*بسم الله*
.
.
.
.
.
.
.
.
.
ميار: عندک پروبلام
جواد: وي عندي
جيت نجاوبو حبست قدامنا طونوبيل كانت فيها عجوزة وجان معاها
حكمني من يدي ودارني موراه وغطاني بلكور ديالو
قاعدين يخزرو فينا وطلعو لفوق باينين مضياف تع خالو منير غير راحو دار ليا
جواد: روحي اطلعي ضوک
جيت نرفد فاليزتي رفدها هو رحت طالعة وهو مورايا وهذاک دروج بسيف نطلع فيه.. تعكلت فدرجة حكمت لباروداج مي زلقت بديت نشهد غمضت عينيا حتى لقيتو مورايا حاكمني بيدو على جنبي وانا متكية بظهري على صدرو
جواد: صايي موليتيش تحكمي روحک
نضت عليه وحكمت مليح فلباروداج
ميار: قصدک نرعش كي لفلون
جواد: ايييه
نحيت طالون وكملت حفيانة للفوق.. حليت لباب لقيت صوت مصالون باينة راهم مريحين لثم
مدلي فاليزتي ودخلت لبيتي رميت طالون وروحت لخزانة جبدت پيجامة ودخلت دوشت ونحيت هذيک لكلون لي كان فوجهي
صليت واش جاز ..شربت كاشي تع راس ورقدت
*********
دالتي نحكي
جينرال: لالا داخلة فيها قضية ياسمينة
فراح
جاسر: وقتل وتهريب في نفس نهار واش رايح يستفادو مفهمتش
جينرال: راني مولي ونحكو فلبيرو مشي هدرة تع تيليفون
جاسر: لازم عليا نفتح قضية قتل ياسمينة فراح
جينرال: عييت وانا نخمم كلش تخلط راني قريب 20 سنة ضايع
جاسر: علبالي صعيبة راح تلقا شكون قتل ياسمينة وحنا راح نديرو لي علينا
جينرال: وانا عندي كونفيونص فيک كون مجبتكش من عنابة لهنا
جاسر: كاين حاجة
جينرال: وشنوها
جاسر: كنت قريت وحدة مفقودة ولي هي بنت لمرحومة
جينرال: هه في رايک محوستش عليها؟؟ لبلاد قلبتها على راسها مكان حتى حاجة
جاسر: خلاص اومبعد نشوفو انا نخليک غدوة نتلاقاو فلبيرو
جينرال: ؤؤک
كوبا عليه وحط تيليفون ويخزر فلفراغ
راسو بدا يوجع
دخل شوفور دا ليفاليز باش يوصلو للمطار ويولي لجزائر وقالذفي قلبو
"قبل 20 سنة خسرت عايلتي.. مي ضوک واحد مراح يسلک من صهيب بن سالم"
دخل لطيارة ووجهة ديالو يصفي حساب لي خسرو كلش
مالغري دخل بيناتهم وولا يمشيهم هو مي كل ميقول وصل يلقا روحو يولي وين كان باسكو لعبة بدات قبل 20 سنة وغدروه لقا روحو وحدو تلقا صدمة مور ختها اولها
نهار مرتو وحب حياتو جابتلو ثمرة حبهم لي تحداو كامل ناس باش يكونو مع بعضاهم ولي هي طفلة نسخة مصغرة على يماها
كان خذا كونجي ملكازيرنة باش يروح يشوف بنتو لي نزادت
دخل لسبيطار فرحان دنيا مش سايعاتو
دخل ملباب لقا مرتو راقدة وباين عليها تعب لولادة
راح باس راسها وقعد يسنا تنوض شويا دخلت فرمليا وجايبة قطعة منهم رفدها وهو فرحان
فطنت مرتو على صوت ضحک شافتو وريح جنبها
صهيب: ريحتي شوية
ياسمينة: حمدلله.. هذا وين جيت
صهيب: معنديش بزاف
جا يكمل هدرة دخلت ختها وهي تتبسم سعاد: مبروک عليكم
صهيب: لعقوبة ليک
هبطت راسها وتنهدت خزرت فيه ياسمينة وهو دارلها الله غالب خرجت هكاک
قعدو جوغني كامل ygsro ويضحكو تصورو تذكار لهذاک نهار مي مكانش علبالو نهار لخر لي راح يشوف بنتو ومرتو
جاه تيليفون ملخدمة باس طفلة من راسها وخزر في ياسمينة
صهيب: نهدر فتيليفون نشوف واش يحوسو ونولي
ياسمينة: ؤؤک
خلاها مع ختها مالغري مايرتاحلهاش وخرج.. حكاو امور لخدمة وبلي كاين شحنة راح يهربوها للخارج ولازم يستعينو بلجيش تفاهمو وكامل.. حتى سمع صوت يعرفو مليح دار لقاه راجل سعاد ولي هو رشيد يتفاهم مع طبة على بيع اعضاء بشرية
شافو خرج وراح تبعو بطونوبيل وحد 2 سوايع ونص حتى دخلو لمزرعة بعيدة بلبزاف وواحد ميفيق بيها قعد فطونوبيل يشوف برک مي مكان حتى حاجة ستغرب حتى
بدا يشم ريحة ليصونص.. دور راسو لقا رشيد حاكم بريكي في يدو ويتبسم
رماه وشعلت طونوبيل قعد ونار محاوطة كامل لجوانب
رشيد: متلعبهاش شاطر باسكو انا اشطر منک
صهيب: كون راجل وواجهني مشي تتخبا مور ناار
رشيد: منبعد نشوفو شكون راجل
راح وخلاه تاكلو ناار وكان علبالو مكان حتى واحد يسلكو لثم حاول يفتح لباب مي غير فتحها جات نار على وجهو
داق فيه نفس وطاح على لكوسانة دايخ
جازت 5 دقايق حتى جازو زوج رجال يسكنو فوحد لقرية لثم وشمو ريحة في جيهة هذيک لپلاصة
دارو جهدهم باش يحبسو نار ويسلكوه وبعد مدة خرجوه داوه لسبيطار وحدوخر دخل كومة 20 يوم باش فطن
فطن وكان صدمة ليه انو ملامحو راحو تشوه بمعنى لكلمة
وفي هذيک ليلة عرف بلي مرتو ماتت وبنتو!! لي مشبعش منها تبحرت
ملثم فقد نطق وولا ميحب يشوف حتى واحد جاز شهر وهو فسبيطار
سمع جينرال تع لكازيرنة واش صرالو ولي كان اول واحد يوقف معاه
تآسف على حالتو بلبزاف.. وقرر يسفرو لإيطاليا بعدما دار كامل لاجراءات بلي مات وخرج لخبر
جاز عام وفي هاذ لعام بدا يرجعلو نطق وقنعو جينرال يدير عملية على وجهو ويبدلو ..ودارها
وولا للجزائر ورجع منصبو كيما كان.. قعد مور قضية مرتو عوام
قدر يحكم شحال من واحد يتاجر في الاعضاء وتهريب السلاح وهاذ شي خلاه يتعلى في مراتبو وجينرال لقديم دا تقاعد وصهيب دا پلاصتو وآمنو على كلش مي كل ميجي يوصل لرشيد يخرج كي شعرة ملعجين
حتى وين قرر يدخل في لعبهم.. وولا واحد منهم مي باينة مراحش يآمنوه من لول.. قعد مور لحقيقة يحوس عليها حتى ولا معروف في لمافيا تع روسيا ورشيد ولا هو يخدمو ولحد الآن معلبالوش هو راجل نسيبتو صهيب بن سالم
اما بنتو دار جهدو مي ملقاهاش جاوه خبار راهي برا لبلاد مي بضبط معلبالوش وين
بصح حاجة كان يقولها كيما كافح باش مدولو ياسمينة راح يدير كلش باش يلقا بنتو وينتقم لمرتو
فطن من تخمامو كي قالولو هبطت طيارة في ارض الجزائر تقعد وناض باش يكشف لمستور
•~•~•~•~•~•~•~•~•~•~•~•~•~•~•~•~•
¤¤جاسر¤¤
شفت لجرح لقيتو بدا يتلم ويبرا لبست تريكو وفاست ملفوق رفدت لمفاتح وتيليفون.. خرجت لقيتها كي عادتها مريحة تتفرج مع خالتي راضية جيرانة اصلا ديفوا ترقد عندها
خليتهم وخرجت رايح للمقر مبيد وصلت لقيت دنيا مخلطة محوستش نكسر راسي دخلت ديراكت لبيرويا شويا دخل مراد
مراد: هبلت نتا مزالک مريض وجاي للخدمة
جاسر: ميهمش ضوک لازم جيبلي دوسي تع ياسمينة فراح
مراد: ومنين نجيبو هذا
جاسر: باين من لآرشيف ازرب راني نسنا
خرج وانا قعدت نخمم ونعاود.. ليوم يولي جينرال ونتفاهمو واش نديرلو
جازت ساعة.. جيت خارج باش نروح عند مراد نشوف آسكو لقاه فتحت لباب لقيتو في وجهي
مراد: تقلقت هاني جبتو
وليت لپلاصتي وحطهولي قدامي وخرج باش يشوف خدمتو
فتحت دوسي وبديت نقرا فيه
" فراح ياسمينة.. عن عمر 23 سنة تم اختطافها من اشخاص مجهولين
التقطتهم كاميرات المراقبة للمستشفى.. في 7 جانفي 1999 تم اختفاء المدعوة وصرح مدير المستشفى انها كانت قد خضعت لعملية قيصرية لولادة فتاة.. ومن مساء يومها لم تكن مجودة في الغرفة 306
في 20 جانفي من نفس العام وجد جثت المدعوة في طريق السريع
حيث كانت مصابة برصاصتين واحدة في القلب مباشرة وواحدة في ساق اليسرى... في 30 جانفي من نفس العام عرضت القضية امام المحكمة الدستورية العليا
وبعد تحقيق ان المدعوة فراح ياسمينة تعرضت للقتل من مجهولين.. ولا يعرف هويتهم واغلقت القضية في 12 فيفري بعد المحاكمة الاخيرة...
تحت اشراف الضابط سليمان بن يوسف و المحقق حسن عمارة "
غلقت دوسي وانا مشوكي.. حبيت نربط الاحداث مقدرتش شكي مراح يفيد والو... لازم نلقا سليمان بن يوسف و حسن عمارة بلاک كاشما نعرف... دخل مراد
مراد : وااش خو لقيت واش تحوس
جاسر : اييه بصح لازم نلقاو سليمان بن يوسف و حسن عمارة راني شاک عندهم يد كي تغلقت القضية
مراد : صعيبة باش نلقاوهم كوم تقاعدو عندهم مدة
جاسر: ميهمنيش راح نلقاهم بلاک جينرال يعرفهم ولا وحتى لملفات ديالهم مكتوب لادراس ونميرو تع تيليفون
مراد: وي خلاص مي واش دخلها في قضية رشيد
جاسر: عندهم يد باينة ..مي اومبعد نحكو في هاذي
مراد: اييه تسما نوصلو لي غلق لقضية نلقاو شهود
جاسر: وي هذا وين حاب نوصل باسكو قضية تع قتل تغلقت في ميمپا شهرين مدخلتش لراسي
مراد: وعلى حساب علمي سليمان بن يوسف و حسن عمارة تقاعدو مور غلق لقضية
جاسر: مالا خلاص اصلا راسي راهو يوجع انا نروح ايدا كاشما عرفت قولي جديد
مراد: وي ومتزيدش جي حتى تبرا
خرجت.. شريت شويا قضيان ووليت لدار غير دخلت لاقاتني
مرام: طولت
دخلت لقضيان للكوزينة وهي مورايا تهدر
مرام: راک مريض لازم تريح
جاسر: علاه شوفي فيا نحارب
مرام: راسک خشين وذن المهم منريحش وحدي خالتي راضية ولات لدارها وانا مريحة قدام ربع حيوط
جاسر: كملتي وضوک بعدي راسي راهو يوجع
خليتها تاكل فروحها ودخلت لبيتي بدلت حوايجي ورميت روحي على لبونک نديسيدي واش ندير
•~•~•~•~•~•~•~•~•~•~•~•~•~•~•~•
¤¤ميار¤¤
نضت صباح مشي بكري كيما لبارح باسكو ليوم فطور لعروسة كيما قاتلي اسراء وغدوة نولو للعاصيمة
عدلت فراشي ودخلت غسلت ولبست هكا
رفدت تيليفوني وهبطت لتحت لقيتهم مريحين فصالون صبحت عليهم وريحت جاز لوقت سمعنا زغاريت خرجنا لقيناهم داخلين
مدولها مصحف و طاطا زهية مدتلها كادو سنسلة تع ذهب وريحة سلمنا عليها
وولينا لصالون مسكينة ملي قعدت مطلعتش راسها
ايناس: يا مرت خويا متحشميش رانا كامل فامي هنا ضياف راحو
هاجر: لالا والله والو
اسراء: آبنتي حنا لوما تهنينا من لغاشي سمانة وهما على راسنا
اسمهان: منحكيش انا
ميار: عرس كومپلي ونتي حكمولي راسم حكمولي رستم
ايناس: هههههه والله صح
هاجر: متعرفونيش بيكم
اسراء: نعرفوک.. انا بنت رحمة اسراء وهاذي ميار بنت خالتو زهرة هاذو عمات راجلک ايلا حكالک عليهم نصرو ثرثار وهاذي منال
هاجر: ههههه حكالي عليكم كامل منعرفكمش برک
منال: وعرفتينا عروستنا
ايناس: نكمل انا وهاذي الهام بنت عمتو نصيرة وكاين وحدوخرين ثاني مع لوقت تعرفيهم
هاجر: نشالله
اسمهان: ايذا راكي عيانة روحي تريحي
هاجر: لالا نورمال
ميار: خليها tgser معانا حنا غدوة رايحين
ايناس: نتي اسكتي راني زعفانة منک
ميار: علاه خير
ايناس: وكي تولي متحضرش عرسي
ميار: نهبط على جالک خسارة عليک
هاجر: علاه وين ساكنة
ميار: ساكنة في فرنسا مي جيت نقعد شويا في دزاير كوم في حياتي مجيت ليها
هاجر: مي تهدري مليح دزيرية
ميار: وي حنا فدار نهدرو عربية وتعلمتها ملي كنت صغيرة
منال: ووقتاه تولي
ميار: مبقاش بزاف يعني شهر ونص هكاک
اسراء: خصارة
اسمهان: اصلا والفناكم ونتوما غدوة تروحو
منال: مام انا غدوة نروح للعاصيمة
اسراء: مالا جي معانا نوصلوک في طريقنا
منال: ايذا مشي بزاف عليكم
اسراء: لالا
قعدنا نحكو وجاز لوقت فطرو مالين لعروسة وراحو وحنا طلعنا نفرزو حوايجنا وقعدنا فصالون
شويا دخل اكرم وموراه جواد وريحو معانا
اسراء: منال مشي غدوة تولي للعاصيمة جي معانا
منال: ايه ايذا مشي ديرونجمو
رحمة: وين راكي مريحة
منال: في اقامة تع المعهد
رحمة: جي تريحي عدنا كيفاه هاذي تريحي في اقامة وين علبالک واش كاين لثم
اسراء: اييه صح والمعهد مشي بعيد على لجاميعة ديالي ولا واش رايک جواد
جواد: ايه كيما تحب
منال: لالا بزاف عليكم منقدرش
رحمة: والله نزعف عليک
قعدت غير نخزر انا.. اصلا معندي منهدر تنهدت وجبدت تيليفوني غير رفدتو عيطتلي آسينات
رفدت عليها ونضت ملثم
آسينات: وااش زينة ديالي
ميار: صافا ريحتي شويا
آسينات: والله حمدلله مالغري بدا لوحام سوكتي برک
ميار: معليش المهم الخلقة التامة
آسينات: كملتو لعرس صايي
ميار: وي غدوة نولو للعاصيمة
آسينات: وشبيک حاسک آنورمال
ميار: عيانة برک ومبقاش ونولي
آسينات: مزيا خليتي پلاصتک وصايي لخطرة لخرة لي تبعدي علينا هكا
ميار: هههه زعما متحبيش كي نبعد واقيل تهنيتي مني
آسينات: لالا مي حابة نشوفک
ميار: وحامک جا عليا پييي ضوک شوفي كيفاه يخرج وليدک زيين كيفي
آسينات: ههههه وي يخرج لخالتو
..انا نخليک نروح نقري احمد شويا
ميار: سلميلي على حمودة قليلو كي جي ميرو تاكلک هذووک لخدود
آسينات: ههههه تهنا منک
ميار: هكااااااا... المهم سلميلي على قاسم قوليلو مزالني نسالک تشريلي صاک لي عجبني عند Zara
آسينات: مزال منسيتيش
ميار: آمشي قالک آرواح وآنساا وهايا طيري عليا
آسينات: هههه تهلاي في روحک
كوبيت عليها ووليت لصالون.. لقيتهم ساكتين
ميار: خير جماعة شبيكم تبكمتو
منال: نسناو فيک جي تمديلنا سوجي ههههه
ميار: وعلاه خلاصولک نتي
اسراء: احممم
اكرم: صايي ارواحي نلعبو پارتي شكشايكا
ميار: وجد روحک يسموک خاسر
اكرم: هههه نشوفو.. شكون يلعب
منال: نلعبو حنا ربعة اسراء ونتا وميار
ميار: آيا ؤؤک
درنا على طابلة وحطينا طابلات وقعدنا نلعبو.. وانا سكارة تالبت منال كل ماجي لحومتي نخرجها ونضحک في وجها ونقوللها هاذي هي لعبة حتى كرهت
جبناها لعب حتى دومنت انا وخلبتهم يكملو نشوف شكون يربح زاد دومن اكرم وقعدو اسراء ومنال قعدو يمدولهم فلواحد فوادهم خرج شغول يطمعوک بربح لاعلينا
ربحت اسراء ومنال كوفت روحها مسكينة
منال: هه ملبكري منربحش
اسراء: معندكش زهر
اكرم: صايي ربحتيني نتي بردتي
ميار: بيان سوور خوو
جواد: صايي نتوما متكملوش سماطتكم
ميار: ديرونجيناک
جواد: اييه
ميار: كاين بيتک ريح لثم
جواد: تساليني وين نريح؟؟
ميار: نووو ريح وين تحب
رحمة: بديتو نتوما خلاص
رحت ريحت ناكل في روحي دايمن يحشمني وضوک قدامهم كامل شاف فيا دورت راسي
قعدنا ngsro ماعدا جواد واكرم يهدرو على لخدمة منبعد خالتو ناضت ترقد
وبداا الانسحاب قعدنا غير انا ومنال واسراء
منال: علاش تضاربو نتي وجواد بزاف
ميار: الله غالب منتفاهموش
اسراء: يقولو هاذو لي يحبو بعضاهم
قالتها وغمزتلي.. خزرت فينا منال مستغربة
منال: هههه جواد يحب منآمنش
اسراء: علاه
منال: ملي نشفالو جابد روحو كي كنا صغار كنت طفلة لوحيدة لي يهدر معاها
ميار: علاه يهدر غير معاک نتي
منال: تقدري تقولي انتيمتو كي كنا صغار
ميار: وي كي كنتو صغار مي ضوک جابلي ربي تبدل كلش
منال: سيي مزالنا كيما مقبل
اسراء: وي بلاک.. مي مليحة راح تريحي عدنا
منال: ههه شفتي صدفة
ميار: المهم لبنات نروح نرقد غدوة نوضو بكري
اسراء: وي صح انا ثاني
ميار: تصبحو بخير
منال: بونوي
دخلت لبيتي mdigotya قال وشنو آنتيمها لالا مليح بزاف
استغفرت ورحت نحيت تريكو ولبست بيستيي باسكو سخانة
قعدت نتقلب في پلاصتي باسكو سخانة بزااف ليوم شفت كليماتيزور شعلتو كي بدات تبرد لبيت ولاو عينيا يتغمضو ورقدت
صباح نضت عضامي يسطرو كامل مكملتش تكسال حتى بديت نعطس وراسي يدور
طفيت كليماتيزور ونضت سور ضربني هواه حتى راسي راهو يوجع لبست سروال grona مع تريكو بيض ديمي مونش وفيه كتيبة دخلتو فسروال لبست باسكات بيضة ودرت ساک فيه پاپيي وريحة وتيليفوني رفدت كاشي تع راس وروحت لكوزينة ودايرة حالة بلعطيس
لقيتهم يستقهواو صبحت عليهم
و
رفدت كاس ما باش نشرب دوا
رحمة: وشبيک بنتي
ميار: منعرف خالتو راني نايضة مريضة
بلاک كي شعلت كليماتيزور
منال: نتي fragile
ميار: وي على حساب شوفة
شربت وخرجت روحت لبيتي شفت كاشما نسيت ولاا
وريحت على لكورسي وحاطة راسي اصلا كي نمرض منوليش نضوي
¤¤¤¤¤¤¤¤¤¤¤¤¤¤¤¤¤¤¤¤¤¤¤¤¤
¤¤¤¤¤¤¤¤¤¤¤¤¤¤¤¤¤
¤¤¤¤¤¤¤
¤¤جواد¤¤
فقت صباح لبست پونتاكوغ جين مع تريكو بلو ماغين
عدلت شعري ودرت ريحة.. شفت صوالحي واجدين خرجتهم وهبطتهم لطونوبيل تع اكرم باسكو ميكفيش مع دوزانهم
طلعت باش نشرب قهوة.. ريحت وقعدت نشرب
سمعت صوت عطيس دخلت وفي يدها لكاشي خزرت في واش لابسة كون تعرات وخلاص حكمت روحي قدامهم
وظهرت مريضة ثان
شربت وخرجت.. كملت قهوتي وقتلهم يوجدو روحهم نروحو
رحت طبطبت في بابها سمعتها قالت
'''ادخلي'''
فتحت لباب لقيتها حاطة راسها على لاكوافاز طلعت راسها وخزرت فيا وكانت تبان ذبلانة جات تهدر عطست
ميار: وشنو جيت تستشفا
تهدر من نيفها بركلها لكليماتيزور.. ربعت يديا عند صدري وتكيت على لباب
جواد: علاه نستشفى فيک
ميار: تنفحلک باسكو
جواد: علاه شعلتي لكليما ونتي علبالک تمرضي
ميار: كانت سخانة مقدرتش نرقد
جواد: وضوک مرضتي كي نوصلو للعاصيمة نديک لطبيبة
ميار: لالا صحا
جواد: مسقسيتكش وجدي روحک
ضوک نروحو
روحت ومكترتش معاها هدرة سبقتهم لتحت حطيت كابة تع يما حتى شفتهم هبطو جاو عدلت كلش وديماريت ديريكسيون للعاصيمة
مشينا وحد ساعة حتى بدات تعيط وتضرب في ظهري
ميار: حبس على طرف طريق اجري
سطاسيونيت على جنب وهبطت تجري
منال: وشبيها
اسراء: منعرف نروح نشوفها
جواد : ريحي ضوک نشوف
هبطت لقيتها ترد رحت ليها وحكمتلها شعرها حتى كملت جبتلها قرعة ما غسلت.. شفتها وجها صفر
جواد: راكي مليحة
دارتلي براسها لالا وتكات على صدري
مشيتها لطونوبيل وركبتها
حليتلها لكارو ومديتلها قرعة ما
رحمة: صافا بنتي
ميار: آممم
ديماريت.. طريق كومپلي وانا نعس فيها كانت متكية على كتف اسراء وكل زوج
دقايق تشم فريحة ديالها حتى وصلنا لدار
طلعتها اسراء وانا هبطت الكابات ودخلتهم لدار
منال: كاين بيت ليا
جواد: شوفي يما تقولک
مديتلها كابتها وطلعت تع يما واسراء درتهم في بيت ووليت جبت تع ميار دخلتها لقيتها متكسلة قدام اسراء
جواد: قوليلها تنوض نديها لطبيبة
ميار: لالا
جواد: هبطيها اسراء
هزتلي راسها ايه وانا هبطت مالغري تعب تع طريق مي منقدرش نخليها هكا
سنيتهم فطونوبيل حتى جابتها وركبت ديتها لكلينيک قريب شويا
لقينا لغاشي
سنينا حتى جات دالتها هي دخلت مع اسراء وانا ريحت نسنا فيهم
وحد ربع ساعة خرجو مدتلي اسراء باش نشريلها دوا
قعدو فطونوبيل وانا شريت ووليت
جواد: واش قاتلها
اسراء: ضربها ريح.. ومدتلها دوا تع لفيرتيج تاني
جواد: اييه ؤؤک
ولينا لدار فهمتهم دوا كيفاه تشربو ودخلت لبيتي دوشت وصليت ورقدت ديراكت
نضت على صوت آذان المغرب ..لبست قاميص وخرجت للجامع
صليت ووليت لدار ..خرجت في وجهي مناال
منال: اكرم راهو جابلک حوايجک وراني حطيتهم في بيتک
جواد: ضوگ جاا
منال: عندو وحد 5 دقايق برک ملي راح
جواد: ؤؤک صحا منال
شفت يما خرجت ملكوزينة وتتبسم جات ليا
رحمة: جواد حابة نهدر معاک في حاجة
جواد : نبدل ونولي
رحمة: راني في لبيت
بدلت حوايجي وروحت لبيتها طبطبت ودخلت
جواد: آنعم يما
رحمة: آرواح ريح قدامي
رحت ريحت حداها وتنهدت
رحمة: شوف جواد انا جامي جخلت روحي في حياتک باسكو علبالي واعي وعلبالک واش دير
جواد: يما روحي للمفيد باسكو علبالي عندک هدرة
رحمة: اييه ضوک راک 28 سنة بخدمتک ميخصک والو علاش مجيبليش عروسة
جواد: يماا ولينا لهااذ سوجي
رحمة: وي نولي ليييه حابة نشوف ولادک قبل ما تتغمض عيني
جواد: بعيد شر عليک.. ولا على زواج قتلک وعاودتلک مزال
رحمة: انا لقيتلک لي تناسبک اومبعد نتا خمم بغرضک
جواد: وانا ميهمنيش
رحمة: يهمک.. حاب نخطبلک منال
********
- إنتهاء البارت
- رايكم؟؟؟
- هاذ لحلقة فيها بزاف احداث.. يعني هكا نص لحكاية فهمتوها وكاين استنتاجات حابتكم تقلوهملي
- سمحولي على الاخطاء الاملائية معاودتش شفت لبارت ونشالله نسيي نصححهم
- واهم نقطة قولولي ايدا حابين نطول لكرو ولا نزرب آحداثو باسكو راح نولي سامطة بنعمييي سمانة حكيتها في 5 لبارت... شغول انا منوع لي نحب تفاصيل منقدرش نزرب باسكو تولي كرو تع سلک سلک
- ومنعرف علاه حابة نخلط لحالة جاوني بزاف افكار لا علينا
- تعليقاتكم ورايكم يهمني ويشجعني نكمل لكرو.. ومتنساوش ديرولي فوط √
- إلى الملتقى....♡♡