حكٍم طغى ماعاد ينفع نظامه

Part 6

في صباح يوم جديد في الديره
قاموا البنات يجهزون الفطور وكان يوم الثلاثاء و في هذا اليوم يتجمعون حريم الديره في وحده من البيوت و جمعتهم اليوم كانت في بيت ام عبدالعزيز حطوا البنات الفطور في بيت الشعر و جلسوا ينتظرون العيال عشان يفطرون راحت ام عبدالعزيز تقومهم دخلت عليهم وكانوا نايمين وجلست تقوم فيهم : يا فيصل نواف قوموا عزيز يلا قم توحوني انتم قوموا
تلفتت عليهم وهي تشوفهم كل واحد بجهه صرخت بصوت عالي عليهم عشان يقومون وكانت تهددهم بالمويه قام عزيز اللي اصلاً نومه خفيف و ناظر في امه : روحي انا اقومهم
طالعت فيه ام عبدالعزيز و طلعت : بسرعه لا تتأخرون ننتظركم على الفطور
طلعت ام عبدالعزيز من عندهم و جلس عزيز يسحب في فيصل و نواف لين قاموا و جلسوا يتهاوشون على الحمام و طلع عزيز منه وراح لبس ثوبه و جاء بيطلع من البيت ترك نواف الحمام لفيصل وراح يلحق على عزيز قبل ما يطلع : ياولد انتظر وينك رايح ؟
فتح عزيز الباب و وقف عنده : ابد رايح للمحل اليوم علي ونسيت افتح بدري
نواف وهو يدري انه عزيز لحد الان يفكر بسالفة امس : علي انا !؟ ليكون لحد الان زعلان من امي ترا امي يبيلها من يسايسها تعرفها عنيده خذها بالمسايس
عزيز بطفش من نواف : ياخي ماني زعلان بس بروح للمحل الحين تلقى جدي فاتحه بيفصل علينا و الطلبيات فوق راسنا
نواف : مع انها ما مشت علي بس وكل امرك لله وخلني اروح اطلع الحيوان اخوك من الحمام كلها بسبتك خليتني اخليه يدخل قبلي
ضحك عزيز عليه وهو اللي ما يعرف شخصيته الا نواف ولا يضحكه الا هو غسلوا وجيهم العيال وراحوا للفطور وبدا فيصل بالاكل و ضربته امه على يده : اح يمه وش فيتس !؟
ام عبدالعزيز : عيب عليك انتظر اخوك الكبير
فيصل : طلع هو مارح يفطر
ام عبدالعزيز : وين طس بيجنني هالولد كان عاقل مدري وش قلبه
نواف : راح للمحل عليه اليوم نسى يفتحه بدري و بعدين يمه انتي تدرين وش يبي هالولد
ام عبدالعزيز : اكل وانت ساكت لا تتدخل بيني و بين اخوك
وقف نواف على رجله و طالع امه : اجل اذا تهاوشتي انتي وعزيز لا تجيني اهدي عزيز خليني ما اتدخل مره وحده ( طالع فيصل ) انا بروح للعزبه وانت كمل فطورك وجب الاغراض اللي ناقصتهم بعدين رح للمحل
هز فيصل راسه و طلع نواف وانقهرت ام عبدالعزيز على حال عيالها اللي انقلب فجاءه وكله بسبة مصادفتهم لعمهم اجل لو قابلوهم او قالت لهم السالفه وش بيصير وقررت انها ما تستعجل و تعلمهم لازم تصبر وهي اللي تعرف شخصية عيالها طالعت في بناتها : وانتن اخلصن و قوموا رتبوا البيت قبل ما يجون العرب
هزوا روسهم البنات بخرشه من امهم و قامت ام عبدالعزيز ودخلت داخل طالعتها ندى لين دخلت : اه ياربي من امي تعصب من عيالها و تفش خلقها فينا
فيصل : اقول امي هالايام لحد يقربها نار وشرار
الجده منيره : والله ما صارت كذا الا منكم جننتوها ماخليتوا فيها عقل
فيصل : اكشخ يا منيره تدافعين عن بنتس الا على طاري بنتس جدي وينه وراه ما افطر معنا حتى ما قوم عزيز يروح للمحل ترا هذي تنحسب عليه يفضل عزيز وحنا لا
الجده منيره وهي تناظره بطرف عين : راح يفتح المحل عنكم شاف عزيز جاي من خط و رحمه بعدين انت ليش ما رحمت اخوك ورحت عنه للمحل ؟
فيصل : والله حتى حنا نكرف هنا يعني كلنا مو مرتاحين المهم اكتبوا لي اغراضكم اللي ناقصتكم بورقه و عطوني اياها و لوسمحتوا اكتبو الاغراض اللي تكون في بقالة ابو عباس مالي خلق اروح لبقالة المدينة
راحت ندى تجيب الدفتر وجلست تكتب اغراض البيت بعدين كتبت طلباتها وطلبات خواتها وكانت خرابيطهم اكثر من اغراض البيت اخذها فيصل وراح جابها و بعدها طلع للمحل
___________•
في الحاره
ركب نواف السياره و مشى شوي بس وقفه ماجد وجاء ركب معه : على وينك رايح
نواف باستغراب منه : رايح للعزبه بس اول شيء انت مو تعبان وش مطلعك من البيت و ثاني شيء راكب معي ما تخاف ابوك يشوفك ؟
ماجد : اولاً ترا اصابتي بكتفي يعني اقدر امشي و ثانياً ابوي مو موجود بالبيت فاكيد ما ترضى اجيك للعزبه كعابي وانا مصاب صح ولا لا ؟
نواف بتسليك : اي اي ما ارضى ( طالع في حارتهم وشاف ناس جالسه تنقل للديره ) الناس تبي تطلع من الديره وهم جايينها
ماجد : ما تدري عن ظروفهم بعدين مو كل الناس يبون يطلعون من الديره مثلاً انا اعشقها ولا ابي اطلع منها شكلك انت ناوي على الطلعه
كمل نواف طريقه للعزبه : ياخي انا عادي ما فرقت معي ها عشت هنا ولا عشت هناك بس ياخي طالعه لنا سالفه هاليومين ولازم اعرفها ولا بينجن عزيز او يجنني
ماجد باهتمام : اووح وش صاير معكم ؟
وصل نواف للعزبه و وقف السياره : اقولها لك شوي هي طويله والحين عندي شغل لين راسي اربط ثوبك وانزل ساعدني
ماجد بضحك : اساعدك بيد وحده ؟
ضحك نواف عليه وجلس يحرك يده الثنتين بالهواء و يطقطق على ماجد : الله لايبلانا الحمدلله على نعمة اليدين اقدر اتمغط فيها ( جلس نواف يتمغط عشان يقهره ) يااااوك ياحلو التمغط حلواااه
ماجد طالعه بطرف عينه : لا تخليني ادعي عليك الحين ترا دعوة المريض مستجابه
نواف : ترا نمزح معك ياهوووه وراك شديتها ؟
ماجد : اي تأدب و ترا بساعدك لا تخاف بس بالاشياء الخفيفه وترا مارح انسى لازم تقول لي اللي صاير معك
نواف : اليوم الليل خلنا نتقابل بالجبل حقنا و بكت العلوم كلها عندك
ضحك ماجد عليه وراح نواف يضبط امور العزبه و كان ماجد يساعده بالامور البسيطه اللي يقدر عليها خلصوا كل شيء ورجعوا للديره
___________•
في بيت الخاله الهنوف
جالسه الهنوف و عيالها بالصالة يتقهون ويسولفون و كانت الهنوف تفكر بشيء ودها تقوله بس تنتظر فارس يجي من دوامه جاء ابو فارس و قررت تقوله قبل ما يجي فارس عشان يكون عنده خبر : اقول يا ابو فارس ما ودك نزوج فارس ؟
ابو فارس ببتسامه : الا ودي اليوم قبل بكرا بس تعرفين ولدتس ما يبي الحين يقول بعدين مدري لمتى بعدين
وعلى كلامهم وصل فارس من دوامه و جلس معهم : اااح يا اني تعبت اليوم بروح انام و لو ينفجر العالم لا تقوموني
خاله الهنوف : بسم الله علينا اجلس شوي بنقول لك شيء
فارس باهتمام : وش عندكم ؟
ابو فارس : امك تبي تزوجك
كملت خاله الهنوف الكلام : لا تقول شيء اسمع اول و اعرف من نبي نخطب لك بعدين ترا عمرك يمشي و كم باقي لك و تصك الثلاثين ان كانك تبي تفرحني اعرس
فارس : يا يمه انا كم مره قلت لتس اني ما ابي اعرس الحين بس انتي مدري وش فيتس لزمتي
نجلاء : الا تكفى يا فارس اعرس بخاطري احضر عرس من طرفنا ولا اكون انا اخت المعرس بعد والله فله
فارس بنص عين : عشان السيده نجلاء بتستانس الحين بروح اتزوج
خاله الهنوف : وش تنتظر انت عشان ما تعرس وظيفتك و عندك و قادر انك تفتح بيت ليش تصعبها ولا تنتظر عزيز يعرس بعدين انت ترا لو بتنتظر عزيز تراه مطول واضح عليه افلح انت وهو يفلح وراك
فارس : الله يهداتس يا يمه وش دخل عزيز الحين انا حالياً ماني مستعد للزواج
خاله الهنوف : طيب خلاص لا تتزوج بس اعرف من هي البنت اللي انا ناويتها لك نخطبها بس مو لازم تتزوجها على طول حرام تطير من يدك
فارس وهو يسلك لانه بس يبي يسكر السالفه : اي طيب من هي ؟
خاله الهنوف : ريم بنت اختي
نجلاء نطت بحماس : الله وناسه بتجي ريم عندنا تكفى وافق تكفى تكفى تكفى
خاله الهنوف : هاه وش قلت ؟
فارس : هذي يبيلها تفكير يا يمه بعدين ليش ماخذه وحده قريبه يعني لو صار مشكله بيني وبينها بتخرب العلاقه بين العائله كاملة احس فكري بغيرها
ابو فارس : ريم و النعم فيها بس لو بتخطبونها شرطي الوحيد العرس يكون في الرياض ما ابيه بالديره عشان جماعتي و ربعي كلهم هنا
خاله الهنوف: خله يوافق بالأول هاه يمه وش قلت ؟
فارس : قلت لتس بفكر و لو وافقت العرس يكون بعد سنتين او ثلاث
خاله الهنوف : اوف سنتين او ثلاث البنت يمشي عمرها الحين هي ٢٦ يعني بعد ثلاث سنوات بتصك الثلاثين و بعدين خالتك و جدك مارح يوافقون انها تقعد مخطوبه ثلاث سنوات
فارس : انتي قلتي خطبه وبعد كم سنه زواج
خاله الهنوف : انا قصدي تقعد خاطبها سنه مو ثلاث !!
فارس : اجل شيليها من راستس تصبحون على خير
قام وراح فوق لغرفته التفتت الهنوف لابو فارس: عاجبك كلام ولدك ؟
ابو فارس : وش اسوي فيه اغصبه خليه متى ماطخ هو يجيتس
نجلاء : حيوان خرب علينا الحماس
خاله الهنوف : انتي اسكتي لا اسمع صوتس
وجلست الهنوف تفكر هل تخطبها له و تقعد ريم مخطوبه ثلاث سنوات ولا اختها بترفض هذا الشيء و خايفه بعد انه زواج ريم و فارس بيسبب مشاكل بين العائلة مستقبله هذي اشياء لازم تفكر فيها قبل ما تقدم على هذي الفكره
______________•
في المحل
كان عزيز يشتغل و هو ساكت و حتى شغله ما كان ذاك الزود مره يرتب الاجهزه و مرات يسج و كان الجد مقبل جالس و يطالعه و بالجهه الثانيه بالمحل فيصل واقف و يرتب الحسابات
الجد مقبل : فيصل نواف راح للعزبه ؟
فيصل : اي راح
الجد مقبل : اجل قم رح جب الأغراض اللي ناقصه بالبيت
فيصل : جبتها وخلصت
الجد مقبل وهو يبي يصرفه عشان يجلس هو و عزيز لحالهم : طيب فيه القز الخربان اللي وديناه نصلحه رح جبه
فيصل : جابه امس نواف
الجد مقبل : طيب رح ...
قاطع كلامه فيصل : فهمت اروح اصرف نفسي تعبت نفسك وانت تحاول تصرفني
الجد مقبل بعصبيه خفيفه : دامك تعرف اني ابي اصرفك وراك ماطلعت من البدايه بس تعبتني
فيصل بضحك عليه : عجبني شكلك وانت تحاول تصرفني
الجد مقبل حاول يضربه بالعصا بس انحاش و التفت لعزيز : وانت تعال قابلني و قولي وش علتك اللي طلعت لك فجاءه
جاه عزيز و جلس قباله و جلس عزيز يطالعه و الجد مقبل يطالع وعم الصمت لبضع من الثواني : مقعدك قدامي تناظر في وجهي تكلم
عزيز : وش اقول
الجد مقبل : وش تقول !!؟ تقول اللي صار امس
عزيز : والله ياجدي ما صار شيء وانت شفت بعينك جيتكم و تكلمت بهدوء بس فجاءه تنفجر امي و تبينا نمشي الموضوع ولا كأنه شيء صار ترا حنا كبرنا و سكتنا على اشياء قديمه صارت بس عشان ما نزعلكم بس خلاص الحين كبرنا وصرنا نطعم العلم  ولازم تقولون لنا كل شيء
الجد مقبل بضحك : اي كذا طلع كل اللي بقلبك
عزيز : انا مو شايل بقلبي شيء بس لو انت مكاني وكنت تتكلم طبيعي و فجاءه امك تصير تبكي و متوتره وبس ترجف و تجون انتم تطلعونا برا البيت عشان بس ما نعرف وش اللي صاير و الله انك لتزعل لين ما تعرف السالفة تشوفني على حق ولا لا !!!!؟
الجد مقبل وهو وده يقول كل شيء بس لازم امهم هي اللي تقولهم : شف يا وليدي انت صادق بكل كلمه قلتها وانا امس شفت صدمتك وصدمة اخوانك على اللي صار امس بس عط امك وقت وهي بنفسها بتجي تقول لك خلها تجهز نفسها وانت بعد لا تصدمها و تروح تقابل عمانك و تقهرها لا تقابلهم و ابعد عنهم لين ما تقول لك السالفة
عزيز : و اذا ما جت تكلمت بصبر لين متى ؟؟
الجد مقبل : اصبر هي بتجيكم بس اليوم اذا رجعت رح سلم عليها وطيب خاطرها تراها ما تعودت تشوفك كذا ارجع عزيز اللي تعرفه ولا تزعل امك عليك مره ثانية تسمع ترا لو شفتك مزعلها بتوطى ببطنك تراها غاليتي
عزيز بضحك : ابشر و مال بنتك الا اللي يطيب خاطرها
الجد مقبل : كفو هذا العشم فيك
تفرقوا وراح عزيز يكمل شغله و طلع الجد مقبل و راح لجمعة شياب الديرة
_____________•
في بيت ابو تميم
واقفه اديم في الحوش وجالسه تسقي الزرع وكانت طفشانه و كانت تفكر بكلمة نواف امس وعصبت منه و دفت السطل برجلها : صدق انه ما يستحي اجل يقول لبنت كذا اكيد انه كلم كذا وحده كذا و انا غبيه واقفه اسولف معه و اسم...قطع كلامها طق الباب و راحت تركض تفتحه و ماتدري ليش كانت تحس نواف اللي وراه : مين
ندى : افتحي هذي انا ندى
استغربت اديم جيتها و فتحت لها الباب : هلا والله تفضلي
دخلت ندى و فتحت عن وجهها : اسمعي انا جايتس بسرعه و بروح بسرعه اليوم جمعة الديرة عندنا وجيت اعزمتس ما فيه مجال للاعتراض
اديم وهي تدري ان ابوها مارح يوافق : صراحه ما اوعدتس بس بحاول
ندى : تكفين حاولي حتى تعالي بدون لا تكشخين عادي بس حنا
ضحكت اديم : اي ولا يهمك بس تعرفين ابوي اذا وافق بجي
ندى : يارب يوافق يالله انا بروح تاخرت الحين امي تغسل شراعي
ضحكت اديم عليها و راحت ندى و سكرت الباب اديم و قعدت تكلم نفسها : تكفين يا اديم وش كنتي تحسين فيه يوم جاء ببالك انه اللي طق الباب نواف غبيه انتي
دخل ماجد للبيت و كانت معطيته ظهرها و يشوفها تكلم نفسها ولا انتبهت لوجوده و رفع صوته لها : هيه اديم وين وصلتي
لفت عليه اديم بخرشه : بسم الله من وين طلعت انت بعدين وش مطلعك من البيت و انت لسى ما تعافيت بتجنني
ماجد : هدي هدي الحمدلله انا بخير بس من اللي طلعت من عندتس الحين
جلست اديم بالجلسة اللي بالحوش : بنت جيرانا جت تعزمني لبيتهم
ماجد : اخت نواف ؟
اديم : اي بس قلت لها اني احتمال ما اجي
ماجد : ليه ما تروحين روحي و وسعي صدرتس
اديم : تستهبل انت ما تعرف ابوي لو قلت له بيقول لا المره اللي راحت وافق عشان العرس كان لابو خالد مو لهم و الحين لو قلت له بيعصب و بيقول لا
ماجد : عادي ما نقوله
اديم : شلون غبي انت بيفقدني
ماجد : بنقول له انتس رحتي لعبير وهو بيحسبتس عندها
اديم بقلق : والله مدري اخاف يدري و بعدين اكلها
ماجد : يا بنت انتي تبين تروحين ولا لا ؟
اديم : ابي
ماجد : خلاص ازهليني روحي تجهزي و ترا الليل اذا رجعتي انا بطلع و ابيتس تغطين علي
اديم بفهم للموضوع : فهمت ليه من اليوم تحاول تقنعين وراك مصلحه مو لله قل وش عندك
ماجد : افا ما كأنتس تعرفيني حتى لو ماعندي شيء بخليتس تروحين
اديم : طيب وين بتروح ؟
ماجد : بطلع مع نواف عنده سالفه مضايقته بيقولها لي و بعدها برجع بس غطي علي ساعتين
اديم : طيب بغطي عليك بس ياويلنا من ابوي اذا عرف انه مقابلينهم
ماجد : معليتس مب صاير شي روحي تجهزي
راحت اديم تتجهز و كانت تفكر وش الموضوع اللي مضايق نواف : اففف اديم وش دخلتس تفكرين فيه روحي تجهزي لا تتأخرين
راحت تتجهز و بعدها طلعت مع ماجد و وصلها لبيت ام عبدالعزيز
_____________•
في بيت ام عبدالعزيز
بدوا يوصلون حريم الديره و جمعتهم ما كانت جمعه كبيره كانت جمعه صغيره على قدهم و مثل اي جمعه في ديره سوالف و ضحك و كانوا البنات في المطبخ يجهزون الضيافة وكانت ريم قلقانه من روحة ندى و خايفه انه امها تجي تدورها و ما تحصلها : ما كأنها تاخرت ؟
نوف : يعني
ريم : ليتنا ما خليناها هي اللي تروح الحين وش يسكتها تقعد تسولف مع البنت و تنسى ليش هي راحت
دخلت ام عبدالعزيز وهي معصبه منهم : وراكم محد منكم جاء يقدم الضيافة بتجنوني و اختكم العله الثانيه وين غدت !؟
نوف : الحين بتجي راحت للحوش و بتجي
ام عبدالعزيز : وش تسوي في الحوش روحي ناديها لي الحين
جت بتطلع نوف بس دخلت من الباب ندى و هي كانت تسمع صوت امها في المطبخ و راحت رمت عبايتها في المجلس اللي ينامون فيه اخوانها وجت دخلت كأنها جايه من الحوش : وش فيكم متجمعين بالمطبخ ؟
ام عبدالعزيز مسكتها من يدها : انتي وينتس ماجيتي تصبين القهوة للحريم
ندى : كنت بالحوش ارتبه
ام عبدالعزيز : بسرعه تعالي صبي القهوة و انتن تعالوا قدموا الضيافة بسرعة
طلعت ام عبدالعزيز و طلعوا البنات وراها و ضيفوا المعازيم و بعدها بنصف ساعة وصلت اديم وطقت الباب و راحت ندى تفتح لها دخلت اديم و جت ندى بتسكر الباب بس دخل ماجد يده عشان يدخل القهوة و الحلا اللي جايبتها اديم بس ندى ما انتبهت و سكرت الباب على يده المتعافية صرخ ماجد ولا امداه يكمل صراخه الا وشاف ابوه جاي من بعيد كبح شعوره بالالم و راح يركض عشان ابوه ما يشوفه
ندى بخرشه : يمه وش صار !!!؟
اديم : ياويلي سكرتي الباب على يد ماجد
ندى بخوف : يمه لايكون اللي انصاب فيها !؟
اديم جالسه تضحك من تعابير وجهها : لا لاتخافين هذيك ملفوفه سكرتي على المتعافية
ندى : شكلي كسرتها له عاد انا دفاشتي ما اخليها
اديم : معليتس ما صار شيء
ندى : ادخلي حياتس
دخلت اديم لمجلس الحريم و سلمت عليهم بعدها راحت جلست مع البنات
اديم : الا جمانه و نجلاء وين ؟
نوف : راحو لمدينتهم ما يجون الا بنهاية الاسبوع او الإجازات
اديم : عاد الإجازات يجونكم ما يروحون لين تبدأ الدوامات
ندى : اييي اكرهه الإجازات يجونتس ولا يطلعون لين اخر يوم إجازه يحلوهم وهم يجونتس نهاية الاسبوع يقعدون يومين و بعدها يرجعون
اديم : فضفضتي بزياده لا تسمعتس جمانه تراها صايره خويتي ما ارضى عليها
ندى : عشتوا ما ارضى عليها عيب عليتس انا بنت جيرانكم مو هي المفروض ما ترضين علي انا
نوف : خلونا ندق عليهم بجيب جوال امي و ندق
راحت نوف تجيب جوال امها بس ما لقت فيه شحن بعدها رجعت لهم ومعها جوال فيصل : ما لقيت جوال امي بس لقيت فيصل عند الباب و اخذت جواله قوموا يالله نروح ندور شبكه عشان نتصل
اديم : يحتاج اجيب عبايتي معي ولا مافيه احد !؟
ندى : لا معليتس ما فيه احد تعالي
راحوا جهة مجلس الرياجيل و لقط الجوال شبكه و اتصلوا على جوال نجلاء بعدها بكم ثواني ردت جمانه : خير وش تبون امداكم تشتاقون لنا !؟
ريم : والله مو حنا اللي اشتقنا لكم اديم هي اللي اشتاقت لكم
جمانه : ارحبي يا اديم ما لقيتي تجين عندهم الا يوم رحنا
نجلاء : حبيبتي انتي يا ريم انا مارح اخليك تشتاقين لي ابد ( كانت تقصد انها بتجي عندهم اذا تم عرسها من فارس ) اهلين اديم كيفتس
ريم بعدم فهم : وش قصدتس
نجلاء : ولا شيء
اديم : انا بخير انتم كيفكم
نجلاء و جمانه : الحمدلله
جمانه : يا ويلكم تقولون مواضيع مهمه انتظروا لين اجي بعدها قولوا اللي بخاطركم وانتي بعد يا اديم لا تغدرين فيني هذا وانا اقول اديم على جوي و ويني عنها من زمان صدق الصاحب ساحب
ندى : فشلتينا حتى ما تعرفين تقولين امثله وش دخل الصاحب ساحب
نجلاء بترقيع لجمانه : قصدها من شاف احبابه نسي اصحابه بس غدر فيها لسانها
ندى : ليتس ساكته انتي بعد بدال ما تكحلينها عميتيها
اديم فاطسه ضحكك منهم و من محارشهم : والله يا جمانه يا انتي دخلتي جوي يا عليتس جو ما عليتس من احد همتس نفستس و بس احستس تمشين على البركه ما تدرين الله وين حاطتس
جمانه : والله ما ادري هذي مدحه ولا سبه بس باعتبرها مدحه شكراً لتس
اديم بضحك : عفوا
قاطع وناستهم فيصل اللي سمع سوالفهم من عند الباب و عرف انه فيه احد داخل و تنحنح : ولد فيه احد
ريم : اي انتظر بجيك وش تبي
فيصل : نواف يبي بوكه تلقينه على الطاولة داخل و عطوني جوالي لاني بطلع
ريم : نواف وين ليه ماجاء ياخذ بوكه هو ولا زعلان لسى
فيصل : لا وش يزعله بس انا جيت اخذ جوالي و قال لي اجيب بوكه
ريم : والله مدري عنكم انتم يبيلي جلسة معكم لانكم من تالي متغيرين
اخذت ريم الاغراض و عطتها فيصل بعدين طلعوا من المجلس و جلسوا داخل يسولفون
______________•
في بيت ابو تميم
دخل تميم و ابوه و كانوا ينادون اديم بس ما فيه احد يرد طلع لهم ماجد و قال لهم انها راحت لبيت وحده من الحاره و بتجي و انه الحين هو بيروح يجيبها طلع من عندهم وراح لبيت ام عبدالعزيز و اخذ اديم وقال لها انه بياخذون لفه بالحاره عشان ابوهم ما يشك
اديم : كيف يدك عورتك ؟
ماجد : اي عورتني من ذي المجنونه بغت تكسر لي يدي الثانيه
جلست تضحك اديم عليه : هذي اخت نواف الصغيره ما تدري انك ورا الباب
ماجد : وراها طايره
اديم : والله مدري بس من عرفتهم وهي كذا
ماجد : وعاد انتي اكيد عاجبتس جوها تحبين اللي كذا
اديم : اي والله عاجبني الا انت متى بتروح ؟
ماجد : الحين بنزلتس و بروح
اديم : بتدخل ؟
ماجد : لا مالي خلق اقول لابوي شيء انتي قولي له انه عازمه واحد من الشباب و بيجي بعد صلاة العشاء او قبلها
رجعوا للبيت بعد ما داروا بالديره شوي عشان ابوهم ما يشك و نزل اديم و راح يقابل نواف في جبلهم المعتاد
______________•
في احدى جبال الديره
كان نواف قاعد فيها و مضبط القهوه و شاب النار و ينتظر ماجد يجي وصل ماجد و جلس جنبه : من زمان عن هالجلسة
نواف : اي والله من زمان
ماجد : غرد اسمعك
نواف : اسمع راح عزيز للمدينة عشان يوقع اوراق و قابل واحد من عماني اللي من زمان ما قابلناهم و...ابتدا نواف يقول له كل اللي صار و عن ردة فعل امه اللي صارت فجاءه
نواف : بس هذا اللي صار وش تفسر ردة فعل امي ؟
ماجد : والله يا طويل العمر انت وقت جيتكم هنا ماتدري  وش صار مع امك عشان تنقل هنا حتى الحين لو اسألك انتم ليش نقلتوا هنا ماعندك جواب تقوله لي ف انا اقول انتظروا ولا تشدون على امكم هي بالنهاية بتجي و بتقول لكم
نواف : والله ياماجد انا احاول اسوي نفسي كأنه مو هامني الموضوع عشان عزيز ما يشد الحين عزيز مشتط الا ولازم يعرف وش صاير انا احس ورا نقلتنا الى هنا سالفة كبيره انت لو تشوف وجه امي كيف انقلب يوم سمعت بس طاريهم هذا وهي ما شافتهم
ماجد : اذا تبي تسمع شوري انا اقول خلوا امكم براحتها دام ردة فعلها كذا لان يمكن على قولتك انه الموضوع كبير اكيد انه مسبب لامك صدمه حتى انت توك تقول انه يوم عرفت كانت تكلم نفسها مو مستوعبه عشان كذا لا تضغطون عليها ما تدرون وش اللي مر عليها
نواف : انا ابد ما كلمتها عن السالفة و بحاول اهدي بعزيز حتى فيصل ما اشوفه عطى ردة فعل يمكن شايل بقلبه لازم اكلمه
ماجد : اي كذا هد بإخوانك و امكم اذا شافتكم كذا هاديين بتعرف انه يمديها تعتمد عليكم و تقول لكم
نواف بضحك : اكشخ يا ماجد طلعت تعرف تهدي ما توقعتها منك
ماجد بضحك : حتى انا منصدم من نفسي يالله قم خلنا نروح قبل لايشك ابوي الا على طاري ابوي كنت بتقول لي وش صار بينكم يوم إصابتي
نواف وهو يتذكر اللي صار و ضحك : تدري انه ابوك طفش من هوشاته معي و راح رفع السلاح بوجهي
ماجد بصدمه : تمزح وش اللي خلاه يرفعه !؟
نواف : يحسب انه انا اللي طاعنك لان اهل الحاره شافوني وانا اشيلك و كان ثوبي كله دمك و عاد انت تعرف اهل الديره و تكبيرهم للمشاكل فراحوا و قالوا لابوك انه انا ذبحتك بسبب عداوتنا لابوك و ابوك ماشاءالله جاهز مايحتاج احد يقوله شيء
ماجد : وكيف نزل السلاح زين ما طلق عليك
نواف : اختك شايفه كل شيء وقالت لابوك و نزله
ماجد : هذا كله صاير وانا ما ادري حتى تميم ما قال لي شيء
نواف : بسيطه يارجال قم خلنا نرجع لايفقدونا
ماجد : خلنا نرجع ركض من الجبل و الفائز بطل الليله و يأمر على الثاني اللي يبي
نواف : تبي تسابقني وانت يدك ملفوفه اخاف تطيح عليها و تروح مرةٍ وحده
ماجد : معليك مني قول انك خايف بس
نواف : اجل انا حذرتك خلني اشيل الاغراض و انظفها و بعدها نبدأ
اخذ نواف الاغراض و راح ينظفها و ماجد كان متركي على الشجره و كان يفكر انتبه له نواف و قعد يطش المويه على ماجد و نط ماجد من المويه اللي جته وراح اخذ من المويه وقعدوا يكبون على بعض بعدها خلص نواف تنظيف الاغراض وربط ثوبه على بطنه : يالله نبداء ؟
ماجد : اي بس تعال اربط ثوبي عشان اركض زين
ضحك نواف عليه : هذي بدايتها اربط ثوبي انا اقول مالها داعي خلها لين تطيب بعدين نتسابق وش مستعجل عليه
ماجد : قول انك خايف انا اعرف كيف اتوازن ترا اذا انسحبت انت الخسران
نواف : بكيفك انا حذرتك
ربط نواف ثوب ماجد و عدوا لين ثلاثه و نزلوا من الجبل ركض و رجولهم تتصافق في ظهورهم من قوة الركض ولا امداهم يمكلون الركض الا وطاح ماجد ما قدر يتوازن وقعد يتشقلب و نواف شافه ولا امداه يسحب فرامل الا وتعثر منه وطاح وتشقلبوا لين وصلوا تحت و كان نواف ماسك الاغراض معه عشان ما يرجع ياخذها و يوم طاح طاحت الاغراض و صقعتهم لين وصلوا انتبه نواف على ماجد وراح له ركض ولقى وجهه مدفون بالتراب و كان جسمه يرجف خاف نواف و قلبه على جنبه و ناظر فيه طلع ماجد قاعد يرجف من الضحك دفه نواف بيده : قسم بالله انك منت بصاحي بغيت تروح فيها
ماجد وهو يحاول يسكت نفسه و صوته متقطع من الضحك : بغيت تدعسني يا نواف برجولك بعدين انت خبل تركض من الجبل و الاغراض معك !!؟
نواف شافه يضحك عرف انه مافيه شيء و قعد يضحك على اشكالهم و ثوبهم اللي امتلى تراب : شسوي مالي خلق ارجع اخذها ليتني ما غسلتها امتلت تراب ( ناظر في شكل ماجد و كان وجه ماجد و عيونه تربان وقعد يضحك عليه ) تكفى شف شكلك كيف هذا اللي ما يسمع الكلام ياكل تراب زي كذا
ماجد : حبيبي شف شكلك انت بعدين تكلم
نواف : المهم يدك جاها شيء تبي نروح المستشفى نشوفها !؟
ماجد بضحك : طلعت تخاف علي لا تخاف ما طحت عليها امش بس خلنا نرجع قهر ما عرفنا من فاز
نواف : اعتبر انا اللي فزت لانك انت طحت و طيحتني معك
ماجد : اقول والله ما تعتبر حنا قلنا الفوز على اللي يوصل اول مو اللي اخر من يطيح محد فاز
نواف : امش امش الله يخلف علي ماقد قابلت واحد عاقل وانا كنت احسبك اعقل من نايف طلعت العن منه لك الجنه يا نايف طلعت كل هالوقت ظالمك
لموا الاغراض و رموها بحوض السيارة ركبوا ورجعوا لبيوتهم
____________•
دخل نواف للبيت وشاف اهله قاعدين بالحوش كلهم و توهم بيحطون العشا : مسهم بالخير
ام عبدالعزيز مسكت راسها من شكله : ياربي متهاوش مع من بعد انت ما تعقل ما تريح الاوادم ابد
حب فيصل انه يطقطق عليه : عاد من شكلك واضح انه اللي متهاوش معه مصفقك صفقوك الرياجيل يا رخمه 
الجد مقبل : نواف انت ما تخلي حركاتك ذي اشغلت عمرك و اشغلت الاوادم معك
نواف بطفش منهم : خلصتوا فيه احد بعد يبي يعلق انتي بعد ياجده اذا عندتس شيء قوليه لا تخلينها بخاطرتس عادي
الجده منيرة : خل الهذره الزايده و قول مع من متهاوش انا مستغربه لك يومين ما تهاوشت مع احد
نواف : ما تهاوشت مع احد نزلت من الجبل ركض ولا انتبهت لحصاه وتعثرت فيها و طحت بعدين ترى انا مسالم متى شفتوني اتهاوش صح كلامي يا ندى ولا لا ؟
ندى بتسليك له : اي صح انت ماخذ جائزة المسالمين في الدنيا
ام عبدالعزيز بعصبيه خفيفه : انطق ابلع
نواف : بروح اتروش و اجيكم لا تاكلون لين اجي تراني ميت جوع
راح نواف يتروش و طبعاً محد عطاه اهتمام و جلسوا ياكلون و يوم خلصوا شالوه و بعدها دخل الجد مقبل ينام و دخلت ام عبدالعزيز و الجده منيره داخل و بقى بس الاخوان بالحوش جالسين حول الضو جاهم نواف وهو يحسب انهم لسى ما اكلوا : يالله نادوهم و جيبوا العشا
فيصل و عود الاسنان بفمه : الحمدلله على النعمه اكلنا وخلصنا
نواف : كذاب ياربي انا ليه محد مهتم لي بهذا البيت لازم اتزوج بروح ادور لي وحده تهتم فيني طلع ماعندي خوات ولا ام
ريم : خل الدراما الزايده شلنا عشاك بحافظه روحي جيبيه يا نوف
نواف : والله اني اضيع بدونتس يا ريم جعلني ما عدمتس
جابت نوف العشا و فتحه وقعد ياكل : زين انكم كلكم متجمعين هنا انا بقول لكم شيء و اتمنى محد يقاطعني خصوصاً انت يا عزيز
عزيز : تكلم نسمعك
نواف : شوفوا يا حباني انا بتكلم على الموضوع اللي صار امس انا اشوف انه نعديه ولا نسأل امي بشيء لانكم كلكم شفتوا ردة فعلها احس لا نضغط عليها وهي بتجي تكلمنا و بتقول لنا كل شيء هو اكيد انه السالفة كبيره عشان كذا ماقالت لنا شيء فلازم نحسسها انه خلاص حنا مو طايشين و تقدر تعتمد علينا
عزيز : انا اتفق معك
نواف استغرب منه : انت اللي تتفق معي !؟
فيصل : الامور الحين بين امك و عزيز مثل العسل جاها اليوم و راضاها
نواف : يا الكلب من وراي وانا من اليوم انفجر مخي وانا احاول افكر كيف اصلح ما بينكم
ريم : في كلمه قالها نواف ودي اعلق عليها
نواف : علقي يا اختي الفاضله
ريم : انت تبي تقنع امي انه حنا مو طايشين احس مارح تقتنع وهي شايفه شكلك قبل شوي ما احس انها بتعتمد عليك
نواف : انا وش سويت الحصاه هي اللي طلعت بطريقي ولا انا كنت انزل من الجبل بهدوء
نوف : طيب انا ابي اقول شيء
نواف بصرامه : لو سمحتي اذا فيها سب لي احتفظي برأيتس
نوف : لا بقول شيء عن امي و ابوي الله يرحمه
عزيز باهتمام : وش قولي
نوف : يوم كنا صغار اذكر انه ابوي كان بيطلع مكان و انا جيت مسكته من يده وقال لامي شيء بعدين طلع وامي جلست تبكي وهذي اتوقع اخر مره شفت ابوي فيها
عزيز : ما تذكرين وش قال لها !!؟
نوف : لا ما اذكر اصلاً كذا اذكره كأنها مو حقيقه كأنها خيالات
نواف : لا اجل الموضوع كايد دام امي جلست تبكي بعد مارح طلع صادق يوم قال انه الموضوع مسبب لها صدمه
فيصل : من اللي قاله !؟
نواف انتبه انه كان يقصد ماجد بكلامه : اء مخي مخي اتكلم معه و افكر فيه وكنت افكر انه الموضوع مسبب لامي صدمه خلاص اجل اكيد انه الموضوع كبير لازم ما نشد على امي وهي بتجي تقول لنا و يالله قوموا ناموا سرى الليل
فيصل : مستلم المهمه عن جدي اليوم
نواف : اي يالله انتم دخلوا الاغراض وانا بروح ارقد في السطح مشتهي نومته
عزيز : مريض انت توك متروش و بتروح تنام لي في السطح
ريم : صادق عزيز راسك خضر وبتنام بالسطح صدق انك مريض
نواف : معليكم مارح يصير شيء يالله تصبحون على خير
راح نواف اخذ فراشه و حطه في السطح و اخذوا البنات الاغراض و دخلوها و العيال راحوا ينامون
.
.
( انتهى )
بارت خفيف اتمنى انه نال اعجابكم 💕
اكتبوا لي اراءكم حول البارت بالكومنت 🫶🏻
بالنسبه للبارت القادم احتمال ينزل الجمعة او السبت القادم عشان عرفة و عيد الاضحى ولا تنسوني من دعاءكم بهذا اليوم الفضيل 💕
#حكمٍ_طغى_ماعاد_ينفع_نظامه