عاهرة الامام(كاملة ❤️)

27

♥ الــحــلــقــة الرابــعــة عـشــر تتمة 02 ♥

منال : ماما ...
ياسمينة فهمتها و تبسمت : اييه صورية مدرناش شوفة شرعية كيما كامل الناس ايا قررنا دك نديروها وشرايك ؟
صورية تبسمت : الراي راي لولاد عيطيلو لسيف و يروحو للشومبرا المقابلة هنا بزاف بنات ميقدرش يدخل عليهم .
ياسمينة : عندك الحق منال عيطيلو .

ناضت منال تعيطلو و صورية مشات لبنتها لؤ مزالها قاعدة و تبوزي ...

صورية : أميمة بنتي روحي للشومبرا ذيك دك يجي سيف يحب يشوفك .
أميمة خزرت فيها : يشوفني ! لاه يشوفني ميعرفنيش ؟ و ديجا حراام يشوفني كيما حرام يلمسني .
سلمى : هذي يسموها الشوفة الشرعية مهيش حرام اميمة .
اميمة : ميهمنيش منيش حابة نشوفو .. عايدة كظلي صوري .
صورية : حابة تبهدليني معاهم ! اميمة امشي عندو زوج دقايق و روحي تموتي كي يشوفك ولا تنقصي ولا وش يصرالك !
اميمة : انا منيش حابة نشوفو مفهمتوش هذي ! هك نفسيتي مش حباتو .
عايدة : اميمة بركاي تبهليل و روحي يشوفك و ترجعي متفوتيش اللحظات هذو تندمي عليهم منبعد .
اميمة : كيما نندم على الخاتم .. هفف كليتولي راسي .
صورية : نوضي دوك و منبعد عندنا قعدة طويييلة .
خزرتها فيها اميمة و ناضت : يسرى جيبيلي جلبابي .
صورية لزت على سنيها : أمــيــمــة متقلقينيش .
اميمة : منيش حباتو يشوفني هك اووووف .
يسرى : امشي متتبهلليش .
ياسمينة : روحي بنتي راه يستنا .

تبسمتلها ابتسامة صفرا و خرجت رجل للور و رجل لقدام متحبش تلحق و تشوفو ولا يشوفها اما و كالعادة يخلوها تدير حوايج متحبهمش و يمشوها على مزاجهم هوما حتى في حاجة هك تخصها  معندهاش راي .. للحظة خممت تطلع لغرفتها و تخليه يستنا اما كي تفكرت باباها و بلي تجيبلو ليه التبهديل مسحت الفكرة من راسها و كملت طريقها .. وقفت قدام الباب مترددة تدخل ولا ترجع حتى خرج ليها رابح ...

رابح : أميمة جيتي ! ايا تدخلي معاي .
أميمة : راه هنا !
رابح : هيه راه يستنا عندو شحال .

خدات نفس و دخلت مع باباها .. كان يبربش فتيليفون كي سمع صوت خطوات خباه و طلع راسو طاحت عينو عليها .. عندو سنين طوييلة مشافهاش + بلا جلباب و ممكيجا ..

أميمة : سلام .
سيف : و عليكم السلام .
رابح : قعدي بنتي .

قعدت اميمة جنب رابح تخزر للحيط و لفوتاي و طابلا كل حاجة غيرو هو .. و على العكس سيف ملي دخلت و عينؤه عليها متحركوش يستكشف في كل حاجة فيها شعرها عينيها وجهها طولها لبستها يديها مخلا حاجة مركزش معاها ...

سيف : وشراكي ؟
اميمة : مليحة .

بقاو ساكتين لحظات و وقفت كي حستو مراحش يزيد يهدر بلا متخزر فيه خرجت خلاتو يتبع فيها بعينيه .. طلعت لغرفتها ديراكت دخلت و قفلت الباب .. نحات لبروش لي فشعرها رماتها و زادت طالون رماتو و تكسلت على سريرها ...

اميمة : مبقالي غير نتفرج فيه خزر فيا و نخزر فيك يخي حالة الواحد رح يطيح من التعب و هو جايبني و يتفرج تيليفيزيو انا توبة توبة .

🍭 جام + رايكم + توقعاتكم 🍭

صااو بناات كتبتلكم بزاافيت ليوم و هنا نحبس 💃 ملتقانا في ليل بحلقات جدد😻🔥