#دائرة_الجحيم
بقلمي:هبه محمد علي
الحلقة الثالثة..
حاولت أغطي نفسي وأنستر وصوتي من الخلعه راح وبقيت اتلعثم وأتمتم واعمل في حركات أبعد بيدي علشان البرة يسمعها ومايدخل..
- إحم إحم
عشان الفت إنتباه الداخل ووقت الحركه إستمرت قلت بلسان تقيل:
-في زول ،ماتدخل ..!
كنت متخيله لو قلت ليه كدا ح يبعد من الباب او يرجع..لكن شبح الزول قفل باب الحمام والحمام كان نورو منور ، بس الصاله لمبتها مطفيه والزول واقف قريب للباب علشان كدا ملامحو ماواضحةبعد ماسمعت صوت القفله كنت ماقادرة اميز هو منو بالضبط بس شكلو راجل والصابون دخل في عيوني وحرقتني وبقيت افتش للكلام واشهق لاني اتشرقت بالصابون والصوت طالع مني مقطع:
- إنت إنسان ولا جان.. ؟!
امرق بره.. والله اكورك والم عليك الناس..!
حاولت أجري تجاه الشماعه والصابون مغطي عيوني وكنت عاوزة اتغطى بهدومي بس اتزلقت..
ومع وقعتي دي حست بزول بمسكني من نصي لثواني وفكاني وقعت في الأرض بدون وعي صرخت مع الوقعه.. وهو علي طول وقع من فوق لي وبديت أصرخ وفجأة سمعنا صوت بره بقول...
-افتح الباب دا..!
كان دا صوت جدي الشبلي وهو بحاول يدفر الباب اللي نحن واقعين جنبو وقافلينو باجسامنا..
-افتح الباب بقوليك!
في اللحظه دي ناس البيت جو من العرس وكانوا سامعين صراخي العالي واتلموا كلهم وعمي واولاد اعمامي دفروا الباب..
وكان منظر مخزي ومحرج ومهين لأبعد حد، انا في الأرض وسعد ولد عمي من فوق لي وانا من دون ملابس!
بالنسبة لي دي كانت اكتر لحظة كرهت فيها حياتي وخجلت من نفسي، إتمنيت لو اني في اللحظة دي ميته او لو الارض تنشق وتبلعني ولا أشوف نظراتهم المهينه دي !
جدي دخل الحمام هو ومجدي ورفعوا سعد، جدي الشبلي جراهو بره الحمام ودفرو رماه علي الارض وبقى يضرب فيه ويكورك بطول حسو معاه..
-دي اخرتها يا كلب؟ دي عرضك ، بدل تحميها تعتدي عليها؟
كانو كلهم مخلوعين وما قادرين يتصرفوا بس واقفين يتفرجوا مجدي كان شال ملابسي المعلقاها في الشماعة ومداهم لعمتي عشان تسترني بيها...
دخلوني غرفتي ، وانا منتهيه،، منهارة عديل، احساس خوف ولا خلعه مامفهوم.. كانت بتلفت زي الزول الرايحة ليه حاجة وخايف لحد ما عمتي شريفه ضربتني كف! حتى بديت استوعب.. ودخلت في حالة بكاء هستيرية...
اعمامي فكوا سعد من جدي وساقوه بعيد من ..
جدي الشبلي و حبوبتي آمنه دخلو غرفتهم...
-الليله ووب ، دي فضيحه شنو يا خوانا! الشبلي،،، الحصل دا مصيبة..
-لا حول ولا قوة إلا بالله يا حجة. الله يسترنا...
في اللحظة دي استأذنت راوية وزوجها معاذ و دخلوا غرفه جدي الشبلي وزوجتو ..
-قولي بسم الله يمه الفضيحه تتلمى ..!
-تتلم كيفن يا راوية بعد السواه ولدك دا؟
اتكلم جدي الشبلي بصوت جهور كدا وآمر:
-مافي زول غيرنا نحن ناس البيت شاف الحاصل.. نعرس ليهم بس ونلم الموضوع على كدا!
-انا كمان جاي اقول ليك كدي يا ابوي!
-خلاص بدايه الشهر الجاي العرس، من هسي جهزوا حالكم..
-باقي اقل من عشرين يوم لكن، دا زمن بسيط..!
-بسسس، ولا كلمه..!
مما بقيتوا تردوا علي كلمه بكلمة حالكم مال، انا خليتكم براحتكم ماتقولوا كبرت وغلبتني الربايه.. لالا والله انا اربي بلد بحالو، لكن افتكرتكم كبرتو وبقيتوا رجال و تقدروا تتحملوا مسؤولياتكم..العرس يوم واحد الشهر الجاي، وهيام يتعمل ليها احسن عرس ماينقصها ولا شئ، اما المعولق ولدكم دا خلوه علي بعرف شغلي معاه بعد نحل الورطة دي...!
طلعوا كلهم من قدام ابوي الشبلي، راوية كانت فرحانه بان سعد ح يعرسني لأسباب كتيرة، وعارفه ان الحصل دا ما في زول يقدر يطلعوا برا بيت ابوي الشبلي.. وبكدا هي مخططها ماشي مظبوط..
اما أنا كنت في غرفتي مقبله على الحيطة وضامه روحي وأبكي، احاسيسي ملخبطة ونفسي مكسورة، جاتني حبوبتي قعدت جنبي في السرير، وكانت متأثرة وهي بتمسح علي شعري:
-معليش يابتي ، الجات من السماء تحملها الواطة،، نحن واثقين في تربيتك، إلا الخايب الله يازاهو من يومو موطي راسنا، وهسي جدك قال بدور يجي يتكلم معاك، أخليه يجيك؟
ماقدرت أرد عليها ، كان كل تفكيري ح أقابلو كيفن بس بعد المنظر الشافني فيه دا؟ واعمامي واولادهم ونسوانهم وعماتي والبنات؟ وووووب علي وااااي ح أقابلهم كيف تاني واخت عيني في عيونهم !! وبقيت أبكي بحرقة ودموعي دي ما راضيه تقيف...
-هيام يا بتي مادايرة تتكلمي معاي؟
سمعت صوت جدي وانكمشت علي روحي وبقيت بتخج من البكاء ..
-قومي يا حاجه سوي ليها كبايه ليمون مظبوطة عشان تروقها..
قامت حبوبة من جنبهي وقعد جدي، مسااافه يعاين في الأرض ماقادر يتكلم...وأخد نفس طووويل وبصوت بعيد وحزين:
-استغفر الله العظيييم... يابتي كدي قومي حيلك واستغفري...وكلو مقدر من ربنا...انا جاييك نحل الاشكاليه دي، وعشمان في فهمك وتقديرك لمصلحتك..
ما عندي قدرة اعاين في وشو كنت بفاوضو بالبكاء بدون صوت مسكني من يدي وقلبني عليه وحاول يقعدني لما حبوبتي جات عشان أشرب العصير...ماعندي ليه نفس والله، لكن جدي وحبوبتي مابكسر بخاطرهم لو سم مستعدة أشربو وانا مسلمة و راضيه...
شلت الكبايه مسكتها وشربت منها علشان يتطمنوا ويمشوا يخلوني براها انا محتاجة أبكي واكورك وأفش غبينتي.. بعد شربت واديت الكبايه لحبوبتي.. جدي بدأ الكلام وياريتو لو ما اتكلم:
-يابتي انت عارفه نحن بنعزك قدر شنو، وبنخاف عليك، والحصل دا ما برضينا، ونحن عاوزين نصلحوا..
عاينت لي في عيونو وقريت قرارم بس كنت بتتمناه يقول كلام مختلف ...
-الود الحيوان دا لو في ظرف تاني انا عينو مابخليه يملاها فيك، بس بعد موقف قبيل دا مضطرين نعقد ليكم علي بعض..!!
بقيت اعاين لجدي ما مصدقاه...
-سعد؟؟؟! كيف دا ؟؟ من بين كل خلق الله نصيبي انا يكون اسوأ واحد فيهم؟؟
ومجدي؟ جدي قول كلام غير دا عليك الله!
قول انك بتهظر! حبوبة قوليه انا ما دايرة سعد...!
حبوبة تبكي :
-يابتي ولا انا دايراهو ليك ، لكن نسوي شنو، لابد نلم الفضيحة... فوضي امرك لله... حسبي الله ونعم الوكيل بس!
قام جدي من جنبي والحسرة وألم قال:
-خلاص يا حاجة خليك الليله معاها هنا حاولي هديها ، والله يابتي كان مناي اعرسك لواحد يستاهلك بس مافي حل غير كدا، اعفي لي بس! أعفي لي..!
يتبع...
*****--------*******---------*****---------*****
#دائرة_الجحيم
الحلقة الرابعة
بقلمي:هبه محمد علي
______________
يومي داك مانمت للصباح وشلت الليل كلو بكاء.. حبوبة قاعدة حارساني لما غلبها النعاس ونامت..كانت بتحاول تصبرني بس انا مقهورة ، ماقدرت اقول شي،، ماقدرت ادافع عن نفسي، كان نفسي اكورك باعلى صوت واقوليهم انا ماغلطت يا ناس.. بس ما قادرة..الصباح جدي جاء خبط لينا باب الغرفة ، حبوبة صحت مشت تفتح الباب وصبحت عليه بقول :
صباح الخير يا حاج ، كيف اصبحت؟
-الحمد لله ، انتو كيف؟ وهيام اصبحت كيف؟
-مانامت والله ولا غمدت للصباح..!
دخل جدي الغرفة وهو بصبح علي، مارديت عليه بس قعدت في السرير ، جاء مجدي استأذن ودخل صبح علينا وقال لجدي :
-يا جدي انا عاوزك في كلام..
-مجدي يا ولدي، اي شي قسمة ونصيب، والحصل دا حدد نصيب هيام.. لو عاوزني في الموضوع دا بقوليك الله يقسم ليك بت حلال تستاهلك، لكن هيام خلاص شيلها من راسك..!
انا حيلي برد وقلبي بس بقى شغال يدق وحسيت بمرارة في خلقي.. وكأنو قلبي دا في كلاب تنهش فيه.. وانا شايفه مجدي بيرجف وهو بيعاين لي ولجدي..
-طيب يا جدي انت سألتها من رايها؟ يمكن ما دايرة سعد..!
-الحصل دا مامعاه سؤال، ولو رفضت سعد اي راجل يتقدم ليها تاني ح يكون نظرتو ليها فيها شك ونقصان.. علشان كدي انا قررت نلم الموضوع..
-ياجدي هي ماغلطت، وانا مستعد اتحمل اي شي يحصل.. بس ما تحكم علينا بالاعدام وتديها لسعد..
كلام جدي دا ولع لي الضوء لحته انا ماكنت شايفاها، فعلا انا موقفي كدا محل شك وظن.. ولو مجدي او راجل غيرو اتزوجني، ح يكون الحادث دا في راسو.. وانا ما ح اقدر اخت عيني في عين اي واحد من اهلي تاني،، كفايه شماتت بنات اعمامي وامهاتهم وعمتي زهرة ، عاينت لجدي وقلت ليهو :
-انا موافقه يا جدي!
كان مجدي يعاين لي و الصدمة واضحة في عيونو وملامحو اتغيرت، انا اتعمدت ما اعاين ليه..ما ح اتحمل نظرات شفقه .. وما ح اخليه يبقى موضوع ونسة ، جدي طوالي قال لي :
-ربنا يكملك بعقلك يا هيام، العرس بدايه الشهر، شوفي دايرة شنو وطلباتك كلها مجابة..
حبوبة كانت بتعاين لي وتبكي.. عارفاني ماموافقه بس مابتقدر تكسر كلام جدي نظرت لي بعيونها الباكية وقالت لي:
-هيام يابتي، وكلي أمرك لله، انا عارفه خاطرك فيه شنو، لكن سعد ولا غيرو الله قاسموا ليك مابفوتك، ان شاء الله ربنا يقدم الفيه الخير...
قبلت منها غالبني اقول ليها شنو ، بس كل القدرت أرد بيهو قلت ليها :
ياحبوبة الجواي وجع الكلمات مابتوصفوا، انا مابقدر اكسر كلام جدي ، ولا بقدر اواجه الناس وهم جواهم شك، والسبب الاساسي لموافقتي إني سمعت كلام سلمانه أم مجدي لما قالت ليهو :
-مجدي يا ولدي كلام جدك دا هو الصاح... كيفن بتدور تعرسها بعد الحصل ليها؟؟
-يا أمي الله يرضى عليك هيام ما عندها ذنب في الحصل دا...
-اي لكن كمان لو طلعت حامل؟
سكت مجدي وكان مخلوع من كلام امو.. وهي فرحت من جواها لانها حست كلامها دا ح يكون سبب يغير بموقفو ، واصلت كلامها وقالت ليهو :
-عفوي ورضاي يا ولدي.. هيام دي ذي بتي واكتر ، وانا كنت بتمناها ليك.. لكن بعد الحصل دا ، شيل الموضوع دا من راسك نهائي..
-لكن يا أمي ...
-خلاص انا العندي قلتو ليك.. وان بقيت عفوي ورضاي ما عندهم قيمة ، عرسها مابمنعك وكلام الناس في ستين..!!
قطع حبل الذكريات صوت عمتي منيرة وقالت لي :
-هيام ..سرحانة وين..
- ....
-انا أمك الماولدتك.. قولي الدايراه وبقيف معاك.. صحي وافقتي علي سعد؟؟
هزيت ليها راسي ، وانا ببلع في دموعي .. وعاوزة قدام عمتي أظهر قوية ومبسوطة ، وفى الوقت ده جدي رسل السوق وجابو لي افخم شيله.. وحبوبتي جابت حاجات الحبسه وأجرت لي مرة تدخني ...
انا كنت زي الإنسان الآلي اتحرك على حسب أوامر حبوبة وعماتي،، يوم الحنه دا كان أقسى يوم عرفت فيه إن مجدي قطع إجازتو وسافر ما قدر يحضر عرسي، وما ودعتو لأني ما دايرة و ماقادرة الاقيه ، حاول كم مرة يشوفني بس أنا كنت بصدو..
يوم حنتي كان لامي نسوان من الأهل والجيران والأصحاب.. وجابو فنانه مشهورة ... وكلهم كانوا بيرقصوا ويضحكوا ،، راوية وسهاد علشان سعد اتزوجني ودا مرادهن ،، من جانب ورثي من ابوي ح يكون من نصيب ولدهم... ومن جانب يمكن مجدي يتزوج سهاد..!!
عمتي زهرة فرحانة علشان خاته عينها على مجدي لبتها مرام وشوقي أساساً خاطب ميرال..
-شووفيها سمحة كيف!!
-ماشاء الله قمررر، لكن ماتستاهل تتدمر مع سعد الصايع الضايع دا..
-سمعت قالوا إغتصبها عشان كدي جدها حلف طلاق يعقد عليها...
-هي ها قالوا بينهم علاقها وحملت منو..استغفر الله العظيم..!!
دي كانت تعليقات معظم النسوان في الحنه... ولللأسف كانن بيسمعني الكلام في أضاني...!
أنا ما إستحملت وأعصابي تلفت خالص.. ووقعت من طولي...!
يتبع....