Mo yo konn kè fè mal
Maladi, doulè enfènal
Mo yo se kri soufrans
Yon plim ekri davans
Dlo je yo degoute avan lawouze
Byen avan mwen t ap toufe
Anba chalè solèy pa preche
Ke lanfè poko ka apwouve
Mo yo se dlo je lè plim ekri
Lavi ban m do, souri pou defi
Mo yo pran nesans nan tristès
Lavi a mande mwen fè plis jès
Lanati pa bay depèn alafwa
Sòlitid pou ekri de chagren
Bonè ap nwaye nan yon kwen
Enspirasyon ap dodomeya
San batay nou t ap mouri
Mo yo pèmèt mal yo dekouvri
Soufri pa anba, ekri byen wo
Mo yo makonnen pou fè nou ewo
Tan pase, sikatris yo rete
Doulè make nan mo prete
limyè pou eklere lespwa
Pou mo yo briye nan fènwa
