أكثر الاوقات من افوت للفيس بوك، افوت على صفحات الأصدقاء حتى اشوف اصدقائهم، ادور على ناس عشوائيين ما ألهم علاقة لا بالفن ولا بالكتاب ولا بالسياسة ، ناس بسطاء يحچون ببساطة واخطائهم الأملائية بريئة ومابيها قصد .واحد اسمه ( ابو حيدر سبع قصور ) عنده بس خمس اصدقاء يمكن ضايفيه بالغلط لان واحد منهم كاتبله ( شلونچ نسرين !)
واحد لابس عگال ومنزل صورة واگف بنص مجموعه ويذبحون طلي ثواب للحسين ، وراهم حايط اصفر ومبردة ايرانية وباب عليه بردة كودري وطفلة ماده راسها اتباوع ، وكلهم لابسين شحاطات ، الگاع منگعه من المطر والصورة بيها ريحة مطر . وكاتب ( راح نطبخ ثواب ) وماكو اي لايك ولا تعليق. وواحد گاعد بباب بيتهم بدشداشة بسيطة وبيتهم بلوك ما ملبوخ ، مبتسم ابتسامة بيها امان ، وكلشي ماكاتب عالصورة . وواحد ما امخلي صورة لبروفايلة ، بس بصفحته صورة جماعية هو واصدقائة ، صورة ماخذيها من بعيد ، بمنطقة فقيرة، وما گايل هو وين واگف . يمكن يخجل ايخلي صورته . ايجوز مو حلو . ايجوز ملابسة بسيطة . يجوز شاف مجازر الفيس بوك المناطقية وخاف ايخلي صورته ويگولون عليه ( شروگي ) . ووحده مخليه صورة طفله . وما كاتبه ولا بوست . المن تكتب ؟ وهيه محد يعرفها ويمكن اخوانها كلهم موجودين بصفحتها وخايفه منهم بالحياة وبالفيس وايحاسبونها عاللايك . وواحد كاتب مشتهي عسلية . وامسوي لايك الروحة ! محد يعرف على شنو يحچي . ويمكن حتى ماعنده اصدقاء . واحد واگف يم قبر اخوه وكاتب ( اخوي چان بطل ) . امعلقله واحد كاتبله ( حسين بچيتني حرام عليك ) . يمكن اخوه شهيد بس محد ايعرفه . لان مو چذاب وميطلع بالتلفزيون . قصص عشوائية هواي بالفيس بوك . ناس حلوين بس حلاوتهم ميعرفون ايكتبوها ، فبقت مقفولة ورا صفحاتهم . يجوز يبچون ويحزنون ويفرحون بفوز المنتخب وبالانتصارات اكثر من عدنا . بس ميعرفون يكتبون مشاعرهم ( بالشوكة والسكين ) مثلنا . احنا اتعلمنا نرسم الصدق بالچذب الملون . لذلك صفحاتنا بالحياة وبالفيس بوك عامرة .
