نفحة من الماضي الأليم....
رفعت راسي شفته وبكلبي گلت...
حريمة بيك كل ونة ليل
وسنين الكضن بالآه والونة
شلتك مثل ماي العين
واعتبرتك نظرهن وحتى اعز من الاثنين
سندتك و وكفت وياك وضيعت حيل هواي من عمر مال سنين
سنيني انگضت بالصبر ، بس ياصبر الجازيته بخيانة و غدر
وبلا عذر من رحلت خليت ايد على الجرح ورشيت فوكاهن ملح
اخ وآه وشيفيد منهن لو حجيت دمعة مطر اني دمعت وشلال عالوجه ارسمت والغيم فوكاهن سطرت
من رحلت انه متت
وانفاسي صارت تنحسب
وكل يوم اسال هالرئة ها خلصن
تجاوب ب لا بعد بصدرك بقايا آه والونة..
من اوكفت وقويت ونسيتك وحبيت
راجع ليش ؟؟
تخرب الراحة علي ! لو ترجع الونة ؟
لا بريتلك ذمة ولا سلمك الله
ولا طول بذاك العمر
المليان بخذلان وغدر
ليش ارجعت ؟
و بغيبتك هواي طولت
واعتبرتك ميت بلا قبر
لا قريت فاتحة ولا ثوبت
ولا لبست اسود ولا علنت احداد وبكل عرس احضرت ..
وها وشوكت من يوم العرفتك جذبت بذيج المشاعر وغيري وحدة دللت .
بقلمي
عبير إدريس
لؤي : مفاجئة مو ؟ عبالج متت ؟ وهاي شنو التطورات صايرة عادي تكعدين وية رجال بوسط الطلاب بالجامعة ، واني جنت اتوسل بيج حتى بس نحجي على أنفراد واتوسط يم صديق او صديقة يلا تقبلين ..
ضحك وكمل كلامه.
اي هاي اني وين احجي من جنتِ بعدج بنية هسه مطلقة وعندج ولد ، وشي اكيد تدورين على فرص زينة ، بس تعرفين ما تصورت اسمار بنت عارف ، شكبر اسمها ترتبط بواحد اعمى مجرد عنده فلوس ، وصل بيج الطمع لهذه الدرجة ؟؟؟
يحجي واني صافنة عليه وعلى بشاعة كلامة ، الصدمة صارت صدمتين شوفته اللي استغربتها وخصوصاً بهذا الوقت ومن ردت احجي كلشي لأديم ، وكلامه اللي مطر علية مثل السم ، عيوني عليه وعلى أديم ، اللي جان مدنك راسه بصفنة ، وفكه ينبض بقوة ، ...
لؤي : شنو اخبار ابني ؟ نسيتي شنو كتبتي بالقرار يا ست لو تحبين اذكرج ؟
أسمار : ياقرار اللي خليت بيه وخالفت ؟
لؤي : ما خالفت بس حبيت ابينلج القانون لا يحمي المغفلين..
أسمار : بس يكدر يحمي السراق !!!
لؤي : اخذت حقي ما سرقتج ، هسه معلينا بالراح ، الجاي راح يترتب حسب مزاجي واللي اني احبه..
أسمار : وشنو الراح يترتب ؟
لؤي : اذا تزوجتي بخير وسلامة ، اياس يرجعلي ، هاي حسب الاتفاق اللي حضرتج وقعتي عليه..
أسمار : انت خطية تدري.
لؤي : اي ادري ..
أسمار : اذا كملت كلامك ارجع من وين ما اجيت..
لؤي : صدك تحجين بعد فراق ما يقارب الخمس سنوات تتلگيني بهيج برود وحتى بدون ما تعزميني على عصير..
أسمار : زين يعني تعرف المدة اللي ما شفت ابنك بيها ، وجاي بعد خمس سنوات تطالب بيه وتريد اتنازل عنه بكل سهولة ، من كل عقلك تحجي ، روح بابا روح..
التفت على أديم وكال..
لؤي : هذا اعمى لو اطرش واخرس ، و اذا متوفرات معناها اعمى بس شايل الغيرة ؟؟
أديم جر نفس طويل ورفع راسه بأتجاه لؤي ، ردت احجي واجاوبه بقوة دفاع عن أديم ، بس سكتت من كال..
أديم : يخاطبني السفيه بكل قبح
فآبي أن أكون له مجيبا
يزيد سفاهة وأزيد حلماً كعود زاده الإحراق طيبا ولقد أمرُّ علي اللئيم يسبني فمضيت ثمة قلت لا يعنيني.
إذا نطق السفيه فلا تجبه فخير من إجابته السكوت فإن كلمته فرجت عنه وإن خليته كمداً يموت سكتُ عن السفيه فظن أني عييت عن الجواب وما عييت ولكني اكتسيت بثوب حلم وجنبت السفاهة ما حييت.
ضحك لؤي وكال..
لؤي : يتمنطق الاعمى يلا خطية قابل تكدر تجاوبني بشي ثاني افلش وجهك وما راح تكدر ترد الضربة..
أديم : أعرض عن الجاهل السفيه ،فكل ما قاله فهو فيه، فلا يضر نهر الفرات يوماً إن خاض بعض الكلاب فيه ولو كل كلب عوى ألقمته حجراُ لصار الصخر مثقال بدينار.
لؤي : هذا من وين اتعرفتي عليه ، يلا خليه يفيدج ، وعود من تتعرضين لتحرش لفظي او جسدي ذاك الوقت نشوف الردود الشعرية بشنو تفيده..
حجاها باستهزاء وضحك ، وگف أديم ورفع العكاز بأتجاه لؤي..
أديم : روح منا قبل لا تصير بخبر كان.
لؤي : وهذا منو اللي يخليني بخبر كان انت لو عصاتك..
تقرب أديم منه ، وضربه بالعصا بقوة ، وصارت الضربة على كتف لؤي ، الاخير عاط لان تأذى بحيث من الضربة انكسرت العكاز بيه...
لؤي : صدك لو كالو كل اعمى لئيم وضربته توجع..
أديم : أسمار اتصلي على أسمر خليه ييجي يشوف شغله وياه.
اخذت موبايلي بايد ترجف دنكت راسي اتصل ، ما احس الا شي ارتطم بالكاع وصدرت وياها اه قوية من أديم رفعت راسي ، لؤي دافعه بالكاع ، والدم يتدفق من راسه بغزارة ، تخبلت ، دنك يم راسه وكال.
لؤي : هذا الاعمى مالتج خلي يدافع عن نفسه بعدين يدافعلج خوش راح يفيدج..
أديم حرك راسه باتجاه صوت لؤي راد يجاوبه بس غمض عينه ، بدون وعي كمت اصيح بصوت عالي واهز بيه..
أسمار : اكعد فدوة لا تموت أديم ، أديم اكعد حباب الله يخليك أديم..
صرت اعيط وغركت ايدي بالدم ، التموا الطلاب خابروا الاسعاف ، التفتت على لؤي ما شفته الحقير انهزم ، اخذت موبايلي مسحت الدم اللي بايدي بملابسي واتصلت على أسمر يرن يرن ماكو جواب ، سديته ورجعت اتصلت ، اكثر من مرة يلا جاوبني.
أسمار : وينك أسمر وينك..
أسمر : شبيج مفزوعة خير ؟
أسمار : انت وين احجي بسرعة..
أسمر : عندي معاملة وبلغت أديم من وصلته للجامعة احجي صاير شي وياكم أديم بيه شي تخربط؟
أسمار : عفية تعال بسرعة أديم ينزف من راسه.
أسمر : شنوو شبيه وشلون هيج صار؟
أسمار : تعال هسه عفية بسرعة لان ملتمين عليه الطلاب ومنعرف شنو نسوي خابرنا الاسعاف ومنتظريهم ييجون.
سده بدون ما يجاوبني ، رجعت الموبايل بجنطتي ورحت يم أديم ، لكيت ولد نازع السويتر مالته وساد الجرح اللي براسه ، من باوعت على كمية الدم اللي غطت الكاع ، راد يغمى علية بس تمالكت نفسي لأجل أديم خفت يروح مني.
وخرت الولد وكعدت بالكاع خليت راسه بحضني وسديت الجرح ، اول مرة اعرف نفسي عندي جرأة اشوف الدم والزمه وابقى بنفس الثبات.
انعاد بيه الموقف الصار بيوم اللي تسمم بيه أديم...
الظاهر مكتوبة علينا نتقارب بس بالأزمات والمواقف اللي تأذي القلب وتدميه..
وصلت الاسعاف سووله اسعاف اويلي واخذوه ، صعدت وياه طول الطريق اني لازمة ايده ، وصلنا للمستشفى ، نزلوه ونقلوه على سديه وبعده فاقد الوعي ، تخبلت ،،
كعدت على الرصيف رجلي ما حملتني افوت وياه لداخل المستشفى ، رن موبايلي فتحت جنطتي جلب السحاب فتحتها بقوة اطشرت اغراضي بالكاع من ضمنهن الموبايل ،باوعت عليه صار كلشي بجهة البطارية والگفر ، استغفرت ربي فركت وجهي بقوة تنهدت جريت نفس قوي بعدها دنكت بالكاع تربعت وكعدت الم اغراضي وارجعهم بالجنطة ، رجعت البطارية بالموبايل شغلته ما اشتغل ، ظليت احاول بيه يلا ، اول ما انفتح رن أسمر جاوبته.
أسمر : وينج يمعودة؟
أسمار : بالمستشفى
أسمر : وليش اتصل مغلق بيا مستشفى انتوا؟
وضحتله سبب انغلاق الجهاز ونطيته عنوان المستشفى ، سده نزلت ايدي البيها الموبايل لحضني ببطئ وحزن وعدم حيلة ، دموعي انسابت على وجهي بدون صوت واني استذكر الموقف وصوته شلون يتأوه بألم ، ومن التفت براسه ببطئ ناحية لؤي راد يجاوبه وغمضت عينه بعدم حيلة منه ...
دعيت من كلبي يرجع حق أديم وحقي والله ينتقم منه اشد انواع الانتقام ، ويبعده عني وعن ابني ويكفينا شره ليوم الدين.
دنكت راسي وخليته بين ايدي وبعدني نفس كعدتي بالكاع متربعة، ما رفعت راسي الا من سمعت صوت أسمر وهو يكول ، شنو اللي صار ؟ رفعت راسي على كيفي لكيته كاعد كدامي مكنبص ، رفعت اكتافي و همست..
أسمار : هو اني اعرف شنو اللي صار حتى احجيلك ؟
أسمر : شبيكم صار انفجار فهميني أسمار شو وجهج وملابسج وشعرج كلهن دم ..
بجيت بهضم كلت..
أسمار : هذا دمه مو دمي، دم اخوك رسم ملامحي ، أديم جوة هناك مغمى عليه احجي وياه ما يسمعني اكوله اني حبيبتك حاجيني طمني عليك برد كلبي ، ما يجاوب ، خفت يموت ويعوفني شنو أسوي بهيج حالة اني فهمني أسمر فدوة..
جنت احجي والدموع غطت الرؤيا عني كمت ما اشوف ، مسحت عيوني بكفوف ايدي الاثنين باوعت ما لكيته كدامي ، رايح ، كمت اخذت جنطتي وفتت لكيته توه داخل يسأل عن مكان أديم ، بعدها ركض واني ركضت وراه ، وصلنا يم باب غرفة وكف يدكها بقوة وسريع ، طلع ولد من داخلها لابس لبس ممرض ، سد الباب من ورة ظهره بدون ما يلتفت كال...
_ تفضل شنو رايد ؟
أسمر : اخوية كالو هنا اريده ..
_ وشنو خاطفيه واجيت تداهم المكان ، ماعندكم حرمة للمريض انتوا ؟
أسمر : اكلك اخوية ما اعرف حالته شنو يعني ضروري اشوفه شعرفني ميت لو عايش شنو الصارله ؟ احجيلي يرحم والديك..
_ جرح عميق براسه ونزف هواي تحظروا للتبرع راح يطلب الدكتور منكم دم..
التفت علية وكال..
أسمر : ادري بشنو مضروب وشنو صار فهميني لخاطر دينج..
حجاها بعصبية ويرجف ..
أسمار : احجيلك بس اكعد وافهمك.
أسمر : ما اكعد احجي شنو صار سمرة بس لا تخافين اهدأي..
أسمار : اجى طليقي السابق للكلية وجنا كاعدين اني وأديم وحجى علية هواي وهددني ياخذ ابني وبعدين وجه كلام قاسي لأديم ، أديم جاوبه وتلاطشوا بالكلام ، بعدها ضربه بالعصا بكتفه ، رجع لؤي دفعه وكع بالكاع جانت اكو صبة عالية شوية انضرب بيها وماحس بعد والدم نزف بقوة..
أسمر : وهذا لؤي شنو سالفته هسه تحجيلي تفاصيل بس اتأكد من سلامة أديم ..
حجاها عاكد حاجبه وصاك على اسنانه..
تركني يتمشى بالممر ويتصل بأهله ، حتى يحظرون للمستشفى خاف ما يتطابق دم واحد بيهم وية دمه يتبرع الثاني.
اتصلت على خالتي جاوبتني، بجيت بصوت يرجف ومتوسل حجيت وياها..
أسمار : خالة حبيبتي لحگيني.
أسن : شكو شبيج أسمار شنو الصار ؟
أسمار : عفية بس تعالي بسرعة الله يخليج.
أسن : وين اجي غير افهم شبيج احجي ظل بالي انتِ وين ؟؟؟
أسمار : اني بالمستشفى أديم كاعد يموت ويمكن مات هسه ..
شهكت وبصوت خافت كالت..
أسن : شنو كلتي أسمار عيدي الحجيتيه.
أسمار : أديم خالة أديم مات يمكن..
قطع كلامي أسمر من سحب الموبايل من ايدي، التفتت عليه كاعد حاجبه كال.
أسمر : شبيج خبلتيها وليش متفاولة على الرجال ، الو خالة أسن شلونج ؟
أسن : هلو أسمر شلونك شنو بيه أديم عفية صدك تحجي أسمار.
أسمر : لا يابة هذا كدامي كلشي مابية نايم كالأسد .
أسن : هسه انتوا وين حتى اجي.
أسمر : وين جاية يابه هسه الولد جايين يمنا ونخابرج اول بأول.
أسن : لا عيني لا ضروري اجي يم أسمار انطيني العنوان وين ؟
أسمر : ما نختلف تعالي وية إيساف لأن هو هم راح ييجي ماشي.
أسن : شلون اصبر ياعيني خليني اجي.
أسمر : ماشي بلغي الشيخ واذا وافق تجين خابريني اجي اخذج.
أسن : شلون تعوف أسمار وحدها اني وابوها نجي.
أسمر : سوي اللي يريحج خالتي .
أسن : اكيد أديم مو مخطر عفية؟
أسمر : لو مخطر جان حجيت وياج بهذا الهدوء او جان جاوبتج اصلا ...
أسن : الحمدلله يلا اخذ راحتك وخلي اخابر إيساف حتى اجهز نفسي.
أسمر : ترافقج السلامة.
أسن : الله يسلمك.
سد الموبايل واخذ كف ايدي خله بيه الموبايل وحجى بهدوء واني صافنة عليه.
أسمر : شبيج خبلتي خالتج والرجال مات ودفنتيه شنو سالفتج انتِ ، ادخلج فحوصات خاف بيج شي ؟
هزيت راسي ب لا ، جاوبني بهدوء مطمني.
أسمر : لعد شبيج صافنة مخروعة أديم مابيه شي صدكيني.
لزمت ايده ثنينهم اريد احس بالأمان اللي فقدته من قبل خمس سنوات ..
أسمار : أسمر اني ليش ياهو اللي احبه يروح مني ؟
عكد حاجبه مستغرب كلامي ، همس.
أسمر : ليش المن خسرتي ومنو راح تخسريه ؟
أسمار : يعني شوف مات أديم ويريد ياخذ ابني مني والله يريد ياخذه مني اعرفه لؤي واحد نذل وغدار..
أسمر : أسمار انتِ بوعيج كاعد اكولج أديم ما ميت عايش وبهاي الغرفة مابيه شي بس يسمحولنا نشوفه راح تفوتين اول وحدة وبعدين منو ياخذ ابنج والج حضانته.
رفعت ايدي لشعري فركته بهوس بعدها هزيت راسي همست..
أسمار : ياخذ مني اياس لو اعوف أديم هو خيرني هو اليوم هددني اي كال اخذه منج اني وقعت أسمر بيدي هاي وقعت حتى يتنازل عن ابني وحتى بيتي تنازلت عنه مقابل يسمحلي اسفر ابني وكال اني وراج اتنازل عن الحضانة وطلع جذاب
أسمر : يعني مقابل موافقته على سفر ابنج تنازلتي عن البيت وكتبتي تعهد ما تتزوجين ويظل ابنج وياج واذا تزوجتي هو ياخذه ؟ يلا سمحلج تسافرين بيه.
أسمار : اي.
أسمر : وهذا الحجي صار يم محامي لو هيج كلاوات.
أسمار : طبعاً خليت محامي وهو خله محامي ، وتم الاتفاق واني وقعت وهو كذلك.
أسمر : معناها مايكدر ياخذه منج الحضانة الج وهو متنازل من يوم اللي وقع بيه على التنازل عن حضانة الطفل..
أسمار : شلون مو خابرني المحامي من جنت مسافرة وكال مسوين لعبة علية..
أسمر : اوكفي انتِ وهو والمحامين وين اتفقتوا وين صار التنازل غير بالمحكمة ؟
أسمار : اي بس اني خليت محامي وسلمته توكيل ورحت بعد هو وراية كمل الاجراءات.
أسمر : وشلون وثقتي بيهم وسلمتي حالج ومالج ورحتي شمدريج ما صار تزوير وتلاعب من رحتي.
أسمار : شلون يصير تزوير وتلاعب واني وقعت على ورقة بيها كل الشروط ..
أسمر : أسمار احنا بدولة بيها كلشي مباح التزوير والفوتوشوب والرشوة يعني كلش عادي يشترون المحامي مالتج ويغيرون بشروط الاتفاقية وبعدين من هو اجى وحجى بزود يعني مالي ايده من الموضوع صح ؟
أسمار : صح حجى واثق من المادة اللي عنده ..
أسمر : شفتي ؟ ارتاحي هسه وبعدين اخذ منج ادق التفاصيل.
باوعتله بنظرات توسلته بيها.
أسمار : عفية يعني راح تساعدني؟
أسمر : طبعا اساعدج واوكف وياج لحد كطع النفس.
أسمار : الله يخليك.
أسمر : بشرط كلشي تحجيلي ما تضمين شي .
أسمار : ابد والله كلشي راح احجي.
أسمر : هذا هو متفقين ، فوتي مددي بهاي الغرفة وخلي اصيحهم يفحصوج يشوفون ضغطج ، وجهج شاحب.
أسمار : مابية شي مابية ..
ظليت اردد بيها واحجي حجي ما مفهوم حسب ما حجالي أسمر بعدين لان ما جنت بوعيي واتذكر كلشي ...
أسمر : فوتي كلتلج بدون عناد.
استجابيت لكلامه ومشيت وين ما اشرلي وهو مرافقني لحد السرير اللي نمت عليه ، ظل صافن علية لم شفته هز راسه بعدم رضا وطلع من الغرفة ،
التفتت اكو سرير ثاني نايمة عليه مرة كبيرة بالعمر وسرير ثالث عليه طفلة مراهقة خالين اوكسجين على حلكها ، اختنكت ردت اطلع لان اني مابية شي مو مثلهم حالتي ، وكفت حتى أطلع دخلوا أسمر و دكتورة شابة تحجي وياه وتضحك هو مبتسم ويهز راسه، وصلوا يمي كال..
أسمر : هاي شكومج مو كلتلج نامي ؟
أسمار : مابية شي اريد اشوف أديم بالي يمه.
أسمر : بعده ما مطلعيه ارجعي نامي وخلي تفحصج الدكتورة اني بره منتظر..
سكتت هزيت راسي ورجعت مددت ، ابتسمت الدكتورة بوجهي وكالت.
_ شنو أسمج ؟
أسمار : أسمار ..
_ حلو ، من شنو تعانين ؟
أسمار : مابية شي ..
_ لعد شنو هذا الدم اللي على وجهج وملابسج؟
أسمار : خطيبي تعرض للضرب من قبل واحد نذل ودمه صار علية
_ بس لا هذا اللي جابوه بالاسعاف ؟
أسمار : اي هو..
_ خطية بس حالته استقرت هسه كدروا يوكفون النزف..
أسمار : زين ما عرفتي ليش هيج نزف راسه شنو السبب؟
_ لحد الان منتظرين ياخذوله اشعة ويعرفون سبب النزيف شنو ..
أسمار : يعني احتمال شي ثاني غير الضربة اللي تعرضلها ؟
_ كلشي وارد ما نسبق الاحداث الا من نتأكد نبلغكم..
أسمار : شكرا
_ عفوا يلا اخذلج الضغط انطيني ايدج مديها..
مديت ايدي اخذتلي الضغط وهمست..
_ نازل هواي ، تحسين بدوخة مو صحيح ؟
أسمار : اي
_ طبيعي لان نازل ضغطج ، هسه راح اخليهم يشدولج سيروم ويرجع كلشي تمام ماشي.
أسمار : ماشي..
_ اكو شي بجسمج يوجعج لو بس دايخة ؟
أسمار : لا لا بس دايخة
_ معافاة ان شاءالله.
أسمار : شكرا تسلمين..
ابتسمت لبست سماعتها على رقبتها وطلعت خارج الغرفة ، بعدها بدقائق اجتي بنية ممرضة شدتلي السيروم ونظمته وراحت ، اسمر يروح وييجي علية ، خطية رجل يمي ورجل يم أديم ، وكل شوية اسأله عنه ويطمني..
بعدها بساعة ونصف اجتي خالتي وإيساف وأهاب وأرود وإسلام وأعقل ، فاتت يمي خالتي وأيساف سلموا علية وتحمدولي بالسلامة كأنما الحادث صار وياية مو وية أديم..
من حسيت بنفسي صرت زينة كمت رحت يمهم سلمت وظليت كاعدة على الكرسي وهم واكفين ، بعدها اجى الممرض صاحلهم راحوا علمود التبرع بالدم وظلينا اني وخالتي التفتت علية وكالت..
أسن : شنو الصار احجيلي منو ضربه لأديم ؟
أسمار : لؤي..
أسن : شنوو ؟ لؤي؟ وين شافه!! وشذكره بيج هذا الكلب ؟
أسمار : حظي هذا خالة حظي جابه علية..
أسن : احجيلي شنو الصار ؟
حجيتلها مختصر لان جنت تعبانة ،تخبلت وظلت تسب بيه وتلعن ، بعدها اجى أيساف وكال أديم راح يفوت عملية سألناه شنو كال منعرف لحد الان ..
بعدها اجوي الولد أهاب وأسمر وياهم شرطي ما اعرف ضابط شايل دفتر وقلم ، وصلوا يمي أسمر كال.
أسمر : سجلنا شكوى ضد لؤي ، هسه شنو عندج احجي ، الموقف اللي صار كله بحذافيره لا تنسين شي.
أسمار : ماشي.
جريت نفس ونظرات عيني تتوزع بخوف بينهم حجيت اللي صار دفعة وحدة والشرطي يكتب ، بعدها سألني اذا عندي شي اضيفه او لا كلت لا.
مرت ثلاث ساعات وطلع أديم من غرفة العمليات لغرفته الجان بيها اول شي ، بعدها بساعتين كالوا أديم كعد ،
الشرطي طلب اول شي يفوت حتى ياخذ الافادة مالته قبل لا ندخل احنا يريد يتأكد نفس الاقوال او لا ، دخل على أديم اقل العشر دقائق طلع حجى وية أسمر..
_ الدعوة سقطت عن المتهم.
أسمر : ليش يابه ؟
_ لان اخوك يكول وكعت و ما اعرف واحد بهذا الاسم.
أسمر : يابة شلون هاي خطيبته جانت وياه وهي شافت كلشي.
_ الاهم شهادة المريض احنا ما نمشي بس بحجيكم عندكم دليل على الولد يثبت صحة ادعائكم ؟ احتمال متهميه زور شلون نعرف الحقيقة.
أسمر : شلون شغلة هاي صدك جذب زين انتظرني افوت احجي وياه اشوف شنو سالفته.
_ احجي وياه اني رايح بالنسبة للمركز انسدت القضية..
حجاها عافهم وراح ، أهاب التفت على أسمر متخصر كال.
أهاب : هذا صدك يحجي شبيه تخبل ؟
أسمر : اكو شي اباله أكيد .
أهاب : وشنو نسوي هسه ؟
أسمر : نسأله يلا نتحرك.
أهاب : هو شنو نسأله اني ما انام وتغمضلي عين اذا ما اخبزه للكلب يلا ارتاح ..
أسمر : شوف اخوك اول يلا اتصرف..
أهاب : اني اكبر منه شنو اخذ اذنه يلا اروح اطلع حقه؟
أسمر : حتى لو اكبر منه بس هاي شغلته احتمال عنده رأي ثاني بيها.
أهاب : مثلاً ؟
حجاها متخصر وعاقج وجهه.
أسمر : مثلا ياخذ حقه بيده.
أهاب : ما اختلفنا احنا اخوانه ناخذ حقه
أسمر : مع ذلك نرجعله .
أهاب : اني رايح ما اظل منتظر اعذرني.
أسمر : ابو عطاء احجيلك حجاية ردعه بيها.
أعقل : ليش اذا حجيت راح يكعد ويسكت وحتى اذا فات واخذ رأي أديم راح يسوي اللي براسه.
أهاب : يعني ليش ما اعجنه فهموني.
أسمر : انت تعجنه واحنا نخبزه بس على نار هادئة بدون ما نتضرر فهمت.
أهاب : وشكد خايف اني نتضرر.
أسمر : اصبر.
أهاب : زين لعد انتوا فوتوا شوفوه شنو يريد واني رايح اجيب عشا واجي.
أسمر : متأكد تجيب عشا؟
أهاب : طبعا قابل شعندي.
أسمر : تمام هذا هو..
طلع من المستشفى ودخل أعقل يم أديم رحت لأسمر كلتله بصوت ناصي.
أسمار : عفية انت مو كلت اني اول وحدة افوت ؟
أسمر : بعيوني هسه تفوتين بس ابو عطاء ما اكدر امنعه لان اكبر مني وعيب املي عليه كلامي.
أسمار : تمام مو مشكلة ..
عشر دقائق وطلع أعقل ، أشرلي أسمر حتى افوت ، جريت نفس ودخلت اني وخالتي أسن ، دخلنا سلمنا جاوبنا جان مغمض عينه وراسه مضمد ، وحدة من عيونه نازل عليها لون ازرك ، وجهة من راسه مورمه..
أسن : حمدلله على سلامتك وتنكسر الايد اللي انمدت عليك ابو تميم.
بتعب جاوبها..
أديم : يسلمج الله ويخليج ما تشوفين شر ان شاءالله..
أسمار : حمدلله على سلامتك أديم.
حجيتها بصورة متقطعة ورجفة بصوتي .
جاوبني بجفاء وعكدة حاجب كأنما ما يعرفني ..
أديم : يسلمج الله.
باوعت على خالتي وهي اشرلتي بمعنى خلينا نطلع ..
أسن : اخذ راحتك احنا برا اي شي تحتاج كول.
أديم : متقصرين .
طلعنا وخالتي تجر بية جر ما قبلت اطلع ، بالباب التفتت عليها وهمست.
أسمار : اريد احجي وياه ليش طلعتيني ؟
أسن : هسه وكتها ماشفتي حالته شنو صاير بية؟
سكتنا من اجى الدكتور وكف يم إسلام وحجى وياه بعدين اجوي باقي الولد يستمعون.
_ طلعت الاشعة مال المريض ، سبب النزف عنده شظية براسه قديمة وجانت بمكان صعب تتحرك بيه ، وبسبب هذه الضربة تحركت ومكانها نحس وحساس لهذا نزف وتطلب الوضع ندخله عملية اخذت من عندنا ساعتين الى ثلاث ساعات تقريباً بس للأسف من بعد محاولات عديدة ، ماكدرنا نطلعها لان مكانها صعب ، بس ردت اسأل هو متعرض لحادث سابق وتسبب بفقدان بصره ؟لو لا ؟
إسلام : اي انفجرت عليه عبوة بسيارته وصارت بيه اصابات عديدة والحمدلله طلع منها سلامات.
_ تدرون اكو شظية براسه ؟
إسلام : اي نعرف بس بوقتها ماكدروا يطلعوها ، دكتور ممكن تكون هي السبب الرئيسي بالعمى ؟
_ ممكن كلشي وارد وننتظر ونشوف شنو يصير وياه بالايام الجاية بلكت تتحرك من مكانها ونكدر نطلعها بهيج حالة تكون فرصة رجوع بصره اقوى من هسه.
إيساف : يارب خير شكرا دكتور تعبناك ويانة ، اليوم نكدر نطلعه ؟
_ افضل تعوفوه لباجر لان مسوي عملية ويرادله راحة..
إيساف : ماشي هو هم ما ظل وقت بعد واحد يرجع نبات كلنا وياه ، أسمر وين اخوك ؟
أسمر : منو منهم ؟
إيساف : أهاب ؟
أسمر : ما اعرف .
إيساف : معقولة رجع؟
أسمر : ما اعتقد هسه اتصل علية كال راح اجيب اكل واجي وهسه لا هو ولا الاكل ..
إيساف : شوفه وبلغني.
أسمر : ماشي.
تقرب من خاله اسن لزم ايدها وكعدها على الكرسي وكف فوك راسها جان يهمسلها وهي تهز راسها بلا..
عافها واجى يمي وكف كال.
إيساف : انتِ هم مثل خالتج ما تقبلين ارجعكم ؟
أسمار : لا وين اكدر ارجع خليني عفية.
إيساف : زين اسبحوا واكلوا لكمة نظيفة غيروا ملابسكم واجيبكم بيدي
أسمار : لا ما ارجع.
إيساف : ابوية انتِ ملابسج كلها دم وضعج تعبان ارجعي اسبحي وغيري ملابسج أديم كلش زين ومابيه شي.
أسمار : خليني براحتي الله يخليك.
إيساف : هذا هو براحتج.
تركني وراح وكف يم أسمر ، حسيت اهتزاز بجنطتي عرفت اجاني مسج فتحت الجنطة طلعت الموبايل باوعت ، أفنان كاتبة ( أسمار اتصلي بية وافضل يكون وحدج ضروري ) ، اخذت موبايلي وتمشيت بنفس الممر بس بعدت عنهم ، اتصلت بيها كالت.
أفنان : هلو أسمار شنو الصاير ؟
أسمار : شكو ؟
أفنان : اني كاعد اسألج.
أسمار : ليش اكو شي ؟
أفنان : لعد ليش أهاب يكول خابري اسمار وبلغيها راح اتصل بيها بس تكون وحدها عندي شغلة وياها بخصوص أديم.
أسمار : ما اعرف غير يتصل بية وبعدها اعرف السالفة وابلغج .
أفنان : هم صحيح راح اسده واخابره حتى يخابرج لان منتظرني هو.
أسمار : ماشي انتظر.
سديته منها ثواني ورن موبايلي جاوبت.
أسمار : الو اهلا.
أهاب : شلونج
أسمار : الحمدلله
أهاب : انطيني عنوان هذا الكلب.
أسمار : لؤي ؟
أهاب : اكو غيره يعني ؟
أسمار : شنو تسوي بيه ؟
أهاب : تحاسبيني لو تستفسرين؟
أسمار : لا هاي ولا هاي بعدين شبيك حدي وتحجي معلك.
أهاب : لا سلامتج اخوية عرسه اليوم وحبيت اتلاطف وية بنات الناس واتغزل بيهم عندي وقت هواي ، شوفي انطيني عنوانه هسه.
أسمار : لا تصيح زين .
أهاب : ما مصيح صوتي عالي من الله.
رديتله العنوان وسده قبل لا يكول مع السلامة ، بعدها دزلي مسج كاتب بيه.
( ولا نفس يطلع لأحد من اللي تنفسناه اني وياج )
سديت موبايلي وخليته بالجنطة، ورحت يمهم سألتني خالتي منو كلتلها أفنان كالت خوما حجيتي الها لان ما يدرون كلت لا سألت عليه وحبت تسلم، بعدها اجى أسمر وكال .
أسمر : اتصلت بيه جان مشغول هسه يلا جاوبني وكال جاي اقل الساعة يمكم.
إيساف : ماعرفت وينه ؟
أسمر : لا ما عرفت.
سكتوا بعدها مرت ساعتين وصار الفجر ، اجى أهاب يعدل بردن القميص ينزل بيها وصل يمنا وخله الاكل ، وكال مأشر عليه.
أهاب : اكلوا لكمة سدوا جوعكم بيها ، وخلوني افوت لأديم اتطمن عليه.
إيساف : وين جنت ؟
أهاب : عندي حبايب زرتهم .
إيساف : من وين ذولة ؟
أهاب : حبايبنا هواي.
إيساف : اللي بالي بالك أهاب ؟
أهاب : حد الله بيني وبين الحرام شيخ.
إيساف : مو هذا قصدي ، تعرف قصدي زين.
أهاب : لا ما متعارك ...
أيساف : اي زين.
محد كدر ياكل ، لحد ساعة ٨ الصبح اجى الدكتور دخل يم أديم فحصه حسب ما فهمت ، وطلع نطاهم وصفة مال علاج ونبههم على هواي شغلات لازم ينتهبون عليها علمود وضعه يتحسن وكال عادي طلعوه اليوم..
راح واحد من الولد مشى بأجراءات الخروج وطلعوه يمشوه بالعربانة جان مغمض وساد كف ايده بقوة ، وصدغه وفكه ينبض بقوة..
صعدنا بالسيارات وصلونا اني وخالتي وهمه راحوا ، اول ما فتت دخلت سبحت وطلعت لغرفتي مددت بس كل شوية اتصل ب اسمر اشوفهم وين وصلوا واتطمن على اخبار أديم ، الا كال وصلنا وتطمنت عليه نام ، يلا نمت..
مرت الايام وصار اسبوع ، بهذا الاسبوع اني كل يوم اتصل واتطمن بس ماحجيت وياه ولا سمعت صوته ، دوام ماداومت وهو اخذوله اجازة..
مرت عشر ايام وبابا كال لازم نروح نشوفه ونتطمن عليه ونتحمدله بالسلامة ورحنا ، دخلنا للصالون مالتهم ، اجوي كلهم سلموا علينا ، بعدها جابوا الحجية بالكرسي سلمنا عليها ورحبت بينا هواي وحجينا بسالفة أديم
ما كايلين الها صايرة مشكلة ومضروب ، مبلغيها مسوي عمليه علمود عينه ، وخطية جانت تحجي وتتمنى يرجع يشوف وتفرح بيه.
بعد شوية طلع أديم من غرفته يتملس طريقه بالعكاز ، كام أرود تلكاه وصله للقنفة كعد و سلم على بابا وعلينا بس سلامه جان جماعي ولبابا خصصه..
اني ما حجيت شي ولا سمع صوتي ابد بس جان ينصت للأصوات حتى يميزني من بينهم ، صرت اعرفه وحافظه كل حركاته ، جر نفس بقوة وتنهد ، حجوا مواضيع عامة مرت ساعة و بابا رفع الزحمة كال يلا ...
كمنا حتى نطلع ، سلمت على الحجية وأفنان و رحتله همست.
أسمار : حمدلله على سلامتك واشتاقيتلك..
من سمع صوتي ولهفتي بالكلمة الاخيرة ملامحه تغيرت شفايفه تحددت بقساوة اول مرة اشوفها عند شخص ، عكد حاجبه ورفع راسه ليفوك ما جاوبني ، ظليت صافنة عليه بعدها تذكرت احنا مو وحدنا دنكت راسي وطلعت ، مجرد عبرت الباب دمعتي نزلت..
الطريق كله ضايجة وافكر، خالة تسألني شبيج من اجينا جنتِ متلهفة وغير شكل ليش هسه تغيرتي..
سكتت ما جاوبتها..
درت وجهي للجامة واتفرج سارحة بزماني ..
وصلنا فتت لغرفتي واتصلت على أفنان ردت توصلني بأديم حتى احجي وياه ، سدته وخابرتني وره ربع ساعة كالت نايم.
ثاني يوم نفس الحجة هم نايم ، ولمدة اسبوع نفس الشي رافض يحجي وياية..
انجنيت ليش رافض يحاجيني ولا داوم وياية بعد حتى احاجيه
من بعد ثلاث اسابيع على الحادثة ، جنت بالدوام كاعدة وسارحة بأفكاري وشلون اواجه أديم وابين موقفي بدون ما اجرحه وبنفس الوقت يتفهمني ، سمعت صوت قبيح رفعت راسي واشوف لؤي كمت ردت اضربه بعدين تذكرت اني بالجامعة واي تصرف محسوب علية.
أسمار : ليش جاي ياكلب يانذل شنو تريد مني ؟
لؤي : أريدج انتِ وابني.
أسمار : وهسه تذكرتنا؟؟؟
لؤي : اني شوكت نسيتكم حتى هسه اتذكر وبعدين ليش تكرهيني ؟؟
أسمار : اذا اكرهك معناها بعدني احبك ومادام اندكيت بيه وخربت حياتي الا اخرب حياتك..
لؤي : تغيرتِ هواي عن قبل..
يتبع....
عن حال أسمار وموقفها نگول..
خاطرة بعنوان ( تغيرت )
تغيرت اي فعلاً تغيرت
وحتى هواي تكبرت
من انت وكلبك والزمان احتليتوا كلبي والمكان
غدروا بيه نبضي ورجفتي وخوفة عيوني ولهفتي وشوكي وضنوني..
غدرتوني من عرفتوني اهواكم لكطع النفس
ولك يايوم بديت نفسي قبل عيوني
لا عفية لا تلوموني انتوا جنتوا نور عيوني
عكبيش جاي وتعتذر
وتنوه لقلبك كاعد يحتضر
وتفجع بروحي وتطلب اعتذر
وارجع احبك من جديد واربت والوليك واهيد
وما انتقم ولا اكيد وما ارجع الصاع اللي انضربته من بعيد
لا من صدك عيدك سعيد
بقلم
عبير إدريس