انطفاء نجمة
للكاتبة : Hawraa
..تعالي بسرعة يفلانة
حبيبج عينة ذبلانة عسى الله
لا ينومني واتركج ليلة زعلانة
، انه ملوع انه مولع انه العاشك
ان الولهان .
لجي لهلج واكللهم احبن بتكم الحلوا
، واذا مارضو ينطونج!!
ابوكج بوكة بالكوة
اعادي الكل على عشانج
عمامج، اهلج، اخوانج
واجيب الدنيا وافضحكم
وانام بوسط شارعكم، واطيرن بيج
فوك الفوک واشيلنج على جناحي...
صوتن فراشاتي الجميلات الحبابات 👀🖤
+ قراءة ممتعة 🖤
...........
ترف....
رمشت بعيوني عدة مرات من دخل واحد
لابس قميص ماروني اخذتة بألاحضان باستة
بكل جرئة وكامت تسولف ويا بقرب مدري شلون تصرفت بوقتها من صدمتي وشدة قرفي تجاهها
رفعت تلفوني واخذت عدة صور، انطتة مدري شنو علاكة ملفوفة وراح سدت الباب واجتي بسرعة رجعت لمكاني وسويت نفسي طبيعية رغم اني بداخلي كمية حقد وقرف مو طبيعية
اباوع على ايدي ترجف مثل السعفة اوف شجاني
اخذت نفس وهدئت نفسي، دخلت للمطبخ ما باوعتلها اجتي يمي تباوع تباوع علية من فوك ليجوة عبالها شفتها، كالت
... شدتسوين؟
باوعتلها بطرف عيني وكلت ببرود
... مزة
رفعت حاجبها، وكالت
... اممم سويلي وياج
ابتسمت بتصنع
... تدللين حبي
كملت الكهوة وهي كعدت تباوعلي من فوك ليجوة
، اخذت ملح خاشوكتين وخليتها بالكهوة بدون متنتبه
رحت يمها خليتها يمها على الميز، وابتسمت بتصنع كتلها
... اشربي قلبي
باوعت صفح، وكالت
... خاف تردين تسمميني
كتلها رافعة حواجبي
... لا يبا اني اسممج صدك جذب مو بالحيف غير
انتي مرت ابوييي الغالية
هزت راسها، وكالت
... اوي هاي شنو تكولين مثل العربان يبا
منيلج هاي انوب
رفعت حاجبي ردت اطش الكهوة بوجهها
... وليش عيني عربان بشنو احنا احسن منهم
وبعدين العراق بي هواي لهجات وكل لهجة تتميز عن الثانية ووحدة احلى من اللخ على شنو هال تفلسف والمياعة
هزت ايدها معاجبها الكلام، وتفر بالكوب
سكتت جان كتلها بأبتسامة
... صدك عمة انتي هم رايحة للحج؟
اخذت نفس وكالت
... لا
سويت نفسي مصدومة، وكلت
... يااا شعجب الي بعمرج حجن وعدهم احفاد
فاجئتيني صراحة، زين اكلج ام صديقتي بكدج خوش مرية تريد تروح للحج شنو رأيج ترحين وياها؟
كالت بأستنفار وعيونها تنكط سم
... ليش عيوني بعدني اني ويني وين الاحفاد
بعدني شابة اخبل ثلاثينية بكامل انوثتي
ابتسمت بأستفزاز، وكتلها بهدوء
... ياا خطية انتي صغيرة لعد شعجب هالكد عندج
تجاعيد بوجهج يرادلج حقن هنا
كملت كلامي واني ااشر على خدها
، رفعت ايدها تتلمس خدها بقلق وهي تكول
... هاا صددك؟!!، خل اروح اجدد الفلر لعد
رفعت حاجب وكلت واني اخذ رشفة من الكهوة بكل هدوء
... يعني انتي مسوية فلر شلون تكولين ماسوي ابد؟.
كلبت ملامحها، وكالت بعصبية
... يووو شبيج واكفتلي على الحجاية الوحدة
هسة كلت بالغلط مو الة مسوية عمليات تجميل اصلا جمالي طبيعي
هزيت راسي
... ماشاء الله اي صح انتي شكرة من هاي بابا انعجب بيج اني جان عبالي من تأثير ام عباس تزوجج بس طلع سحر جمالج الخلاب
رفعت حاجبها، وكالت.
... منو هاي ام عباس
رفعت شفتي وكلت
... وحدة كلش خوش مرة شغلها مضبوط تخبل مثلج
هزت راسها بغرور وجع مصدكة الصخلة ، كملت كلامي
... اي حجية
... شنو حجية ولج ششايفتني
... ااا اقصد بيبي شبيج، شكد مواليدج انتي ولا ادري
عدلت كفشتها، وكالت
... مواليد 1989
غصيت بالكهوة، وكمت اكح كتلها عاقدة حواجبي
... ماشاء الله ما بيناتنا هواي لعد
هزت راسها، وشربت من الكهوة بس خلتها بحلكها كامت تركض للسنك واني اضحك ضلت تكح وتغسل وتشرب مي
... يا بربوك حقيرة تردين تسميني جلبة اني اعلمج
ضحكت، وكتلها ببرود واني اخذ كهوتي وامشي
... مرة ثانية سوي شغلتج بيدج لان اني فد وحدة حقيرة ديري بالج مني اليوم زين خليت ملح يجوز باجر اخلي غير شي
طلعت من المطبخ اضحك، وهي تعيط وتسب جنها جعجوعة الجذابة تكول اني مواليد 1989 وهي اقل شي يطلع عمرها خمسة واربعين سنة اذا مو اكثر
ام الصبغ والسيليكون مسوية سيليكون لمؤخرتها *
صايرة تخوف جنها مروة راتب، من السمن .
صعدت لغرفتي ضايجة كلش مشتاقة لجوجو الحقيرة
هسة الله يعلم بيا حال هي تنهدت كاعدة على الجرباية افكر مر اليوم طبيعي ثاني يوم بليل جنت كلش ضايجة
كمت طلعت كتبي، وكعدت ادرس بدون نفس شنو هاي الهندسة عمي موتتني صعبة انعل يومها اثناء ماجنت اللعن بحضي دك تلفوني
كمت بسرعة يرادلي حجة حتى اترك الدراسة
شلتة ابتسمت بتوسع شفتة جسووووري، رديت كلت بصوت هادئ
... هلووو
... هلا يبا شلونك
كعدت على الميز مبستمة بدون سببب
... هلا بيك ابو الشباب بخير الحمدلله، انت شلونك المرة العيال
ضحك واني كلبي دك بسرعة على ضحكتة اخخ خطفت كلبي ضحكتة البربوق
... بخير بخير يسلمون، ممكن تنطيني الآنسة ترف حبيبي الغالي
ضحكت، وكتلة
... تدلل عيناي
... شني من ضحكة بوية، چنها ضحكة رقاصات
... الشغل مو عيب شبيها الرقاصة
... انه ادري صح لسانج، اي شخبارج
... تماااام
... شو تماام؟.
تنهدت، وكتلة
... زوجوني
سكت شوية، وكال
... نزوجج مرة وحدة؟ اي شكو بيها من حقج يبا
عندج واحد معين ببالج لو ندورلج على ذوقنا
كتلة بتفكير
... لا انت جيبلي واحد حتلو مطي بس زوجوني زوجونييييي
... اعصابج يبا شبيج مستعجلة انطي مجال نلكيلج واحد خبل حتى يتحملج
... معلييييية زوجونييي ماريد ادرسسس زوجونييي
ضحك، وكال
... تدللين جنج على عريس هسة اخذج لأسعد
خوش زلمة معدل
كتلة بضحكة
... صدك موافقة موافقة فدوة ماريد ادرس
والله متت هسة هذا شنو يشتغل
... عركچي
... على راسي
ضحك بصوت واني ابتسمت، كتلة بضوجة
... لا صدك موافقة عادي كتلك الشغل موعيب
بس بطلوني من الجامعة لعبت روحي هاي الهندسة شكت حلكي حتى الله ميرضاها
كال بجدية
... تحملي بوية تحملي هذا مستقبلج، ابوج ومرتة مابيهم آمان اضمني نفسج
... اووووف ادرييي شسوي جويسر شسوي اذا ماجبتلي عريس اني راح اجيب
كال بجدية
... كافي مسلتة
... اشكرك
... تدللين
... شكد مستفز انت لخاطر الحمزة
... ادري
... استغفر الله
سكتت شوية متمددة على الجرباية اباوع للسكف واحجي ويا، اسمع صوت انفاسة من يدخن واتخيل شكلة شلون يكون
... جسر
... عيونة
ابتسمت، وكلت بهدوء
... احجيلي عنك
... مثل شنو؟
كتلة بتفكير
... انت غامض احس اكو شغلات هواي ما اعرفها
ماحب ينضم علية
كال ببرود
... شلچ بيها
... شلون شلي بيها، احجيلي اكو شي ماعرفة؟؟
كال ببرود
... لا
اخذت نفس وكلت
... بلي اكو
.. اي
... يعنييي اكوووو
رد بكل برودة اعصاب
... اي
اخذت نفس متنرفزة
... شبيك جسر رح تخبلني اضوج من هيج اسلوب باردد
... ضوجي
كلت بصوت
... عززاااااا والله راح اسد الخطط
ضحك بصوت، وكال
... احب انرفزج
... استغفر الله دكافي
... حلوة من تتعصبين
... اني بكل وقت حلوة ادري، ولتغير الموضوع احجيلي انت ابسط شي اهلك متحجي بيهم واني ماخلي ملحجيلك اسرار بيتنا كلها يمك
ضحك، وكال
... تمام يبا، مثليش تردين تعرفين انه عندي اخ واحد واخت اكبر منج وامي مرة من اهل الله
تنهدت وكتلة
...يعني هسة انت عود سويت زين وكتلي؟
... والله حرت وياج اسكت مترضين احجي مترضين وتعال يا جسر افهم هرمونات الآنسة ترف
... ديلا راح اروح اقرة هو عريس وماكو
... ديري بالج على نفسج وركزي بدراستج لاحگة على العريس
ابتسمت وسديتة منة، يستفزني بس الثولة احبة
وهو هم تصرفاتة توحي بحبة الي بس مادري شنو منتظر ميعترف. ..............
...........
جمان.....
مرت سبع ايام من حياتي، سبع ايام من العذاب، سبع ايام من القهر ، سبع ايام من الظلم
كلها عشتها وأكثر تدمرت نفسيتي فوك ماهي متدمرة
حتى اكل ماكدر اكل صرت جني هيكل عضمي، عمتي مدري شلونها وحمواتي معاجبهن الوضع وبس يسمعن حجي، ومن ثاني يوم خلني اشتغل وياهن وقسمن الشغل بدون خجل
صارت السبعة مالتي، واجني نسوان بكد شعر راسي
ناس تعشق النفاق والقيل والقال جايبتلي عمتي فستان احمر صارخ بشكل وبي كومة شغل تريدني اللبسة ضغطت على اسناني ، وكتلها
... لا شكرا عندي هواي
خزرتني كدام خالتهم، وكالت
... البسي حبيبتي صدك جذب اني حسبة امج
قابل تستحين
اخذت نفس، مانعة نفسي من الانفجار كدامهم
اخذتة وصعدت الغرفتي باوعت اكو بطل عصير
على الميز شلتة وفتحتة وطشيتة على الفستان
وشمرتة، رحت لبست كلبية امي جايبتها بالجهاز
شكد اكررهن بس مابيدي شي.
نزلت جوة شافتني عمتي عقجت وجهها، كالت
... هاي شنو يالعنودية وين الفستان لابستلي
هاي الخرگة، شحلاتة ذاك مبين مال عرايس
يخبل
كتلها بأسف
... اني هم عجبني بس انطش عليه العصير
وتنكع
كالت بأستنكار
... وينة؟
... فوك بالغرفة اجيبة تشوفي؟
عافتني وراحت شكد مكروهة وغثيثة استغفر الله
ترف كالت راح اطلع من الجامعة واجيج ما فرحانة بأهلي بس فرحانة بيها، بلشت تجي النسوان وما اسولفلكم على الاطلالات الفاخرة الي لابساتها
تارسات روحهن ذهب يلمعع كل كلادة بكد راسي
واللمع وايلاينر مكزكز، واشكال الوان عيوني كامت توجعني من الالوان
اجاني جاهل كال
... عمة عمة، اجتي وحدة تخبل جنها باربي
تكول صيح عمة جمان
كمت بسرعة ماعندي باربي غير ترف، طلعت ويا لكيتها واكفة على صفحة ولابسة نضارة شمسية والشفايف مقوسة والاجواء معاجبتها رحتلها بسرعة حضنتني
... لج هاي وين عااايشة انتي اخذيني من الهوسة ماريد احد يبوسني بسرعة صعديني لغرفتج
ضحكت، وسلمت على عمتي وصعدنا بحجة تشوف غرفتي
راحت شمرت جنطتها على الجرباية، وكالت
... عزااا جمان هاي شنو الهوسة
كعدت بصفها، وكلت بجزع
... هاي يومية هيج حبي حتى بغرفتي مخلصانة من الخطار ياهو الجاية وصاعدة فوك
كالت بقرف
... اييييع وين الخصوصية بالموضوع؟!!
... الخصوصية بخالتج لج لعد اني شكول صار اسبوع احس نفسي اريد اموت اكرهم كلهم اولهم هذا الكو** النايم بصفي
... اوووف سودة بوجهي، بس عمتج تبين حبابة
باوعتلها صفح
... ترف دنجبي بلا هي مو تنكط سم من ثاني يوم
خلتني اغسل البيت كلة لج حقيرة بس تسمع حجي موتتني عوذ الله منهم كلهم واحد ازيد من اللخ
كالت عافسة ملامحها
... اويي عفية شوكت تخلصين
هزيت راسي بتفكير، وكلت بجدية
... الله كريم ترف بس ان شاءالله ما ابقى هنا
طول عمري وادفن نفسي
حضنتني، وكالت
... عفية حبيبي القوي
حضنتها اني هم، وبعدها طلعت كومة غراض جايبتلي
... لج شدعوة هالكد ثولة
... دهاج يمعودة اكلي من خير رائد قابل الحية احسن منج
كومة نساتل وشغلات هم جايبة تدري بية
ما اكل وياهم هواي، خليتهم بالكنتور واندكت الباب
يردونا ننزل دكت رجلها متريد تنزل بالكوة خليتها تنزل وياية
نزلنا كعدنا على صفحة، وكل شوية يجن نسوان يسلمن علية، وهي تغلس متبوس اجوي اهلي امي وضحى
وكرايب بوستهن من عيب العالم لا اكثر بسطحية، وعفتهن وكعدت بمكاني ويا ترف
اثناء ما دنسولف اجتي مرة كعدت يم ترف
لابسة عباية راس وجواها دشداشة خضرة وبيها ورد كبار كلش وتراجي ذهب طوال طالعات من الشال
وكلادة جبيرة
لزمت ايد ترف، جان تباوعلي ترف فاتحة عيونها
عزا هاي تقرف احد يلزمها بسرعة سحبت ايدها كالت الها المرة
... فدوة شلون جمال انتي شسمج يولو؟
باوعلي، ورجعت باوعتلها عزا هاي صديقتي
قبيحة هسة تفضحها
... صبرية
عضيت شفتي مانعة ضحكتي، كالت المرة
... فدوة شلون اسم حلو مثلج
ابتسمت ترف بتصنع، بعدين كالت المرة
... اكلج اني من جيتي ادحك عليج شلون جمال ونزاكة اريد اخطبج لأبني
ترف كالت بفرحة
... اي والله حجية كل الهلا اني اريد ابطل
من الدراسة اكيف
ضحكت المرة واني ادعي انو ترف متسويلها فضيحة
انعل يومها،
... نزول عليج شلون سوالف، هو ابني يشتغل بالحلال مال ابو وخير من الله وبيتنا جبير وماعندي بنيات بس ست ولد
... اهااا حلوو ماشاء الله
رفعت حاجبها المرية، وكملت
... اي انتي وين اهلج شو ماشفت امج وياج.؟
كلبت عيونها ترف، وكالت
... حجية خلي اكلج حتى لتكولبن غشتني من البداية باجر عكبة من نتزوج تكولين صبرية ماكالت بس اني
مريضة بالقلب، وعندي قرحة، ضغط وسكر مزمن
وجالي، وعندي تهشم بالعظام وقالون صاعد ونازل ومستعرض
فتحت عيونها المرة
... يااا صدك
... اي شسوي من الله، وها ترا ماعرف اطبخ
يعني تكضوها مطاعم وماعرف امسح وانضف تدرين بعد الي عدهم قلب شوية تعبانين يصيرون وحتى اطفال ميجيبون
خلت ايدها على حلكها المرة ومدري شحجت
ترخصت وكامت باوعتلي ترف ضحكت، وكتلها
... فلك طرج شسويتي ايدي على كلبي كلت هسة تفضحني هاي
... شنو اني كاولية قابل شسويت هي جذبة بيضة
اباوع المرة كعدت ويا العجايز وضلن يباوعن على
ترف ويحجن ، وترف تضحك بعدين رحت للمطبخ
حتى اجيب مي ورجعت لكيت ترف بالصالة واكفة ويا جهال واحد منهم يصير ابن خالة انس هو عمرة صغير بس ضخم شوية وسمين
اسمع ترف تكلة
... شوف لك اذا ما وليت من وجهي هسة اكتلك والله
ترا اني انكلب سعلوة
كاللها
... ميخالف عمة انتي حلوة خل ابوي يتزوجج
امي مو حلوة
... لك ناقص ولي منيي انت وابوك
حجة الولد الثاني
... خالة تزوجيني من اكبر انتي تشبهين
هاي الممثلة البلتلفزون
وخرت تريد تروح راد يلزمها كامت تكمز
... لك وخر ايدك عيييييع لتطخنيي
انتبهن عليها النسوان وهي مدايرة بال
اجتي ام الولد وخرتة وتكتل بي، كالتلها ترف
... ترا ابنج يحجي عليج يكلي امي مو حلوة
خزرتها لترف، وموتت ابنها كتل
انعل يومج ترف موتتني ضحك وربي النسوان
كلها تباوع عليها وهذيج ما همها تمشي بكل ثقة ونزاكة
بعدين قبل ليصبون غدة كالت
... عيني اني اذا شفتهم يلوصون بلأكل احتمال يغمى علية وماضل وقت هسة اجاني السايق باي
بوستني وكلش ضجت، ودعتها وراحت
رجعت جوة امي بس تباوع علية صاحتني كعدتني يمها جايبتلي هدايا اني بالكوة كاعدة تحجي وياية واني ماهتم طلعو من عيني كلش اهلي.
بعدها خلصت السبعة ونص باتو يمنا
ونص رجعو لبيتهم مو هوسسسة ضيم ، مرت الايام ماكو شي جديد من سيئ الى اسوء انس الله ياخذة ماريد حتى اجيب سيرتة.
بيوم جنت بالمطبخ هستوني كملت المواعين
اجتي بتهم اصغر مني بسنتين يمكن بس هي ضخمة شوية، و الشعر مكزكز ومنفوش والدشداشة برتقالية وبيها طكع
وكفت يمي جان تشمر ماعون بالسنك، وكالت بأمر
... غسلي
رفعت حواجبي، وكتلها
... لا بربج؟
تخصرت وتقدمت علية
... شنو معاجبج حبي؟ ، هو انتي حالج حال الخدامة هنا هاي وضيفتج
ابتسمت بشر وكلت بكلبي
إذا كانت النهاية فلا تمت جبانا، جريتها من شعرها بكل قوتي من حركة كلبي وكتلها بغضب
... باعي بالهمجية يالوصخة، زبالتج انتي تغسليها
بيدج يا عار افتهمتي لا انتي ولا عشرة مثلج تخوفني صار فترة ساكتة اكول خليني بس وحقة لأالله اذا تجاوزتي بعد امسح الكاع بكرامتج
وضربتها راجدي هي عاطت، واجتي تريد تضربني دفعتها بقوة مدري منين اجتني القوة بس من حركة كلبي ماتحملت رفعت اصبعي بتهديد
... اذا مديتي ايدج علية اكسررهاا
... بت الفكر حيوانة اني اعلمج يبوووو يمةةة تعاييي شوووفي شلون ضربتنيييي
كامت تعيط اجتي امها والولد جانو طالعين
شافت خدها احمر وشعرها منكوش، عاطت بية وهي تنكط سم
... لج ك*** هاي شمسوبة ببنتي اليوم اخلي انس يربيج يا ما مترباية سا***
رفعت حاجبي وكتلها بأستهزاء
... لاااا والله خلي انس يربي روحة بالبداية
مو يربيني الي
اجتي رادت تضربني دفعت ايدها وكتلها بفحيح
واني بقمة غضبي ودي اشرب من دمهن هسة، كل واحد الة طاقة تحمل معينة واني سكتت هواي وصار الوقت الي لازم انفجر بي.
... وحق الله اذا مديتي ايدج افضحجج انتي
وابنج العاااجز، الي مسميتة رجال وهو مالة
علاقة بالرجولة
بهتت ملامحها ورصت على اسنانها ، وهذيج بتها واكفة تباوعلي بشماتة تنتظر امها تضربني اندارت على بتها وعاطت بيها حتى تطلع من المطبخ
... يمة صدك جذب ماشفتيها شلون ضربتني
واني لا منها ولا عليها
... اطلعييييي راااانيييييييا
طلعت وهي سدت الباب واجتي علية، كالت بتهديد
... شوفي ولج اذا احد درة بهذا الموضوع حلكج اشكة
افتهمتيي
رفعت حاجبي، وكتلها بأنتصار
... مدام محد مأذيني اني ما احجي ولا افضحة
ولا راح اكول لأهلي، بس اذا اذيتوني لو طخيتوني اعتبرو نفسكم مفضوحين وشغل البيت خل بناتج يخدمنج مو اني
هزت راسها بوعيد، وكالت
... خوش
عفتها ومشيت صعدت لغرفتي بسيطة اشوفكم جمان شلون تصير منا وهيج
، حيوانات وربي
اني عايشة ويا حيوانات مو بشر عدهم المرة بس للخدمة والكرف ولازم ترضي زوجها عبالك نبي مو زوج انعل ابوكم لابو الزوج، هالكد ما مريت بشغلات
حتى لساني صاير مفشگ..............
.................
ترف....
كاعدة واكلب بقلق وتفكير بصور الحية الي اخذتهنالها
عضيت شفتي شسوي اشوفهن لأبوي لو لا، جانت الصورة عبارة عن هي واكفة ويا وضاحكة والصورة الثانية رافعة ايدها تريد تلزمة والثالثة من دتبوسة سديت التلفون بسرعة وشمرتة على الجرباية أشمئزيت اووف هسة شسوي
ضليت اكرط بأضافري وافتر حتى جمانة ماكو حتى تساعدني رجعت شلت التلفون دزيت رسالة لكمال ما رد، بعدين دكيت على جسر هو ينطيني حل رادت تخلص الدكة يلا رد، اجاني صوتة
... الوو هلا ترافة
حكيت شعري وكلت
... هلوو شلونك!!
جان صوتة هادئ عبالك نايم
... الحمد الله، كولي يبا احس بحلكج حچاية
ابتسمت، وكتلة
... شنو نايم
... اي توني غفيت وانتي كعدتيني للمعلومات ماحب احد يكعدني من النوم
... ديلا شعدك نايم واني كاعدة، باوع
... باوعت
... شسمة انت وين
كال بهدوء
... يمج
... ههههه وين يمي؟
... وين متردين
دنكت راسي مبتسمة، وكتلة
... جا خوش اريد اشوفك باجر عندي فد موضوع !
... شنو من موضوع
... باجر تعرف
... خوش يبا باجر انه يمج
... اوك، يلا تصبح على خيررر
... انتي الخير كلة يبا
... ادري
... جيرة بكصتج مو مال حجي حلو
طكيتها بضحكة ، بعدها راح واني نمت اوف من عندي سالفة اضل اتكلب بالكوة انام ثاني يوم كشخت كشخة معدلة جا غير راح اشوف حبيب ئلبي، رحت وصلني الي اسمة علي كلش حباب وحتى عينة ميرفعها جان قبل ظريف ويسولف هسة سطرة الحمزة بس ساكت.
مرت اول محاضرة دكيت على جسر، ومارد
وثاني محاضرة هم ماكو دكيت ومارد قلقني وين صار
رحت كعدت بالكافتريا ضايجة دا اشرب كهوة تعكر مزاجي حسيت احد كعد كبالي رفعت راسي فزيت بسرعة كلت واني مخلية ايدي على صدري
... خرعتني جسر
رفع حاجبة بخزرة، وكال
... نزلي ايدج
باوعت على ايدي وخرتها شلون يركز هيج
بالحركات شو اني مادري بروحي شسوي، كتلة اغير الموضوع
... وعليكم السلام
اخذ الكهوة من ايدي، ورجع ضهرة على الكرسي
، وكال وهو يباوعلي
... بشرفج هو هذا هم لبس
كتلة بضوجة عاقدة حواجبي
... صدكني ملابستهن الك
كلت بكلبي الله يسامحني على هل جذبة هو اني
كشخت على مودة، رفع حاجبة وكال وهو يدخن
... چا لخلگ الله لابستهن حتى يشوفوج
كتلة متنرفزة
... لاا لنفسيي لابستهن ميهمني خلق الله شلون يشوفوني
رفع حاجبة يباوعلي مضيق عيونة، وياخذ رشفة من الكوب بأريحية ويحجي ببرود ينرفزني بهل حر
، درت وجهي متضايقة كال
... شنو الموضوع آنسة ترف
... ليش اتأخرت شكد انتضرتك ودكيت عليك
... چان عندي شغلة كملتها وجيت
كلبت عيوني وتقربت على الميز، اشرلي بأصبعة
ارفع القميص نازل من ناحية ركبتي كلبت عيوني شبي اليوم متنرفز مخبل
سولفتلة كلشي شفتة وعن الصور وكتلة مدا اعرف اتصرف ، كال ببرود
... مو شي جديد على مرت ابوج اتوقعت الاكثر منها
... يا عزا شنو اكثر من هذا الي شفتة
كال وهو يغمز يطرف عينة
... اكو هواي اكثر
... عزا جسر شدتحس هاي شلون هيجي تسوي
... كلشي يطلع من الك.... وقطع كلامة ماكملها
رجعت نفسي بيأس ، وكتلة
... كملها دادة كملها تستاهل
ابستم بجانبية، وكتلة عاقدة حواجبي
... هسة شسوي عفية
... اتركيها متجيج غير الاذية منها
... شلون يصير والصور
... دزيلياهن ومعليج
... شنو رح تسوي
... خليها علية، بس ممنوع تجيبين طاري الها
كتلة بتفكير
... تدري بية ماكدر اسكت
خزرني، وكال
... تررف كافي استهتار كتلج عوفيها
ماريدج تتأذين شفتي ذيج المرة شصار
كتلة واني ااشر على نفسي
... اني مستهترة؟؟
هز راسة بقبول ، وكال
... نعم عزيزتي
كتلة بأندفاع
... لا يا مستهتر
رفع حاجبة
... بت رائد وحگ ربج لو ما العالم منا چا علمتج
شلون يصير المستهتر
عيبتلة بالساني عدل كعدتة ورخة ياخة القميص
، وهو يكول بحدة خوفتني نضراتة
... لساااااانج راااح ينكص منا العالم ترررررف
بلعت ريكي وعفست ملامحي، وكتلة
... هسة شلون الواحد ميتشاقة وياك عزيزي
كام من مكانة اخذ السويج، والتلفون والنضارة
كمت ويا، وكتلة
... والله متروح اذا متطلبلي كهوة بدال كهوتي الي شربتها
هز راسة بيأس، وراح جابلي وحدة واجة
ودعني ووصاني ما اتعرض للحية وراح بعدها خلص الدوام وطلعت اوف حارة وبزعانة روحي لكيت علي واكفلي رحت للبيت متنرفزة مدري شبية بس هاي الآنسة سيمين زاعجتني عبالك كاعدة على كلبي
انوب حتى متسوى واحد يشغل بالة بيها ،
دخلت لغرفتي نزعت ملابسي اخذتلي حمام استرخيت شوية، ونزلت للمطبخ لكيت شاهيناز سلمت عليها وكعدنا ناكل سوة ونسولف جان تدخل الحية
كتلها
... تعاي اكلي ويانا
كلبت وجهاا
... ماريد سم
... يا صدك موزين عليج هذا الاكل بي دهون هواي
وانتي مرة جبيرة خاف يصعد الضغط اسفة!!!
شاهيناز حابسة ضحكتها بالكوة، هزت ايدها وجان بيدها تلفون تريد تخابر راحت من انفتح الخط
مخبوصة مدري شبيها وراها سالفة كملنا اكل وسولفنا عليها ضلينا نسولف وبعدين صعدت لغرفتي
نمت وكعدت بلي قريت، وبعدين تذكرت جسر دزيتلة الصور الي رادهن على الفيس .
ضليت افرفر بالبرامج ودخلت على الماسنجر لكيت
كمال راد علية ابتسمت وكتبتلة
... شو مختفي
شافها بسرعة، ورد
... هستوني دا اراسلج، ملتهي الله وكيلج مشاكل طامس ولعبان نفس وربج
... يااا شكووو
... يمعودة روحي بزعانة
كتلة واني اكرط بأضافري
... شصاير احجي ولك
... امي
انخمش كلبي، وكتبت بسرعة
... شبيها؟
... متقبل اخطب حبيبتي
... ليش؟
... كتلج قبل امي متتمنالي الخير، دا افكر ارجع
للعراق واعوفها بس غير دراستي
... ميخالف اتحمل شتسوي وين تضل اذا اجيت وحبيبتك شلون؟
... الله كريم مادري التفكير ماكلني على ساعة احجز واجي
كلت بكلبي اوف لو تدري اني اختك،
... ونعم بالله لتتسرع انت هسة دكمل دراستك بالبداية
... هو هم هيج
ضل يحجيلي شلون مشاكل ويا حبيبتة
وما مرتاح وياها يكول هاي الفترة مدري شبيها
ميعجبها العجب، كلت بكلبي حضك مثل حظ اخيتك
ماكاعد لا ويا اهل ولا احد.
مرت الايام مصار شي جسر بعد ماشفتة بس نتخابر ونتطمن على بعض هو ميكطع بية ابد بس يرجع من الشغل يتصل علية ونسولف ، بيوم جنت طالعة من الجامعة علي ادك عليه ميرد كلت اذا مالكيتة برة ارجع بتكسي
مشيت للمكان الي يوكف بي ماكو، رجعت تمشين ليغاد شفت سيارتة وصلت يمها عقدت حواجبي من تقربت اكثر مشيت من وراها جان اسمعة وهو يحجي ...........
. . ................ يتبع
بما انو اليوم جمعة، وماكو دوام كتبت الكم بارت
شاركوني آرائكم حبيبات👀🖤
دمتم بخير🖤