ضابط عشق الترفه (مكتملة)

الجزء الثاني البارت الثامن

نرجس... دخلت وره مده دخل منتظر ونعاد الحجي مرة ثانية... اني رفضت ومنتظر هم كال لا تخلون حياة الشباب تتوقف علينه... انجان اكو قسمة بيني وبين نرجس تصير لو شنو الظروف
بس ماكو شي بالاجبار...

بيبي عاندت وعمو هم كلوله جا وحده من الاثنين لو هسه تقبل تخطب بنت خالتك لو ناخذ نرجس وننطي فاطمة.. ما تضل تنتظر ومالي نفس الا بنرجس ولو ما تريد تتزوج بالاجبار هالشي ما يصرفلي بعد افتهمت لو لا...
وهذا العندي..
... بابا كله الله كريم وبعدها ترخصنه منهم وطلعنه
...
من رجعنه بابا صاحلي وحجه وياي بالموضوع
كتله بابا تعرف وضعي لسه جمرة حمزة بداخلي مشتعله نوب تريدني افكر بغيره..
وتعرف منتظر اعتبره مثل أمير اخويه
بابا عجز عن انه يقنعني...(طبعا مذكرتلكم احداث انه اهل نرجس رجعو ذهب ومهر نرجس لأهله وأهله مقبلو بس أهل نرجس رفضو كالو الولد استشهد بعد وهذا حقكم والبنيه حتى ما تزوجته بس عقدو بعدها كوه مقتنعين ماخذينه)

ماما باليل كولش اجتي وحجت وياي...
ماما نرجوسه اني وياج بكل قرار تاخذي ولا تكولين علمودج ابنج  لا والله ما اضحي بسعادة بنتي علمود سعاده احد ثاني لان هذا ظلم بس فكري بيها
حمزة استشهد وانتي بنفسج كتيلي وصيته واخر كلام كاله الج.. ومنتظر الولد من كولشي كامل أخلاقه وهم شهادته وحتى بيت وحدج يسويلج...
واضافه الولد كبر يا أمي وهو يحبج.. (طبعا منتظر هسه عمره ٣٧ ونرجس حتدخل ب٢٣ ) وانتي جربتي تاخذين عن حب والقدر ما كتب يجمعكم فكري ماما
وصدكيني اني من اجيت احجي وياج والله لمصلحتج مو علمود اخوج قسم بالله...
بعدها كالت نامي ماما..
نمت وثاني يوم صادف عطله عندي..
كعدت اسوي رياضه الصبح لان جسمي كلش نحيل
وسويت ريوك.. طبعا جسمي كولش ضعف هالفترة..

الظهر خابرني منتظر كال اريد احجي وياج بالموضوع.. ونتفق اذا اقتنعتي ما اجبرج ع شي..
كتله اسمعك.. كال أمير وفاطمة حقهم يتزوجون وينسعدون وهسه اثنينهم ساكتين ومتحملين في سبيل ما يضلمونه وياهم وننجبر بس خلي نكون احنه احسن ونقبل بالواقع.. وصدكي الترديه يجرالج تردين زواج ع ورق وعادي بعدين شفتي حياتج وياي صعبه اني بنفسي اقدم طلب الطلاك الج..
وإذا تردين نخطب ونطول الخطبه وشوفي اذا تراهمتي وياي او لا واني اعرف وضعج ومتقبله واعرف حب حمزه بداخلج ولا راح اطلب منج تنسيه
بس اذا صار عقد اريد تحترمين رابط الزواج.. مشاعر الي ما اطالبج بس ما اريد كدامي تظهرين الحب والذكريات خليها بداخلج وما إلي دخل وهم كل فتره اخذج لقبره وندعيله سوه وما احرمج بس اريد تحترمين وجودي بس... كتله انطيني مجال افكر..

ضليت يوميه افكر افكر وهم داومت وشفته بس سلمت.. بعدها قررت بما انه حياتي عايشتها بس روح ما يهم انجان يم اهلي لو يم منتظر..اني ما حظيت بالاحبه ولا تزوجنه ع القليله خلي اجمع اخويه وحبيبته واكسب ثواب بيهم...
خابرت منتظر باليل كتله موافقه.. هو كلي الله عليج..
كتله اي والله بس مثل ما اتفقنه..
وقتها هو فرح حيل واتفقنه نخلي فترة للخطبه فد كم شهر اقل شي..
...
ثاني يوم بلغت ماما واهلي كلهم فرحو بس مايعرفون شنو متفقين اني ومنتظر.. كتله خلي حياتنه الخاصه بينه ما اريد اي احد يتدخل...
وره اسبوع بعد الإتفاق صارت كعده عشريتنه واتفقو
علمود الحاضر والغايب الي ولفاطمة..
وعقدولنه... صرت مرته شرعاً لمنتظر..
بعدها دخلو الولد بما انه منتظر صار زوجي وأمير اخويه وبالنسبه لفاطمة هم فعادي يدخلون...
لبسونه ذهب وحلقات وقطعنه كيك.. طبعا اني مرحت صالون ولا شي اشتريت  لبست فستان عادي ردت البس اسود بعدين استعاذيت من الشيطان وكلت لازم اتقبل الواقع فقررت البس ملابس غامقه محد يعرف بالاتفاق بينه اني ومنتظر فما اريد اجذب انتباه (طبعا هنا مر تقريبا ٤ أشهر ع وفاة حمزة) فجنت لابسة فستان لون زيتوني كلش غامق وما مفتوح طويل بس دلع طبيعي كل فستان هيج.. شعري سرحته وعفته مفتوح ولبست تاج ذهبي ويه لون شعري ومكياج ردت احط خفيف وتذكرت حمزه من كلي احب المكياج الخفيف عليج يبرزلي جمالج اكثر.. فقررت اخلي قوي.. خلصو تلبيس الذهب ومراسيم الصور وكذا بعدها عافونه وحدنه اني ومنتظر بالاستقبال وفاطمة وأمير بغرفه امي..
منتظر  تقدم باسني بكصتي وكلي مبروك علينه.. كتله الله يبارك بيك..كلي ما نريد نثير شك احد.. خلينه ريلاكس وهم طبيعيين كدامهم...
فضلينه نحجي ع الدوام وكلي لبسج عادي بس شويه أعرض اريد كتله بس اني زين لبسي كال ميخالف بس شويه مو ضيق.. كتله ميخالف..
مكياج يشوفني اصلا ما احط قوي لان الخفيف احله عليه... فما حجه بهذا الموضوع...
كال شكد تردين الخطبه.. كتله كلما أطول احسن..
طبعا جان نص السنه فكال ع العطله..
كتله تمام ان شاء الله..
خلصت مراسيم الخطوبه وصعدت لغرفتي ابدل
طلعت صور حمزه وحضنتهن بين روحي واني اضمهن بصندوق وهداياه اليه وعقد السيد والحلقة اللي استأذنت من ام حمزة احتفظ بيها لان بيها نقش حروفنه سوه... لو ميداليه بيها صورتنه سوه
والموبايل ما كدرت احذف شي من محادثاته لو شي ولا اكدر ابقيهن وصورنه فبابا جابلي موبايل جديد وخط جديد ذاك غلقته وحطيته بالصندوق...
بعد ما نقلت الأرقام وحولت التلي وبرامج الدراسه وكولشي محتاجته لهذا الموبايل..
..
وره شويه دك موبايلي منتظر كلت اكيد اخذ رقمي من اهلي...
سلم وحجه وياي كال
نرجس اتصلت ع رقمج ماكو ولا البرامج..
_منتظر اني صرت زوجتك شرعا وقررت احترام هالرابط البينه فذكرياتي ويه حمزه كلها حطيتها بصندوق وعفته حتى التلفون اعذرني ما اكدر احذف شي بس دفنته ويه ذكرياتي..
_نرجس انتي كولش دتكبرين بعيني.. كولش هالأشياء اللي دتسويها ع الرغم حزنج جبيره بالنسبه الي.. ووعد اذا الله سهل اعوضج عن كولشي والايام ان شاء الله بينه بعد تقبلج اليه طبعا...
_كتله الله كريم..

بعدها بيوم داومت وطبعا علنه خطوبته كدام كل الطلاب وقسم فرحان وقسم اللي ضاجو..
مهتمينه...
بس الحلو بمنتظر عايفني ع راحتي..
بس كال اتمنى تبينين كلشي طبيعي..
صراحة انقهر عليه قررت ادوس ع نفسي.
في سبيل ما اخلي احد يحجي عليه ولا يأذي..
.
ثاني محاضره خلصت والثالثه بعدها وكالو ما تجي الدكتورة..
اني صديقات معندي بس ع كد الدراسة...
فالخط يتأخر..
رحت لمنتظر لغرفته سلمت ابتسم وردلي السلام..
كتله خوما عندك شغل..
كال لا مخلص اني.. كتله خلصنا والخط بعده
ما عندي صديقات كلت تصير صديقي..
هههههههه هو ضحك كال اصيرلج صديق وصديقه وكولشي.. ابتسمت....
مرت ايام ومنتظر يخابرني ويتواصل وياي يوميه
تعودت عليه كولش ما اكول حب وإنما اهتمامه
سؤاله خوفه عليه.. لابد زرعن مشاعر طيبه بداخلي اله... مر شهر ونص ع خطوبتنا وامتحانات وكذا....
منتظر كال بعد شهر ونص يخلص الدوام ومباشرة العرس هيج متفقين...
فبلشت احضر واجهز.. طبعا كأي عروس امي واخواتي وياي فكولشي يشترن مرات يشترن ملابس نوم فاضحه اني اصفن واتذكر علاقتنه ما راح تكون هيج... فاضحك بداخلي بس ما اكدر ابين لاحد...
مشيت الأمور عادية واجهز كولشي... بعد خلصت جهاز ب٣ أسابيع لان عندي دوام فكولشي جهزت.. بقت الغرفه..
كلي نطلع نختارها سوه(اووفففقق ياربي تذكرت شلون رحنه لبغداد اني وحمزه نختار ومتت قهر
والله ما نسيته ولسه جمرته بداخلي بس حرام عليه افكر بيه والله من اتذكره لو تنزل دمعتي احس خاينه لان افكر بشخص واني ع ذمه ثاني.. اعرف هسه الكل يفكر نسيته بس حمزه ما راح انساه بيوم
وإنما قررت اقفل هالحب بداخلي واعيش مشاعر ثانية عسى ولعل يرتاح بكبره لان دائما احلم بيه يكلي عيشي  حياتج  ومشاعرج لا تقتليها ويه موتى اذا تحبيني صدك رجعي نرجس القديمه وعيشي من جديد واني مرتاح هسه اريد ترتاحين مثلي)
...
كتله تمام... كال بعد الدوام ونتغده كتله اوك..
خلص الدوام خابرت بابا وماما بلغتهم... وطلعنه بالسيارة شغل اغنية... وحط ايده ع ايدي شويه فزيت اعتذر مني  ورجع يسوق...
ويشاقيني حتى لا اضوج... اني نقهرت عليه حيل..
بس بعدني شسوي ما اكدر...
فاختارينه الغرفه بعدها دخلنه مطعم واكلت اني ريزو وهو هم... وبعدها اكلنه حلويات وشي...
نقهرت عليه لان اعتذر مني بالسياره من لزم ادية..
فمن طلعنه للسيارة نريد نرجع صعدت.. شغلت نفس الاغنيه وحطيت ايدي ع ايدة وصورت فيديو النه
هو كبل ابتسم وضل بعدها يضحك بس شنو تحس الفرحه طالعة من كل كلبه...
رجعت للبيت وهالايام امتحانات نهائيه وكولش تعبت
حتى منتظر ما نلحك نحجي اني وياه..
بيوم امتحان كيمياء عندي ملزمه كامله ما حضرتها
بداية الدوام ويه وفاة حمزة فشلون ما اعرف...
خابرته كال اجيكم لو زحمه كتله لا عادي..
كلت لماما  كالت هلا بيه قابل غريب هوه... مهم اجه يمنه وكعدنه بالاستقبال شويه معزول.. وقدمتله ضيافه وشي كتله نكعد بالكاع ونفرش الملازم مال هيج ع القتفه ما افتهم اذا ما اربع هههههههه
ضل يضحك اني جنت لابسه تراك وهو اجانه بكشخته المعتادة بنطرون وقميص بس من صدك هو جمال.. ضلينه نشرح من ال٥ العصر ب٨ بحيث ظهرنه طك من التعب... بعدها كتله خلي اسوي عشا ونكمل لو تعبت كال لا عادي.. كال المن يضيع وقت هسه نوصي دلفري كتله بس ع حسابي َ كال نجبي كتله والله ما اني عازمتك.. ضل يضحك .. قبل لان لحيت عليه حيل... بعدها وصينه بركر اثنين وبيتزا ومقبلات وفنكر وببسي.. كتله تره جوعانه كلي اني هم جعت.. وره نص ساعه وصل الدلفري اكلنه ونضحك وساعه نلوص المكان خلصنه الاكل كله بحيث كولشي ما بقه نوب رحنه نغسل  وراها
رجعنه للملازم ودك دراسه لساعه ب١١ونص
بقالي ملزمه زغيره.. شرحلياها ع السريع وكال يلا للنوم باجر دوام وراج وكعدي ب٥ راجعي. كتله ان شاء الله...  نوب كتله ابقى هنا. كال لا غراضي هناك خاف اتأخر الصبح.. كتله تمام سلم عليه.. باسني بخدي ونوب حضني ما اعرف شصارلي كلبي ضل يدك... نوب بادلته الحضن لان ما ردت اكون جامده بنظره او ابينله عدم الاهتمام يبقى رجل وهيج اشياء تبقى بذاكرته ما ينساهن كل تصرف محسوب..
عصرني حييل بحضنه فجأة نزل راسه لركبتي باسني
هنا لو شكد ما اكول قويه لان ضعفت  واني اتذكر حمزه من رحنه بيتهن وباسني وكوه سيطرت ع دموعي متنزل... نوب حس بيه تشنجت كال يلا حروح ودعته وراح وقتها اخذت كتبي وصعدت بغرفتي ضليت ابجيييي ياربي طلع ها لذكريات والله حرام يعني اني بحضنه واتذكر حمزه من باسني
شكد نذله اني وخاينه...
لهالسبب ما ردت اقبل.. بس كولشي صار بعد...
..
يتبع
للكاتب #نسيَم
Almahdwya_74