နိုးလာလာချင်း ဝန်းရံခရဲ့နံ့ဘေးမှာကွေးကွေးလေး အိပ်ပျော်နေတဲ့နိုင်းကို တွေ့လိုက်ရတော့ အိပ်မူံစုံမွှားဖြစ်နေတဲ့ ကြားထဲက ဝန်းရံခ အသာအယာပြုံးလိုက်မိသည်။ ဒီကောင်လေးဟာ အိပ်ပျော်နေတဲ့ အချိန်ဘယ်လောက်တောင် အပြစ်ကင်းလိုက်လေသလဲ။
ဝန်းရံခဘက်ကို ခပ်စောင်းစောင်းလေးမျက်နှာမူကာ လက်တစ်ဖက်ကို ခေါင်းအုံးအောက်ဖိအိပ်ပြီး ကျန်လက်တစ်ဖက်ကိုတော့ ဝန်းရံခရဲ့ကိုယ်ပေါ် တင်ထားတဲ့အပြင် ခြေတစ်ဖက်ကပါ ဝန်းရံခကို တက်ခွထားလေသည်။ ညအိပ်တုန်းက မပိတ်ဖြစ်ခဲ့တဲ့ ပြတင်းပေါက်ဆီက လေတွေကလည်း တဝူးဝူးတိုက်ခတ်နေလျှက်ရှိရာ အဖြူရောင်လိုက်ကာစဟာ ခပ်ပါးပါးလူပ်ခတ်လျှက်။ ဒီမှာက တစ်ခြံနှင့် တစ်ခြံ အတော်လှမ်းလှမ်းမှာ တည်ရှိနေတဲ့ အပြင် အိမ်အနောက်ဘက်မှာက ဘောလုံးကွင်းကြီးဆိုတော့ လေတော့ အင်မတန်တိုက်သည်။
အခန်းထဲထိ မွှေ့ရမ်းတိုက်ခတ်လာတဲ့ လေပြည်နှင့်အတူ နိုင်းရဲ့ပန်းနုရောင် ဆံပင်လေးတွေက တစ်ချက်တစ်ချက် လူပ်ခတ်သွားရသည်။ မျက်ခမ်းစပ်ထဲ ဆံစတွေဝင်ပြီး စူးကုန်တော့မှာဘဲ။ ဝန်းရံခမှာ စိတ်ထဲကတွေးရင်း ဆံပင်တွေ လှုပ်ရမ်းခါသွားလေတိုင်း မျက်နှာပေါ်ကနေ သပ်တင်ပေးနေရလေသည်။ နိုင်းရဲ့ဆံပင်တွေက အရောင်တွေချွတ်၊ ဆေးတွေဆိုးလွန်းလို့လားတော့ မသိ။ ပျော့အိလို့တော့ မနေ။
ဆံပင်တွေကတော့ ကြမ်းရှရှဆိုပေမဲ့ နိုင်းရဲ့မျက်တောင်တွေ၊ မျက်ခုံးတွေကတော့ ထိလိုက်ရုံနဲ့ နူးညံ့ပျော့စင်းလို့။ မျက်တောင်လေးတွေဆို မထူဘဲ ခပ်ပါးပါးနှင့် အရောင်ဖျော့ပြီး ရှည်ရှည်လေးတွေ။ အပေါ်ကိုကော့တက်မနေဘဲ အောက်ကို စိုက်ကျနေတဲ့ မျက်တောင်မျိုး။ အသားအရည်ကလည်း ပါးလျလွန်းတာမို့ အတော်နီးနီးကပ်ကပ် ကြည့်လိုက်လျှင်ပင် ပါးပေါ်က ခရမ်းရောင် သွေးကြောမျှင်လေးတွေကအစ တွေ့ရသည်။ သွေးကြောမျှင်လေးတွေခပ်ရေးရေး ပေါ်နေတဲ့ အရေပြားတလျှောက် ကို ဝန်းရံခ လက်ဖျားလေးတွေနဲ့ တို့ထိနေမိရင်း ဒီကောင်လေးဟာ အရမ်းပိန်မနေရင် ပါးလေးက ပေါင်မုန့်တစ်လုံးလိုအိပြီးဖောင်းနေမှာဘဲ လို့တွေးလိုက်မိတော့ ဝန်းရံခ အသည်းယားသွားမိသည်။
