٤ برواز من ورد
سدير ابن اختي مسرة كان حفيدنا الاول وروحنا بيه وخصوصا انه على ايدامي انولد وهي اللي ربته
ففرحتنا كانت بجية مسرة وابنها احنى اصلا قليلا ما جان يجينا احد
بذاك اليوم من جتي وعيونها تبجي بس فرحانه
ابتسمت والدموع بعينها
كالت عقيل زوجها طلعتله الموافقة على السفر و البعثة الى ال المانيا الدائرة راح ادزه هناك يكمل دراسات ...ولازم اروح وياه مصاحبة زوجية اقل شي تلاث سنوات
بس شلون يجي من گلبي اعوفكم واعوف ماما!!!
اني صدك سكتت ماحجيت ...مفكرت لابيها ولا بزوجها بس بسدير شلون راح تاخذه
وتروح ...اصلا روحي بيه ...كلش ضجت على كولة ماما هذا ابنا وانت دتربيه رحت بصفنتي جبتلها كلاص مي واجيت
كتلها شوكت سفرتكم ؟!!
كالت بنهاية رمضان ان شاء الله يعني هيجي شي بعد مكالو بالضبط
يعني ماباقي شي ؟
كالت تعرفين اخو عقيل هناك ...وراح نروح بنفس الجامعة اللي بمدينته
هو اللي حصله الموافقات ...الحمد لله خطية كلش فرح من كلناله راح نجي
باثناء ذلك...سمعنا صوت ماما دتلاعب سدير وجرته وجتي كالت ماماتي ليش كاعدين وحدكم هنا؟!! شافت دموع مسرة ...فراسا بهتت خيرج امي شبيج
طبعا اني راسا نطيتها بلا مقدمات كتلها طالعتلهم بعثة ورايحين لالمانيا هالشهر الجاي
فمسرة كالت اصلا اتاخرنا ...
امي راسا قاطعتها ..صدك ماما راح تاخذين سدير ...يايمه ياروحي ...شلون بعد ماشوفه شلون تاخذيه هذا ابني ...واني ربيته ياربي شلون اتحمل فراكم
من شافتها هشكل مسرة انقهرت كالتها ماما هي كلها تلاث سنين
وكامت تبجي فامي حضنتها وكالتله
يله ميخالف امي لاتضوجين هذا مستقبل زوجج وفرصة ماتتعوض روحي والله ويوفقكم
هي كلش انقهرت بس ضمت بگلبها
وفعلا هي اللي ربت سدير لانه من انولد كانت مسرة توها بدت تدرس دبلوم طموحها كان الدكتوراه درجات التخرج مالتها مااسعفتها تدخل ماجستير راسا بس انقبلت دبلوم فعلى طول جانت يمنا وخصوصا وكت
زوجها عقيل كان انسان هادئ ومحترم وملتزم كلش وحتى مسرة اتحجبت اول ماتعرفت عليه واهله هم كانوا كلش بحالهم اصلا مافي يوم سمعنا مسرة تجيب طاريهم او تحجي عنهم بشي صح حالتهم المادية مو تمام
بس ممانعوا ابد بطلبات مسرة وراسا عزلوا الطابق الفوك بدرج خارجي حتى تاخذ راحتها مع انه هي طول الوكت يمنا خصوصا من صار عدها طفل
فمحسينا ببعدها عنا من اتزوجت بالعكس صارت يمنا اكثر من ما بيتها وزوجها كان مايمانع ابد لانه اختي تعرف شلون تمشي امورها فاامي اتعلقت بابنها حيل وللاسف صحتها كلش تعبت ورة سفرها
وواجى رمضان وباول يوم منه عرفت انه ليث وكومة موظفين مصايمين مااعرف شنو اللي تغير بهالدنيا قبل حتى اللي يفطر يستحي يكول فاطر ...هسه صار كلشي علني ماكو مستحى ...لا من الله ولامن عباده
فمن داوم ليث وكلاص الجاي بيده واحنى صايمين
فسالته كتله ليث اشو مصايم ؟!! يكول جنت اصلي واصوم ويضحك يكول بس خوالي ادبسزية طلعوا عيني وعلموني على الشرب والنسوان
بس امي واختي يصومون اني واخوية وابويه منصوم
عاادي فرحان ويضحك
مكنت اعرف يحجي صدك لو كذب بس عرفت منه انه يشرب مرات على الرغم وكته كله بالقاعة يتمرن ....يعني المفروض رياضي
بس خلال هاي الفترةقوت علاقتي بليث اكثر وصار يحجيلي هواية عنه وعن ضحى ...من يكون فاضل مموجود ونكون وحدنا بالغرفة
وكلما يحجيلي اساله اكثر
كمت افكر بضحى هواية يمكن اكثر منه ههههه
وشلون هي بتصرفاتها اللي عمري معرفت اسوي مثلها خالة ليث هيجي يدوخ بيها
مااعرف ليش كنت اغار منها لا وبعد كمت اقلدها بالتصرفات مرات من اللي يحجيلي عنها ليث مثلا اني طبيعتي دائما امشي ومااسلم على احد اتجنب الفشلة.
لانه اظل افكر هذا جاوبني لو لا وليش هيجي جاوبني شنو يقصد ...هاي مااسلم عليها عاقجة شكلها...وهكذا
فبس اللي يسلم عليه ارد عليه هسه و هالايام كمت اسوي مثلها تمشي مبتسمة وتسلم على الكل
وعلى الرغم من انه هو يكول جان هواية يتعارك وياها على هاي الشغلة لانه كلش يغار عليها ويتخبل اذا ضحكت وية احد
وحتى يحجيلي يكلي مرة ردت ابسطها لانه كانت تتشاقة وية وابو محمد
فاني اتفاجات وضحكت كتله تبسطها شنو
كلي عادي احنى واحد يبسط الثاني.
بوكتها مافتهمت عبالي صدك يبسطها طلع هو ينبسط منها
بس مو مثل الي نعرفه يعني لو تضربه بالجنطة مالتها لو هيجي بالموبايل لانه هي فدوة كلش نازكة تموع بالحر حسب مايوصفلياها
يكلي سارة اذا مااخابرها كل ساعتين اتخبل ...اظل افتر داير مداير نفسي
بس اسمع صوتها يله ارتاح حتى لو ماكو شي بس ال الو مالتها تموتني
وهم يحجيلي شلون معذبها بشكه وغيرته
وكل مرة اريد اساله ليش افترقوا استحي انتظره هو اللي يكول
بس اللي افتهمته من كلامه انه هو شكاك
فكتله معقولة ماتثق بيها ؟!!
كلي لا والله اثق بيها مثل عيوني بس سارة هذا مرض بيه مو بيدي اذا شفت تلفونها مشغول اكلب الدنيا عليها حتى لو تحلفلي ميت يمين مااكدر اصدك ....وهذا الصراع بداخلي خبلني وخبلها شغلة موبيدي مرض هذا مرض سارة صدكيني
وقبل متسافر مسرة بشي عشر ايام احنى كنا مفجوعين من الخبر...كلنا متضايقيين منها مانكدر نكللها لاتروحين لانه هذه فرصة ماتجي بالاحلام ولا نكدر على فراكها
مرت ايام رمضان حيل كئيبة ...جنت من ارجع من الشغل اجيب اكل ويايه من برة...مالنه واهس نطبخ على كد الشوربة واذا امي بالبيت اسويلنا اكل بسيط حتى ابويه مصار اله واهس يسولف ويحجي ويتشاقه
وبهالفترة اذكر
امي رجعت من وكت بذاك اليوم وسوتلنا الفطور فطرنا ...على الرغم من الاوضاع جانت موزينة بغداد بسنة ٢٠٠٨ بس برمضان جانت لساها بعض المناطق مثل قبل تكعد للسحور خصوصا الاسبوعين الاخيرة منه
ومن هاي المناطق المنصور
رحنا افترينا شوية ورجعنا على ساعة ١٢ من رجعنا ابويه واخوية سرمد صعدوا فوك واني وامي كعدنا نباوع تلفزيون على المسلسلات تعرفون نسهر تقريبا للسحور نتسحروننام اتذكر جانت ساعة وحدة ونص بالليل دك تلفون امي اكثر من مرة
واخر شي راحت شالته كالت اكيد هاي المستشفى
والله و اسمع صوت ماما دترجف بس تكول لاحول ولاقوة الا بالله ياربي شلون ! وجتي يمي ودموعها تكت نشف دمي بجسمي.
سارة هاي عمتج سعاد جانت على التلفون تكول كاتلين عمتج نجاة ورجلها بسيارتهم
الخبر نزل عليه مثل الصاعقة ...كتلها شتحجين ماما؟!!
كالت شلون هسه اكول لنعيم ...تعالي اذا هسه كعدت ابوج وكتله اخاف يفز ،يخترع ،يصعد ضغطه ؟!يصير شي بالرجال؟
ظلينا نبجي وممصدكين الخبر وقلقين على جهالها الصغار
والله واخر شي صعدنا اني وامي دنكول لابوية حتى يروح يشوف الموضوع يشوف الخبر هذا ووظلينا محتارين شلون نخبره!وشكد ماحاولنا بهدوء وعلى كيف من شاف دموعنا ورجفتنا حس اكو شي مااتحمل راسا اتخربط اغمى عليه من عرف الخبر ...كان كلش يحب عمتي هذه مثل صديقته وعلى طول تتفقدناو هي الوحيدة من بيت جدي الي نحبها هواية ونمون عليها
خطية اتاذى كلش وظلينا ساعة نحاول انهديه... حتى يلحك يروح ويفتهم شنو اللي صاراحنى الي گلبن اتاذت عليهم
بذيج السنة واللي قبلها صارالقتل والذبح بشوارع بغداد علني ...ومحد يخاف من العقوبة ...انصبغت الشوارع بدم الناس الابرياء
المصيبة انه لحد هسه مانعرف ليش كاتليهم
عمتي نجاة اصغر وحدة بعائلة ابويه كانت من مواليد ٦٨
من كانت صغيرة حبت واحد جيرانهم متزوج
مااعرف شلون خلاها تحبه هم متزوج و هم عنده من زوجته اربع جهال وهم محلو وهم كاعد ويه اهله يعني مستحيل مستحيل يوازي مستوى عمتي باي شي ومكان متمكن حتى يدللها مثل دلال اهلها ومع ذلك
اتزوجته رغما عن جدي وبيبتي بعد مشاكل كومة
وحتى ورة الزواج ماارتاحت ماكو تلاث سنين كضتها عرك وطلايب تالي زوجته الاولى واهله طلكوها ...وحتى مؤخر ماانطاها
واخذت بتها الوحيدة سراب جانت سنة ممكملة ورجعت لبيت جدي بقت هناك حتى نفقة مايدزلها رادت بس تخلص من شرهم
وقبل شي ثمن سنين اتعينت موظفة بالاتصالات واتعرفت على زوجهاالثاني المرحوم
جان ممتزوج يعني عمتي اول زواجه ...وجان كلش فقير وعلى نياته بحيث يمشي ورة حجاية عمتي ...وصار عدها من عنده اثنين ولد منه سنة ورة سنة جابتهم
هي كانت الله يرحمها انسانة طيبة وبشوشه ماعدها اذية على احد وهمه الاثنين كلش بحالهم لا سياسة ولادين .همه جانواوحدهم بذاك اليوم راجعين ساعة تسعة من بيت اخو زوجها طالع من المستشفى وديزوروه ومااعرف شلون موكفيهم و كاتليهم على السريع مال الدورة وجانو الله يرحمهم عايفين الجهال الصغار يم سراب اللي بوكتها جانت صف اول كلية
ومن متاخرين مراجعين للبيت ظاله دك عليهم تلفوناتهم مغلقة اخر شي مخابرة عمامها وكوم عمها الثاني روح وراهم على نفس الطريق و شايف الحادث والشرطة ملتمين....من نازل يشوف هذا اخوه وعمتي غركانين بدمهم بنص الشارع والسيارة ظاله ماشية مدعومة بالرصيفوصاعده عليه ...الله يرحمهم
صارت الفاتحة واني بقيت بالبيت مارحت وياهم لموا جهال الكرايب وبقوهم يمي حتى لاتصير هوسة ...فاتحة النسوان صارت بييت جدي ونفسه كاعد بيه عمي والبيت صغير فكالو نعوف الجهال يم سارة ...و لانه مااحب هاي الاجواء والهوسة والقهر والبجي اني بلا كلشي دموعي ماسكتت.بقيت يمي شكو جاهل ومن ضمنهم جهال عمتي ست وسبع سنين جانو بذاك الوكت
جان الموقف مؤلم كلش . يعني شلون هسه هذولة المساكين يبقون بلا اب وام و سراب كم سنة وتتزوج بس هذولة شيكبرهم
من هسه يبجون يريدوهم شلون الواحد يفهمهم ماكو ام واب كنت حاضنتهم وابجي وهمه كلش فقرة عينا ابوهم
يبجون بسكتة ويكسرون الخاطر جنت ادعي الله يحمي برائتهم والله خطية وصعبة
ورة ماخلصت الدفنة والفاتحة
بابا قرر انه سراب والولد يبقون يمنا احنى نربيهم وماحد كسرله حجاية اهل زوج عمتي هم معارضوا. بس عمتي سعاد رادتهم هم مكدرت تحجي كون ابويه اكبرهم ومحد يكسرله كلمه
وبالفعل بقوا يمنا وامي نقلت مدارسهم وحتى العيادة سدتها ورة الحادثة تقريبا شهر لانه خطية الجهال اتمرضوا كاموا مياكلون ابد خصوصا الصغير ليل نهار يبجي يريد اهله
يكعد على الصبة مال الباب بالحديقة ويبجي يكول هسه تجي ماما ,شكد اشترينالهم لعب وشغلات بس مكان يريد الا امه واتمرض بالفراش
فظلت امي وسراب يداروهم
وقبل العيد بكم يوم صار سفر مسرة ...وصارت لحظة الفراق الثانية كانت سنة صعبة حيل
يعني عيد هاالسنة كان اتعس عيد ...الله يساعد كل واحد فقد اهله لو بعيد عليهم ويجيه العيد..يصير الجرح جرحين والحزن حزنين
جنا نحضر الكليجة والعيديات والهدايا للجهال هسه المن ننطي والمن نعايد لا رحنا نزور احد ولا احد زارنا ابويه ماقبل بس رحنا للمكبرة ورجعنا الفرحة بس كانت فرحة وصول مسرة ال المانيا بسلامة وفرحتهم بالحياة الجديدة هناك
رجعت سراب للكلية ورة شي شهر او اقل مااتذكر بس اتفقنا اانه كل يوم واحد يوصلها على فراغه الا ان ادبرلها خط فاني على الاكثر جنت اوصلها وامي تروح تجيبها توصلها وتروح للعيادة
بس اشو هاي تصرفاتها شوية جانت مو عاحبتني يعني يومية مطلعة امي تروح تشتري هدوم اسود جديدة وتدور موديلات امي مجانت تحجي بالعكس تكيف تطلعها حتى تنسيها وتلهيها بس اني جنت اكول هي بيا حال اللي امه وابوه يروحون جوة التراب هم اله واهس بالدنيا يدور لبس ومكياج وجنط ؟!!!
احنى بوكتها حضرلناهم غرفة مسرة وجبنا جرابيهم وغراضهم من بيتهم ماقبلت نشتريلهم جديد ...بس ماخلينا بنفسهم شي ...كلشي جانوا يريدوه بالساعة نركض عليه حتى سرمد حبيبي جان يومية يطلع الولد يفرهم بسيارة امي لو سيارتي ...ويلعبهم بالحديقة يعني حاولنا مانقصر وياهم
بس بصراحة جنت اشك بتصرفات سراب عزلتها بالغرفة فوك على طول حابسة نفسها ومن افوت من يم غرفتهم اسمعها تحجي بالتلفون ومن تسمع صوت رجليه تنصي صوتها
ورصيد ورة رصيد مرة مني مرة امي مرات ابويه زين المن تخابر؟!!
فكمت اراقبها بالليل واكثر من مرة افتح عليها الباب اشوفها تسولف بالمسنجر على الحاسبة جان عدها لابتوب بذاك الحساب مع انه حالة عمتي مو كلش يعني ...فد يوم ابويه وصلها اني اخذت حاسبتها كلبت بيها...و فتحت الهستري وشفت البلاوي