يوميات زوج صايم ( مكتملة)

عائلة أحمد

أحمد : رمضان جانا وفرحناابو ايه يا عسل بقي هناكل ايه ده رمضان بعد بكرة
مني : هناكل مكرونة مش فاضية بروق
أحمد : يعني هي مش كانت ترويقة العيد طلعنا بترويقة رمضان كمان ثم مكرونة ايه يعني امبارح كشري وأول امبارح عدس في ايه بقي اتقي الله
مني : هعملكم كل الي نفسكم فيه أول يوم رمضان
أحمد : وانت فاردة صدرك اوي بربع كيلو الكاجو الي جبته فوقي يااختي
مني : بقولك ايه متشغلنييش خليني انضف اغسلي يا بت السجادة كويس
أحمد : اعتقي البت بقي ده انت ناقص تخبطي علي الجيران تاخدي سجاجيدهم تخليها تغسلها
مني : يعني أنت عايز الضيوف ياجوا يقولوا عليا مش نضيفة
احمد : يعني احنا مش بنضف عشان البني ادمين الي حيالله عايشين في البيت وان النضافة من الايمان لا بنضف عشان الضيوف ميقولوش علينا حاجة
مني : سيبك بس من الكلام ده جبت باقي الطلبات
احمد : جبت ياختي كل حاجة
محمد : والبط يا بابا جبت البط
احمد : بط يااااه أحلام السفهاء حبيب ابوك احنا عشان ناكل بط محتاجين قرض
ليلي : ما انت لسه قابض الجمعية يا بابا الله
احمد : يعني مش نصلح الغسالة الي باظت لا نجيب بط
محمد : انت تجيب ٤ بطات هم علي قد فلوس الجمعية
مني : فكرة ونعملهم علي اربع مرات
ليلي : لا نعملهم مرة وكل واحد ياكل بطايه
احمد : يا طفسه يالي همك علي بطنك عايزاانا نعمل ٤ بطات في يوم واحد
محمد : عشم ابليس في الجنة دي امك اكلتنا عدس وكشري وبصارة ومكرونة وفول وطعميه وبدنجان وبطاطس وانهارده اليوم السادس طلعت بواقي الاكل كله بتاع الاسبوع الي نصه بايظ وعملت جنبه شوية مكرونة ولسه بتفكر هتقضيها إزاي بكرة وانت عايزاها تعملك ٤ بطات في يوم
مني : قصدك ايه يا واد ده توفير علي فكرة ثم ان الاسبوع الي قبل رمضان بنقضيه معروفة وأول يوم رمضان هعملكم كل الي نفسكم فيه
احمد : يارب عيلة هتشلني يارب عوض عليا عوض الصابرين
مني : يالا يا واد كمل تنضيف في السفرة وأنت يا احمد اهدي كدة وادخل في شوية مواعين استفرد بيهم يالا
أحمد : كمان هغسل المواعين والله انا تكة وهطفش وما هتعرفولي طريق جره