البارت حار وبيه سمسم 😂 من المشاعر
وغريب بنفس الوقت
اوعدكم ان قلبكم هالمرة راح يدك بقوة
ياترى المن راح يكون تحيزكم
ونكول بسم الله
- سليمان : واكفه كدام المرايه ، وتحط الحمره برقه ، رشت عطر على شعرها الرطب ، وحركته يمين ويسار ، واني عيوني تمشي وياها ، لابسه برنص ، اندارت وغمزتلي ، كالت راح انتظرك بالغرفة الثانية خمس دقايق وتعال ، لزمت تلفوني اشوف الوقت الي يمشي مثل السلحفاة ، مرت خمس دقايق وكمت ، فتحت الباب وشفتها من فوق ليجوا على كيفي اريد اخزن هاي الصورة بعقلي اقتربت وكتلها شهالحلا ، اليوم ناويه توكفين قلبي ، جانت لابسه بدله ركص شرقي تاخذ العقل باللون الاسود ، والحجول راسمه احلى لوحه برجليها
- ثريا : ابتسمت وكالت اليوم اريد اعيشك ليله بالف ليله
- سليمان : اني وياج يوميا اعيش ليلة احلى من ليله
- ثريا : مشت يم ميز المرايا وشغلت تلفونها على اغنية شرقية ، وبدت سهرتهم ..... هاي الليلة الي قبل ميسافر سليمانو ويا ثريا ...
- نرجع لواقع ثريا اليوم
- ثريا : غصيت من البجي دموعي تنزل لا اراديا ، وين اروح بهاليل ، حتى تلفوني ماعندي، حسبي الله ونعمل الوكيل بيج ، شعري كفشته الله يكفشها ، قميصي نص ردن و دلعه وبجامه اتشكشكت من يم الركبه ، احاول اسد الدلعه بس متنسد حطيت شعري من كدام حتى يغطي ركبتي وصدري ، ودموعي تجري ، وين اروح بهاليل حتى بيت سراج ما اندل مكانه زين ولا اهلي بعدهم مارجعوا ، ضليت امشي امشي ما اعرف وين اروح سليمان مو كتلك لتسافر 🧳! هيج سويت بيه ، تعال شوف امك شسوت بمزاجك ، ضليت امشي وابجي بهالشارع والافرع ليما وصلت الشارع العام وكفلي تكسي شاب يتغزل وشعدها الحلوة هنا مارديت ضل يتحارش ما رديت شفت باب بيت مفتوح دخلت بيه حتى يحس اني مو وحدي ، من شفته ابتعد طلعت شفت عائلة تمشي ، حجيه كبيرة اجيت عليها وكتلها جدة بلكت تساعديني
- الحجة : خير يابنتي
- ثريا : جدة مرت عمي طردتني من البيت بهاليل حتى حجاب منطتني اريد فلوس تكسي ارجع لاهلي
- الحجة حسبي الله على هيج مرة ، اندارت على ابنها امشي خلينا نوصلها لاهلها ...
- ثريا : صعدت وياهم دليتهم على بيت اهلي ، تشكرتها ونزلت ، فتحت الباب من الخيط ودخلت دورت على مفتاح البيت مالكيته ، شو ماما وين مغيره مكانه ، كعدت على المرجوحة وبديت ابجي على نفسي ابجي على سيوفي وعلى وضعي ، ما حسيت بنفسي غير نايمة على المرجوحة بدت الشمس تشرق ، كعدت غسلت وجهي بالبوري مال الحديقة هسه لومو هالكتايب الا اكسر الجام وادخل ، رجعت ادور جوا الزولية لو جوا السندانة ماكو ورا الشباك هم ماكو بطني توصوص لا اني اكدر اطلع ولا اكدر ادخل البيت ، حتى حجاب ماعندي ولا فلوس ....
- سليمان : اخذت عسل وسافرت على محافظة ... اوديها لاهالها امها مريضة حيل وكلت احجي ويا خالي اعوف عسل ، بس شفت شكله تعبان ، وليله البارحة متروح عن بالي ، كل شوي اتذكر وابتسم ، جلبوا بينا بيت خالي فاضطريت ابقى يوم ثاني ، خابرت امي اسال عليها بس بعد مترد ، كلت يجوز نايمين ، ثاني يوم ادك الصبح مترد والضهر همين ، معقولة زعلانة ، خابرت امي اسالها تتحجج مرة تكول بالحمام ، مرة جاي تنيم سيف ، كتلها حتى لو جاي تنيمه انطينياه ، سكتت ، كتلها يمى شكو شصاير ، كالت مرتك ادبسز تفشر عليه من سمعتها تحجي ويا واحد بالتلفون ، واستغلت الفرصة محد هنا وتريد تضربني طردتها برة ، صحت يمى وين طردتيها وين هسه هي
- اسيل : شمدريني كلعه الي تكلعها
- سليمان : تخبلت وصحت شوكت صار هذا الحجي ، كالت البارحة بالليل ، كلتلها وليهسه ساكته ، سديت التلفون وكتلها اني راجع هسه
- عسل : وين حبيبي بعدنا
- سليمان : عسل بدون حجي تريدين تبقي هنا اني راجع ، لبست ملابسي على السريع خابرت خالتي كلت خل اشوف شصاير ، الو شلونج خالة
- رقية : هلا سليمان شلونك
- سليمان : الحمد لله انتي شلونج ، خالة اخباركم
- رقية : الحمد لله ياوليدي كلنا بخير ، حجزنا بس نريد نفاجاء ثريا ، بس شو نخابرها من البارحة مترد خير
- سليمان : هنا تخبلت اكثر ، وين راحت ، واهلها بعدهم مراجعين ؟؟ بلعت ريكي وكلت اي يمكن تلفونها مدري شبيه هسه اخابر امي واشوف ، سديت التلفون منها وانداريت صحت بيها شعندج صافنة نازل اشغل السيارة وتعالي ، شغلت السيارة شفتها اجتي ، يله مشينا صعدت السيارة الساعة 7 العصر وهي من البارحة ماكو وين راحت وين ، مشيت سريع ، الجكارة ما عفتها وحدة ورا الثانية راح اتخبل اذا صار بيها شي ، رجعت دكيت على امي ، يمى شوكت طلعتيها ، ولج يمى متخافين من الله مطلعتها بتالي الليل وين الكاها هسه ، اهلها بعدهم ما رجعوا ، يمى يا بنت ... شتكولين يمى هاي عرضي ليش هيج تذبحيني ، ليش شسويت بحياتي حتى هيج يصير بيه ، شمرت الجكارة من الشباك بعصبيه وطلعت وحدة جديدة
- عسل : وجهه يصب عرك بهالجو البارد ، وايده لازمه سكان السياره بقوة بحيث اوردته ودماراته كلها مبينه ، حطيت ايدي على جتفه وكلت على كيفك حبيبي كلشي ينحل
- سليمان : شينحل شيتصخم وين الكاها هسه ، ليروح واحد من ولد الحرام ، اعوذ بالله ما ادري شسوي بنفسي هسه
- ثريا : حركتني الشمس 🌞 من الضهر للعصر كل شوي اغسل وجهي بالمي مدري شبيه لاعبه نفسي ودايخة من هالحر وين اروح ، هسه اموت من القهر و الجوع والحر ومحد يدري بيه ، هاي تاليها ثريا شسويتي شي يفيدج بحياتج الناس باجر تذكرج بيه ، حضنت رجليه وكمت ابجي بصوت ناصي لان اسمع سيارات تمشي واصوات اغاني عاليه وصوت جلاب ينبحون خفت حيل، قلبي كام يوجعني من الخوف ، شفت الباب ينفتح على كيفه اريد ابلع ريكي مجاي ينبلع من الخوف ايدي كامت ترجف ووجهي يذب عرك مدري منين يطلع ، ضليت ارجف من الخوف واني اشوفه يتقرب مني كلت هاهيه ثريا انتهيتي ....
