رعب(محمد عصمت)

نوم عميق

سامانثا كانت واحدة من أعز أصدقائي، كُنا 3 صديقات مُقرَّبات، أنا اسمي جيني، وصاحبتنا التالتة اسمها آمبر، في واحدة من عُطلات نهاية الأسبوع والدها قرَّر يودينا نقضي الأجازة في كابينة بتاعتهم في وسط واحدة من الغابات، وقال إنه هيوصلنا لحَد هناك، سامانثا قالت إنها هتكون تجربة لطيفة.. فليه لأ؟

بمُجرَّد ما وصلنا، سامانثا شاورِت على بحيرة في وسط الغابة وهي بتقول: " شايفين البحيرة دي؟ اسمها البحيرة سامانثا، بابا إتولَد وكبر هنا، وكان بيحِب البحيرة دي جدًا، عشان كدا سمَّاني على اسمها "

في الليلة دي، وبعد ما قضينا شُنطنا، قعدنا إحنا الـ 3 على الأرض جوا الكابينة وبدأنا ندوَّر على طريقة نسلي بيها نفسنا.

آمبر سألت: " حد عنده قصص رعب حقيقية مُخيفة؟ "

قُلت بسُرعة وبحماس: " أنا عندي قصة حقيقية، حصلِت لحَد قريب حَد من أصدقائي، كانت جليسة أطفال وقاعدة مع طفلين في ليلة من الليالي، الأطفال ناموا وهي كانِت قاعدة في الدور اللي تحت في الضلمة بتتفرَّج على التليفزيون، فجأة.. تليفون البيت رن، ردَّت.. وسمعت صوت مُخيف بيقول: إنتي مُتأكِّدة إن الأطفال فوق بخير؟ "

آمبر قالت بملل: " جيني، القصة دي معروفة جدًا، مفيش حد ميعرفهاش، وبعدين القصة مش مُرعِبة زي ما إنتي مُتخيِّلَة يعني! حد تاني عنده قصة؟ ويا ريت تكون قصة حلوة "

سامانثا قالت بحماس: " أنا عندي قصة، على بُعد 10 دقايق مشي من هنا، فيه بيت قديم مكسَّر ومهجور، عدينا عليه وإحنا جايين، بيت في وسط الغابة كدا، في مكان مهجور لوحده، المُهِم.. من فترة طويلة، كان فيه راجل عايش هناك، أسرته كانوا أغنياء وبيمتلكوا مئات الفدادين من أرض الغابة دي.

الراجل دا قبل بنت ريفية لطيفة من قرية قُريّبة من هنا، وحبوا بعض، لكن أسرته مكانوش مبسوطين من دا، كانوا شايفين إن البنت دي مش أد المقام، لكن هو تجاهَل كُل كلامهم تمامًا، قرَّر ينفصل عنهم وبنى كوخ صُغيَّر بعيد عنهم، برضه في مكان مهجور من الغابة.

وفعلًا إتجوِّز البنت وكُل حاجة كانت ماشية كويِّس، بعد شوية خلِّفوا بنت، وبعدها ولد، وهنا.. القصة بتبدأ تتحوَّل للأسوأ، ابنهم كان تعبان، مش مريض يعني أو كدا، لا كان تعبان نفسيًا، مريض نفسي يعني زي ما بيقولوا، مش مُعاق ولا حاجة، لا.. كان مجنون شوية.

لمَّا الولد بقى عنده 9 سنوات، بقى عبء أهله مش قادرين عليه، نوبات غضب عنيفة، مواعيد نوم مش منطقية، اختفاء في الغابة لأيام طويلة بدون مُبرِّر، وحاجات تانية زي كدا، الأب والأم مكانوش عارفين يعملوا إيه، طلبوا المُساعدة من أهل الأب اللي سابهم ومشي من فترة طويلة.

أهله خدوا الولد لمكان بعيد، وسط الغابات، حاجة كدا شبه المصحات النفسية بس بدائية أوي، من وجهة نظرهم.. دا كان الحل الأمثَل.

بمرور الوقت.. الأب والأم بدأوا يتعوِّدوا على حياتهم من غيره، وفي النهاية بطَّلوا يزوروه، نسوا تمامًا إن ليهم ولد، وكُل حاجة رجعت تمشي كويس مرة تانية.

بعد مرور 8 سنوات، الولد تقريبًا كان عنده 17 سنة في الوقت دا، ونجح يهرب من المصحة البدائية اللي كان فيها، دوَّروا عليه كتير، لكن ملقوش ليه أي أثر، في النهاية.. قرَّروا يبلَّغوا أهله إنه هرب، كانوا خايفين عليه، خصوصًا إنه لوحده في غابات مُظلِمة ودا معناه إنه هيموت.

لكن الولد كان حي، وفي ليلة من الليالي.. رجع البيت مرة تانية، اقتحم البيت وبدأ ينتقم، دبح عيلته كُلها.. والده، والدته، وأخته.. وبدأ يقطَّعهم لقطع صُغيَّرة.

الفاس بتاعه كان لسَّه بينقَّط دم، اختفى مرة تانية وسط الغابات، الناس اكتشفوا الجُثث المتقطعة بعد أيام، المنظر كان مُخيف ومُرعِب، الشُرطة بدأت تحقَّق في الموضوع وتدوَّر على الولد، لكن برضه.. مكانش له أي أثر، ولحَد النهاردة.. الولد مالوش أي أثر.

من يومها، وكُل سنة.. في موسم الحصاد، الناس بتختفي بطريقة مُخيفة، وأدام بيت كُل شخص بيختفي بتظهر عروسة قُماش قديمة، بيقولوا إن الولد لسَّه ساكِن في الغابة لحَد النهاردة.

السُكَّان المحليين بيقولوا إنك عشان تنجو من هجومه، لازم تعلَّق عروسة قُماش على باب بيتك، وهو بيحترم دا.. ومش بيهاجِم البيوت اللي معلَّقة العرايس دي، محدش عارف المعلومة دي حقيقية ولا لأ، لكن مفيش بيت في المنطقة كُلها مش معلَّف عروسة قُماش على بابه "

بمُجرَّد ما خلَّصِت قصتها، شهقت بخوف وأنا بقولها: " دي قصة مُرعِبة جدًا، انتم معلَّقين عروسة على باب الكابينة.. صح؟ "

سامانثا قالت بمرح: " طبعًا.. بابا مش مصدَّق في الموضوع دا، لكنه سايبها احتياطي "

آمبر قالت بخوف: " أنا خايفة! "

سامانثا كمِّلت كلامها: " البيت لسَّه موجود، وأشباح الأسرة اللي ماتت لسَّه ساكناه، بيقولوا إنك لو رحت هناك مُمكِن تشوفهم أو تسمعهم "

سألتها: " يعني مُمكِن نروح نزوره؟ "

قالت: " أكيد، بس الصُبح، أنا مش عايزة أضحي بنفسي "

ضحكنا ونمنا وإحنا خايفين، تاني يوم الصُبح، والد سامانثا جابلنا فطار من واحد من المطاعِم المشهورة، وقالنا إنه هياخدنا نعوم في البحيرة، وبعد الضهر هنروح نزور البيت المسكون.

لمَّا وصلنا هناك كُنا خايفين، البيت كان مهجور وشكله مُرعِب، وأول ما دخلنا حسينا بوجود حضور مُرعِب، بدأنا ندوَّر في أنقاض البيت المُرعِب دا، وفي واحد من الأدراج السرية لقيت دفتر مُذكرات قديم، ورقه مُجعَّد ولونه أصفر.

سامانثا قالت بفضول: " دا شكله دفتر مُذكِّرات أو حاجة زي كدا! "

همست بخوف: " يمكِن دفتره مُذكِّراتُه؟ "

آمبر سألت بغباء: " مين؟ "

قُلتلها: " الراجل.. الراجل اللي قتل عيلته كُلها "

سامانثا أخدت الدفتر مني وبدأت تقرا بصوت عالي، وإحنا قعدنا نسمَع بإهتمام.

قالت: " مكتوب في المُقدمة: إلى أسرتي اللي كُنت بحبهم وبهتَم بيهم واللي عملت كُل دا عشان يكونوا معايا طول الوقت "

(5 سبتمبر 1987.. إحساس الوحدة صعب، كُل اللي كُنت محتاجه هو إنهم يتكلِّموا معايا، بس هُمّا قرَّروا ميتكلموش معايا، ساعات بسمَع صوتهم في أوقات متأخَّرة من الليل، وساعات بسمَع صرخاتهم، الجو هنا برد، والمكان مُظلِم أوي، أنا محتاج أتحَب، بس هُمّا مكانوش بيحبوني، تأثير الأدوية راح خلاص، أنا دلوقتي حر، خلاص تحرَّرت، اللي مش هيحبني.. هيمشي، هنيمهم نوم عميق، كلهم هيناموا نوم عميق، بس أنا لسَّه سامِع أصواتهم، لسَّه بيصرَّخوا!)

(4 ديسمبر 1987.. لازم يبطَّلوا يبصوا عليّا كدا، أنا كويس خلاص، عايش في الغابة، بطارد الحيوانات وأنيمهُم نوم عميق، زي ما عملت في ماما وبابا وأختي، ساعات بزور بيتهم القديم.. بس بالليل، بسمَع أصواتهم، على الأقل دلوقتي بيتكلِّموا معايا)

(3 أكتوبر 1995.. سبت الغابة من سنين، دلوقتي عايش في قرية صُغيَّرة جنب الغابة، محدش عارفني، محدش يعرف حقيقتي، بسمعهم بيحكوا قصتي ساعات، وبضحَك عليهم، كُلهم بيخافوا مني، لسَّه بزور الغابة في بعض الأوقات، وساعات بنام في البيت القديم، ماما وبابا لسَّه بيتكلموا معايا ساعات، بيقولوا إنهم فخورين بيّا)

(2 نوفمبر 1998.. الحياة ماشية بشكل كويس، لقيت وظيفة مُحترمة، اشتريت بيت، قابلت بنت كويسة، جميلة جدًا، ساعات بخليها تزور الغابة عشان بابا وماما يشوفوها بس مش بقولها)

(1 يوليو 2000.. النهاردة يوم عظيم، بقي عندي بنت، أنا سعيد جدًا، ماما وبابا بقوا جدود دلوقتي، للأسف زوجتي مقدرتش تعيش، الحمل كان صعب عليها، غالبًا راحت في نوم عميق، بس مش مُهِم.. أنا سعيد جدًا)

(13 أغسطس 2010.. أنا فخور ببنتي، طلعت زيي بالظبط، بس هي أذكى كمان، معندهاش مشاكِل مع ماضي والدها، مشكلتها إنها مش بتسمع صوت جدها وجدتها، اللطيف كمان إن عندها أصدقاء كتير، هتقدر تساعدني لمّا تجيبهم هنا، أنا بحبها أوي.. بحبها لدرجة إني سميتها على اسم بحيرتي المُفضّلة.. سميتها سامانثا)

على وش سامانثا كان فيه ابتسامة مُرعِبة، قُلتلها بخوف: " إيه اللي بيحصَل؟ "

آمبر سألتها بعصبية: " دا المفروض إنه مقلب بقي ولا إيه؟ "

وقبل ما سامانثا ترُد سمعنا صوت خطوات من ورانا، مشي لحَد ما وقف جنب بنته وهو بيقول: " حبيبة بابا.. برافو عليكي "

ابتسمت وهي بتقوله: " تربيتك يا بابا "

مكانش ينفَع أقف أفكَّر أكتر من كدا، حاولت أشد آمبر، لكن الخوف كان شاللها في مكانها، كان لازم أسيبها، جريت زي المجنونة.. وآخر حاجة سمعتها كان صوت آمبر وهي بتصرُخ

من وقتها وآمبر مالهاش أي أثر، سامانثا ووالدها هُمّا كمان اختفوا، بس أنا مُتأكِّدَة إن مصيرها كان مُختلِف عنهم

.

.

.
الولد كبر وإتجوِّز وخلِّف، وبنته طلعت زيه، مش متزنة نفسيًا، وطبعًا كان طبيعي إنه يحكيلها كُل حاجة وهي تتقبله، وتحوَّلِت لطعم حي، بيستدرِج بيها بنات من أصدقاء سامانثا عشان يقتلهم من غير ما حد يشُك فيهم
لولا إن جيني هربت وقدرت تحكي لنا اللي حَصَل كانت هتبقى ضحية زيها زي آمبر
ما زال البحث عن سامانثا ووالدها مُستمِر لكن للأسف مالهمش أي أثر لحَد دلوقتي وللأسف مصير آمبر مجهول

#بتاع_الرعب

#حدث_بالفعل

#قصص_حقيقية_حول_العالم