وبشر الصابرين

البارت العاشر

مرحبا حبايبي...

///وبشر الصابرين ///

البارت العاشر .

بقلم Aseel

.........

كالتلي هنيال التحب مثلك ولف
كتلها يعني بالمختصر هنيالج
    كالتلي ترض اغازلك
كتلها غير انتي الغزل يحلالج
   كالتلي بس عندي طلب
كتلها كولي كل طلب يجرالج
    كالتلي تنطيني وعد
كتلها اوقع ع البياض اكبالج
    كالتلي سري بذمتك
كتلها مو زلمه اليخون اسرارج...

..............
شكراً على الاهداء ..
.........

جنت حاطتها بحضني ارضع بيها .. واسمع صوت شاهين برة .. مدري شصار بية من سمعتة كال وين البنية هسة ..

راد يغمة علية من الخوف ..
عصرتها بحضني حيل وغمضت عيوني منتظرة يسحبها مني ..وابجي ..

طب علية.. واني حجيت وابجي ..وحاضنة البنية قوي

شاهين بداعت كلمن غالي عليك لا تاخذها مني .. عليك الله شاهين لااااا ..

طبت وراه باجي

ام شاهين : شاهين شيرين جابت ولد مو بنية ..

شاهين : لا تلعبون علية .. حلمت بيها ..

شيرين جان قران يم راس البنية .. شلة وحطيتة بوجهة ..

شاهين بداعة هذا القران لا تاخذها وتحرمني منها .  عاقبني بكلشي الة ضناية. تدري بية شكد جنت اتمنة تجيني بنية .. لا تحرمني منها ابوس ايدك .

شاهين :شو جيبيها مشتاقلها ..

شيرين: ضلينا صافنين اني وباجي شنو مشتاقلها .. انوب حطها بحضنة وضل يبوس بيها رغم اولادي القبلة جان يخاف يبوسهم مو انوب يحطهم بحضنة ..

شاهين :شسميتوها .

ام شاهين: ماسمينها لحد هسة لان منعرف مصيرها شنو .

شاهين :ماطول عاندتيني وحبلتي بدون رضاي عناد بيج اني اسميها .. ومااطلع ابن ابوي اذا ماخليتها تحبني اكثر منج ..

ام شاهين :شغيرك ابني سامع شي . 

شاهين: لا يمة شايف مسامع ..

شيرين: اسم الله اشفت وهيج تغيرت .

ام شاهين :اي ابني اشفت

شاهين: والله حلمت حلم غريب يمة.

حلمت عود اني بمكان ظلمة كلشي مااشوف .. والمح بنية من بعيد تأشرلي تريدني اجي وراها ..

وضليت امشي وراها لحد مطلعتني من الظلمة ..
على مكان حلو وكلة اضوية ..

فزيت من حلمي على صوت صياح وخبصة مال جنود من طلعت .. حاجيت الولد طلعو الايرانيين مأسرين الوحدات كلها .. الة وحدتنا .

بلحظتها تذكرت البنية الي بالحلم .. وعرفت شيرين جابت بنية .. حتة من سولفت لجماعتي .  ماصدكو كامو يضحكون وويكولون امانة بوساتنة الها هاي نقذتنا ..

رغم الحرب والاسر الي صار وطلعنا من حلك الموت بس جان بالي يمها تمنيت بس اشوفها ..

واحضنها شتاقيتلها واني مشايفها ..

شيرين: الحمد لله والشكر .. ربي نقذك من الموت .

ام شاهين: الف الحمد لله هسة ادز على واحد من خوانك يجيبلنا ذبيحة مال سلامتك ..

شيرين :مكلت شراح تسميها ..

شاهين : اسميها لافين .. يعني نقاء الروح الجميلة .

شيرين :حلو اسم لافين .

ام شاهين: انشاالله تتربة بعزك ودلالك .

شاهين :هاي قطعة من روحي صارت بعد

شيرين :ضل يبوس بيها وهية تتنعوص ضايجة

شافها بدت تبجي انطانياها وراح يسبح ..

اوزار  جانت يمنا حتة تعاوني وهية حضرتلة اكل واني كمت حضرت هدومة ..

طلع من الحمام وكابلها وكعد ياكل .. حتة مقبل يصعد فوك .. كال انام يم بنتي ..

فرش يم كاروكها ونام ..
كعد بليل لان جرها نومة جان تعبان خطية .

هنا جان عمر سامر تقريبا ٢٢ سنة

وبعدها ابنة زياد عمرة ٢٠ سنة

والبنية الجبيرة جيهان عمرها ١٨ سنة

وراها ولد خالد عمرة ١٧ سنة 

والبنية الثانية ازهار ١٥ سنة

واخر العنقود زيدون عمرة ٩ سنوات تقريبا .

هذولة اعمار جهال شاهين .. كلهم كبرو .

الي يشوفهم شلون يعاملوني واعاملهم ميكولون هاي مرت اب .. لا والله اصلا حتة مرات انسة اني مرت ابوهم ..

احبهم وغلاتهم مثل جهالي واكثر ..

وجهالي محمد واحمد صارو عمرهم تقريبا ٨ سنوات

وبعدها محسن ٦ سنوات .

وبعدها حسن ٤ سنوات .

.....

بالنزلة مال شاهين هاي جان مكابل لافين وكاعد .. ميقبل اطلعها برة الغرفة بعد ما صعد غراضنة فوك ..

اهتمامة مو طبيعي بيها حتة مرات احس بروحي كمت اغار .. جان ميقبل باجي تساعدني بيها .. يكلي بنتي هاي اني اداريها ..

رغم عندي اربع ولد جانت باجي تساعدني بيهم الة لافين جان ممنوع اللمس ..

يخاف عليها من الهوة الطاير ..
بليل من تبجي الكاه فاز قبلي .. ويباوعلها من ترضع .لحد متنام يشيلها ويبوس بيها وينيمها بكاروكها ..

اخر يوم الة بالنزلة .. الليل كلة مكابلها..

شيرين: وتالي وياك ترة بديت اغار ..

شاهين :ولج ماكدر اعوفها .. شلون حعوفها شهر ..
راح يصير هذا اصعب شهر الي ..

شيرين :لهدرجة ... بعدها لحمة حمرة حتة متدري شكو .  لعد لو تناغيلك وتتلكاك شسوي .

شاهين: ياياااابة .. غير يجي هليوم ..

شيرين: اشو تعلقك غريب بلبنية رغم عندك بنات غيرها ليش ..

شاهين: ولج هاي من الله انزرع حبها بكلبي ..
ولج ماكدر شلون اعوفها

شيرين: كول الله كريم لا تسويلك عرضة. ..

شاهين: انشالله ..

شيرين : ثاني يوم التحق شاهين بعد ما وصاني ادير بالي عليها يمكن عادها ١٠ مرات (ديري بالج على لافين )  من طلع من الغرفة لحد باب البرة هوة يوصي ..

طلع ودرت وراه مي بارد حتة يردلي سالم ..
سديت الباب وراه رجعت حتة اكمل نومتي لان دنيا فجر ..

بهاي الفترة انشغلو بزواج سامر الي صار فدوة لطولة عريس .. خطبولة بنت ابن عم شاهين ..

مجنت اعرفهم بس معرفة سطحية ..

وننتظر يكمل بناء بيتة ويتم الزواج ..

مر الشهر وصار موعد نزول شاهين .
طبعا مااحجي على منظرة من اجة وتلكبناه وعيونة تدور على شي ضايع منة ..

اخر شي نطق .

شاهين: وينها ..

ام شاهين: منية يمة هيانهة مرتك ..

شيرين:  لا باجي اني صرت كخة .. يقصد على بنتة حبيبتة ..

شاهين: ههههه لا انتي الاصل ام سامر .. شعدنة غيرج انتي نور البيت .. بس لافين وين .

شيرين: شفتي باجي

ام شاهين: شجاك ابني .. اول مرة يصير عند طفل ارتاح اشوية ميصير تشيلها وانت تعبان تاخذ من تعبك اسبح وتغدة وتلحك تشبع منها ..

شيرين :راح سبح بسرعة وطب للغرفة ورحت وراه جبتلة الاكل لكيتة يشمشم بيها وهية نايمة .. وتتنعوص متضايقة لان تضوج .

صحتلة حتة يكعد ياكل .. اجة كعد ياكل ويباوع عليها .. كمل وراح يمها نام جانت مطلعة ايدها من الكماط .. حط اصبعة بنص ايدها وغفة وياها

مر يومين واجة شاهين صاحني للغرفة الصراحة اني خفت من شفت وجهة ميبشر بخير ابد .

طبيت كلي .

شاهين :سدي الباب وتعالي عندي موضوع اريد اخذ رأيج بي

شيرين :طبعا اني لزمني كلبي .. من كلي هيج
خير خما صاير شي ..

شاهين: لا ماكو شي بس ردت اكلج اليوم اجة اخوج الصغير علية ..

شيرين: منو ماجد .

شاهين: لا اخوتج من ابوج

شيرين: تقصد سامي

شاهين :اي سامي .

شيرين :وشراد منك

شاهين :طلب ايد جيهان مني .. يكول شايفها من تروح للمدرسة ويريد يخطبها .

شيرين :ضليت صافنة وكمت امتمت.
م.. م. مادري شكلك .

شاهين: اني مرايد شي منج بس انتي تعرفين مرت ابوج وابوج واني ماريد انطي بنتي لهيج ناس ماريد اظلمها 

شيرين: اذا تقصد سامي فسامي تربيتي .. كلهم ربيتهم اني .. وكلبهم علية ..

وابوية ومرتة صايرين ناس كبار وكتلهم المرض وماكو منو يداريهم اني سمعت زوجة سامي يم اهلها
شنو طلكها لو شنو

شاهين: اي يكول مطلكها لان متقبل تعيش ويا امي تدرين بخوانج كلمن وبيتة متقبل ترجع لاهلها

شيرين :والله حقها هية تنجرع مرت ابوية .

شاهين: شنو رأيج انطيهم لو لا .

شيرين: اني العلية كتلك سامي كلش زين هذا تربة على ايدي ..ودائما يسأل علينا بس بدون ماامة تدري

ومرت ابوية ترة راح حيلها كوة تحجي .
وابوية هم صار بالفراش ..

تدري قبل كم يوم من سمعت عود كلبي وجعني ورحت اشوفهم جنت انت بعدك منازل ..

رغم لكبر والعجز والمرض .. نفس طبعهم .. متغير ..
حتة من طبيت واني ابجي . ابوية بس كال هلة ودار وجهة نام .. ومرت ابوية كالت مابي حيل يحجي ويا احد .. واني هم طابة انام انتي مو غريبة .

شاهين: صدك .. والف مرة كايلج لا تروحين هذولة مو اهلج .. اهلج مازن وماجد وشيلان وديلان .. واني واهلي .. احنا اهلج .. شيرين اني ماريد احد يهينج لو ينزل من قيمتج ..

هسة عوفي هلسالفة يعني اوافق لو لا ..

شيرين: لا تدخلني بهيج سوالف اعتبرة غريب وانت رأيك بي ..

واذا تحير روح استشير مازن

شاهين: هوة هم هيج ..

شيرين :مرت يومين وشاهين وافق بس بقة يفاتح اهلة بالموضوع .. وياخذ رأي بنتة .

اهلة كالولة البنت بنتك وبكيفك اذا خوش ناس انطيها

ودزني حتة اخذ رأي جيهان بس حسيتها هاويتة ويمكن هية هم معجبة بي لان عيونها لمعت من سمعت اسمة ..عرفت جوابها قبل لا تكولة ..

حضنتها ودمعت عيوني .. بنتي كبرت وراح تتزوج .
ولج الة اجهزج احسن جهاز ..

رحت بشرت ابوها وتمت الخطوبة بعد اسبوع ..

اجلو العرس لكم شهر لبين متخلص سادس ..

بهاي الفترة كمل بيت سامر .. اخذني سامر وشاهين والعروس رحنا جهزنا اثاث البيت .. جانو بكلشي ياخذون رأيي. حتة زوجة سامر .. حسيت روحي صدك امة ..

خاصة من يكلي يمة شنو رأيج بهذا .. لو يمة ياهو احلة .

لو زوجتة من تكلي باجي شختار .. اريد على ذوقج .

حسيت روحي طايرة ..

كملنا البيت وجهزنا للعرس ..وتم العرس بفرحة جبيرة .. متخلة من الدبكات والمباركات ..

اشوف  العالم تصيحلي وين ام العريس .. صيحولنا ام العريس .. لو صيحو ام سامر ..

خلوني اصدك اني صدك ام العريس ..
فرحتي متنوصف .. شعور محد مجربة غير بس الام الي مزوجة ابنها ..

سامر واخوانة اولادي .. وفرحتهم من فرحتي ..

كملنا هوسة العرس وكلمن راح لبيتة .. ورجع كلمن لحياتة .. وصار سامر من ضمن المدعوين يوم الجمعة .. كل مجانت اللمة تكبر كل ماافرح اكثر .

جان عمر لافين ٧ اشهر تقريبا .. وتزوجت جيهان .. مخليت شي ماجهزتة بيها وابوها صاغها ذهب من فوك لجوة هاي فرحتنا وفرحة البيت .. جانت مثل مرة اكبر من عمرها شاهين يكول امها جانت هيج .. متسوي شي اذا متخطط الة ..

حتة كلامها ونصايحها لاختها .. وطريقة تعاملها .. تكول مرة بعمر ال٣٠ .. مرات احس روحي زعطوطة كدام عقلها الشايلتة ..

مخفت عليها ابد لان اعرفها واعرف بيها تدبر عيشتها ..

ورة زواجها من جانت تجي تكول

جيهان: مابيهم حيل يسوون مشاكل فلا تخافين علية  انظف واسوي اكل اصبلهم واصعد لغرفتي وسامي خوش سامي شايلني بالصلوات يكلي انتي تربية اختي واختي اعرفها اكثر واحد ..

واللع لو تدرين شكد متاذي من ورة امة .. لان محد يقبل يجي يمها من الجناين كلهن يكرهنها .. بس اني كلت اتحمل لخاطرة خطية ..  وهواي شغلات تعلمتها منج .. وهلشي خلاني اكبر بنظرة ..

شيرين فدوة لكلبج اي حبيبتي رفعي راسنا ولا تخليهم يكولون معرفو يربون .. بستها من راسها ..

......

بقت بس ازهار وياي هاي صارت ايدي اليمنة ..اذا متساعدني تاخذ لافين يمها جانت تموت عليها .. تكلي ماما هاي بنتي مو اختي ..

هية تبدل وتغسل .. وتوكل من تشوفني مشغولة .
بس من يجي شاهين متلزمها لان ميقبل احد يلزم لافين غيري اني وهوة ..

كبرو الجهال وسامر صار  عندة طفل ..
وجيهان حامل ..

وسنة تجر سنة ..

وانتهت الحرب سنة ١٩٨٨ ..
وشاهين صارعمرة يتجاوز الحد المطلوب .. يعني انهى خدمتة ورتاح كلبي بعد عذاب ٨ سنوات حتة احس شعري خلص من كد التفكير والقلق صار يوكع ....

هلحرب اخذت هواي شباب وشياب وحتة اطفال .. بين جنود وبين ضحايا حرب من الطرفين .. هواي عوائل انهجمت بيوتها ..

هواي ترملن هواي اطفال تيتمو ..
منو جان يكدر يفك حلكة ويكول ليش .. الليش اذا كلتها يطير راسك ..

الناس تخاف على روحها وجانت تمشي ويا السير ..

هنا صار عمر لافين ٥ سنوات ..
جنت الاحظ تصرفاتها متعجبني .. مغرورة .. ومن يجي خطار تتنحس وتضل لازكة بابوها ومتقبل احد يسلم عليه ..

وتعادي اخوانها .. وتضرب بيهم وكلشي تشوفة تريدة ..

جان زيدون دائما هوة الي يفهمها ويعرف شلون يقنعها ..

علاقتهم حلوة ..بهاي السنة تزوج زياد هم .. نفس الفرحة والاجواء

شاهين جان مدلل لافين حيل .. دلال مو طبيعي ..
حتة مرة باجي كالت ..

ام شاهين : لافين لجمال (جمال ابن حماية الي اصغر من شاهين جان عندة بس ثلاث ولد وماعندة بنات وهوة ومرتة مدرسين )

شاهين: شنو انتو بكيفكم بنتي تكبر وتقرر.. والعالم مو ولدهم تكلهم بابا زوجني هاية .. الة اخليها تجي وتكلي بابا زوجني هذا .

شيرين :انت ضل طلع عينها بسوالفك ترة الدلال الهواي مينراد وهاي بنية ..

وانت مو جنت تكول البنية تربيتها صعبة اشو مرخي الحبل فد مرة الها ..

شاهين: هاي غاليتي ... شتأمر انطيها حتة لو عيوني متغلة عليها ..

شيرين :لهدرجة تحبها .

شاهين :يمكن من حبي الها لو اضل طول عمري اتأسفلج لان زعلت من كلتي حامل .. هم مااوفيج ..

انتي جبتيلي قطعة مصغرة من الجنة ولج دشوفي ملامحها من كد متحبني صايرة تشبهني ..

شالها وحطها بحضنة ويبوس بيها .. باجي حجت .

ام شاهين: شوف هاي سوالفك مال بابا زوجني متعبر علينا كول ماريد ازوجها وخل تكضي العمر يمي .

شيرين: هسة وينها وين الزواج خل تكبر والله كريم .

مرت السنوات .. ومر العمر يمشي وياهن.

طبينا سنة ال١٩٩٠ ...

سجلت لافين بالمدرسة سجلتها بعمر ال٧ سنوات لان جانت ناعمة وضعيفة .. واصغر من عمرها وخفت عليها من الجهال .. وحتة شاهين هم جان خايف عليها .. عبالك روحة تطلع وياها وتطب وياها  .. جانت صعبة بشكل وهواي تتنعوص وتتدلل   .. حتة بصعوبة اكتسبت صديقات ..
شاهين ماقصر بدلالها ..

هم رجع العراق للحرب .. هم رجع ضيم الامهات والزوجات والاطفال الي خايفة تتيتم ..

صح شاهين تسرح بس كلنا عراقيين واذا المصاب مصار ابيتك يصيب جارك

جانت لافين مصارلها اسبوع من داومت تفاجأنا بورقة بيد محسن اخوها الي جان وياها هوة وحسن ..بس جان صف سادس .. وحسن صف رابع ..

شيرين: شنو هاي الورقة

محسن: مادري المديرة كالت انطيها لابوك لو لامك .

شيرين :فتحت الورقة لكيت استدعاء ولي امر .. للطالبة لافين ..

زين هية شلحكت تداوم
انتظرت شاهين يجي وشوفتة الورقة ضحك .. كال بسيطة باجر اروح وياها واشوف ..

النهار كلة اسألها ماما مسوية شي .. تكلي لا .
ماما شنطوج دروس تكلي ماطونا شي .. حتة دفترها جان فارغ يعني ممعقولة صف اول وكلشي ممنطيهم وصار اسبوع ..

ثاني يوم متحملت رحت ويا شاهين اريد اعرف سالفتها شنو ..

راحت ويانا وطبينا للمديرة نستفسر ..

شاهين: السلام عليكم .

المديرة :وعليكم السلام ..

شاهين: اني ولي امر الطالبة لافين شاهين .. طالبيني استدعاء خير خما اكو شي

المديرة:  لا ماكو شي بس بنتك متقبل تكعد بصفها ومن بداية الدوام لهسة هية تكعد بصف اخوها محسن ..

ترة احنا مبلشين دروس للصف الاول وراح يضيع عليها اذا ما بدت ويا الجهال ..

شاهين :هاي صدك بابا لافين هيج تزعليني منج .. عود اني اكول بنتي شاطرة وحتطلع اشطر وحدة باخوانها .. هيج تسوين ..

لافين: بابا اخاف ابقة وحدي .. محسن حباب هوة وصديقة امير هواي يضحكوني ويلعبوني .

شاهين: اذا متروحين لصفج ازعل منج وبعد ماحبج .

لافين :بابا ماعرف احد بي والله ..

شيرين: تعالي اني اصادقلج .. وشوفيهن شلون حبابات .

لافين :ماروح ماروح .. اريد بابا يصادقلي .

شيرين :ها حتة هاي لازم ابوج

لافين: اي اني اريد بابا ..

شاهين: فدوة يروحلج بابا امشي اوديج .

يلة طبي جوة واني وماما ننتظرج برة بباب المدرسة حتة اذا تطلعين من صفج ازاعلج  ماشي ..

لافين : هزيت راسي بمعنى اي ...

اخذني بابا ووداني لصفي .. وعرفني على بنات الصف حتة يصيرن صديقاتي بس اني جنت ماحبهن ..

بس علمود بابا ميزعل قبلت ابقة ..فاتت المعلمة  ودرستنا ...واني مادة بوزي ليكدام انتظر تصير فرصة حتة اطلع مليت خاصة ماعرف ماما وبابا وين راحو .

دك جرص كالت المعلمة اكلو  اكلكم وشربو مي من يدك الجرس انوب ضموهن ..

اني ركضت لصف اخوية .. لكيتة يسولف هوة وامير صديقة ..

محسن :ها لولة .. اشو جيتي هنا بابا مو كال لا تجين بعد ..

لافين :ااريد اشتري انطيني فلوس .

محسن :وين تشترين الحانوت ازدحام تنمردين انتي وهذا طولج .

امير: يخبل طولها .. لاتحجي عليها .

لافين: اذا ماارجع واكولة لبابا عليك اكلة يقلد علية محسن

محسن: اسفين عيني بس قصدي تنداسين..هسة معليج ضلي هنا يم امير واني اروح اشترياج واجي.. شتريدين اشتريلج ..

لافين: جيبلي قمر الدين وعصير رنا ..

محسن :اكو واحد ياكل قمر الدين وعصير .

لافين: شمدريني همة شعدهم .. جيبلي من الي يجيبهم بابا الي ..الي احبهن.

محسن: امري لله .. دير بالك عليها لا توكع .

امير :دروح عبالك رايح للحرب ويوصي ..

لافين: راح محسن وجابلي قمر الدين وعصير رنا .. وبسكت ..

محسن: تعالي تذكرت انتي امي مو ترست جنطتج اكل ليش متاكليهن

لافين: مابيهن من هذني حاطتلي لفة  وتفاحة وخيارة وبطل مي .

محسن: غير بيهن فوائد هذني ميفيدنج ومن ارجع اكول لامي عليج اكلها ترة الاكل متاكلة تنطي للحارس .

لافين :خطية واكف من الصبح لحد منطب مياكل ..

امير: يمة فدوة لكلبج شنو هلحنية

لافين: دك الجرس ورحت لصفي وكملنا باقي اليوم عادي واستمريت بالفرصة اروح يم  محسن وامير وارجع لدروسي ..

حسن وياي بس اكرهة وكل مااشوفة اتعارك وياه .. جان خواني بس اشوفهم اتحارش بيهم وماحبهم ..

بس محسن احبة لان يشتريلي .. وازهار احبها ..وزيدون ..

زيدون جان يحاول يعقلني ويخليني ابطل غرور لو دلال ويفهمني انو احنا اخوان ولازم واحد يحب الثاني ..

اشوية اشوية بديت اتأقلم .. ويا اخواني بس علاقتي بيهم مو مثل الثلاثة هذولة

جان اذا يجي خطار ابقة متعلكة بركبة ابوية حتة محد يبوسة .. اغار عليه حيل .. حتة اخواني محد يبوسة لان اكتلهم .. وشحدة الي يحاجيني ..

جنت اميرة البيت .. رغم نة نة متقبل على تصرفاتي وبابا يكلها بنتي بكيفها شتريد تسوي اني من اسمع هيج انغر اكثر ..وتزيد تصرفاتي عناد وعصبية ..

بس من دخلت مدرسة شفت البنات .. وزيدون يعلم بية ومحسن وحتة امير جان ينصحني ..وازهار جانت الام الثانية الي

جانو عامل اساسي بتغيير شخصيتي

مرة بالمدرسة بالطلعة  تعاركت اني ووحدة .. وضربتني اني وضربوني .. شيسكتني .. ضليت .

ضليت الطريق كلة ابجي يريدون يعرفون اشبية اكلهم معليكم بابا يجيبلي حقي ..

محسن :ولج بس كولي منو وياج .

لافين: معليك اكول لبابا انت معليك ..

مصدكت طبيت للبيت ركضت جان بابا بعدة مجاي .
ضليت انتظرة حتة مبدلت هدومي .. لحد مااجة واني طكيتها بجية بحيث احتارو شلون يسكتوني ..

كوة سكتني سولفتلة .. ابوية كال

شاهين : ميخالف بابا ميصير اروح اضربها عيب .

لافين: ما تجي باجر وياي يعني تجي .. والله اذا ماجيت بعد لا اروح ولا اوصل للمدرسة

شاهين :يلة كلشي ولا تضوجين باجر اروح وانعل والديها هاي الي بجت غاليتي ..

شيرين: شاهين ترة تربيتك غلط .. كافي دلال .

شاهين :دعوفيها هسة دتتدلل عليج لو علية .

شيرين :.. سكتت محجيت لان مثل كل مرة قافل
لافين بهاي الفترة تغيرت صح مدللة بس اشوية خففت مشاكلها ويا اخوانها ..اشوية بدت تتأقلم .. وصارت تسولفلي على صديقاتها بس اكثر سوالفها واسرارها يم ابوها .. تسولفلة من طبت للمدرسة لحد مطلعت وطبت للبيت

وهوة مستمع الها بابتسامة ويستمع الها  ويناقشها بدون ملل

جنت اصفن عليهم واستغرب على حالة الي يشوفة شلون جان رافض فكرة الحمل خاصة ببنية .. وشلون راد ينطيها .. ميصدك شلون مدللها وشايلها على كفوف الراحة ..

لافين: ثاني يوم بابا راح ويانا بس من وكت طلعنا حتة يلحك على دوامة ..
وصلنا وجانو قليل الجايين ..

ضليت لازمة ايد بابا وواكفتلها بباب المدرسة ..

شاهين: ولج بابا خل نطب اكعد جوة رجلية راحت من الوكفة والله مابية حيل .

لافين: لا بابا اريد الزمها هنا حتة متنهزم .

شاهين: اي عود من تجي اروحلها ..

لافين :طبينا جوة بالساحة وهية طبت واني عطت بابا هاية بابا هاي ضربتني

هية شافتنة كامت تركض بين الصفوف تحير وين تروح واني جارة ابوية من ايدة واركض ويركض وراي .. والحارس يباوع لابوية .. 

طبت بصف وحصرتها بالباب كتلة بابا تعال ادبها هاي وينها .. هية كامت تبجي .

نغم: عمو والله ماسويها بعد ..

لافين :اجة الحارس على ابوية .

الحارس :عمي عيب رجال شكبرك تريد تضرب طفلة .

شاهين :هههههاااااي كل عقلك اضربها بس ماردت اكسر قلب بنتي .. وجاريتها ..

لافين: اني عبالي حيضربها .. اشو طلع فلوس من جيبة وانطاها الها وباسها ..

شاهين :حبيبتي بعد لا تضربيها هاي اختج .. وصيرن صديقات واجيبلج هداية من اجي مرة ثانية ..

لافين: ضليت صافنة لان بابا سوة هيج ..
ليش متضربها ..

شاهين: عيب بابا انتن خوات .. ليش تزعليني منج . انتي حبابة وهية هم . صيرن صديقات وشاطرات .

نغم :شكرا عمو .. هاي الفلوس راح انطيها لبابا لان ماعندة .

شاهين: ليش ماعندة انتو وين كاعدين .

نغم: احنا كاعدين هنا ورة المدرسة

شاهين :هذاالبيت الصغير قصدج

نغم: اي . هوة هذا بيتنا .

شاهين :طلعت فلوس انوب وانطيتها .. بس مو تضيعيهن .. واذا كالج ابوج .. كليلة ابو صديقتي انطاني هدية لان شاطرة وحبابة ..

نغم: اي عمو شكرا ..

لافين :اشو هاي حضنت ابوية .. دفعتها .. وخري مالتي هذا .

شاهين :لافين بابا شكلنا .

لافين :اسفة بابا بس ماريدها تحضنك .

نغم: لا بعد مااحضنة والله وراح اصير صديقتج جيبي الصحيبة ..

لافين :وتصاحبنا ومن يومها صارت اعز صديقة بالصف .. كعدنا سوة بنفس الرحلة ..

بابا من رجع سولف لامي الصار وكلهم ضحكو علية لان جارة ايد ابوية واصيحلة تعال ادبها .. صرت نكتة .. وكل ميضحكون اكوم ابجي واتمرغل حتة اسكت ..

مرة من المرات .. جنا راجعين  من المدرسة اني ومحسن وامير ..

وصلنا للشارع ومحسن كال .

محسن :انتظروني هنا اروح اشتري واجي من هذا المحل .

لافين: لا تتاخر حباب .

ضلينا واكفين اني وامير..جان تفوت سيارة عروس ..

صحت بصوت سيارة عروووس شكد حلوة ااااالله

امير :يجي يوم وتصيرين عروس ...

يتبع ....

من هنا راح تبدي شخصيات جديدة تدخل ..والها دور مهم بالقصة ..

اتمنالكم قراءة ممتعة ..

تحياتي Aseel ..

احبكم .🍒😘

صوتوووووووووووو