خطيئة لاتغفر الغوث
بقلمي:اية الطائي
--------------------
#الحلقه26
.
.
.
لاتنسون تتفاعلون صعدوا التعليقات شكد ماتكدرون،البارت الجاي الأثنين ساعه 11مساءا
-----------------------
رواسن:-
كمت وراها دخلت للغرفه كاعده بالكاع حاضنه نفسها وتبجي مدري شصار بيه جسمي صار يرجف مثل السعفه
غمضت عيوني بخوف اخاف اسئلها والله صرت اخاف من المصايب
تقدمت عليها وغصبا عليه سئلتها-شصاير زهراء لاتوكعين كلبي مو كلشي انته هاا موجاي احجي وياج جاوبي
اريد افهم منها شي وهي ماكو على لسانها غير راح يكتلوني راح اموت تخبلت افتر بالغرفه وارجف هو غير اعرف شصاير
بالغلط وايدي طخت بسراحيه المي جانت كزاز وكعت بالكاع واتناثرت الى قطع صغيرة
-استغفر الله ربي واتوب اليك
مشيت لميت الكزاز واخذتها على صفحه كعدت احجي وياها بهدوء رغم كوه لازمه نفسي عنها بس اعرف العصبيه بهيج مواقف ابد متفيد
رواسن-شوفي حبيبتي اذا هسه انتِ بقيتي ساكته اكيد الوضع راح يتأزم لازم تحجيلي شنو صاير حتى نعرف شلون نتصرف تمام
اباوعلها حتى النفس كطعته بس دموعها تنزل وجسمها يختض مثل السعفه هديتها وطمنتها وصرت اسحب الكلام منها شويه شويه
رواسن-اي احجيلي كلتي هو راسلج من غير حساب صح
زهراء-اي رواسن شوفي والله العضيم راح احجيلج من البدايه ومن دون جذب
هزيت راسي بأي
رواسن-اي حبيبتي هو هذا الي اريده حتى نعرف شلون نحل الموضوع ومايتعقد
مسحت دموعها تحجي أو ويه كل كلمة تشهك
زهراء-والله هو ابد ماجان ابالي بس بيوم العقد مالتكم جتي عليه اخته وكالت اني وانتِ نفس العمر وماعندي صديقات وانطتني رقمها كالت نتواصل عليه
واني والله والله ماحجيت وياها الأ بعد مااخذت اذن ماما وراها صرنه نتراسل تقريبا مر شهر هي تحجي ويايه وعلاقتنه صارت كلش قويه
تقريبا وره هالشهر هواي صارت تحجيلي عن اخوها وتكول معجب بيج ماعرف شلون قنعتني احجي وياه
وانتِ عرفتي وشفتي شنو الصار
هزيت راسي بأي اريدها تكمل ،اشوفها فتحت التلفون وطلعتلي الحساب الجديد الي مراسلها منها
فتت على المحادثه وتوسعت عيني ،كمت على حيلي متخبله متخبله لااا يربي
رواسن-ولج صووور يالكلبه صور مو كلتي مادزيت
فقدت اعصابي لزمتها موتتها شعرها اتكطع بأيدي واني موحاسه على نفسي وهي كاتمه صوتها مفرفحه جوايه
بجيت مختنكه -ليييش ولج بس انطيني سبب يخليج هيج تسوين اهلج بشنو مقصرين وياج ولج ماوكف بعينج سمعتهم لو شيبة ابوج
لزمت صدرها مختنكه تكح
زهراء-والله والله مادزيتها الها دزيتها لأخته وماعرف شلون وصلت اله
عضيت اصبعي كوه لازمه نفسي لااصيح رجعت اقره بالمحادثه ايدي ترجف كوه لازمه التلفون
دازلها الصورة هي الصورة مابيها شي حتى لابسه حجاب بس اااخ يفبركوها الغبيه الله ياخذج يازهراء ياحقيرة بشنو ورطتي نفسج
نزلت على اخر رساله جان كاتبلها
-اليوم الج مده لل2بالليل لو تدزيلي 2مليون لو وحق علي الصور توصل لكل اهلج بس بغير شكل يحلوه هههههه
لزمت التلفون اريد اكتب ماكدرت ايدي ترجف وحلكي يبس
ثواني ودك برقم مجهول مسحت وجهي متوتره عيني عليها وعلى الجهاز
حجتها مختنكه
زهراء-لاتردين عفيه لاتورطين نفسج وياي
رواسن-اشش حسج مااسمعه
توني فتحت خط اجاني صوته
بعدني مامستوعبه كلشي وحسيت الغرفه نكلبت فوك راسنه
بلعت ريكي ساكته عيني بعينه ابد مانزلتها رجفت شفايفي اريد انطق كلمة وحده ماكو متت بمكاني
والتلفون بأيدي صوته يصيح الو ،يابه بلحظتها لو يذبحوني مايلكون قطرة دم بيه
رجعت خطوتين ليوره وهي ضامه نفسها ورايه
لحظات هي لحظات وماحسيت الأ خدي شتعل نار
سحب التلفون من ايدي وذاك بس سمع صوته غلقه
اشرت عليه ايدي ترجف وشفايفي صارت مثل الثلج
رواسن-ليش تضرب ليييش افهم السالفه أول
صُهيب-اششش صووتج لج اطلع ....... اذا ماربيتج من جديد
ضليت واكفه كدامه ضامه زهراء ورايه اعرف اموت ومااخلي احد يتقربلها
دنك عينه يقره بالرسائل واحسه صار مثل البركان
شمرني بالكاع انضرب ضهري بالحافه مال جربايه نشليت شل من الوجع
سحب زهراء ضربها والبنات واكفات بره يرجفن من شافنه يضربها ركضت هيام سحبتها منه
هيام-شكووو شصاير شصاير غير تفهمني ليش تضربها
صاح بصوت عالي حسيت طبلت أذني نزرفت
صُهيب-تريدين تعرفين شصاير هاااج اقري
خله التلفون بأيدها اباوعلها تقره وعيونها تتوسع
صُهيب-وخرن شويه خل احجي وياها
رواسن-صُهيب بس افهمك والله...
صُهيب-اشش انتِ بالأخص حسج مااسمعه
حسابج بعدين بر..... تردين على الزلم
رغم وجع ضهري ذبحني صرنه اني وياه امالخ هو يصيح واني اردها عشره كلت راح يضربني بوقتها صدك اتخبل
ايه-
واكفين نتراجف كلشي مافاهمين ورواسن كل ماحجت عاط بيها وهي متسكت ترادد
وكفت بصف هيام اشوف شنو بالتلفون اقره وفاتحه عيني ابد مامستوعبه
جسمي كله صار يرجف وهمه لسه على عيطت الوحده وماشوف غير هيام شمرت التلفون عليه
وهجمت عليها ملختها تعت بشعرها وهي ساكته مختنكه من البجي نريد نوخرها منكدر
اجه صُهيب جرها وطلعها من جواها وهيام متخبله تصيح وتغلط بصوت عالي
هيام-بس انطينياها هالكلبه الأ اموتها لج حقيرة مافكرتي بينه ماكلتي اصخم وجه اهلي ااااخ ياررربي اااخ
ماجاوبتها ضامه نفسها وره صُهيب تبجي ،سحبها صعدوا فوك واحنه اتخبلنه لايسويلها شي
رواسن-
-لاتجننن اني اروح
صعدت ركض وراه احس نفسي نكطع الأ وصلت دكيت الباب اصيح عليه يفتحها
فتح الباب بسرعه دفعته اريد ادخل ماخلاني
مسحت وجهي ايدي ترجف
رواسن-ابقه يمها
حجه ينتر بالكلام صاك على اسنانه
صُهيب-نزلي جوه رواسن جوه شكلت اني شكلتتت
لزمت ايده وبجيت
-متسويلها شي عليك الله
عاط بوجهي
صُهيب-نزلي عاد
رواسن-ماااانزل لو تموتني ماانزل
سحبني من ايدي ودفعني للغرفه مسحت دموعي ومشيت حضنتها لصدري
رواسن-اشش كافي اني يمج مااخلي احد يأذيج على موتي يأذوج وعلي
شهكت تضم نفسها بصدري وتحجي
زهراء-لتعوفيني رواسن هسه يكتلوني
هزيتلها راسي بلا ،واباوعله قفل الباب وراح على الكنتور تسودنت من شفت السلاح بأيده بس بقيت ثابته ياجبل مايهزك ريح
اعرف غلطت بس مو هيج يكون الحل ضميت وجها مااخليها تشوف وهي من دون شي ترجف بحضني
كعد مقابيلي واشرلها تعالي باوعتله وشهكت من شافت السلاح ضغطت على ايدها اطمنها
همست بصوت خافت
رواسن-لتخافين اني يمج
صُهيب:-تعالي هنا
اشرتلها تروح ردت اكوم وراها عاط بيه...كعدي انتِ مكانج وحسابج بعدين
اباوعلها كعدت كدامه ترجف الكلمه كوه تطلع منها
صُهيب-احجي من البدايه حرف واحد جذب انهيج انتِ وهاي
حجاها واشر عليه غمضت عيني بقلة حيلة كوه جاي اصبر بنفسي
كعدت تحجيله كلشي بالحرف الواحد كملت وشهكت بكلامها كلتله...
زهراء-والله موقصدي اسوي هيج والله
كام اخذ السلاح حطه بخصره راد يطلع وكفت مانعته
رواسن-وين تروح
عصر شفتي حيل غمضت عيوني متوجعه
صُهيب-وخري من وجهي وتاخذيها وتنزلن وكأن شيء لم يكن تتصرفن عادي
اريد احجي مااكدر مارد شفايفي بأيده مرد اسمعه رد كال
-اني احلها ،وحسابج بعدين ست رواسن ماناسي
واعلمج شلون تريدين تحجين ويه هالعار
دفعني وطلع لزمت شفتي صارت تنبض حيل رفعت ايدي بيها دم
رواسن-كسر بأيدك ياصُهيب
همست بصوت مخنوك
زهراء-رواسن شراح يصير راح يكتلوني
رواسن-اشش ولج هي هاي عمله تعمليها كلبه كل هالكتل وبعد تستاهلين امشيي كدامي
نزلت كدامي وصلت لباب الغرفه وخافت تدخل سحبتها ودخلت
هيام كامتلها تريد تضربها ودفعتها
هيام-عوفيني رواسن اموتها وكلبي مايرتاح لج انتن شنو من بشر وانتِ رواسن انتِ اكلج شصاير تكليلي ماصاير شي
رواسن-ماجنت ادري بالصورة والله العضيم
دخلتها كعدت بصفي ،هيام بس تفتر ورسل كاعده بالزاويه تبجي ريام وايه صافنات عليها مقهورات
كمت غسلتلها همزين ماجاي الضرب على وجها بس شفتها شويه مشكوكه
:-رواسن
رواسن-هاا
بجت مختنكه
زهراء-اذا متت دفنوني بكربلاء احبها
رواسن-واني كتلج الشر مايمسج قبل مايمسني وابن ابوه اليدنالج،لهل سبب بلا هالحجي وامشي كدامي
رجعنه للغرفه واسمع صوتهم صار بره مسحت وجهي متوتره وكعدت افهم بالبنات مايجيبون طاري لأي احد
مجرد ماانفتحت الباب فزت وصارت ورايه زفرت نفس براحه لمن شفتها عمه
جُمان-هاا يمه رجلج راح
ساكته وبس ارمش بعيني حرت شنو اجاوبها أخير شي هزيت راسي بلا
جُمان-هاا شنو تأجلت روحته
رواسن-اي اي تأجلت صار عنده شغل هنا ماكدر يروح
هزت راسها بأي وطلعت زفرت نفس براحه
هيام-هسه شراح يسوي الله يخليج خابري كلبي راح يوكف من الخوف
فركت ايدي بحيرة
رواسن-مااعتقد يجاوب خل شويه يمر وقت واخابره
مر اليوم مثل السم علينه كلوبنه ترجف خوف وتوتر
دكت ساعه وحده بالليل ويه كل دكت ميل يفز كلبنه بخوف
بعد ماتحملت سحبت الجهاز واتصلت عليه
رواسن-جاوب الله يخليك جاوب
هيام-هااا عفيه ماجاوب
هزيت راسي بلا وكعدت صافنه عليهن هيام انتهت كل شويه متخربطه وزهراء اموته نفسها من البجي
ريام وايه يبجن ويسكتن بهيام ،اتصلت بي مرة ثانيه على أمل يرد بس ماكو يضل يرن ويفصل
صبح الصبح وماكو خبر منه والباب صارت تنركع اشرتلهن سون روحجن نايمات ومشيت فتحت الباب
صارت كدامي اتخصرت تحجي معاجبها
ام رسل-شنو عيني اليوم ناويات تضلن بهل جحر ماتكومن نريد نتزقنب
كتفت ايدي لصدري
-عوفي البنات نايمات واني اطلع اشرب كهوة اريد اعدل مزاجي تعكر من الصباحيات
عفتها ومشيت للمطبخ اي هنا الوجه الرحماني اليفتح النفس قابل مثل هذيج السعلوه تمشي وتبخ بسمها
مريم-ها يمه صباح الخيرات
رواسن-صباح الخيرات على كلبج
مريم-يمه ولو اتعبج بس كعدي علي رجليه ماتعيني اصعد الدرج
-ومصطفى شنو راح؟
مريم-اي يمه من الصبح راح
هزيت راسي بشرود ،وصعدت بسرعه دكيت الباب عليه ونزلت
محمد ونور شويه وطلعوا من غرفتهم وعمامي جانوا بالصاله بس ابو محمد جان ويه مصطفى بالعزه بس محمد ماعرف ليش لسه مارايح
اني بسرعه بس شفته رجعت للغرفه صايره حيل اتحسس منه مااكدر انسه مواقفه وحقارته وياي وشلون جان يهدد
ايه-ها وين رحتي شو تأخرتي ؟
رواسن-كعدت علي ونزلت
سكتن ماحجن شي اخذت التلفون وطلعت بره للحديقه اتصلت عليه بسرعه جاوبني
-ها شصار فدوه
:- راجع بالطريق سدي وصلت
ماانطاني مجال حتى احجي وسده بوجهي
-خررره على الوكت الخلانه نحتاجك راح تموت يعني اذا كتلي شنو سويت
كلبي وجعني وروحي صارت تلوب من البارحه احنه على فرد كعده ماغمضتلنه عين من الخوف
ايه-ها رواسن ،صُهيب شكالج
غمضت عيوني بتعب ورديت كتلها
-ماكال شي بس كال راجع وسده دخلي جوه خلي ننتضره يجي والله كريم
كلهن ثواني ثواني
بين ماجاي ندخل وصار صوت طلقات
فزينه نركض وكلهم طلعوا يركضون بره
احس رجليه نشلن وبعد مايعينني
واكفين بالباب والمحه واكع بصف السيارة دمه مغركه
وعلي كاعد يمه
دفعتهن وطلعت وعمه مريم طلعت ورايه
الدنيا مخبوصه وناس ملتمه شي تخابر الشرطه وشي واكفه
ومحمد طلع من البيت بسلاحه
وهو بس شافنه عاط
صُهيب-دخلللن جوه دخلن شطلعجننن هيج
ردت الزمه واحس وشه صارت براسي بس
أتذكر مدري منو دخلنه للبيت
فزيت اشهك النفس كوه اسحبه مخنوكه وعمه تغسل بوجهي
صحت مفزوعه
رواسن-ماات مااات
الخوف والرعب الي حسيت بي بلحظتها بس الله أعلم بي ،مسحت دموعي احاول اصبر نفسي على هالمصايب الي جاي تصير واسمع عمه تصيح لااسم الله مابي شي يمه
جان البيت عبارة عن فوضه البنات كلهن ملتمات بجهة وعلى فرد بجيه بيبي تصرخ وعمه مريم حالتها حاله واكفه بالباب تبجي روحها مفرفحه وتريد احد يوديها
اسمع عمه صاحت لهيام
جُمان-تعالي يمه هيام غسليلهاوانطيها شي حلو وجها صار ليمونه
جتي تريد تكومني كتلها لا اني اكوم كمت غسلت وجهي جسمي كله يرجف بصورة مو طبيعيه وراسي احسه يريد ينفجر
كعدت ابجي بخوف ورعب المنظر ابد مجاي يروح من راسي هي الاصابه موخطيرة جانت بكتفه بس الهبطه وحدها هدت حيلي
-شكد حقيرة اني قبل شويه جنت احجي عليه انكص الساني ان شاء الله والله بعد ابد مااحجي بس خل يرجع
جتي كعدت يمي حضنتني
هيام-كافي عمري انتِ شعليج
رواسن-منو سوه هيج معقوله ماشافوه وبهل سرعه اختفه!!
هيام-مادري والله عقلي راح يوكف شهل يوم الأكشر
اخذتني ودخلنه للصاله عمه كاعده وتلبس بجواريبها ماعرف منو راح يوصلهن جلبت اريد اروح وياها بس ماقبلن
وهنه طلعن وأم رسل اكلت راسي اريد اكوم عليها والبنات لازماتني
الحجيه-لج انتِ ماتضبين لسانج بيا حال احنه
ام رسل-ديله عيني قابل مجذبه تلكينها تتمنى موته حتى تفتك منه وتصيع بكيفها
ام علي-الله اكبر عليج البنيه بيا حال شويه استحي على شيبتج
ام رسل-شبيها قابل شو جنها صل وبعدين انتِ شكو صايرتلها دفاع
ايه-
هو اني كوه جنت لازمتها ونوب هيج حجت عليها مانشوف غير فلتت نفسها ونامت عليها احلف بالله كسرتها
نمنه عليها نيوم بس نريد نفكها من ايدها متقبل تهد شعرها وهي تعيط صراخها واصل لسابع جار
لزمتها اريد اوخرها ودفعتني حتى اني صرت بينهن ونكتلت ماعرف الضرب منين صار يجي لو كل شويه ام رسل عبالها اني رواسن ولزم وجهي تخرمشه
دخل عمو ابو صُهيب ليكول مثل الي جان محمل كومت حقد على رواسن وهسه نفجر.... سحبها من فوكها وبسرعه ضربها
ضميت نفسي بالزاويه ميته خوف وقهر وهي روحها مفرفحه تحجي وياه وترجف
رواسن-لااا تضررربون لااااتضربون مو رجال اليضرب مره
فتح عينه على وسعها وام رسل الحقيره تحرضه عليها ركض يريد يلزمها وماما وكفت كدامها
ام علي-استهدي بالرحمان خويه مرت اخوك هي الي اتعدت على البنيه
خله وطلع يسب بعمو صقر وهي تخبلت تريد تفلت نفسها منه واحنه كوه لازميها حتى بيبي ماقبلت وصارت تحجي عليه
ويه هالهوسه كلها ودخلوا الولد علي وصُهيب ومحمد أو وراهم دخلت عمه مريم وجُمان وابو رسل
كلهم صفنوا علينه جانت حالتنه حاله ام رسل امرغله نفسها بالكاع تدك وتلطم وتصيح....هو هاي تاليتي وحده زعطوطه تضربني
ابو رسل-شكوو شكوو منو هيج مسوي بيج !!
لزمتها وليه تغلط وتفشر على رواسن
دخلوا كعدوا صُهيب جانوا لافين ايده وجهة اصفر وقميصه كل دم ،عمو ضل يصيح بس محد رد عليه
من عرفوا هي متجاوزه عليها حتى محد حاجه رواسن
ابو رسل-يعني أنتَ قااابل بالتسوي مرتك قابل
صُهيب-عاشت ايدها وكثر الله من امثالها
ضل يغلط يغلط تالي اخذ مرته ودخل لغرفتهم بعد محد شافهم
شويه ودخل عمو ابو صُهيب وهم ضل يحجي على رواسن وهي ابد ماحجت ولاتحركت من مكانها
ابوصُهيب-واحنه لشنو زوجناها الك ماتضبها شويه
وتربيها
ضحك مستهزء
صُهيب-هو دخل اربي نفسي الأ اربيها
ومانسمع الأ رواسن طكتها بضحكه عمو وجهة احتقن وهي ولاسكتت عمه تكرص بيها وصُهيب يخزر بيها وهي ولاكأنوا
ضلوا كاعدين بالصاله يحجون على الصار واحنه عمه طلعتنه عود حتى لانتسمع
كعدنه كلنه بالغرفه هيام ضايجه من رواسن لأن ضربت أمها ورواسن مغلسه ماحجت شي
كعدت اكلب بالتلفون الغرفه هدوء فجأه اتذكرت شغلة زهراء وكمزت كتلهن
-ولجن هسه شلون نعرف شصار بشغله زهراء
صفنن بوجهي وبهتت وجوهن كأنوا الي صار ويه صُهيب نسانه كلشي وهسه الأ تذكرنه
كلها كعدت صافنه وحايره غير عن الخوف الي دب بكلوبنه وكن رجعنه لنقطة الصفر
شويه ودخلت جُمان للغرفه ضلت تستفسر الأ ان فهمت السالفه كلها وردت تحجي ويه رواسن ابد ماقابله على تصرفها
رواسن-وان شاء الله يجفصون ابطني واسكت !
جُمان-ولج ماكايلتلج سكتي بس مو تضربيها يالمفلوكه مره بكد امج شلون تضربيها
رواسن-واني سكتت بمافيه الكفايه وهم ماتجوز مني تره وصلت حدها
ضلت شكد تحجي وياها الأ ان ملت وطلعت
ردت هيام حجت وياها بس وجهة جان ثكيل
هيام-اذا خلصتن عركات ياريت تحجين ويه رجلج وتشوفين شنو سوه
رادت تحجي وياها رواسن وكوه سكتتها بهل وقت ثنينهن عصبيات ومايعرفن شنو يحجن
صار وكت غده كمنه كلنه وكفنه نساعد خطيه عمه مريم تفتر وحده بالبيت حتى نسيت اطلع اساعدها
مريم-هاي يمه شلون صارت رواسن
بعدني مافكيت حلكي ودخلت ام رسل تحجي بصوت عالي
ام رسل-وشنوو حظرتج تسئلين عليها اني المكتوله لو هي
مريم-اي جنتي واسئل عليها ليش لا
ام رسل-اي جدر ولكه غطاه يتهنون
سكتت ابد ماحجيت ولاكلمه حتى البنات جانن يشتغلن بهدوء
ام رسل-تعالي لج رسل انطيني حبايه من جزداني راسي راح يطك من كسر بأيدها ذيج الي ابالي
التفتت على ضحكت رواسن واكفه بالباب وتكللها
رواسن-كولي اسمي كولي شنو خايفه
ام رسل-ولعباس ابو فاضل توخرين من وجهي لو الم امة محمد عليج الس....
اخذت الطرشي من ايدي تخلي بالطوس وتباوعلها ، اتذكرت من جانن يتعاركن اخذتلي راشدي من رواسن من قوته احس فكي نعوج خرب بيومج جنها ايد مال ثوران ههههههه
عفتهن ومشيت حضرنه السفرة وكعدوا ياكلون واحد يخزر بالثاني واذا حجوا على شي تحسهم مو يتناقشون يتعاركون
دناكل وعلي هم فتح موضوع حياة كلها صاحت لا صارت غصه ابلعومي ميته قهر عليه
علي-عمي شنو لا هو انتوا الي تزوجوها لواني
صُهيب-شكو شصاير ؟ على منو جاي تحجون
علي-اريد اخطب
صُهيب-اي شكو بيها شاب ومن حقك
اباوع للولد وجهم حتقن يريدون يضحكون ،عاد صُهيب اذا لزمهم تصنيف ميستحي حتى من بيبي
صُهيب-اي ومنو هاي سعيدة الحظ
علي-صديقة مرتك
باوع لرواسن وبتسم وهي مدري ليش تخوزر بي
صُهيب- يله سهله نروح نخطبها ، هي راحت لعمامها مو هيج كلتي رواسن
هزت راسها بأي بدون لاتحجي وياه
ابو رسل-اشو انتوا بكيفكم تحجون كلنه مانقبل بيها هي تالي عمرنه ولدنه تاخذ بنات رقاصات
صُهيب-هسه اليشوفك مو اربعه وعشرين ساعه تهز ويه الرقاصات،همه غير يخلونه ساكتين
عمو تخبل وعلي سواله هوسه وطلع ماقبل على حجي عمو صار مو غده سم كلها كامت شلنه الأماعين ودخلت أصب جاي
باوعت على وجهي كله مخرمشاته ومطبوع بي الراشدي مو مال اطلع
توسلت بيهن وحده منهن تودي الجاي ماقبلن الحقيرات كل وحده مسويه حداد ليشوفهن جنهن ارامل
دخلت للصاله جانوا يحجون بسالفه صُهيب وبس شافوني سكتوا شكد خبيثين مايخلونه نعرف حجيهم كله من جوه الجوه
انطيتهم جاي وكعدت بصف بابا نوعا ما مرتاحه مصطفى ماموجود ولو ماحاجيه احسن شويه ودخل
اريد اكوم واكول خاف فشله
عينه ابد مانزلها مني شكد ادبسز جان مايباوع مدري شبيه هسه مجلوب ،يمه كل مااتذكر لمن اعترفلي احس مطايه ترافس ابطني
جنت صافنه وانتبهت لبيبي تحجي وياي
-هاااا
الحجيه-وعلاا صارلي ساعه الغي وياج ،كومي حضري الغده لأبن عمج وين صافنه
باوعت عليهم وطكيتها ركضه شكد فشله ،دخلت للمطبخ ريام واكفه على السنك دفعتها وكتلها روحي صبي اكل لأخوج اني اكمل
ريام-وسم دزوج الج لو الي
ايه-لاوالله وهو اخوج لو اخويه نطمري وامشي حضريله الأكل بدون لغوه
ريام-هاا هاا كولي استحي منه بعد مااعترفلي
خزرت رواسن ودرت اباوع عليهن كلهن فاتحات حلوكتهن مصدومات
رواسن-والله معليه شبيج تباوعين؟
رسل-عاا عاا هيج السالفه
خزرتهن ودخلت للغرفه يمه شجاي يصير بيه راح اموت شهالشعور
البنات كملن وجني يمي هيام مامرتاحه تريد تعرف شصار وزهراء ساعه صافنه وساعه تبجي صح غلطت وغلطها جبير بس كسرت خاطري
ردت اروح وتذكرت حجي رواسن كالت ابد لاتتعاطفن وياها بينن الها مدى حجم الغلط الي ارتكبته
رواسن-
ضليت كاعده يم البنات وحده صافنه بوجه الثانيه
وصُهيب ثبرني اتصل مرتين ماجاوبت مالي خلكه ادري بي هذا يضل يرزل مابيه اتعارك
أخير شي دز رساله
-خلي زهراء تصعد للغرفه وممنوع تصعدين وياها
وجيبيلي جهاز رسل وياج
هذا شبي هسه اني كاتله نفسي على غرفته
رديت كتبتله
-ماميته على غرفتك بس زهراء مااعوفها وحدها اني وعدتها
دزيت الرساله شافها مارد لويت شفايفي معاجبني هذا شبي
بلعت ريكي وباوعت لزهراء
زهراء-شكو عفيه لتخوفيني
رواسن-ماكو شي شبيجن تباوعن يريد يحجي وياها
وانتِ رسل انطيني جهازج
رسل-شكو قابل اني شعليه
رواسن-بدون لغوة جيبيه
انطتنياه وكعدت زعلانه اعرف كلشي ماعدها بس صُهيب مدري شيسوي بي
خليت حجاب على راسي وصعدنه وصلنه لغرفه صُهيب جان مصطفى واكف بالباب
مصطفى-نزلي انتِ رواسن
ردت احجي ماخلاني اخذ جهاز رسل ونزلت قبل لايسئلن حجيت
-ماكو شي بس مصطفى كال نزلي ماقبلوا ابقه
هيام-عزه بعيني بس لاحجه لمحمد هماتين والله هذا مايسكت ويروح يحطها بحلك ابويه
رواسن-لامايحجيله اصلا علاقتهم موتمام ويضوج منه
كعدنه ننتضرها طولت تقريب النص ساعه ونفتح الباب،الوجه أحمر دم باجيه على ماكايله بس
هي مختنكه ماتكدر تحجي وهيام تهز بيها تريدها تحجي
رواسن-اوكفي هيام على كيفج مجاي تشوفين حالتها
هيام-ماااابيها شي مااابيها بس خل تحجيلي شحجوا وياها
فتحت عيوني خازرتها
-كافي عاد شبيج عود هاي انتِ الجبيرة
نومتها على الجربايه خليت البنات يمها وطلعت تلكتني عمه مريم توها نازله من فوك عيونها مورمه من البجي
مريم-يمه بالكي تحجين وياه تسحبين منه حجي عجزت وماجان يحجي شي منو يسترجي يسوي هيج
بلعت ريكي ساكته
-يله يمه روحي انتضرج بغرفه البنات وين الله ويحجيلج منو السوه هيج
رواسن-ان شاء الله احاول احجي وياه
صعدت لغرفته دكيت الباب ودخلت ،شمر الجكاره من ايده والتفتت لأتجاهي
-دخلي
سديت الباب ودخلت كعدت بصفه دار وجهة يستغفر،وسكت
حجيت ويه نفسي
-شبي هذا نزل عليه الدين فجأه
صُهيب-اي ست رواسن احجي بله شعندج احجي
-اني لالا شعندي بس انتَ احجيلي شنو سويت
ماسويت
باوعلي وهز راسه متحلف،صافنه منتضرته يحجي ومااحس الأ نسحبت من شعري قوي
عاط بكل صوته:شحجيتتتي وياه بله
رجف جسمي وصوتي احتقن حجيت بهمس...وخرر عيب عليك وين حاجيه وياه
احس بعد مااسيطر على نفسي ولا على رجفة جسمي ،وخر من عندي لكيتها فرصه بس اريد اطلع
طلعت اسب بنفسي وبزهراء وبعشيرتي وبالأمه العربيه كلها وصياحه ورايه صار بفلس
-هسه من الزمك بالنعال منو يكول ليش شبيك هيج ترجف ابن النعال
صار بوجهي علي كاعد بالممر يدخل... خرب بروحج رواسن بس لاسمعني ،نزلت راسي ومشيت خرب بس اريد اوصل للغرفه
بعدني على الدرج أو وصلتني رساله منه قريتها واسب بمدري منو
-بدلي هاي الخره الي لابستها
وسعت عيني بصدمه وبسرعه باوعت على ملابسي.. والله مابيهن شي عريضات وطويلات دخل يطير
قريتها ومارديت.
دز رساله ثانيه وصدك من قريتها ارتاحيت وتأكدت شغله زهراء فضت زفرت نفس براحه ورجعت للبنات كاعدات ينتضرني ويمهن عمه مريم
بسرعه كالت
-ها يمه ماحجالج شي
هزيت راسي لا وهي كالت اروح انام هذوله راح يجلطوني ،هي طلعت والبنات استلمني دك تحقيق
هيام-يعني تريدين تقنعيني كلشي ماحجه
رواسن-هسه موهيانها الرساله كدامج وجاي تقرين
هيام-جاا شجنتي تسوين يمه؟
رسل-ههههههههه
خزرتها وكمت تمددت بالفراش البنات كل وحده اتطشرت بصفحه وهيام لزمت زهراء تريد تحجيلها وذيج متقبل تحجي الولد منبهيها وهيام حجت وياها الأ ان بزعت
----------------------------------
حياة-مرات رغم الهدوء الي محاوطنه تتولد عواصف داخلنه ممكن هالعاصفه تعصف بينه لمكان بعيد وتدمرنه ويمكن نكدر نتغلب عليها وهاي حالتي اني
رغم ماكو احد هنا مقصر ويانه بس اكو فراغ بداخلي ولاشخص يكدر يملي وشكد ماحجيت ماكو بشر يفهمني
طبعا اخر فتره عمو جاب نقلي لهنا وستمريت اداوم وياهم والأمور ماشيه صح جنت طالعه ب3دروس بس دخلت بكلوريا
وبيوم جنت كاعده بره بالحديقه حاطه الكتاب بحظني وصافنه عليه مدري شبيه الله مطيح حظي ولاجاي اركز بدراستي رغم دائما اتواصل ويه رواسن وتجيب وتنصح بيه
بس ماكو اسمع منا واطلع منا لو باقيه يم غصون اشرفلي
التفتت على صوت الجهاز معلن عن وصول رسائل ،فتحته وكل ضني هاي رواسن
بس لكيته هذا الولد الي جان كل اسبوع يطلب منه
قريت رسالته وجان يسئل اذا لسه نجهز كيك
دزيتله لا حاليا ماكو نتضرته يجاوب ماكو وصراحتا من زمان كلبي ناغصني من هالشخص احس نفسي أعرفه
مدري شجاني وكتبتله...ممكن اعرف أنتَ منو؟
رد كتب
-هههه ليش شنو حابه تتعرفين عليه
مسحت وجهي متوتره وبيني وبين نفسي اسوي ...اجاوبه لولا اي اي اجاوبه حتى اعرف منو هو
كتبتله
-عفوا شنو هالكلام احترم نفسك
خرب يومج حياة هاي شجاي الوص اني ردت امسحها بس مالحكت شافها ماكو والله ثواني واتصل الجهاز بأيدي
فتحت عيوني مصدومه
-شكد مايستحي ليش يتصل ،جاوبته عود جاي ارزله ونصدمت صدمت عمري ومن صوت ضحكته عرفته هذا علي
مدري شصار بيه كلبي صار يرجف توترت وحتى صرت مااعرف شلون اجمع الكلام
اجاني صوته يكول
-هاا يابه بس لازعلتي ،اتقشمر وياج
دزيتله لا حاليا ماكو نتضرته يجاوب ماكو وصراحتا من زمان كلبي ناغصني من هالشخص احس نفسي أعرفه
مدري شجاني وكتبتله...ممكن اعرف أنتَ منو؟
رد كتب
-هههه ليش شنو حابه تتعرفين عليه
مسحت وجهي متوتره وبيني وبين نفسي اسوي ...اجاوبه لولا اي اي اجاوبه حتى اعرف منو هو
كتبتله
-عفوا شنو هالكلام احترم نفسك
خرب يومج حياة هاي شجاي الوص اني ردت امسحها بس مالحكت شافها ماكو والله ثواني واتصل الجهاز بأيدي
حجيت وياه منفعله والله ضوجني شنو معنى تصرفه يدخلي بحساب وهمي
-انتَ شنو تقشمر عليه داخلي بحساب وهمي والله عيب عليك لا ومسوي نفسك زبون عندي
علي-هههه على كيفج يابه شبيج شنو حرام نطلب كيك
زفرت نفس قوي ورجعت كتله
-بس أنتَ سويت هيج حتى تساعدني
سكت شويه ورد حجه
علي-اي وشبيها
نفخت نفس بملل وعيني على الطريق لايطلع احد ويفهمني غلط
-علي روح لازم اسده لايجي احد،هسه اني موبالبيت
حجه بسرعه فاز
-رجعتي تشتغلين بره ؟
حياة-على كيفك بعدين شعليك واذا طلعت اشتغل بره
صاح بحركه ،ضليت صافنه ومااعرفت شنو احجي
-يااابه شبيج احجي هم رديتي تطلعين
بعد السماعه شويه عنه واسمعه يسب نفسه،شويه ورجع كال
-شبيج ماتحجين
حياة-لا انتقلنه نعيش ويه عمامي
جيت اغم نفسي هسه اني ليش جاي اخذ وانطي وياه بالكلام
علي-عدهم ولد ،ولد عدهم
ولعباس جيت اكله نجب أنتَ شعليك بس ستحيت لزمت وغلقته بوجهة... هذا شبي انوب مستجلب هو بقه بس هو عليه
اخذت كتبي ودخلت اقره جوه وكالعاده هوستهم واصله ليوين حوراء اربعه وعشرين ساعه تتناكر ويه ضرتها وبيبي بس تحجي عليهن وصايرين فلم
مرت أيام وجتي أيام اتصالاته ابد ماتبطل والله مدري شبيه مااحظره وضاله على سوالفه الي تخرب ضحك وغدير تجيب وتحجي عليه متقبل حتى حجيت لرواسن هم رزلتني مدري شبيهن على الرغم معتبرته صديق قابل شعندي وياه
بس على الرغم من هذا ابد ماقصرت بدراستي الأ ان خلصت فترة الأمتحانات وبدينه نمتحن والأسئله جانت سهله نوعا ما بس هاي رواسن وره كل امتحان تخابرني تبجي تخبلني تالي من نكعد نحل الأسئله تطلع مجاوبه اكثر مني هههه
ومن رجعنه من اخر امتحان بدلت وتغديت أو العصر خابرتها وقبل لاتحجي بسرعه كتلها
-والله بس تدكيها مناحه احظرج خلينه فرحانين
رواسن-هههه لا والله حيل فرحانه واخيرا كملنه،كابوس وخلص
ضليت احجي وياها تقريب الساعه وراحت
التفتت على الباب دخلت غدير الوجه اصفر وبس ترجف
حياة-شكو تعالي شبيج!!
-عدي ابن عمه فرح
حياة-اي شبي ؟
-حاجي ويه عمو وكايله اريد اتقدم لغدير
--------------------------
ياقوت-
جان تقريبا اخر اسبوع نداوم بيه واليوم يعلنون الأسماء الداخله بكلوريا ،طول الوقت جنت حاطه ايدي على كلبي اخاف ماادخل بلحظتها شيخلصني من سائد
مر الوقت واني كاعده وحدي وصراحتا حسيت بملل موطبيعي
جيت اطلع وصارت بوجهي بنت عمتي زمهرير ...هاي شجابها هنا هي مو ثاني متوسط
-هاا ست ياقوت شنو احنه نبزز لو مايعجبج تسلمين علينه
حجتها بصوت عالي التفتت للبنات كلها تباوعلنه
ياقوت-ممكن توخرين اريد اطلع
باوعت للبنات ورجعت باوعتلي ،ضحكت
-لاااا والف لا ماتطلعين قبل ماالكل يعرف حقيقتج القذره
فتحت عيوني مصدومه وجسمي كله يرجف وحده من البنات وكفت تسئلني
-خير ياقوت شبيهن وياج
هزيت راسي بأي وبسرعه رديت هزيته بلا كلش توترت وخفت لاتحجي شي بموضوع حازم ،لزمتها اريد نطلع بره حتى نحجي وهي دفعتني تأشر عليه وتحجي
-شاااايفين هاي بواكت الزلم باكت مني خطيبي ههههههه لا والأحلى من هيج ماتهنت بي يومين لاغير وتطلكت الله اليعلم شنو الصار
فتحت عيوني مصدومه شفايفي ترجف اريد احجي مااكدر صوتي اختفه وصوت البنات يتبسبسن بينهن
مدري شصار بيه حسيت على لحظة كلبي يوكف
وهنه شافن المدرسه دخلت للصف بسرعه ركضت هي وصديقتها ليبره
وفزيت على صياح المدرسه
-شبيج ماما جاي احجي ويه الحايط امشي رجعي لمكانج
بسرعه رجعت لمكاني بس يايابه شصار بيه دموعي كوه لازمتها وبكلبي اتحسب على حازم وعلى كل واحد يجيب طاري
بدت تذيع بالأسماء وهواي بنات ماداخلات ،لكيت الخوف حجه وكعدت ابجي وبسرعه رفعت راسي من سمعت اسمي
-لاتبجين ماما داخله
مسحت دموعي مبتسمه ورفعت راسي احمد الله ماضيع تعبي
خلص الدوام ومدري شلون كضه الوقت حسيت روحي تريد تطلع غير عن نضراتهن احس كل نظرة تكول انتِ مو خوش بنيه حازم لوثج ،وارد اهز راسي بلا واتذكر كلام سائد...حجي الناس لايقدم ولايأخر خليج قويه
انتضرته بره على ماوصل
-هابويه بشري ،تراني كاعد على نار
ابتسمت مجاملتا مااريد ابينله شي
ياقوت-الف الحمدلله داخله
ابتسم بفرح
-عفيه ببنيتي وعلى هالبشاره تستحقين مكافئه
ياقوت-هههه ياا عليمن
ضحك،وبضحكته يترس روحي فرح
-يابه غير رمش عيني اليوم رافع راسي وداخل بكلوريا
جاب الطريق كله يتشاقه ويايه كدر يسحب الحزن مني وقريب مانوصل لمدرسة رهف واحمد دك تلفونه ،فتح خط ومجرد ماسمعت اسم حمزة
غابت ابتسامتي وكلبي صار يرجف غمضت عيني حيل اريد هالشعور يروح مااريد افكر بي يربي مااريد
اكسر ثقه سائد
مافهمت من حجيهم كلشي كل شويه صايح بي ومفززني ،سده منه وباوعلي
-شكو
ياقوت-هاا لا ماكو شي
يمه متتتتت بمكاني كون اختفي من كدامه والله نضراته حيل قلقتني
وصلنه لمدرستهم وصف السيارة ننتضرهم يطلعون
وبهل لحظات جان سؤاله مثل الكابوس بالنسبه الي
-ياقوت عندج شي ويه حمزة؟
عيني جمدت عليه لاأخذ ولاانطي صرت مثل الجماد
ماصحيت على نفسي الأ لمن طبك باب السيارة ونزل
واسمعه يسب نفسه بعصبيه
شكد حزت بخاطري هيج احس نار وشبت بكلبي ،منزله راسي ودموعي تنزل بحظني
-والله ماعندي شي وياه ليش هيج يفكر بيه
مسحت دموعي الشهكه مجلبه بزردومي ولمن حسيت بوجوده بقربي
حجيت بصوت مخنوك
-ليش تشك بيه والله ماعندي شي وياه
دار عينه يسب ويلعن بنفسه
سائد-اشش شو ياقوته عاينيلي بويه نعلعلى على....يابه انسي كأنوا ماحاجي وياج اني واحد حمار
ماحجيت شي بس درت وجهي عنه زعلانه والله بعد ولااحجي وياه راد عالج ولاجاوبته
على ما طلعوا ورجعنه للبيت ،مر يومين يابه شلعت كلبه ومارضيت شنو يشك بيه وبعدين اني وين شايفته لحمزة
والله شنو مايستحي هيج يحجي وياي
مرن كم يوم استراحيت وكعدت اقره وعلى هالهدوء والجو الي توفرلي للدراسه احمد الله واشكره الف مره
جانت بوقتها دنيا عصر مليت من الكتاب وكمت كلت اسوي كيكه شويه اغير جو،توني كملتها خليتها بالفرن وندكت الباب
خليت حجاب على راسي وطلعت افتحها لأن سائد نايم ورهف ابد ماادزها لأن تطلع بدون حجاب لو تطلع بالبرموده وسائد يتخبل علينه واني الي اترزل وياها
-فتحت الباب صار كدامي وكفت مرتبكه وشكد اكره هالشعور اظل مااعرف شسوي
حمزة-السلام عليكم
-هاااا
ضحك ،نزلت راسي بفشله
حمزة-سويلي مجال رايد اخوج الجحش بجم كلمة
رفعت راسي وماعرف شلون اتجرئت وخزرته
-لاتغلط عليه
حمزة-هههه امرآ وطاعه
دخلت جوه وهو مشه ورايه سويتله مجال كعد بالصاله ومشيت اكعد سائد
كعدته ورجعت للمطبخ
رهف-اكلج شنو راد حمزة
ياقوت-وشعرفني اني
رهف-امم تدرين خاله تكول كبرن حتى اخذجن لولدي هههههه
رفعت عيني بصدمه وايدي رجفت
-اموووتج رهف امووتج اياج تخلين هالأشياء ابالج اهم شي دراستج بعدين والله لويسمعج سائد الأ يشرنه على الحبال
رهف-والله بطرانه اني اتزوج يوسف الجحش تفف تفف عليه اذا سويتها
خزرتها ومشيت سويت جاي ودزيته بأيد احمد
ضلوا تقريب الساعه كاعدين ماعرف ليش اجاني شعور الموضوع متعلق بيه
وكل مااتخيل ممكن هالكلام صح اريد اموت
تقريب الربع ساعه لمحت حمزه طلع بره بس شكله مايبشر بخير شنو تعاركوا !!
التفتت فازه على صوته
سائد-تعالي ورايه للغرفه
حجه هيج وطلع باوعت على رهف وكلبي رجف
رهف-شبيج ياقوته روحي
كعدت بالكاع مدري شبيه متوتره وخايفه
سمعت صوته وكفت خايفه
-جيت جيت شبيك
دخلت للغرفه كاعد على القنفه يدخن اشرلي اروح اكعد يمه
كعدت يمه ورفعت عيني اباوع لعيونه...لازين مامعصب
-تدرين حمزة خطبج؟
رفعت راسي اريد احجي كلمة ماكو لساني نبلع ،نزلت راسي ايدي بحضني عاصرتها حيل
هيج بلحظتها تمنيت اختفي من كدامه
رجع كمل كلامه بحسره
-حمزة خليج بعيده عنه جاي تسمعيني ياقوت
تشوفينه بهذا الطريق انتِ ماتمرين منه مفهوم
-ياقوتي يابه عاينيلي شبيج
ختنكت اريد احجي وياه اكله ماعندي شي وياه ماكدرت ،غسل وجهي يفشر على نفسه وعلى حمزة
حجيت كوه
-انتَ ليش كل مره تحسسني عندي شي وياه
سائد-اشش يابه شهالحجي اني متأكد منج ماتغلطين ولافد يوم تنزلين راسي بويه ياقوته انتِ تربيتي
زفر نفس بحسره ورد حجه
-وهذا الحمار لو اعرفه مجرد مسوي شي غلط وياج اطيح حظه اشرب من دمه ومايرفلي دم ،بس هذا اجه وخطبج مني وانه مارايد انطيج
اهم شي عندي هسه تركزين بدراستج وعوفج من هالخرابيط وادري بخالتج تعبي براسج هاي هم عوفيها
مسحت دموعي بسرعه وكمت اريد اطلع وقبل لاافتح الباب كال
سائد-اذا عندج رقمه حضريه خوش
نزلن دموعي مسحتهن بسرعه
-واني منيلي جهاز أنتَ مو كسرته
عض على شفته ورجع باوعلي،كال
-والله راح عن بالي العصر اجيبلج غيره
عفته وطلعت بره كلبي يوجعني ومن يوم الي اعترفلي مدري شصار بيه اصفن اصفن والكه نفسي افكر بي
دخلت للمطبخ رهف كاعده تزين بالكيكه بستها بخدها وكعدت يمها حجينه شويه علما صار المغرب أذن
رحت صليت وطلعت اسوي عشه وهو صله أو وكف يمي
سائد-ست خنيسه لسه زعلانه من اخوها لو شنو
احجي وياه بهدوء رغم كلبي شابه بيه نار من القهر،مقهوره لأن احسه عنده شك تجاهي واني والله مامسويه شي
ياقوت-اي وانتَ ماكل ست خنيسه بلسانك لأن تشوفها فقيره
ضحك
-لايابه هاي منو معلمج على هالحجي
ياقوت-شوف والله ولاتزعل بس انتَ وكر من الخباثه دوم تعض وتضم راسك ونبي وفوكاها تسوي نفسك فقير
ضحك بصوت عالي حتى ختنك
-افااا هاي اني هيج
هزيت راسي بأي راح اخذ خياره من الثلاجه غسلها وكعد يكرط بيها
سائد-بس على فكره حلوه هاي وكر الخباثه مال ناس شخصيه مثلي
كتله
ياقوت-اي خوش هسه من تتزوج أعلمها لمرتك ولجهالك هم
ضحك وطلع ورهف جتي يمي متعاركه هي واحمد وكوه اسكت بيها لسانها شطوله هي تغلط عليه وتجي تتبكبك
نقلت العشا على الميز جوي كلهم كعدوا
وكالعاده سائد يضل يحجي ويه رهف واحمد دائما يحب يعرف تفاصيل يومهم شنو الي مضوجهم
ولمن اشوف حنيته واهتمامه بينه اريد ابجي احسه ابونه مو مجرد اخ
ثاني يوم جابلي جهاز وماقبل احط بي اي رقم غير رقمه حتى خاله ماقبل اخلي رقمها
وره مده مو هواي بدوا احمد ورهف يمتحنون واحنه امتحنه وراهم ذبيت كل جهدي على الأمتحانات بس اريد اخلص ومنها اطلع معدل عالي حتى ادخل معهد وافضها
بصراحه عاجبني معهد تمريض ومادري شلون راح اقنع سائد هو يريد اكمل سادس واني ماالي واهس
ابد
كملت امتحان وطلعت بره انتضر سائد ماكو دقايق ولمحت سيارته وكفت مشيت بهدوء فتحت الباب وصعدت
ياقوت-السلام عليكم
-وعليكم السلام ورحمة الله وبركاته ،جاوبتي بويه ؟
هزيت راسي بأي مبتسمه فرحتي ماانطيها لأحد واخيرا خلصت من كابوس الثالث
ابتسم وشغل السيارة ،بنص الطريق واجاه اتصال مدري شبيه كل ملامح وجهة تغيرت عصب وصار مايتحاجه صراحتا خفت اسئله خاف اترزل
وصلنه للبيت ،اخواني كاعدين بالصاله باوستهم ودخلت للغرفه بدلت وحضرت الأكل
ردته ياكل ماقبل والله للعصر كاعده بالغرفه ودخلت رهف تركض
ياقوت-صخام بعينج شكو
سحبتني وياها للمطبخ وكفنه نباوع من الشباك مال مطبخ وتوسعت عيني بصدمه
.
.
.
يتبع🕊️