سمعت صوت نعرفه كويس صوت ياما قهرني و استفزني وهاني بس كيف جت هنا و مِن سمحلها
ميساء بصوت مائع وكانت لابسة روب لونه اسود قصير فوق الركبة : اووو اهلًا اهلًا امتى جيتي انت ؟!
انا نكدب في عيوني و وذاني و بعدين حتى لو اللي قدامي صح اكيد المعتصم مش هنا و بايت في المستشفى مع ولده: احم انا جيت لاني ندور في بنتي
ميساء عضت ع فمها و تلعب بشعرها:اممم بنتك ماشية مع المنتصر و مرته بيشروا هدية ع شان الحفلة اللي دايرهالنا المعتصم الليلة في مطعم الفندق و ياريت ما تغيبيش لان مش معقولة بتسيبي بنتك بروحها الوقت جايب ما عنده و ضحكت
من وراها : ميساء يا ميساء
انا يضربوني بموس ما انطلعش نقطة دم شن درت يا معتصم فيا ثاني حتى ريقي ما قدرتش نبلعه و رجليا تخلوا عني و خانوني ورفضوا يهربوا بيا من هالمكان كيف جيت و ليش ؟ شن درت في روحي صار اللي كنت خايفة منه و تعاود قدامي مشهد احمد و رواية ما قدرتش نتكلم
ميساء بصوت دلع: عصومي ع شن تفاهمنا احني؟!
المعتصم غمض عيونه و نفخ بملل: ميسو حبيبي وين مشيتي تعالي هيا
ميساء ضحكت و حطت ايدها ع وسطها و غمزتلي : شفتي كيف راجلي حبيبي ما يصبرش عليا
انا ولا كلمة طلعت مني انسحبت و مشيت للغرفة اللي حاجزتها قبل ما نوصل
المعتصم طلع من وراها وانصدم في لبسها و معاها واقفة ع الباب : هيه انت شن تديري عندك تحشمي و غيري البلي اللي لابستيه !!! كيف قاعدة هكي قدام الولد و ع اساس مش هكي تفاهمنا ماهو كل شي ع شانه تجي تقعدي معاه ع البحري بكل
ميساء قربت منه و حطت ايدها ع صدره: وسع بالك حبيبي و انا ندير هكي باش يتأكد ان احني ما فيش بينا مشاكل و بعدين مرات انت تقتنع و تفهم ان انا وياك ما ليناش غير بعض
المعتصم بعدها عنه بقوة : خليك بعيدة عني تي انا كاره روحي اللي فكرت فيك يوم و عاشرتك كاره كل جزء في جسمي لمسك و بعدين وحدة زيك بعد العار اللي منتشر عليك في الفيس راهي لابدة و ما توريش في خليقتها لحد
ميساء بغيض : العار داراته امك ع فكرة وتوا منمشي نوتي روحي لحفلة الليلة اللي ولدك ما رقدش وهو يستنى فيها
و خشت و سيباته
قعمز المعتصم مهموم شاف تيليفونه القاني مش متصلة نفخ بقوة و مسح ع شعره: مش عارف شن نقوللها و لامتى حنخليها تأجل جيتها وانا اللي كنت نزن عليها نبيها تنهي الموضوع مع خوالها و تجي وتوا مش قادر نتكلم في الموضوع
انا المرة هذه دموع ما فيش ممكن نزحت خلاص راقدة ع السرير و نفكر و نراجع في اللي صار و نحلل فيه بس ما وصلتش لتنتيجة تخليه يدير هكي نبي اي عذر ع شان نسامحه !! لاني عارفة روحي المرة هذه مش حنقدر نكابر بعد عرف قديش نحبه و قديش انا ضعيفة قدّامه
