شتل عنبر

البارت ٧٨

السلام  عليكم

شتل عنبر

بقلمي Wasan Alsaad

البارت  ٧٨

......................

الحيطان منخل والدروب احفور
والبيبان صرخه بلا صدى ولاصوت
صفنت كَمبره بوحشة مِسيّت اكَبور
ووجوه الزغار الحاضنه الشباج
باكَة ورد ذابل بلّ الحزن محصور
والنظره متاهه وخوف يرضع خوف
من يهتز قفل حسبالهم شاجور
من يهتز قفل حتى الطيور اطير
مرعوبة جنح وبلا وعي ادور

ما ظل لا ملاذ يلوذ بيه الخوف
بس حسرة مراره بحشرجة مصدور
كَامت والجراد اسراب تتله اسراب
من تسكن الريح يعشش المنثور
كَامت والمناير تختلي وي ناس
وتخاوي الرصاصه الصكر والعصفور
كَامت والبشر موبشر ،غابة زور
يحصده العصف ويلوجه التنور
حتى الماي ورّث والتوى الصفصاف
شاحب والنهر من كثر غيظه يفور

والموت بصلافه ايدكَ على البيبان
ويوزع عليهه السِدرْ والكافور من الموت
كَامت والدكَايكَ ترضع من الموت
كل لحظه بطبكَ كل ثانيه بعاشور
كَامت والدكَايكَ ترضع من الموت
صفنت رحى الكًَاع، ورحى الموت ادور
كَامت من دخيلك ياعلي الكرّار
موهاي القيامه؟ المن بعد مذخور

(  قصيدة  القيامة  بقلم   عريان  السيد  خلف  كتبت هذه  القصيده  تخليد  لانتفاضة  شعبان  وما جرى  بعدها من  انتقام  وحشي  )

.........................................

ماذا   لو  كنّا   نملك  اكبر   ممحاة  للزمن ؟

ماذا  لو  كان  بيدنا   ان  نمسح  من ذاكرتنا  ومن  تاريخنا    سنه  او  حقبه  زمنيه  ؟

سيقول   البعض   سمنسح ٢٠٠٣  وما  بعدها   ،   لا  يلامون لكن
من   عاش    سنة  ١٩٩١  وهو  مدرك   ما حصل   فيها   سيعلم  
من  هنا  بدأت   المرحله   للسقوط   وتوالت  الصفحات 
وجرفتنا  معها  في بحر  لُجي   هائج   تتقاذفنا  الامواج   فيه  
ونحن    صاغرين  مذعنين   ترفعنا  موجه  وتنزلنا الاخرى  في  بحر لايعرف  طعم   الماء  و رائحته  ولونه   لكنه   مميز   بلون  الدم  المخيف
وطعمه  غير  مستساغ    ورائحته  النتنه 

الحرب  ما   تخرب  مدننا  وتحيلها  مدن   الخراب  والدمار    بل
أحالت  ارواحنا  الى  خراب  .....

ليلة ٢٨ شباط / ١-اذار-١٩٩١

٤٣   يوم  بالضبط    عاشوا  العراقين     اصعب  وابشع   الايام   

يجي   الليل   والكل   يتشاهد    وما  يدري  راح  تطلع  عليه  شمس  باجر  ،   يحل   الصبح  اللي  يكضوه  بدون  نوم   لو    غفوات  متقطعه ما  تشبع   من جوع  الجسم   لراحه  النوم   خوفا  من   بدا   غاره   جديده  

صوت   الطيارة   المسماة   ب (  الشبح )  وحده   يخطف   الروح  مِن  الجسد   صوت  مرعب   كأن    طائر   الشؤوم   يحوم   فوق   رووس    العباد 

يختار   ضحيته   .....

تحل   شمس  الصبح   الخجلانه    حتى  شمس   ذيج  الايام  كانت  مختلفه  يمكن  هم   تحالفت  ويه  قوات  التحالف   

الناس  كانت  تدور عليها ادفى   عظامها   اللي  نخرها  برد  كانون  الثاني وشباط    بظل   نقص  وغياب   الكهرباء  والنفط  والغاز 

بهول  بيت   خلف   تحديدا    بالمساحه  المحصوره  بين  الدرج   وموزع  اللي  ياخذ   لغرف  الطابق  الارضي  والمطبخ   الخالي  من وجود   شبابيك    
لان   الهول  كبير    هم   اختاروا       المكان  المتوسط  البيت     وتركوا   مكان   كعدتهم   القديمه     ودكوا  على    الشبابيك   نايلون   وبعدها  كارتون   وبدل  البرده    خلوا  بطانيات   صوفيه   ثخينه   (   فتاح  باشا )    حتى   تخفف  من  البرد 

الكل   كاعد   بمكانه    متلفلف  بأكثر  من  بطانيه    مفروش   جواه  بطانيه   على  الفراش   حتى     تخفف عنهم   البرد     خصوصا   بعد  نفاذ     النفط  الابيض      من   بيوتهم  وشحة   الحصول  عليه   

لكن  اليوم  رجعت    الصوبه  الكرونه  الحمرة الأسطوانيه   ام  القاعده  السوده  يسموها  العراقيين   (  ام  الصينيه  )   بفضل  وفيه   اللي    جابت   وياها  جليكان   كانت   خازنته   لوقت  الحاجه  

اخذوا  منه   للصوبه    وللبطل  ابو   التمره  والخيط   اللي  يستخدموه   للاناره   بدل    اللاله  والفانوس   لان  للبطل   اقتصادي    باستهلاك   النفط 

مخلين   اثنين   واحد   على  البايه  الثالثه  من   الدرج   والثاني   باب  التواليت  (  اجلكم  الله)

الساعه    تعدت   العشرة     سعده  اللي  نايمه  اقرب   شي   جوه  الدرج      والبقيه   متوزعين      بمكان   المحصور    بالموزع   

الجهال  يم   فاطمه  اللي  من  طرفها  الثاني  مكان  امها  وفيه وياها  حفيدها   ايمن 

ومقابلهم   نوريه   وخلف  وبصفه     منذر   

الليله      الكل   متجمع     يم   فراش  نوريه  اللي  صارلها   يومين   مريضه     النهار  والليل     رغم   ما مبطله  لا  صلاه  ولا  دعاء   لزهير  ولكل  شاب  امه  واهله  يترجون  عودته من  الحرب  لكن   الاخبار  المرعبه  والإشاعات اللي  تسمعها   خلت  قدرتها  على  الصبر  تنهار  

خصوصا    بعد  ما  سمعت  قبل  يومين  من  اذاعه  روسيا  اليوم   شلون    طائرات  قوات  التحالف  قصفت     أرتال    وحشود    الدبابات  والمدرعات 
وناقلات  الجنود   المنسحبة   من  الكويت   على   طول    الطريق   السريع  رقم   ٨٠    الرابط  بين    مركز  مدينه    الكويت  العاصمه   باتجاه    العبدلي والحدود   العراقيه    وعن  بشاعه   الهجوم  وعدد الضحايا   بالأنفس   والمعدات 

كانت  طول   النهار   تهذي وتون   باسم  "  زهير "   خصوصا  بعد  ما  وصل    لأجوائهم   الدخان    المنبعث  من حرق  آبار    النفط  الكويتيه  بعد  ما   أضرمت  بيها  قوات   الحرس  الجمهوري   النار   قبل  انسحابها 

اذا   البصره   صار   نهارها  اسود   ورائحه  الدخان   خانقة      شلون   الحال   على  الموجودين   بالكويت    واللي   عدهم   ربو مثل  حال  زهير

فاطمه    تسوي  كمادات   وتخلي  على   كصتها      وهي  تسمي  باسم  الله  كل  ما  تبدلها   ونوريه   تفز  من بروده   الكماده   و وفيه  كاعده   يمها   وتمرخ   بايدها  وبصفها   خلف    اللي  يقرا   آيات   

وفيه  انطت  امر   لفاطمه

"  ولج  يمه   كومي  جيبي    راس  بصل  كصي   نصين   وتعالي " 

ركضت   فاطمه   وجابت  المطلوب     زاحت  وفيه  خلف  

"  شو  ميل   عني  خويه   اكعد  ليغاد 

خلت   كل  نصف من  راس  البصل  على  راحه   قدمها  ولبستها  جواريب 

منذر   اللي  متولي   مهمه    البحث  عن  الاخبار  والتنقل  بين  القنوات   بدل  من  ابوه  اليوم    اول  شي  يبدا ويه   اخبار  إذاعة   صوت   العرب  من   القاهرة    الكنها  ما  كانت  واضحه   دائما   يتقطع  البث  بعدها   ينتقل   لمونتكارلو    بعدها   ال بي بي  سي    و صوت  روسيا  العربيه   وبالاخير    صوت  امريكا  بحث  عن  خبر   مختلف  او  تحليل  

كان   مقرب    الراديو   لاذنه  حتى  يسمع   اجه  وقت  الاخبار   لو    لا  

بعده   عن  أذنه  وكال

"  باجر  لازم  اخذها  للمستشفى   بلكت  الكه  طبيب  ممرض  "

جاوبته  فاطمه  وهي   تعاين   لخالها   الساكت  وعيونه  على  النايمه  وتون  وكأن   كل   شي  بيه   يون  وياها    عيونه  بيها  الم   على  حالها  ماينوصف

" من طلعت انت   اخذها  جاب خالي  المضمد وانطاها  أبره "

سالته  وفيه

" صدك  يمه    منذر     شنهي  حال  الدنيا   والولايه  ذكن  ايام  الطيارات كل شي ما  افتهمنا  ولا   احد  عنده  واهس يعرف  شصاير   بحال  الولايه

لان  نخاف  ما  نصبح   لثاني  يوم  شنهي   شفت  ما  شفت    شتكول  الوادم "

تنهد    منذر   بحسرة  قويه

"  والله  يا  عمه  ستر  الله على   حرب  ايران      لا  ظال  جسر  
كل  الجسور  قصفوها  جسر  الكرمه  وجسر  خالد   وجسر الكرنه  
كطعوا    المدن  عن  بعضها 
لا  ظلت  محطه  كهرباء  ولا   بداله (   الاتصالات)     القصر    اللي  بسراجي    دائرة    المخابرات   اللي  يسموها  الاستراحه   بشارع  دينار 
خطوط   نقل    المنتجات   النفطيه  من   الحقول  للمصافي

حتى  معمل  البيبسي  اللي  بالحكيميه  سوه  كاع  مصفصفه 

تذكرون    ثاني   ليله  لو  ثالث  من  كلنه  ما  نصبح  من  كثر  الغارات  والصواريخ   خو    البيت  راد   يتفلش  علينه "

زاحت  فاطمه     الكماده  ورجعت   الثانيه  على  جبين  نوريه

وهي   تهز  بيدها 

"  يمه  موت  احمر الله لا  يعيدها    الجهال  للصبح  ما بطلوا  بجي  وصريخ"

جاوبها   منذر

"  هي  بهاي  الليله  ضربوا  بريد  العشار   والمخابرات   و معمل  البيبسي "

سالته  عمته  وفيه 

"  جا  عود ليش  معمل  البيبسي   شبيه  "

جاوبها 

"  والله  عمه   الحجي  هواي  والله وحده  يعلم  الصدك  وين  بس  اقرب  كلام     العقل  يصدكه 

مو  من  بدات  الطيارات  ليله  ١٦-١٧  تقصف    
ثاني  يوم   طلع   الريس  خطب   وكال  بدات   ام  المعارك   هاي  بيوم  ١٨ 
وكان   رده    ضربوا   السعوديه   وإسرائيل   صواريخ 
ارض ارض   

  الجماعه قابل   هم   ايران  ذوله  تحالف  دولي   اكثر  من ٣٣ دوله  وكلها    عندها   قوة  وتكنولوجيا   الطير  الطاير   ترصده   بالأقمار  الصناعية 
  رصدوا  إطلاق   الصواريخ    اجه     من هاي  المنطقه   يكولون   لو  بيها  منصة إطلاق   لو  مخزن   مال   صواريخ   ساوها  ويه   الكاع 

الكارثه    بالبيوت   القريبه   خطيه راحوا  ضحايا
واليوم  اكو ولد يشتغل   بمصفى البصرة  حجالنه   على جماعته   يكول   انتدبوا  مجموعه ودزوهم  لمصفى  الناصريه بشغل    خلصوا  وراجعين   لأهلهم   بنفس   ليله  الضربه    عابرين  الجسر    بناصريه   شفت  كامل  طالع 

اكو   ملحكين     يعبرون   الجسر  واكو بعدهم  بالنص    وتجي  الطياره   وتضربهم  وراحوا  شكد  ضحايا   "

جاوبت وفيه    بقهر

"   دخيلك ربي  شمسوين   شنهي   جنايتنا  وهيج يصير   بينه "

  بدات    بالراديو     موسيقى   دائما  تطلع   قبل  اي   مؤتمر   صحفي 
اشر    منذر   الهم   بالهدوء  ورفع  صوت   الراديو وأعلن المذيع    عن  انتقال  البث  المباشر   الى قاعدة   القوات  المشتركة في  الدوحه  بقطر  
حيث  يعقد   قائد  قوات  التحالف 

الجنرال  (  نورمان شوارتسكوف   الملقب  بالدب  الابيض )  مؤتمر  صحفي  

اجاهم   صوت  المترجم   بعد كل  جمله   ينطقها  القائد   العسكري 

وكان  ملخص   المؤتمر   هو   اعلان  وقف  إطلاق  النار  بين   الجانبين  بعد  توقيع   الطرفين  على اتفاقيه  الخيمه  بعد  اجتماعات   بين  الطرفين  دامت  يومين   نتج  عنها  قبول  الجانب  العراقي  بقرارات  مجلس  الامن  بدون  قيد  او  شرط 

الكل    ظل   ساكت    لثواني  ما مصدكين   انتهت   الحرب  
انتهت  وشنو  نتيجه     نهايتها  ندفع  ثمنها   غالي 

وره  شويه   سالت  وفيه 
"  يعني    شنهي   النتيجه  هسه "

جاوبها  خلف   اللي خرج  من  سكوته    بعد  ما  حس  بنوريه   نامت
وتوقف  صوت   أنينها

"   يعني  خلصت الحرب     ولازم   جيشنا   يكمل  انسحابه  بسرعه   ونعترف   بالحدود   بينه وبين  الكويت  اللي  هم  حددوها  وندفع   تعويضات 
عن   كل شي  خسرته  الكويت  "

دكت   على  رجليه    وفيه 
"   خوش  والله   جا من  الاول    وانسحب   اكفي  الوادم  هل  المصايب اللي    حطت  على  رؤوسها   تاليتها  ما رضه  بجزه رضه بجزه و خروف

انا  بس  اريد  اعرف  مو  ذاك  اليوم  بالراديون  كالو    العراق  وافق على 
إطلاق   النار  مدري  شسمه    جا  هسه  شنهي  ردينه  ردود "

جاوبها   منذر 

"  صح  عمه  يوم  ٢٢-١  وافقوا  ربعنا   على  مقترح   روسيا   بس
رادوا   ٣  اسابيع   مهله  للانسحاب  امريكا  ما رضت 
تكول  مثل  ما  دخل بليله  ظلمه   يطلع   منها  بنفس  السرعه

ومن  بدات    العمليات  البريه  وشاف   شلون  السالفه  ما  بيها  نتجه  والكفه  الراجحه  الهم  يوم  ٢٥  -١    رجع  وافق  على  الانسحاب  من  غير   شروط   وبيوم  ٢٦-١  يعني  قبل ٣  ايام   بدا    الجيش  ينسحب 
بس    كبل  لا    يتركون   مواقعهم   شعلوا   النار  ب ٧٠٠ بئر  نفط   كويتي  من  اصل   الف وكسور    بئر   واكيد    الطيارات    والأقمار   الصناعية   رصدتهم    عاد   بنفس  اليوم  وقواتنا    بالطريق  
اعترضتهم   الطيارات   وقصفت  الأرتال     من  النهايه  والمقدمة   حتى    تعيق    حركة   الرتل   ودمرت   اغلب    المدرعات  والدبابات  
والله  يعلم     بخسائر   الأرواح     الظاهر    هاي  كانت    كرصه اذن 
  ارواح  العالم  تروح   وراها  هم  كعدوا  بسفوان  (   مدينه  عراقيه  على  الحدود  العراقيه  الكويتيه )   تفقوا  وتصافحوا   شهامهم  "

جرت    وفيه  حسره  بعمق  كل  جرح  بكلبها   بعمق  الم  الفقدان

"  اي  يمه   جا مكيوله  هي  ما  يروح  بيها  الا  ابن  الخايبه  ،  عسانه  لا  حبلنه  ولا  جبنه ولا  ربينه    جبناهم  للكبور   وي  ربي  الگ  بيها   اراده 
... يمه   يا   زهير   يا  امجد ناخيه   ابن   الحسن  الحجه   واحنه  الليله  
ذكرى   ولادته   يردكم   النه  سالمين   ويقر  عيونه  بشوفتكم   " 

امنوا   البقيه  على  دعائها  ..

ثاني  يوم   كعد  من  الصبح   منذر     بعد  طلوع  الشمس  بشويه   انتبه  الكل  نايم   بس  فراش  امه   خالي   وصوت  ابوه  يقرا  قران   يجي  من  الديوانيه 

كعد   وراح  للمطبخ    شافها   كاعده   يم  دجه  الباب  وعينها   على   الغيوم   السوده  التارسه  السمه  من وره   الدخان     باس  راسها    وسالها

"   شلونج  اليوم  يمه   ،  الحمد  لله  حرارتج  نازله  بس ليش  كاعده   بالبرد   هيج    تعالي  جوه   اروح  اطلع   اترس   المنقله  شويه    حطب  وفحم   وأجمره  وادخله  يمج  يدفى المطبخ
هذه  كانت   وحده من  وسائل  التدفئة     ياخذون     الماعون     المصنوع  من  الحديد اللي  يستخدمه   البناء    بنقل   خلطه  الأسمنت  ويخلون   بيه   حطب  سعف   وفحم   ويشعله   لحد  ما    يخلص  من  الدخان  ويجمر     ياله  يكعدون  حواليه    حتى   لا  يستهلكون     كميه  النفط  اللي  عدهم 
جاب المنقله  ودخلها   وشال  القوري  وخلاه  عليه    وتقرب  منها 
" يله  يمه   كومي   فدوه  اروحلج   دفي    نفسج   لا  تتمرضين "

نحبت  وبجت
"  انا  اكعد يم  النار    اتدفه  وبالليل  عليه  تل  بطانيات 
وابني   ما  ادري  بيه  بردان   جوعان   عساها  ماتت روحي  يمه  زهير "

اجاهم  صوت  خلف  من  وراهم   ما  يقل عن  خوف  نوريه  بس  مصبر  كلبه  وموكل  اموره  لرب  العالمين   ومأمن  ابنه  عنده 

"   سمي  باسم   الله    نوريه   وكليه  امرج   ماكو    ارحم  منه
كلبي   مطمن  يكلي   زهير   يرد  بالسلامه " 

  تدنت  من مكان   كعدته    يم    المدفئه 

ولزمت ايده  تستمد  منها  القوه 

"  صدك  خلف   فدوه  اروحلك   انت  زلمه   صايم  مصلي   وما  أظن  الله  يخيب  دعاك  وانوب  ابوه    ادعيله  خلف    رحمه  لأهلك     "

وطاحت   دموعها   تسابق   وحده  وره  الثانيه 

حاولوا منذر  وخلف يهونون  عليها ويصبروها  رغم  الخوف اللي بداخلهم
بعد مرور  ساعتين     اندك الباب  الخارجي   وكان  الكل  متجمع  على الريوك    طلع منذر  من باب المطبخ  ويم  الحديقة  سال عن  هويه    طارق  الباب   اجاه صوت   ابن  جيرانهم    راح  فتح   الباب   وبعد  شويه   رجع   وهو  مستعجل    شاف   نظراتهم   عليه  وكلهم   منتظرين 
يعرفون  منو  اللي  على  الباب   وشنو  يريد 

جاوب كل  تساؤلاتهم  قبل  لا  يسالون

"  يابه   هذا  جمال  ابن  جيرانه  يكول   الناس  اغلبها   طلعت    لساحه  سعد   تسال    عن  اولادها   الراجعين     لان  الجيش   المنسحب  كاموا  يوصلون  يكول خلي  نروح  بلكت    نحصل   خبر  عن  اخوانه  لو   نتلكاهم "

وكف  خلف  على  حيله 
"   اي  بويه   امشينه  "

التفت    عليه منذر   اللي وصل    لباب  المطبخ  المطل  على  الهول

"  لا  يابه   أبقى  انت   مو   اثنينه نترك  البيت   ما  ندري   شنو  اللي  يصير  " 

وأتوجه   منذر      مع  مجموعه  من  الجيران   لساحه  سعد  ...

......... بنفس  اليوم    بيت   ناصر  العصر

كانت  عنبر  تحضر  معكرونة  بصلصة الطماطه    من  دون  اي  لحم    للعشاء  وبجانبها   طاوه   بتيته    وطماطه   محموسات (  مشوحات)   بقليل  من  الزيت  والبهارات  
هذا كان   الروتين     بأيام  الحرب   قبل  الظلام    كل  شغل  ماكو    كل  شي  متحضر  وجاهز   الإنارة  والتدفئة  والاكل   حتى  يقللون  حركتهم  بالظلام 

البنات   شمسه   ونهله   متكابلات   على  صندوك   طماطه  اشتراه خالد   من  سيارة  اليوم كانت تفتر    بالأحياء   تبيع   إنتاج مزارع   الزبير    وسعره كان  كلش  رخيص    والطماطه  كان   بعض منها  بيه  خضار 
فكانوا  يفصلن   اللي المستوي (  الناضج)  عن اللي بيه  خضار

تحت  تعليمات   كلثم اللي  اشترت  من  ابو  سياره  كم  شدة  ثوم  اخضر   وجمعته    وشدته  بخيط   وعلكته بالمنور حتى  يبس  وهي   تحس   بأعظم  انجاز   لان    سعره  رخيص   والثمر كبير      

كلثم  وشمسه  وحسين     اجو    بيت    ناصر    بعد  إلحاح  من  ناصر  وخالد   قبل  الحرب  ان   يجون   يمهم    ونفس  الحاله  خلف  عرض عليهم   يجون   يمهم   لكن    شمسه  فضلت  تروح  يم  اهل  ابنها   افضل 

دخلت   كلثم    فرحانه 
"  والله اليوم  صدك  فرصه     بس  الثوم   كافي   هذا  يطلعنا منا  للموسم  الجاي  اذا  عدلين  بوكت  الصبور  وكت  الباميا  ما   نحتار "

  ردت  عليها  شمسه 
"  والله  يا  عمه     عليج  سوالف    الوادم  حايره    تعيش  منا  لباجر  وانتِ  حايره   بالثوم   والباميا "

ردت  عليها   بطريقتها   الهجوميه

"    خايبه   وموت  الجلاب السود   هو  عمر  وكضه   كل شي  ما  فتهمنا منه  عود  يظل  للوادم  العدله   تأكله  بثواب  ارواحنا "

التفت  عليها  نهله 
"  عمه  خلصنه الطماطه   هسه   الخضره   اخذها  اخليها   بجيس الطحين   حتى  تستوي   والحمره   شنسوي  بيها  نعصرها   هم  تخرب  ماكو  كهرباء   تجمدها  "

جاوبتها  كلثم 

"     انتن  لهنا  ونعم  الله عليجن باجر    أغبش  عليها  من  الصبح 
وابدا  اعصر   حصه  و اسويها  معجون   وحصه   اجففها "

جاوبتها  شمسه

"  اوووه   عمه   جا  على  ما    يعكد (  يثخن )   مخلصه   قنينه   الغاز
وشلون  هذا جففين  الطماطه "

فرت   كلثم  بيدها 
"   من  اكول  عليجن   غشيمات ما  ترضن  ،  هاي  مال   يفور  لحد ما  يكرض   سوالف  الخارمات اللي  بس  تريد  تكضي   واسمها  مسويه  معجون   احنه  نسوي  على  تعلوم اهلنا  نشره  بصواني   ونغطيه  بوصل  ململ   حتى  لا  ترابه  لا   دوده    تطيح  بيه  
وتجفيف   الطماطه    حالها  حال  الباميا 

التفت     لعنبر    ولج  يمه  ما خلصتي  شكون هي  باجه  هن    بتيته  وطماطه  صارلج   ساعه  تكلبين  راحت   كضه  الغاز "

جاوبتها   عنبر
"  خلصت عمه    طفيت  النار "

دخل  حسين   وشايل  بيده  علاوي    ابو  ٩  اشهر  واللي  بده  يزحف    يبجي  من  شاف    نهله    كام  يلج  بالبجي  يريدها   وكفت  على  حيلها   وأخذت  من    الماي    المتروس    بكل    ألاواني  الموجوده  
وأخذته 

"     تعال  يمه حبيبي    شبيك   تلج  تريد  تنام "

خلته  بحضنها  وبدات  تنيمه

وكلثم   سالت   بامتعاض
" جا وين   امه   شو  مالها  حس"

ردت  شمسه
مو  صب  الماي  بحنفيه  الحديقة  جرت   صونده تترس   السطوله   والجليكانات بالحمام  وتكول  عندي  ملابس علاوي  اغسلهن "

التفت نهله   لعنبر وطلبت  منها
"   صدك  عنبر    آخذي   من هاي  الطماطه  القويه  شلفيها ورشي  عليها
ملح   خطيه  من شافتها  اشتهت  وهي   حامل  وتتنسه"

حركت  كلثم   حلكها  يمين   يسار  وكالت
"  خطيه  اي  ليش  لا   بعدين   كامت  تحوم  بنظرها  حواليها  كأنها  تبحث  عن  شي   ولوحت  بيدها مهدده ... ولج  انتِ شنهي    كطعتي وايرات كلبج  بعد  ما  عندج  احساس   ،  هسه من  انزع  مداسي   واتولاج  وين  اللي يوجعج  احد  يلومني "

ردت  نهله 
"  ليش    شمسويه   يا ربي والله  احتاريت   اذا  صرت  زينه  و  داريتها  ما  رضيتوا  وان   صرت  مو  خوش  وتناكرت  ما  رضيتوا   بله  شلون  حلنها   اليه"

جاوبتها  كلثم
"  ولج  يمه  افتهمي   احنه  مو  عليج  انتِ وضرتج  لا  اللي  تسويه  وياه  من  الزينات    احنه  نحجي  عنج  وعن  رجلج   جم  دوب   هيج  تظلين
العمر   يابنيتي   يمشي  وما  يوكف  لحد   ليش  تضيعين   عمرج 
هيج  تظلين  مرمره   روحج  ومرمرته وياج   الم  روحي   وارد  جوه جناح  رجلي  والحك  اخلف   اثنين   بعد   شو  بعدج  صغيره   شنهي   ناويه  تظلين   على   هل  الواحد الله  يخلي    والواحد  الله  لو    تردين  تظلين 
تربين   بزر   غيرج 
علاوه   انه  صار   عندي  من  قويدر    وليد   اثنين  خاله  راضيه  وخليه ياخذ كاوليات   الدنيا   شلي  بيه  المهم    عندي  اللي   يشيل  كبرتي ويأنس وحدتي  ...
شوفي  انا هذا  الحجي ما يصرفلي   ذيج    المده   اكول  خطيه  بعدها  جرحها خضر     وحكها   بس   لا   لهنا وبس  اذا  انتِ ما  تعرفين  صالحج
انا  هم  حالي من حال نوريه   اجيتي لهذا  البيت   بنت ١٨  سنه   هم     باريت  وعلمت    والي حك عليج  وعليكم  كلكم 
لحكي   على روحج  لا  تخليني    وادفعه  دفع    لحجرتج    وتدرين  بيه  اذا كعدت  ركبه  ونص   ما  تطول  عندي  السالفه    ... كامت  كلثم   على  حيلها  وبنتره  كالت ... شو   انطيني  الفرخ  من حضنج
والله   يا   الله    نسوان  مامش  عكل   "

بنظرات    مستغيثة    التفتت  لشمسه
الي  رفعت  أكتافها   وعلى  وجه  ابتسامه  رضا     

"  ما   عندج  مفر   كلثم  وحطتج براسها   "

  رفعت   عنبر راسها   اللي  شهدت كل  هذا  الحوار   بذهن   غايب     ذهنه  متشتت   ما  بين   اخوها  امجد   وما  بين  زهير  
الدموع  المكتومه    ليليه هن  رفيقاتها
لمحت  من  شباك  المطبخ  اللي كبالها 
راس  رجل  ظاهر  من   زخرفه الباب   العلويه     ركزت  بيه   ميزته  منذر  
بعدين  سمعته  يدك  الباب   ويصيح    ومبين  من  صوته   فرحان

"  يا  اهل  البيت    ، خالي  ناصر    البشاره  "

البنات  هم   سكتن يحاولن  يميزن   الصوت   اللي  بره
التفت  عنبر   لنهله  وهي   مرتبكه 

" هاذ ( هذا)  هاذ    منذر  بالباب "

وكفت   نهله  على  حيلها  وحسين   اجتازهن  وطلع  يفتح   الباب 

ودخل     منذر    يسند   بواحد  ما كدرن   يميزنه  من  اول  نظره  وياهم  واحد  ثاني  هم   ساند  امجد  من  الجانب  الثاني 
شهكن   وطلع  صوتهن     ثلاثتهن صرخه  باسمه
"  امجد  "

طلع   على  صوتهن  خالد  وناصر    اللي  سحب  ابنه  من  بين  ايدين  منذر     والشاب  الثاني  اللي  بعدين  عرفوه   ابن  جيران  بيت  خلف 
  وحضنه  بكل  قوته   وكعدوا  اثنينهم بالكاع   بعد ان  خارت  قواهم 

المنظر  كان  مهيج  للمشاعر  ومبكي 

طلعت كلثم  وعنبر   وراها  والبنات  واكفه   باب  المطبخ  عنبر  كعدت  بالارض   يم ابوها  وامجد  ولازمه  امجد  من ظهره وتبجي 

"  والله    جان  گلبي يعلم    راح  تجي  اليوم  والله  حتى  سويتلك   المعكرونه  مثل  ما تحبها     حمره  وبلا لحم     "  

التفت  عليها  وأخذها   بحضنه  وهم   اثنينهم   صاروا  بحضن  ابوهم   وهي   تسأله  

"  بيك شي    يوجعك  شي " 

جاوبها   وهو  شويه  يبوس    براسها    و شويه  بيد  ابوه  اللي  ما بطل  لسانه   حمد  لله
"  لا  ما بيه  شي  بس  رجليه   مورمه  من  المشي "

الولد  اللي ويه  منذر    انحرج   وقبل لايطلع  كله

"  منذر  انا   انتظرك  بالسيارة    حتى  نرجع  قبل  لا تغورب "

  نزل  عليهم    منذر  وخالد  حتى  يدخلوهم  واشتغلت  هلاهل  كلثم                      

كلهم   كاعدين   حواليه   يعاينون  على     الإنهاك  والتعب   والكسره  المبينه  على  كل  شي  بيه     الملابس المزكه     والجروح   الطفيفه    وريحته  دخان  والسخام  اللي  على  وجه  

كام   عاين  عليهم   واحد  واحد   متلهف   يشوفهم   بلل شفايفه  المتيبسه

"  لا   تسألوني    اي  شي  هسه   بس   اكلكم    طلعت  من  الموت   اللي  شفناه   شي  حتى    بأفلام   هوليود   ما  صاير   ...  تعاين  لكلثم   اللي  كاعده  يم  رجليه   تمرخها   وكال  ...  عمه   عطشان "

كامت   وحيلها   ما  عانها  تكوم  ردت  كعدت  وصاحت    على  اللي  بصفها  
وكانت  عنبر  
"  كومي   جيبي   الماي   لاخيج  "

كان  حسين    جايب  ماي   وانطوه  اله   اخذ   الكلاص   وشربه  كله  وايديه  ترجف   والماي  يتجبجب على  حنجه وركبته  " 

وكلثم   تكله
"  على  كيفك  يمه  راح  عنك  العطش " 

   العيون  اللي  حواليه  كلها  دمعت  على  حاله الله  يعلم   شنو  شاف   وشنو  واجه    لحد  ما  وصل    
كام  منذر  على  حيله  
"   كرة  عينك  خالي  بجيته  سالم     يله  انا  اروح    الولد   ينتظرني  بره "

التفت  ناصر
"    وين  بويه  ظلوا  الليله   يمنه  كوم    دخل  صاحبك    حتى  ما  ضيفناه 
ولا  سألناك  على  زهير     "

جاوبه  منذر  وهو  واكف 

"  لا  خالي ما اكدر   مناك  امي  حالها مو زين    عاد  اردلها  بخبر   امجد   شويه   تهون   و صاحبي   ما  يدخل  اعرفه    هذا  جارنه   هم   عنده   اخوه  اثنين  بالكويت    وجينه  من  سمعنا  الناس  تنتظر  اولادها  بساحه  سعد  بلكت    نحصل   خبر    وزهير   لحد  ما    لمحت   امجد    بالساحه    يمشي   ويطيح  ما    سمعت  عنه  خبر   بس  من  سالنه    كم  جندي   كالوا    فوجهم  ويه  الأرتال  اللي ورانه    والله  اعلم   بحاله .. تقرب  من  امجد   وباسه 
يله   شد  حيلك   يا  بطل      الحمد  الله  على  سلامتك  وكلها  تصير  سوالف "
جاوبه  امجد  وهو  مدنك  على كلاص  الماي

"   ما  ظلت  أرتال  ولا  أفواج  كلها    طفرت  بأرواحها  العزيزه    وكلمن  يمشي  بوحده  اللي   الله  قدره  واندل  دربه   واللي  تاه  بالصحراء 
واللي   مصوب  وما  كدر    يكمل   المشي   ،  لا  احد  يكلك   شفته  وتصدك
كلمن  حاير  بروحه  ،  سامع  عن  يوم   القيامه 
أظن   اللي  شفناه   بطريق  الكويت   ذبوا  علينه   نار   مثل  التيزاب 
مو  تحرك   لا  تذوب   الدبابه   شكبرها   ذوبتها 
راحت  البشر   انصهرت   ويه  الحديد  كدام  عيوني

رفع  وجه  وشاف   الرهبه  والفزع   على وجوه  الكل
بفك    مرتعش   وعيون   دامعه  وراد    يطمن  منذر   وهو  بالأصل  ما مطمن

"  لا  تخاف   وطمن  عمتي   هواي  وراي يمشون   ،  يجي    اكيد   يجي  ، عاين  لكلثم  .... عمه   جوعان   ونعسان"

طلع  منذر   خايف  من  وصف  منذر   وهو   بقلبه  متاكد اللي  صار   بعد  افضع    وراه  خالد  اللي كاله
"  مشكور  ابو  غفران    جزاك  الله  خير  والله  يطمن  كلبك  وكلوبنا  على  زهير   انا  باجر  من  الصبح   اتعنى لساحه  سعد   عاد  انا  اكدر   اوصل الها  مشي    اخاف  انت ما  تحصل  سياره   لا  تظل  بقلق "

اتنهد    منذر

"    ما سويت  شي    حتى  تشكرني ،  ديروا  بالكم  عليه( منذر )    اللي  بعيونه من   رهبه  وخوف  أظن   انا وياك   عشناه  بس  بغير  طريقه 
الله  يعينه  ويقويه   ويطمن  كلبنه  على  زهير  ،   ادعي  يا  ابو غنى 
عمتك  لا  ليلها  ليل  ولا  نهارها  نهار  "

  بعد   ما    ساعده  خالد     بالغسل     خلوا  كدامه   الاكل   رغم  جوعه   ما كدر  ياكل  غير  لكمتين   وعافه 

بدات   الالم   رجليه  المورمه  من المشي  المتواصل   لايام  وحتى     راحة  قدمه  بيها   دنابل     بعضها  مخزن  جراحه   

انطاه   خالد  مسكّن    حتى   يكدر   يرتاح  وبدات  كلثم     بمرهم  للأعصاب  موجود   بالبيت   تدهن  رجليه  وتمرخ  

التفت   على   الكاعدين  حواليها  وانطت    اوامرها  الصارمة  
"  يله  شنهي    رحم  الله من زار  وخفف   وليدي  تعبان  ويريد   ينام   كلمن  يندل  داره 
كومي  خوله  آخذي  ابنج  كل   شويه  ينز  وصعدي  وانتِ  عنبر  آخذي  بنت  اخوج  يله  كلمن   يرد  لمجانه    كضه وكت  المشاوط  منا ومنا
وهي  تخزر    بنهله   ،  وانت  ناصر   اخذ  ابن  ابنك  خليه  ينام  يمك   صار  زلمه   علمه    عليك    تحتاجه  بالليل

ناصر  اللي  فهم    اللي  ناويه   عليه   كلثم   اللي  تفقت   وياه     من  قبل  
وكلتله  لازم  تساعدني   خو  ما نظل   طول  العمر   نعاين  وساكتين  
نحاول   ونشوف   وهو    ايدها  لان    يعتبر  الوضع   بيه  ظلم   لنهله  نفسها  كاعد  تظلم   روحها   والحياة   تمشي   كدامها   وهاي  ضرتها
حامل   بالثاني   وحال  ابنه   اللي  عمره  ما  شكى بس هو  اكثر  واحد   يعرفه  ويحس  بيه   ما  مرتاح 
فقبل   بخطوه كلثم  ان  يخلوهم امام  الامر  الواقع   وخصه  نهله  ويجمعوهم 
بغرفه  وحده    وباقي  الامور    يتفاهمون   هم  عليه  .....

وكف   ناصر  وهو  يمد  ايده  لإيهاب  
"  ها  بابا   نروح   تنام  يمي "

وكف  الطفل    وخله  ايده  بيد  جده  فرحان   وامه  تباوعله بعيون   دامعه

صاحتله  امه  
"  ايهاب  "  والكل   انتبه   شراح   تكوله   هي 
صارت   عينها     على  خوله  اللي  منتظره   تشوف   شلون  راح  تصفى  الامور   وبعدين     لمحت اشاره  من  شمسه   كانما  تايدها  

اجه  الطفل  يمها
"  باسته   وحضنته   .. صرت  جبير  عفت  حضن  امك   روح  حبيبي  ويه جدو ودير    بالك  عليه  "
وهي  اتجهت   لغرفتها     قبل  الكل  
شمسه   استأذنت وانسحبت    لغرفه  امجد  اللي  شغلوها   من  اجو  وراها      حسين 
  عنبر  وغنى    الفرحانات باللي  يصير   صعدن   وهن   يطفرن  على  الدرج  ومغطيات  حلوكهن بيديهن  لا تطلع  منهن   صرخه  الفرح  والحماس

التفت  كلثم   لخوله  اللي  بعدها كاعده 
"  ها  شو  بعدج  كاعده  راح  الفرخ   كضه  نص  نومته  مكسر 
كومي  صعدي شتترجين  بعد  السوالف  وكضت 
  و رجلج  هسه  يروح    ينام  بحجرته  وهي  تأشر   على  حجره
  نهله    "

بتعجب   سالت  خوله
"  جوه"

عافت   رجلين   امجد   اللي  غفى  رغم  السوالف  والحجي  اللي  فوك  راسه
"  اي جوه   شنهي    ما راضيه جنابج    ترى  هاي حجرته  ومرته   هاي  الأصل   موش  جاك تالي   عكبك   لو   شفتينه ساكتين " 

ردت   خوله
"  ما كلت  شي  عمه   ولا  اعترضت"

جاوبت     كلثم

"  لا  عشتو  ناويه  تعترضين "
قبل   لا  ترد خوله    وبنبرة    حازمه  تنهي  الجدال 
"  بس   كافي   ،   سمعتي  شكالت  عمتي   آخذي  ابنج  وصعدي 
ولا  تجادلين  " 

كامت   خوله   وصعدت   

وره  شويه   راد    خالد  يمتد  على  الكرويته  وكلثم   فرشت   فراشها 
بصف  امجد    التفتت  عليه
"    شعندك  ضال  هنا    يله  كوم     جا  هاي  اللغوه اللي  سويتها  صارلي  ساعه  وانوب  تنام  فوك  راسي  "

رفع  خالد    ايده  من   على  عيونه  وكال
"  وين  اروح   الباب  اكيد  انقفل  من  زمان"

طلعت    سلسله  مفاتيح  من جيبها   وذبتهن عليه  وهو  لكفهن

لفت   حلكها  بفوطتها مال البيت  البيضه   واشرتله 
"  يله  كوم    نريد  نغفه واريد  ابن  منتوف  يعتب  بره   باب الحجره"

ابتسم  خالد  وهو  يكّوم  على  حيله
"    والله   يا عمه   اذا  خليتي    راسج  بشي   تسوينه    بس  اريد   اعرف
شلون  ما  كدرتي  على  عمي  قادر"

ردت  عليه  بصوت   واطي
"  عماها  البين    الا   تهز  لشتي  بهل  الليل  يله  كوم
روح  خليني  انطمر"

.............

اليوم   الثاني 
طلع   منذر     وكانت الطياره  تحوم     بالأجواء    وصوتها  كلش     قريب   الظاهر   تطير   بمستوى  منخفض  ولهناك   ونثرت   اوراق   من  الجو

الجاهل   بالشارع  يلعبون  كدام  بيبان  بيوتهم    ركضوا  يلموها مثل  ما  يلمون  الواهليه

اجه   طفل     مجمع   رزمه  منهن   
ومثل  البارحه  كان     منذر   طالع   ويه  جارهم   جمال    بلكت  اليوم  يحصلون  خبر    صاحو  على  الطفل  وأخذوا   ورقه كانت مكتوبه  بالعربي  والإنكليزي    بيها  كلمات   مبهمه   المعنى   وراها   تحريض  ان
ينتفض  الشعب  العراقي  ويحصل   حريته   وانه الوقت   المناسب 

ساله  جمال  
"  هذوله  شنو  نيتهم   !   شيردون  "

جاوبه   منذر 
"  يكلبوها بينه خاف   ناقصين     ،  امشي  خويه  امشي   هم   لو  يردون  يسوون  شي   بكل  سهوله   يسوون  "

ومثل  البارحه  العالم  واكفه     على  جانب  الطريق   والدبابات     والمدرعات   المنسحبة   اللي  نجت  من    مجزره  طريق  الموت   بدات  توصل    غير     الجنود  اللي يمشون  على  رجليهم     واللي  أعدادهم   بدات   تزيد 

عن  البارحه  

وهم    واكفين     ومرت  من  يمهم   دبابه   من  اقتربت  من    منتصف الساحه  وبالقرب  من   صوره  جداريه   لرئيس   الدوله   
واطلق   عليها    نيران  من    الدبابه  وطلع    من  الدبابه    اللي  يقودها   وهو  يسب  ويلعن   بالنظام  الحاكم    اللي  ورطهم   بحرب    خاسره 
وهو  يوصف   شنو  شاف  وشكد   خسر   من  جماعته 

  صارت  إطلاقات    بعد  ان    سمعوا    الرفاق  المرابطين    بمجمع  كليات   باب الزبير  (  الادارة  والاقتصاد )    القريبه من الساحه   ومن  الفرقه  الحزبيه   القريبه  الواقعه  بنهاية حي   الجمعيات     مقابل    بانزين  خانه  ساحه  سعد(  محطه  وقود )    

تفرقت   العالم  الواكفه    يركضون    بالشوارع  الفرعيه     يتفادون     الرمي    العشوائي  من    اسلحه   سيارات   الفرق   الحزبيه   وشرطة  النجده 

الجنود    المنسحبين  والناقمين من  شافوا    هذا  المنظر     بدوا     ينادون  بهتافات   سقوط    النظام     لهبت   حماس  الاخرين    وانتشرت    شراره 
الانتفاضه  مثل   الشراره   بكومة  القش 

جمال  سحب      منذر   وركضوا    ركبوا  سيارتهم    طلعوا  على  طريق  بغداد   رادوا  يدخلون   للجمعيات    شافوا  اكو  مواجهات 
بين  الرفاق    والنَّاس   يم  شارع  التربيه  كملوا  طريقهم   ودخلوا   بشارع     الاصمعي    الى  ان  وصلوا  تقاطع   الجمهوريه  شافوا  الناس   طالعه  جوكات  وتركض  وتهوس    وما  يعرفون   وين  اتجاهم    الى   ان  كملوا  طريقهم   ويم      بنايه  المكينه   (   الدائرة   الماليه  والقانونية   تابعه   لشركة   نفط   الجنوب  موقعها   بدايه   الحكيميه ) عطلت   سيارتهم 

خلوها  على  صفحه   وكملوا  مشي     كانت  الا وضاع  بعدها   ساكنه   لكن   قريب   على   دائرة  الامن   المقابله     للنادي  الآثوري

قبل  لا  يوصلون   للجسر    سمعوا   تبادل   إطلاقات  ناريه   وأصوات   هتافات  

انعطفوا وأخذوا  الطريق  المحاذي   للنهر     براگ (  موازي)    شركة  المطاحن  ودخلوا  بين   فروع    الاحياء  السكنيه
بصوت   يلهث     كال  جمال (  جيران  بيت  خلف)
" اركض  منذر       الشارع  العام  ما  يفيدنه  ندخل  بين   الفروع  وبلكت   نوصل   لاهلنه سالمين "

بنفس  الوقت   كان  الوضع   طبيعي   بالطويسه 
  اجه    ازهر  اللي  يلعب  بالشارع  طوبه  ويه  الجيران     يركض  ويصيح

"  جدي   جدي  الحك   ابو  سيارة     الطماطه بالباب  يريدك    وعمي زهير    وياه " 

الكل   طفر   وكاموا  يترادمون واحد  بالثاني   نوريه    ركضت  حافيه     وكفت     بالكراج  

وهي  تسمع  الرجال اللي  يحجي  بلكنه  اهل  الزبير 

"  كواك  الله  عمي    ،  أبشر   وكر عينك  هذا  وليدك  ويانه   صارله   ليلتين يمنه  لكيناه  طايح   بالدرب   الجاي  صوب  من  الكويت   ويه  الجنود   اللي   تمشي  وضيفناه  عدنه  مثل  الباقين   بس  هو  خطي عليل  ما خليناه  يطلع
مثل   ربعه    صدره  متنك  وكوه  يشم الهوه  عاد  من درينه  اهله من  البصره
كناله  عمي  نوصلك  لو  على  ظهورنه   بس    البارحه  كلش وضعه  تأزم   ردنه  عجزنه منه   يرضى  ناخذه    للمستشفى    ما  عنده   غير   اروح  لاهلي  وامي   الله  يعلم  بحالها
" 

نزلوه   اثنين   شباب  صغار  من  بنيد   البيكب  المحمله  صناديك طماطه

طلعوا   الجيران    وتباركوا  لخلف  بسلامة  ابنه   واثنين  من شباب  الجيران  شالو  زهير  المنهك    واللي   بصعوبة  يجر   النفس   تحت  عيونه  سواد  
وجه   صاير   اسود  
دخلوه   الشباب   للكراج  تلكته  نوريه
واحد  من   الشباب  سالها
"  كرة   عينج  خاله   بس  فتحينه  الديوانيه  نخليه    يرتاح   وهو  يمج    شبعي  شوف  بيه  حقج  والله   والحمد  لله  على  سلامته

دارت   البيت  وفتحت  الباب من  داخل   ودخلوه
مددوه    على  القنفه  وسلموا  وطلعوا  

هي  كعدت     جوه  يم  القنفه    تُمسح  بيدها  على  وجه   وأيده   المدندله يمها   وعلى  صدره  كأنها  تتاكد   من وجوده  وهي  ما  تحلم  

وكل  شويه  تبوس  بيده  وتشمها 

كعدت  وفيه  يمها     وراحت  على  بسطاله   المشلوع ونزعته   اله  
ودارت  وجه  لفاطمه

"  جبيبي   طشت   وماي  خلي  نغسل  رجليه  وايديه  و وجه

بسج  نوريه  من  البجي    الحمد  لله من  رد  سالم   هسه  كون   تهلهلين   وفرحانه "

ردت نوريه

" الف  الحمد   لله والشكر  بس  جن  كلبي  عالمني   ماهو  طويب  (  مريض) " 

سمعته    بصوته مخنوك    كوه  يطلع  والكحه   خانكته

"  يمه "
لزمت  ايده   قوي 
"   بعد امك   وروحها   "

"  يمه  انه  جيتج   وعدتج  ما  اموت  بعيد  عنج  ،   يمه    شفت  الموت   مرات  كدامي   لا مرة  ولا  اثنين   واشيل  راسي    للسما
وكله  ربي     اجل   امرك  شويه   اريد   اموت   يم  امي  "

زاد   بجي  نوريه    وما كدرت  ترد   وفيه  اللي ردت

"  اسم   عمه  زهير     ،   الحمد  لله   رديت  النه   وما  بيك  بس  العافيه   وهي  مدنكه  على   رجله   تغسلها  من    الرمل   العالق  بيها    والدم   اليابس   وشافت   جرح    برجله   شك   جبير   ... يمه   سوده  بوجهي 
هاي   شنهي  رجلك  مجروحه  "

جاوب   وهو   كوه  يجر  النفس
"   ما  ادري    من    قصفوا    رتلنا  وكمنه  نطفر   من    السيارات  اللي  اشتعل   بيها  نار    على    الرمل   وكمنه  نركض  مبتعدين  خاف 
  يلوحنه  شي   حسّيت   دست   على  نار   بس  هانت  عليه  من منظر
النار  اللي كدامي  مشتعله    بالدبابات  وسيارات  الجنود   واللي  اكو  بيهم  مالحكوا   يطفرون  منها  وذابوا  ويه  الحديد

اخذته  نوبة  سعال     وكل  ساعه   يتغير  لون وجه    دلاله  على  الاختناق 

دخل  خلف  اللي  عجز  عن  شكر    الرجال   اللي  نقذ   زهير  وحاول   وياه  يدخله  هو   وربعه  يرد  وأجب  الضيافه  ما قبلوا   بس انطوه  وعد   يجون  مره  ثانيه   يشوفون  زهير 

  كعد  يمه  وحضنه      بس  زهير   زادت  حالته  سوء   لا نفع  وياها   بخاخ

ركض    خلف    يدور  سياره   وحصل  واحد   من  المنطقه 
  وهم  الجيران   ساعدوه  وأخذوا  زهير  ويه  خلف    للمستشفى  

اللي   رأسا  استلموه  وخلوه   تحت  جهاز التنفس .....

وصل  منذر    وتلكوه  جهال   الشارع   وبشروه    برجعة  زهير   والجيران  باركوله    دخل   للبيت    وهو    ملهوف  حتى   نسى   المعمعه  اللي  صارت  

وبعد  ما  عرف    اخوه  وابوه   بالمستشفى   تبعهم  

الأوضاع  زادت  توتر   خصوصا    بمناطق   القريبه من  شارع  بغداد  والقريبه   على   ساحه  سعد 
الحيانيه  والجمعيات     وامتدت   الشراره  الى   خمس  ميل  
وبالعمق   هم  كانت   الناس     منتفضه بمناطقها     بالجمهورية  والموفقيه     ومن  مناطق  العشار     وصارت  مواجهات      هجموا  على  مقرات  الحزب   ومراكز  الشرطه   والسجون   و اكو  ناس  استغلت  الوضع   وهجمت  على 
متحججه   بنقص  المواد    بيوتها  والأسواق   على   مجمع  الاسواق  المركزيه  وعلى  مخازن  وزاره  التجاره  وعلى    مخازن   المطاحن   الناس  حملت  حتى  الحنطه   الحب اللي  بسايلو

وكف  الرمي   بعد  ما    المنتفضين سيطروا  على   الجمعيات   وبدات   هجوم  الحشود  على  التربيه    لا  خلو  كرسي  ولا  ميز  وحركوا  الأوراق  والسجلات 

والنَّاس  واكفه  متعجبه   زين  ليش  هل  التخريب  معقوله  نفسهم  الجوعانين  يحركون    دوائرهم  ومدارس  اولادهم   

السالفه  بيها  غموض  واكو  ايدي  خفيه  
غرضها   التخريب  واستغلال  الوضع   بالسرقة  والاغتيالات

كانوا  خالد  وامجد  واكفين   برأس   الشارع  ويشوفون   الناس     تشيل    بهل   الأغراض  حتى  رحلات  المدارس   ما  سلمت 
مروا  نسوان  اثنين  وحده  شايله  رحله  والثانيه   مجسم  الكرة  الارضيه

خالد  عاتبها

"  يمه  ليش  هيج  مو هاي  باجر   ابنج  لو  ابن  ابنج   يرجع  للمدرسه
وين  يكعد " 

ردت عليه
"  ياااا  هسه  انت محتار  وين  يكعدون   خلي  نحتار    بارواحنا    بيش   أجيم   للخبز   بيش   اطبخ  عود  انوب  افكر   بالمدرسة  وين  يكعدون "

هز   ايده   خالد  وامجد  سال  المراه  الثانيه
"  خاله وانتِ تعرفين  هاي   اللي  بيدج  شتسوين  بيها  وين  ما خذتها"

ردت  عليه
"  و انت  ياهو  ما لتك  ما خذتها  من  بيت  ابوك   
مالكيت  شي  بس  هي  مذبوبه بالكاع  كلت   اخذها  للفروخ   تلعب  بيها "

مشن    النسوان   فرحانات     باللي  عدهن

التفت   امجد   لخالد

"  هاي  ليش هيج  معقوله  العالم  ما كامت  تفكر  ولا  تميز   زين   ليش  التخريب   ليش  النهب "

جاوبه  خالد
"  هواي  أسباب   بس أهمها    الكبت   هاي ناس  صارلها  سنين  مثل   القنبله  الموقوتة   تعرضوا  لكل  انواع  الكبت  والقهر  والتهميش     وقيس  انت  كل  هذا   مع   جهل   وعدم   الشعور   بالمواطنه والانتماء  
سياسه   الدوله   ما  خلت   هاي  الناس  تحس  ان   هاي  الدوله  جزء منها  وان  هاي   الدوائر  والممتلكات   لها  ملكها  
الكل   معتبر   الدوله  تمثل  شخص  واحد   متربع  على   راس  هرم  السلطه 

فهم   كاعد    ينتقمون   ويطلعون   الكبت  بداخلهم   تجاه   بنايات  وأثاث  ومع  الاسف    مالكو  اللي يوجهم   توجيه  صحيح
يله  امشي   نرجع  البيت   هسه  تلكه  ابوي  واكف  بلباب  ينتظر

وصلوا     للشارع   لكوا  جماعه  مسلحه  وهوسه  يم   باب  بيت  واحد  من  جوارينهم    واحد من  اولادهم   رفيق  حزبي  

لمحوا   ابوهم  واكف  باب  الجيران    مثل   اللي  ساد  الدرب  عن     اللي  يردون    يقتحمون  البيت  وناصر   يصيح

"  الله وامان  الله   محد  يعتب   بابهم  الا   على  جثتي  شنهي  عمي    راحت   الغيره  والنخوه   بيت  بس  نسوان  بيه  وأبوهم   رحال  شايب   تردون   ابنهم  روحوا  دوروا  عليه   ماهو  هنا    "

واحد   من    جاين    يهجمون  على  البيت   كال  لناصر
"  استاذ    انت   انسان  فاضل  ومربي  اجيال  وكلنا  نحترمك   واكو  بينه  درسوا  جوه  إيدك   وهذوله  الناس مو  ثوبك  ابنهم    مطلوب  النه  دم   شكد  طير   ركاب  وكتب  على  عالم   "

جاوبه  ناصر

"  لاني   كل  اللي كلتهن  وضيف  عليهن  ابن  عرب   واعرف   معنى  الدخيل   والجار   وكبلها  مسلم  وانت مسلم     ودينا   ونبينا وصى   بالجار  
الجار  قبل  الدار    وتريد  هسه    تتعداني  وتعبر  على جاري  وتنتهك حرمة  بيته  لا  والله  هذني  الشوارب  موش على  زلمه  و عسه  امي  لا  جابتني 

روح  بويه روح  انا  هاي  كعدتي  هنا    اخذ  ربعك   ومن  تخلص  هاي  الكوتره  (   الخبصه ، الفوضى)   وتصير   عندكم دوله  وقانون  
اطلب  حكك  منه   بالقانون   "

خالد  وامجد   وكفوا  يم  ابوهم   والجوارين  من  سمعوا  كلام    ناصر   تشجعوا  وكفوا  بوجه   المهاجمين   وانفضت  السالفه 
وظلوا  دوريات  كاعدين   برأس  الفرع  يحمون   بيوتهم   وبالاخص   بيت  جارهم   اللي  اهله  مالهم  ذنب  باتجاه  ابنهم ...

امتدت  الانتفاضه   لباقي   المحافظات     بحيث   انتفضت  ١٤  محافظه  من  اصل  ١٨ 

  لكن   سرعان   ما   انتكست   الانتفاضه  بسبب  غياب  التنظيم  والقيادة 
وعدم  التواصل  بين  المحافظات   لان  طرق  الاتصالات  ونقل   المعلمومات  مقطوعة   اضافه   الى    خذلان   القوات  التحالف بقياده  امريكا   للمنتفضين  بعد  ما  أعطتهم  الوعد  بالمساعدة    أعلنت   ان   تغيير  وعلى  لسان   الرئيس  الامريكي  بوش الاول   بخطاب   اله  بالسعوديه  امام   جنوده   لتحيتهم   "ان    تغيير  نظام  الحكم  بالعراق    شأن  عراقي  داخلي لا  دخل   لنا  فيه "

والأمر   الاخر   سمحت   قوات  التحالف   بإرسال    مروحيات  الجيش العراقي  الموجوده   بمطار    الكويت   بحجه   نقلها  لجرحى  الحرب  العراقيين  وبعض  الأسرى   اللي  سلموا    بساعة  توقيع  الإتفاقيه  الخيمه
وهم  من  المراتب   العليا   استخدمت    السلطه  العراقيه  المروحيات 
بقمع  الانتفاضه    وارسلت   قوات  الحرس  الجمهوري   بعد  ان  قسمت
المسؤوليات  على  ثلاث  محاور

محور  الشمال  بقياده   طه يس  المعروف  ب الجزراوي    واللي  قاد    اكبر  عمليه  تطهير   عرقي  بحق  الاكراد   وخصوصا   بكركوك    ونزح    حوالي  مليون  وأكثر   من  نصف  المليون  كردي  الى  الجبال   على  الحدود   التركيه  والإيرانية   بظروف  صعبه

والمحور  الأكثر  شراسه  وانتقام  هو  محور  الوسط  بقياده  حسين كامل   االي   ابتدا   بكربلاء   وكانت  اكبر   جريمه   قمع    واباده    حدثت في  هذه  المحافظه  خلال    اقل  ٤  ايام    

ومحور   الجنوب    بقياده    علي  حسن  المجيد   ومحمد  الزبيدي   اللي  اقتصوا  من   الناصريه  وخصوصا   مناطق  العشائر   بسوق  الشيوخ  والشطره وجعلوها   عبره   حسب   قولهم 

بدات   الحكومه  وخصوصا  بعد  انتشار  اخبار  اكتساح  الجيش    والعنف  اللي  يخلفه  بالمدن   اللي  يدخله      ترجع  سيطرتها  على    المدن  البقيه
عاد  الرفاق   الى   الظهور   وبدات  عمليات  تطهير     نسحبوا     الثوار   الى    المناطق    القريبه  من  الحدود   والى  الأهوار  

طول  هاي  الفتره  كان   زهير     منوم  بالمستشفى   يعالجون   الربو    وكانوا  شاكين   عنده   ذات  الرئه   لكن  التحاليل  اثبتت   عدم  إصابته

من  بدات   قوات  الامن  والحزب    تداهم   حتى  المستشفيات   بحث  عن  مصابين   ومجرد  الشك   يعتقل  حتى  المريض   

الطبيب  نصحهم  يطلعوه   ويكملون  علاجه  بالبيت  وهو   يكتب  بيه  تقرير   حتى  يراوه    للجيش    او   الامن بحاله  التفتيش 

بعد  حملة  تفتيش  ومداهمات   شملت   كل   الاحياء  والبيوت   ومرات     يكررون   اكثر  من  مره  

نوخذت   بيها   شباب  وشياب     جمعوهم    داخل  مناطقهم  لو بساحه    مدرسه    وهم  مربطه  ايديهم   ليوره  ومكعديهم بالكاع   و  مراتب  الامن   وذوي  الدرجات  الحزبيه  البارزه  كاعدين  على  كرسي  
وداير  مدايرهم     عناصر  أمنيه  موجه  اليهم    الشتائم   والسباب  على  الاهل  والعرض 
يبدون   يسالون  واحد  واحد     شعندك  علاقه   بحزب  الدعوه 
يحاولون   يستفزون   المقابل  ومن  يظل   على   نفس  جوابه  ان  ماعنده  شي   ويظلون     يسالون  بيه   شرايك    بالريس،    شرايك  بايران

اخر شي   يسالون    عناصر   الحزب  من  داخل  المنطقه  عليه  هذا  عليه مؤشر      عنده  شي 

اذا  حصل  تزكيه    من  هل  العناصر  يطلع

  طلعوا  ناصر   وخالد   بعد  ان  حصل  تزكيه  من   الرفيق  اللي   ساعد  اهله  ومن  اجو  على  امجد  ولانه  عسكري    اخذوه  للانضباط 
حتى  يسلموه  لوحدته  ناصر   خاف  على  ابنه  وراد    يروح  يتوسل بالمسؤول  الكاعد   بس  جاره  الرفيق  منعه  

"  امن   استاذ   والله ابنك  ما عليه  شي     وبكفالتي  يوصل   لوحدته  واصلا   هم كلهم  راح   يسلموهم  للمقر   الفيلق  الثالث  "

تكررت  هاي   الاستجوابات   اكثر  من  مره 

ومرت  على  خلف   ومنذر     اللي      بصعوبة  سيطر  على  توتره     من  خوفه  لا   تمر  عليه  تجربة  السجن  من  جديد
اما    زهير      فالضابط   الجيش   اللي  اجه   يفتش  البيت
من  شاف  حاله  وشرحله   خلف   انه جاي  من  الكويت    وتعرض    لصدمه من  شاف  جماعته  يموتون  كدامه    وهاج  عنده  الربو  
تنهد  الضابط   وتعاطف  وياه  وكال

"    شفنه  الوضع   بعيونه  ،  انطه  امر   لجنوده   خلوه  وجيبوا   الحجي  والشاب  الثاني  "

اللي  طلع   خلف  ومنذر    وباقي    الجيران  هو  تزكيه  المختار    وهو   مفتخر  ان  ماكو   احد  من  ابناء  حيه   شارك   حسب  ما يسموه
"  بصفحه  الغدر   والخيانه "

مرت   ايام    حذره  على  الكل   والنَّاس  تتناقل   اخبار    القمع  والاعتقالات  اللي  حتى  المرجع  الديني  الأعلى   للطائفه  الشيعيه  آنذاك
( السيد  الخوئي )  ما استثني  منها  ونقلوه  رغم  مكانته  وكبر  سنه    وحالته  الصحيه  الى  بغداد      وبعدها   أرجعوه  للنجف   و وضعوه   تحت  الاقامه  الجبريه 

بدات   عمليات    التصفيه    اللي  بالمقابل    السلطه  تسميها    (  التطهير )    تبعد  عن  المدن   والاقضيه والنواحي     وتتعمق   قرب  الحدود     والأهوار  خاصه

اطلقوا  عناصر   الحزب  حملات    لتطهير  الأهوار  من  ما سمي  بالغوغاء
وبدات اكبر  تخريب   بيئي   متعمد   بعد  حرق  أيار  نفط  الكويت  وهو عمليات  تجفيف  الأهوار   وتحويل   مسار   نهري  دجله  والفرات 

بدات    ترجع  الحياه   شي  فشي  

رغم  الدمار   الشامل   والواسع   رجعت  دوام  الدوائر  والمدارس    للاستئناف والموظف   او  الطالب   اللي  يتقاعس  يعتبر  من  الخونه

بالقرب  من  الجسور    الكبرى  المهدمه   نصبوا  جسور  حديديه    يسموها  الطبكه    
رجعوا   تشغيل   إسالة   الماي  الصافي   لكن  بفترات    ليس  مستمر    لحين  ما    يصلحون  الأضرار  ونفس  الشي  للكهرباء  حاولوا  بالجهد  والكوادر   الموجوده  يعيدون   تشغيل الوحدات  اللي  ما  دمرت   بشكل  كامل

ورجع   تجهيز  الكهرباء   لمده    ساعتين   او  ثلاثه  باليوم    والنَّاس  الكسبه  رجعت   تطلع   لإشغالها و كسب  قوتها

رجع   خالد   يفتح  محل   الزجاج   لكن    الوضع    المالي    للناس  خلت  حتى  تبديل  زجاج  شبابيكها  المحطم  شي  كمالي   او  ثانوي   يمكن  الاستغناء  عنه   ماكدر    يستمر  بدفع  ايجار  المحل    ويوميه  العامل  
ومتطلبات الحياه    سد  المحل 

كانت فترة  عصيبه  عليه   وهو  بطبعه   ما  يعرف  يشكي   
لكن   نهله  كانت   تفهم   حتى  سكوته   برجعة   علاقتهم  
كرجل  ومراه   حاولت   تخفف  عنه   وساندته  كزوجه   مدبره   تعرف
تصنع  من  العدم    

كانت    بيومها   قلقه  عليه   طلع    قبل  صلاة  الفجر   ومثل  عادته   لا كال وين   رايح   وصار   المغرب   وهو  ماكو  ما  حاولت   تظهر   خوفها  كدام   خالها    والبقيه  
ولو  خالها  لاحظ   توترها   وسالها
"  خالد  وين   راح "

جاوبته  
"   هااا يكول   شغله   اللي  بيها  خبزه "

هز  راسه  وسكت   

وره   شويه   دخل    وملابسه   متوسخه  وحالته   مبين    عليه  التعب 

وحتى    رجله   واضح  العرج  بيها 

سلم   عليهم   وتوجه   لغرفته  وياها   

هي   ركضت للمطبخ   وأخذت  كلاص  الماي  ودخلت  عليه   لكته
كاعد  بالكاع  ماد   رجله  اللي  تاذيه   وثاني   الثانيه  
ومدنك  راسه   
كعدت  يمه   ناوشته   الماي  اخذه  بيده  اليسرى

"  رحمه  الله والديج  "

سالته بهدوء    وهو   عيونها    تتفحصه

"  وين  جنت "

جاوبها  وهو   على نفس وضعه

"   شتشوفين حالي "

جاوبته  بخوف  على  حالته
"  لا تكول  جنت بالمسطر  واستغلت  عماله  خالد   وين  بيك  شده  على  هذا  الشغل "

كور  ايده   ودك   على   رجله   اليسرى   مره  وعلى  ايده  اليمنى  مره 
ولاول مرة  تشوفه  جازع  بهاي  الحاله  وحتى دموعه  تلالي بعيونه

"  ياريت    حيلي    يعني  مثل   كبل  ولج نهله  انا  جنت اسطه    نجار  انصب    قالب    البنيان  وحدي    حتى  عامل   ما  احتاج    هسه
ايدي ورجلي  خانوني  وخلني   احمل  على  راسي   صناديق  الطماطمه  بالعلوه  و توسل  باللي  يمي   يعني  ويشايلني  كله  علمود 
جم   دينار    العيشه    انعل  ابوها  من  دنيا  
ليش    ما   الرصاصه  صابت  كلبي   گبل  رجلي  وخلصتني 
  ليش    ما   انا  المعدوم    ومنصور   العايش     ليش
شنهي   معنى   لحياتي   وانا  مو  كادر    أعيش   اهل  بيتي 

حست  وجه   احتقن  وحتى تنفسه    تزايد  

أخذت  ايده  المكوره والمشدودة أعصابها   وباستها  حاولت   تفتحهن  شويه  شويه  وباستها

"  اسم الله  عليك    احنه  معنى  حياتك    اهلك  وعائلتك   اولادك  
الله  حفظك  النه    بلاك     شنو  حالنه  لا  تكول  هيج   انت  ما مقصر   وربك   الرزاق   وهاي  مو  ذله  ،  الذليل  اللي  يمد   ايده   ويطلب  من  الناس  وأنت  عمرك  ما سويتها   
كامت  تُمسح  على  صدره  حتى  يهدا   وأخذته  بحضنها 

  هدي  روحك  وطلع  كل  اللي  بكلبك  وذبه  على  جتفي   لا   تخاف   العبد  بالتفكير    والرب  بالتدبير    رزقك   ما  يروح  لغيرك 

تشبث  بيها  بكل   قوته    وعلى  كتفها    الطري  اللين   خله  راسه   المثقل  بالهموم   هنا  راحته  وبيته  وسنده 

سمعها   تكمل
"     لا تروح   بعد  للعلوه  هاي  الشغله  ما تصيرلك    
اشتري   جم  صندوك  طماطه    وحتى  لو تبسط  بيها كدام  باب  البيت 

والحكومه     راح   تنطي   حصه  غذائيه  شهريه   اكيد   تشيلنا  وانا     أخيط    للجوارين  والنَّاس   وتدبر   بس  لا تقهر   روحك "

بعد  راسه   عن  جتفها    وصار  وجه  مقابل  لوجهه

"  لا   ما تخيطين  اكره  الخياط  واكره  صوت  المكينه  ما  اريد مصيرج  مثل   مصير  امي    ،  مثل  ما كلتي     الله يدبرها  من  يمه "

مسحت  وجه   اللي  اختلط  بيه  العرك    وريحه  الطماطه  وبعض  بقاياها   الممروده  على   وجه   وشعره  وملابسه

ابتسمت  وهي  تحاول تغير   موده

"  هاي  شنو   مسوي   خلطه   لوجهك   بماي  الطماطه   حتى  عود  تصير 
حلو  ،  شو باوعلي     بس  لا  ناوي  على  الثالثه  ،  كون صدك"

ابتسم 
"  اي   شتسوين   بله"

صفنت  وجاوبته

"   ما  اسوي  شي   ادري  بروحي   ،  لو   اكدر    أذيك   جا  سويتها   قبل    تنهدت  وكامت   وانطته  ايدها  يله  كوم   اغسل   ترى  الطماطه  تحرك  البشره    عيوني   لا  انوب  ضرتي  ما  تتحمل   تحسس  بشرتك "

ضحك  وهو   صدك  تغير   مزاجه

"  يا  بويه  على  غيرة  النسوان    نار  نار "

  التفت   وهي  تحضر  هدومه

"   هاي  منو   النار    كوم  كوم     اخر   وكتك  صرت  العندليب   ،
ما  غنيت   كبل   من جنه بس  راسي  ورأسك   ،  شو كضيتها  انا  اغني   وانا  اسولف   وحضرتك  مستمع "

اتنهد
"  الله   احلى  ايام   وعبالج  الاستماع  سهل    اصلا   الاستماع  مزاج
مو  يسمون     اللي  يطربون على  اغاني    ام  كلثوم  سمعيه

انا  هيج   جنت  اطرب  وسميع  لكل  شي  تكولينه  ،   شنو  رايج    ترجعين   تغنين  وانا  جمهورج  الوحيد"

جاوبته 
"  لا  والله   خاف   تزعل،  لا  عيني   أعلنت  اعتزالي    كوم  يله كوم 
خلي  ست  خوخه    "

بعدها   بأيام   بدا  يبسط     بسطيه  مخضر   بسوك  الحيانيه  صح  يطلع  رزقه  اليومي  بس  كثرة  البياعه  خلته  يفكر   بغير  شي 
الى  ان  تعرف  على  سايق  سيارة     بيكب   واتفقوا
يبيعون   مخضر   دوار   بالسياره   هو    يكعد   يوزن   ويبيع     على  المناطق   البعيده  عن  السوك   وبنفس  سعر  السوك   لان   يشترون   البضاعه  من   العلوه   وتوكلوا ومشت  وياهم  رغم   التعب   والمصاعب  ....

بعد   مرور  اشهر    وهدوء  الأوضاع    الاتصالات   لازالت  مو  كلها   مومنه   حاولت   وفيه  تتصل   بيت  اخو   مراه  خليل   ابن  ام  زامل   وأخو  فاتنه  حتى   تسال عليهم     حصلت  لكن    الخطوط  متشابكه      وما  فهمت  شي وانكطع  الخط   حاولت  تروح   ما خلاها  خلف  

وكال
"  انطيها   مهله    بلكت  شهر   وتبين   اكيد    يسمعون   باللي  صار  ويخافون  يجون   بهل  الدرب "

وبيوم   بعد   ما   المدارس  خلصت  والطلاب    نجحت    اغلبها  

كان   شهر  السادس    السنه   الحر  يختلف  عن  كل  سنه  هاجم   من شهر  الخامس  والكل    يتوقع  وحتى    بسبب حرق الآبار  اللي  لحد  الان 
ما  نطفت   وسمعوا  باذاعه  الكويت   انه  بحدود  شهر   ال (  ١١)  ياله   يكدرون    يسيطرون  على  الحرائق

اندكت  الباب   وهو   راح  يفتحه  لان   منذر     بعده  بالورشه

وزهير  بعد   علاج  طويل  رجع  لوحدته  بالصويره
متأملين   يسرحوهم  بعد  ما  انهوا    فترة   خدمه  الخريج    (  سنه  ونص)  وزادت   عليه ...
فتح  الباب  تفاجأ  بمراه       بالثلاثينات   ملامحها  مو  غريبه   معصبه    والسواد  مغطيها  من   فوك  ليجوه ويها  ولد   شاب  بعمر ١٦  سنه   

سلم  الولد   وكال

"  جدي  يمكن  ما  عرفتني   انا   احمد  ابن  خليل    ،   عمتي  تصير  زينب  الله  يرحمها   وحبوبتي  ام  زامل "

رحب  بيهم   خلف 
"  يا  هلا   وكل  هلا   العذر  بويه منح  ام  احمد   وانت  ابو  شهاب   صاير    رجال  الله  يحفظك   تفضلوا   عذروني  هم  العمر  اله  حوبه  والذاكرة "

دخلوا  وتلكتهم   نوريه   وسلمت  عليهم  بترحيب  بعد  ما  عرفتهم

سالهم   خلف
"  بويه  وينكم   ام  زامل وينها   وفاتنه زام  ظافر   انا كوه    لازم  اختي  وما تدري  وديت  ابن  اخوي  طارش وراح  سال  عليكم بالثوره   كايليله  ماموجودين  ومحد     رضه   يكول  وينكم  "
بجت  ام  احمد  وكالت
"  البقيه  بحياتكم عمي     بعمتي  ام  زامل  وبفاتنه  وأولادها " 
صرخت    نوريه   و فاطمه  اللي كانت  نايمه  على  ظهرها   وهي  بشهرها   الرابع  حامل   ومن  سمعت  صوت    خطار  وميزت  الاسماء  لانها  نايمه   بالغرفه  الجوه   اجت  تسلم 

سكتهن   خلف 

"   لا حول ولا  قوة  الا  بالله   العلي  العظيم   ،  شلون  بويه  وليمته  وليش  احنه   ليهسه ما ندري "

جاوبه  احمد  ابن  خليل     رغم صغر  سنه  لكنه  تربية   امراه   قويه  مثل  ام  زامل   ربته  على الدين  والاخلاق  والرجوله  

"    جدي  راح  احجيلك  باختصار  يمكن   احنه  عائلة  نكتب  علينا   خط  الشهاده    ومواساة    اهل  البيت  والحمد  لله  هاي  نعمة  لا  ينالها  الا  ذو  حظ  عظيم  

قبل   الضربه   بثلاث  ايام   طلعنه   احنه  وجيرانه  لكربلاء 
من  باب  هي  مدينه  مقدسه  وما  راح  يضربوها   وصدك    اجرنا  غرفتين   بخان  مدري  بيت  من   البيوت  القديمه   اللي    يم  الحرمين   
نسمع   صوت  الطيارات    بس   ماكو   قصف    داخل   المدينه   وتوصل  النه  الاخبار  بغداد   تفلشت    جنه   نطلع  للامام  ونرجع  بالنهار   بس    وره   المغرب  كلها    ببيوتها وكربلاء   انترست   ناس    من غير  محافظات   من قبل   الضربه

وره    ما   سمعت   الناس  بالانتفاضة     طلعوا  اهل  كربلاء   حالهم  حال  باقي  المحافظات  وسيطروا  على  الدوائر    الامنيه  والحزبيه  والمحافظه  سقطت 
صبحنه  بيوم   نريد  نرد  لبغداد  كالوا  الطريق    مقطوع  والمدينة  محاصره  والجيش  راح  يقتحم المدينه   اذا  ما  سلموا  ارواحهم 

المهم  وره  مقاومه   وصارت    حرب  بالشوارع 
ما  نسمع  الا  صوت  بمكبرات  الصوت  الدبابات   قريبه   من  شارع  قبله   ويطلبون   من   أهالي  المدينه   يطلعون   من بيوتهم   يتوجهون  صوب  بحيره  الرزازه مشي    طلعت    الناس    كبار  وصغار  نسوان  واطفال وزلم     اكو  اللي  توجهوا   للامام    تحتمي  بيه   ومنهم   حبوبتي  ام  زامل  كالت  ما  اروح   وياكم  أظل  هنا  

المهم  طلعنا  نمشي  ويه  الناس     التفت   جدي  وراي  واشوف   الدبابه    تمشي  بشارع    القبله  وترمي   بالقنابل  جنها    كاعده   تمطر    ماكو  فرع   ولا   بنايه  ما  ضربوها   الولايه  سحكوها   سحك  

ونسمع  بس  أصوات    الناس  من  داخل  الحضره  يكبرون
وهو  الملعون واكف  على  الدبابه   ومبكبر   الصوت   ينادي  وصل  صوته    لكل  الولايه
" انت حسين  وانا  حسين  ونشوف  منو  الاقوى "
ومن  ايده   طلعت  اول     رصاصه   باتجاه    الحرم   وسمعنا   بصوت    فلقه    قنبلة  الدبابه   ضربت    القبه "

ابتعدنا  شويه   وطايرات  حايدتنه   شويه  صارت  الناس    أفواج  بيهم   اللي  راح  بطريق  البساتين   واحنه ويه  غيرنا  كملنا  للرزازه 
وهنا   الطيارات  كامت  تضرب  علينا  تولونه وهي  كلها   نسوان  وجهال

اول  وحده  نضربت  عمتي  فاتنه  و  بنتها

وراها   رجع  عليها  ظافر  اللي  جان   يركض وياي  وبنتها  الجبيرة   تركض ويه  امي    شادتهن بطرف  عبايتها    هم   فلتت امي  وركضوا   على   عمتي  واللي  يرمي  من  الطياره  كومهم  فوك  امهم
وأختي  اتصوبت بعامودها  الفقري 

  ما  كدرنا   نتقرب    منهم   لان اللي  يقترب   يموت  فوكهم  
شلت  اختي   وركضنا    واحنه  الطلق  يطفر   بين  رجلينه
وصلنه    يم  الرزازه   جمعوا  الناس  الشباب  والرجال  حملوها   بسيارات 
  ونسوان  وعواىل   أخذوها  بسيارات  ريم والله  اعلم  وين

كل  مجموعه    اوامر  شكل 

وصل  لمجموعتنا    انطاهم   قائدهم امر  خليهم  يركضون   اللي   يكدر    يعبر  السده  الترابيه  من  غير  ما  يتصوب  عوفوه   واللي  يطيح  كتلوه  مثل  الجلب

والوادم   بدات  تركض  وتدافع  ما  ادري  شلون  وصلت وانا  على ظهري  اختي   حتى  امي    ما  ادري  بيها ولا بقيه  اخوتي 

وره   السده     تجمعت  الوادم   مدنكه   حتى  بجي  ما  نكدر   نبجي   نخاف لا  يطلع  صوتنا  ويعبرون  يكتلونه واحنه  نسمع  صوت  الصلي  مالهم  على     الناس  اللي طاحت  وهم  يتوسلون بيهم  يعوفوهم

ظلينه  ليله كامله   بينه  الاف مدري  مئات  الله  واعلم   لحد  ما  تطمنه  راحو 

   خذينه  الدرب    وردينه   لبغداد   بدون  ما  احد  يدري  بس جارنه   هذا  اخو  دنيه  وهو  اللي  جاوب   الطارش   اللي موديه    ولانه  يخاف    ما كدر   يكله   شي 
هاي كل  اللي  صار  جدي   وره   اشهر  ياله  كدرنا  نسال 
عمتي  وجهالها  دافنيهم  ويه  هواي ضحايا   يمه  الرزازه

وحبوبتي  ظلت  ويه  هواي  ناس  كتلوها   بساعه وكتها  من  طلعوهم   بالقوة  من الامام   وظلوا   مطلين  يم باب  الامام 

  الى  ان    واحد  جبير  مدخل   وطالب   يدفنوهم
ودفنوها  مقابر  كربلاء   حتى  ما  اكدر  اروح  ازور  قبرها"

  اتجدد   الصراخ  والعويل   من   اجت    وفيه     بعد  ما كانت تادي  واجب  فاتحه    لكنها  هل  المره      تمسكت   بالصلابه 
علمود    حفيدها  اللي  أمنته  امه   عندها   وعرفت    قدر   رب  العالمين  وحكمته   اللي  خله  هذا  الطفل   يبجي  ويلح  يريد    يظل  يم  بيبته

بعده  ما  حان   اجله  مثل  امه وإخوته  اللي  ساقتهم المنيه  الى   اجلهم

انصبت   فاتحه  لفاتنه وامها  وأولادها   وأبلغوا  الناس  انهم  توفوا  بحادث  سياره   اثناء   رجوعهم  ....

بشهر ١١  ولدت  خوله   ابنها  الثاني   اللي  سماه  جده  ناصر  " محمد"
وكان  فرحه لبيت  ناصر  

  بمنتصف    شهر  ١٢ -١٩٩١

وكفت سيارة   الهلال  الاحمر  العراقي  وياها  مختار   منطقه  بيت  خلف  
وعناصر  من  الحزب   امام  بيت  خلف  
اندك   الباب   وفتحه  منذر

ساله   المختار  بعد  السلام    ولانه  يعرفه  معرفه  شخصيه

"   عمي   ابوك  موجود  وعمتك   ام  ظافر   موجوده "

جاوبه  باستغراب  عن سواله  لعمته

"  اي  عمي  امر "

فتح  موظف  الهلال  الاحمر  اللي عرفه من  الباج المعلم بركبته
"  خلي  تجي  تستلم   ابنها "

تقرب    منذر  من  السياره   وصدمه الشخص    الموجود    بالسياره 

"  ريسان  " 
ومن  فرحته  كام  يصيح 

"  عمه  عمه  ريسان   ريسان  عايش "

يتبع  ......

ملاحظه  /    اعرف   البارت     بيه  ذكريات واحداث مؤلمه     للجميع  بس  هذا  جزء  من  حياتنا    مرت  على  البعض   بكوارث  وعلى  البعض   الله  لطف  بحالهم     الاحداث    المذكوره   كلها  أكيده  ومن  عن  لسان   أصحابها    واكو  مؤكده    بأفلام   فديو
مثل  اللي  عاشوه    بيت  ام  زامل   وأحفادها   عاشوه  اهل  كربلاء   ورصدته  بذاك  الوقت  كامرة  مراسل  قناة BBC   
وعرضته    بكل  القنوات  ولان   احنه  بالعراق كان  الاعلام  العالمي  ما يوصلنا   ما  شفناه   الا وره  سنين     وموجود  على  لليوتيوب   اجزاء منه

احترامي  للجميع   ودمتم  بأمان  الله   البارت  القادم   تحول  جديد   بالاحداث   وراح   ينتهي    دور   احدى الشخصيات  اللي    تضوجون  منها