح لأهلي
اهلي بطريق فشلة منهم
شياع: ماشي روحي
مِسك: وابات
شياع: ممنوع
مِسك: عفيه شياعي
كلتله بدلع واني ميته من القهر منه لسة قهر الصبح
وغضبه ما نسيتهن
شياع: احتركو اهلج لا تخليني اعوف جماعتي واجيج
اطلع ضيمي
مِسك: لعد وافق خليني ابات
شياع: المقابل
مِسك: بدت المصلحة شياع
شياع: الدنيا صارت مصالح يعيون اليشوفني الدرب
مِسك: من ارجع عود تدلل
شياع: بسيطة راح اجي اخذج
مِسك: لا لتعب نفسك هسه اشوف اخواني ضل يم جماعتك
ختمته اتصالي ويا واتصلت على علي كالي داتسوگ
خابري عُمر خابرت عُمر كالي تجهزي مسافة طريق ،
كمت غسلت المواعين ومشيت ترخصت من عمه وعمو
ما كان موجود كالتلي ماكو داعي لكن اني تجنباً
للمشاكل خابرته وترخصت منه ، اعرف ما يحق اله لكن
يبقى احترام وهم تتجنبين المشاكل ،
صعدت لغرفتي اخذت ملابسي باوعت لميز المراية كنت
مرتبة ساعات شياع واكسسوارتي برف بميز المراية
ابتسمت بشر واني اخذ ساعة كانت سودة ويحبها وهي
صراحة كلش حلوة وقوية هم كانت سيورها حديد وبيها لمعة تجنن صراحة حبيتها لكن انتقامي اقوى ،
حطيتها على الميز ومشيت جبت تحفية وصرت اكسر
بيها وفعلاً كسرتها وخاف يريد يرجع يصلحها كسرت
القاعدة خليتها شُتات ما شفيت غليلي ابد واني اشوف
شلون متكسرة، رحت جبت الثانية كانت هالمرة
رصاصية والقاعدة مالتها حمرة ، ردت اكسرها بس كلت
خاف اروح لقسم الكسور ومن يكول يسگتلي اذا هيج؟
عاد احترمت نفسي ورجعت خليت هاي بمكانها نزلت
جنطتي بيدي وتلفوني كتبت لشياع
مِسك: على كولت عبود لسة الخير لكدم حبيبي
شويه ودزلي
شياع: شصخمتي
مِسك: شي بسيط كلش بس هم ما انساها
شياع: مِسك شسويتي كتلج
مِسك: ارجع واشوف
غلقت تلفوني وكعدت انتظر عُمر وعمة كانت تلعب
بنات قهّار هالبنات شكد هادئات بس خلي يردن شي
يبوووه يبوه يخبصن البيت خبص عمتي وأسينات يضلن وحدة تلطخ بوحدة كد ما ينخبصن ،
شويه واجه عُمر سلمت اني ومشيت سلمت على اخويه
واتوجهنا لبيتنا اهلنا ، كنت راضيه عن نفسي وااكول
لنفسي لا تسكتين بعد شوفيي قوتج وبسبب هالشي
ما كنت متخيلة تصير الي مشكلة صرت اعض اصابعي
ندم لان سويتها !!!
وصلت لاهلي وكالعادة مريم الگاها سابقتني وكانوه
خوالي اهنا يستقبلون اهلي همه الظهر يجون لذلك كلها
ملتمة ، تلكتني مُهجة كبل اخذتني ودخلتني بالغرفه
خالة: ها شلونها اوضاعكم
مِسك; زوينين
خالة: يعني
مِسك; اكلج شو انتِ شلتي المستحه
ضربتني على كتفي زحزحتني من مكاني كم خطوة
كالت
خالة: خايبة ومرض كون ولج غير ما نمت ليالي من وراج
مِسك: ليش
خالة; من ترجفين بالي كلت البنية راح تموت كد ما صارت ترجف
مِسك; اي شصار
خالة: متنه من الخوف عليج غير رجلج صار يبجي
مِسك بدهشة; جذاااابة
حطيت ايديه على شفافي خزرتني وكالت
خالتي: الله يطيح حظج مسوية نفسها مصدومه هو
انتِ گلتيها عليمن بعد هالحركات
ضحكت ومشيت بست راسها وكتلها
مِسك: العفوه العفوه يلا سولفيلي
مُهجة: والله يعود المِسك انه شفت شياع يبجي گلت
لو بيها حظ تحافظ علي لان شنو مبين يعشقج عشق
مو طبيعي ما شفتي ما تركج
مِسك: اي والله
خالتي: صدك الخرز ضلسن لابسته شهر لابستي
مِسك: ايي شياع ما يخليني اذبه
خالتي: احسن خالة الاحتياط واجب
شويه وطلعنا اني وياها بدينا نشتغل ونحظر للغده ،
للظهر كلها تجمهرت كدام البيبان ويطشون جُكليت على
اهلي كان ابويه حاظني ويبوس براسي ، كنت كلش
فرحانة من شفتهم رُغم التعب الا إن فرحتهم واضحة
اجت كلها تسلم على اهلي ، واني واكفه ويا ملك
نسولف ونضحك ، اشرلي علي اني وملك ومشينا وراه
طلعنا الجنط من الجنطة وعلي يخابر الي فهمته هذا
كان يونس من ختمه وياه كتله
مِسك; خير شيريد منك
علي: يتعذر لان اهله ما اجوه
ملك: ما گتله مو بحاجتهم
مِسك: شعلينا بيهم اهم شي اهلي وصلوه بسلامة ،
اخذنا الجنط ودخلناهم جوه رحعنا كعدنه يم اهلنا
وهمه كانوه تعبانين الا انهم ما سكتوه وهمه يحجون
بجمال البيت العتيق والمسجد النبوي ، واحنا كلنا
نسمع بأهتمام ، كنت كلش فرحانة الهم وادعي الله يديم
السعادة على اهلي،
ضليت طول اليوم ما فاركت امي بس كاعده يمها اني
واخواتي ونسولف وياها ، شما نكبر نبقى صغار يم امي
خوالي كلها طشت العصر لكن خالة مُهجة وبناتها ضلن
لان احنا ما قبلنا يرحن ، وكانت لمة حبايب حلوة نسيت
كلشي واني بوسطهم ،
ثاني يوم الظهر اجوه عيالي وشياع واني تكليتهم
وكفت يم شياع وعيوني تلمع كنت ناسية غضبي منه
لان مشتاقتله هو يباوعلي ويخزر لان بس اغمزله كدام
علي وابوية كنت اموت من الضحك من اشوف غضبه
وحيرته ، همه دخلوه للاستقبال واني اخذت عمتي
وأسينات دخلتهن لصالة مشيت واني افكر بفكرة عجبتني ،
اخذت تلفوني ومشيت صرت ادور بالبيجات على هدبة
اله ، لكيت سترة لون رصاصي حبيتها كبل حجزتها
ولان بنفس المحافظة كالي باجر الصبح توصل ابتسمت
واني افكر برد فعل شياع ، مشيت كعدت يم النسوان
يسولفون ،
من رادوه يرحون اني اتفقت ويا علي قبل بساع يطلب
من شياع اضل اهنا وشياع ما كدر يرفض طلبه
بوسطهم وافق واني كنت واكفه اضحك بنصر خزرني
هو وعيونه كانت تتوعد الي ، همه راحوه واني لبست
جبتي واخذني عُمر للمحل مالته ، اخذت نفاخ ونشرات
وحبشكلات ناوية اخبله والله ، رجعت حجزت كيكة
وبقى بس ارجع واحظر كلشي واشوف ردة فعله ،
فعلاً ثاني يوم وصلت السترة كانت كلش حلوه اخواتي
حيل تخبلن عليها واني كذلك بس لو يدرن شداخطط يحطني ويشمرني بالشط هههه ، رجعت لعيالي وكان
شياع موجود والغريب هم إنجيل سلمت اني وصعدت
متغافله عن عيون تراقبني ، حطيت الشغلات بالكنتور
وكبل نزلت ، كان محط اهتمام الكل إنجيل كانوه
يسألوها عن حملها واني كاعده هادئة افكر شأسوي
بضبط ،
مر اليوم وشياع لا شافني ولا شفته ولد عمه كانوه اهنا
وهو التهى وياهم ، بالاضافة الى إنجيل اتقيد احجي لو
اسأل عنه لسه احسه مُلكها مو الي ، لذلك اتجنبه كنت
صار الليل همه راحوه لبيتهم واني صعدت اخطط عدل
لحفلتي ،
لثاني يوم اجه واني كنت كاعده بغرفتي اصفط
الملابس ، كان يدخل شياع كال
شياع: هلا بسالفتي
ضحكت وكتله
مِسك بخجل: حلوة هاي مال سالفتك هلا يحيلي
كعد مقابيلي وكال وعيونه تفترس وجهي بحُب ولهفة
شياع: وين هالغيبه
مِسك: اني موجوده بس الي يلگه احبابه ينسى اصحابه
جرني اله وكال
شياع: انتَ كل احبابي ولج
رفعت حاجب وعيوني كانت تتنقل على كل وجه
مِسك: اممم شرأيك بمفأجئتي
شياع: لو بساعتها ردت اكضج كض چن جاهل لزم عصفور بس حرامات شردتي بريشاتج
ضحكت وكتله
مِسك: احمد الله ما كنت موجوده ، ما اريد اتخيل الصار
غمضت عيوني وهزيت راسي طارده الافكار منه ضحك
هو وكال
شياع: صدك كيدجن عظيم انتن النسوان
مِسك: والله ما نجي لمكركم انتو يالزلم
ضحك بصوت عالي وشدني اله اكثر ويكول
شياع: الظاهر ماشي عليج مكري
مِسك: انتَ اوووه هواي
غمز الي وكال
شياع: اريد اجرب بلا
ضحكت وختلت بصده وكتله
مِسك: لاااا لااا ما حزرت
شياع: ليش بلا
مِسك: عندي شغل
شياع: الله يطيح حظج دومج فاهية وما بيح حظ
رفعت راسي اله وكتله
مِسك: شيااااع لا تحجي عليه
شيااع: اوي نزول عليج خوفتيني
طكيتها بضحكه بصوت عالي هو كبل جرني وضمني
لصدره وكال
شياع: ما ينلام أيهاب منو يكول يجي بالي الحچي
واستغفر الله
مِسك: اوووه وخر لعد وخر
ضمني اله اكثر وكال
شياع: اش ركدي بمكانج واسكتي
فعلاً ركدت اني وضلينا نسولف اني ويا ما خلينا شي ما
سولفناه ،
لليل كنت اباوع لنفسي بالمراية كنت لابسة فُستان
قصير احمر ومرتبة الغرفه ومزينتها صدك طالعه تجنن
واني حاطة مكياج مشغله ماجدة الرومي كلمات و
الجو مولع يمي كنت فرحانة وفخوره بنفسي ، اتصلت
على شياع وكتله اصعد ، حظرت دبوس واني مستعدة
للي راح يصير
خلال لحظات انفتح الباب ودخل هو رفع راسه وعيونه
اتسعت بدهشة ضحك وكال
شياع; شمسويه
كان يضحك وعيونه استقرت عليه كانت تلمع اجه عليه
راد يحضني ابتعدت عنه وكتله
مِسك: مو كتلك اردها الك
شياع: يعني
عگد حواجبه مستغرب طلعت الدبوس وصرت اطكطك
بالنفاخ واني اصيح واحجي علي هو واكف ما ينطي
أي ردة فعل ، شلت الكيكة وشمرتها بزبالة واخذت
السترة وكصصتها التفتت علي وكتله
مِسك; ما تستاهل اجيبلك سميري مو هالاجواء
كانت الاغنية تناقض كلش كبير بالفوضى السويتها اني
واني تخصرت واباوع للغرفه كانت هوسه وكلشي كان
يجنن هسه بحال يُرثى له ، باوعتله كانت عيونه مصوبة
علبه بهدوء ، راح للسرير وهو يهز ايده ويكول
شياع برود: يكولون النسوان نص عقل ما الومهم والله
مِسك بقهر; شياااع
باوعلي وهو رافع حاجبه
شياع; هسه شستفاديتي؟ ، شو انتِ الخسرتي
غمضت عيوني وكتله
مِسك: لا تقهرني ما تستاهل كلشي اسويلك
شياع: هاا هيج تشوفين
باوعتله بحذر وهو كام وما اشوفه الا جرني اله اتسعت
عيوني بخوف ما احس الا شفافه انطبعت على شفافي
نبض قلبي بعنف وسارت الرجفه بكل جزء بجسمي
كانت القُبلة رقيقه لتجعل نبضات قلبي تثور كان يطبع
شفافه على كل ثنايا وجهي واني متمسكة بقيمصه
واحاول اهدأ نبضات قلبي المُبعثرة ،
وبالقُبلة الثانية هدأت ثورة افكاري وحل الهدوء ارجاء
روحي ، ليجعل الهدوء سعادة غامرة لقلبي ،
وعند الثالثة من بديت استجاب اله وابادلة بكل فهاواه
حظني من خصري بقوه واني مغمضه عيوني اصنع
عالم حُبي لشياع ، اي احبه واحب عيونه الكحلية احب
تفاصيله واحب حچاياته ، كنت مغمضه ومأمنه بيد
منو اني ولمنو مسلمة نفسي وقلبي ومشاعري وجسدي
ما اعرف شصار بعدها لكن من حسيت بدأ يتقربلي
فتحت عيوني برهبة وخوف منه ما اعرف ليش حسيته
مو شياع ما احس الا رفعت ايدي وضربته كف!!!!
شهكت بخوف ودموعي المحبوسة نزلت بغزاره واني
اشوفه شلون كان مصدوم رجفت وكنت
ارجف حيل من خوفي صرت ابجي واضحك عباله
متقصده لكن اني خايفه مرعوبة ضميت وجهي بثنين
ايديه وكنت ابجي بغزاره وحسيت بوقتها راسي بدأ
المه يجتاحني ،
ابتعد عني بسرعة وكام جريت الفرشة وغطيت نفسي
واني ابجي واشهك بصوت عالي الفرح والهدوء وهدوء
افكاري وعالمي ويا انتهى بغلطة مني لا تُغتفر ، كنت
كوه التقط أنفاسي واركان الغرفة شهكت هدوئه
وشهكاتي كتله وواني واثقه أنه يسمعني
مِسك: وا والله مو قصدي اضربك اا اني ما ادري شياع
اان اني اسفه شي شياع
كمت ابجي بصوت مسموع لكن هو ما يحچي ، هدوئه
خلاني اكره نفسي ورُعبي مو بيدي ليلة عرسنا لسه
ابالي كان قاسي كأنه وحش ينال من فريسته اني كنت خايفة وعيون شياع بوقتها الغاضبه ما غابت
عن بالي كنت خايفه منه حيل ،
كنت رُغم خوفي وانهياري بوقتها كوه يطلع صوتي
واحجي واعتذر منه اما هو ماله صوت ، ومن ما اسمع
اله صوت اتخبل واضل ابجي بهستريا ،
ما حسيت الا اني صرت بحظنه التفتت علي وحظنته
بقوة ابجي واعتذر منه مو بيدي اخاف منه لكن أماني
بقربه كان يمسد على شعري وهادئ ، مر الوقت هدأت
شهكاتي وذبلت اجفاني نمت والدمع كان يسيل على
خدي يشرح شكد اني ندمانه وغلطت بحقه !! .
ثاني يوم فتحت عيوني كبل طفرت وعيوني ادور علي
ما كان موجود جريت حسرة لزمت راسي بأثنين ايديه
كلش مقهوره من نفسي ، كمت واني كارهه نفسي من
اباوع حال الغرفة شلون كان ،صدك كارهه نفسي هالمره
اخذت ملابسي ومشيت واني مالي خلك دخلت للحمام
غمضت عيوني بأسى واني اشوف حالي كان فستاني
السحاب مفتوح ونازل شوي من كتفي واكتافي وركبتي
مليانه أثار عيوني كانت المشكلة كانت مورمه والبياض احمر صاير كد ما كنت ابجي ، واسأل واكول يغفر الي
غلطة كانت سهواً مني غلطتها ،
سبحت وبدلت طلعت غمضت عيوني وجريت انفاسي
بقهر وقلة صبر ودي اطم نفسي على تصرفاتي البارحة
ما الي عين اقابله بعد الي صار ، مشطت ورتبت نفسي
و رجعت نضفت الغرفه ردت حجه أي حجه المهم ما
انزل واقابله ، لكن للاسف دكت كَمَرة الباب وطلبت انزل
حتى اكل وياهم ،
نزلت واني حايره شلون اقابله ، رفعت راسي شفتها كلها
تباوعلي مستغربين كالت عمتي
ام شياع: يمه اسم الله الرحمان شبيج عمه ليش وجهج
هيج مگلوب
مِسك: البارحة هاج عليه راسي وهيج صار وجهي
محد اقتنع حقهم اذا ما مقتنعه شلون همه يقتنعون
سألني عمي اذا متعاركة ويا شياع كتله
مِسك: لا عمو
ابو شياع: چا اني شفته بالليل راح سألته كال لبيتي
عكدت حواجبي ودنكت ما عندي أي اجابة يعني راح
لهناك ؟ زين إنجيل عرفت ؟ ، كتله
مِسك: خابرته إنجيل وهو راح
ليال: ليش تخابره
مِسك: كالتله اسمع طكطة بالحديقه وهو راح كال خاف
حرامية وهي وحدها
اقتنعوه همه اني تنفست براحة من سدوه الموضوع،
البارحة ما غاب عن بالي ابد حتى شهيتي للاكل ماكو
عفتهم صعدت لغرفتي كعدت واني لازمة تلفون حتى
ما عندي الشجاعة اخابره اعتذر منه بوسط افكاري رن
موبايلي باوعت شفته شياع بلعت ريكي ورجفت ايدي
بخوف وقلق منه يكدر يسيطر عليه يكدر يفرحني لو
يخليني حزينة ، رديت علي
مِسك: الو
شياع: روحي لأهلج!!!
يتبع...