(وجـمــعـنـا خـذلانـهـم)

البارت الحادي عشر 11

تم تغيير اسم الرواية من #عشيق_زوجتي_في_بيتي

          الى

#وجمعنا_خذلانهم

#بقلم_بتول_حسين

#البارت_الحادي_عشر_11

--------------------------***--------------------

"إن مرت بك مشاعر الإنطفاء والخيبة ، إن أتعبك الطريق وتاهت بك الخطوة ، حتى تلك الندوب التي في أعماقك مخفية ، لا تحزن لكل حدث في حياتك قسمة وحكمة ، مهما ضاقت سيضيء الله في ظلامك شمعة ، سيزول مافي القلب من غصة ، لا تيأس نور الله أقوى من كل عتمة. "

--------------------------***--------------------

مسلم : بعد محچيت هذا الشكل ويا يقين وشفت دموعها بطرف عينها بس ردتني وماسگتت شخصيتها قوية كلش نظراتها الحادة رغم الدمعة باطراف رمشها

اتندمت لان هيج عاملتها وهنتها ،، قررت ما اشوفها بعد ولا اهتم ألها لازم امنع نفسي عنها حياتها وهيه حره بيها هيه تحل مشاكلها

بس بعد كم يوم چنت گاعد بمكتبي بلمحكمة وحاير بشغلي ومن طلعت احچي ويا بنيه شفت زوجها يحچي ويا محامي ضليت اراقبة وبعدها طلع هو والمحامي من المحكمة ثاني يوم رحت للمحامي

وسئلته شنو يريد اتوقعت راح ينفصلون بس المحامي گال يريد يزوج وزوجتة ماتعرف وتدري انت لازم توقيعها لهذا راد اساعدة بعقد خارج المحكمة

انقهرت عليها وتشمتت بيها بنفس الوقت ،، من اتذكر سيارتها ومجمعاتها وملابسها وحجابها اضوج كلش يعني لخاطر الفلوس تحجبت وخوش صيدة ولد حلو ومرتب هم شكل وهم فلوس ما اعتقد يهمها الباقي

لعبت نفسي من النسوان والبنات كلها وحتى رجعت لعقلي وابتعدت عن جنس حواء وصرت احتقرهن كلش صرت وحدي لنفسي وبس اطلع ويا اصدقائي واخلص الوقت العندي ويا بنتي

مشت الايام بنفس الروتين دوام ومن ارجع انام شوية وبعدها اخذ بنتي للبيت يمي اضل وياها وبعدها ارجعها لبيت عمي واطلع ويا اصدقائي

اهلي مادخلت بيتهم بس امي تجي تشوفني اني شايل مسؤلية البيت لحد الان طبيب ابوية وامي مصرفهم ومسواگ البيت والمحل لان المحل امي صارت تگعد بي هيه وزوجة هيثم الثانية

هيثم ممقصر وياهم بس يضلون اهلي ولازم اتحمل مسؤليتهم رغم تجي ايام اريد اروح اخذ ابوية واشمره بلشارع من اذكر الشي الصار يستحق هذا الشي ينشمر بدار عجزة او بلشارع وارجع اخاف ربي

واگول اذا اسوي هيج اني ما افرق عنه بشي هو امي تسولفلي بس يبجي ايده يحركها قليل تحسن على الادوية ويحچي بس من الحزام وجوه شلل عمي ممقصر ويا خلاه رجال بس اسم

امي مسولفة ويا ومحاولة تعرف الصار وليش هيج سوه ويا زوجة ابنه ،، مسولفلها هيه تجي للمحل تگعد وياي وتدلع وتاخذ ملابس نوم ومن تطلعون تلبسهن وتضل تفتر بيهن بلبيت واكثر من مره تتحارش بي وشوية شوية صارت تتعره وتدخل ويا بلفراش

چنت اسمع اريد اكرهم اكثر ماريد احن اريد گلبي يضل حجر من جانت كل جنت حواء ،، بعدها هو صار يحچي براسه الشيطان حسب ميقنع نفسه بهذا الحچي يبرر لنفسه لقذارته والله يمكن الشيطان متفاجئ مثلي واكثر

ورايدة ابوية يسجل المحل والبيت بأسمها ومقررين تطلك مني وتزوج ابوية بس الله كشفهم على حقيقتهم ،، هو هم مسولف لعمي هذا الكلام لان من سولفت لعمي گال غصب عنه خليته ينقل البيت بأسمك والمحل من ضمن البيت

والجهاز الچانت تگذب عليه وتگول لاختها ألها ومن فتحته وعدها اكثر من حساب واصدقاء كلش هواي تفتح وياهم مكالمات فيديو وصورها موجودة بلمحادثات وبملابس مخزية كلش وكلام اني ولد بعمري ماحچيت هيج ويا بنت ولا حاچي وياها هيج وهيه زوجتي وحلالي

بكل مره انقهر عليها واتذكر شكلها مثل الحيوان حابسيها ويضربوها واتذكر اني حرمتها من بنتها ،، اروح اطلع الجهاز واقره المحادثات واشوف صورها واسأل عقلي الماراضي يستوعب

معقولة هاي طيف الخجولة الحنونه الحجاب ميوكع من راسها وملابسها المستورة بلبيت ،، معقولة هاي هيه بهاي الاوضاع المقرفة والملابس المكشوفة وماتستر غير شي بسيط منها تلبسها أليه وتلبسها تغري ابوية بيها حتى بس تاخذ البيت والمحل

وتاخذ مني وتضم ذهب وتاخذ فلوس صالونات حتى تعدل نفسها وتخوني وتودي صور وتفتح كاميره ويا غيري اني زوجها متتصل بيه مكالمة فيديو اضل انتظر يوم نزلولي دقيقة دقيقة

بديت ارتب وضعي وارجع مسلم النظيف مو وحدة رخيصة مثل طيف وواحد قذر مثل ابوية يرجعوني للصفر واخسر الدنيا والاخرة

شگد عمي حاول وياي حتى ازوج بس ماقبلت گتله لا تحچي وياي بجنس حواء كلهن ،، صرت انقرف من شي اسمه زوجة

بس ماعرف ليش ضل منظرها ونظرتها لحادة والدموع بطرف عيونها بعقلي بكل مره اتذكرها اضعف وارجع اذكر نفسي هيه حالها من حالهن گلبي يگلي شكلها قاسي بس هيه نظيفة مو متصنعة
مو مثل طيف شكلها خجولة وحنونه بس گلبها قذر

وعقلي يرجع يگولي لا لا هيه مثل البقية اهم شي نفسها شوف وين وصلت صادت واحد حلو وشبعان فلوس واخذت التريدة ومايهمها شي وما تدري بزوجها شنو مسوي من وراها ولا مهتمه بي

بس بيوم چنت بلدوام بلمحكمة الساعة ب 10 الصبح جابولنا ريوگ وگاعدين اني وزملائي بلشغل ناكل ونسولف ونضحك بس مو بمكتبي بمكتب صديقي يحقق هو وكل شوية داخل واحد

وهو ضل يحچي علينا خاف يترزل گتلهم تريگو بسرعة خلي يشتغل ،، بعدي احچي والاكل طلع من حلكي وخشمي من شفت يقين حالها يقهر ومتبهذلة ومكلبچين ايدها دخلت للتحقيق ضليت اگح اختنگت

شربت مي وجريت نفس وگمت واني اتفحصها بنظراتي ومصدوم ،، هيه اول مدخلت چانت شامخة ومامهتمه نظراتها الحاده تتفحص المكتب بس من شافتني احس عيونها تگول ساعدني ،، صارت تنزل دموعها

وشفت اصدقائي انخبصو واحد يهمس للثاني يقين كلش حلوه وعيونها تجذب جمالها طاغي كلش وبس اني اعرف التدخل لهذا المكان وبجمال يقين شنو يصير بيها

--------------------------***--------------------

يقين : ههههه بعد مايقنعني تمثيلك اخذ زبالتك واطلع برا الناس تتفرج علينا يله هذا مكان رزق يتامة مو للزبايل

جهاد : حبيبتي تعالي للبيت نتفاهم

نور : جهااااد مو اني واكفه لو ماكو احترام

جهاد : اكلي خرا وولي من وجهي كله بسببج راح اخسر حب عمري اخذتها بلظيم والقهر وسهر الليالي يله صارت اليه ملكي وحلالي مستحيل اضيعها من ايدي

يقين : ماعرف انقهر على نفسي ماعرف اضحك ،، عيني طلعو برا حلو مشاكلكم ،، ضلو واكفين ويتصايحون بنص المحل اتصلت على زوجة اخوية وگتلها تجي للمحل وسولفتلها باختصار جهاد مزوج وحدة منفصلة وعدها اطفال

ضلت تسأل فصلت المكالمة واتصلت على قمر حتى تجي وعلى جنه بعدني احچي ويا جنه انسحب الجهاز مني ،، باوعت جهاد سحبني من ايدي

طلعني من المجمع وگال

جهاد : صعدي بلسيارة

يقين : انطيني الجهاز واخذ زوجتك وروح جهاد خذلتني انت تحلم تشوف وجهي بعد او تسمع صوتي روح واخذ زبالتك وياك

جهاد : اكلللللج صععععععدددددي

يقين : لا تعلي صوتك عليه الرجولة عمرها مجانت بلصوت العالي الرجولة توفي بكلمتك بوعدك الرجولة تحافظ وتكون سند للقدمتلك گلبها وحياتها وصانتك ووگفت وياك وتقبلت كلشي وماتركتك

جهاد : تعيريني لان عقيم مو ههههه ،، لهذا السبب ازوجت گلت يجي يوم وتعيرني وتمل وتتركني وتروح لغيري

يقين : حشه اني ما انزل المستواك لا تخلط بيني وبينك انت حشره اختاريت الزبالة تگون مكانك رغم قدمنالك العسل بس انت اصريت تروح للزبالة يله كل واحد يعرف قدرة

نور : جهاااد وين تريد عوفها لهاي الزبالة وتعال وياي خلي تولي شايفة نفسها

يقين : ههههه اخذها وروح بدون مشاكل ونتقابل بلمحكمة ،، ماحسيت غير راح لنور وصار يضرب بيها ويگلها منو تولي لج منو زبالة بعدته عنها وضليت اصيح عليه اخذها وروح منا كافي فضحتنا روح

جهاد : باحلامج اتركج لو تموتين تعالي غصب عنج مو برضاتج

يقين : سحبني من ايدي واخذني للسيارة وطلع بينا للبيت ماحچيت ولا كلمة ويا ابد جهازي ضل عندة ،، دخلنا للبيت رحت للغرفة قفلتها عليه بسرعة ضل باب الغرفة مره يبچي ومره يعاتب مره يلومني أليه مره يلوم نور

واني صرت ألم اغراضي كلها لميتها مخليت شي فتحت باب الغرفة بعد ساعتين ،، لان سمعت هوسه طلعت شفته واكف باب البيت ويحچي تقربت اسمع صوت خالتي وامي

كتله افتح الباب مافتح حاولت ويا صار يدفعني ماقبل وراح للمطبخ رجع بأيدة سچينة ويهدد يگتل نفسه اذا اخذوني او طلعت وحلف يطلگ نور وشنو اريد ينفذ بس ما اطلع من البيت واتركة

ماهمني اذا گتل روحة او لا ولا انهزيت ابد بس اهلي واهله خافو وراحو ،، ضل واگف بلباب حتى ما اطلع وبيده السچينة ،، ماحسيت غير شمرها وسحبني من ايدي دخلني للغرفة وهو وياي وقفلها من شاف جامعة اغراضي كلها تخبل

گعدت على الجرباية وهو ضل يفتر ويتوسل وكل مره يتقرب مني احذره بنظره وحده وهو يبتعد عني بسرعة ضل يتوسل اضل وشنو اريد ينفذ وصار يبچي مثل البنية مارف گلبي عليه ابد ولا انقهرت ولا انهزيت

حسيت نفسي انسانه بس بالاسم صرت بلا احساس او مشاكل من الصدمة لانها قوية وچانت سبب تحويلي جبل صامد مهما صار ما ينهز او ينهد

هو من شافني هيج حبسني بلغرفة بسويج سيارتي جامعة مفاتيح البيت من كل مفتاح نسخة لكل غرفة ولباب البيت هم وهو ماذكر هذا الشي السويج عندي معلگتة بلبنطرون چنت لابسة بنطرون وبدي طويل

ضليت گاعدة واسمعه يحچي ويا نور بعصبيه ويغلط عليها ،، واني رغم اجاوزت عليه واريد اتركة مافكر يمد ايدة عليه او يغلط عليه ونور هانها كلش

ضحكت على اسلوبه متوقعني طفلة هادئة مطيعة وتتقشمر بكلمتين ومن يعامل نور هيج ويطلگها راح ارجع اله وما اعوفه

ضليت على نفس الگعدة بس افكر شلون اخذ جهازي من اطلع لان كل الدلائل بجهازي المحادثات والصور والفيديوات ،، للفجر فتحت الباب وشفته نايم بلصالة وجهازي وجهازة على الطبلة بصفة تقربت اخذت جهازي وطلعت من البيت

رحت لبيت جنه اتصلت اول مجاوبت گتلها اني بلباب فتحي الباب ،، فتحت الباب ودخلت للبيت ضلت تسأل شنو صار ماگدرت اجاوبها تعبانة ونعسانة گتلها بس ارتاح وانام وبعدين نحچي اذا اجه جهاد خلي اخوج يطلعله ويوگفة عد حده المجمعات أليه مو لجهاد لا تخافون منه گولولة منعرف وين يقين

بعدها اتصلت على امي ومنعتها تفتح الباب لجهاد واذا اتصل تگولة موجودة نايمة بلبيت اجتي بنص الليل

بدلت ملابس من جنه ونمت ومافكرت بشي گعدت ب 9 الصبح وشفت مكالمات كومة من جهاد رديت عليه

جهاد : وين انتي لو اطيرين ارجعج للبيت اصبريلي يقين

يقين :  انت وين

جهاد : بيت نور

يقين : ههه بلمكان المناسب ألك جهاد انت تعرفني اني من اخذ قرار وانطي كلمة ما اتراجع ابد انت اكثر شخص تعرفني للاسف

انت انتهيت من حياتي انت متت ماكو شي بعد يرجع استوعبها بسرعة افضل ألك طلگني بدون دوخة ومشاكل

جهاد : ههههه نجوم السمة اقربلج من هذا الشي انتي أليه ملكي وحدي أليه فهمتي وراح ارجعج مذلولة أليه وغصب عنج ونور ما اتركها وانتي تضلين وياي وانتي الممنونه بعد

يقين : انت تعرفني ماكو داعي ارد على ذكر مثلك مو گد كلامة وگد وعدة باي ،، فصلت المكالمة وحچيت ويا اخو جنه يروح يشوفة موجود لو لا راح شافة مموجود ولا سيارته موجودة

اجرت سيارة واخذت اغراضي كلهن من البيت ورحت للمجمعات سيارتي هناك ضلت خليت اغرضي بيها ورجعت للبيت

سولفت كل شي لامي وزوجة اخوية وتواصلت ويا محامي وانطيته الادلة ورحت للسوگ اخذت كاميرات وخلاهن الولد بواجهات المجمع بس حاولت اخليهن ميبينن

لان اني اعرف جهاد من يريد يحقر ويا شخص چان يسولفلي عن شغلة واعرف حقارته كلش زين لهذا حاولت اصير اذكة منه واتصرف قبلة

واستمريت بحياتي واني اشرف على شغل المجمعات وجنه وقمر وياي واخو جنه اما صديق جهاد طردته من المجمعات

خالتي وبنات خالتي اجني مره وحدة لان خجلانات من خذلان جهاد أليه وبنفس الوقت حاولن ارجع ووعدني متتكرر ويطلگ نور ومن هذا الحچي الفارغ

رفضت ورفضت ينفتح هذا الموظوع مرة ثانية وبعدها مشفت وجهن ،، مرت اسبوعين وراح التبليغ لجهاد بس بعد مدفعت للمحامي كومة فلوس حتى يستعجل

وچنت متنازلة عن كل شي گلت للمحامي كل شي ما اريد بس الطلاق واذا ماقبل اخلعة المحامي راح لمعرض السيارات لجهاد وگاله هذا الشي

اني عرفت جهاد عنده شي لان بعد متصل وسگت كل شي اتوقعت بس الشي السواه متوقعته
بعد مغلقنا المجمعات ب 3 الفجر رجعنا اني وجنه وصلتها لبيتها هيه واخوها واني رجعت للبيت

ساعة واتصلو علينا اسمع هوسه وصوت غريب گلبي نغزني چان صوت رجال كبير بلعمر گال انتم اصاب مجمعات .... بلمنصور

گتله اي اتفضل ،، گال الله يعوضكم المجمعات احتركن ماگدرنا نلحك عليهن لان البلاغ اتأخر يله وصل للاطفاء

انصدمت حسيت الدنيا كلها صارت بلون اسود مستحيل لا لا مستحيل لا كلشي اله المجمعات لا لا هذني امانة ايتام امانه عني لا ياربي لا اتوسل ربي لاااااااااااااا لييييييييش يالله لييييش مو اني ما اعترضت على اي شي وتقبلت كل بلاء منك وحمدتك ليش هيج

هيج هوايه عليه هاية امانت ابوية واخوية ،، دخلن امي وزوجة اخوية مرعوبات ويسئلن شبيه وشنو صار

لج يمه جهااااد هذا والله جهااااد لج يمه راحن المجمعات حركهن جهاد لج يمه راحن امانت ابوية واخوية شلون هسه اباوع بوجه جهال اخوية اليتامة التركهم امانه عندي بس اني ضليت ألكم

واني دمرتكم بأيدي بسبب جهاد يمه ابروني الذمة سامحوني عليكم الله سامحوني ما ضنيت جهاد هيج يسوي لان يعرف هذني رزق ايتام

امي وزوجة اخوية ضلن يبچن وحضنني ويخفف عني بكلامهن بس النار شعلت بگلبي مو بلمجمعات جهاد دمرني ودمر اهلي بهذا الشي

لبست حچاب واني بتراك النوم ولابسه جركز البيت واخذت سيارتي ورحت للمجمعات دموعي متوقفن كل شي مدمر وصاير رماد البضاعة كلها محتركة واني چنت مشترية بضاعة جديدة لان العيد الكبير قرب

دخلت گعدت بنص المجمع الارض حارة كلش وبعدة حار المجمع وكله مي صرت اشگي حالي لابوية واخوية

تعالو يابه شوفو شنو صار بيه بعدكم ماعندي سند يابه تعال شوف يقين المدللة جهاد يريد يذلها لان ماعدها سند يحميها

ماعندي سند يدافع عني ماعندي سند يوگف بوجه جهاد ومن يريد يأذيني او يفكر يأذيني راح يحسبله حساب

ليش هيج عفتوني وحدي منو أليه اني وين اروح هسه راحت امانتكم يابه سامحوني ،، صرت ابچي بصوت عالي وبعدين ذكرت الكاميرات

گمت بسرعة من مكاني وشفتهن ماصايرلهن شي رحت للمخزن مقفول المفتاح مو عندي ضل بلبيت
اتصلت على اخو جنه وخطية اجه هذا الحچي ب 5 الفجر گتلة يصعد ينزلي الكاميرات

ورحت للبيت اخذت المفتاح ورجعت للمجمع المخزن جوه كلش اخر شي بلمجمع والباب حديد وصعب يدخل النار منه لان مابي ولا فتحة

دعيت هواي تكون التسجيلات والشاشة مابيهن شي والحمدلله دموع زوجة اخوية واطفالها ودموعي ماراحن هيج دموع يتيم وألها حوبه عند الله

المخزن كل شي مبي وحتى البضاعة الموجودة ماصاير ألها شي بس ما اگدر اسوي شي ولا ارجع المجمعات قبل ما احل مشاكلي ويا جهاد

احتفضت بلتسجيلات وجهاد لحد الان ميعرف بلكاميرات والتسجيلات العندي مأمن عباله المجمع مابي كاميرات اني خليت بداخل المجمع كاميرات حتى اكشف خيانته وبعدها خليت برا المجمع خاف يحاول يأذيني او ياخذني غصب عني من المجمعات او يجي يسوي مشاكل

من شفت التسجلات وسيارة جهاد واضحة بس مغطي وجه هو وصديقة وواضح شلون حركو المجمعات بس تعذبت يله گدرت ارجع اشغل الكاميرات من المي

نقلت البضاعة الضلت بلمخزن للبيت والبضاعة بلمخزن الرجالي هم مصاير الها شي خليتها بلبيت وبديت ارجع ارمم دواخل المجمعات ومن خلصت غلقتهن مافتحتهن

وفكرت هواي وقررت انتقم واطلع حق البضاعة الحركها والترميم السويته بلمجمعات وگلت صار الوقت اخذ حقي واكون سند لنفسي وما انتظر اي احد يگون سند أليه لازم اثبت لجهاد اني قوية مهما يسوي مايهمني  ...........

والله العظيم اجلت مراجعة الدكتور لان ردت اوضح ألكم ببارت اليوم تفاصيل عن طيف وابو مسلم

توقعاتكم شنو راح يصير

لا تنسون التصويت والتعليق كلش مقصرين الرواية لحد الان بس 20 ألف مشاهدة ليش هيج تروحون تعبي

اشوفكم بخير بلبارت القادم