وجهو كان حمر بحال جسمها هي .. عروق رقبتو مزال منفوخين .. كيتنفسو بالجهد و أنفاسهم مخلطين حيت وجهها قريب بزاف لوجهو ..
راكيل: شنو ؟!
كاسيو: ( بيدو شد على رقبتها من اللور ) ماغاديش نڨتلك .. و ماغاديش نخليك تمشي و تخليني .. غاتبقاي معايا .. هنا ..
هاد المرة ماقالهاش بحالا كيطلبها إنما كيعلمها أنها غاتبقا معاه .. بحالا هو خدا القرار و هي ماعندهاش الحق باش ترفضو ..
قال ثلاثة الاحتمالات و ختار بنفسو واحد .. و كان الأسوء بالنسبة ليها .. كانت كتفضل يڨتلها على أنه يخليها تعيش معاه ..
راكيل: علاش ؟
كاسيو: ( كيشوف فعينيها بحالا موضر فيهم ) هادشي لي كنحس بيه دابا .. بغيت نحس بيه ديما ..
راكيل: يعني .. بغيتي تخليني هنا معاك غير باش تحو.. يني ؟
كاسيو: ( بصراحة و بدون تردد ) آه ..
راكيل: إيلا غير على قبل السيكـ.س راك تقدر تجيب وحدة اخرى من غيري ..
كاسيو: No woman feels like you .. ( قرب حط شفايفو على ديالها و همس و هو كيبوسها بشوية ) no fcking one tastes like you ..
" ماغانحس مع حتى وحدة كيفما كنحس معاك .. و حتى وحدة ماعندها بحال مذاقك .. "
تجاوبات معاه فالبوسة ماشي حيت باغية تبوسو و لكن حيت محتاجة وقت باش تفكر فجواب .. ملي لقاتو فصلات البوسة و شافت فعينيه ..
راكيل: و لكن أنا .. مانقدرش نعيش معاك و نتا كتڨتل الناس ..
كاسيو: ( حرك راسو بلا ) أنا مكنڨتلش الناس ..
راكيل: و شكون هادوك لي فالفريكو لفوق ؟
كاسيو: هادوك عائلتي .. ( وسعات عينيها ) غير بوحدهم لي ڨتلت .. و ماناوي نڨتل حتى واحد من غيرهم .. كنقسم ليك ..
صدمها .. الكلام هرب منها .. و هو مال كيبوس عنقها بشوية عكس كيف كان كيدير قبل .. غمضات عينيها كتتحكم فراسها ماتنهارش بسبب شنو سمعات عاد نطقات ..
راكيل: و علاش ؟ ( هز راسو شوية شاف فيها و هي كملات بشوية ) علاش ڨتلتيهم ؟
بقات كتشوف فعينيه .. و كيبانو ليها كيرجعو لطبيعتهم .. للبرودة و الظلام .. شعر جسمها وقف و حلقها نشف من منظرهم هاكاك و كيفاش فلحظة تبدلو .. تراجع بشوية حتى تلاقا ظهرو بالفوتوي و حط عليه حتى راسو .. كيشوف فيها و لكن عقلو مابقاش مركز معاها ..
" علاش ڨتلتيهم ؟ "
سؤالها بدا كيضور فراسو مع بزاف ديال الأصوات آخرين .. راجل صوتو خشن و ثقييل بالشراب كيغوت و كيسب .. صوت امرأة كتبكي بالجهد و كتغوت لشي واحد يعتقها .. صوت ماعن و طوابل و أثاث كيتهرس .. صوت بنت مراهقة كتبكي بالجهد و كتغوت بربعة الكلمات بالإيطالية " بابا .. عافاك .. بعد منها " .. صوت ولد كيسب و كيغوت .. الأصوات كيتجهدو .. و ذكريات كيدوزو قدام عينيه .. خصوصا وحدة .. مطبوعة فعقلو .. واضحة بتفاصيلها كلهم ..
ماماه طايحة فالأرض .. بفستانها البيج المفضل لي مزوق بوردات غوز صغار .. نيفها و فمها كينزفو .. و باباه لي راجع للدار بالليل سكرااان بعدما خسر فلوسو كاملين فالقمر تاني .. واقف حداها كيضرپها بالركالي و هي كتبكي و كتترجاه باش يحبس ..
" ڨحببة .. ولييتييي كتخبيي عليااا الفلووووس !!! "
خوه الصغير .. طفل فعمرو 8 سنين .. ببيجامة دالنعاس كحلة مزوقة بدببة قطبيين .. جاي كيجري كيجر فباباه باش يبعدو على مو و هو كيبكي و كيغوت " بععدد من مااامااا .."
كيشوف كيفاش باباه دفعو حتى طاح حداها .. حيد السمطة من سروالو و بدا كيضرپهم بجوج .. كيشوف ماماه كيفاش حضنات على خوه مخبياه كتحميه و كتهز الدقات كاملين و هي كتغوت " باراكة عافااك .. " و كتبكي .. و فنفس اللحظة كيسمع صوت بكا ختو الرضيعة جاي من جهة بيت النعاس ..
كيتفكر راسو و هو ولد 11 عام تحت ناموسيتو فالأرض .. متكي على كرشو .. جامع يديه قدامو و حاط عليهم ذقنو .. حداه الطوموبيل اللعبة ديالو .. كيشوف فهاداك المشهد من الباب لي خلاه خوه محلول ملي مشا يعاون ماماهم .. عينيه خاويين مافيهم لا ألم لا حزن .. فراغ كبير و برود مكيليقوش بملامحو الطفولية .. مشهد كان كيشوفو من نهار حل عينيه فالدنيا .. و بقا كيشوفو حياتو كلها .. حتى قرر قبل خمس شهور يدير ليه نهاية .. يحبس ألمهم هوما و غواتهم مرة وحدة .. و للأبد ..
راكيل: ( ملي تعطل باش يجاوب نطقات بشوية ) كاسيو ..
" كنت باغي نڨتل بادري بوحدو و نهني عائلتي منو .. و لكن عرفت بلي واخا يمو.ت حتى حاجة ماغادي تسالي .. غايبقا حي فعقولهم و محرم عليهم يعيشو .. كان خاصهم يمو.تو باش يرتاحو .. داكشي علاش ڨتلتهم .. عاونتهم باش يرتاحو .. هنيتهم من الضرپ .. و الصداع .. و المشاكيل .. "
هادو هوما الكلمات لي وجد باش يقول .. و لكن ملي فرق شفايفو و حرك لسانو خرجات هضرة أخرى ..
كاسيو: ( بصوت منخفض ) حيت فيهم الصداع ..
هزات حاجبها .. و ابتسامة جانبية بانت على شفايفو .. مال عندها كيبوس فعنقها و يدوز عليه لسانو .. و كيهضر وسط هادشي بنفس الصوت المنخفض ..
كاسيو: بادري .. مادري .. خويا .. و ختي .. كلهم كان فيهم الصداع ..
هز راسو شوية تقابل معاها .. عينيه سكرانين بيها .. كيهضر بهدوء بحالا كيقول حوايج عاديين و هي قلبها كيتجهدو دقاتو ..
كاسيو: كانو كيغوتو بزاف .. كيقلقوني ..
راكيل: ( بلعات ريقها ) و إيلا .. غوت حتى أنا ؟ غاتڨتلني ؟؟
كاسيو: ( ابتسامتو توسعات حتى بانو نيابو .. رجع اللور تكى بظهرو و راسو على الفوتوي ) نتي غاتغوتي فحالة وحدة .. ( حط يديه على مؤخرتها و عصرها و هي شهقات بشوية و مالت عندو كثر حتى قرب وجهها من وجهو و يديها على كتافو ) ملي نكون كنحو..يك .. ( حط شفايفو على ديالها و نطق بهمس ) و هاد الغوات منك نتي .. كيعجبني ..
راكيل: ( بعدات راسها شوية و بان الانزعاج فوجهو حيت كان باغي يبوسها ) و علاش كتاكلهم ؟
سؤالها كان مغلف بأمل زائف .. تمنات يقول ليها بلي ماكياكلهمش و يكون شكها خاطئ .. و لكن هو ترخاو ملامحو و بان شبح ابتسامة على وجهو ..
كاسيو: فاللول كنت باغي ندفنهم .. و لكن فكرت نجرب .. بغيت نعرف واش بصح لحم البشر بنين كيف كيقولو ولا غير كدوب ..
حبسات راسها بزز ما تتقياش على وجهو .. زمات شفايفها و زيرات على سنانها و عينيها غرغرو .. كلها رعشات ..
كاسيو: صدق tasty ( بنين ) .. داكشي علاش قطعتهم و حطيتهم فالفريكو لفوق .. و قررت ناكلهم ..
راكيل: ( شعور التقزز كيكبر فيها .. و هضرتو فهادشي بهاديك الطريقة الباردة كتخليها تزيد تخاف ) يعني ... ( زيرات على كتافو بلاما تحس ) ملي قلتي ليا غاتاكلني كنتي كتقصدها بالمعنى الحرفي !
كاسيو: ( حرك راسو بلا بشوية ) لا .. نتي لا .. ( كيزيد يزير على مؤخرتها و كينطق بشوية ) هوما كليتهم ميتين .. أما نتي .. ( عينيه لمعو كيشوف فعينيها الخايفين ) غانبقا ديما ناكلك حية ..
شافت للجنب و معدتها كتزيد تتقلب .. و هو مال كيبوس كتفها .. و إبهام يدو اللور كان كيدوز بشوية على الوشام لي عندها فوق مؤخرتها تماما .. بخط ملتوي .. ضايرة بيه أفعى سوداء كبيرة و ورود حمراء عامرة بالشوك ..
" I like it DIRTY .. That's my guilty PLEASURE .."
الوشام السري ديالها و لي قراه عشرات المرات هاديك الليلة ملي كانت قدامو عر.. يانة على يديها و رجليها و هو وراها كيح..ويها ..
كاسيو: ( خفض صوتو كيهمس حدا ودنها ) غاتزوجي بيا .. و غاتولدي معايا أ راكيل .. غانعيشو هنا أنا و نتي و ولادنا .. و ماتخافيش .. أنا ماشي سكايري و قمار .. ماغاديش نضرپك كيفما كان بادري كيضرپ مادري .. نتي ماغاديش تبكي .. داكشي علاش .. حتى واحد ماغادي يمو..ت .. كنواعدك بهادشي ..
خدات نفس عمييق خرج كيرعش .. حسات براسها مابقاتش قادرة تستحمل .. شافت جهتو و نطقات ..
راكيل: بغيت .. ندوش ..
هز راسو بشوية و تقابل معاها .. عينيه فعينيها .. كتحس بيه كيقراها .. بحالا غايعرف فاش كتفكر و هادشي كيزيد يخوفها ..
طلق منها بشوية و حرك راسو بواخا .. ناضت من فوقو و هي حاسة بالألم تحت منها .. هزات حوايجو لي كانت لابسة و مشات قاصدة الدروج و هو مراقبها من اللور .. جسمها كان فقمة جمالو و جاذبيتو بالنسبة ليه .. موسخ بالغيس و العرق و الريق و المني ديالو .. مغطي كلو بعلامات حمراء عارفهم غايبقاو مطراسيين فيه لأيام ..
طلعات بأقصى سرعة تقدر عليها بحكم رجليها فاشليين .. ذاتها كلها فاشلة .. دخلات للحمام لي دوشات فيه فاللول و سدات عليها من لداخل .. لاحت هادوك الحوايج فالأرض و تخشات تحت الدوش و طلقات الما باااارد .. كانت محتاااجة تصحصح و توعى .. كانت محتاجة جسمها و عقلها يتوگضو .. ملي كملات خرجات من الدوش و هزات الفوطة تنشفات .. من بعد هزات حوايجها لي جات بيهم و حيداتهم قبل أول دوش .. لبساتهم .. كانو تماك حتى تقاشرها و سبرديلتها و حتى هوما لبساتهم ..
خرجات من الدوش و هي مقررة شنو غاتدير .. شافت فهاداك الكولوار مابانش ليها الأثر ديالو .. تحركات بشووووية عليها و بدات هابطة الدروج بلاااا حس .. كتسمع صوت الموسيقى منخفض جاي من التورن ديسك .. و بان ليها هو واقف ورا الشرجم .. وراه كانت الطابلة عليها قرعة النبيذ و هو كان هاز كاس فيدو .. كيشوف من الزاج لبرا .. كان كيبان ساااهي ..
شافت على الطابلة كان مزال محطوط تيليفونها و حتى سوارتو !! بلعات ريقها و شكرات الرب حيت الموسيقى خدامة و يمكن هادشي مايخليهش يسمع خطواتها إيلا قربات ليه .. كانت ناوية تتسنى الفرصة المناسبة باش تحاول تهرب و لكن عرفات بلي هي لي خاصها تصنع هاديك الفرصة .. عرفات بلي خاصها تتحرك و تدير شي حاجة إيلا بغات تعتق راسها .. كانت كتفكر تقبل العرض ديالو و تبقى معاه و تسايرو حتى تعرف كيفاش تدير تهرب .. و لكن راجل بحالو ڨتل عائلتو و كياكلهم مستحيل تيق فيه .. فأي لحظة ممكن يتقلب عليها و يڨتلها .. داكشي علاش كان خااصها تتصرف قبلما يوقع هادشي ..
بدات كتتمشى بشووووية لجهتو و قلبها كيضرب بالجججهد .. شعرها الفازگ مفزگ حتى حوايجها و هي كتحس براسها عرقانة .. و كتشجع راسها باش تكمل و ماتتراجعش ..
كاسيو كان ساهي كيتفرج فالشتا لي كتصب برا و كيسمع للموسيقى المفضلة عندو .. كيفكر فيها هي ..
فهادشي لي كيدير .. مانادمش و هو متأكد من القرار لي خدا .. باغيها تبقا معاه بأي ثمن .. كانت بحال شي مخدر جديد اكتشفو .. دمنو من أول تجربة و ماباغيش يحبسو .. كان باغيها تبقا معاه و يتزوج بيها و يدير معاها عائلة .. عائلة !! ماعمرو فكر يدير عائلة .. كانت هادي أول مرة و ماقادرش يستوعب كيفاش بنت يالاه تلاقا بيها خلاتو يفكر بهاديك الطريقة .. هو كان معقد من هاد الناحية و ماعمرو بغا يرتبط بشي وحدة و يدير معاها ولاد .. حيت كان فأعماقو خايف شي نهار يولي بحال باه ..
راكيل خربقات ليه وراقو .. خلاتو ينسى الحذر ديالو لدرجة أنه غلط و نسا الساروت فالحمام ملي يالاه دخلها لدارو .. نسا شنو مخبي تماك .. و لكن الغريب فالموضوع هو أنه من بعدما ذاقها و مارس معاها ولا هو لي باغيها تعرف !! و واخا يعيا يكدب على راسو و يخبي .. الحقيقة هي أنه عجبو الحال ملي عرفات !! حيت كان محتاج لسبب باش يربطها معاه و ماكانش لاقيه .. كان محتاج سبب يقنع بيه راسو .. و أنها تعرف السر ديالو كان أحسن سبب .. كون ماعرفاتوش كان غايكون مضطر يسمع لعقلو و يخليها تمشي فحالها و تكمل حياتها بعيد عليه ..
من اللحظة لي تلاقاو فيها و هي كتلعب ليه بعقلو بطريقة غريبة مافهمهاش .. شخصيتها الحمقة و الجريئة هي لي خلات كلشي معاها يكون مميز .. حتى الچنس .. مافاهم والو .. و ماباغيش يفهم حيت ماشي مهم بالنسبة ليه .. المهم هو راكيل تبقا معاه و حداه .. تولي مراتو .. ديالو ..
سمع شي صوت منخفض و حس بالحركة وراه قاطعو أفكارو .. و مع الضورة كلشي وقع بالزربة .. ضرپاتو راكيل بقرعة النبيذ للراس بالجهد و هي كتغوووت .. و طاح الكاس من يدو للأرض تشتت و تزلع النبيذ حتى ترش على الحيط !!
كاسيو: ( بشوية مزير على سنانو ) Cazzø !!
وسعات عينيها كيرعشو ملي ماطاحش ! كيبان ليها غير ضور راسو للجنب .. شد على راسو و هو مغطي بالنبيذ الأحمر و قطرات من الدم الغامق ..
تراجعات هي خطوة اللور كتشوف فيه مصدومة و قلبها فحلقها مصعب عليها تبلع ولا تتنفس .. توقعات هاديك الضرپة غاتطيحو ولا تڨتلو ولا على الأقل تخليه يفقد الوعي !
و لكن هو كان مزال واقف .. كيبان ليها هبط يدو لي كان شاد بيها بلاصة الضرپة و بجوج شافو فيها .. حمرا بالدم !! رجعات شافت فوجهو .. فملامحو لي مزال هادئة .. شعرو فازگ بحال حوايجو بالنبيذ الأحمر .. و خطوط من الدم نازلين من جنب جبهتو غاديين لذقنو ..
كاسيو: ( شاف فيها و نطق بهدوء ) علاش ؟ همم ؟ علاش ضرپتيني ؟
بدا كيقرب منها .. هزات الكرسي لي حداها واخا ثقيل باش تضرپو و لكن هو شدو منها و خبطو مع الحيط حتى تشخشخ و هي غوتات ..
كاسيو: أنا باغيك تعيشي .. و لكن نتي .. ( بدا كيتعصب .. و لكن مكيرفعش صوتو .. مزال بنفس النبرة المنخفضة .. ) كيبان ليا .. باغية تمو.تي ..
راكيل: ( غوتات ) بااغية نمشي فحاالييي ..
هاربة منو و كتزف عليه بأي ديكور جا قدامها .. بعض المرات كتصيبو و بعض المرات كيتفادا الضرپة و تجي فالحيط ولا فالأرض ..
كاسيو: راك غير كتعيي فراسك .. ماعندك فين تهربي مني ..
الدم مغطي نص وجهو و حتى عنقو و بدا كينتشر فالتيشورت ديالو لكحل من لفوق .. كان كيخلع خصوصا مع نظرات عينيه المظلمين و الابتسامة لي مكتعرفهاش إيمتا كتترسم على وجهو و إيمتا كتختفي !!
هزات واحد الڤاز بغات تضرپو بيه و لكن هو كان أسرع منها .. شد ذراعها و خدا منها الڤاز زف بيه للأرض تهرس .. و هز يدو للفوق صرفقها حتى طاحت للأرض بالجهد .. صفعة وحدة منو كانت كافية توضرها .. طعم الدم كان قوي ففمها .. عنقها كيحرقها .. خدها كيضرها .. و هو كيضور بيها بشوية بحال شي مفترس كيضور بالفريسة ديالو .. كيلعب بيها و كيرعبها نفسيا قبلما ياكلها ..
كاسيو: علاش راسك قاسح ؟ علاش كتديري غير داكشي لي ماخاصكش تديري و كتطيحي راسك فالمشاكيل ؟ ( مد يدو قدامو كيشوف فيها بغضب كبير ) ضرپتك .. نتي لي خليتيني نضرررپك .. ( شاف فيها هي لي طايحة قدامو .. زير على قبضة يدو و على سنانو و قرن حجبانو بالجهد ) بغيتي ترجعيني بحالو أ راكيل ؟
صوتو كان كيوصلها ثقيل حيت داخت .. و لكن كتسمعو .. شي حاجة كانت كتلمع فطرف عينها .. ملي ضورات راسها تشوف بان ليها الموس .. نفس الموس لي كان شاد فيدو و هددها يقطع ليها بيه حوايجها .. كان مليوح فالأرض تحت الطابلة .. توسع بؤبؤ عينيها ملي شافتو .. و تدفق الأدرينالين تاني فعروقها .. بحالا لقات تذكرة النجاة ديالها !
مدات ليه يدها بغات تهزو و قبلما توصل ليه حسات بيه شد شعرها كيگعدها ..
راكيل: اااي ...
كانت كتتألم بالجهد .. جسمها كلللو كيضرها و هو مزال ما ضرپهاش بصح .. مزال مانواش يعذبها و يڨتلها .. هادشي كامل و هو يالاه بدا .. كتتخيل حجم الألم النفسي و الجسدي لي غايخليها تذوق قبلما يرحمها و يڨتلها ؟ هادشي إيلا كانت عندو شوية الرحمة و ما قررش يعذبها حياتها كلها حتى تمو..ت بخاطرها !
وقفها قادها معاه و تحنى عندها بوجهو لي حمار بالدم .. قابل وجهها معاه و بقا شاد فشعرها .. كان مزير على سنانو و دمو سخوون هابط من الجرح لي فراسو و لي كيحرقو .. و المنظر ديالو هاكاك كان بصح كيخلع .. كثر من أي وقت آخر ..
كاسيو: علاش ماباغاش تبقاي معايا ؟
راكيل: ( يد شادة بيها على التيشورت جهة صدرو و يد على يدو فشعرها ) حيت نتا .. مريييض ..
كاسيو: ( غوت ) و شنووو المشكلل ؟؟؟؟ ( خفض صوتو و ميل راسو ) حتى نتي راك مريضة .. بحالي ..
راكيل: ( قارنة حجبانها فيه ) أنا مكنڨتلش الناس ..
كاسيو: ولكن كنتي باغية تڨتليني ..
راكيل: ( زيرات على سنانها كتشوف فعينيه بانفعال كبير ... كتحرك راسها بلا ) لا ماشي بحالك .. أنا إيلا ڨتلتك غانكون كنڨتلك حيت كندافع على راسي .. أما نتااااا .. ( بدات كتغوت ) ڨتلتي عااائلتك كللهااا غيييير حييت مرييييض .. نتاا مااشي بششر ... نتااا ووححش ..
كاسيو: اااااه .. ( تخطفات من الغوتة لي دار .. زاد زير على راسها و زاد قرب ليها .. شد ذقنها بيدو لاخرة مزير عليه .. و رجع خفض صوتو كينطق مورك على الحروف ) وحش .. و هاد الوحش .. بغااك .. وليتي ديالو .. ماغاديش يخليك تبعدي عليه .. ماغاديش تهربي منو .. و غاتبقاي عايشة معاه حتى تمو.تي نتي .. ولا يمو.ت هو ..
هضرتو خلات جسمها يدير ردة فعل بلاما تخطط ليها هي ولا تفكر فيها .. و حيت ماتوقعهاش هو ماقدرش يحبسها .. هزات رجلها بالجهد و ضرپاتو لحجرو بقوتها كلللها .. توسعو عينيه بالجهد و تحبسات النفس ديالو .. طلقها و تحنى شاد عليه مزير كيتألم .. و هي استغلت الفرصة و مشات كتجررري تحنات تحت الطابلة هزات هاداك الموس من الأرض .. ماجات فين توقف حتى كان شدها تاني من شعرها .. و مع الضورة مع وجهات الموس بقوتها كلها باش تطـ.عنو ! و تااني كان أسرع منها و شد بيدو الطرف الحاد من الموس قبلما يقيس صدرو !!
وسعات عينيها كتشهق و الدم كيسيل بالجهد من يدو ليدها فالطرف لاخر من الموس .. سخون و لزج .. طلقات الموس كتغوت و كتترعد من الصدمة و الخوف و هو لاح الموس بالجهد عامر بدمو للأرض .. و بنفس اليد لي كتنزف جيفها من عنقها بالجهد و بقا غادي بيها حتى لسقها مع الحيط جنب المدفأة !!
قارن حجبانو و مزييير على سنانو كيفما مزير على رقبتها هي .. عينيها واسعين و النفس مقطوعة عليها كتحس براسها كتمو..ت !!!
كاسيو: ( كيهضر بين سنانو مورك على الحروف ) إيلا مابغيتيش تعيشي معايا .. غاتمو..تي .. ماغانخليكش تمشي أ راكيل ..
راكيل: ( كتقمش و تضرپ فذراعو الصلبة بدون نتيجة ) ط..طل..ق ...ط....
ماقادراش تهضر و يدو كتزيد تزير عليها .. حاسة بلي غايطرطق عنقها بيدو و غايكون هادا هو سبب مو.تها ماشي نقص الأكسيجين .. هبطات يديها كتقيس الحيط فجنابها بحالا كتقلب على باش تفك راسها .. حسات براسها قيسات شي حاجة قاسحة و باااردة .. كانت هاديك الحديدة الطويلة لي كيحركو بيها الخشب فالمدفأة موقفة على الحيط .. شداتها مزيرة عليها .. قاداتها فيدها و هي عارفة بأنها أملها الوحيد و الأخير .. و بلاما تفكر حيت ماعندهاش الوقت .. طعـ.ناتو لجنبو !!
هز حجبانو و فنفس اللحظة رخا عليها و تراجع كيشوف لتحت .. الحديدة مغروسة فجنبو و هي لي شاداها بيدها كترعش ! خدات نفس عميييق .. كتنهج .. كتشوف فيه و فالحديدة .. كيبان ليها مزال واقف .. عارفة بلي هاديك الجرحة ماغاديش تڨتلو .. داكشي علاش جرات الحديدة خرجاتها منو .. و قبلما يعاود يهاجمها .. هزاتها لفوووق و بقوتها كللللللها و ضرپاتو للراس و هي كتغوووت ..
و أخيرا ..
طاح !!!!