حب حياتي...Samuel

عندي أمل

باقي عندي أمل..
غادي نبدا كلامي ب بااقي عندي أمل فالرجوع.. الا ماشي اليوم ولا غدا ممكن من بعد حتى عشر سنين ولا عشرين عام..
من نهار وافقت نكون ليه.. من نهار خرج من lagorixa اميمة ديال بصااح.. قلبي ضرب غير ليه.. عقلي ماقادرش يفكر فشي حاجة غيرو.. واخا ندور العالم بما فيه من المستحيل نعرف شي واحد لي يساويه واخا غير فرمش عينيه..
واخا نسمع عليه كلام كيفما كان.. واخا يقول بلسانو "كرهيني ابنت الناس" عارفة بلي مجبر.. عارفة ماشي لخاطرو.. عارفة بلي حتى لآخر نفس غادي يبقى يبغيني..
كان بإمكانو يخليني عايشة فالاوهام ولكن كانتيق فيه وحتى لآخر مرة هضرنا فيها كان معايا صادق وعمرو فقدني الثقة فيه.. وهادشي من بين الحوايج لي مخلياه يزيد يكبر في عيني..
واخا شحال تقال ليا.. أميمة راه مايصلاحش ليك.. اميمة راه كان كايهضر مع فلانة.. اميمة راه خسر معايا الهضرة.. وكيفما هضرو ليا فيه مشاو عندو قالو ليه عليا.. عمرني بغيتو.. تزوجت وسمحت فيه.. وعمرني حسبتو.. قالو ليه بلي عندي علاقة مع غيرو.. قالو ليه مرضت بسسبو... قالو ليه تعرفت على الجديد.. قالو ليه
وحتى حاجة من هادشي ما كاينة من غير قرايتي لي هملت.. الحاجة لي كان ديما يوصيني عليها فيها سمحت.. وقفات حياتي في فراقو.. عقلي مابقى قادر لا يدي لا يجيب.. حبست كلشي وفكرت في حل.. كان قدامي حل الهجرة..
فكرت نمشي نشوفو.. توحشت نعنقو.. كرهت البعد.. شحال من هدف كان عندي.. شحال من حلم حلمت..فكرت حتى عييت وكانرجع لنفس النقطة الحياة ماشي هاكدا حلمتها... بلا samuel.. الحياة بلا بيه ما عندها معنى..
نهار قررت ندفع الفيزا.. وحدة قالت ليا بلوكاني.. وهو غير الكونط ديالو فمرة.. والثانية قالت ليا كمل حياتو كمليها بلاه وجمعي لي بقى ليك ديال الكرامة..
وفجأة طلع قدامي كونط جديد.. والحالة العائلية خاطب.. وعاد فهمت.. وعاد قدرت نتيق كل كلمة قالها بالحرف.."انا عاجز ا اميمة.. انا ماعندي حتى حل آخر.. انا مجبر.. انا ما بقيتش كانآمن بشي حاجة سميتها الحب من بعدك..." رجعت بذاكرتي للماضي زاوية بزاوية.. بكيت دمعة على كل حاجة جمعاتنا.. بكيت الدم حيت لي تمنيناه ما تحقق.. بكيت حيت رجعت للحيرة من جديد واش نكمل لي بديت ولا نكمل حياتي بلا بيه.. بكيت حيت ما بقيت عرفت فين نرد براسي.. بكيت حيت ماشي انا هادي.. بكيت على كل فرحة فرحتها.. بكيت على كل فرصة كانت بين يدي وضيعتها.. بكيت عليه.. بكيت بسبب الحب.. بكيت حيت كل نهار كانزيد نبغيه.. بكيت حيت تمنيتو جنبي.. بكيت حيت بغيت هادشي يكون كابوس ونفيق منو ونلقى راسي كانعاود نعيش اول لقاء لناا بجوج.. بكيت على بزاااف الحاجات... بكيت حيت الغربة سرقات مني حاجات بزاف من غيروو.. سرقات مني راسي بصفة عامة.. بكيت وتمنيت تكون آخر مرة ننزل فيها الدموع...