طوبي الجزء التاني

الجزء التامن والسبعين ( حق الرد الاخيرة )

#طوبى  "جنة طوبى"
#جمان_فريد
#الجزء الثامن_والسبعين "حق الرد_الاخير"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
🌙رمضان مبارك🌧رمضان الدعاء🌙
#الدعاء
📌‏قال الشيخ ابن باز رحمه الله-:
"الإلحاح وحسن الظن بالله، وعدم اليأس، من أعظم أسباب الإجابة. فعلى المرء أن يلح في الدعاء، ويحسن الظن بالله -عز وجل-، ويعلم أنه حكيم عليم، قد يعجِّلُ الإجابة لحكمة، وقد يؤخِّرُها لحكمة، وقد يعطي السائل خيرًا مما سأل".

[📚فتاوى ابن باز (١٢٢/٢٦)].
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 في غياب أبـي أتصنع الحياة رغم الحزن
في عيني أبتسم و فاجعة موتـه مدفونة
في قلبي 🍃
________________________________________
"تتوقع تجي من وراه فايده اللي درناه ياجدي؟"
تنهد وحرك راسه بالنفي وقال..
/مش عارف..الناس هادوا ماتقدريش تتوقعي شن يديروا..مرات يزلبحوهم ويجيبوهم في صفهم يلعبوا ع حكاية القرابه والعيله ويخلوهم ياخدوا معاهم موقف ضدنا حتى هما..
طوبى وهي تفكر في كلام جدها قالت..
/وليكن..المهم درت ردة فعل تخليهم يخافوا ويعرفوا ان مش كل الطير يتاكل لحمه..
شبحلها جدها للحظات بعدين ابتسم ع جنب وقال..
/صحة ليك..
ابتسمت طوبى وهي تشوفله..
هو ضيق عيونه وقال..
/خلينا منهم توا وقوليلي..ليا مده معاش نشوف فيكم انتي واميمه مع بعض زي قبل وهي معاش تجي هني متنافسين؟
طوبى حطت خصلت شعرها ورا وذنها وقالت..
/لالا مافي شي..غير هي الفترة هادي لاهيه ومش فاضيه..
علي:قبل تروح من خدمتها وتجي هني طول..
حكت ساعدها حكة خفيفه وقالت..
/مرات مولي عليها التعب ساعات طويله خدمه في هالظروف الجو والضي المقطوع مش حتلقى وقت لغير راحتها..
علي:يعني المشكله اللي صارت مع صفيه بسبب حسين مادخلها بشي؟
طوبى حركت راسها بالنفي وقالت..
/لالا..انت ارتاح وريح دماغك شويه ساد ماشاغلاتك بمشكلتي..
علي:بنتي الدوة هادي معاش نبي نسمعها انتي بنت ولدي من بيوقف معاك كان اني ماوقفتش معاك؟
ابتسمت طوبى وقالت..
/ربي يدومك عليا..
هز راسه وقال:ويعطيك الوقت الطيب..
فجأة..دق باب الحوش..
وكأن طوبى سمعت دقة قلبها القويه مش بس حستها..
اما جدها..ناض من حداها ومشي بإتجاه الباب..
وهي ناضت وقفت في مكانها وعيونها مع جدها بنظرات قلق..
يوصل علي  في الباب ويفتحه..
ويلقى قدامه معتز ولد فردوس ومعاه جده حسن اللي قال بإبتسامه بشوشه..
/السلام عليكم..
☘طوبى لها سمعت الصوت مشت خشت من باب الكوجينه..
علي:وعليكم السلام..
؛شن حالك ياحاج.
علي:الحمد لله..تفضل تفضل..
وخشوا ومعتز يقول..
/شن حالك جدي علي..
علي سكر الباب وقال..
/اني باهي الحمد لله انت اللي عاش من شافك يسي..
خدي معتز يد علي وباسها..
مسح علي بيده ع راسه وقال..
/خشوا خشوا تفضلوا..
:يزيد فضلك ياحاج علي..
☘ودخلهم المربوعه وقعمز مع حسن فيها ومعتز خش داخل يسلم ع امه وباقي العيله...
🍃🍃🍃🍃🍃
ماشي قدامها بمسافه بسيطه وهي وراه..تشوفله بنظرات شوق وحزن..
وهو في حالة قلق بالغ...
وصل للصاله خش..ومرر نظره عليهم وقال..
/السلام عليكم..
وهي وراه..مررت نظرها عليهم بأستغراب وقالت..
/السلام عليكم..
كانوا مغليه وخديجه مقعمزات يشوفوا للجالي بخوف وقلق..
وبوه واقف وهو حاط ايديه ورا ظهره وقال..
/خيركم واقفين غادي!؟ اقربوا..
قدم الجالي ومشي لبوه وكان ناوي يدير حركه تخلي بوه يلين من ناحيته..
وين وصل في بوه وجي بيبوس راسه..بعده محمد..
شافله بضيق بعدين قال..
/علاش مناديني كان بتقعد واخد مني هالموقف يعني بنقعدوا هكي غدوة قدام الناس! ولابالك حتى غدوة ماتبنيش نجي..
نجاة قعدت تشوف لخديجه ومغليه تبي تفهم منهم شن صاير..
وهما الزوز كانوا بكل انتباههم مع الجالي وبوه..
محمد:لاهو غدوة لابد ولازم تجي بش تكذب كلام بنت الواعر عليك قدام عمامك..
توسعوا عيون نجاة بصدمه وبدي الخوف يتسلل لقلبها..
هو بعدم استيعاب قال..
/مافهمتش!
محمد:تو نفهمك ياباش مهندس..طوبى الواعر مشت لحوش لعمتك وتلاقت.مع عماتك واللي هناك حطاته..
بدي ع وجهه ملامح الصدمه..
محمد:ومش هكي بس..جدها علي الواعر ماشي للبلاد لعمامك  غادي وحكالهم اللي هناك حتى هو بحضور واحد من وجوه القبيله ياافندي...
الجالي بصدمه:كيف!!
محمد؛هادي اللي شاد فيها وماتبيش طلقها وخاصمتنا وقطعت الحوش ع خاطرها..مشت شهدرت بيك وسط ناسك وشهدرت بينا حتى حني..مراة زي هادي ماتستاهلش تقعد ع ذمتك دقيقة وحده بعد هكي..
الجالي وهو يسمع في بوه شن يقول كانت الصدمه مسيطره عليه وعقدت لسانه..
شن قالت عنه طوبى لعيلته!؟ شن حكي جدها قدام واحد من وجهاء القبيله عندهم اللي اكيد مش حيوقف اللي سمعه عنده اكيد حيطلع وتولي سيرتهم ع كل لسان..
محمد:لكن في حاجه اليوم عرفتها ليها علاقه بالحاجه اللي عرفتها عن سبب المشكله بينك وبين بنت الواعر...
اطراف نجاة بدوا يثلجوا..
عكس الجالي اللي بدي يعرق ويتوتر..
وامه واخته من الخوف قلوبهم حتوقف...
محمد وهو عاقد حواجبه بغضب كمل يقول..
/وصلني..ان المراة اللي حكي عليها ولد خوك ليلتها..غير نظره لنجاة وقال...قريبه هلبه..هلبه..
بلعت نجاة ريقها وبدت تتسارع انفاسها من الخوف..
محمد شنيبه وهو مركز بنظره عليها..
/شن في بينك وبين نجاة يالجالي..
نجاة بخوف شديد قالت تلقائيا..
/شني!؟ شن في بيني وبينه شن قصدك ياعمي!؟
محمد شنيبه بحده؛اللي جابلي الدوة مايكذبش..
الجالي كعادته قلب الطاوله بالمبالغه في ردة الفعل..
/هلبه هكي يابوي هلبه! كيف انت تسمع لحاجه زي هادي اصلا..معاش لقوا شن يقولوا خلاص!..
نجاه وهي ترعش..
/حسبي الله ونعم الوكيل ياربي شن دخلي اني في مشاكلهم شن يبوا مني ياربي!
خديجه؛يابوي ربي يهديك وخلاص والله ماعارفه شن نقولك..
الجالي بإنفعال مصطنع...
/من اللي قاله الكلام هدا ياخديجه!
محمد شنيبه بصرامه..
/اشبحلي هني.وانتي ضمي فمك مانبيش نسمع حسكم انتي وامك..
الجالي غمض عيونه بأسف مصطنع وقال..
/لاحول ولاقوة الا بالله..فتحهم وقال..مش عارف شن داير بش يصير فيا هكي..
بوه وهو مركز في ملامح وجهه قال..
/يعني الدوة هادي كذب مافيش منها؟
نجاه بنبرة مرتعشه..
/افتراء هدا.حسبي الله ونعم الوكيل..
الجالي:مفروض يابوي اللي وصلك دوة زي.هادي دفلت ع وجهه..مش تجيني بيها وتسألني كان.حق.ولاكذب!
هز محمد راسها بعدين قال..
/باهي..
فك ايديه من ورا ظهره ومشي من قدامهم وهما معاه بعيونهم..
وين قرب من رف موجود ع ركن من الصاله..
مغليه حطت يده ع قلبها وقالت..
/حي عليا!
وشافت راجلها واخد المصحف الشريف من ع الرف ولف وورجعلهم..
الجالي حس كل شي فيه هبط..
ونجاه كادوا عيونها يطلعوا وهي تشوف للمصحف بخوف..
ومغليه اللي قاعده حاطه.يدها صدرها مازال تندب وتقول بهمس..
/حي عليا ياربي لا..ياربي لا..
شدت خديجه يدها التانيه بقوة وهي تشوف لبوها بخوف شديد..
وقف محمد قدام ولده ومد يده اللي فيها المصحف وقال..
/حط يدك ع المصحف واحلف ان مافي بينك وبينها شي..
مغليه وخديجه قعدوا يشوفوا للجالي بترقب وخوف شديد..
ونجاة كانت حاسه روحها حيغمى عليها في أي لحظه..
اما هو اللي كان مركز بنظره ع المصحف معاش بدي يحس بشي ولايشوف في شي..
كأنه غارق في فضاء اسود فاضي ماينشافش منه كان المصحف..
محمد شنيبه؛قتلك حط يدك ع المصحف واحلف ان الدوة هادي مافيش منها..
ماحركش ساكن..
وبوه يشوفله وهو يراجي فيه يحط يده ويحلف لكن الجالي قاعد جامد في مكانه ماتحركش..
نزل محمد شنيبه المصحف وقال..
/معناها حق...حط المصحف ع الكنبه وهو يقول..ضاحكين علينا حتى حني!..قدمله وقال..مستغفلني حتى اني ! خليتني مانسوى شي قدام خوتي وعيلة الواعر والناس..طلعتني راقد ع وذاني مانندري ع شي!..
وهو منزل عيونه ويسمع فيه شن يقول بخزي وخوف منه..
محمد بغضب:تكلم ياكلب..ضربه ع كتفه بقبضة يده وقال..
تكلم...قول..مش ساد ماجاني منك من فضايح وبلي واني نرقع وراك ونغطي عليك مش سادني!..لكن لالالا خلاص لعند هني وياسروصلتها لأخرها...من اليوم ياالجالي واهم امك واختك شاهدات..لاعاد ولدي..ولانعرفك ولاعندك حق عندي ولاعاد نبي نشوفك ولانسمع عنك..امشي اطلع..
وخداه من ذراعه وقعد يجر فيه وهو يقول..
/معاش نبي نعرفك ولاعاد نقبلك بعد ماقصرتلي رقبتي..
وطلعه برا الصاله وهو يجر فبه..
والجالي منقاد زي الشاة المنقاده للذبح...
بوه في الامور هادي صارم مايقدر حد يثني كلامه ولايخليه يتراجع ياخد قرار مصيري لايمكن يرجع فيه...
وبهكي الجالي حيخسر كل شي..
الفلوس..القوة..النفود يلي سهلوا عليه هلبه طرق مشي فيهم فحياته...ومادام حل عليه غضب بوه حيخسر هدا كله فوق خسارته لوجوده مع اهله ويضيع من بعدهم....
⚡رمش عيونه بقوة ورفع نظره لبوه...
محمد شنيبه:هيا..
بعد ماتخيل اللي بيصير فيه لو اعترف لبوه بالحقيقه المخفيه عنه...اختار مايخرسش الدنيا...
رفع يده وحطها ع المصحف..
مغليه حطت يدها ع فمها وهي تشوف في يده الجالي ع المصحف بذعر..
اما خديجه ونجاه كانوا مصدومات...
وهو بعد ماتبددت رهبة ارتكاب الذنب بكبر ابليسي قال..
/اقسم بالله مافي بيني وبين نجاه حاجة..
غمضت مغليه عيونها..
ونجاة وخديجه قاعدين يشوفوله بذهول..
حول يده وكمل يقول..
/بعدين يابوي فكر فيها لو الدوة هادي مزبوطه كيف نقنع خوي المهدي ياخدها يومها..
محمد شنيبه تفكر هداكا اليوم وقال في نفسه..
"ايه صح كيف نسيت الحاجه هادي!"
الجالي شد بيده اليسار راحة اليد اليمين اللي حطها ع المصحف وقعد يفرك فيها وهو يقول..
/اللي وصلك الدوة هادي ممكن يكون مايكذبش لكن سمعها من حد ضليع في الكذب والافتراء..فك ايديه من بعض وقال..اما اللي يحكي عليها محمد اني شافني معاها..ماكانتش وحده يابوي كانوا زوز..وحده من بنات العيله ركبت.الدور التاني مش عارف شن بدير ماتندريش عليا قاعد فوق وين شافتني هربت وحتى خديجه شافتها يومها..
خديجه طلعت من الحاله اللي هي فيها.وقالت
/ايه صح ..
الجالي:وفي المرة التانيه وحده فيهم خاشه لدار الكوي بتتكلم بالتليفون لقتني فيها طلعت طول وتصدف ومحمد يشوف الموقفين وممكن لأنه قاعد حاقد عليا بسبب مشاكلي مع امه زمان استخدمهم ضدي..
ونجاه تسمع وساكته الخوف عقد لسانها..
محمد شنيبه حط المصحف ع الطاوله بعدين التفت ع ولده وقال..
/مادام حلفت ع المصحف خلاص اي كلام في الموضوع نسمعه تاني مش حنصدقه..
نزلت مغليه يدها وحطتها ع حجرها وهي تشوف للجالي بألم..
محمد:اظن بعد هكي مافيش سبب واحد يخلي شاد في الشيطانه بنت الواعر مراة شوهاتك وشهدرت بيك وافترت عليك مفروض معاش تقعد ع ذمتك..
الجالي هز راسه مرة وحده وقال..
/خل تجيب قبل وبعدين لكل حادث حديث..
وفجأه وبدون سابق انذار..
طاحت نجاة حداهم مغمى عليها..
خديجه بفجعه؛نهار اسود..
وجتها قعمزت جنبها ورفعتها وقعدت تفيق فيها وهي ولارمشت عيونها..
محمد شنيبه بخوف:برا جيب ميه برا..
الجالي مشي طول طلع من الصاله وهو يفكر كان حق فقدت الوعي ولاتمثل بش تكسب تعاطف بوه..
☘خديجه؛وجهها زي البزار..
محمد شنيبه بتأنيب ضمير..
/اني الغالط اني مفروض ماناديتش عليها..
ومغليه قاعده في مكانها تشوف لنجاه..
ع خشة الجالي وفي يده طاسة ميه مدها لخديجه وقال..
/خودي..
خدت الطاسه اللي فاحت منها ريحة عطر الجالي وين شمتها نجاة بدت تفيق..
وخديجه بعد بلت ايديها بالميه قعدت ترش ع وجهها..
فتحت عيونها..
محمد شنيبه؛نجاة..
هي طول انهارت بالبكي..
رفعتها خديجه وقالت..
/خلاص اسكتي ماصار شي..
نجاة ببكي..
/كيف ماصار شي ياخديجه هدا كله وماصار شي..هدا كله وماصار شي..
وضمت خديجه وقعدت تبكي..
وخديجه اللي كانت فاهمه شن قاعده دير نجاة..
طبطبت.عليها وقالت..
/قولي حسبي الله ونعم الوكيل في اللي كان السبب
نجاة وهي تبكي؛عييت والله عييت شن هالعيشه مافي حد يبي يخليني في حالي علاش وين نمشي شن ندير..
رفع الجالي حاجبه ووزع نظره القدام بملل.
خديجه:لاحول ولاقوة الابالله..
تباعدت نجاه عنها وناضت وهي تقول ببكي..
/مدام الحكايه وصلت لهني بنطلع من الشقه مش قاعده هني..
الجالي:بصراحه عندها حق..
محمد شنيبه بضيق:لالا يابنتي تعوذي من الشيطان هدا حوشك وهني ماليك ..
نجاة ببكي:مانقدرش ياعمي بعد ماطلعت عليا دوة زي هادي الناس بتصدق ياعمي من غير شي يدووا عليا..
محمد شنيبه؛بالعكس كان طلعتي تأكدي كلامهم..
نزلت عيونها وهي تبكي وتقول..
/عييت والله عييت مش ساد في اللي صار لأختي علاش الناس مايبوش يخولنا في حالنا! ع خاطر يتامى وماعندنا حد اللي يجي يمسح وسخه فينا!
محمد بضيق:معاش تقولي الدوة هادي قدامي وسامحيني يابنتي مش قاصد نوجعك لكن حطي نفسك مكاني تفهمي موقفي..
نجاة:عمي سامحني معاش نقدر نقعد..
هو قال:عليا اليمين مانك طالعه..
مرته وصغاره شبحوله بصدمه..
وهي قعدت تمسح في دموعها وتقول..
/علاش هكي ياعمي!
محمد؛انتي ليك معانا زي اللي لصغارك بالزبط وحقك اني ناخده يابنتي اني..
هي قالت بنبرة باكيه مثيرة للشفقه..
/ربي يطول في عمرك..وغطت بايديها وجهها وقعدت تبكي..
محمد:لاحول ولاقوة الا بالله..خلاص يابنتي خلاص بري لشقتك..
الجالي وخديجه تبادلوا النظرات بعدين شافولها وهي طالعه..
🍃هي مجرد ماطلعت من باب الحوش مسحت دموعها وقعدت تقول بحقد...
/خدمتيني خدمة العمر ياطوبى...
شويه انفتح الباب الخارجي متاع الحوش وخشوا محمد المهدي ويزن..
شافوها..
يزن قال:خالتي نجاة علاش مانزلش حمزة..
محمد المهدي تجاهل وجودها وكمل طريقه لشقتهم..
نجاه:قاعد مع خوته فوق كان تبيه تو نقول ينزل..
يزن؛قوليله يجينا..
نجاة:باهي..ومشت طول بإتجاه شقتها وهي تتفكر في نظرات محمد المهدي و اللي حكاه الجالي عنه..
وقالت بوعيد..
/تو نوريك ياولد عيشه..
🍃وفي الحوش..
محمد شنيبه بغضب..
/اني ع اخر الوقت همكي يصير فيا! اني ننحط في موقف زي هدا قدام خوتي وناس البلاد غادي اللي مش حيغيبوا جهد في رفع الدوة والزياده عليها..لكن باهي ياعيت الواعر والله مافايت اللي داروه هكي...
خديجه:باهي كيف بيصير غدوة؟
قاللها:كل شي بيمشي زي ماكان متخططله بالزبط وبتجي انت تحضر وعمر خوك لو قاعد في البلاد قوله يجي..
الجالي؛حاضر..ارخصلي ياحاج..
محمد شنيبه هز راسه موافقة..
هو لما جي بيطلع عيونه جو في عيون امه اللي كانت تشوفله بنظرة غريبه..
هو هرب من نظرتها ومشي بيطلع وهو يقول..
/السلام عليكم...
🍃ومنه الصاله طلع من الحوش بكل...
لما سكر الباب شاف لحوش الواعر بنظرات حقد..
بعدين مشي ركب سيارته وعيونه فراس التونسي اللي كان يبخبخ "يرش" في الميه قدام محله معاه لعند مادرقت السيارة بعدين غيرهم لعبد القيوم اللي كان واقف قدام مطعم ربيع ويشوف حتى هو للجهة اللي مشت منها السيارة...
🍃🍃🍃🍃🍃
"عمي بشير دخلني دورة برمجيات"
اريج بتهكم؛اشيه..دورة انجليزي ودخلك نادي وتوا برمجيات الشمس بتزرق من مغربها قريب!
فردوس:باهي شن دايرين معاك غادي!؟
معتز؛زي قبل عايش مرتاح وغير شن نبي..
آلاء؛وشن فكرك بينا توا!؟
فردوس بحده؛آلاء..
معتز ببرود:لاعادي سؤالها مافيه شي..جدي هو اللي جابني..
مطيره واريج وغرفه قعدوا يشوفوا لفردوس بضيق..
وطوبى تشوف لمعتز بإمتعاض..
الاء؛ياريته جي بروحه..
معتز ؛ياريت لان اليوم في مباراة مهمه فالنادي راحت عليا..
فردوس وهي تشوف وتسمع في ولدها حست بضيق وخنقه ودمعتها واقفه في محجر العين...
"معتز"
ناض فز لما سمع صوت جده علي وقال..
/شكله جدي قال هيا..مرر نظره عليهم
وقال بإستعجال..سلام..باي..
مشي بسرعه طلع من حداهم..
كلهم قعدوا يشوفوا لفردوس بضيق وحزن..
بس طوبى قالت..
/قاعد صغير ومش فاهم الدنيا تو يكبر ويتعلم ..
فردوس بحسره:انقال ع غيره نفس الكلام ياطوبى وكبروا حتى هما وماتعلموش الحن..
طوبى:احكمي عليه لما يكبر يافردوس..
شبحتلها وقال؛حيكبر بعيد عني ياطوبى..
طوبى:ماتعرفيش شن يصير بعدين..
مطيره:صح مرات ربك يهديه..
هزت فردوس راسها وقالت..
/ان شاء الله..ماعندي غير الدعاء..
طوبى:معناها عندك كل شي خليها ع ربي يافردوس..
فردوس؛ونعم بالله..
غرفه شافت لولادها وقالت..
/تعرفوا ندمت اللي جبت ولاد يقولوا ثلتين الولد لخاله..
طوبى:لالالا هادم الزوز بالذات حيطلعوا لجدهم لطفي وقولي طوبى قالت..
ابتسمت ودموعها في عيونها وقالت..
/ياربي ياحبيبي..
مطيره:الله يرحمه ويوسع عليهم وخيي.
كلهم وابتسامه الحزن مرسومه وجوههم قالوا..
/آمين..اللهم آمين..
🍃🍃🍃🍃🍃
الساعه10:00ليلا..
خشت نجمه للكوجينه اللي كان يتعشى فيها اشرف بروحه..
نجمه:خيرك تتعشى هني!.
اشرف؛ولادك يتناقروا ع السياسه خديت صونيتي وسيبتهالهم..
قعدت تشوفله شويه بعدين قعمزت مقابلاته وقالت..
/بنسألك..
قام عيونه فيها ووقف اكل..
نجمه؛قاعدين صحاب انت وولد عيت كعبار؟
هز راسه وقال؛ايه..علاش!؟
ورجع ياكل..
نجمه؛لاغير سمعت عليهم اخبار اليومين اللي فاتوا وصار بيني وبين وحده من الجيران اني قلت ان عندهم نسيب عسكري من ايام القذافي وهي تقول لالا ماعندهمش..
اشرف هز راسه وهو ياكل وقال..
/انتي صح وهي صح..
هي بإستغراب قالت..
/كيف يعني!
اشرف:كان عندهم نسيب عسكري صح لكن توفى في 2011..
اللي عرفاته نجمه توا صدمها وخلا شكها بادي يتحول ليقين...
شويه ناضت ومشت طلعت من الكوجينه من غير ماتنطق بكلمه..
بعد ماطلعت..اشرف جاه شاهد العقل..
وقف الماكله وبلع اللقمه اللي في فمه من غير مايمضغها كويس وقالت في نفسه..
"شن لبزت ياثور!"
🍃طلعت من حداه وفي حالة غضب وماانتبهتش لرجليها اللي رفعوها للمربوعه الا قبل ماتوصل فيها بشويه..
وقفت في مكانها..بعدين قالت..
/مش توا مش توا..
ولفت ومشت وهي تحاول تتمالك اعصابها وتهدا مؤقتا..
🍃خلت كل شي يمشي طبيعي لين روحوا ولادها وطول هالوقت كانت مركزة ع حالة سميره اللي ماكانتش طبيعيه..
☘وعبد الفتاح نفسه حس ان سميره مش ع بعضها يكلم فيها ترد عليه بكلمة وقص وكانت قالبه وجهها طول الطريق..
ماباش يسألها قدام صغارهم واستنى لين يروحوا للحوش ويقعدوا في دارهم ع انفراد..
🍃🍃🍃🍃
"تو انت مش قلت انك منبه ع خوتك مايطلعوا شي"
هو بإستغراب؛وليهم سنين لتوا حافظين السر..
سميره ودموعها في عيونها..
/وخديجه مرت خوك محيي من وين عرفت!؟
هو بصدمه:كيف!..
سميره نزلوا دموعها وهي تقول..
/طول النهار وهي تلقح وتتسهوك لا وقالت انها شافت الهانم هديكا في عرس اخت كنتهم..
عبد الفتاح بعدم استيعاب..
/غير اهدي واحكيلي وحده وحده بش نفهم! خديجه من شافت في عرس مش عارف من هي اللي قلت عليه!؟
هي بتهكم؛مرتك التانيه ياباشا!
عبد الفتاح كيف جي بيرد تفكر العرس اللي رفع ابتسام ليه اليومين اللي فاتوا وكيف كانت حالتها بعد ماروح بيها مرتبكه ومضايقه وتسرح هلبه..
سميرة بنبرة مخنوقه..
/مادام خديجه عرفت خلاص..حنقعد مضحكه نساوين خوتك انت حتنفضح قدام امك..
ومشت طلعت من حداه وهي مقهورة وحزينه ع حالها...
وخلاته في حالة من التوتر والغضب وهو يمسح ع لحيته ويفكر في الورطه اللي طيح روحه فيها..
☘اييه ياعبد الفتاح مافي شي يدرق للأبد☘
🍃🍃🍃🍃🍃
فتحت الشغاله الباب...
وهو خش يقول..
/فوزيه شن حالك؟
سكرت الباب ومشت وراه وهي تقول..
/كويسه يااستاذ الحمد لله.
مختار:وينها؟
:في قوظتها"دارها" ماخرجتش منها ابدا..
وقف والتفت عليها وقال:مافاقتش لتوا؟
:لاهي فاقت لكن ماخرجتش من القوظه..
مختار:امم..كلت شربت؟
:لايااستاذ..
هز راسه ومشي طول للدروج ركب فوق..
ووصل للدار اللي هي فيها..
دق الباب..بعدين فتحه بالشويه ودخل راسه..
شافها مقعمزه ع كرسي مقابل الروشن وين دق الباب شافتله..
ولما بان عليها..بدت ع وجهها ملامح الخوف والغضب..
ابتسم ابتسامه واسعه..وخش وسكر الباب وقال..
/Hallo..شن جو؟.
قعدت تشوفله بنفس النظرات وهي ملتزمه الصمت..
نزل نظره لسفرة الاكل المحطوطه ع الطاوله قال..
/علاش ماكلتيش!؟
صابرين بنبرة باكيه:علاش درت فيا في شن غلطت معاك؟
تنهد..بعدين مشي قعمز.ع السرير وقال..
/انتي ماتنفعيش تكوني لغيري..
قالتله؛تبيني نقعد معاك هكي لاخر عمري!.
قعد يشوفلها وهو ساكت..
صابرين؛انت قبل قلت انك ماتفرضش في روحك ع مراة صح؟علاش تفرض في روحك عليا!
مختار؛مانفرضش روحي ع وحده ماتحبنيش لكن انتي تموتي عفايس شلايكي ياصابرين..
نزلوا دموعها وهي تشوفله..
اتكي بإيديه للخلف ع السرير وحط رجل ع رجل وهو يقول..
/ع العموم انتي هكي ولاهكي مش حترتاحي في حياتك لأن المراة اللي عندها تجارب سابقه في المجتمع هدا مايرحمها حد..لهدا شفت ان احسن شي ليك تكملي حياتك هكي..ومعاي اني..
حتعيشي ملكة زمانك خير ماتكملي حياتك خدامه  عند مرت بوك وخوتك..نزل رجليه وحط ايديه عليهم وهو يقول بضحكه ساخره..
/اعتبري روحك ملك يمين..سبيه خديتها في حرب غنيمه..
وهي تسمع وتتوجع من كل اهانه مش قادره ترد عليك..
هو قال:اني كنتلك خير من خواتك ياصابرين..
ناض وقف وهو يقول..اللي باعوك بقشرة بصلة..
شاف للسفرة وقال..
/تعشي ياصابرينه تعشي مافي شي مستاهل....
ومشي طلع من حداها وسكر الباب..
وبعد ماسكر الباب هي طول انهارت بالبكي...
🍃🍃🍃🍃🍃
"شن توا حالك باهي"
المهدي؛الحمد لله خير من بكري..
محمد ولده؛بوي تسمع مني..
شبحله وهو ساكت..
قاله؛طلع روحك من مشاكلهم بالله عليك ماجايك من وراهم شي كان وجع القلب..
المهدي:مش هاينه عليا طوبى يامحمد..
محمد بضيق؛ولااني يابوي وصدقني لو نقدر نديرلها شي راني درت..انت شفت بعينك لما واجهت جدي شن صار..كان جدي هكي موقفه معناها ماحد يقدر يديرلها شي يابوي..
المهدي:لاياولدي نقدروا..نقدروا نمنعوا ظلمهم ليها..
محمد بخوف ورجاء..
/بوي من الاخير اني مش مستعد نخسرك حتى انت حسرتي ع امي قاعدة هني..وحط يده ع صدره وقال..توجع فيا كل دقيقه يابوي..لو لقدر الله صابك مكروه لاقدر الله حني شن نديروا شن يصير فينا..كان تحملت يزن وسدرة مايتحملوش يابوي..
تعبوا عيون مهدي بالدموع بعد ماسمع كلام ولده اللي كله رجاء وخوف وحزن..
حط يده ع ذراعه وشد عليها وقال..
/خلاص خلاص..حاضر..اللي تبيه نديره..
محمد وهو شاد دمعته بقوة..
/ان شاء الله ربي يسخرلها من يعاونها وينصرها وان شاء الله امي تسامحني..
والمهدي وهو يشوف لولده رفعاته الذكريات ليوم مستحيل ينساه...
《 يقولوا البنادم يحس بروحه..يحس بساعته لما تقرب..اني حاستها قربت هلبه..في شي من داخل..في شي مات..اختفي..شي كان يقوي فيا ومخليني واقفه ع رجليا ونقاوم..من غيره حاسه روحي خلاص..معاش نقدر..
مهدي..
بنأمنك امانه..لو صارت فيا حاجه..طوبى امانه عندك.
احسبها زي نسرين وخديجه بالله عليك..طوبى قاعده صغيره..تبي من يوقف وراها ويحميها بالله عليك يامهدي خليك وراها بالله عليك..هادي امانتي عندك يامهدي..لو كنت غاليه عليك حق..حافظ عليها..
هو لما يسمع في كلامها حس الى جانب شعور بالخوف..
حس بالإحتقار..
مهدي عارفه روحي نبي نكلفك فوق طاقتك بس ماعنديش ثقه في غيرك بش نأمنه ع اغلى ماعندي بالذات وانها ولت ليكم توا..
//تمام..بناخدك ع قد عقلك وبنقولك طوبى عندي مش حتكون زي نسرين وخديجه..طوبى حتكون بقيمة سدرة بنتي عندي..》
تنهد بألم ودموعه معبيات عيونه وقعد يشوف للسمي السودا  المرصعه بالنجوم وكلامه قاعد يتردد ع مسامعه...
🍃🍃🍃🍃🍃🍃
تاني يوم..
السبت..
28يوليو..سنة 2018..
الساعه 6:30عصرا...
التجهيزات في حوش شنيبه ع قدم وساق للحضرة وضيوفها..
وولاد محمد شنيبه كلهم كانوا حوالين بوهم فهاليوم حتى المهدي برغم اللي صار مايقدرش يخلي بوه قدام الناس وهو كبير العيله بعده..
بس بطل المسرحيه هادي كان الجالي اللي قعد يعول ويرحب ويهدرز ووجهه بشوش طول الوقت..
وعمامه مركزين عليه..ومن كثر ماأثر فيهم بدوا يميلوله ويتعاطفوا معاه ويشككوا في كل اتهام نسب اليه من مرته وجدها..خصوصا انهم يحبوه من قبل ويشوفوا فيه حاجه كبيره..
🍃الجالي؛لااني طالع طالع تو نجيبه معاي..عطيني الوصفه بس..
راجل عمته؛ماعنديش الوصفه عندي الباكو متاعه تقدر تاخده زعم؟
الجالي إبتسامه:نقدر نقدر جيب الباكو بس..
طلع الراجل من جيب سوريته العربيه علبة الدواء ومدها للجالي..
خداها الجالي وقال:توصي ع حاجه تانيه..
:لابارك الله فيك..
الجالي:فيك بارك الله..السلام عليكم..
ومشي بيطلع من الحوش..
🍃وبرا..
قدام الحوش المقابل كانت مدرسه سيارة آلاء وهي فيها لاهيه بتليفونها وتراجي في نفس الوقت..
واللي تراجي فيهم..طلعوا من الحوش وتوجهوا للسيارة..
اريج ووراها طوبى..
ويطلع الجالي من حوش بوه وكيف جي بيلبس نظاراته..
يجو عيونه عليها..
وهي تشوفه...بدت ع وجهها ملامح الكره..
اماهو بدت ع وجهه ملامح الحقد..ونظرات عيونه ليها كانت مخيفه..
اريج وين شافتها خافت وقالت..
/هيا بيبو بري ومعاش تشبحيله..
مشت طوبى بعد ماغيرت عيونها عنه..
وهو قعد معاها بعيونه لين ركبت السيارة من الخلف..
واريج ركبت القدام وسكرت الباب وقالت..
/هيا تحركي..
الاء حطت تليفونها قدامها ووشغلت السيارة  وتحركت طول..
هو طول مشي ركب سيارته وشغلها ولحقهم...
وهدا كله صار ع عيون فراس التونسي..
🍃🍃🍃🍃🍃
"في عنده ضيف داخل"
حط مختار رجل ع رجل وقال..
/مش مشكله نستنوا..
وفي مكتب المسؤول اللي كان جاي مختار يشوفه..
كان هالمسؤول مقعمز مع ضيفه واللي يخدم تحت ادارته..
المحجوب...
:للأسف الموضوع مش في يدي..لو في يدي اني مستحيل نحولك ياسيادة المستشار.
المحجوب بنظرات كبرياء قال..
/باهي من حقي نعرف السبب..
:مانقدرش نفيدك صدقني لأني مانعرفش القرار جاني واني نفدته..
ابتسم المحجوب ابتسامه متهكمه وهو يهز في راسه بعدين ناض وقال..
/ع العموم اني تشرفت بالخدمه تحت إدارتك..
:الشرف كان ليا اني سيادة المستشار...
تصافحوا وقاله المحجوب..
/نتمنى مايكونش اخر لقاء..
:بإذن الله..
طلق يده وقال؛السلام عليكم..
:وعليكم السلام..
ومشي المحجوب بثبات وثقه برغم الالم اللي كان يحس بيه بسبب خسارته لوظيفته..
طلع من المكتب..وين مشي بيكمل طريقه..
وقف في مكانه لما شاف مختار في مكتب السكرتيره..
:تفضل استاذ..
ناضت مختار وقال..
/شكرا..بس ع فكرة اللون طالع عليك حلو عاكس ع عيونك.
هي ابتسمت بإرتباك وخجل..
وهو ابتسم ابتسامه واسعه..ولف ومشي بإتجاه مكتب المسؤول..
وين شاف المحجوب رفع حواجبه بمفاجأة  وقال..
/اوو خال..يامحاسن الصدف..
وقدمله وسلم عليه بالخد بعدين قال..
/كيف الحال؟
المحجوب وهو يشوفله بنظرات كبر..
/الحمد لله في خيار خيري..
مختار؛وجهك يقول عكس هكي! مريض؟
المحجوب قعد ساكت وهو يشوفله بنفس النظرات..
مختار اشر ع المكتب وقال..
/ولا صاير بينك وبين استاذ ربيع مشكله مستعد ندخل فيها الراجل صديق مقرب ويتحشم مني هلبه ومايرفضليش طلب..
ضحك المحجوب ضحكه ساخره خفيفه..
بعدين طبطب ع ذراع مختار ومشي وخلاه..
ابتسم مختار تهكما ونفض ذراعه بيده..بعدين مشي خش للمكتب...
🍃🍃🍃🍃🍃
وصلوا البنات مع طوبى لمحل ملابس اطفال كبير..
نزلوا وخشوله..
طوبى بإبتسامه حماس..
/قداش يهبلوا..
ومشت للركن اللي فيه ملابس الرضع وباقي حاجتهم وهما لحقوها..
بعد ماخشوا للركن مع بعض...
خش الجالي للمحل...

#حق_الرد
#طوبى

...يتبع...