ရင်မှာအရင်တိုင်း

အပိုင်း ၁၇

Unicode

+

မျက်နှာချင်းဆိုင်ထိုင်ပြီး တစ်ယောက်နဲ့တစ်ယောက်အကြည့်မလွှဲနိုင်ဖြစ်နေကြတဲ့သူတို့နှစ်ယောက်....။

+

ချစ်လွန်းလို့ အကြည်စိုက်နေကြတာမဟုတ်ပဲ တစ်ယောက်ကိုတစ်ယောက်မကျေမနပ်ဖြစ်ကာ ဘယ်သူကမှအလျော့မပေးနိုင်ဆိုတဲ့ပုံမျိုးနဲ့ ကြည့်နေကြခြင်းသာ။

+

လူတစ်ယောက်ရဲ့ အကျင့်စရိုက်နဲ့ဗီဇကပဲကြာကြာဖုံးကွယ်ထားလို့မရတာလား ဒါမှမဟုတ် မွှန်နေတဲ့အချိန်မို့လို့ ချစ်တာတစ်ခုပဲသိတယ်ဖြစ်နေခဲ့တာလား။ သေချာပေါက်နောက်ကတစ်ခုပဲပေါ့... မွှန်နေတာ မွှန်နေလို့ဘာမှမမြင်ခဲ့တာပဲဖြစ်ရမည်။ ရည်းစားမဖြစ်ခင်ကတည်းက ကိုကိုက ဘာကိုပဲလုပ်လုပ်စနစ်တကျနဲ့အကောင်းဆုံးလုပ်တတ်တဲ့သူ တစ်ခုခုဆိုသွေးအေးအေးနဲ့ ဆုံးဖြတ်တတ်တဲ့ အေးဆေးသမား၊ ဖူးငုံကအရာရာမှာ လျှပ်ပြာလျှပ်ပြာနဲ့ ပြဿနာဖြစ်လာရင်မစဉ်းစားပဲ ခုလက်ရှိစိတ်ထဲပေါ်လာတဲ့အတိုင်း လျှောက်လုပ်ပစ်တတ်တဲ့ ပူပူလောင်လောင်သမား။ အဲ့တာတွေကို ရင်းနှီးစကတည်းကသိနေခဲ့တာပဲ။ကွာခြားချက်တွေအများကြီးထဲကမှ အကွာခြားဆုံးအချက်ကိုပြောပါဆိုရင် ကိုကိုကအသက်ထက်အများကြီးပိုရင့်ကျက်တဲ့သူဖြစ်ပြီး ဖူးငုံကတော့အရွယ်နဲ့မလိုက်အောင် ကလေးဆန်လွန်းတာဖြစ်သည်။ဒါကြောင့် တကယ်တမ်း ဖူးငုံတို့ရဲ့အသက်အရွယ်ကွာခြားချက်က ၃နှစ်ပဲရှိတာဆိုပေမယ့် မသိရင် ၁၀နှစ်လောက်ကွာတယ်ထင်ရသည်။

+

ဖူးငုံတို့နှစ်ယောက်ရဲ့ တူညီတဲ့စရိုက်ဆိုလို့ နှစ်ယောက်လုံးက ကိုယ်မှန်တယ်ထင်ရင် သိပ်အလျော့မပေးချင်ကြတာဖြစ်ပြီး အမြဲတမ်းလည်းကိုယ်ပဲမှန်တယ်ထင်နေတာသာဖြစ်သည်။

+

"အဲ့တော့ခုက ပူကြူးမှားတာလား ကိုကိုမှားတာလား"

+

​အတော်ကြာမှပဲ ကိုကိုကသက်ပြင်းချလိုက်ပြီးစကားစပြောလာသည်။ ကိုကိုပြောတာကိုကြားပေမယ့်လည်း မကြားချင်ယောင်ဆောင်ပြီး အကြည့်လွှဲလိုက်ကာ ဟိုဟိုဒီဒီလျှောက်ကြည့်နေလိုက်သည်။
မှားတာကတော့ဖူးငုံပေါ့... ဒါပေမယ့်ဝန်မခံပါဘူး ဝန်ခံလိုက်ရင် နဂိုတည်းကဆရာကြီးလုပ်ချင်တဲ့သူက ဆုံးမစာတစ်သီတစ်တန်းကြီးနဲ့ပြောတော့မှာ။

+

"အဲ့လိုမျိုး ဘာမဟုတ်တာလေးကိုစိတ်ကောက်ပြီး အကုန်လျှောက်block ပစ်တာတွေမလုပ်ရဘူးလို့ကိုကိုပြောထားတယ်လေ"

+

"ကိုကိုကဘာလို့ဖူးငုံကိုစိတ်ဆိုးအောင်လုပ်လဲ"

+

"ကိုကိုဘာလုပ်လို့လဲ"

+

"ကိုကိုဘာလုပ်လဲ ကိုကိုသိပေါ့"

+

မျက်စောင်းထိုးကာအော်ပစ်လိုက်တော့ သူ့ကိုအော်ပြောရင်မကြိုက်တဲ့ ကိုကိုကဒေါသထွက်နေတဲ့မျက်နှာနဲ့ဖူးငုံကိုကြည့်လာသည်​။ စိတ်ထဲအနည်းငယ်ထိတ်လန့်သွားပေမယ့်လည်း အလျော့မပေးချင်တာကြောင့် မျက်နှာကိုတင်းထားလိုက်သည်။

+

​ဟုတ်တယ်... ခုနအတွေးကိုပြန်ပြင်မယ် ဖူးငုံပဲမှားတာမဟုတ်ဘူး ကိုကိုလည်းမှားတယ် ကိုကိုအရင်မှားလို့ဖူးငုံမှားတာ... အဲ့တာကိုသူ့အပြစ်ကိုကျမပြောပဲဖူးငုံအပြစ်လာပြောနေတာ။

+

ပြဿနာရဲ့အစက fbကလို့ပြောရမည်ထင်။ ဖူးငုံက fb မှာပုံလေးတွေတင်တာ ကိုကိုနဲ့ပတ်သက်တဲ့ ကိုကို့ကိုပြောချင်တဲ့စာလေးတွေကို shareတဲ့အခါ mentionတဲ့အခါတွေမှာ ကိုကိုနဲ့ cmt အပြန်အလှန်ပေးချင်သည်။ ကိုကိုကအဲ့တာတွေကိုအပိုအလုပ်တွေလို့ထင်နေတာဖြစ်ပြီး fb ကိုတောင်စိတ်ကူးပေါက်မှကြည့်တတ်တဲ့သူဖြစ်သည်။

+

မနေ့က ကိုကိိုနဲ့ လျှောက်လည်ရင်း ကော်ဖီဆိုင်မှာကိုကိုရိုက်ပေးတဲ့ပုံလေးကို ညရောက်တော့fbမှာတင်လိုက်သည်။ ဖူးငုံ အရမ်းသဘောကျတဲ့ပုံလေးဖြစ်လို့ ပုံတင်ပြီးတော့ 'ကိုကိုcmtပေးနော်' ဆိုပြီးဖုန်းဆက်ပြောထားရဲ့သားနဲ့လာမပေး။ အဲ့တာအထိဖူးငုံစိတ်မဆိုးသေး။ ခါတိုင်းလည်း ဖူးငုံ ၁၀ခါတင်မှ ၃ခါလောက်ပဲကိုကိုက cmt ပေးတာဖြစ်ပြီးကျန်တဲ့ ၇ခါကဖူးငုံဘာသာဝင်ရေးတာဖြစ်သည်။ တစ်ခါတစ်လေဆို ကိုကို့အကောင့်နဲ့ caption လှလှလေးရေးပြီး ကိုကိုကပဲအရမ်း ro တတ်တဲ့ကောင်လေးအနေနဲ့တင်တာမျိုးတွေလည်းရှိသည်။ အကောင့်နှစ်ခုနဲ့ ကိုယ့်ဘာသာရေးလိုက် reply ပြန်လိုက်လုပ်နေတဲ့ဖူးငုံကို ကိုကိုက 'ရူးလိုက်တာ' လို့မှတ်ချက်ပေးရုံကလွဲပြီး ဘာမှဝင်မပြော။ စိတ်ချမ်းသာသလိုလုပ်ဆိုပြီးသာ သူ့ psw ကိုပေးထားတာဖြစ်သည်။

+