بارت طويل
استمتعوا 🤍
گالت وين صافن؟
گلت بعيونچ
اگول شلون عايش چنت من دونچ
.
.
.
خديجة
انصدمت من امي گالت شاهين راح يعقد ! وعليمن ؟ على وحده بس الله يعلم منين جاية و شنو غايتها ؟!!
خلي اتصل على فهد اشوف شلون نگدر نتصرف
خديجة: دجاوب مدكولي وينك ليش تنطي رفض
خلي ارجع اتصل عليه لحد ما يجاوب
فهد: خديجة تتصل انطيها رفض بالمحاضرة اني وهيه مستمره تتصل گلت أكيد صاير شي استأذنت من الدكتور وطلعت اجاوب عليها
خديجة: الوو.. ها فهد صباح الخير
فهد: صباح النور شكو صاير شي؟
خديجة : اي طبعا متدري نايم ورجليك بالشمس
فهد: شنو هالحچي ام ادم ؟! احجي شكو طلعت من المحاضرة علمود اجاوبج عبالي شي مهم
خديجة : اي اكيد مهم مستقبل اخوك وسمعة عائلتنا مو مهمات؟
فهد: غير تحچي شكو وتفضها عاااد هسه هالمقدمات على شنو ؟ احچي يمعوده ..
خديجة: اخوك شاهين العود يريد يتزوج هاي البنية الملفيها عدكم واحنه منعرف منين الله ذابها علينا علمود يساعدها ،، بله هذا حچي فهد، انت اخوه تقبل بهذا التصرف شلون ساكت و عايفه يتصرف بكيفه؟
فهد: شذررر؟ !!
خديجة: شذر نذر شمدريني بيها المهم هذا الموضوع لازم ينتهي قبل لا يبدي ،، فهد عمامي و خوالي اذا عرفوا ميصير خير لان البنية منعرف اصلها وفصلها والله وحده يعلم شنو البلاوي اللي راح تجينه من وراها .. ولك مدري شمسويتله لاخوك
فهد: سدي خلي اخابره افتهم منه
خديجة: مو تفتهم منه ، امنعه فهد بأي طريقة لان الناس راح تاكل وجوهنااا.
فهد: استغفر الله ، انتي ليش تحچين ع البنية وتاخذين غيبتها يا ام ادم حطي الله بين عيونچ ، شعرفتي عنها وتحچين عليها بهالشكل حراااام خافي الله .. يلا سدي في أمان الله
خديجة: يااا تسده بوجهي فهيدان وتنطيني محاضرة دينية بسيطة خلي اروح لبيت اهلي اشوفها للمسعدة ما دام الجهال بالمدرسة، اي والله يامن تعب و يامن شگه ويامن على الحاضر لگه
اية..
گاعده بالسنتر ويه البنات بالكلية همه يسولفون واني بغير عالم سارحة وافكر بيه صارله اسبوع ما مر للبيت وبالي يمه شلون اگدر اعرف اخباره بدون محد يحس عليه اووووف المحبة من طرف واحد قاتلة في بعض الاحيان
لأن الحب من يظهر بحياة الانسان يجتاح كل مشاعره و تفكيره ، الحب فد مستعمر قوي يغصبك على افعال او تصرفات بعمرك ما فكرت ممكن تسويها
طول العمر احنه سوا ، عشنا وتربينا سوا ، ما چنت افكر بيه غير ابن عمي واخوية وبس .
لكن ..مرة چنت بصف خامس اعدادي وكلهم ملمومين ببيتنا مسوين عزيمة على رجوع بيبي من الحج بالسلامة والمطبخ مخبوص بالنسوان كلها تحضر للعزيمة و الولد طالعين طابين وصايره هوسة
اني گاعده ع الميز واثرم بالخضار احضر للسلطات وهو واگف منتچي ع الكاونتر ياكل تفاحة ويسولف ويه امي بالصدفة انجرح اصبعي بالسچينة والدم بده يفور
اية: اايييييي ،، إصبعي ماماااا تعالي
هو بسرعه لزم إصبعي وضغط عليه قوي حتى يگطع النزيف اول مره يصير بهالقرب مني قيدني السكوت وظليت بس صافنه عليه
ليث: شوو اشوف ،، گومي شوو گومي ويايه خلي اغسل الدم ،، هو انتي مال عزايم دگعدي واسكتي منريد زلاطة ،، سمرررة ولج سمررررة معقم وقطن ولاصق جروح عالسريع يلاا تحركي
اية: هو يغسل بأيدي ع السنگ واني صافنه بيه اول مره واحد يلزم ايدي والعطر مالته سطرني
اخذ الاسعافات الاولية من سمر وبدا يلف إصبعي قوي يتحرك ويحجي ويه امي وسمر و مخبوص واني بغير عالم سرحانة بيه
ليث: هااا ؟؟ لسه يوجعچ لو راح الالم؟
اية: ... (سكوت)
ليث: اية ؟؟.. مو دا احجي وياج هو جرح بسيط شبيج لا تخافين ماكو شي
اية: ... هااا
ليث: لا تخافين ما راح يبقى أثر جرح بسيط يروح
اية: .. ااأآ .. إي
ليث : هاي شبيج ؟ خوما دايخة ؟
اية: لااا بس شوية لعبت نفسي
ليث : دروحي ارتاحي يلا
و طبطب بإيده على راسي وطلع من المطبخ ومن يومها واني تعلق گلبي بيه انتبه لكل تصرفاته و حركاته ومن حركاته المفضلة يفر بالسبحة على إصبعه ، حافظة كل ملامحه ، اعرف شنو يحب و شنو يكره مثلا يحب السبح والساعات كلش ويكره الچاي ويحب الكهوة ساده
صابرين( صديقة اية) : هااا وين وصلتي بالصفنة ؟؟
اية: ههههه لا ولج دا افكر بشغلة بالبيت
صابرين: يلا صار وقت المحاضرة عيني خلي نفوت
اية: يلا هاي اخر محاضرة والله تعبانه اليوم بس اريد الدوام يخلص حتى ارجع انام
سمر
طالعين بالساحة اني وصديقاتي حاطين جبس وحب شمس وقواطي ببسي و القشبة مشتغلة ناكل ونقشب
مريم( صديقة سمر) : اگولج ما تغاسلتي وياه بعد؟
سمر: هو ظل يدز مسجات واني لبسته ما جاوبت
مريم: احتغمي نفسج لبستيه شنو تغه اخوية بلا زحمة و بصغاحة سمغ انتي كبغتي الموضوع وهو ميسوه
سمر: شكبرت الموضوع مريم الجواب واضح من عنوانه مسويلها تاگ ع رييل بالأنستا وبيه قصيدة لمهند العزاوي هاي مال (خايف اخسرك چنت ) وهيه راده عليه بسمايلات قلوب مفطورة من فطروا راسها گولي آمين ،، يلا فسريلي انتي شنو معناها؟
مريم: اي ميخالف افتهمي منه ميصيغ هيج تگطعين تغه والله يحبچ يولي
سمر: حبته حية ان شاء الله
مريم: ههههههه انچبي انچبي ظلي هيج لحد ما يعوفچ و يغجعلها حتى تغتاحين
سمر: اموته والله ! شنو بكيفه يرجعلها
مريم: لا بكيفج عيني لاعبة بأخوية لعب المگغود
سمر : اخوووج مگرود ؟؟؟ لو اني حظي المصخم خلاني احبه
مريم : يبووو بعد شيخلصنه ومن تتغاضون يصيغ نبي منزل استغفغ الله خليني ساكته
سمر: ايي احسن تسوين فضل😒
...
شاهين
كملت محاضراتي وگاعد بالمكتب فنجان الگهوة كدامي واسحب دخان الچكارة و جمرتها تزيد بالاشتعال مثل گلبي عليها ، هو اللي يشوف عيونها ينعت عت وعلي
بس احس اكو هواي أمور ضامتهن عني وحقها بعدها متعرفني بس لازم اعرف كلشي عنها بأي طريقة حتى لو زواجنا حبر على ورق بس هذا الشي بالنسبة الها لكن اني لاااا الموضوع يختلف بالنسبة الي ما اريدها تضيع من ايدي وافقت على شرطها حتى تقبل لكن اني نيتي وياها يعلم الله صافية مثل برائتها ..
رن الموبايل المتصل فهد
شاهين: هلااا بضلعي ،شلونك حبيبي ؟ ما شفتك الصبح
فهد: حبيبي بخير اذا انت بخير ، طلعت شوية من وقت تريكنا سوا اني و ولد صديقي وبعدين طلعنا للكلية
شاهين: عافيات ، محتاج شي حبيبي؟
فهد: شاهين شنو موضوع هالبنية شذر؟ سمعت تريد تعقد عليها صحيح هذا الكلام؟
شاهين: صحيح خويي
فهد: ليش ؟ شعرفت منها ؟ شنو الاسباب ؟ البنية البارحة اجتنه الشغلة مو طبيعية ...
شاهين : فهودي حبيبي ، البنية عدها مشاكل هواي واستنجدت بيه و اني انطيتها كلمة ولازم احميها من الكل
فهد : منو الكل قصدك؟
شاهين : اي شخص يحاول يمسها ولو بكلمة بلا أستثناء
فهد: شاهييين .. انت حبيتها؟ لو شنو ؟؟
شاهين: فهد هسه هذا الحجي مو وكته نگعد وجه لوجه ونسولف تمام ؟ وحضر نفسك انت شاهد ع العقد.
فهد : انت فكرت بالموضوع زين بالنهاية البنية احنا منعرفها وخاف تصيرلك مشاكل وبعدين لـ...
شاهين: نحجي بعدين مو مال بالتلفون
فهد : الله يقدم اللي بيه الخير ، في امان الله
شاهين: الله وياك
خلي اتصل على ابن عمي و حزام ظهري ليث افهمه بالشغلة كلها وهمين حتى يشهد على العقد ويه فهد
ليث : لك شگد شايف مخابيل مثلك ما شايف ههههه يلااا انتم السابقون و نحن اللاحقون بلكت الله تنفك الچبسة
شاهين: هو مو صوجك صوجي اللي اريدك تشهد ع العقد
ليث: اسمع ما دام تريديني اشهد على هذا العقد هذا شاربي مو عليه اذا ما طلع الموضوع بيه ( إنَّ و اخواتها ) كلهن خوووش ... انت طامس بالحب اخوي هههههه
شاهين : أرعن متصيرلك چارة ديلا ولّي ... اسمع لا تتأخر
ليث: (يغني) : وطااااير بحبچ طاير .. يا حلـوة يأم ظفاااير
وبحالي مدري شصـ...
شاهين: سده بوجهه يضحك
...
خديجة : يمه لو مهما تكون مشاكلها احنه شنو علاقتنا ؟
ام شاهين: حبيبة وداعتج اني ما راضية بس شسوي لأخوج شو هذا نام وگعد گال راح اجيب السيد و نعقد اني و البنية
خديجة: يمه تره الموضوع مو خالي! خاف تطلع البنية ... استغفر الله من ذنبها
ام شاهين : لا يمه لااا حبيبة لاتحجين هالشكل انت هم عندج بنية ومترضيلها هذا الكلام ، ثانياً البنية يتيمة و تكسر الخاطر
خديجة : وينها هيه مختفية لسه ما شفتها
ام شاهين: بغرفة البنات فوگ تستحي تظل گاعده هنا
خديجة : اكل ومرعى وقلة صنعة على الاقل تساعدكم
ام شاهين: لا خطية گالت اساعدكم اني ما قبلت يمه
خديجة( بصوت عالي): يمممه شبيج كل ما حجيت حجاية تدافعيلها خييير شو إجت البارحة حطتكم بجيبها !!!!
ام شاهين: اشششش ولج صوتج عيب لا تسمع شجاج
خديجة: و متسمع خايفة منها عشتووو!
شذر : نزلت جوه اريد اشرب مي و همين ضجت گاعده وحدي فوگ گلت انزل اساعد خالة بأي شي ما متعوده اگعد كلشي ما اسوي وچان اسمع وحده تحجي عليه بالمطبخ بعصبية ومحترگ دمها ما اهتميت الصراحة لكلامها لان بالنسبة الي موضوع العقد اللي راح يصير هو مجرد خلاص الي من مشاكلي و درع حماية من عمي لا اكثر وگلت همه بعدين راح يتفهمون هاي الحقيقة، صحت بصوت عالي گلت حتى ميعرفون سمعت شي
شذر: خاااله خاااله
ام شاهين: أإا .. هاي شنو شذر احنه مو اتفقنا تصيحلي يمه حالج من حال البنات
شذر(بإبتسامة) : نسيت والله اعذريني يمه وانداريت على البنية اللي چانت تحجي عليه وسلمت عليها
ام شاهين : هاي بنتي الچبيرة أُم أدم أكبر من شاهين متزوجة و عدها ولد و بنية
شذر : يا اهلا وسهلا تشرفت
خديجة ( بغرور) : هلا بيج
ام شاهين : يمه شذرة البنات والولد على وصول من دواماتهم خلينا نحضر السفرة لان وره الغدا نحضر للعقد حبيبة
شذر : حسيت گلبي وگع بالگاع من جابت طاري العقد راح اربط نفسي بشخص ما اعرفه في سبيل اخلص من الظلم اللي عايشته
شذر: صار يمه
ام شاهين: وانتي يمه خديجة روحي لبيتج زلمتچ وجهالج صار وكت رجعتهم حتى تحضريلهم لگمة ياكلوها
خديجة: يمه تره اني ما راح احضر بالعقد لا تزعلون لان ما راضية اي ليش بعدين تعتبون الصراحة حلوة
ام شاهين: براحتج يمه اصلا هيه بيناتنا و مراح تطلع السالفة
اسمعهم يحجون واسوي نفسي دا اشرب مي بس فهمت أخته الجبيرة ما راضية وخفت تسويلي مشاكل وعدت نفسي ابتعد عنها كل البعد الحذر واجب بالنهاية.
ام اسعد : الحجية تريدچ بغرفتها بنيتي شذر
رحت لغرفة الحجية و راسي مليان اسئلة شتريد مني ؟
و ليش صاحتني؟ خاف تريد احجي قصتي ؟ اذا كلش عود اكوللها خلي شاهين يحجيلج احسن اوووف ياربي بيش ورطت نفسي انييي 😞
دگيت باب غرفتها و سمحتلي بالدخول اول ما طبيت اشتميت عطر عبالك بخور فد ريحة مميزة كلش مليانة حنية وهيه گاعده على سريرها ويمها صندوق خشبي قديم وكلش حلو اشرتلي بايدها ع السرير حتى اگعد يمها توجهت وسويت مثل رادت
الحجية: ولج يمه شذرة اسمعي مني هذا صگر تعب بحياته حيل گضاها ركض بركض كلشي ما شايف من دنيته حاير بأخوته و خواته ومشاكل ولد عمه هواااي يذكرني بجده الله يرحمه نفس شكله واطباعه متشوفين اصيحه صگر ع اسم جده چان زلمة الزين يبيض الوجه
اريد منچ تسعدينه يا يمه و تريحين گلبه و شوفي ،، شغلتين لا تسويهن وياه الاولى لا تعاندين سمه وموته العناد تره يصير مُرّ وياج علگم والثانية لا تضمين عليه شي ابد ديري بالج يسمع شغلة عنچ من غيرچ شلون ما تكون هاي الشغلة چبيرة لا تضمين ابد يمه فهمتي؟؟
شذر: بيبي تره هذا مجرد عقد يعني علمود يخلصني من مشكلتي لا اكثر ولا اقل يعني مو من صدگ راح نتزوج چذب
الحجية: ولج چذبيش يمگموعه انتي الحجي وياج عبث اذن من طين واذن من عجين ، ! شذرررة ديري بالج على وليدي حتى اني هم اداريج واحبچ
شذر: صار بيبي صار( ما اريد اضوجها هيه فرحانه عبالها حفيدها حيتزوج من صدگ متدري السالفة شنو)
الحجية: هاچ يمه البسي هذا هديتي الج
قدمتلي معصم ذهب و بيه احجار هواي ملونه كلش حلو وموديله عبالك أثري قديم كلش حبيته بس استحيت اخذه
شذر : لااا بيبي تسلمين وما قصرتي واعتبري هديتج وصلت
الحجية: دلزمييي شنو هالعناد هاي عود هستوني وصيتها عوفي العناد هنيالي اي والله ، البسي شو گدامي دا اشوفه عليچ يلا
شذر : لبسته طلع شوية چبير ينزل على كف ايدي
الحجية: اي كلش حلو بالعافية يمه بس ينرادلج شويه لحمة حتى يصير على گدچ مضبوط
بست راسها وتشكرت منها وطلعت و خديجة رجعت لبيتها وصار الغدا تغدينا و صبيت چاي و وزعته عليهم ما عدا عمو ابو شاهين دخل لغرفته ينام و اني كعدت يم البنات يسولفون عن يومهم والدراسة واني صافنه على سوالفهم سمعته يصيح اسمي و چان كلها تسكت ..
شاهين: شذر .. بلا زحمة عليج صبيلي استكان چاي ثاني اني بالحديقة
حسيت كلهم يباوعون عليه گمت صبيت الچاي وانطيته لسمر حتى تاخذه اله چان ادكول ما دام گلج الج يعني عنده حچي وياج روحيله حبيبتي
اخذت الچاي وطلعت وراه عدهم گعده كلش حلوة بالحديقة مسقفة بيها ميز وداير مداير الميز مرجوحة و قنفات ، حطيت الچاي على الميز گدامه هو يشرب چگارة
شذر: تفضل .. تحتاج شي بعد ؟ اجيبلك شي؟
گال اتفضلي اگعدي واشرلي ع القنفة بجانبه اني گعدت ع القنفة المقابيله بيني وبينه الميز وانتظرت اسمع شيريد
شاهين: چان رحتي گعدتي بنهاية الحديقة ليش مكلفة نفسچ؟؟!
شذر: هااا ... لااا مو ما اريد ازعجك حتى تاخذ راحتك
شاهين: تعالي گعدي هنا قريب عليه يا أبويه عندي حچايتين وياج
شذر: اي احچي اسمعك
شاهين(بقلة صبر) : انتي ليش تعاندين گومي اگعدي يمي شكم مره أعيد الحچاية
شذر (خفت حسيته صار عصبي بس ميريد يبين بس بنفس الوكت ما اريد اگعد بصفه قربه مني يخربط أفكاري ويشوشني بس شلون اشرحله هذا الشي) گمت وگعدت على نهاية القنفة اللي گاعد بيها هو ودنگت راسي
شاهين: عدها عناد مو طبيعي واني أكره هذا الطبع بس بنفس الوقت عاذرها أكيد عدها أسبابها شوية شوية وياها وتتغير ان شاءالله
شاهين: خلي راسچ مرفوع دائماً لا تنزليه ابد لكائناً من يكون متفقين ؟؟
شذر : متفقين ( ورفعت راسي بس ما اباوع بعيونه)
شاهين: شوفي صح اللي راح يصير بيناتنا هو مجرد حبر على ورق مثل ما طلبتي وايضا وسيلة حتى اگدر اساعدج تتخلصين من الضغوطات اللي بحياتچ لكن وخلي خطين جوه كلمة لكن انتي تعتبرين مرتي و مسجلة على اسمي يعني تصرفاتج و كل امورج تعود عليه مسؤوليتج كلها برگبتي واني سعيد وممنون بهذه المسؤولية بس عندي طلبات بسيطة اتمنى تنفذيها بطيب خاطر مو بإجبار لان تهمني ان تسويها ممكن؟
شذر: اكيد اذا اگدر انفذهم وبدون نقاش مو كافي راح تساعدني
شاهين: شوفي هاي اول شي .. ابداً ما اريدج تحسين بالمنية لان اني اقترحت هذا الحل و مستوعب كل العواقب مو مجبور ولا مضطر بالعكس اني اللي اشكرج لان خليتي ثقتچ بيه و بكلامي و وافقتي على طلبي ، ثانياً اتمنى منچ تلتزمين بالحجاب ما اريد شعرج يبين لا گصيبة و لا زلف هذا الشي مهم عندي ، ثالثاً والاهم اريدج تسولفيلي هسه اي موقف مهم صار بحياتج تحسين بيه ممكن يغيير من قراري بالارتباط منچ و أوعدچ وعد وكلام زلم ما تتغير نظرتي تجاهج او قراري بالارتباط و رجائي ان ما تكتمين عني اي شي يخصج
شذر: ( فكرت احجي له كلشي بس استحيت كلش وتلعثمت ما عرفت شنو اجاوبه هو ما طلب غير حقه بس شلون اشرحله ومراح تتغير نظرته تجاهي مستحيييل ماكو رجال يتقبل وحده مثلي تربت بعائلة تفضل الفلوس على كلشي)
شذر: شاهين ان شاء الله احاول التزم بالحجاب مثل ما تريد رغم اني لبسته غصباً عني مرت عمي جبرتني بوقتها
شاهين: اني اشكرچ جداً وبعد
شذر: اني ما ضامه عليك شي حجيتلك كل الامور المهمة بحياتي
شاهين (لاحظت من جاوبتني وكالت ما ضامه شي توترت وبدت تسوي حركتها المعتادة تگرص برجلها )
شذر ( من جاوبته على سؤاله حرك ايده على شواربه ولحيته بطريقة عاموديه صعودا و نزولا كأنما ديمشطهم و حسيته يفكر بجوابي ارتبكت كلش و اكتسبت خدودي حرارة الخجل من نفسي لان كذبت عليه حسيت بروحي سويت ذنب عظيم)
شاهين: شذر.. هذا اخر جواب عندچ ؟ وخلي ببالچ اني ما انطي فرصة مرتين لان الفرصة تجي مرة وحده فاهمة عليه
شذر( زاد ارتباكي بطريقة خلتني انقل نظري لكلشي موجود گدامي غير عيونه) و جاوبته : اي هذا جوابي ( رغم اعتراض ايدي برجفة قوية جبرتني اقيدها بأيدي الثانية حتى أكتم اعتراضها وثورتها على كذبي)
ما چنت ادري هذا كلامي ممكن يعرضني لخسارة كبيرة وهي خسارة شاهين💔
شاهين: هاي هيه لعد ما دام انت متأكده اني اثق بيج.
وباوعت لعيونها ابدا ما شالت عينها ومستمرة تگرص بنفسها و كملت كلامي وبلغتها بمقدار المهر ٢٥ مليون معجل و ٥٠ مليون آجل رفضت رفض قاطع و ما اتقبلت هذا الشي فرحت بيها حسيتها مو طماعة ابد و عدها عزة نفس عالية وهاي الصفات من اجمل صفاتها بس فهمتها انه محد ضامن عمره واني اذا صار عليه شي اني ضامن حقها حتى بعدم وجودي بجانبها وگتلها اذا ينتهي العقد بيناتنا بعد ما تنتهي مشاكلها عود لا تطالب بحقوقها و تبريني الذمة حتى اقنعها بقبول المهر بس بداخلي افكر للمستقبل البعيد ما اريد يظل عدها حزن ولو بسيط انه ليش ما سجلي مهر عالي حالي حال البنات اريدها تتباها من يسألوها ومتحس بأي نقص لان هيه تستاهل أكثر الاشياء قيمةً و أثمنها ، شذرة نادرة الوجود والله رزقني بيها أكون جاحد لنعمة الله اذا ما أقدرها
شاهين: ايدچ محلية السوار
شذر( گلبي صار يتراقص بدگات غير منتظمة بسبب مدحه الي) : اشكرك هاي بيبي الله يطول بعمرها انطتنياه هديه
شاهين: تستاهلين الاكثر شذرة ، هذا السوار متوارث من ام جدي الله يرحمه انطته لبيبي بس بيبي ما انطته لأي وحده من چناينها يعني انتي مميزة عدها بعد شتردين ههههه
شذر: ههههه والله فرحتني ما چنت اعرف قصته ( جذبني كلامه من گال اسمي شذره اول مره يگوله بهاي الطريقة)
شاهين( هيه ضحكت واني ضعت وتيهت دربي)
شذر: من رخصتك اروح اني احضر نفسي
شاهين: اخذي راحتچ اني هم اروح اجيب السيد تمام؟
شذر : ان شاء الله
وحضرت نفسي وشاهين جاب السيد وتم العقد وسط ذهولهم لمن سمعوا بقيمة المهر بس محد ناقش و فهد وليث شهدوا على العقد وبعدها حضروا سرير الي بغرفة الحجية و استقريت تقريباً وبعد يومين خالة ام شاهين اخذتني للسوگ واشترتلي ملابس انيقة وحلوة و ما خلت شي ما اشترتلياه كلش چنت فرحانة لان دائماً چانت مرت عمي تنطيني ملابس بناتها القديمة البسهم
بعد مرور اسبوع تقريبا چانت الايام بيها تمر بهدوء وسكينة بدون اي احداث غير الامور الروتينية اندگت باب البيت والجرس بطريقة قوية وسريعة تبعث الخوف والارتباك بالنفوس ، يوسف باوع الكامرات و ركض للطرمة و فهد وشاهين وعمو طلعوا وراه واحنه النسوان ركضنا للمطبخ نشوف شكو؟
يوسف( بصوت عالي) : منوووو لحظة جاييك
فتح الباب وسط ذهولنا وصدمتنا من كمية سيارات الشرطة اللي وگفت بالباب حسيت رجليه صارت خيوط من الهبطة
الضابط: السلام عليكم اخوية، المدعو( شاهين محمد الصگر) متواجد بالبيت حاليا؟؟
شاهين: نعم سيادة الضابط اني شاهين
الضابط: عليك آمر بإلقاء القبض تفضل ويانه!!
انتهى .
حياكم الله شذراتي 🩵
اتمنى ان تنال رضاكم وبأنتظار قراءة ارائكم بالقصة🤍
لا تنسون التصويت حتى اگدر استمر اضغطوا علامة النجمة⭐️