سياف حط الصينية قدام راجس
- لا تفكر تقولي ما تبغى تاكل
راجس طالع بالصينية وابتسم
- ما احب أكل المستشفيات
سياف رفع حاجبه
- اذن بطل تدخل المستشفى
راجس كشر
- على اساس انو بإختياري ؟!
سياف طالع في راجس
- المرة الاولى لأ .. بس ذي المرة .. في احد يطلع بذاك الوقت يمشي ؟ ما تتفرج You ؟! .. ما شفت كيف قتل صاحبتها لما طلعت تجري الصباح ؟!
راجس قلب عيونه
- شكرا لانك حرقت علي المسلسل !
سياف قلب عيونه وهو يفتح صحون الاكل بس راجس سحبها من يده وصار يفتحها لنفسه
- احد قالك اني معرف افتحهم ؟!
سياف رجع سحب الصحون
- بحاول أدلعك يا دلخ ( غبي ) !
راجس كشر
- وانا ما ابغى دلعك طيب ! .. يكفي امس جالست تهددني قدام اخواني وتستغل اني تعبان !
سياف رفع حاجبه
- انا ما استغليت انك تعبان انا استغليت انك تبغى تكذب على ناس مهتمة فيك لانك منحرج امو ذي ثاني مرة تطلع من البيت على المستشفى !
راجس كشر اكثر
- اكرهك !
سياف ابتسم
- وانا أحبك
راجس تجاهله وسحب الملعقة
- انت ما عندك شغل ؟ .. متأكد انك محامي مو مجرد ديكور بالمكتب ؟ .. اشوفك تجلس معاي اكثر مما تشتغل المفروض انك مطرود من زمان !
سياف ضحك
- ذي ميزت انك تشتغل في مكتب ابوك
راجس بلع لقمته
- اها يعني انت دحين بتعترف انك شغال بالواسطة
سياف هز رازه وهو يحط المصاص في علبة العصير تبع راجس
- طبعا ! .. الواسطة ذي خلتني ادرس قانون بدون ما افكر اصلا بأي تخصص ثاني فأقل واجب منها هو انها توظفني !
راجس طالع في سياف
- انت ما اخترت قانون ؟
سياف هز راسه
- للحق .. لليوم معرف لو ذا اختياري او لا .. من طفولتي اتذكر انو اسم المحامي لصق فيا .. ولد المحامي .. مع الوقت الكل صار يقول اوه يلا اكبر واطلع محامي زي ابوك .. إلين بديت اشك انها مكتوبة قبل اسمي وماليا فيها خيار
راجس هز راسه
- ولو رجعت بالزمن ؟ .. بتختاره ؟
سياف عدل جلسته ورخى عيونه وهو يفكر .. هو اخذ القانون كأنه شي هو ملزم بيه .. يلقى نفسه فيه ايوة .. بس عمره ما فكر في شي غيره اصلا
راجس شاف سكوت سياف فرجع يطالع الاكل وتكلم
- لو اقدر ارجع برجع ادرس نفس تخصصي .. انا اخترته لاني ابغى اكون جزء من السفارة
سياف طالع في راجس
- لذي الدرجة حابب الشغل فيها ؟
راجس رجع ظهره على المخدة
- لانها الشي الا كان قدامي دايما .. من وانا صغير اشوفها .. واشوف عادل وهو يلبس ويروح .. اشوف امي وهيا تتجهز للمناسبات تبع السفارة .. دخلت كذا مرة وانا صغير وكنت مبهور .. انك تكون جزء من حلقة وصل تحسس الغريب انو ببيته .. انك تشتغل بالقطعة الوحيدة الا هيا جزء من وطنك بس خارج وطنك ..
سياف طالع في راجس قبل ما يمد يده لراجس
- لانك الغريب البعيد عن وطنه
راجس مد يده ومسك يد سياف
- لاني الغريب الا ماله مكان يرجعله
سياف ضغط على يد راجس
- عندك بيوت كثير ترجعلها .. احسنهم بيتي يعني .. بس انت الا مبعد نفسك
راجس رفع عيونه يطالع بعيون سياف
- يمكن لانو ذي المسافة كويسة ؟ .. اني ما اضر او انضر من احد
سياف
- تقصد انك تعيش حياتك كأنك مجرد مشاهد بدل ما تعيش
راجس سكت .. هل هو بيعيش حياة يتفرج فيها على كل شي حوله ؟ ..
- يمكن لاني مقدر اسوي شي بدون ما اذي أحد
سياف ابتسم على جنب
- انت مو قنبلة نووية متحركة .. ايش اكبر اذى بتسويه ؟ تحك بنتلي ؟!
راجس ما ابتسم
- ادمر حاجات ناس تعتبرها حقائق
سياف ميل راسه
- الحقائق دايما تدمر .. بس انك تدمر الناس بالحقيقة ارحم من انك تعيشهم كذبة
راجس عقد حواجبه
- بس يمكن ذي الكذبة مريحتهم !
سياف
- ويمكن انت تعتقد انهم مرتاحين بينما هما اصلا تعبانين .. يمكن هما تأقلموا مع ذي الكذبة لانهم اعتقدوا انها واقع .. ويمكن لما انت تظل مخبي الحقيقة عنهم انت جالس تضرهم .. وتضر نفسك
راجس هز راسه وهو يبعد وجهه
- ما حتفهم
سياف سحب يد راجس ناحيته وحط يده الثانية على وجه راجس
- طيب فهمني ! .. انا مستعد اسمع .. مستعد افهم
راجس طالع بعيون سياف .. قلبه دق .. هو مستعد يسمع فليش ما يتكلم ؟ .. ما تعب وهو شايل الحمل لوحده ؟ .. ما جا الوقت الا يخرج كل ذا من قلبه ؟
راجس بلل شفايفه
- ال .. الموضوع ..
قاطعهم صوت الباب الا انفتح ورازي دخل وهو شايل شنطته على ظهره ووجهه اشرق اول ما شاف راجس صاحي وابتسم
- اهلا بالاميرة النايمة !
رقرب رازي من راجس وحضنه فبعد سياف عنهم عشان يتركلهم المساحة
راجس ضم رازي
- ماني اميرة نايمة
رازي بعد عن حضن راجس وكشر
- صح ! .. انت اميرة منكوبة كل ما تخرج من قصرها يتصيدها ولد حرام !
بعدها قرص رازي يد راجس الا زعق بألم
- هيييي !
رازي طالع فيه
- تستاهل تتمدس ترى بس انا ساكلك ومراعي انك بالمستشفى !
- لا لا خذ راحتك هو بالمستشفى يعني لو انجرح بيتدخلوا بسرعة
ألتفتوا هما الاثنين على الباب وشاف رازي راشد واقف هناك وهو يبتسم .. في شي مختلف فيه بس مو قادر يحدد ايش هو
راجس كشر
- يعني بتضربوني !
راشد قرب من السرير وسحب راس راجس وهو ينكش شعره
- احمد ربك بس بنضربك ولا حقيقي يبغالك احتجاز في غرفة محصنة كلها اسفنج عشان لا يطيح على واحد من السما يطعنك !
سياف ضحك وراجس ألتفت يطالعه
- دافع عني طيب منت المحامي حقي ؟!
سياف رفع يدينه
- انا خارج محاكم الاسرة تماما !
راشد ضحك
- شفت ! .. محد بينقذك من يديننا
راجس عض على شفايفه .. ورازي بعد يد راشد
- ثواني .. لا يكون تعور !
راشد بعد عن راجس وراجس هز راسه
- ما .. ما تعورت
راشد جلس جنب راجس على السرير ورازي ظل واقف وهما يتكلموا بينما سياف كان يدخل شوي بوسط الاحاديث
⚜️⚜️⚜️⚜️⚜️
صحي سلطان من النوم وسحب جواله يطالع الساعة ..
مسح عيونه لانو نام كثير وبدأ يشيك على تنبيهات جواله قبل ما يدق قلبه وهو يشوف تنبيه من الانستقرام
دخل وشاف رسالة من انس
- تؤ .. انا الا سمحتلك تلقاني
سلطان ابتسم .. شي في شخصية المتحكم الواثق في انس جالس يجذبه .. وما يعرف لو ذا الانجذاب بينتهي بخير او شر ..
كتبله
- حلو .. طيب متى بتسمحلي اعزمك على قهوة ؟ .. او غدا ؟
انس قرأ الرسالة خلال لحظات وشاف سلطان انو انس بيكتب شي فرفع حاجبه .. توقع انس يسحب عليه وما يرد بسرعة
- بكرة .. الساعة ٩ .. بلاجيو ( كافيه على البحر )
سلطان رفع حواجبه بتعجب .. هل انس حدد موعد مقابلة لهم ؟ .. هل يعتبره ديت ؟
- تمام
طالع برسالته .. هل كذا كويس ؟ .. يعني ما يبغى يكون مرة مدلوق على وجهه ولا يبغى يبان انو مرة متحفظ .. يبغى يتعرف على انس اكثر بس هو ما يعرف لو رده ذا هو افضل رد ممكن يرسله الان
⚜️⚜️⚜️⚜️⚜️
وقف هيرو الفلم وألتفت لمالك الا كان ماسك الايباد .. هو جالس يشيك على جدول الموظفين عشان يعطي الموافقات عليه وعلى الاجازات .. عنده شخص يسوا كل ذا بس مالك يبغى يشرف على الموضوع بنفسه .. هيرو يعرف انو مالك تعب إلين أسس المطعم .. انك تفوز بلقلب " ذا شيف " كان اسهل خطوة سواها في مسيرته ..
حط هيرو راسه على كتف مالك وغمض عيونه .. مالك ترك الايباد ورفع يده يمسح على راس هيرو
- عندي موضوع ..
قالها هيرو بهدوء ومالك ميل راسه ناحيت راس هيرو
- الا هو ؟
هيرو بلع ريقه بشويش
- ايش خطتك .. بعد التقاعد ؟
مالك هز اكتافه
- اراقب المطعم واظل اشرف عليه عشان اوسعه
هيرو فتح عيونه ورفع راسه
- هذي خطة عمل مو خطة تقاعد
مالك رفع حاجبه
- ايش المفروض تكون خطة تقاعدي ؟ .. اجلس في البيت اطبخ لحبيبي الا يرجع من دوامه شوية اكل ؟ ..
هيرو عقد حواجبه
- مافيها شي لو كانت ذي خطة تقاعدك بس لأ
مالك عقد يدينه قدام صدره
- بتوصل لأيش ؟ .. نروح نعيش بدولة ثانية ؟ ما ينفع لان مطعمي لازم اشرف عليه حضوري لو مرة كل شهر !
هيرو بلل شفايفه
- نتبنى .. طفل
مالك ظل يطالع فيه وهيرو تردد يكمل كلامه
- ادري .. عندنا سند .. بس .. سند كبر و.. تقريبا هو بخير مع جولان .. وغالبا ما بيرجع معانا .. ف ..
مالك قاطعه
- جولان يشتغل بالسفارة .. فسند لازم يرجع معانا لو بيظل مع حبيبه
هيرو هز راسه وسكت
- صح ..
نزل هيرو عيونه ورجع يطالع التلفزيون الواقف وواضح انو كلامه ما خلص فمالك تنهد وعدل جلسته
- مين ؟
هيرو ألتفت
- لا تهتم .. السالفة اصلا غبية و ..
مالك مد يده وحطها على رقبة هيرو وسحبه ناحيته
- الا قلته من شوي مو جواب على سؤال !
هيرو طالع بعيون مالك
- محد .. هو بس .. ابغى .. ابغى اقدم تقاعدي قريب .. ف .. بنصير سوا .. بس انت بتنشغل بالمطعم لاني اعرف انو هو نتايج جهدك لسنين وانو هو اهم مشروع في حياته بس انا حكون فاضي و ..
مالك عقد حواجبه وقاطعه
- زواجنا اهم مشروع في حياتي .. المطعم حلم وتحقق بسبب اننا سوا .. لا تتكلم عنه كأنه شي خاص فيا .. انا مجرد طباخ .. لو ما كنت معاي كل ذيك السنين .. كان عمري ما عرفت اوقف لحالي واقرر افتح مطعمي .. محد كان حولي في اسوء ايامي قدك .. فعمرك لا تتكلم عن المطعم كأنه نتيجة جهدي لوحدي .. ولا انو هو اهم من زواجنا ! .. مافي شي بعيوني اهم من ارتباطنا !
هيرو عض شفايفه ومالك قرب من وجهه وباس شفايف مالك قبل ما يعضها بالقوة ويسحبها ناحيته قبل ما يفصل بوستهم
- ليش ما قلتلي انك تبغى تتقاعد قريب ؟ ..
هيرو بلع ريقه وهو يلف يدينه حولين مالك
- لاني ما ابغى اسوي اي شي قبل ما اشوفك مستقر .. انك تسيب المطعم وتصير مجرد مدير مو شي هين .. واول كم شهر بتصير اخطاء .. انو واحد مننا موظف وقتها بيفيد
مالك مسك وجه هيرو بيدينه
- بس انك تكون معاي وتمسكني عن اني اطرد كل طباخ يغلط من مطبخي بيفيدينا اكثر
هيرو ضحك
- لا تكون قاسي عليهم
مالك رفع حاجبه
- شوف مين الا يتكلم ! .. كم طالب رسب عندك ذا الترم ؟!
هيرو قلب عيونه
- لا تقارن ! .. الطباخين الا عندك بيحطوا كل جهدهم في العمل .. طلابي لو حطوا ربع ذا الجهد في المادة بينجحوا !
مالك ضحك
- صح صح .. ذكرني ايش لقبك في الجامعة ؟
هيرو كشر وهو يسحب مالك ناحيته
- مالي لقب .. شكلك تتخيل حبيبي
مالك باس شفايف هيرو الا شد على مالك وهو يعمق البوسة وهو بين يدينه
⚜️⚜️⚜️⚜️⚜️
نواف عقد حواجبه
- ثواني .. ايش اللي صار !
سلطان حط يده في جيبه
- قلتلك فكرته غبية
سامي زعق فيهم هما الاثنين
- انقلعوا دحين سوقو الشرف وسوا انو مالكم دخل بالموضوع ! .. سلطان انت كنت تدري وفضلت تظل ساكت .. ونواف .. انت كنت تدري اني ابغاه بالحفلة وانت بنفسك ظليت هناك عشان قلك يسيب حبيبك البكاية !
نواف تحرك ومسك سامي من ياقته
- اخوك يخاف يقتلك بس انا اقولك .. جيب سيرة حبيبي مرة ثانية على لسانك وقسما عظما بقطعه واعلقه في رقبتك !
سامي دف نواف
- انقلع ! .. انا جاي اكلمكم في شي وكل واحد منكم عايش بعالم ثاني
سلطان ظل جالس فوق الكنب .. عشان كذا مرهف كان يتصرف بذاك الشكل .. يرفض الاحتكاك بالناس .. يتغزل بالكلام فقط وما يلمس احد .. ودايما دايما يحاول ما يكون مع احد ثاني في مكان مغلق .. حتى عند سلطان .. اول كم شهر وقبل ما يثق فيه كان دايما يطلب منه انو باب المكتب يكون مفتوح لما يتكلموا .. مرهف فاقد ثقته بالناس بسبب أهله
سامي مسح وجهه بيدينه
- الولد منهار .. وانا السبب
نواف بعد عن سامي وتحرك لطاقة المكتب .. المفروض يتعاطف معاه بس .. هو ما يقدر يسامح مرهف على الشي الا سواه برازي .. حتى لو كان ضحية .. الضحية مو لازم تصير جاني على ناس ثانية !
سامي طالع في سلطان
- ما اعرف دكتور كويس .. فأحتاج منك مساعدة .. اعرف .. اعرف انك رحت لدكتور من زمان وكان كويس و ..
سلطان رفع راسه يطالع في سامي
- تعرف اني رحت ؟!
سامي هز راسه وهو يحك رقبته
- ابوي قالي .. انو بعد وفاتها .. انت رحت لدكتور لانك ما كنت قادر تتحمل حاجات كثير ..
سلطان طالع في سامي مو مستوعب .. بعد وفاة امه هو حرفيا انرمى من ابوه .. قاله ينقلع يدورله اي مكان يعيش فيه لانو بيجيب زوجته الثانية ( ام سامي ) وهيا ما تطيق سلطان .. وقتها لقى سلطان نفسه بالشارع وهو عمره لسه ١٧ سنة .. هو ما كان محظوظ زي سند عشان ياخذ منحة في جامعة برة ويكون عنده احد ينتبهله .. والاسوء انو ما كان في جدة وقتها .. فظل ينتقل بين بيت اصحابه الين خلص الثانوي .. طوال فترة حياته الجامعية عاشها بالسكن تبع الجامعة .. وفي الاجازات الطويلة كان يجي هنا لجدته .. عمره ما قالها شي عن الا سواه ولدها ( ابو سلطان )
ودحين يكتشف انو ابوه كان يدري انو لما انهار سلطان هو قرر يروح بالسر لدكتور هنا .. عشان في فترة حس فيها انو يبغى ينهي كل شي ويقتل نفسه ..
سامر ظل يطالع في سلطان .. ما يتوقع يجاوبه الان .. هو بيدور اصلا على دكتور كويس بس الا عرف يوقف شخص بائس زي سلطان عن انو يقتل نفسه بيقدر يوقف مرهف ويهدأ عقله .. هو فقط للان مو مستوعب الشي الا قاله مرهف .. انك تطيح ضحية اغتصاب من افراد عيلته .. وانو محد يصدقك مهما قلت لانو مين الابله الا بيطالع في ولد صغير في وقت هو متزوج فيه وعنده عيال ؟
تذكر رجفت مرهف وهو يقولها
" لما .. لما رحتلهم .. ابوي ضربني .. قالي اني فاسق ومنحط .. متشبه .. ايش تلبس شورتات قدام اعمامك ؟ .. ليش تجلس في حضنهم ؟ .. ليش تسمحلهم يسلموا عليك بالبوس لو ما كان ذا الشي يعجبك ؟ .. ولما .. لما كلمت امي هيا قالتلي انو مستحيل اي رجال يطالع في ولد ماله ملامح .. مافي شي في جسمي يغري وواضح اني جريت وراهم انا الا ابغى ذا الاهتمام .. "
الاسوء انو الموضوع ما وقف هنا .. لما سافر مع امه وتحرش فيه جارهم .. هيا ضربته .. قالتله " كل رجال الدنيا عينهم عليك ؟! .. لو كنت بنت مو كان احسن ؟! "
هو انخذل من الطرفين .. مو مرة او مرتين .. مرات عديدة وعلى مدار سنين .. لما سامي ورى مرهف الصورة مرهف بدأ يبكي .. الا قابله كان ولد عمه .. ايه العم الا اغتصبه وترك لعبة لعياله واكد منهم صور ذيك الليلة .. وظل يهدد مرهف بيها .. في قروبات كثير مستعدة تدفع عشان تشوف طفل يتعرض للانتهاك .. فيا يدفع .. يا ينتشر الفيديو ويصير مصدر نشوة لناس مريضة
وسامي وبكل غباء .. رجع مرهف لنفس ذاك المكان الا كان يشرد منه سنين ..
⚜️⚜️⚜️⚜️⚜️⚜️
شادي بلع ريقه وهو يطالع في غيث الا ابتسم
- حلو .. كل شي ماشي تمام معاك .. ويعني .. نقدر نحدد موعد العملية على الاسبوع الجاي ؟
شادي فز
- جد .. جد ؟!
غيث هز راسه
- ايوة .. كل ما استعجلنا كل ما كان احسن اصلا .. وصح فين راشد ؟
شادي بلل شفايفه
- راح يشوف اخوه .. بس .. بسألك .. عن .. الاضرار الجانبية لبعد العميلة ..
غيث تنهد
- مافي شي خطير .. بس .. ما ابغى اكذب عليك شادي .. يمكن .. يمكن .. تفقد شوية ذكريات ضايعة وتصير ملخبط
شادي عض شفايفه
- ملخبط ؟
غيث هز راسه
- بتجلس فترة تضيع في الوقت او تتذكر شي على انو امس وهو صار قبل شهر .. يعني لفترة ٣ شهور بعدها بترجع طبيعي
شادي هز راسه
- وما بيرجع .. صح ؟ .. الورم
غيث
- ذي في يد ربنا مو بيدي .. بس .. نقول ان شاء الله انو شي لمرة وحدة بالعمر
فادي ضغط على كتف شادي
- بتصير كويس
شادي هز راسه وهو مبتسم بهدوء .. راشد اخيرا بيرتاح
⚜️⚜️⚜️⚜️⚜️
أحبكم